Mga Taga-Efeso 2–Mga Taga-Filipos 4 (Unit 25)

Materyal sa Pagpangandam alang sa Home-Study Teacher

Summary sa mga Leksyon sa Daily Home-Study

Ang mosunod nga mga summary sa panghitabo, mga doktrina, ug mga baruganan nga nakat-unan sa mga estudyante samtang gitun-an nila ang 2 Mga Taga-Efeso 2–Mga Taga-Filipos 4 (unit 25) dili tuyo nga itudlo isip usa ka bahin sa imong leksyon. Ang leksyon nga imong itudlo magtutok sa pipila lamang niining mga doktrina ug mga baruganan. Sunda ang mga pag-aghat sa Espiritu Santo samtang imong ikonsiderar ang panginahanglan sa imong mga estudyante.

Day 1 (Mga Taga-Efeso 2–3)

Gipadayon ni Apostol Pablo ang iyang pagpamulong ngadto sa mga miyembro sa Simbahan sa Efeso pinaagi sa pagtudlo nila nga tungod sa grasya ni Jesukristo, ang tanang binuhat maluwas pinaagi sa hugot nga pagtuo Kaniya ug nga kon kita moduol kang Jesukristo ug moambit sa Iyang grasya, mahiusa kita uban sa mga Santos sa Dios. Gitudlo sab ni Pablo nga ang Simbahan sa Ginoo may pundasyon nga mga apostoles ug mga propeta, nga si Jesukristo ang punoang tukurang bato, ug ang mga apostoles ug mga propeta nagtinguhang makatabang sa mga anak sa Dios aron mahibalo ug mobati sa gugma ni Jesukristo.

Day 2 (Mga Taga-Efeso 4–6)

Pinaagi sa padayong pagpanudlo ni Pablo bahin sa organisasyon sa Simbahan, ang mga estudyante nakakat-on nga ang Ginoo mitawag og mga apostoles, mga propeta, ug ubang mga lider sa Simbahan sa pagtabang nga mahingpit ang mga Santos ug maprotektahan sila gikan sa sayop nga mga doktrina. Gitudloan sab ni Pablo ang mga Santos nga ang mga disipulo ni Jesukristo mihukas sa ilang karaan, masalaypong mga kinaiya ug misul-ob sa bag-o, matarung nga mga pamaagi.

Day 3 (Mga Taga-Filipos 1–3)

Gikan sa sulat ni Pablo ngadto sa mga Santos sa Filipos, nakakat-on ang mga estudyante nga ang oposisyon nga atong nasinati gumikan sa pagsunod kang Jesukristo makatabang aron mapadayon ang Iyang buhat ug kon atong sundon ang ehemplo ni Jesukristo bahin sa pagpaubos ug kamanggihunahunaon sa uban, niana mas magkahiusa kita. Gitudlo usab ni Pablo nga ang Dios motabang nato nga makabaton kitag tinguha ug mobuhat sa unsay gikinahanglan para sa atong kaluwasan, nga gihimong posible pinaagi sa Pag-ula ni Jesukristo, ug kon atong isakripisyo ang tanang gikinahanglan aron sa pagsunod kang Jesukristo ug magpadayon uban sa hugot nga pagtuo, kita makaila Kaniya ug makaangkon og kinabuhing dayon.

Day 4 (Mga Taga-Filipos 4)

Samtang gipadayon nila ang ilang pagtuon sa sulat ni Pablo ngadto sa mga Santos sa Filipos, nadiskubrihan sa mga estudyante nga isip matinud-anong mga sumusunod ni Jesukristo, kon mag-ampo kita uban ang pangaliyupo ug pasalamat, niana panalanginan kita sa Dios sa Iyang kalinaw, ug kon itumong sa mga matinud-anong Santos ang ilang mga hunahuna sa bisan unsay matarung ug kon sundon nila ang mga apostoles ug mga propeta, niana ang Dios sa kalinaw magauban kanila. Gitapos ni Pablo ang iyang sulat pinaagi sa pagtudlo nga makahimo kita sa tanang butang pinaagi ni Jesukristo, nga naghatag nato og kalig-on.

Pasiuna

Human matudloi ang mga Santos sa Efeso nga hukason ang ilang karaan, masalaypong mga kinaiya ug isul-ob ang bag-o, matarung nga mga kinaiya isip sumusunod ni Jesukristo, gitudloan sila ni Apostol Pablo nga kinahanglan usab nilang isul-ob ang tibuok nga hinagiban sa Dios.

Mga Sugyot alang sa Pagtudlo

Mga Taga-Efeso 6:10–24

Gitambagan ni Pablo ang mga Santos sa “pagsul-ob sa tibuok hinagiban sa Dios”

Isulat sa pisara ang mosunod nga pamahayag ni Presidente Ezra Taft Benson. (Kini nga pamahayag makita sa “The Power of the Word,” Ensign, Mayo 1986, 79.) Dapita ang usa ka estudyante sa pagbasa og kusog sa pamahayag.

“Si Satanas nagpasiugda og gubat batok sa mga miyembro sa Simbahan kinsa adunay mga pagpamatuod ug nagtinguha sa pagsunod sa mga sugo” (Presidente Ezra Taft Benson).

Sa unsang mga paagi si Satanas nakiggubat batok sa mga kabatan-onan sa Simbahan?

Dapita ang usa ka estudyante sa pagbasa og kusog sa Mga Taga-Efeso 6:10–13. Hangyoa ang klase sa pagsunod, nga mangita kon unsay giawhag ni Pablo nga pakigbatukan sa mga Santos sa iyang panahon. Ipasabut nga ang pagka malipat-lipaton nag-refer sa mga pamaagi nga gigamit sa paglingla o pagbitik.

Unsa ang gisulti ni Pablo nga gipakigbatukan sa mga Santos sa iyang panahon?
Sa unsang paagi ang gilista ni Pablo diha sa bersikulo 12 susama ra sa atong gipakigbatukan karon sa atong panahon?
Unsay gisulti ni Pablo sa mga Santos sa iyang panahon nga isul-ob aron makabarug batok niining mga dautan? (Human makatubag ang mga estudyante, isulat sa pisara ang mosunod nga baruganan: Kon isul-ob nato ang tibuok hinagiban sa Dios, makabarug kita batok sa mga dautan.)

Isul-ob ang Tibuok nga Hinagiban sa Dios

Manwal sa Seminary Teacher sa Bag-ong Tugon—Leksyon sa Home-Study (Unit 25)

Hatagi ang mga estudyante sa kauban nga handout. Bahina ang mga bata ngadto sa lima ka grupo, ug i-assign ang matag grupo og usa ka hinagiban nga gihisgutan sa Mga Taga-Efeso 6:14–17. (Ayaw iapil og assign ang “mabinaksan ang inyong hawak sa kamatuoran” [bersikulo 14]. Kon gamay ra ang imong klase kinahanglan nimong i-assign ang pipila ka grupo og sobra sa usa ka hinagiban.)

Isulat sa pisara ang mosunod nga mga pangutana:

Para asa gamiton ang usa ka hinagiban?
Unsay tawag ni Pablo sa usa ka hinagiban?
Sa unsang paagi ang usa ka bahin sa lawas nga napanalipdan sa hinagiban nagrepresentar sa espirituhanong paagi?
Sa unsang paagi ang pagsul-ob niini nga hinagiban makatabang nga ikaw makabarug batok sa mga dautan?

Aron matabangan ang mga estudyante nga makompleto ang handout, dapita ang usa ka estudyante sa pagbasa og kusog sa Mga Taga-Efeso 6:14. Hangyoa ang klase sa pagsunod, nga mangita diha sa pisara sa mga tubag sa pangutana samtang ilang i-apply ang “mabinaksan ang hawak sa kamatuoran” ug dayon isulat ang mga tubag diha sa ilang mga handout.

Ipasabut nga ang hinagiban nga “gibakus” sa hawak usa ka bakus nga gitaud sa tunga nga bahin sa lawas. Dayon dapita ang pipila ka estudyante sa pagreport sa ilang mga tubag diha sa klase. Mahimong mosugyot ang mga estudyante og mga tubag nga sama sa mosunod: (1) Gamiton kini sa pagtabon sa hawak [mga bat-ang] (sa importante nga organ nga may kalabutan sa pagpasanay). (2) Gitawag kini ni Pablo og “kamatuoran.” (3) Nagrepresentar kini sa atong kaputli og moral nga kalunsay. (4) Ang kahibalo sa kamatuoran sa plano sa kaluwasan makapanalipud nato gikan sa pagkalingla ug makatabang nga kita magpabiling lunsay sa moral.

Dapita ang mga estudyante sa pagsunod niini nga sumbanan samtang basahon nila ang Mga Taga-Efeso 6:14–18 uban sa ilang mga grupo ug kompletuhon ang usa ka bahin sa handout nga may kalabutan sa gi-assign nganha nila nga hinagiban. (Ipasabut nga ang “mahinapinan ang inyong mga tiil” [bersikulo 15] nagpasabut sa pagsul-ob og sapatos o ubang panalipud sa tiil.)

Human sa igo nga panahon, pagdapit og usa ka representante gikan sa matag grupo nga moreport sa unsay ilang nakat-unan sa klase. Samtang moreport ang matag grupo, dapita ang mga estudyante sa pagrekord kon unsay nakit-an sa mga grupo diha sa ilang handout.

Nganong importante man ang pagpanalipud sa atong kaugalingon uban sa tibuok nga hinagiban sa Dios?

Dapita ang usa ka estudyante sa pagbasa sa mosunod nga pamahayag ni Elder M. Russell Ballard sa Korum sa Napulog Duha ka mga Apostoles. Hangyoa ang klase sa pagpaminaw kon unsaon nga atong masul-ob ug malig-on ang hinagiban sa Dios.

“Unsaon nato sa pagsul-ob ang tibuok nga hinagiban sa Dios, aron kita, sama sa gisaad ni Pablo, ‘makabarug batok sa dautang mga adlaw’?

“Gusto nakong hunahunaon nga kini nga espirituhanong hinagiban dili usa ka tibuok nga piraso sa metal nga gihulma aron mosakar sa lawas apan mas sama sa usa ka ginagmayng kinadena nga puthaw. Ang usa ka kinadena nga puthaw naglangkob og mga puthaw nga gitapot aron ang mogamit niini sayon rang makalihok nga dili mawad-an sa panalipud. Makaingon ko niana tungod kay kasinatian na nako kini nga wala kitay ngilngig ug dagkong butang nga mahimo aron maarmasan ang atong kaugalingon sa espirituhanong paagi. Ang tinuod nga espirituhanong gahum nag-agad sa daghang ginagmay nga lihok nga gisapid pinaagi sa hilo sa espirituhanong pagpalig-on nga mopanalipud ug mosagang sa tanang dautan” (“Be Strong in the Lord,” Ensign, Hulyo 2004, 8).

Unsay inyong buhaton aron masul-ob ug malig-on ang hinagiban sa Dios sa matag adlaw?
Sa unsang paagi kini nakatabang ninyo nga makasukol sa mga dautan, tintasyon, o pagpanglingla?

Isulat ang mosunod nga mga pangutana diha sa pisara. Dapita ang mga estudyante sa pagtubag sa mosunod nga mga pangutana diha sa ilang mga class notebook o mga scripture study journal:

Asa nga mga bahin sa inyong espirituhanong hinagiban ang gikonsiderar ninyo nga lig-on?

Asa niini ang pinakahuyang nga bahin sa inyong hinagiban?

Unsay inyong mahimo aron mapalig-on ang matag usa niini nga espirituhanong hinagiban sa inyong kinabuhi?

I-summarize ang Mga Taga-Efeso 6:19–24 pinaagi sa pagpasabut nga gitapus ni Pablo ang iyang sulat pinaagi sa paghangyo sa mga Santos nga mag-ampo aron siya mahatagan og “igsusulti” (bersikulo 19) ug makasangyaw sa ebanghelyo nga walay kukahadlok samtang naa sa bilanggoan.

Ipakigbahin ang imong pagpamatuod bahin sa mga kamatuoran nga nahibaloan sa leksyon karon, ug dapita ang mga estudyante nga buhaton ang bisan unsang pag-aghat nga ilang nadawat.

Sunod nga Unit (Mga Taga-Colosas–1 Timoteo)

Dapita ang mga estudyante sa pagpangita sa mga tubag sa mosunod nga mga pangutana samtang padayon silang magtuon sa mga sinulat ni Pablo atol sa umaabut nga semana: Unsay gisulti ni Pablo mahitungod sa kamahigugmaon sa kwarta? Unsaon nato nga makalikay sa sayop nga mga tradisyon? Sumala ni Pablo, unsa ang mahitabo sa dili pa ang Ikaduhang Pag-anhi? Unsaon nato sa pagkasayud nga nanghitabo na kini?