Mga Taga-Roma 8–1 Mga Taga-Corinto 6 (Unit 21)

Materyal sa Pagpangandam alang sa Home-Study Teacher

Summary sa mga Leksyon sa Daily Home-Study

Ang mosunod nga mga summary sa panghitabo, mga doktrina, ug mga baruganan nga makat-unan sa mga estudyante samtang sila magtuon sa Mga Taga-Roma 8–16 ug 1 Mga Taga-Corinto 1–6 (unit 21) dili tuyo nga itudlo isip kabahin sa imong leksyon. Ang mga leksyon nga imong itudlo magtutok lamang sa pipila niining mga doktrina ug mga baruganan. Sunda ang mga pag-aghat sa Balaang Espiritu samtang naghunahuna ka sa mga panginahanglan sa imong mga estudyante.

Day 1 (Mga Taga-Roma 8–11)

Gikan sa mga pagtulun-an ni Pablo ngadto sa mga Santos sa Roma mahitungod sa pagkaespirituhanon o sa pagkakalibutanon sa hunahuna, ang mga estudyante nakat-on nga kon kita mosunod sa impluwensya sa Espiritu, atong mabuntog ang kalagmitan sa kinaiyanhon nga tawo sa pagpakasala. Nailhan usab sa mga estudyante ang mosunod nga mga kamatuoran: Kon kita matinud-anong mga anak sa pakigsaad sa Dios, mamahimo kitang isigka-manununod uban ni Jesukristo sa tanan nga iya sa Langitnong Amahan. Kon atong gihigugma ang Dios, tanang mga butang molihok alang sa atong kaayohan. Pinaagi ni Jesukristo atong mabuntog ang tanang hagit ug kalisdanan sa mortalidad. Kon kita modawat ug mosunod ni Jesukristo ug sa Iyang ebanghelyo, kita makadawat sa mga panalangin sa pakigsaad sa Dios ug maluwas.

Day 2 (Mga Taga-Roma 12–16)

Sa Mga Taga-Roma 12–13, ang mga estudyante nakadiskobre nga ang Dios naglaum nato sa pagpahinungod sa atong mga kinabuhi ngadto Kaniya ug molikay sa pagpahiuyon ngadto sa kalibutan, ug kon kita mobuhat sa ingon, kita mahimong mas mahisama ni Jesukristo. Sa Mga Taga-Roma 14–15, ang mga estudyante nakakat-on nga sa mga butang nga wala mahisguti sa piho nga mga sugo, angay natong likayan ang paghukom sa mga pagpili sa uban ug magmahunahunaon kon sa unsang paagi nga ang atong mga pagpili nakaapekto sa uban. Ang mga estudyante nakakat-on usab nga ang mga kasulatan gisulat aron sa pagtudlo kanato ug sa paghatag kanato og paglaum.

Day 3 (1 Mga Taga-Corinto 1–2)

Sa usa ka sulat ngadto sa mga Santos sa Corinto, si Pablo namulong og pipila ka mga kabalaka ug mga pangutana. Gikan sa iyang mga sinulat, ang mga estudyante nakakat-on nga ang Ginoo naglaum kanato isip mga Santos nga magkahiusa ug wad-on ang pagkabahin-bahin ug mga panagbingkil ug aron ato lamang mahibaloan ug masabtan ang mga butang sa Dios pinaagi sa Iyang Espiritu.

Day 4 (1 Mga Taga-Corinto 3–6)

Dinhi niining leksyon ang mga estudyante nagpadayon sa pagtuon sa sulat ni Pablo ngadto sa mga Santos sa Corinto. Gikan sa mga pulong ni Pablo, nakat-unan sa mga estudyante ang mosunod nga mga kamatuoran: Samtang makatabang kita sa uban nga makakat-on mahitungod sa ebanghelyo ni Jesukristo, pinaagi lamang sa gahum sa Espiritu Santo nga ang mga tawo makabig. Ang Ginoo mohukom kanato sa makiangayong paagi tungod kay Siya nakahibalo sa tanang butang, lakip sa mga hunahuna ug mga tinguha sa atong mga kasingkasing. Kon mopili kita sa pakig-uban og maayo niadtong mihangop sa sala, mahimo kita nga maimpluwensya sa ilang kadautan.

Pasiuna

Kini nga leksyon makatabang sa mga estudyante nga makasabut kon unsaon sa paglikay sa sala kon kini naglibut kanila. Dugang pa, sila makakat-on kon nganong importante ang pagpabiling putli sa ilang lawas.

Mga Sugyot alang sa Pagtudlo

1 Mga Taga-Corinto 6

Nagtudlo si Pablo sa mga Santos mahitungod sa panaghiusa ug sa balaud sa kaputli

I-drawing ang usa ka litrato diha sa pisara sa usa ka panaksan nga may dunot nga prutas uban ang usa ka piraso nga presko nga prutas. Dapita ang mga estudyante sa pagkonsiderar kon nakahunahuna ba sila kon unsaon sa paglikay sa sala kon napalibutan sila niini.

Samtang nagtuon ang mga estudyante sa 1°Mga Taga-Corinto°6, dapita sila sa pagpangita og mga kamatuoran nga gitudlo ni Apostol Pablo nga makatabang nila nga magpakabuhi sa matarung bisan pa og gilibutan sa dautan nga mga impluwensya.

I-summarize ang 1 MgaTaga-Corinto 6:1–8 pinaagi sa pagpasabut nga si Pablo mitambag sa mga Santos nga mga taga Corinto nga husayon ang panagbangi tali sa ilang mga kaugalingon kay sa modangup ngadto sa mga korte nga sibil.

Dapita ang usa ka estudyante sa pagbasa og kusog sa 1 Mga Taga-Corinto 6:9–11. Hangyoa ang klase sa pagsunod, nga mangita sa mga binuhatan sa pagpakasala didto sa Corinto nga gitudlo ni Pablo nga likayan sa mga miyembro sa Simbahan.

Unsang mga matang sa mga kinaiya sa pagpakasala nga gitudlo ni Pablo nga likayan sa mga miyembro sa Simbahan?
Sumala sa 1 Mga Taga-Corinto 6:11, unsa ang gipahinumdom ni Pablo niining mga Santos mahitungod sa ilang mga kaugalingon? (Daghang mga kinabig gikan sa Corinto nga miapil niining mga kinaiya sa pagkamakasasala sa wala pa miapil sa Simbahan, apan naghinulsol sila ug nalimpyuhan gikan sa ilang mga kasal-anan.)

Ipasabut nga sa karaang panahon ang Corinto adunay dungog sa pagka-imoral, ug daghang mga taga Corinto mitanyag sa ideya nga ang atong mga lawas gihimo aron maglipay-lipay. I-summarize ang Hubad ni Joseph Smith sa 1 Mga Taga-Corinto 6:12 pinaagi sa pagpasabut nga si Pablo mitudlo batok sa pilosopiya nga walay husto o sayop.

Sa unsang paagi nga ang mga ideya ug mga binuhatan didto sa Corinto managsama sa uso nga atong nakita sa kalibutan karon?

Dapita ang usa ka estudyante sa pagbasa og kusog sa 1 Mga Taga-Corinto 6:13. Hangyoa ang klase sa pagsunod, nga mangita sa unsay gitudlo ni Pablo mahitungod sa katuyoan sa atong mga lawas. (Mahimo nimong ipasabut nga ang pulong nga karne nangahulugan og pagkaon.)

Unsa ang gitudlo ni Pablo mahitungod sa atong mga lawas? (Samtang daghan pang mga taga Corinto nga daw mituo nga ang lawas gihimo lamang alang sa lawasnong kalipay, gikorihian ni Pablo kana nga panlantaw pinaagi sa pagtudlo nga ang atong mga lawas gilalang aron sa pagtuman sa mga katuyoan sa Ginoo.)

I-summarize ang 1 Mga Taga-Corinto 6:14–17 pinaagi sa pagpasabut nga kadtong mipasakop sa Simbahan nahiusa uban ni Kristo isip espirituhanong “mga sakop” sa Iyang lawas. Si Pablo mipasabut usab nga ang sekswal nga imoralidad wala mahiangay sa usa ka espirituhanon nga pakigrelasyon uban ni Jesukristo.

Dapita ang usa ka estudyante sa pagbasa og kusog sa 1 Mga Taga-Corinto 6:18. Hangyoa ang klase sa pagsunod, nga mangita kon unsa ang gitudlo ni Pablo sa mga Santos nga mga taga Corinto nga buhaton. (Mahimo nimong ipasabut nga sa Hubad ni Joseph Smith sa 1 Mga Taga-Corinto 6:18 nausab ang mga pulong “walay lawas” ngadto sa “batok sa lawas ni Kristo.”)

Unsa man ang gitambag ni Pablo nga buhaton sa mga Santos?
Unsa ang gitudlo ni Pablo mahitungod niadtong mga nakahimo sa pagpanapaw? (Mahimo nimong isugyot nga markahan sa mga estudyante ang mga pulong diha sa bersikulo 18 nga nagtudlo sa mosunod nga kamatuoran: Kadtong kinsa nakahimo og sala nga pagpanapaw nakasala sa ilang kaugalingong mga lawas.)

Ipasabut nga ang sunod nga gitudlo ni Pablo kon nganong ang pagpanapaw, o sekswal nga imoralidad, usa ka sala “batok sa kaugalingong lawas [sa tawo].”

Pahinumdumi ang mga estudyante nga sa 1 Mga Taga-Corinto 6:19–20 mao ang usa ka scripture mastery passage. Dapita ang usa ka estudyante sa pagbasa og kusog sa 1°Mga Taga-Corinto 6:19. Hangyoa ang klase sa pagsunod, nga mangita kon sa unsay gitandi ni Pablo sa atong mga lawas.

Sa unsa gikomparar ni Pablo ang atong mga lawas?

Pagpakita og litrato sa templo.

Unsa ang kalainan tali sa usa ka templo ug sa bisan unsang building?
Unsaon man ninyo sa pag-summarize ang kamatuoran nga gitudlo ni Pablo sa bersikulo 19? (Ang mga estudyante mahimong mogamit og lain-laing mga pulong apan kinahanglan nga ilang mailhan ang mosunod nga doktrina: Ang atong mga lawas mao ang mga templo sa Dios diin ang Espiritu mahimong mopuyo.)
Sa unsang paagi nga ang pagkasabut nga ang atong lawas mga templo makaimpluwensya kon unsaon nato sa pagtratar ang atong lawas ug ang lawas sa uban?

Dapita ang usa ka estudyante sa pagbasa sa mosunod nga pamahayag ni Elder D.°Todd Christofferson sa Korum sa Napulog Duha ka mga Apostoles. Hangyoa ang klase sa pagpaminaw alang sa dugang nga panabut mahitungod kon sa unsang paagi ang pagsabut nga ang atong mga lawas mga templo sa Dios nga kinahanglang moimpluwensya kon giunsa nato kini pagtratar.

“Sa pag-ila niini nga mga kamatuoran [gikan sa 1 Mga Taga-Corinto 6:19–20] …, siguradong dili nato hugawan atong lawas, sama sa mga tatoo; o mopaluya niini, sama sa drugas; o hugawan kini, sama sa pakighilawas nga dili pa minyo, pagpanapaw, o pagkadili maligdong. … Ingon nga ang atong lawas instrumento sa atong espiritu, mahinungdanon kaayo nga atong ampingan kinikutob atong mahimo. Kinahanglan nga atong ipahinungod ang mga gahum niini sa pagserbisyo ug sa pagpadayon sa buhat ni Kristo” (“Mga Hulagway sa Gipahinungod nga Kinabuhi,” Ensign o Liahona, Nob. 2010,°18).

Unsay inyong hunahuna sa gipasabut ni Pablo sa mga pulong “kamo dili na inyo sa inyong kaugalingon” sa 1°Mga Taga-Corinto 6:19?

Dapita ang usa ka estudyante sa pagbasa og kusog sa 1 Mga Taga-Corinto 6:20. Hangyoa ang klase sa pagsunod, nga mangita kon nganong ang atong lawas dili na sa atong kaugalingon.

Unsa nga mga pulong nga mopakita nga ang atong mga lawas dili na atong kaugalingon? (Ipasabut nga ang “gipalit na sa usa ka bili” nagpasabut nga natubos o nabawi na pinaagi sa Pag-ula ni Jesukristo.)
Unsaon man ninyo sa pag-summarize ang kamatuoran nga gitudlo ni Pablo sa bersikulo 19–20? (Human makatubag ang mga estudyante, tabangi sila nga makahibalo sa mosunod nga kamatuoran: Tungod kay napalit na kita sa usa ka bili pinaagi sa Pag-ula ni Jesukristo, atong mga lawas dili na atong kaugalingon.)

Paghangyo og usa ka estudyante sa pagbasa sa mosunod nga pamahayag ni Elder Jeffrey°R. Holland sa Korum sa Napulog Duha:

“Palihug, ayaw gayud pag-ingon: ‘Kinsa man ang nasakitan niini? Nganong walay gamayng kagawasan? Ako makalapas karon ug unya maghinulsol.’ Palihug ayaw pagpalabi sa pagbinuang ug kapintas. Kamo dili mahimong walay tulubagon sa ‘paglansang pag-usab sa Anak sa Dios’ [tan-awa sa mga Hebreohanon 6:6]. ‘Likayi ang pakighilawas’ [1°Mga Taga-Corinto 6:18], si Pablo mituaw, ug mipalayo ‘sa bisan unsa nga butang nga sama niini’ [D&P 59:6, emphasis gidugang], gidugang sa Doktrina ug mga Pakigsaad. Ngano? Nan, alang sa usa ka rason tungod sa dili mabana-bana nga pag-antus sa lawas ug espiritu nga naantus sa Manluluwas sa kalibutan aron nga kita mahimong makalikay [tan-awa ilabi na sa Doktrina ug mga Pakigsaad 19:15–20]. Kita nakautang Kaniya og usa ka butang tungod niana. Sa pagkatinuod, kita nakautang Kaniya sa tanang butang tungod niana” (“Personal Purity,” Ensign, Nob. 1998, 76).

Sa unsang paagi nga ang paghinumdom nga ang atong mga lawas dili atong kaugalingon maka-impluwensya sa mga pagpili nga atong himoon kalabut sa atong mga lawas?

Patan-awa ang mga estudyante sa litrato sa presko nga mga prutas nga naa sa pisara nga napalibutan sa dunot nga mga prutas.

Sa unsang paagi nga ang pagsabut niining mga kamatuoran mahitungod sa atong lawas makatabang kanato nga magpabiling putli kon kita napalibutan sa mga pagkadautan?

Pagpamatuod sa mga kamatuoran nga inyong nahisgutan. Dapita ang mga estudyante sa pagpamalandong sa mga pagbati o mga pag-aghat nga ilang nadawat panahon sa leksyon ug sa pagsunod sa mga pag-aghat.

Sunod nga Unit (1°Mga Taga-Corinto 7–14)

Ipasabut ngadto sa mga estudyante nga ang matag usa nila nahatagan ug usa ka espirituhanong gasa gikan sa Langitnong Amahan. Dapita sila sa pagtuon sa sunod nga unit nga mangita kon unsa pa ang ubang espirituhanong mga gasa nga gihatag sa Langitnong Amahan sa Iyang mga anak. Sultihi sila nga si Apostol Pablo mitudlo nga bisan kon ihatag pa niya ang tanan niyang mga kabtangan aron mapakaon ang kabus, ug usab ihatag ang iyang lawas aron sunugon, kon wala pa siyay naangkon nga pihong espirituhanong gasa, wala siyay pulos. Dapita ang mga estudyante sa paghunahuna mahitungod sa unsa nga mga gasa ang nahatag diha nila.