Leksyon 130: 1 Timoteo

Leksyon 130

1 Timoteo

Pasiuna

Si Pablo misulat kang Timoteo nga usa ka priesthood lider nga Taga-Efeso, ug gitambagan siya sa pagsiguro nga ang tinuod nga doktrina mao ang matudlo. Naghimo siya og mga kwalipikasyon para sa mga bishop ug mga deacon ug gitambagan si Timoteo sa pagkahimong ehemplo sa mga tumutuo. Gipahimangnoan ni Pablo ang mga Santos sa pag-atiman sa mga kabus ug mga biyuda. Gitapos niya ang iyang sulat pinaagi sa pagtudlo nga “ang pagkamahigugmaon ug salapi mao ang gamut sa tanang pagkadautan” (1 Timoteo 6:10).

Mga Sugyot alang sa Pagtudlo

1 Timoteo 1–3

Gitudloan ni Pablo si Timoteo mahitungod sa mga responsibilidad sa pagbantay sa Simbahan

Dapita ang usa ka estudyante sa pagbasa og kusog sa mosunod nga istorya nga gihatag ni Presidente Thomas S. Monson:

“Nahinumdom ko sa usa ka kasinatian nako pipila na ka mga katuigan ang milabay dihang ako nagserbisyo pa isip usa ka bishop. Atol sa pangbukas nga tulumanon sa among miting sa priesthood usa ka Dominggo sa buntag, nangandam mi sa pag-orden og usa ka batan-ong lalaki ngadto sa office sa pagka-priest. Ang mibisita sa among ward nianang adlawa mao ang high councilor nga nagserbisyo usab nga usa ka temple worker. Dihang giandam nako ang batan-on nga moatubang sa kongregasyon aron himoon namo ang pag-orden, gipahunong ko sa councilor ug miingon, ‘Bishop, kanunay nakong paatubangon ngadto sa templo ang i-orden.’ Giusab niya ang posisyon sa lingkuranan aron ang batan-on mag-atubang ngadto sa direksyon sa templo. Diha dayon nakamatikod ko og usa ka dili awtorisado nga praktis” (“Opening Remarks” [worldwide leadership training meeting, Nob. 2010], lds.org/broadcasts).

Ipasabut nga isip usa ka bishop, si Presidente Monson, dili ang high councilor, ang awtorisado nga mangulo sa buluhaton sa Ginoo sa iyang ward.

Unsa man ang malagmit nga peligro sa usa ka bishop o branch president nga motugot og dili awtorisado nga buhat sama niana?

Ipasabut nga si Apostol Pablo mihimo og usa ka sulat ngadto kang Timoteo, usa ka batan-ong lider sa Efeso. Sa branch sa Simbahan diin siya ang nangulo, si Timoteo nag-atubang og mga hagit nga susama sa kang Presidente Monson.

Dapita ang mga estudyante nga magpuli-puli sa pagbasa og kusog sa 1 Timoteo 1:3–7. Hangyoa ang klase sa pagsunod, nga mangita kon sa unsa nga responsibilidad ang gihatag ni Pablo kang Timoteo. Ipasabut nga ang pulong nga tinumotumo nga sugilanon (bersikulo 4) nagpasabut sa sayop nga mga pagtulun-an; ang pagpatalinghug sa “dili matapus nga kaasuyan sa kaagi sa mga kagikan” (bersikulo 4) nagpasabut sa sayop nga mga tradisyon nga ang kaluwasan moabut lamang niadtong pinili nga mga binhi ni Abraham, kinsa maoy sagad nga nailhan sa ilang labihan ka taas o dili matapos nga kaasuyan sa kaagi sa mga kagikan; ug “walay kapuslanan nga mga pagtabi” (bersikulo 6) nagpasabut sa walay tumong nga mga diskusyon.

Sumala sa bersikulo 3–4, unsa nga responsibilidad ang gihatag ni Pablo ngadto kang Timoteo?
Sumala sa bersikulo 6–7, nganong importante para ni Timoteo ang pagtuman sa ilang responsibilidad?
Unsa ang usa ka kamatuoran nga atong makat-unan gikan sa tambag ni Pablo kang Timoteo mahitungod sa responsibilidad sa mga lider sa priesthood? (Ang mga estudyante mahimong mogamit og lain-laing mga pulong apan siguroa nga mahibaloan nila ang usa ka kamatuoran nga susama sa mosunod: Ang mga lider sa priesthood dunay responsibilidad sa pagsiguro nga ang tinuod nga doktrina ug hustong mga buhat gitudlo. Isulat sa pisara kini nga kamatuoran.)

Pahinumdumi ang mga estudyante sa sitwasyon nga nasugatan ni Presidente Monson isip usa ka bishop. Dapita ang usa ka estudyante sa pagbasa og kusog sa sumpay niini nga istorya. Hangyoa ang klase sa pagpaminaw kon sa unsang paagi gisanong ni Presidente Monson ang high councilor:

“Akong nakita ang kalagmitan nga ang ingon niini nga praktis mas mokatap. Bisan og mas bata pa ko kay sa high councilor, nahibalo ko kon unsay gikinahanglang buhaton. Gibalik nako ang lingkuranan aron mag-atubang na usab kini sa kongregasyon ug giingnan siya, ‘sa among ward, moatubang mi sa kongregasyon’” (“Opening Remarks,” lds.org/broadcasts).

Sa unsang paagi kita napanalinginan sa mga lider sa priesthood kinsa naniguro nga ang tinuod nga doktrina ug hustong mga buhat natudlo sa Simbahan?

I-summarize ang 1 Timothy 1:8–11 pinaagi sa pagpasabut nga nagpahimangno si Pablo batok niadtong mga nagtinguha nga mahimong mga magtutudlo sa balaod sa Dios apan walay hustong panabut niini.

Dapita ang usa ka estudyante sa pagbasa og kusog sa 1 Timoteo 1:12–16. Hangyoa ang klase sa pagsunod, nga mangita kon nganong ang pagpahayag ni Pablo sa pagpasalamat nagpadulong kang Jesukristo.

Ngano kaha nga mapasalamaton man si Pablo ngadto ni Jesukristo?
Sumala sa mga bersikulo 15–16, sa unsang paagi si Pablo usa ka “sumbanan” para sa tanan kinsa motuo kang Jesukristo?

I-summarize ang 1 Timoteo 1:17–1 Timothy 3 pinaagi sa pagpasabut nga gitambagan ni Timoteo si Pablo nga mohupot sa iyang pagtuo. Gitudlo ni Pablo nga si Jesukristo ang atong tigpataliwala, ug gitambagan niya ang mga miyembro sa Simbahan kon unsay angay nilang linihukan. Mihimo usab siyag mga kwalipikasyon para sa mga bishop ug sa mga deacon.

1 Timoteo 4–5

Gihulagway ni Pablo ang mga kinaiya sa usa ka matinud-anong alagad ni Jesukristo

Pagdala sa klase og usa ka paper clip, piraso sa hilo, tape, ug usa ka magnet. Ihigot ang pikas tumoy sa hilo ngadto sa paper clip, ug dayon i-tape ang pikas tumoy sa hilo ngadto sa lingkuranan o lamesa. Guniti paduol ang magnet ngadto sa paper clip nga dili ipasabud ang magnet sa paper clip. Ang pwersa sa magnet mopalihok sa paper clip padulong sa magnet. Patuyok tuyuka ang magnet aron makita unsay impluwensya niini sa paglihok sa paper clip.

Kon ang paper clip nagrepresentar sa usa ka tawo, unsa kaha ang girepresentaran sa magnet?

Hangyoa ang mga estudyante sa paghunahuna kon sa unsang paagi sila susama sa magnet ug nakaimpluwensya sa uban. Dapita ang mga estudyante sa pagpangita og usa ka baruganan samtang tun-an nila ang 1 Timoteo 4 nga nagtudlo nato unsaon nga mahimo kitang positibo nga impluwensya sa kinabuhi sa uban.

I-summarize ang 1 Timoteo 4:1–11 pinaagi sa pagpasabut nga nanagna si Pablo nga sa “kaulahiang mga panahon” (bersikulo 1) ang ubang mga miyembro sa Simbahan mopalayo sa ilang gituohan ug mosunod sa sayop nga mga pagtulun-an ug mga praktis, sama sa “pagdili sa pagpangasawa” (bersikulo 3). Giawhag ni Pablo si Timoteo nga alimahan ang mga Santos pinaagi sa tinuod nga doktrina.

Dapita ang mga estudyante sa pagbasa og hilum sa 1 Timoteo 4:12, nga mangita sa unsay gitambag ni Pablo nga angay makab-ot ni Timoteo. Ipasabut nga ang pulong nga sinultihan niini nga bersikulo nag-refer sa kinaiya o gawi. Hangyoa ang mga estudyante sa pagreport sa ilang nakit-an.

Sa inyong hunahuna unsay buot ipasabut sa pagkahimong usa ka “panig-ingnan [ehemplo] sa mga tumutuo”? (Mahimo nimong isugyot nga markahan sa mga estudyante kini nga mga pulong diha sa ilang mga kasulatan.)
Sa unsang mga pamaagi gitambagan ni Pablo si Timoteo nga mahimong usa ka panig-ingnan [ehemplo] sa mga tumutuo? (Ilista sa pisara ang tubag sa mga estudyante.)

Dapita ang usa ka estudyante sa pagbasa og kusog sa 1 Timoteo 4:13–16. Hangyoa ang klase sa pagsunod, nga mangita sa dugang nga tambag nga gihatag ni Pablo nga makatabang ni Timoteo sa pagkahimong usa ka panig-ingnan [ehemplo] sa mga tumutuo.

Unsa nga tambag ang gidugang ni Pablo nga mahimong makatabang ni Timoteo sa pagkahimong usa ka ehemplo sa mga tumutuo?
Sumala sa bersikulo 15, nganong gisultihan ni Pablo si Timoteo nga pamalandungan ang mga doktrina nga gitudlo ni Pablo ug usahon ang iyang hunahuna sa pagsunod niini? (Aron makita sa uban og sa unsang paagi ang pagbuhat niini nakatabang ni Timoteo.)
Base sa mga pagtulun-an ni Pablo sa bersikulo 16, unsa ang mahimong resulta kon maningkamot kita nga mamahimong mga ehemplo sa mga tumutuo ni Jesukristo? (Gamit ang mga pulong sa mga estudyante, isulat sa pisara ang baruganan nga susama sa mosunod: Kon kita mga ehemplo sa mga tumutuo ni Jesukristo, makatabang kita sa pagdala og kaluwasan sa atong kaugalingon ug sa uban.)
Sa unsang paagi ang pagkahimong ehemplo sa tawo nga mituo ug misunod ni Jesukristo makatabang paghatag og kaluwasan ngadto sa uban?

Dapita ang mga estudyante sa pagribyu sa lista nga naa sa pisara ug ikonsiderar ang mga paagi diin si Timoteo mao ang “panig-ingnan [ehemplo] sa mga tumutuo” (1 Timoteo 4:12). Hangyoa ang klase sa paghulagway sa mga paagi diin ang usa ka tawo mahimong ehemplo niining mga sitwasyuna.

Kanus-a nga ang usa ka tawo milihok isip usa ka ehemplo sa mga tumutuo para kaninyo sa usa ka paagi nga gihisgutan ni Pablo? (Mahimo sab kang mopakigbahin og usa ka kasinatian gikan sa kaugalingon nimong kinabuhi.)

Dapita ang mga estudyante sa pagsulat og tumong diha sa ilang mga class notebook o mga scripture study journal kon unsaon nila sa pagkahimong mga ehemplo sa mga tumutuo ni Jesukristo ug sa ingon makatabang sa pagdala og kaluwasan sa ilang kaugalingon ug sa uban.

I-summarize ang 1 Timoteo 5 pinaagi sa pagpasabut nga gitudloan ni Pablo si Timoteo kon sa unsang paagi ang mga Santos makaatiman sa mga nanginahanglan, lakip sa mga biyuda.

1 Timoteo 6

Giawhag ni Pablo si Timoteo nga tabangan ang uban sa pagpangita sa mahangturong mga katigayunan

Pag-display og usa ka kwarta diha sa klase.

Sa inyong hunahuna ang kwarta mosangput kaha sa pagka mas dautan o sa pagka mas maayo? Ngano man?

Ipasabut nga ang 1 Timoteo 6 nagrekord nga gitambagan ni Pablo si Timoteo mahitungod sa kwarta. Dapita ang usa ka estudyante sa pagbasa og kusog sa 1 Timoteo 6:6–10. Hangyoa ang klase sa pagsunod, nga mangita kon unsay gitudlo ug gipahimangno ni Pablo mahitungod sa katigayunan.

Unsa nga pagtulun-an o pahimangno gikan ni Pablo ang importante kaninyo? Ngano man?
Unsa sa inyong hunahuna ang buot ipasabut sa mga pulong nga “kay ang pagkamahigugmaon og salapi [kwarta] mao ang gamut sa tanang pagkadautan”? (1 Timoteo 6:10).
Sumala sa mga bersikulo 9–10, unsay sangputan sa pagkamahigugmaon og salapi? (Human makatubag ang mga estudyante, isulat sa pisara ang mosunod nga kamatuoran: Ang pagkamahigugmaon og salapi mosangput sa pagkadili matarung ug sa apostasiya.)
Ngano kaha nga ang pagkamahigugmaon og salapi mosangput man sa pagkadili matarung ug sa apostasiya?

Aron matabangan ang mga estudyante nga makasabut nga ang “pagkamahigugmaon” sa kwarta kay sa kwarta mismo mosangput sa pagkadili matarung, dapita ang usa ka estudyante sa pagbasa og kusog sa mosunod nga pamahayag ni Elder Dallin H. Oaks sa Korum sa Napulog Duha ka mga Apostoles:

“Walay dautan mahitungod sa kwarta. Ang Maayong Samarianhon migamit sa samang salapi aron moserbisyo sa iyang isigkatawo nga gigamit ni Judas sa pagluib sa Agalon. Ang dautan ‘mao ang kamahigugmaon og salapi [nga] mao ang gamut sa tanang pagkadautan.’ (1 Tim. 6:10; mga italic gidugang.) Ang kritikal kaayong diperensya mao ang sukod sa espiritwalidad nga atong gigamit sa pagtan-aw, pag-evaluate, ug pagdumala sa mga butang niining kalibutana” (“Spirituality,” Ensign, Nob. 1985, 63).

Isulat sa pisara ang mosunod nga mga reference sa kasulatan ug mga pangutana, o ihatag kini isip usa ka handout:

1 Timoteo 6:11–12, 17–19

Unsa nga tambag ang gihatag ni Pablo kang Timoteo ug niadtong may mga katigayunan?

Sa unsang paagi kini nga tambag makatabang nato sa pagbaton og saktong kinaiya sa pagpangita og bahandi ug paggamit sa katigayunan?

Ipares-pares ang mga estudyante. Dapita ang mga estudyante sa pagbasa sa mga reference ug hisguti ang mga pangutana uban sa ilang mga kapares. Human sa igong panahon, dapita ang pipila ka estudyante sa pagpakigbahin unsay ilang gihisgutan.

Kon ang mga Santos misalig sa Dios ug buhong sa maayong mga buhat, unsa ang gisulti ni Pablo nga ilang makuptan sumala sa bersikulo 19?
Unsa nga baruganan ang atong makat-unan gikan sa mga pagtulun-an ni Pablo kon unsay atong mahimo aron makaangkon og kinabuhing dayon? (Bisan og ang mga estudyante mogamit og lain-laing mga pulong siguroa nga mahibaloan nila ang usa ka kamatuoran nga susama sa mosunod: Kon mosalig kita sa buhi nga Dios ug buhong kita sa maayong mga buhat, nan makuptan nato ang kinabuhing dayon.)
Kon ang pagsalig sa Dios ug pagsunod sa pagkamatarung maoy pinakamahinungdanon sa atong mga prayoridad, sa unsang paagi kana makaapekto sa atong panan-aw, pagpangita, ug paggamit sa katigayunan?

Tapusa pinaagi sa pagpamatuod nga ang pag-angkon og kinabuhing dayon maoy tinuoray nga makapadato sa usa ka tawo. Awhaga ang mga estudyante nga ang pagsunod sa pagkamatarung himoon nilang pinakamahinungdanong prayoridad aron maangkon nila ang tinuod nga katigayunan sa kinabuhi.

Komentaryo ug Background nga Impormasyon

1 Timoteo 1:1–7. “Imong baoran ang pipila ka mga tawo sa dili pagpanudlo ug lain nga tuloohan [doktrina]”

Gitudlo ni Presidente Gordon B. Hinckley ang kaimportante sa pagtudlo sa hustong mga doktrina sa Simbahan:

“Gihisgutan ko na kaniadto ang mahitungod sa kaimportante sa pagtuman sa doktrina sa putli nga Simbahan, ug sa pagsiguro nga gitudlo kini sa tanan natong mga miting. … Ang gamayng pagtipas sa doctrinal nga pagtulun-an mosangput sa dako ug yawan-ong pagkasayop” (Teachings of Gordon B. Hinckley [1997], 620).

1 Timoteo 1:4. “Dili matapos nga kaasuyan sa kaagi sa mga kagikan”

Si Elder Bruce R. McConkie sa Korum sa Napulog Duha ka mga Apostoles mitudlo nga ang “kaasuyan sa mga kaagi sa kagikan” nga gihisgutan diha sa 1 Timoteo 1:4 ug sa Titus 3:9 nag-refer ngadto “sa sayop nga tradisyon sa mga Judeo nga ang kaluwasan para lang sa pinili nga mga binhi kon kini nahibaloan pinaagi sa kasayuran sa mga kaagi sa kagikan. Niini nga dispensasyon, gimando sa Ginoo ang pagsiksik sa mga kagikan isip usa ka mahinungdanong rekisito sa paghimo sa kaluwasan nga maanaa sa tanan kinsa walay oportunidad nga makadawat sa ebanghelyo dinhi sa kinabuhi” (Doctrinal New Testament Commentary, 3 vols. [1965–73], 3:127).

1 Timoteo 2:9–10. Pagpamisti [Sininaan] nga maugdang

“Giawhag ni Pablo ang kababayen-an sa ‘pagpatahum sa ilang kaugalingon pinaagi sa pagpamisti nga maugdang, nga magmaligdong ug magbinuotan’ (1 Timoteo 2:9), buot ipasabut uban sa pagpaubos ug balaang pagtahud; gitudlo sab niya nga ang mga babaye kinahanglang maglikay sa mahal nga sapot ug plata ug mabulak nga pamustura. Ang susama nga mga pagtulun-an makita diha sa 1 Nephi 13:7–8; 4 Nephi 1:24; Mormon 8:36–39; ug sa Doktrina ug mga Pakigsaad 42:40. Gipasabut ni Pablo nga ang mga babaye kinahanglang magsul-ob og sinina ‘nga magpakita sa pagkadiosnon.’ Ang baruganan sa tarung nga sininaan magamit sa lalaki ug babaye nga mga miyembro sa Simbahan karon:

“‘Pinaagi sa inyong sinina ug panagway, kamo makapakita nga … kamo tinun-an ni Jesukristo ug nga kamo nahigugma Kaniya.

“‘Ang mga propeta sa Dios kanunay nga nagtambag sa Iyang mga anak nga magsinina og tarung. Kon kamo maayong mamustura ug magsinina og tarung, kamo nagdapit sa pagpakig-uban sa Espiritu ug kamo mahimong maayo nga impluwensya sa uban’ (Alang sa Kalig-on sa Kabatan-onan [booklet, 2011], 6)” (New Testament Student Manual [manwal sa Church Educational System, 2014], 458).