Leksyon 106
1 Mga Taga-Corinto 7–8
Pasiuna
Si Pablo mitudlo sa minyo ug dili minyo nga mga miyembro sa Simbahan didto sa Corinto mahitungod sa kaminyoon ug misyonaryo nga buhat. Nagtubag sa pangutana mahitungod sa pagkaon og karne nga gihalad ngadto sa diosdios, si Pablo mitudlo sa mga Santos sa pagkonsiderar sa epekto sa ilang personal nga mga gipraktis diha sa uban ug mahimong andam sa pagbiya sa pipila ka mga binuhatan nga tingali maoy hinungdan sa espirituhanon nga babag.
Mga Sugyot alang sa Pagtudlo
1 Mga Taga-Corinto 7
Si Pablo mitambag sa minyo ug dili minyo nga mga miyembro sa Simbahan mahitungod sa kaminyoon
Kopyaha ang mosunod nga diagram diha sa pisara:
Aron matabangan ang mga estudyante sa pagsabut sa kinatibuk-ang kahulugan sa 1 Mga Taga-Corinto 7, pahinumdumi sila nga, sama nato, ang mga miyembro sa Simbahan didto sa Corinto nagpuyo sa usa ka katilingban nga dunay makalibog ug nagkasungi nga mga ideya mahitungod sa kaminyoon ug sa pisikal o sekswal nga kasuod.
-
Base sa unsay inyong mahinumduman sa inyong pagtuon sa 1 Mga Taga-Corinto 5–6, unsa ang pipila ka mga dili tinuod nga mga pagtuo mahitungod sa sekwal nga mga relasyon nga mipasulabi didto sa Corinto?
Human matubag sa mga estudyante, isulat ang mosunod diha sa wala nga bahin sa diagram ubos sa “Dili Tinuod nga Pagtuo:” Mahimo ra ang makiglambigit sa pisikal nga kasuod ni bisan kinsa.
Ipasabut nga ang mga miyembro sa Simbahan didto sa Corinto misulat ngadto ni Apostol Pablo naghangyo og giya kalabut sa sumbanan sa Ginoo sa sekswal nga kaputli.
Dapita ang usa ka estudyante sa pagbasa og kusog sa 1 Mga Taga-Corinto 7:1, ug hangyoa ang klase sa pagpangita sa gipangutana sa mga Santos nga taga Corinto kang Pablo.
-
Unsa ang gipangutana sa mga Santos nga taga Corinto ngadto ni Pablo?
Ipasabut nga ang mga pulong “maayo unta alang sa lalaki ang dili pagpakigduol og babaye” sa bersikulo 1 nagpakita nga ang taga Corinto nga mga Santos adunay mga pangutana mahitungod kon kanus-a ug kon ang pisikal nga kasuod angay ba. Ang pipila mahimong nakapangutana kon ang minyo nga mga tawo angay bang malambigit sa pisikal nga kasuod. Isulat ang mosunod diha sa tuo nga bahin sa diagram ubos sa “Dili Tinuod nga Pagtuo:” Wala gayud itugot ang pag-apil sa pisikal nga kasuod, bisan gani sa kaminyoon.
Ipasabut nga ang duha ka dili tinuod nga pagtuo nga gisulat sa diagram nagpresentar sa pasulabi nga pag-aninaw nga milahi gikan sa sumbanan sa Dios alang sa pisikal nga kasuod.
Hangyoa ang usa ka estudyante sa pagbasa og kusog sa 1 Mga Taga-Corinto 7:2–3. Dapita ang klase sa pagsunod, nga mangita sa unsay gitudlo ni Pablo sa mga taga-Corinto mahitungod sa pisikal nga kasuod. (Mahimo nimong tabangan ang mga estudyante sa pagsabut nga ang fornication nagpasabut sa pagkighilawas nga gawas sa kaminyoon ug ang due benevolence nagpasabut sa gugma ug kasuod nga gipadayag tali sa bana ug asawa.)
Pagdapit og usa ka estudyante sa pagbasa sa mosunod nga pamahayag nga makita sa Alang sa Kalig-on sa Kabatan-onan:
“Ang pisikal nga kasuod tali sa bana ug asawa maanindot ug sagrado. Kini gi-orden sa Dios aron malalang ang mga anak ug alang sa pagpadayag og gugma tali sa bana ug asawa. Ang Dios misugo nga ang sekswal nga kasuod itagana alang sa kaminyoon” (Alang sa Kalig-on sa Kabatan-onan [booklet, 2011], 35).
-
Gikan sa unsay ato nang nabasa, unsa man ang atong makat-unan mahitungod sa pisikal nga kasuod? (Human makatubag ang mga estudyante, isulat ang mosunod nga kamatuoran diha sa diagram ubos sa “Tinuod:” Ang pisikal nga kasuod tali sa bana ug asawa gi-orden sa Dios.)
Dapita ang usa ka estudyante sa pagbasa og kusog sa mosunod nga pamahayag ni Presidente Boyd K. Packer sa Korum sa Napulog Duha ka mga Apostoles. Hangyoa ang klase sa pagpaminaw kon ngano nga ang kasuod diha sa kaminyoon gi-orden sa Dios.
“Ang gahum sa pagpasanay dili sulagma nga bahin sa plano; kini ang plano sa kalipay; kini ang yawe sa kalipay.
“Ang tinguha nga makahimo og anak ang mga tawo kanunay ug labihan kakusog. Ang atong kalipay sa mortal nga kinabuhi, ang atong kalipay ug kahimayaan magdepende kon unsaon nato pagtubag kining makanunayon, dili kapugngan nga pisikal nga mga tinguha.” (“Ang Plano sa Kalipay,” Ensign o Liahona, Mayo 2015, 26).
-
Unsa ang mga katuyoan sa pisikal nga kasuod tali sa bana ug asawa?
-
Ngano nga ang pagsanay—ang abilidad sa paglalang og mortal nga kinabuhi—importante kaayo sa plano sa Langitnong Amahan?
I-summarize ang 1 Mga Taga-Corinto 7:4–24 pinaagi sa pagpasabut nga si Pablo mitudlo nga ang mga kapikas kinahanglan dili magpugong sa pagbati sa usag usa diha sa kaminyoon, nga ang balo ug nadiborsyo nga mga miyembro sa Simbahan tugutan nga maminyo pag-usab kon pilion nila, ug ang mga miyembro sa Simbahan kinahanglan “mosunod sa Dios” bisan unsa ang ilang mga kahimtang. Si Pablo misalikway usab sa diborsyo.
Aron matabangan ang mga estudyante nga mailhan ang laing kamatuoran sa mga sinulat ni Pablo sa 1 Mga Taga-Corinto 7, bahina ang mga estudyante sa duha o tulo ka grupo, ug hatagi ang matag grupo og usa ka kopya sa mosunod nga handout:
Manwal sa Magtutudlo sa Seminary sa Bag-ong Tugon—Leksyon 106
Adunay mga miyembro sa Simbahan sa Corinto kansang mga kapikas dili mga Kristiyano.
-
Unsa kaha nga mga kalisud ang masinati sa mga kapikas sa nagkalain-laing pagtuo?
Basaha og kusog ang tambag ni Pablo ngadto niining mga pamilya nga dili tanan miyembro sa 1 Mga Taga-Corinto 7:12–17, nga mangita sa mga kamatuoran nga gitudlo ni Pablo nga makatabang sa mga pamilya nga dili tanan miyembro sa simbahan karon.
Sa mosunod nga mga luna, i-summarize unsa ang gitudlo ni Pablo mahitungod sa epekto sa matinud-anon nga mga miyembro sa Simbahan diha sa ilang mga pamilya: .
-
Unsa nga mga ehemplo ang inyong nakit-an diin ang usa ka miyembro sa Simbahan adunay positibo nga epekto diha sa mga sakop sa pamilya nga mahimong dili miyembro o dili aktibo sa Simbahan?
© 2015 pinaagi sa Intellectual Reserve, Inc. Tanang mga katungod gigahin.
Human sa igong panahon, hangyoa ang mga estudyante sa pagreport sa kamatuoran nga ilang nailhan sa 1 Mga Taga-Corinto 7:12–17. Ang mga tubag sa mga estudyante mahimong managlahi, apan kinahanglan mopamahayag kini og kamatuoran nga susama sa mosunod: Ang matinud-anon nga mga sumusunod ni Jesukristo adunay balaanon nga epekto sa ilang mga pamilya.
Mahimo kang magdapit og pipila ka mga estudyante aron mopakigbahin og mga ehemplo sa mga miyembro sa Simbahan kinsa nakabaton og positibo nga epekto sa mga sakop sa pamilya kinsa dili mga miyembro sa Simbahan o kinsa dili aktibo sa Simbahan.
I-summarize ang 1 Mga Taga-Corinto 7:25–40 pinaagi sa pagpasabut nga si Pablo mihatag sa iyang opinyon mahitungod sa dili minyo nga mga miyembro kinsa “gitawag ngadto sa pagpangalagad” (Hubad ni Joseph Smith, 1 Mga Taga-Corinto 7:29 [Giya ngadto sa mga Kasulatan]) ug gipasabut nga ang ilang mga kahimtang gitugutan sila sa pagserbisyo sa Ginoo nga “dili magkapuliki” (bersikulo 35), o walay temporal nga mga kabalaka nga kalabut sa pagsangkap alang sa pamilya. Hinoon, siya wala magdumili kanila sa pagminyo.
1 Mga Taga-Corinto 8
Si Pablo mitubag sa mga pangutana mahitungod sa pagkaon nga gihalad ngadto sa mga diosdios
Dapita ang usa ka estudyante sa pagbasa og kusog sa mosunod nga pamahayag ni Elder L. Tom Perry sa Korum sa Napulog Duha ka mga Apoltoles:
“Akong gigahin ang akong panginabuhi diha sa department store nga negosyo. Tungod kay kabahin ko sa management team, importante kanako nga makig-uban sa mga organisasyon sa lokal nga negosyo. Ang mga miting sa kasagaran niining mga oganisasyon kanunayng magsugod sa oras sa ting-inom [diin ang mga ilimnon nga makahubog maoy naandan nga idalit]. Panahon kini sa pakigsagol ug pakigsuod sa mga tawo nga apil sa organisasyon. Kanunay ko nga mobati nga dili komportable niining mga orasa sa pakighugoy-hugoy. Sa sinugdanan nangayo ko og lemon-lime nga softdrink. Nadiskubrihan dayon nako nga ang lemon-lime nga softdrink pareha og dagway sa uban nga mga ilimnon. Dili ko makamugna og hunahuna nga ako dili manginginom uban sa tin-aw nga softdrink nga naa sa akong mga kamot” (“Ang Tradisyon sa usa ka Balanse, Matarung nga Kinabuhi,” Liahona, Ago. 2011, 32–33).
-
Unsa kahay nahitabo kon si Elder Perry mipadayon pa sa pag-inom sa tin-aw nga softdrink atol sa oras sa ting-inom?
-
Unsa pay laing mga sitwasyon diin ang atong ehemplo mahimong negatibo nga impluwensya sa uban bisan og kita wala nagbuhat og bisan unsang sayop?
Ipasabut nga ang mga miyembro sa Simbahan didto sa Corinto nahibulong kon mahimo ra ba ang pagkaon sa kalan-on nga gihalad ngadto sa mga diosdios, o mga dios sa pagano.
Ipasabut nga si Pablo miila nga ang mga miyembro sa Simbahan mahimong maghunahuna nga mahimo ra kini tungod kay nasayud man sila nga wala gayuy mga dios sa pagano (tan-awa sa 1 Mga Taga–Corinto 8:4–6).
Dapita ang mga estudyante sa pagbasa sa 1 Mga Taga-Corinto 8:1, ug hangyoa ang klase sa pagpangita sa unsa ang gitudlo ni Pablo sa mga Santos sa Corinto.
-
Bisan ang mga tawo nasayud nga ang mga diosdios dili tinuod, unsa ang gisulti ni Pablo nga mas importante kay sa unsay ilang nahibaloan? (Gugma nga putli, o dili hakog nga gugma alang sa uban.)
-
Sumala niining bersikulo, unsa kaha ang sangputan gikan sa pagkahibalo? (Mamahimong mapagarbuhon, o arogante.) Unsa ang mahimong resulta sa gugmang putli? (Kaayohan, o pagpalig-on sa kaugalingon o sa uban.)
Dapita ang usa ka estudyante sa pagbasa og kusog sa 1 Mga Taga-Corinto 8:7–10. Hangyoa ang klase sa pagsunod, nga mangita kon ang mga Santos sa Corinto dili ba angayng mokaon sa kalan-on nga nahalad ngadto sa mga diosdios. (Mahimo nimong tabangan ang mga estudyante sa pagsabut nga ang huyang niining mga bersikulo mahimong nagpasabut sa kahuyang sa panabut ug nga ang kagawasan [bersikulo 9] nagpasabut sa kagawasan sa mga miyembro sa Simbahan sa pagkaon sa kalan-on nga mahimong nahalad ngadto sa diosdios.)
-
Sumala sa bersikulo 9, ubos sa unsa nga kondisyon nga si Pablo miingon nga sila dili angayng mokaon sa kalan-on nga nahalad ngadto sa diosdios? (Kon kini mahimong usa ka babag alang sa usa ka tawo nga huyang ang pagpamatuod o walay kahibalo sa ebanghelyo.)
-
Unsa nga ehemplo ang gihatag ni Pablo sa bersikulo 10 mahitungod sa usa ka paagi nga ang pagkaon sa kalan-on nga nahalad ngadto sa diosdios mahimong usa ka babag? (Kon ang usa ka miyembro sa Simbahan kinsa huyang sa pagtuo makakita sa laing miyembro nga nagkaon diha sa kan-anan nga dunay kalabutan sa lokal nga templo sa pagano, ang sakop nga mas huyang og pagtuo mahimong magtuo usab nga dili sayop ang pagsimba sa diosdios.)
Hangyoa ang usa ka estudyante sa pagbasa og kusog sa 1 Mga Taga-Corinto 8:11–13. Dapita ang klase sa pagsunod, nga mangita sa tubag ni Pablo sa pangutana sa pagkaon sa kalan-on nga nahalad ngadto sa diosdios.
-
Sumala sa bersikulo 13, unsa ang gisulti ni Pablo nga iyang mahimong aksyon niining sitwasyon? Ngano? (Tabangi ang mga estudyante nga makasabut nga ang pagkasilo dinhi niining bersikulo nagpasabut sa espirituhanon nga pagkadagma, pagkasala, o pagkawagtang sa pagtuo.)
-
Unsa nga baruganan ang mahimo natong makat-onan gikan niining mga bersikulo mahitungod kon unsaon nato sa paglikay nga madala ang ubang tawo sa pagkadagma sa espirituhanon nga paagi? (Human motubag ang mga estudyante, isulat ang mosunod nga mga baruganan sa pisara: Makapakita kita sa gugmang putli alang sa uban pinaagi sa paglikay sa mga buhat nga makahimo kanila og sayop sa espirituhanon nga paagi.)
Dapita ang usa ka estudyante sa pagbasa og kusog sa nahabilin sa istorya ni Elder Perry. Hangyoa ang klase sa pagpaminaw kon giunsa sa paggamit ni Elder Perry kini nga baruganan:
“Nakahukom ko nga mangayo og imnonon nga klarong mopaila kanako nga dili hinginom. Miadto ko sa bartender ug nangayo og usa ka baso nga gatas. Ang bartender wala pa makasulay nga gipangayoan og sama niana. Miadto siya sa kusina ug mikuha og usa ka baso nga gatas para nako. Karon aduna na koy imnonon nga lahi kaayong tan-awon gikan sa makahubog nga mga ilimnon nga giinom sa uban. …
“Ang gatas mao ang akong napili nga ilimnon atol sa oras sa ting-inom. Sa wala madugay nahibaloan na sa tanan nga ako usa ka Mormon. Ang respeto nga akong nadawat nakapasurprisa gayud kanako, ingon nga ang makapaikag nga hitabo nagsugod sa pagpanghitabo. Ang uban sa wala madugay miapil nako sa pag-inom og gatas!” (“Ang Tradisyon sa usa ka Balanse, Matarung nga Kinabuhi,” 33).
-
Unsa pa man ang laing mga ehemplo kon sa unsa nga paagi nga atong mapakita ang gugmang putli alang sa uban pinaagi sa paglikay sa mga buhat nga makaingon nga sila madagma sa espirituhanon nga paagi?
Pagpamatuod sa mga kamatuoran nga nadiskubrehan sa mga estudyante karon, ug awhaga ang mga estudyante sa pagtinguha sa giya sa Espiritu Santo samtang sila naningkamot sa pagpakabuhi pinasikad niining mga kamatuoran.
Komentaryo ug Background nga Impormasyon
1 Mga Taga-Corinto 7:1–5. Kasuod diha sa kaminyoon
Si Presidente Howard W. Hunter mitudlo nga ang manggiloy-ong kinaiya sa relasyon tali sa bana ug asawa mao ang sumbanan sa Ginoo:
“Kalumo ug pagtahud—dili ang kahakog—mao gayud ang giya nga mga baruganan diha sa suod kaayo nga relasyon tali sa bana ug asawa” (“Being a Righteous Husband and Father,” Ensign, Nob. 1994, 51). (Tan-awa usab sa New Testament Student Manual [manwal sa Church Educational System, 2014], 368.)
1 Mga Taga-Corinto 7:8, 25–35. Supak ba si Pablo sa kaminyoon?
Base sa mga tudling sama sa 1 Mga Taga-Corinto 7:8, 25–35, pipila ka mga tawo mahimong masayop sa paghunahuna nga si Pablo supak sa kaminyoon. Ang Hubad ni Joseph Smith, hinoon, mipatin-aw nga niini nga mga bersikulo, si Pablo namulong niadtong “ipadala na ngadto sa pagpangalagad,” o ngadto sa misyonaryo nga pagserbisyo (Hubad ni Joseph Smith, 1 Mga Taga-Corinto 7:29 [diha sa Giya ngadto sa mga Kasulatan]). Sa ingon niini nga pagsabut, ang Iyang tambag susama ra sa nahatag sa mga lider sa Simbahan karon, kinsa mitambag sa mga batan-ong misyonaryo sa paglikay gikan sa pagpakigdate o paghimo og romantiko nga pakigrelasyon samtang nagserbisyo og misyon. Sa lahi nga mga okasyon, si Pablo misulat pabor sa kaminyoon (tan-awa sa 1 Mga Taga-Corinto 9:1–5; 11:11; 1 Timoteo 3:2; Mga Hebreohanon 13:4). Ang mga pulong ni Pablo narekord diha sa 1 Mga Taga-Corinto 7 busa kadto wala naghulagway sa hingpit nga panlantaw ni Pablo sa kaminyoon apan gituyo sa pagpamulong ngadto sa temporaryong sitwasyon sa mga kinabuhi niadtong nagserbisyo og mga misyon.
1 MgaTaga-Corinto 7:14. Mga panabut sa Ulahing mga adlaw sa tambag ni Pablo
Ang Doktrina ug mga Pakigsaad 74 naglangkob og dugang nga panabut sa mga pulong ni Pablo sa 1 Mga Taga-Corinto 7:14. (Tan-awa usab sa Doktrina ug mga Pagkigsaad ug sa Church History Seminary Teacher Manual [manwal sa Church Educational System, 2013], 260–61.)