Leksyon 98: Mga Buhat 27–28

Leksyon 98

Mga Buhat 27–28

Pasiuna

Samtang nagbiyahe ngadto sa Roma isip usa ka binilanggo, napadpad ang sakayan ni Pablo sa usa ka isla. Diha sa isla, gipaak siya og bitin apan nagpabiling wala maunsa, ug giayo niya ang daghan kinsa nangasakit. Sa katapusan si Pablo gidala ngadto sa Roma, diin gi-house arrest siya sulod sa duha ka tuig ug nagtudlo ug nagpamatuod ni Jesukristo.

Mga Sugyot alang sa Pagtudlo

Mga Buhat 27

Nalunod ang sakayan ni Pablo samtang siya nagbiyahe ngadto sa Roma

Sa wala pa ang klase isulat ang mosunod nga mga pamahayag diha sa pisara. (Kini nga mga pamahayag makaplagan diha sa Alang sa Kalig-on sa mga Kabatan-onan [booklet, 2011], 4, 11, 16.)

“Paglikay kanunay og mga date sa parehong tawo.”

“Ayaw pagtambong, pagtan-aw, o pag-apil sa bisan unsa nga bulgar, imoral, mapintas, o bisan unsa nga pornograpiya.”

“Kon ang imong mga higala mopugos kanimo sa pagbuhat og mga butang nga sayop, ikaw ang mobarug alang sa matarung, bisan kon ikaw nagbarug nga nag-inusara.”

Dapita ang usa ka estudyante sa pagbasa og kusog sa mga pamahayag nga nasulat diha sa pisara.

Ngano kaha nga ang pipila sa mga kabatan-onan mopili sa dili pagpatalinghug niining mga pamahayag sa pagpahimangno ug pagtambag?

Dapita ang mga estudyante sa pagpangita og mga kamatuoran samtang sila nagtuon sa Mga Buhat 27 nga motabang sa paglig-on sa ilang pagtuo nga mopatalinghug sa mga pahimangno ug pagtambag sa mga sulugoon sa Ginoo.

Pahinumdumi ang mga estudyante nga si Pablo gipasanginlan nga nagbudhi ug gibilanggo. Giapilar ni Pablo ang iyang kaso ngadto ni Cesar sa Roma, nga iyang katungod isip usa ka tagilungsod nga Romano. I-summarize ang Mga Buhat 27:1–8 pinaagi sa pagpasabut nga si Pablo mibiyahe kauban ang ubang mga binilanggo pinaagi sa sakayan padulong sa Roma, ubos sa pagbantay sa usa ka centurion nga Romano (usa ka Romanong opisyal sa militar kinsa nagmando og 50 ngadto sa 100 ka mga lalaki). Human maglawig sa daghang mga adlaw, mihunong sila sa usa ka dunggoanan sa isla sa Crete. Sa ilang pagbiya sa dunggoanan, mipahimangno si Pablo niadtong diha sa sakayan nga kinahanglan dili sila mopadayon sa ilang panaw.

Dapita ang usa ka estudyante sa pagbasa og kusog sa Mga Buhat 27:9–10. Hangyoa ang klase sa pagsunod, mangita sa unsay nahibaloan ni Pablo nga mahitabo kon siya ug ang uban diha sa sakayan mopadayon sa ilang panaw ngadto sa Roma. Mahimong imong ipasabut nga ang pulong puasa sa kinatibuk-ang kahulugan niini nagpasabut sa boluntaryong paglikay gikan sa pagkaon. Niini nga sitwasyon “ang puasa” tingali nagpasabut ngadto sa balaang adlaw sa Judeo nga gitawag og adlaw sa Pag-ula, nga nagmarka sa sinugdanan sa panahon nga sa kinatibuk-an gitan-aw nga peligro sa pagbiyahe sa Dagat Mediterania tungod sa mapintas nga mga bagyo.

Sumala sa bersikulo 10, unsa nga pahimangno ug panagna ang gihatag ni Pablo mahitungod sa unsay mahitabo kon sila mopadayon sa ilang panaw?

Dapita ang usa ka estudyante sa pagbasa og kusog sa Mga Buhat 27:11–12. Hangyoa ang klase sa pagsunod, mangita alang sa giunsa sa centurion nga Romano ug sa uban nga diha sa sakayan pagtubag ngadto sa pahimangno ni Pablo.

Imbis mopatalinghug sa pahimangno ni Pablo, kinsa hinoon ang gisaligan sa centurion?
Ngano sa imong hunahuna mas masayon tingali alang sa centurion ang pagtuo sa tag-iya sa sakayan kay ni Pablo?
Sumala sa bersikulo 12, ngano nga kadaghanan sa mga tawo diha sa sakayan mibaliwala sa pahimangno ni Pablo? (Ipasabut nga ang pulong dunggoanan nagpasabut og usa ka landiganan ug ang pundohanan nagpasabut og hamugaway o hayahay.)

Dapita ang pipila ka mga estudyante sa pagpuli-pulig basa og kusog gikan sa Mga Buhat 27:13–21. Hangyoa ang klase sa pagsunod, mangita sa unsay nahitabo samtang mipadayon ang sakayan paingon sa Roma.

Unsa ang nahitabo samtang ang sakayan mipadayon padulong ngadto sa Roma?
Human makita nga “mihuros ang mahinay nga habagat” (bersikulo 13), unsa kaha ang nahunahuna sa mga tawo diha sa sakayan mahitungod ni Pablo ug sa pahimangno nga iyang gihatag?
Sumala sa bersikulo 20, unsa ang mga pagbati niadtong diha sa sakayan sa panahon sa bagyo?
Ingon nga gipakita sa pamahayag ni Pablo nga girekord diha sa bersikulo 21, unsa nga baruganan ang atong makat-unan mahitungod sa unsay mahitabo kon atong ibaliwala ang mga pahimangno ug tambag sa mga sulugoon sa Ginoo? (Ang mga estudyante mahimong mogamit og lain-laing mga pulong, apan kinahanglan nga ilang mailhan ang mosunod nga baruganan: Kon atong ibal-wala ang mga pahimangno ug tambag sa mga sulugoon sa Ginoo, niana nagbutang kita sa atong mga kaugalingon sa kuyaw. Isulat kini nga baruganan diha sa pisara. Ipasabut nga ang kuyaw mahimong molakip sa pagkawagtang sa mga panalangin nga mahimo unta nga atong madawat.)

Ribyuha uban sa mga estudyante ang mga katarungan nga ang centurion ug ang ubang mga tawo diha sa sakayan mibale-wala sa pahimangno ug tambag ni Pablo (tan-awa sa Mga Buhat 27:11–12).

Sa unsa nga paagi kaha ang mga tawo karon naghimo og susama nga mga pamalibad sa pagbale-wala sa mga pahimangno ug tambag sa mga sulugoon sa Ginoo?

Gamit ang Alang sa Kalig-on sa Kabatan-onan o sa bag-ohay nga mga pakigpulong sa komperensya, paghatag og dugang nga mga ehemplo sa mga pahimangno sa mga propeta nga imong gihunahuna nga angay ngadto sa mga estudyante.

Unsa kahang mga peligro ang gibutang sa mga tawo sa ilang mga kaugalingon sa pagbale-wala sa maong mga pahimangno ug tambag gikan sa mga propeta?

Dapita ang usa ka estudyante sa pagbasa og kusog sa Mga Buhat 27:22–26. Hangyoa ang klase sa pagsunod, mangita sa unsay gisulti ni Pablo sa mga tawo diha sa sakayan.

Kon ikaw diha pa sa sakayan taliwala sa kakusog sa bagyo, unsa nga mga pulong gikan ni Pablo ang mohupay kanimo?
Unsa ang gipanagna ni Pablo nga mahitabo ngadto sa mga tawo ug sa sakayan?

I-summarize ang Mga Buhat 27:27–30 pinaagi sa pagpasabut nga sa ika-14 nga gabii sa bagyo, ang mga tripulante mohulog og upat ka mga angkla ngadto sa dagat sa pagpugong sa sakayan gikan sa pagkabangga ngadto sa dagkong mga bato. Ang mga tripulante miadto sa atubangan sa sakayan ug milihok ingon og hapit na mohulog pa og mga angkla. Bisan niana, sa tinuod nagplano sila sa pagbiya sa sakayan ug molayas pinaagi sa usa ka gamay nga sakayan tungod kay nahadlok sila nga ang sakayan malunod.

Dapita ang usa ka estudyante sa pagbasa og kusog sa Mga Buhat 27:31–32. Hangyoa ang klase sa pagsunod, mangita sa pahimangno nga gihatag ni Pablo sa centurion ug sa mga sundalo. Ipasabut nga ang pulong mga diha sa bersikulo 31 nagpasabut ngadto sa mga sakop sa tripulante kinsa misulay sa paglayas.

Unsa nga pahimangno ang gihatag ni Pablo sa centurion ug sa mga sundalo?
Giunsa sa mga sundalo pagtubag ngadto sa pahimangno ug tambag ni Pablo? (Mipatalinghug sila sa iyang pahimangno ug gipugngan ang mga tripulante gikan sa pag-eskapo pinaagi sa pagputol sa mga pisi sa gamay nga sakayan ug pagtugot niini nga maanod palayo nga walay sulod.)

Ipasabut nga sa pagkasunod buntag mihangyo si Pablo sa mga tripulante, kinsa nagpuasa, sa pagkaon (tan-awa sa Mga Buhat 27:33–34). Gipasaligan niya sila pag-usab nga walay usa kanila nga mamatay.

Pagdapit og estudyante sa pagbasa og kusog sa Mga Buhat 27:35–36. Hangyoa ang klase sa pagsunod.

Giunsa sa mga tripulante pagtubag ngadto sa tambag ni Pablo?

I-summarize ang Mga Buhat 27:37–41 pinaagi sa pagpasabut nga ang sakayan nabangga samtang kini naglayag ngadto sa isla sa Malta. Dapita ang mga estudyante sa pagbasa sa Mga Buhat 27:42–44 sa hilum, mangita sa unsay nahitabo sa mga tawo diha sa sakayan.

Unsa ang nahitabo ngadto sa mga tawo diha sa sakayan?

Pahinumdumi ang mga estudyante kalabut sa panagna ni Pablo nga girekord diha sa Mga Buhat 27:22–26 nga walay usa nga mamatay bisan og ang sakayan mawala.

Unsa nga mga baruganan ang atong makat-unan gikan niini nga istorya mahitungod sa unsay mahitabo kon atong patalinghugan ang tambag ug mga pahimangno sa mga sulugoon sa Ginoo? (Ang mga estudyante mahimo nga moila og mga baruganan nga ingon sa mosunod: Kon atong patalinghugan ang tambag ug mga pahimangno sa mga sulugoon sa Ginoo, niana ang Ginoo motuman sa Iyang mga saad ngari kanato. Kon atong patalinghugan ang tambag ug mga pahimangno sa mga sulugoon sa Ginoo, niana kita makasagubang sa mga kuyaw nga naghulga kanato. Isulat kini nga mga baruganan diha sa pisara.)

Aron pagtabang sa mga estudyante sa pagsabut sa mga baruganan nga ilang giila diha sa Mga Buhat 27, dapita ang usa ka estudyante sa pagbasa og kusog sa mosunod nga pamahayag ni Presidente Henry B. Eyring sa Unang Kapangulohan:

“Matag panahon sa akong kinabuhi kon akong gipili ang paglangay og sunod sa dinasig nga tambag o paghukom nga ako walay labut, ako nahibalo nga nagbutang sa akong kaugalingon sa makadaot nga paagi. Sa matag higayon nga akong gipaminaw ang tambag sa mga propeta, gibati nga gilig-on kini sa pag-ampo, ug dayon gisunod kini, akong nakita nga ako nagpadulong ngadto sa kahilwasan” (“Finding Safety in Counsel,” Ensign, Mayo 1997, 25).

Sa unsa nga paagi nga ang pagpatalinghug sa mga pahimangno ug dinasig nga tambag sa mga sulugoon sa Ginoo mitabang kanimo sa pagsagubang sa mga kuyaw nga naghulga sa imong espiritwal ug pisikal nga kahilwasan? (Pahinumdumi ang mga estudyante nga sila makatuon sa tambag sa mga propeta karong panahona diha sa mga magasin sa Simbahan ingon man usab diha sa Alang sa Kalig-on sa Kabatan-onan.)

Dapita ang mga estudyante sa pagkonsiderar kon ila bang gibale-wala ang bisan unsa nga mga pahimangno o tambag gikan sa mga sulugoon sa Ginoo o sa paghunahuna mahitungod sa mga paagi nga sila mas maayo nga makapatalinghug sa mga pahimangno ug tambag nga ilang nadawat. Dapita ang mga estudyante sa pagsulat og tumong kalabut sa kon sa unsa nga paagi sila mohatag og mas maayong pagpatalinghug niana nga tambag.

Mga Buhat 28

Gidala si Pablo ngadto sa Roma, diin nagtudlo ug nagpamatuod siya ni Jesukristo

Ipakita sa mga estudyante ang usa ka hulagway sa buhawi o alimpulos (o pag-drawing diha sa pisara).

Ipasabut nga si Elder Neil L. Andersen sa Korum sa Napulog Duha ka mga Apostoles mipasabut nga ang mga hagit ug mga pagsulay sa kinabuhi ingon og mga “espiritwal nga alimpulos” (tan-awa sa “Espiritwal nga mga Alimpulos,” Ensign or Liahona, Mayo 2014, 18–21).

Unsa ang pipila ka mga ehemplo sa mga pagsulay og mga kalisud nga mahimong ipakigsama ngadto sa alimpulos?

Dapita ang mga estudyante sa pagpangita og baruganan samtang sila magtuon sa Mga Buhat 28 nga makatabang kanila nga matinud-anong makalahutay sa “espiritwal nga mga alimpulos” nga ilang giatubang.

Ipasabut nga diha sa Mga Buhat 28 atong mabasa ang mahitungod sa mga kasinatian ni Pablo diha sa isla, ang iyang gipadayon nga pagpanaw ngadto sa Roma, ug ang iyang pagkabilanggo sa Roma.

Bahina ang klase ngadto sa tulo o mas daghan pa nga mga grupo, nag-agad sa gidak-on sa imong klase. I-assign ang matag grupo og usa sa mosunod nga mga scripture block: Mga Buhat 28:1–6; Mga Buhat 28:7–14; ug Mga Buhat 28:16–24, naghatag sa samang block ngadto sa nagkalain-laing mga grupo ingon nga gikinahanglan. Dapita ang matag grupo sa pagtuon sa ilang gi-assign nga scripture block ug dayon buhata ang mosunod (isulat kini nga mga panudlo diha sa pisara):

Pagdrowing og hulagway o pagsulat og ulohan sa balita nga nag-summarize sa mga panghitabo nga gihulagway sa inyong scripture block.
Ipakita sa klase ang inyong hulagway o basaha ang imong ulohan sa balita, ug i-summarize ang mga panghitabo nga gihulagway sa inyong scripture block.

Human sa igong panahon, dapita ang matag grupo sa pagreport ngadto sa klase. (Kon adunay sobra sa tulo ka grupo, dapita ang mga grupo nga may gibalik-balik nga mga scripture block nga ipakigbahin ang hulagway o ulohan ug uban pang panabut nga ilang nakuha gikan sa ilang pagbasa sa ilang gi-assign nga mga bersikulo.)

Unsa nga mga pagsulay ang nasinati ni Pablo sa iyang pagpanaw ug pagpuyo sa Roma?

Dapita ang usa ka estudyante sa pagbasa og kusog sa Mga Buhat 28:30–31. Hangyoa ang klase sa pagsunod, mangita sa unsay nahimo ni Pablo didto sa Roma bisan pa og siya gi-house arrest. Hangyoa ang mga estudyante sa pagreport unsay ilang nakit-an.

Unsay gibuhat ni Pablo nga nagpakita nga siya nagpabiling matinud-anon ngadto sa Dios bisan pa sa mga pagsulay nga iyang nasinati?
Unsay kaayohan nga miabut gikan sa mga pagsulay nga nasinati ni Pablo samtang diha sa dagat, samtang nalunod, ug samtang nabilanggo sa Roma? (Human motubag ang mga estudyante, isulat ang mosunod nga baruganan diha sa pisara: Kon kita matinud-anon, ang Dios makatabang kanato sa paghimo sa mga pagsulay ngadto sa mga panalangin alang sa atong mga kaugalingon ug sa uban.)
Unsa ang mga ehemplo sa mga paagi nga ang Dios makatabang sa mga tawo sa paghimo sa mga pagsulay ngadto sa mga panalangin alang sa ilang mga kaugalingon ug sa uban?

Kanus-a ang Dios mitabang kanimo o sa usa ka tawo nga imong nailhan nga gihimo ang pagsulay ngadto sa usa ka panalangin alang sa imong kaugalingon o alang sa uban? (Ikonsiderar ang pagpakigbahin og ehemplo nga imong kaugalingon.)

Awhaga ang mga estudyante sa pagsunod sa ehemplo ni Pablo ug sa pagpili nga magpabiling matinud-anon kon sila magsinati og mga pagsulay aron ang Dios makatabang kanila sa paghimo niadto nga mga pagsulay ngadto sa mga panalangin alang sa ilang mga kaugalingon ug sa uban.

Komentaryo ug Background nga Impormasyon

Mga Buhat 28:17–31. Gisangyaw ni Pablo ang ebanghelyo sa Roma

“Kutob sa atong nahibaloan, si Pablo mao ang unang misyonaryo nga nagsangyaw sa ebanghelyo sa Roma. Sama sa iyang gibuhat sa ubang mga siyudad, misangyaw og una si Pablo ngadto sa mga Judeo, ang pipila kinsa mituo kaniya, ug dayon gihatag ang iyang pagtagad ngadto ‘sa tanang nangadto kaniya’ (Mga Buhat 28:30), kadaghanan kinsa maingon og mga Hentil. Samtang diha sa pagka-house arrest, gisulat ni Pablo ang unsay gitawag sa uban og iyang ‘mga sinulat sa bilanggoan’—Mga Taga-Colosas, Mga Taga-Efeso, Filemon, ug Mga Taga-Filipos. Human sa duha ka tuig nga pagka-house arrest sa Roma, kini gituohan nga si Pablo gitaral ug gibuhian ug nga siya human niana nangalagad sa Asia, Gresya, ug tingali sa Espanya sa wala pa mabilanggo pag-usab sa Roma. Sumala sa tradisyon, gipatay siya sa panahon sa mga pagpanggukod ubos ni Nero sa mga tali sa A.D. 64 ug 68. Nagpasumbingay si Pablo sa iyang umaabut nga kamatayon diha sa 2 Timoteo 4:6–8” (New Testament Student Manual [manwal sa Church Educational System, 2014, 330).

Mga Buhat 28. Kon kita matinud-anon, ang Dios makatabang kanato sa paghimo sa mga pagsulay ngadto sa mga panalangin alang sa atong mga kaugalingon ug sa uban

Gitudlo ni Presidente John Taylor nga samtang magpabilin kitang matinud-anon ug masulundon ngadto sa Ginoo, ang atong mga pagsulay mahimo nga alang sa atong kaayohan ug panalangin:

“Wala ba nimo makita ang panginahanglan niini nga mga pagsulay ug mga kasakit ug mga talan-awon nga atong kinahanglan nga agian? Ang Ginoo mao ang nagbutang kanato niining kahimtang nga mga labing gikalkulo aron sa pagpalambo sa labing maayo nga kaayohan sa iyang katawhan. Ang akong opinyon mao, gawas niining mga butanga nga sa karon naglibut kanato ingon nga makadaot kanato ug sa gingharian sa Dios, kini maghatag og usa sa labing kusog nga pagsapnay [o pagtuboy] nga sukad wala pa mahimo, ug ang tanan maayo ug mamaayo kon kita mosunod sa mga sugo sa Dios. Busa, unsa nga kahimtang, nga atong kinahanglan nga okupahon—matag lalaki, babaye ug bata? Buhaton ang atong katungdanan sa atubangan sa Dios, tahuron siya, ug ang tanan mamaayo. Ug kalabut sa mga panghitabo nga mahitabo pa, kinahanglan gayud nga atong isalig kini diha sa mga kamot sa Dios ug motuo nga bisan unsa kini, kini maayo, ug nga ang Dios mokontrolar sa tanang mga butang alang sa atong labing kaayohan ug kaayohan sa simbahan ug gingharian dinhi sa yuta” (Mga Pagtulun-an sa mga Presidente sa Simbahan: John Taylor [2011], 253–254).