Leksyon 125
Mga Taga-Filipos 4
Pasiuna
Giawhag ni Pablo ang mga Santos sa Filipos nga magmainampuon ug tinguhaon ang bisan unsa nga pagkamatarung. Gipamahayag sab niya ang iyang kamasaligon sa makapalig-on nga kusog ni Jesukristo. Gitapos ni Pablo ang iyang epistola o sulat uban sa laing ekspresyon sa pagpasalamat ngadto sa mga Santos sa Filipos tungod sa suporta nga ilang gihatag kaniya atol sa iyang panginahanglan.
Mga Sugyot alang sa Pagtudlo
Mga Taga-Filipos 4:1–14
Gitudloan ni Pablo ang mga Santos sa Filipos nga magmainampuon ug tinguhaon ang bisan unsa nga pagkamatarung
Sa dili pa magklase, isulat ang matag pamahayag sa magkalahi nga papel, ug ihatag ang mga papel sa lain-laing estudyante:
“Akong gikabalak-an unsaon sa pagpasar sa umaabut nga test.”
“Akong gikabalak-an ang sakop sa pamilya nga nasakit.”
“Akong gikabalak-an ang pagbarug sa akong mga gituohan.”
“Akong gikabalak-an kon mahimo ba kong malampuson nga misyonaryo.”
Sugdi ang leksyon pinaagi sa pagsulat diha sa pisara sa pulong nga gikabalak-an. Ipasabut nga sa tibuok natong kinabuhi, makasinati kita og mga hagit o sirkumstansya nga makapabalaka nato. Dapita ang mga estudyante nga gihatagan sa papel sa pagbarug ug basahon ang ilang mga pamahayag nga tagsa-tagsa. Hangyoa ang klase sa paghunahuna og mga higayon diin sila dunay susama nga mga kabalaka.
-
Unsa ang ubang mga kabalaka nga tingali atong masinati gumikan sa mga hagit o lisud nga mga kahimtang?
Dapita ang mga estudyante nga isulat sa ilang mga class notebook o mga scripture study journal ang mahitungod sa usa ka hagit nga gikabalak-an nila o sa tawo nga ilang nailhan. Dapita ang mga estudyante sa pagpangita sa kamatuoran samtang tun-an nila ang Mga Taga-Filipos 4 nga makatabang nila kon sila dunay mga kabalaka.
Pahinumdumi ang mga estudyante nga sa sulat ni Pablo ngadto sa mga miyembro sa Simbahan sa Filipos, gidayeg niya ang kamatinud-anon sa mga miyembro sa Simbahan (tan-awa sa Mga Taga-Filipos 2:12) ug gitudloan sila mahitungod sa mahangturong mga ganti nga maanaa niadtong mosakripisyo ug magmatinud-anon kang Jesukristo. I-summarize ang Mga Taga-Filipos 4:1–5 pinaagi sa pagpasabut nga gitambagan ni Pablo ang mga Santos nga magmalig-on diha sa kamatinud-anon nganha sa Ginoo, magmaya sa Ginoo, ug tugutan nga ang ilang pagkamapailubon (ang pulong sa Gresya nga gihubad nga pagkamapailubon nagpasabut usab nga pagkalumo) (tan-awa sa bersikulo 5,) makita sa uban.
Dapita ang usa ka estudyante sa pagbasa og kusog sa unang mga pulong sa Mga Taga-Filipos 4:6. Hangyoa ang klase sa pagsunod, nga mangita sa unsay gitambag ni Pablo ngadto sa mga Santos. Ipasabut nga ang mga pulong nga “ayaw kamo pagkabalaka sa bisan unsang butang” nagpasabut nga dili magpatuyang sa pagkabalaka sa bisan unsang butang.
Isulat sa pisara ang mosunod nga mga pulong: Isip matinud-anong mga sumusunod ni Jesukristo, kon …
Dapita ang usa ka estudyante sa pagbasa og kusog sa sumpay sa Mga Taga-Filipos 4:6. Hangyoa ang klase sa pagsunod, nga mangita kon unsay gitambag ni Pablo sa mga Santos imbis mabalaka. Mahimo nimong ipasabut nga ang pagpangamuyo mao ang mapaubsanon, kinasingkasing nga paghangyo.
-
Unsaon ninyo sa pag-summarize ang tambag ni Pablo diha sa bersikulo 6? (Isulat sa pisara ang tubag sa mga estudyante isip usa ka “kon” nga pahayag nga susama sa mosunod: Isip matinud-anong mga sumusunod ni Jesukristo, kon mag-ampo kita uban sa pagpangamuyo ug pasalamat, …)
Idugang sa pisara ang pulong nga niana diha sa pahayag. Dapita ang usa ka estudyante sa pagbasa og kusog sa Mga Taga-Filipos 4:7. Hangyoa ang klase sa pagsunod, nga mangita sa panalangin nga gisaad ni Pablo gumikan sa pag-ampo uban ang pagpangamuyo ug pagpasalamat. Ipasabut nga ang pulong nga magabantay niini nga bersikulo nagpasabut nga panalipod.
-
Unsaon ninyo sa pag-summarize ang tambag nga gisaad ni Pablo? (Isulat sa pisara ang tubag sa mga estudyante human sa pulong nga niana. Kinahanglang mahibaloan sa mga estudyante ang usa ka baruganan nga susama sa mosunod: Isip matinud-anong mga sumusunod ni Jesukristo, kon mag-ampo kita uban sa pagpangamuyo ug pasalamat, niana panalanginan kita sa Dios uban sa Iyang kalinaw.)
-
Kon mabalaka kita, sa unsang paagi ang pagpasalamat diha sa atong mga pag-ampo makahatag nato og kalinaw?
-
Sa unsang paagi ang kalinaw sa Dios mopanalipud sa atong kasingkasing ug hunahuna?
Dapita ang usa ka estudyante sa pagbasa og kusog sa pamayahag ni Elder Richard G. Scott sa Korum sa Napulog Duha ka mga Apostoles. Hangyoa ang klase sa pagpaminaw para sa dugang nga mga paagi nga ang kalinaw sa Dios makatabang kanato:
“Kay gitahud Niya ang inyong kabubut-on, ang Amahan sa Langit dili gayud mamugos ninyo nga mag-ampo Kaniya. Apan sa paggamit ninyo nianang kabubut-on ug paglakip Kaniya sa matag aspeto sa inyong inadlaw nga kinabuhi, masudlan ang inyong kasingkasing og kalinaw, madagayaong [makapahimuot] nga kalinaw. Kana nga kalinaw magtumong og mahangturong kahayag sa inyong mga panlimbasug. Makatabang kini sa inyong pagdumala niadto nga mga hagit gikan sa mahangturong panglantaw” (“Himoa ang Paggamit sa Pagtuo nga Inyong Unang Prayoridad,” Ensign o Liahona, Nob. 2014, 93).
-
Sumala ni Elder Scott, sa unsang paagi ang kalinaw sa Dios makatabang sa mga hagit nga atong gisinati?
-
Kanus-a kamo nag-ampo uban sa pagpangamuyo ug pasalamat sa panahon sa kabalaka ug napanalanginan og kalinaw sa Dios?
Hangyoa ang mga estudyante sa pag-refer ngadto sa gikabalak-an nga gisulat nila sa pagsugod sa leksyon. Awhaga sila sa pag-ampo uban sa pagpangamuyo ug pagpasalamat imbis nga mabalaka. Kon ang mga estudyante misulat og mga kabalaka sa ubang tawo, awhaga sila nga ipakigbahin kini nga baruganan niana nga tawo.
Aron maandam ang mga estudyante nga mahibaloan ang dugang nga baruganan nga gitudlo ni Pablo sa mga Santos sa Filipos, bahina sa tulo ka bahin ang klase. I-assign ang ikatulong bahin sa klase sa paghunahuna mahitungod sa paborito nilang pagkaon, ang laing ikatulo nga bahin sa klase pahunahunaa og usa ka makalingaw nga hulagway o istorya, ug ang nahibling ikatulo nga pundok pahunahunaa og usa ka hulagway o kasinatian sulod sa templo. Dapita ang mga estudyante nga itutok dinhi niini ang ilang hunahuna sulod sa 30 segundos.
-
Unsay epekto niini diha ninyo, kon aduna, kaninyo ang nag-focus niini nga panghunahuna?
Ipasabut nga ang atong gihunahuna makaimpluwensya sa atong mga tinguha ug kinaiya. Dapita ang usa ka estudyante sa pagbasa og kusog sa Mga Taga-Filipos 4:8–9. Hangyoa ang klase sa pagsunod, nga mangita sa unsay gipahimangno ni Pablo sa mga Santos sa Filipos nga ilang hunahunaon ug buhaton. Mahimo nimong ipasabut nga ang “palandunga ninyo kini” nagpasabut sa pagmatngon, padayon nga maghunahuna.
Dapita ang mga estudyante nga ikonsiderar ang pagmarka sa matag matang sa butang nga gitudlo ni Pablo sa mga Santos aron ma-focus ang ilang mga hunahuna.
-
Agig dugang sa paghunahuna niining mga butanga, unsa pa ang gitambag ni Pablo nga buhaton sa mga miyembro?
-
Unsa nga panalangin ang gisaad ni Pablo sa mga Santos kon sundon nila ang mga pagtulun-an ug ehemplo?
-
Unsa nga baruganan ang atong makat-unan gikan sa gitudlo ni Pablo sa matinud-anong mga Santos diha sa Mga Taga-Filipos 4:8–9? (Ang mga estudyante mahimong mogamit og lain-laing mga pulong, apan kinahanglang mahibaloan nila ang mosunod nga baruganan: Kon itumong sa matinud-anong mga Santos ang ilang mga hunahuna sa bisan unsa nga matarung ug kon sundon nila ang mga apostoles ug mga propeta, niana ang Dios sa kalinaw ilang ikauban.)
-
Sa unsang paagi ang pagtumong sa atong mga hunahuna makaimpluwensya sa atong mga tinguha ug kinaiya?
Hangyoa ang klase sa pagpakli ngadto sa Mga Artikulo sa Hugot nga Pagtuo sa Perlas nga Labing Bililhon. Dapita ang usa ka estudyante sa pagbasa og kusog sa ika-trese nga artikulo sa hugot nga pagtuo. Hangyoa ang klase sa pagsunod, nga mangita sa mga pagkaparehas diha sa Mga Taga-Filipos 4:8.
-
Unsa nga mga pagkaparehas ang inyong nabantayan tali niining duha ka bersikulo?
Ipasabut nga dihang si Propeta Joseph Smith migamit niining “pahimangno ni Pablo” gikan sa Mga Taga-Filipos 4:8 sa ika-trese nga artikulo sa hugot nga pagtuo, iyang giusab ang “palandunga ninyo kining mga butanga” ngadto sa mas aktibo nga “kami naninguha sa pagpangita niining mga butanga.”
-
Ngano kaha nga importante man nga atong tinguhaon ang mga butang nga matinuoron, matinud-anon, putli (o lunsay), mahiyason, matahum, ug dalaygon?
-
Sa unsang paagi ang pagtinguha sa ingon niining mga butanga makatabang nga atong mapunting ang atong mga hunahuna sa maong mga butang?
Bahina ang klase ngadto sa grupo nga tinagutlo o tinagup-at. Hatagi ang matag grupo og kopya sa Alang sa Kalig-on sa mga Kabatan-onan nga (booklet, 2011) ug sa mosunod nga handout. I-assign ang matag grupo og tag-duha sa mosunod nga mga topic gikan sa Alang sa Kalig-on sa mga Kabatan-onan: “Pagpakig-date,” “Sinina ug Panagway,” “Edukasyon,” “Kalingawan ug Media,” “Mga Higala,” “Pinulongan,” ug “Musika ug Pagsayaw.” (I-adjust ang gidak-on sa grupo ug ang gidaghanon sa mga topic depende sa gidak-on sa klase.) Tudloi ang mga estudyante nga sundon ang direksyon nga naa sa handout.
Mga Taga-Filipos 4:8–9
Manwal sa Seminary Teacher sa Bag-ong Tugon—Leksyon 125
Isulat dinhi ang naka-assign sa inyo nga mga hilisgutan o topic:
Para sa matag usa niini nga hilisgutan, hisguti ang mosunod nga mga pangutana:
-
Unsaon nato sa paggamit ang instruksyon ni Pablo sa Mga Taga-Filipos 4:8–9 nga makagiya sa atong mga pagpili kalabut niini nga hilisgutan?
-
Kon maningkamot kita sa pagsunod sa instruksyon ni Pablo, unsa nga mga hagit ang atong masugatan kalabut niini nga hilisgutan?
Dayon hisguti ang mosunod nga pangutana:
-
Ngano nga ang pakig-uban sa Dios sa kalinaw nganhi kanato igo man nga balus sa pagpangita og matarung nga mga butang ug pagsunod sa mga apostoles ug mga propeta?
© 2015 pinaagi sa Intellectual Reserve, Inc. Tanang mga katungod gigahin.
Human sa igo nga panahon, dapita ang usa ka estudyante gikan sa matag grupo nga moreport sa klase sa unsay nahisgutan sa iyang grupo para sa matag pangutana.
-
Samtang gitutok ninyo ang inyong mga hunahuna sa matarung nga mga butang, sa unsang paagi ang Dios sa kalinaw mipakita nga Siya inyong kauban?
Awhaga ang mga estudyante nga isulat sa ilang mga scripture study journal o mga class notebook ang usa ka paagi nga ilang mapalambo ang ilang mga paningkamot nga itumong ang ilang mga hunahuna sa matarung nga mga butang ug mosunod sa mga apostoles ug mga propeta sa Dios.
I-summarize ang Mga Taga-Filipos 4:10 pinaagi sa pagpasabut nga gipasalamatan ni Pablo ang mga Santos sa Filipos sa pagsuporta ug pag-atiman nga ilang gitanyag kaniya atol sa iyang mga pagsulay.
Dapita ang usa ka estudyante sa pagbasa og kusog sa Mga Taga-Filipos 4:11–12. Hangyoa ang klase sa pagsunod, nga mangita kon unsay gisulti ni Pablo sa mga Santos nga iyang nakat-unan.
-
Unsa man ang mga nakat-unan ni Pablo sa tanang mga kahimtang?
Dapita ang usa ka estuyante sa pagbasa og kusog sa Mga Taga-Filipos 4:13–14. Hangyoa ang klase sa pagsunod, nga mangita kon asa naggikan ang kalig-on ni Pablo.
-
Kinsa ang giingon ni Pablo nga maoy tinubdan sa iyang kalig-on?
Ipasabut nga ang pamahayag ni Pablo sa bersikulo 13 naglangkob sa iyang abilidad, sa kalig-on nga gihatag ni Jesukristo, nga buhaton ang tanang butang nga ikahimuot o gikinahanglan sa Dios, lakip ang pagkakontento sa bisan unsang mga kahimtang.
-
Unsa nga mga kamatuoran ang atong makat-unan gikan sa bersikulo 13? (Gamit ang kaugalingon nilang mga pulong, ang mga estudyante kinahanglang mahibalo sa mosunod nga kamatuoran: Makahimo kita sa tanang mga butang pinaagi ni Kristo, kinsa naghatag kanato og kalig-on [tan-awa usab sa Alma 26:12].)
-
Unsa ang atong mahimo aron makagamit kita sa kalig-on nga gihatag ni Jesukristo?
Dapita ang usa ka estudyante sa pagbasa og kusog sa mosunod nga pamahayag ni Presidente Dieter F. Uchtdorf sa Unang Kapangulohan. Hangyoa ang klase sa pagpaminaw kon unsa nga kalig-on ang makahimo nato sa pagbuhat:
“Ang Dios mobu-bu og mga panalangin sa gahum ug kalig-on, naghimo kanato sa pagkab-ot sa mga butang nga unta lisud nato nga kab-uton. Pinaagi kini sa katingalahang grasya sa Dios nga ang Iyang mga anak makabuntog sa mga makuyaw ug tinago nga mga tintasyon sa tiglingla, makahunong sa pagpakasala, ug ‘[ma]hingpit diha ni Kristo’ [Moroni 10:32]” (“Ang Gasa sa Grasya,” Ensign o Liahona, Mayo 2015, 108).
-
Sa unsang paagi kita makasinati niini nga kalig-on o grasya? (Ang posibling mga tubag naglakip sa naglambo nga kamauyunon; pagdesisyon, kaisug; pailub; makanunayon; ug pisikal, mental o espirtuhanong kusog ug gahum.)
-
Kanus-a kamo nahatagan ni Jesukristo og kalig-on sa paghimo og butang nga maayo? (Ikonsiderar usab ang pagpaambit og personal nga kasinatian.)
Mga Taga-Filipos 4:15–23
Gitapos niya ang iyang sulat ngadto sa mga Taga-Filipos uban sa ekspresyon sa pagpasalamat
I-summarize ang Mga Taga-Filipos 4:15–23 pinaagi sa pagpasabut nga gipasalamatan na usab ni Pablo ang mga Santos sa Filipos gumikan sa pagsuporta kaniya atol sa iyang panginahanglan. Ang gasa sa mga Santos usa ka makahimuot nga halad sa Dios, ug misaad si Pablo nga ang Dios mohatag usab sa ilang mga panginahanglan.
Tapusa pinaagi sa pagpaambit sa imong papgamatuod sa mga kamatuoran nga gihisgutan niini nga leksyon.
Scripture Mastery—Mga Taga-Filipos 4:13
Tabangi ang mga estudyante nga mamemorya ang Mga Taga-Filipos 4:13 pinaagi sa pagsulat sa bersikulo diha sa pisara ug sa pagdungan sa pagsulti niini og kusog. Papasa ang usa ka pulong ug magdungan na usab og sulti og kusog sa pulong. Sublia kini hangtud ang tanang pulong napapas na.
Komentaryo ug Background nga Impormasyon
Mga Taga-Filipos 4:6. Magpasalamat bisan sa mga hagit
Si Presidente Dieter F. Uchtdorf sa Unang Kapangulohan mitudlo kon sa unsang paagi ang kinaiya sa pagpasalamat makapanalangin kanato sa bisan unsang mahagitong mga kahimtang nga atong masugatan, nga naglakip sa mga butang nga nakapabalaka kanato:
“Kadaghanan sa mga reference sa kasulatan wala maghisgot og pasalamat para sa mga butang apan hinoon nagsugyot nga magbaton og diwa o kinaiya sa pagkamapasalamaton. …
“Makapili kita nga magmapasalamaton, bisan unsa pa man.
“Kining matang sa pagkamapasalamaton mopatigbabaw bisan unsa pa ang mahitabo sa atong palibut. Mopatigbabaw kini sa kasagmuyo, kawalay kadasig, ug kawalay paglaum. …
“Kon kita magmapasalamaton sa Dios diha sa atong mga kahimtang, makasinati kita og kalinaw taliwala sa kalisdanan. Sa kasubo, makabayaw gihapon kita sa atong kasingkasing diha sa pagdayeg. Sa kasakit, kita makahimaya diha sa Pag-ula ni Kristo. Diha sa pait nga kasub-anan, makasinati kita sa kaduol ug mainitong gakos sa langit. …
“Ang pagpasalamat ngadto sa atong Amahan sa Langit makapalapad sa atong panglantaw ug makapaklaro sa atong panan-aw” (“Mapasalamaton sa Bisan Unsang Kahimtang,” Ensign o Liahona, Mayo 2014, 70, 75, 77).
Mga Taga-Filipos 4:6–7. Ang kalinaw sa Dios
Gitudlo ni Presidente Thomas S. Monson ang mahitungod sa kalinaw nga moabut kon kita mag-ampo:
“Dunay mga panahon nga kamo magalakaw sa dalan nga puno sa mga tunok ug makasinati ug mga kalisud. Tingali dunay mga panahon nga mobati kamo nga nahimulag—gani napalayo—gikan sa Tighatag sa matag maayo nga gasa. Nabalaka kamo nga kamo nag-inusara. Ang kahadlok mopuli sa pagtuo.
“Kon nakita ninyo ang inyong kaugalingon niana nga kahimtang, ako mohangyo ninyo sa pag-ampo. Ganahan ko sa mga pulong ni Presidente Ezra Taft Benson bahin sa pag-ampo. Miingon siya:
“‘Sa tibuok nakong kinabuhi ang tambag nga mosalig sa pag-ampo ang labing bililhon kay sa ubang tambag nga akong … nadawat. Nahimo kining kabahin nako—ang angkla, tinubdan sa kalig-on, ug tinubdan sa akong kahibalo sa balaan nga mga butang. …
“‘… Bisan kon ang mga dimalas moabut, diha sa pag-ampo atong makaplagan ang kahupayan, kay ang Dios mamulong og kalinaw sa atong kalag. Kana nga kalinaw, kanang kalma nga pagbati, ang labing mahinungdanong panalangin’ [Ezra Taft Benson, ‘Pray Always,’ Ensign, Peb. 1990, 4–5].
“Mipahimangno si Apostol Pablo:
“‘Hinonoa nga ang tanang butang ipahibalo ninyo sa Dios.
“‘Ug ang kalinaw sa Dios, nga lapaw sa tanang pagpanabut, magabantay sa inyong mga kasingkasing ug sa inyong mga hunahuna diha kang Jesukristo’ [Mga Taga-Filipos 4:6–7].
“Pagkamahimayaon nga saad! Ang kalinaw mao ang atong gipangita, ang atong gitinguha.
“Wala kita gibutang dinhi sa yuta aron mag-inusara. Pagkanindot nga tinubdan sa gahum, kalig-on, ug kahupayan alang sa matag usa nato” (“Wala Kita Mag-inusara,” Ensign o Liahona, Nob. 2013, 121).
Mga Taga-Filipos 4:8. Ang pahimangno ni Pablo
“Gipahimangnoan ni Pablo ang mga Santos nga ‘palandunga ninyo kini’ (hatagan og mainampingon, padayong paghunahuna) ang mga butang nga tinuod, bisan unsang butang dungganan, bisan unsang butang matarung, bisan unsang butang ulay, bisan unsang butang hiligugmaon, bisan unsay butang maayong pamation (Philippians 4:8). Dihang gihisgutan ni Propeta Joseph Smith … kini nga ‘pahimangno ni Pablo’ gikan sa ika-trese nga artikulo sa hugot nga pagtuo, iyang giilisan ang ‘palandunga kining mga butanga’ ngadto sa mas aktibo nga ‘naninguha niining mga butanga’ (Mga Artikulo sa Hugot nga Pagtuo 1:13; mga italics gidugang). Si Elder Joseph B. Wirthlin (1917–2008) sa Korum sa Napulog Duha ka mga Apostoles naghisgot sa pahimangno aron ‘maninguha niining mga butanga’:
“‘Ang pulong nga naninguha nagpasabut nga moadto sa pagpangita, mosulay sa pagdiskubre, o mosulay sa pag-angkon. Nagkinahanglan kini og aktibo, masaligong pag-atubang sa kinabuhi. … Sukwahi kini sa magpaabut lamang nga moabut kanato ang swerte, nga walay paningkamot sa atong bahin.
“‘Atong mapuno ang atong kinabuhi sa kamaayo, walay ibilin nga luna sa bisan unsa lang. Dunay daghan kaayong maayo gikan sa atong mga pagpili nga kinahanglang dili gayud kita moambit sa dautan. …
“‘Kon tinguhaon nato kining mga butanga nga mahiyason ug matahum, siguradong makaplagan nato kini. Gani, kon tinguhaon nato ang dautan, kana usab atong makaplagan’ (“Seeking the Good,” Ensign, Mayo 1992, 86)” (New Testament Student Manual [manual sa Church Educational System, 2014], 437–38).
Si Elder Bruce R. McConkie sa Korum sa Napulog Duha Ka mga Apostoles mitambag usab sa mga miyembro sa Simbahan “nga pangitaon unsa ang maayo ug unsay makapalambo sa tanang butang. …
“Kon tan-awon nato ang tanang nagpatigbabaw sa kalibutan, tingali sayon ra ang pagsentro sa atong pagtagad sa negatibo o dautang mga butang, o usikan ang atong mga enerhiya sa mga butang ug sa mga panimpalad nga kadudahan ang bili ug kwestiyonabling sangputanan. …
“Nagtuo ko nga ang mga Santos sa Ulahing mga Adlaw dunay dakong obligasyon nga nagdasig kanila sa pagmaya diha sa Ginoo, sa pagdayeg kaniya sa iyang kamaayo ug grasya, sa pagpamalandong sa iyang mahangturong mga kamatuoran diha sa ilang mga kasingkasing, ug sa pagpahimutang sa ilang mga kasingkasing diha sa pagkamatarung. …
Adunay usa ka mahangturong balaod, nga giorden sa Dios mismo sa wala pa ang katukuran sa kalibutan, nga ang matag tawo moani sa unsay iyang gipugas. Kon maghunahuna kitag dautan, molitok ang atong mga dila og hugawng mga pulong. Kon mamulong kita og mga dautang pulong, mosangput nga mobuhat kita og dautan. Kon ang atong mga hunahuna nasentro sa lawasnon ug kadautan sa kalibutan, nan ang pagkakalibutanon ug pagkadili matarung maingon og normal na lang nga dagan sa kinabuhi. Kon maghunahuna kita og mga butang nga may kalabutan sa imoralidad sa pakighilawas [sex] diha sa atong hunahuna, sa dili madugay magtuo ta nga ang tanan pulos imoral ug hugaw ug moguba kini sa giatang tali kanato ug sa kalibutan. …
“Sa laing bahin, kon maghunahuna kita sa atong kasingkasing sa mga butang sa pagkamatarung, mamahimo kitang matarung” (“Think on These Things,” Ensign, Ene. 1974, 46–48).
Mga Taga-Filipos 4:13. Gihatagan kita ni Jesukristo og kalig-on sa paghimo sa tanang butang nga maayo
Ang kalig-on nga gihatag ni Jesukristo kanato sa paghimo sa tanang butang nga maayo gipasabut nga mao ang grasya (tan-awa sa Giya ngadto sa mga Kasulatan, “Grasya”). scriptures.lds.org). Si Presidente Dieter F. Uchtdorf sa Unang Kapangulohan mitudlo sa mosunod mahitungod sa kalig-on nga gihatag ni Jesukristo sa paghimo sa tanang butang nga maayo:
“Usa ka gamhanang ekspresyon niana nga gugma [ni Kristo] mao ang unsay kasagarang gitawag sa mga kasulatan og grasya sa Dios—ang balaang panabang ug gasa sa kalig-on diin kita nagtubo gikan sa masalaypon ug may kinutubang mga tawo nga kita karon mao ngadto sa gihimaya nga mga tawo sa ‘kamatuoran ug kahayag, hangtud [kita] pagahimayaon diha sa kamatuoran ug [masayud] sa tanan nga mga butang’ [Doktrina ug mga Pakigsaad 93:28]. …
“… Ang Dios mobu-bu og mga panalangin sa gahum ug kalig-on, naghimo kanato sa pagkab-ut sa mga butang nga unta lisud nato nga kab-uton. Pinaagi sa katingalahang grasya sa Dios nga ang Iyang mga anak makabuntog sa mga makuyaw ug tinago nga mga tintasyon sa tiglingla, makahunong sa pagpakasala, ug ‘mahingpit diha ni Kristo’ [Moroni 10:32].
“Bisan og kitang tanan adunay mga kahuyang, kita makabuntog niini. Sa tinuod pinaagi sa grasya sa Dios nga, kon kita magpaubos sa atong mga kaugalingon ug magbaton og hugot nga pagtuo, ang mahuyang nga mga butang mahimo nga malig-on [tan-awa sa Ether 12:27].
“Sa atong tibuok nga kinabuhi, ang grasya sa Dios naghatag og temporal nga mga panalangin ug espiritwal nga mga gasa nga mopalambo sa atong mga abilidad ug mopabuhong sa atong kinabuhi. Ang Iyang grasya makahashas kanato. Ang Iyang grasya motabang kanato nga mahimong labing maayo. …
“Kita ba nakasabut sa atong pagka-utangan ngadto sa atong Langitnong Amahan ug nangamuyo sa tibuok natong mga kalag alang sa grasya sa Dios?” (“Ang Gasa sa Grasya,” Ensign o Liahona, May 2015, 107–9).
Si Elder John H. Groberg sa Seventy mipakigbahin og ehempo kon sa unsang paagi ang Dios mihatag sa matinud-anong tawo og kalig-on nga nagahimo niyang makatuman sa usa ka matarung nga tahas (tan-awa sa “The Lord’s Wind,” Ensign, Nob. 1993, 26–28).