Leksyon 135

Mga Hebreohanon 1–4

Pasiuna

Mitudlo si Pablo sa mga Santos mahitungod sa tinuod nga kinaiya ni Jesukristo. Mitudlo usab siya kanila mahitungod sa Pag-ula ni Jesukristo ug sa pipila ka mga panalangin nga moabut isip resulta sa Pag-ula. Gipakigbahin ni Pablo ang kasinatian sa karaan nga mga Israelite nga naglatagaw sa kamingawan aron sa pagtudlo sa mga Santos unsay kinahanglan nilang buhaton aron makasulod ngadto sa kapahulayan sa Ginoo.

Mga Sugyot alang sa Pagtudlo

Mga Hebreohanon 1

Nagtudlo si Pablo mahitungod sa kinaiya ni Jesukristo

Basaha og kusog ang mosunod nga mga sitwasyon:

1. Usa ka batan-ong babaye gikapoy na nga mao kanunay ang “good girl” tungod kay wala siya’y apil-apil sa pipila ka mga kalihokan uban sa iyang mga higala. Naghunahuna siya nga paubsan ang iyang mga sumbanan aron dawaton siya isip kabahin sa grupo.

2. Usa ka batang-ong lalaki nga nagserbisyo og full-time mission nakaamgo nga ang misyonaryo nga buhat mas lisud kay sa iyang gidahum, ug naghunahuna siya nga mouli nalang.

• Unsa ang komon niini nga mga sitwasyon?

• Unsa ang pipila ka mga rason nga mahimong hunahunaon sa mga tawo mahitungod sa paghunong sa ilang mga paninguha sa pagbuhat sa unsay ilang nasayran nga husto?

Ipaila sa daklit ang basahon nga Mga Hebreohanon pinaagi sa pagpasabut nga, ubos sa kabug-at sa lainlaing mga kalisud, ang pipila ka Judeo nga mga kinabig (gipasabut nga mga Hebreohanon) mibiya sa mga miting sa Simbahan ug mibalik sa nahilabot nga pagkasiguro sa tradisyonal nga pagsimba sa Judeo, diin wala milakip og usa ka pagtuo diha kang Jesukristo (tan-awa sa Mga Hebreohanon 10:25, 38–39). Misulat si Pablo niini nga sulat aron sa pag-awhag niini nga mga miyembro sa Simbahan nga magpabiling matinud-anon ngadto kang Jesukristo.

Dapita ang mga estudyante sa pagpangita sa mga kamatuoran samtang nagtuon sila sa Mga Hebreohanon nga makatabang nilang magpabiling matinud-anon kang Kristo kon ingon og ganahan na silang mohunong.

Dapita ang mga estudyante sa pagbasa sa Mga Hebreohanon 1:1–3, 10 sa hilum nga paagi, nga mangita sa mga doktrina nga gitudlo ni Pablo sa Judeo nga mga Santos mahitungod ni Jesukristo.

Human sa igong panahon, dapita ang pipila ka mga estudyante sa pagsulat sa pisara sa mga kamatuoran nga ilang nakit-an. Ang mga estudyante mahimong mogamit og lain-laing mga pulong, apan siguroa nga ang mga pamahayag nga susama sa mosunod nga mga kamatuoran masulat diha sa pisara:

Si Jesukristo ang milalang sa kalangitan ug sa yuta (tan-awa sa Mga Hebreohanon 1:2, 10).

Si Jesukristo namulong alang sa Amahan (tan-awa sa Mga Hebreohanon 1:2).

Si Jesukristo mao ang manununod sa Amahan (tan-awa sa Mga Hebreohanon 1:2).

Si Jesukristo mao ang tukma nga hulad sa Amahan (tan-awa sa Mga Hebreohanon 1:3).

Si Jesukristo nagasapnay sa kalibutan pinaagi sa gamhanan nga gipamulong Niya (tan-awa sa Mga Hebreohanon 1:3).

Si Jesukristo nagpanglinis sa mga sala sa katawhan (tan-awa sa Mga Hebreohanon 1:3).

Si Jesukristo naglingkod sa too sa Amahan (tan-awa sa Mga Hebreohanon 1:3).

Tingali kinahanglan nimong ipasabut nga ang mga pulong “hingpit nga hulad sa Amahan” nagpasabut nga si Jesukristo naglarawan sa Amahan sa pisikal ug espirituhanon nga paagi ug nakig-ambit sa Iyang diosnon nga kinaiya, ug ang mga pulong “nagasapnay sa kalibutan pinaagi sa gamhanan nga gipamulong Niya” nagpasabut nga si Jesukristo labing gamhanan.

Pag-ila sa mga doktrina ug mga baruganan

Usa ka importanting katuyoan sa mga kasulatan mao ang pagtudlo sa mga doktrina ug mga baruganan sa ebanghelyo. Ang pagkahibalo sa mga doktrina ug mga baruganan nga makita sa mga kasulatan mao ang usa sa mga Sukaranan sa Pagtudlo ug Pagkat-on sa Ebanghelyo. Ang pagkat-on unsaon sa pagkahibalo niini nagkinahanglan og mahunahunaong paningkamot ug praktis. Kon kini nahibaloan na, importante nga klaro ug yano kining ipamahayag aron sa pagsiguro nga kining mga kamatuoran klaro sa mga hunahuna sa mga estudyante.

• Sa unsa kahang paagi ang pagkahibalo niining mga kamatuoran makatabang sa usa ka tawo kinsa nanlimbasog nga magpabiling matinud-anon kang Jesukristo ug sa Iyang ebanghelyo?

Dapita ang mga estudyante sa pagpamalandong hain niini nga mga kamatuoran tingali makatabang nila kon matintal sila sa paghunong sa pagbuhat sa kabubut-on sa Ginoo.

Ipasabut nga ang usa ka tema diha sa basahon sa Mga Hebreohanon mao ang pagkalabaw ni Jesukristo. Sama pananglit, diha sa Mga Hebreohanon 1:4–14, gipakita ni Pablo nga si Jesukristo mas labaw pa kay sa mga anghel. Diha sa sunod nga mga kapitulo, mipadayon siya sa pagpakita sa pagkamaayo ug pagkalabaw ni Kristo.

• Sa unsang paagi ang pagkahibalo nga si Jesukristo mas labaw pa kay sa tanang butang makatabang sa usa ka tawo kinsa nanlimbasog nga magpabiling matinud-anon ngadto Kaniya?

Awhaga ang mga estudyante nga magpadayon sa pagpangita alang niini nga tema samtang nagtuon sila sa nahibilin sa Mga Hebreohanon.

Mga Hebreohanon 2

Nagtudlo si Pablo nga si Jesukristo mao ang Mag-uugda [Kapitan] sa atong kaluwasan

Hangyoa ang mga estudyante sa pagkonsiderar kon unsaon nila pagpili og usa ka kapitan o lider alang sa nagkalainlaing hugpong sa magdudula o grupo nga mahimong ilang apilan (sama pananglit, sa paugnat, lantugi, drama, o mga pundok sa eskwelahan).

• Unsa nga mga kwalipikasyon ang inyong pangitaon kon mopili og usa ka kapitan o lider?

Ipasabut nga sa Mga Hebreohanon 2, mas gipasabut ni Pablo ang mahitungod sa kinaiya ug pagkatawo ni Jesukristo ngadto sa mga Judeo nga mga kinabig aron sa pagtabang nila nga makasabut nganong kinahanglan silang magpadayon sa pagsunod ni Jesukristo. Dapita ang usa ka estudyante sa pagbasa og kusog sa Mga Hebreohanon 2:10. Hangyoa ang klase sa pagsunod, nga mangita kon giunsa ni Pablo paghisgot kang Jesukristo.

• Kapitan si Jesukristo sa unsa? (Isulat sa pisara ang mosunod nga kamatuoran: Si Jesukristo mao ang Kapitan sa atong kaluwasan.)

• Sa unsang paagi si Jesukristo mao ang Kapitan sa atong kaluwasan?

Ipares-pares ang mga estudyante, ug i-assign ang usa ka estudyante sa pagbasa sa Mga Hebreohanon 2:8–13 ug ang laing estudyante sa pagbasa sa Mga Hebreohanon 2:14–18. Dapita ang mga estudyante sa pagpangita sa mga pulong nga naghulagway nganong kwalipikado ang Manluluwas nga mahimong Kapitan sa atong kaluwasan. (Ipasabut nga ang mga pulong “paghimog halad-pasiuli alang sa mga sala sa katawhan” diha sa bersikulo 17 nagpasabut nga si Kristo mitubos sa atong mga sala, nagtugot nga mahiuli kita, o madala ngadto sa usa ka mauyonon nga relasyon, uban sa Langitnong Amahan.)

Human sa igong panahon, hangyoa ang mga estudyante sa pagreport ngadto sa ilang mga pares sa unsay ilang nakit-an. Dayon ipangutana sa klase:

• Sumala sa bersikulo 9, unsay gibuhat ni Jesukristo alang sa tanang tawo?

• Sumala sa bersikulo 14, kinsay gibuntog sa Manluluwas pinaagi sa Iyang Pag-ula?

Ipasabut nga si Pablo wala lamang naghisgot sa Manluluwas isip mao ang Mag-uugda sa atong kaluwasan, apan usab siya mitawag Kaniya nga “maloluy-on ug kasaligang labawng sacerdote” (bersikulo 17). Mipahisama si Pablo kang Jesukristo ngadto sa usa ka Judeo nga high priest tungod kay ang high priest gilantaw isip usa ka tigpataliwala tali sa mga katawhan ug sa Dios.

• Sumala sa bersikulo 17, unsay nakapahimo ni Jesus nga ingon ka maloluy-on ug kasaligang labawng sacerdote?

• Sumala sa bersikulo 18, nganong mahimo man sa Manluluwas ang pagtabang kanato? (Tan-awa usab sa Alma 7:11–13.)

Ipasabut nga diha sa Mga Hebreohanon 4:14–16 mihatag si Pablo og dugang nga panabut sa iyang pagtulun-an kon sa unsang paagi ang Manluluwas usa ka maloloy-on ug kasaligang labawng sacerdote. Dapita ang usa ka estudyante sa pagbasa og kusog niini nga mga bersikulo. Hangyoa ang klase sa pagsunod, nga mangita kon unsay nagpahimo kang Jesukristo nga ingon ka halangdong labawng sacerdote. Dapita ang mga estudyante sa pagreport sa unsay ilang nakit-an.

• Base sa inyong nakat-unan gikan sa Mga Hebreohanon 2:14–18 ug 4:14–16, ngano man nga si Jesukristo hingpit nga makasabut kanato ug makasimpatiya sa tanan natong mga kahuyang ug mga kakulangan? (Tabangi ang mga estudyante nga mahibaloan ang mosunod nga kamatuoran: Tungod kay si Jesukristo miantus ug gitintal sa tanang butang, hingpit Siyang nakasabut nato ug makatabang kanato sa panahon sa panginahanglan. Isulat sa pisara kini nga kamatuoran.)

• Sumala sa Mga Hebreohanon 4:16, ang pagsabut niini nga kamatuoran makatabang nato sa pagbuhat sa unsa?

• Unsa kaha ang gipasabut nga masaligong moduol sa trono sa grasya?

Dapita ang mga estudyante sa pagpakigbahin sa ilang mga pagbati mahitungod sa unsang paagi ang mga kamatuoran diha sa Mga Hebreohanon 2 makatabang nila nga magmasaligon sa ilang desisyon nga mosunod kang Jesukristo isip ilang lider.

Mga Hebreohanon 3–4

Nagtudlo si Pablo sa unsang paagi kita makasulod sa kapahulayan sa Ginoo

Dapita ang mga estudyante sa pagsulat diha sa ilang mga scripture study journal o mga class notebook og usa ka butang nga makahatag nila og temporal o espirituhanon nga kahingawa o kabalaka.

• Unsaon man nato nga makakaplag og kalinaw ug kapahulayan gikan niini ug sa uban nga mga tinubdan sa kasamok ug kabalaka?

Pahinumdumi ang mga estudyante nga ang Judeo nga mga Santos nakasinati og mga pagpanggukod tungod sa pagsunod sa ebanghelyo. Ipasabut nga diha sa Mga Hebreohanon 3 ug 4, gihisgutan ni Pablo ang usa ka kasinatian gikan sa Daang Tugon aron sa pagtudlo sa mga Santos unsaon pagkaplag og kapahulayan niining kinabuhi ug sa sunod.

Ipasabut nga human nakagawas gikan sa Ehipto, ang mga katawhan sa karaang Israel nakapapungot sa Ginoo ug busa wala tuguti nga makasulod ngadto sa kapahulayan sa Ginoo (tan-awa sa Numeros 14; Jacob 1:7–8; Alma 12:33–37; 13:6, 12–13, 28–29). Dapita ang mga estudyante sa pagmarka sa mga pulong “akong kapahulayan” diha sa Mga Hebreohanon 3:11.

Ipasabut nga si Elder Bruce R. McConkie sa Korum sa Napulog Duha ka mga Apostoles mihatag og pagpasabut sa pagsulod ngadto sa kapahulayan sa Ginoo. Dapita ang usa ka estudyante sa pagbasa og kusog sa mosunod nga pamahayag ni Elder McConkie, ug hangyoa ang mga estudyante sa pagpaminaw kon unsa ang gipasabut sa pagsulod sa kapahulayan sa Ginoo.

“Ang tinuod nga mga santos mosulod sa kapahulayan sa Ginoo samtang anaa niini nga kinabuhi, ug pinaagi sa pagsunod sa kamatuoran, nagpadayon sila nianang bulahan nga kahimtang hangtud nga mopahulay sila uban sa Ginoo didto sa langit. … Ang kapahulayan sa Ginoo, kon kabahin sa mga mortal, mao ang pagbaton og hingpit nga kahibalo sa pagkabalaan sa dakong buluhaton sa ulahing adlaw. … Ang kapahulayan sa Ginoo, didto sa kahangturan, mao ang pagpanunod sa kinabuhing dayon, sa pag-angkon sa kahingpitan sa himaya sa Ginoo. (D. & P. 84:24.)” (Mormon Doctrine, 2nd ed. [1966], 633).

• Unsay gipasabut nga mosulod kita ngadto sa kapahulayan sa Ginoo niini nga kinabuhi? Human kita mamatay?

Basaha og kusog ang Mga Hebreohanon 4:1 ug hangyoa ang mga estudyante sa pagsunod, nga mangita kon unsay gikabalak-an ni Pablo nga ang pipila sa mga miyembro sa Simbahan mapakyas sa pagbuhat.

• Unsay gikabalak-an ni Pablo? (Nga ang pipila ka mga miyembro sa Simbahan mapakyas sa pagsulod ngadto sa kapahulayan sa Ginoo.)

Isulat sa pisara ang mosunod nga mga kasulatan: Mga Hebreohanon 3:7–8, 12–15, 18–19; 4:2–3, 6–7, 11. Hangyoa ang klase nga basahon kini nga mga bersikulo sa hilum nga paagi nga mangita kon unsay gitudlo ni Pablo mahitungod sa unsaon nato pagsulod ngadto sa kapahulayan sa Ginoo. (Awhaga ang mga estudyante sa pagbasa sa Hubad ni Joseph Smith alang sa Mga Hebreohanon 4:3 diha sa Giya ngadto sa mga Kasulatan.) Human sa igong panahon, dapita ang mga estudyante sa pagreport sa unsay ilang nakit-an.

• Unsa kaha ang gipasabut sa mga pulong “kon ang atong unang pagsalig padayonan ta sa pagkupot nga malig-on hangtud sa katapusan” (Mga Hebreohanon 3:14)?

• Unsa sa inyong hunahuna ang gipasabut sa “ayaw ninyo pagahia ang inyong mga kasingkasing”? (Mga Hebreohanon 3:15; 4:7). (Ipabiling abli ang inyong kasingkasing, andam, ug masulundon ngadto sa Dios ug sa Iyang mga kasugoan.)

• Unsay gitudlo ni Pablo mahitungod sa unsaon pagsulod sa kapahulayan sa Ginoo? (Gikan sa mga tubag sa mga estudyante, isulat sa pisara ang mosunod nga baruganan: Kon magpabilin kitang matinud-anon ngadto sa Manluluwas ug dili pagahion ang atong mga kasingkasing, mosulod kita ngadto sa kapahulayan sa Ginoo.)

• Sa unsang paagi ang pagpabiling abli sa atong mga kasingkasing sa katuyoan ug plano sa Dios alang nato nag-andam kanato sa pagsulod ngadto sa kapahulayan sa Ginoo?

• Sa unsang paagi kaha kita mapanalanginan niini nga kinabuhi tungod sa pagtinguha nga mosulod ngadto sa kapahulayan sa Ginoo?

Hangyoa ang mga estudyante sa pagpamalandong sa unsang paagi ang pakamatinud-anon ngadto sa Manluluwas ug sa pag-abli sa ilang mga kasingkasing ngadto Kaniya nakatabang kanila nga makakita og kapahulayan bisan pa sa mga problema o mga kabalaka nga mahimong ilang gisinati. Dapita ang pipila ka mga estudyante sa pagpakigbahin sa ilang mga hunahuna ngadto sa klase.

Dapita ang mga estudyante sa pagsulat diha sa ilang mga scripture study journal unsay ilang buhaton aron magpabiling matinud-anon kang Jesukristo ug ipabiling abli ang ilang mga kasingkasing ngadto Kaniya.

Komentaryo ug Background nga Impormasyon

Mga Hebreohanon 1:3. Si Jesukristo mao ang “tukma nga hulad” sa Iyang Amahan

Si Presidente Joseph F. Smith mitudlo sa mosunod mahitungod sa imahe ni Jesukristo:

“Si Jesukristo, ang Anak sa Dios, mao ang ‘tukma nga hulad’ sa kinaiya sa Iyang Amahan (Mga Hebreohanon 1:3). Milakaw Siya sa yuta isip usa ka tawo, isip usa ka hingpit nga tawo, ug miingon, agig tubag sa pangutana nga gihatag ngadto Kaniya: ‘Ang nakakita kanako nakakita sa Amahan’ (Juan 14:9). Kini lamang makasulbad na unta sa problema nga makatagbaw sa matag mahunahunaon, may balaang pagtahud nga pangisip. Ang paghukom dili ikasalikway, nga kon ang Anak sa Dios mao ang tukma nga hulad (kana mao ang pagkahisama) sa pagkatawo sa Iyang Amahan, sa ingon ang Iyang Amahan anaa sa panagway sa tawo; tungod kay mao kana ang panagway sa Anak sa Dios, dili lamang panahon sa Iyang mortal nga kinabuhi, kondili sa wala pa ang Iyang mortal nga pagkatawo, ug human sa Iyang pagkabanhaw. Dinhi niini nga panagway nga ang Amahan ug ang Anak, adunay duha ka mga personahe, nagpakita ni Joseph Smith, samtang isip usa ka batang lalaki nga katorse anyos, nadawat niya ang iyang unang panan-awon” (Mga Pagtulun-an sa Mga Presidente sa Simbahan: Joseph F. Smith [1998], 405–406).

Mga Hebreohanon 4:4, 10. Ang adlaw sa Igpapahulay mao ang timailhan ug simbolo sa kapahulayan sa Ginoo

Si Elder Bruce R. McConkie sa Korum sa Napulog Duha ka mga Apostoles mipasabut:

“Ang adlaw sa Igpapahulay mao ang timailhan ug simbolo sa kapahulayan sa Ginoo. Kadtong misulod na ngadto sa kapahulayan sa ebanghelyo nagbalaan sa Adlaw nga Igpapahulay isip kabahin sa ilang matarung nga pamatasan ug tinuod nga pagsimba. Niana nga adlaw nagpahulay sila gikan sa ilang kalibutanon nga mga buhat, sama sa gibuhat sa Dios gikan sa iyang mga buhat sa paglalang, isip usa ka timailhan ug pagpamatuod nga misulod na sila ngadto sa kapahulayan sa Ginoo niini nga kinabuhi, may mga pagpamatuod sa ebanghelyo, ug nahinangup niana nga kapahulayan sa Ginoo ‘diin nga kapahulayan mao ang kahingpitan sa iyang himaya’ human karon. (D. & P. 84:24.)” (Doctrinal New Testament Commentary, 3 vols. [1965–73], 3:151).