Leksyon 120

Mga Taga Efeso 1

Pasiuna

Misulat si Pablo ngadto sa mga Santos sa Efeso mahitungod sa ilang pagka-orden nang daan nga makadawat sa ebanghelyo. Gisulat niya ang mahitungod sa katapusang dispensasyon, o ang dispensasyon diin kita karon nagpuyo. Gitudlo ni Pablo nga makaila kita sa Langitnong Amahan ug ni Jesukristo pinaagi sa pagpadayag.

Mga Sugyot alang sa Pagtudlo

Mga Taga-Efeso 1:1–8

Gitudloan ni Pablo ang mga Santos nga sila gi-orden nang daan nga makadawat sa ebanghelyo

Dapita ang mga estudyante sa paghunahuna og usa ka panahon dihang miuyon sila nga modawat og usa ka importanting responsibilidad ug gisaaran nga gantihan sila sa pagtuman niini nga tahas.

• Kon magkalisud na ang pagbuhat sa tahas, sa unsang paagi kamo masuportahan pinaagi sa kahibalo nga miuyon kamo niini nga buluhaton ug nga adunay tawo nga misalig ninyo nga matuman kini?

• Sa unsang paagi kamo napanalanginan o nagantihan gumikan sa pagtuman sa inyong responsibilidad?

Ipasabut nga sa iyang sulat nga narekord sa Mga Taga-Efeso 1–6, namulong si Apostol Pablo ngadto sa mga Santos sa Efeso ug sa naglibut nga mga dapit. Ang iyang tumong mao ang paglig-on niadtong mga daan nang miyembro sa Simbahan ug pagtabang sa bag-ong mga kinabig aron molambo ang ilang espirituhanong kahibalo ug magpabiling matinud-anon sa ilang mga pakigsaad.

Dapita ang pipila ka mga estudyante nga magpuli-puli sa pagbasa og kusog sa Mga Taga-Efeso 1:3–8. Hangyoa ang klase sa pagsunod, nga mangita sa mga kamatuoran nga gitudlo ni Pablo sa mga Santos aron magpabilin silang matinud-anon sa ilang mga pakigsaad.

• Unsa nga mga kamatuoran ang gitudlo ni Pablo sa mga Santos aron magpabilin silang matinud-anon? (Samtang motubag ang mga estudyante, mahimo nimo silang dapiton nga ipasabut sa unsang paagi ang pagkasabut sa mga kamatuoran nga ilang gihisgutan nakatabang unta sa mga Santos nga magpabiling matinud-anon.)

• Sa inyong hunahuna unsay ipasabut diha sa bersikulo 4 nga ang Dios mipili og pipila “sa wala pa matukod ang kalibutan”?

Ipasabut nga kini nga mga pulong, agig suporta sa pulong nga gipili na daan ug ang mga pulong nga “mahimong iyang mga anak nga sinagop pinaagi kang Jesukristo” sa bersikulo 5, nagpasabut niadtong gi-orden nang daan sa kinabuhi sa wala pa dinhi sa yuta nga dapit aron makadawat sa ebanghelyo. Isulat sa pisara ang mosunod nga kamatuoran: Ang mga anak sa Dios gi-orden nang daan aron makadawat sa mga panalangin sa ebanghelyo. Ang pagkadawat niini nga mga panalangin mag-agad sa atong kamatinud-anon niining kinabuhia.

Aron matabangan ang mga estudyante nga makasabut niini nga kamatuoran, dapita ang usa ka estudyante sa pagbasa og kusog sa mosunod nga pamahayag:

“Sa kinabuhi sa wala pa dinhi sa kalibutan sa mga espiritu, ang Dios mipili og piho nga mga espiritu nga motuman sa piho nga mga misyon atol sa ilang mortal nga pagpakabuhi. Gitawag kini og pag-orden daan.

“Ang pag-orden daan dili garantiya nga ang mga indibidwal makadawat sa piho nga mga calling o responsibilidad. Ang ingon nga mga oportunidad moabut niining kinabuhia isip sangputanan sa matarung nga paggamit sa kabubut-on, sama nga ang pag-orden daan miabut gumikan sa pagkamatarung didto pa sa kinabuhi sa wala pa dinhi sa yuta. …

“Ang doktrina sa pag-orden daan magamit sa tanang miyembro sa Simbahan, dili lang sa Manluluwas ug sa Iyang mga propeta. Sa wala pa ang katukuran sa kalibutan, ang matinud-anong mga babaye gihatagan og pihong mga responsibilidad ug ang matinud-anong mga lalaki gi-orden nang daan ngadto sa piho nga mga katungdanan sa priesthood. Bisan og dili ninyo mahinumduman kadtong panahona, sigurado nga miuyon mo nga tumanon ang makahuluganong mga tahas sa pagserbisyo sa inyong Amahan. Samtang magpakita ka sa imong kaugalingon nga takus, hatagan ka og mga oportunidad sa pagtuman sa mga buluhaton nga nianang higayuna imong nadawat” (Matinud-anon sa Tinuohan: Usa ka Pakisayran sa Ebanghelyo [2004], 138).

• Sa unsang paagi ang pagsabut nga kita gi-orden nang daan nga makadawat sa ebanghelyo ug sa daghang panalangin niini makatabang nato nga magpabiling matinud-anon sa atong mga pakigsaad?

Mga Taga-Efeso 1:9–12

Si Pablo namulong sa dispensasyon [kapaigoan] sa kahingpitan sa mga panahon

Pagdrowing og simple nga litrato sa pipila ka lahi-lahi nga sapa nga nag-agos padulong sa dakong lanaw sa tubig. Hangyoa ang mga estudyante sa paghunahuna nga ang matag sapa nagrepresentar og usa ka dispensasyon sa ebanghelyo.

• Unsa man kining dispensasyon sa ebanghelyo?

Tabangi ang mga estudyante nga makasabut sa Nag-unang mga Doktrina

Makat-unan sa mga estudyante ang Nag-unang mga Doktrina samtang tun-an nila ug hisgutan ang mga kasulatan ug samtang magsag-ulo sila sa mahinungdanong mga tudling sa kasulatan. Kinahanglang dili ka motipas gikan sa sunod-sunod [sequential] nga pagtuon sa kasulatan aron matutukan ang Nag-unang mga Doktrina. Kondili, kinahanglang hatagan nimo sa pagtagad kana nga mga doktrina kon moabut na kini sa kinatibuk-ang kahulugan sa kasulatan. Sama pananglit, diha sa leksyon mahimo nimong mahatagan og importansya ang doktrina bahin sa mga dispensasyon sa ebanghelyo nga may kalabutan sa unsay gitudlo diha sa Mga Taga-Efeso 1.

Mahimo nimong ribyuhon ang depinisyon sa dispensasyon [kapaigoan] sa ebanghelyo pinaagi sa pagdapit og usa ka estudyante nga mobasa og kusog sa mosunod nga pamahayag gikan sa Giya ngadto sa mga Kasulatan:

“Ang usa ka dispensasyon [kapaigoan] sa ebanghelyo mao ang usa ka yugto sa panahon diin ang Ginoo adunay usa ka sulugoon nga gitugyanan dinhi sa yuta nga naghupot sa mga yawe sa balaan nga pagkapari, ug kinsa dunay balaang pagtugot sa pagsangyaw sa ebanghelyo ngadto sa mga lumulupyo sa yuta. Kon mahitabo man kini, ang ebanghelyo ipadayag pag-usab, aron ang mga tawo niana nga dispensasyon [kapaigoan] dili magsalig sa nangagi nga mga dispensasyon alang sa kasayuran sa laraw sa kaluwasan. Duna nay daghang dispensasyon sa ebanghelyo sukad sa sinugdanan. Ang Biblia nagsugyot nga pinakaminus usa ka nailhan nga dispensasyon sa kang Adan, ang lain kang Enoch, ang lain kang Noe, ug uban pa kang Abraham, Moises, ug ni Jesus uban sa Iyang mga Apostoles sa tunga-tungang kapanahunan” (Giya ngadto sa mga Kasulatan, “Kapaigoan”).

Dapita ang usa ka estudyante sa pagbasa og kusog sa Mga Taga-Efeso 1:9–10. Hangyoa ang klase sa pagsunod, nga mangita kon sa unsa nga dispensasyon ang gi-refer ni Pablo. Ipasabut nga ang mga pulong nga “tinago mahitungod sa iyang kabubut-on” diha sa bersikulo 9 nag-refer sa plano ug mga katuyoan sa Dios.

• Unsa nga dispensasyon ang gi-refer ni Pablo diha sa Mga Taga-Efeso 1:10?

Ipasabut nga ang dispensasyon sa kahingpitan sa mga panahon mao ang dispensasyon diin kita karon nagpuyo.

• Sa unsang paagi kaha ikapahisama ang dispensasyon sa kahingpitan sa mga panahon ngadto sa usa ka dakong lanaw sa tubig diin anaa ang mga sapa nga nag-agos padulong niini?

• Unsa ang gipanagna ni Pablo nga mahitabo atol sa dispensasyon sa kahingpitan sa mga panahon? (Ipasabut nga dihang gisulat ni Pablo ang “paghiusa diha kang Kristo,” sa tanang mga butang, mga butang diha sa langit ug mga butang dinhi sa yuta,” [bersikulo 10], nag-refer siya sa pagpahiuli ug paghiusa sa tanang mga yawe, gahum, ug mga saad nga gipadayag sa Dios ngadto sa Iyang mga anak sukad sa katukuran sa kalibutan, ingon man sa uban pang mga kahibalo nga wala pa ikapadayag sukad [tan-awa sa D&P 128:18]. Isulat ang mosunod nga mga doktrina diha sa pisara: Atol unya sa dispensasyon sa kahingpitan sa mga panahon, ang tanang butang gikan sa nangaging mga dispensasyon ipahiuli.)

Dapita ang usa ka estudyante sa pagbasa sa mosunod nga pamahayag ni Elder B. H. Roberts sa Seventy:

“Kini ang dispensasyon sa kahingpitan sa mga panahon, ug atong makita nga nag-agos padulong niini, sama sa nagbul-og nga mga sapa nga nag-agos padulong sa dagat, ang tanang nangagi nga dispensasyon, nagtabang nato nga masabtan sila, nga sila makasabut kanato; ug atong makita nga ang Dios dunay usa lang ka tuyo sukad sa sinugdanan, ug mao kana ang kaluwasan sa Iyang mga anak. Ug karon miabut ang katapusang adlaw, ang katapusang dispensasyon, nga ang kamatuoran ug ang kahayag ug ang pagkamatarung molukop sa yuta” (in Conference Report, Okt. 1904, 73).

Dapita ang mga estudyante sa pag-adto sa pisara ug butangan og label ang mga drowing nga mga sapa og mga kamatuoran, mga kasulatan, mga pakigsaad, ug gahum gikan sa nangaging mga dispensasyon nga gipahiuli o gidala diha sa dispensasyon sa kahingpitan sa mga panahon. (Ang mga label tingali maglakip sa gahum sa pag-seal, makaluwas nga mga ordinansa, Basahon ni Mormon, ug uban pa; mahimong dugangan og drowing sa mga estudyante og mga sapa kon gikinahanglan.)

• Sa unsang paagi nga ang pagpuyo sa dispensasyon sa kahingpitan sa mga panahon usa ka panalangin kaninyo?

• Sumala sa pamahayag ni Elder Roberts, unsa ang kinahanglang mahitabo atol niini nga dispensasyon? (Kamatuoran, kahayag, ug pagkamatarung kinahanglang molukop gayud sa yuta.)

• Unsa nga mga kapanguhaan sa atong dispensasyon ang makahimo nga atong mapuno ang yuta sa kamatuoran ug kahayag sa ebanghelyo?

Dapita ang usa ka estudyante sa pagbasa og kusog sa mosunod nga pamahayag ni Elder David A. Bednar sa Korum sa Napulog Duha ka mga Apostoles:

“Minahal kong mga kaigsoonan, unsay nakab-ot na niini nga dispensasyon sa pagpahayag sa mga mensahe sa ebanghelyo pinaagi sa mga social media channel usa ka maayo nga sinugdanan—apan usa lamang ka hinay nga dagayday. Ako karon modapit kaninyo sa pagtabang sa pag-usab sa dagayday ngadto sa usa ka baha. … Ako moawhag kaninyo sa paglukop sa yuta sa mga mensahe nga puno sa pagkamatarung ug kamatuoran—mga mensahe nga tinuod, makapalig-on, ug dalaygon—ug tinuod nga molukop sa yuta ingon sa usa ka lunop” (“To Sweep the Earth as with a Flood” [Brigham Young University Campus Education Week devotional, Ago. 19, 2014], LDS.org).

Dapita ang mga estudyante nga ipakigbahin unsay ilang gibuhat sa pagtabang nga malukop ang kalibutan sa mensahe nga puno sa pagkamatarung ug kamatuoran.

I-summarize ang Mga Taga-Efeso 1:11–12 pinaagi sa pagpasabut nga gitudlo ni Pablo nga pinaagi ni Jesukristo ang mga Santos nakaangkon og “panulundon” (bersikulo 11) sa gingahrian sa Dios.

Mga Taga-Efeso 1:13–23

Nanudlo si Pablo mahitungod sa Balaang Espiritu sa Saad

Dapita ang usa ka estudyante sa pagbasa og kusog sa Mga Taga-Efeso 1:13–14. Hangyoa ang klase sa pagsunod, nga mangita sa panalangin nga nadawat sa mga Santos tungod sa ilang kamatinud-anon ug sa ilang pagsalig ug pagtuo ni Jesukristo.

• Sumala sa bersikulo 13, unsa nga panalangin ang nadawat sa mga Santos? (Sila “gitimbrihan [gi-seal] [sa] gisaad nga Espiritu Santo.”)

Ipasabut nga ang pagka “sealed [pinaagi] sa balaang Espiritu sa saad” nagpasabut nga ang Espiritu Santo “mosaksi ngadto sa Amahan nga ang mga ordinansa sa pagluwas gipahigayon sa matarung nga paagi ug nga ang mga pakigsaad nga nauban kanila giampingan” (Giya ngadto sa mga Kasulatan, “Balaan nga Espiritu sa Saad,” scriptures.lds.org). Ang Espiritu mao “ang patinga [pinakaimportante] sa atong panulundon” (bersikulo 14). Nagpasabut kini nga ang presensya sa Espiritu Santo sa atong kinabuhi usa ka timaan, pahinumdom, ug indikasyon gikan sa Dios nga kon magpadayon kitang matinud-anon makadawat kita og kinabuhing dayon.

I-summarize ang Mga Taga-Efeso 1:15–16 pinaagi sa pagpasabut nga si Pablo misulti sa mga Santos nga padayon siyang mihatag og pasalamat sa Dios tungod sa ilang kamatinud-anon.

Dapita ang usa ka estudyante sa pagbasa og kusog sa Mga Taga-Efeso 1:17–18. Hangyoa ang klase sa pagsunod, nga mangita sa unsay giampo ni Pablo nga ihatag sa Dios ngadto a mga Santos.

• Unsa ang giampo ni Pablo nga ihatag sa Dios ngadto sa mga Santos?

• Unsa ang gitudlo niini nga mga bersikulo kanato kon unsaon nga kita makaila sa Langitnong Amahan? (Gamit ang kaugalingon nilang mga pulong, ang mga estudyante kinahanglang mahibalo sa mosunod nga kamatuoran: Makaila kita sa Langitnong Amahan pinaagi sa espiritu sa pagpadayag.)

Aron matabangan ang mga estudyante nga makasabut niini nga pagpadayag, dapita ang usa ka estudyante sa pagbasa og kusog sa mosunod nga pamahayag ni Elder David A. Bednar. Hangyoa ang mga estudyante sa pagpaminaw kon unsa ang espiritu sa pagpadyag.

“Ang pagpadayag mao ang usa ka komunikasyon gikan sa Dios ngadto sa Iyang mga anak dinhi sa yuta ug usa sa dako nga mga panalangin nga inubanan sa gasa ug kanunay nga pakig-uban sa Espiritu Santo. Si Propeta Joseph Smith mitudlo, ‘Ang Espiritu Santo usa ka tigpadayag,’ ug ‘walay tawo nga makadawat sa Espiritu Santo nga dili makadawat og mga pagpadayag’ (Mga Pagtulun-an sa mga Presidente sa Simbahan: Joseph Smith [2007], 155).

“Ang espiritu sa pagpadayag anaa sa matag tawo kinsa nagdawat pinaagi sa tukma nga awtoridad sa priesthood sa makaluwas nga mga ordinansa sa bunyag pinaagi sa pagpaunlod alang sa kapasayloan sa mga sala ug sa pagpandong sa mga kamot alang sa gasa sa Espiritu Santo—ug kinsa naglihok diha sa hugot nga pagtuo sa pagtuman sa priesthood nga sugo sa “pagdawat sa Espiritu Santo’” (“Ang Espiritu sa Pagpadayag,” Ensign o Liahona, Mayo 2011, 87).

• Unsa ang espiritu sa pagpadayag?

• Sa unsang paagi ang pagpadayag pinaagi sa Espiritu Santo makatabang nato nga makaila sa Langitnong Amahan?

Mahimo nimong dapiton ang mga estudyante nga ipakigbahin kon sa unsang paagi ang pagpadayag pinaagi sa Espiritu Santo nakatabang nila nga makaila pag ayo sa Langitnong Amahan. Ikonsiderar ang pagpakigbahin sa imong kaugalingong kasinatian. Awhaga ang mga estudyante nga paningkamutan ang pagkahimong takus sa pakig-uban sa Espiritu Santo aron padayon silang mas makaila pa sa Langitnong Amahan.

I-summarize ang Mga Taga-Efeso 1:19–23 pinaagi sa pagpasabut nga si Pablo padayon sa pagtudlo mahitungod sa panulundon nga gisaad ngadto sa mga Santos ug sa katungdanan ni Jesuskristo isip pangulo sa Iyang Simbahan.

Komentaryo ug Background nga Impormasyon

Mga Taga-Efeso 1:13. Ang “Balaan nga Espiritu sa Saad [gisaad nga Espiritu santo]”

Ang Balaan nga Espiritu sa Saad lain nga pangalan sa Espiritu Santo. Gigamit kini nga reference sa pagbugkos ug sa gahum sa pagpanghimatuod sa Espiritu Santo (tan-awa sa D&P 76:53; 132:7).

“Ang Balaan nga Espiritu sa Saad … nagmatuod nga madawat sa Dios ang matarung nga mga buhat, ordinansa, ug mga pakigsaad sa mga tawo. Ang Balaang Espiritu sa Saad mosaksi sa Amahan nga ang mga ordinansa sa pagluwas gipahigayon sa matarung nga paagi ug ang mga pakigsaad nga nauban kanila giampingan.

“Sila nga nabugkos pinaagi sa Balaang Espiritu sa Saad makadawat sa tanan nga gipanag-iya sa Amahan [tan-awa sa Mga Taga-Efe. 1:13–14; D&P 76:51–60]. Ang tanang pakigsaad ug mga tulumanon kinahanglang mabugkos pinaagi sa Balaang Espiritu sa Saad aron adunay gahum human niini nga kinabuhi [tan-awa sa D&P 132:7, 18–19, 26]” (Giya ngadto sa mga Kasulatan, “Balaan nga Espiritu sa Saad,” scriptures.lds.org).

Dihang misulat si Pablo nga ang mga Santos “gitimbrihan og gibugkos sa balaang Espiritu sa saad” (Mga Taga-Efeso 1:13), ang gipasabut niya mao ang saad nga kinabuhing dayon ngadto sa matinud-anong mga Santos sa mortalidad. Kon ang mga tawo mabugkos pinaagi sa Balaang Espiritu sa Saad, ang Espiritu Santo mopanghimatuod nga sila mga manununod sa celestial bisan og sila mga mortal. Kini nga doktrina usahay nagpasabut nga ang usa ka tawo tawagon ug ang pagkapili gihimong sigurado (tan-awa sa 2 Pedro 1:4–19; D&P 131:5–6; D&P 132:6–7; Bruce R. McConkie, Doctrinal New Testament Commentary, 3 vols. [1965–73], 2:493–95; History of the Church, 3:379–80).

Isip reference sa Balaang Espiriru sa Saad, si Presidente Joseph Fielding Smith namahayag:

“Ang Balaang Espiritu sa Saad mao ang Espiritu Santo kinsa nagbutang sa silyo sa pagtugot diha sa matag ordinansa: bunyag, kumpirma, pag-orden, kaminyoon. Ang saad mao nga ang mga panalangin madawat pinaagi sa pagkamatinud-anon.

“Kon ang usa ka tawo molapas og pakigsaad, sa bunyag, ordinasyon, kaminyoon,o bisan unsa pa, ang Espiritu mokuha sa silyo sa pagtugot, ug ang mga panalangin dili madawat.

“Ang matag ordinansa gi-sealed uban ang usa ka saad sa usa ka ganti nga gipasikad diha sa pagkamatinud-anon. Ang Balaang Espiritu mokuha sa silyo sa pagtugot diin ang mga pakigsaad gilapas [tan-awa sa D&P 76:52–53; 132:7]” (Doctrines of Salvation, comp. Bruce R. McConkie, 3 vols. [1954–56], 1:45).

Mga Taga-Efeso 1:13–14. “Ang pinakaimportante [patinga] sa atong panulundon”

Ang pulong nga “ang pinakaimportante sa atong panulundon” diha sa Mga Taga-Efeso 1:14 nagpasabut nga kon ang matinud-anong mga Santos ibugkos pinaagi sa Balaang Espiritu sa Saad, madawat nila ang personal nga kasiguroan nga ilang mapanunod ang celestial nga gingharian. Ang pulong nga pinakaimportante [patinga] dinhi nagpasabut nga “usa ka timaan sa unsay moabut” (Merriam-Webster’s Collegiate Dictionary, 11th ed. [2003], “earnest”). “Ang gasa sa Espiritu Santo usa sa pinakabilhong mga gasa sa atong Langitnong Amahan. … Kini nga gasa usa ka patilaw o sampol sa mahangturon nga kalipay ug usa ka saad sa kinabuhing dayon” (Isangyaw ang Akong Ebanghelyo: Usa ka Giya sa Misyonaryo nga Pangalagad [2004], 65.