Mga Taga-Colosas–1 Timoteo (Unit 26)

Materyal sa Pagpangandam alang sa Home-Study Teacher

Summary sa mga Leksyon sa Daily Home-Study

Ang mosunod nga mga summary sa panghitabo, mga doktrina, ug mga baruganan nga nakat-unan sa mga estudyante samtang gitun-an nila ang Mga Taga-Colosas–1 Timoteo (unit 26) dili tuyo nga itudlo isip usa ka bahin sa imong leksyon. Ang leksyon nga imong itudlo magtutok sa pipila lamang niining mga doktrina ug mga baruganan. Sunda ang mga pag-aghat sa Espiritu Santo samtang imong ikonsiderar ang panginahanglan sa imong mga estudyante.

Day 1 (Mga Taga-Colosas)

Sa iyang sulat ngadto sa mga Santos sa Colosas, gitudlo ni Pablo nga si Jesukristo mao ang Manunubos, ang panganay sa espiritung mga anak sa Langitnong Amahan, ang Tiglalang sa tanang butang, ang pangulo sa Simbahan, ug ang una nga nabanhaw. Nakat-unan usab sa mga estudyante nga kita makig-uli [reconciled] sa Dios pinaagi sa Pag-ula ni Jesukristo kon kita magpadayon gayud nga dili matarug, ug malig-on sa atong pagtuo. Dugang pa, kon kita makagamut ug malig-on pinaagi ni Kristo, malikay kita sa pagkahisalaag pinaagi sa kalibutanong mga pilosopiya ug mga tradisyon.

Day 2 (1 Mga Taga-Tesalonica)

Sa iyang sulat ngadto sa mga Santos sa Tesalonica, si Pablo midayeg sa ilang kamatinud-anon ug gitudlo ang mga kamatuoran mahitungod sa Ikaduhang Pag-anhi sa Ginoo. Samtang gitun-an kini nga sulat, nahibaloan sa mga estudyante ang mosunod nga mga kamatuoran: Samtang itudlo nato ang ebanghelyo ni Jesukristo pinaagi sa pulong ug gahum sa Dios, makatabang kita sa uban nga mamahimong sumusunod sa Ginoo ug sa Iyang mga sulugoon. Atong mapaambit ang ebanghelyo pinaagi sa atong ehemplo. Ang matinud-anong mga Santos nga mamatay sa dili pa ang Ikaduhang Pag-anhi mabanhaw inig balik ni Kristo. Ang matinud-anong mga Santos nga buhi pa sa Ikaduhang Pag-anhi ni Jesukristo pagasakgawon [caught] aron mosugat Kaniya sa Iyang pag-abut. Kon magmatinud-anon kita ug managtukaw para sa nag-unang mga timailhan sa Ikaduhang Pag-anhi ni Jesukristo, niana maandam kita sa Iyang pagbalik.

Day 3 (2 Mga Taga-Tesalonica)

Sa pagtuon niini nga sulat ni Pablo ngadto sa mga Santos sa Tesalonica, nga nagklaro sa mga kamatuoran mahitungod sa Ikaduhang Pag-anhi ni Jesukristo, nakat-unan sa mga estudyante nga kon matinud-anon kita sa atong paglahutay sa oposisyon ug kalisdanan uban sa pailub ug pagtuo, pagaiphon kitang takus sa gingharian sa Dios. Gitudlo ni Pablo nga sa Ikaduhang Pag-anhi ni Jesukristo, ang mga matarung makapahulay ug ang dautan pagalaglagon. Gitudlo sab niya nga sa dili pa ang Ikaduhang Pag-anhi ni Jesukristo, usa ka apostasiya ang mahitabo. Nakat-unan sab sa mga estudyante nga gisugo kita sa pagpaningkamot nga mahimong mapaningkamuton sa kaugalingon ug sa pagtabang sa uban.

Day 4 (1 Timoteo)

Gikan niini nga sulat ni Pablo ngadto kang Timoteo, nga usa ka batan-ong lider sa priesthood sa Efeso, nakat-unan sa mga estudyante nga ang mga lider sa priesthood dunay responsibilidad sa pagsiguro nga ang tinuod nga doktrina ug hustong mga pamatasan gitudlo. Nakakat-on sab sila nga ang pagkamahigugmaon sa salapi mosangput sa pagkadili matarung ug sa apostasiya. Sa laing bahin, kon mosalig kita sa buhi nga Dios ug buhong sa maayong mga buhat, nan makuptan nato ang kinabuhing dayon.

Pasiuna

Si Pablo misulat ngadto kang Timoteo, lider sa priesthood sa Efeso, ug gitambagan siya sa pagkahimong usa ka ehemplo sa mga tumutuo.

Mga Sugyot alang sa Pagtudlo

Pahinumdom: Niini nga unit, gitun-an sa mga estudyante ang scripture mastery passage 2 Mga Taga-Tesalonica 2:1–3. Mahimo ninyong ribyuhon kini nga tudling kauban sa mga estudyante pinaagi sa paghangyo nila nga i-summarize ang mga kamatuoran nga gitudlo niini. Aron matabangan ang mga estudyante sa pagmemorya og usa ka bahin niini nga tudling, mahimo ninyong i-recite og dungan ang bersikulo 3 sa pipila ka higayon sulod sa klase.

1 Timoteo 4

Gihulagway ni Pablo ang mga kinaiya sa usa ka matinud-anong alagad ni Jesukristo

Pagdala sa klase og usa ka paper clip, piraso sa hilo, tape, ug usa ka magnet. Ihigot ang pikas tumoy sa hilo ngadto sa paper clip, ug dayon i-tape ang pikas tumoy sa hilo ngadto sa lingkuranan o lamesa. Guniti paduol ang magnet ngadto sa paper clip nga dili ipasabud ang magnet sa paper clip. Ang pwersa sa magnet mopalihok sa paper clip padulong sa magnet. Patuyok-tuyuka ang magnet aron makita unsay impluwensya niini sa paglihok sa paper clip.

Kon ang paper clip nagrepresentar sa usa ka tawo, unsa kaha ang girepresentaran sa magnet?

Hangyoa ang mga estudyante sa paghunahuna kon sa unsang paagi sila susama sa magnet ug makaimpluwensya sa uban. Dapita sila sa pagpangita og usa ka baruganan samtang tun-an nila ang 1 Timoteo 4 nga nagtudlo nato unsaon nga mahimong positibo nga impluwensya sa kinabuhi sa uban.

I-summarize ang 1 Timoteo 4:1–11 pinaagi sa pagpasabut nga nanagna si Pablo nga sa “kaulahiang mga panahon” (bersikulo 1) ang ubang mga miyembro sa Simbahan mopalayo sa ilang gituohan ug mosunod sa sayop nga mga pagtulun-an ug mga pamatasan, sama sa “pagdili sa pagpangasawa” (bersikulo 3). Giawhag ni Pablo si Timoteo nga alimahan ang mga Santos pinaagi sa tinuod nga doktrina.

Dapita ang mga estudyante sa pagbasa og hilum sa 1 Timoteo 4:12, nga mangita sa unsay gitambag ni Pablo nga angay makab-ot ni Timoteo. Ipasabut nga ang pulong nga sinultihan niini nga bersikulo nagpasabut sa kinaiya o gawi. Hangyoa ang mga estudyante sa pagreport sa ilang nakit-an.

Sa inyong hunahuna unsay buot ipasabut sa pagkahimong “usa ka panig-ingnan [ehemplo] sa mga tumutuo”? (Mahimo nimong isugyot nga markahan sa mga estudyante kini nga mga pulong diha sa ilang mga kasulatan.)
Sa unsang mga pamaagi gitambagan ni Pablo si Timoteo nga mahimong usa ka panig-ingnan [ehemplo] sa mga tumutuo? (Ilista sa pisara ang tubag sa mga estudyante.)

Dapita ang usa ka estudyante sa pagbasa og kusog sa 1 Timoteo 4:13–16. Hangyoa ang klase sa pagsunod, nga mangita sa dugang nga tambag nga gihatag ni Pablo nga makatabang ni Timoteo nga mahimong usa ka panig-ingnan [ehemplo] sa mga tumutuo.

Unsa nga tambag ang gidugang ni Pablo nga mahimong makatabang ni Timoteo sa pagkahimong usa ka ehemplo sa mga tumutuo?
Sumala sa bersikulo 15, nganong gisultihan ni Pablo si Timoteo nga pamalandungan ang mga doktrina nga gitudlo ni Pablo ug usahon ang iyang hunahuna sa pagsunod niini? (Aron makita sa uban og sa unsang paagi ang pagbuhat niini nakatabang ni Timoteo.)
Base sa mga pagtulun-an ni Pablo sa bersikulo 16, unsa ang mahimong resulta kon maningkamot kita nga mamahimong mga ehemplo sa mga tumutuo ni Jesukristo? (Gamit ang mga pulong sa mga estudyante, isulat sa pisara ang baruganan nga susama sa mosunod: Kon kita mga ehemplo sa mga tumutuo ni Jesukristo, makatabang kita sa pagdala og kaluwasan sa atong kaugalingon ug sa uban.)
Sa unsang paagi ang pagkahimong ehemplo sa tawo nga mituo ug misunod ni Jesukristo makatabang paghatag og kaluwasan ngadto sa uban?

Dapita ang mga estudyante sa pagribyu sa lista nga naa sa pisara ug ikonsiderar ang mga paagi diin si Timoteo mao ang “panig-ingnan [ehemplo] sa mga tumutuo” (1 Timoteo 4:12). Hangyoa ang klase sa paghulagway sa mga paagi diin ang usa ka tawo mahimong ehemplo niining mga sitwasyuna.

Mahimo nimong ikonsiderar ang pagpakita sa usa sa mosunod nga mga video: “No Cussing Club” (4:57) o “The Lost Purse” (2:40). Kini nga mga video anaa sa LDS.org. Hangyoa ang mga estudyante sa pagtan-aw kon sa unsang paagi ang batan-ong lalaki ug babaye diha sa video nahimong ehemplo sa mga tumutuo ni Jesukristo.

Kanus-a nga ang usa ka tawo milihok isip usa ka ehemplo sa mga tumutuo para kaninyo sa usa sa mga paagi nga gihisgutan ni Pablo? (Mahimo sab kang mopakigbahin og usa ka kasinatian gikan sa kaugalingon nimong kinabuhi.)

Dapita ang mga estudyante sa pagsulat og tumong diha sa ilang mga class notebook o mga scripture study journal kon unsaon nila sa pagkahimong mga ehemplo sa mga tumutuo ni Jesukristo ug sa ingon makatabang sa pagdala og kaluwasan sa ilang kaugalingon ug sa uban.

Sunod nga Unit (2 Timoteo 1–Hebreohanon 4)

Dapita ang mga estudyante sa pagkonsiderar sa pipila ka mga hagit sa pagkahimong disipulo ni Jesukristo karon. Ipasabut nga samtang padayon nilang tun-an ang mga sinulat ni Pablo sa sunod nga semana, makakat-on sila og mga kamatuoran nga makatabang nila sa pagpabiling matinud-anon bisan sa mga kalisdanan ug pagpanggukod.