Leksyon 141

Santiago 2

Pasiuna

Giawhag ni Santiago ang mga Santos nga motabang sa mga dinaugdaug ug mitudlo nga ang tinuod nga mga sumusunod ni Jesukristo kinahanglang dili mopalabi sa mga datu kay sa mga pobre. Mitudlo usab si Santiago mahitungod sa relasyon tali sa hugot nga pagtuo ug sa binuhatan.

Mga Sugyot alang sa Pagtudlo

Santiago 2:1–13

Nagtudlo si Santiago sa mga sumusunod ni Jesukristo nga dili magpakita og pamihig [favoritism] ngadto sa mga dato

Panalagma og pili og usa ka estudyante, ug hatagi siya og usa ka gamay nga pagdalit. Sultihi ang klase nga gihatagan nimo kini nga estudyante og usa ka pagdalit alang sa usa ka rason nga basta lang imong gipili (sama pananglit, tungod kay kana nga estudyante misuot sa imong paborito nga kolor o tungod kay midala siya og usa ka butang sa klase).

• Unsay inyong gibati mahitungod sa pamaagi sa akong pagtagad niining estudyante?

• Ngano man nga ang mga tawo usahay mopakita og pamihig?

Hangyoa ang mga estudyante sa paghunahuna og laing mga higayon nga sila nakakita og usa ka tawo nga gitagad og mas maayo kay sa uban ug sa paghunahuna kon unsay gibati nila niini.

Dapita ang usa ka estudyante sa pagbasa og kusog sa Santiago 2:1–4. Ipasabut nga ang Hubad ni Joseph Smith sa Santiago 2:1 nag-ingon, “Akong mga kaigsoonan, kamo dili makabaton sa hugot nga pagtuo sa atong Ginoong Jesukristo, ang Ginoo sa himaya, ug gani adunay pagtahud ngadto sa mga tawo.” Hangyoa ang klase sa pagsunod, nga mangita kon unsay gipasidaan ni Santiago sa mga Santos.

• Unsay gipasidaan ni Santiago sa mga Santos?

Ipasabut nga ang “adunay pagtahud ngadto sa mga tawo” (Hubad ni Joseph Smith, Santiago 2:1) nagkahulugan nga pagpakita og pamihig alang sa usa ka tawo o usa ka grupo sa mga tawo samtang nagdaugdaog sa uban tungod sa ilang mga kahimtang o mga kinaiya.

• Unsa nga ehemplo sa pamihig ang gipakigbahin ni Santiago?

• Unsay pipila ka mga ehemplo sa atong panahon sa mga indibidwal nga nagpakita og pamihig ngadto sa pipila ka mga tawo samtang nagdaugdaog sa uban tungod sa ilang mga kahimtang o mga kinaiya?

I-summarize ang Santiago 2:5–7 pinaagi sa pagpasabut nga mipadayon si Santiago og badlong sa mga Santos kinsa mipakita og pamihig ngadto sa mga dato. Mitudlo siya kanila nga gipili na sa Dios ang pobre nga mahimong datu diha sa hugot nga pagtuo ug manununod sa Iyang gingharian. Mipahinumdom usab si Santiago sa mga Santos nga ang mga datu maoy midaogdaog kanila ug mipasipala batok sa Ginoo.

Dapita ang mga estudyante sa pagbasa sa Santiago 2:8 sa hilum nga paagi, nga mangita kon unsay gipahinumdom ni Santiago nga buhaton sa mga Santos nga makatabang nila nga wagtangon ang pamihig.

• Unsa man ang gipahinumdom ni Santiago nga buhaton sa mga Santos?

• Ngano kaha nga kini nga kasugoan gitudlo nga “ang harianong kasugoan”? (Santiago 2:8).

• Unsa nga baruganan ang atong makat-unan gikan niini nga mga bersikulo mahitungod sa unsang paagi ang matinud-anon nga mga disipulo ni Jesukristo motagad sa mga katawhan? (Ang mga estudyante mahimong mogamit og lain-laing mga pulong apan kinahanglang mahibalo og usa ka baruganan nga susama sa mosunod: Ang matinud-anon nga mga disipulo ni Jesukristo naghigugma sa tanang tawo bisan unsa pa ang ilang mga kahimtang. Isulat sa pisara kini nga baruganan.)

• Sa panahon sa Iyang mortal nga pagpangalagad, sa unsang paagi ang Manluluwas usa ka ehemplo sa paghigugma sa uban bisan unsa pa ang ilang mga kahimtang?

Hangyoa ang mga estudyante sa paghunahuna og usa ka tawo nga naninguha sa paghigugma sa tanang tawo. Dapita ang pipila ka mga estudyante sa pagpakigbahin uban sa klase kinsa ilang nahunahunaan ug ngano.

Hangyoa ang mga estudyante sa paghunahuna giunsa nila pagtagad ang uban. Awhaga sila nga mangita og mga oportunidad nga mosunod sa ehemplo sa Manluluwas sa paghigugma sa uban.

Dapita ang mga estudyante sa paghunahuna nga, human nakadungog sa mga pagtulun-an ni Santiago mahitungod sa paghigugma sa tanang tawo, makadungog sila og usa ka tawo nga moingon nga walay kaso kon magpakita kita og pamihig ngadto sa pipila ka tawo samtang nagdaugdaog sa uban. Nag-ingon usab kining tawhana nga aduna pay mas labing dautan nga mga butang nga mahimo natong buhaton.

• Unsa nga mga problema ang mahimong moabut gikan sa pagbaton niini nga panghunahuna?

Dapita ang usa ka estudyante sa pagbasa og kusog sa Santiago 2:9–10. Hangyoa ang klase sa pagsunod, nga mangita kon nganong seryoso nga butang ang dili paghigugma sa tanang tawo bisan unsa pa ang ilang mga kahimtang.

• Nganong seryoso man nga butang ang dili paghigugma sa tanang tawo bisan unsa pa ang ilang mga kahimtang?

• Unsa nga kamatuoran ang atong makat-unan gikan sa mga pagtulun-an ni Santiago niini nga mga bersikulo? (Ang mga estudyante mahimong mogamit og lain-laing mga pulong, apan siguroa nga mahibalo sila sa mosunod nga kamatuoran: Kon makahimo kita og bisan usa ka sala, mahimo kitang sad-an sa atubangan sa Dios.)

• Sumala sa Santiago 2:10, unsa ang mahangturon nga sangputanan sa paglapas og bisan usa sa mga kasugoan sa Dios? (Mahimo kitang daw “malinapason sa tanan” tungod kay mahugaw kita ug busa dili makapuyo uban sa Dios [tan-awa usab sa 1 Nephi 10:21].)

• Nganong makalaum man gihapon kita, bisan og ang pagka dili masulundon sa Dios naghimo natong mahugaw nga magpuyo uban sa Dios?

Dapita ang usa ka estudyante sa pagbasa og kusog sa mosunod nga pamahayag ni Presidente Dieter F. Uchtdorf sa Unang Kapangulohan:

“Apan ang tanan wala mawagtang.

“Ang grasya sa Dios mao ang atong importante ug walay katapusang paglaum.

“Pinaagi sa sakripisyo ni Jesukristo, ang plano sa kalooy nagtagbaw sa mga gipangayo sa hustisya [tan-awa sa Alma 42:15] ‘ug [modala] og mga kahigayunan ngadto sa mga tawo nga sila mahimo nga makabaton og hugot nga pagtuo ngadto sa paghinulsol’ [Alma 34:15].

Ang atong mga sala, bisan pa kini mapula, kini pagapution ingon sa nieve [snow] [tan-awa sa Isaias 1:18]. Tungod kay ang atong minahal nga Manluluwas ‘naghatag sa iyang kaugalingon nga lukat alang sa tanan,’ [1 Timoteo 2:6] usa ka agianan ngadto sa Iyang mahangturong gingharian nga giandam kanato [tan-awa sa 2 Pedro 1:11]” (“Ang Gasa sa Grasya,” Ensign o Liahona, Mayo 2015, 108).

• Unsay kinahanglan natong buhaton aron mahimong takus sa pagsulod sa gingharian sa Ginoo pinaagi sa Pag-ula ni Jesukristo?

• Sa unsang paagi ang baruganan nga atong nahibaloan sa bersikulo 10 makatabang nato nga mas hingpit nga mahatagan og bili ang Pag-ula ni Jesukristo?

I-summarize ang Santiago 2:11–13 pinaagi sa pagpasabut nga mihatag si Santiago og usa ka ehemplo sa baruganan nga gitudlo diha sa bersikulo 10. Miawhag dayon siya sa mga tumutuo sa pagtagad sa laing mga tawo uban ang kalooy, kay kadtong nagtagad sa uban nga walay kalooy mahukman nga walay kalooy.

Santiago 2:14–26

Nagtudlo si Santiago sa tahas sa hugot nga pagtuo ug binuhatan diha sa atong kaluwasan

Dapita ang mga estudyante sa paghunahuna nga ang usa ka batan-ong lalaki miangkon nga nakasala siya. Nagtuo siya sa Pag-ula ni Jesukristo ug sa kasarang sa Manluluwas nga moluwas kaniya. Nag-ingon siya nga ang kinahanglan lamang niyang buhaton mao nga motuo ug ang Ginoo mopasaylo niya, ug wala nay laing buhaton sa iyang bahin.

Hangyoa ang mga estudyante sa paghunahuna kon ang bugtong pagtuo niining batan-on nga lalaki igo na ba alang kaniya aron mapasaylo alang sa iyang mga sala.

Dapita ang usa ka estudyante sa pagbasa og kusog sa Santiago 2:14. Hangyoa ang klase sa pagsunod, nga mangita kon unsay gipangutana ni Santiago sa mga Santos mahitungod sa hugot nga pagtuo.

• Unsay gipangutana ni Santiago sa mga Santos mahitungod sa hugot nga pagtuo?

• Unsa kaha nga matang sa binuhatan ang gipasabut ni Santiago?

Ipasabut nga gitul-id ni Santiago ang usa ka sayop nga ideya mahitungod sa hugot nga pagtuo. Ang pipila ka mga tawo nasayop pagsabut nga ang hugot nga pagtuo usa lamang ka sulti nga pagpahayag sa tinuohan. Sa kinatibuk-ang kahulugan sa Santiago 2:14, migamit si Santiago sa pulong binuhatan sa laing paagi kay sa paggamit ni Apostol Pablo niini. Sa dihang migamit si Pablo sa pulong binuhatan, ang iyang gipasabut mao ang binuhatan sa balaod ni Moises. Sa dihang migamit si Santiago sa pulong binuhatan, ang iyang gipasabut mao ang mga buhat sa paghalad o mga buhat sa pagkamatarung.

Sa natala sa Santiago 2:15–16, migamit si Santiago og pasumbingay aron sa paghulagway sa tubag sa iyang pangutana sa bersikulo 14. Pagdapit og duha ka estudyante sa pagduol sa atubangan sa klase. Hangyoa ang usa sa mga estudyante nga molihok isip usa ka manlilimos kinsa nangamuyo alang sa pagkaon, saput, ug kapuy-an nga iyang gikinahanglan aron mabuhi. Dapita ang ikaduha nga estudyante sa paglihok isip usa ka tawo kinsa makatabang sa manlilimos. Dapita ang ikatulo nga estudyante sa pagbasa og kusog sa Santiago 2:15–16 samtang ang duha ka estudyante naglihok sa unsay gihulagway niini nga mga bersikulo.

• Unsay sayop sa tubag nga gihatag ngadto sa manlilimos nga estudyante? Igo naba ang tubag sa laing estudyante nga makatabang sa usa ka manlilimos?

Dapita ang usa ka estudyante sa pagbasa og kusog sa Santiago 2:17–18. Hangyoa ang klase sa pagsunod, nga mangita kon unsay gitudlo ni Santiago mahitungod sa hugot nga pagtuo.

Ang Santiago 2:17–18 usa ka scripture mastery passage. Ang pagtuon sa mga scripture mastery passage makatabang sa mga estudyante nga mapalambo ang ilang panabut sa sukaranang mga doktrina ug maandam sa pagtudlo niini ngadto sa uban. Mahimo nimong isugyot nga markahan sa mga estudyante ang mga scripture mastery passage sa lahi nga paagi aron dali ra nila kining mapangita. Tan-awa ang ideya sa pagtudlo nga naa sa katapusan sa leksyon aron matabangan ang mga estudyante sa ilang pag-sag-ulo niini nga tudling.

• Unsa kaha ang gipasabut sa mga pulong “ang pagtoo patay kon kini walay binuhatan” (bersikulo 17)?

• Sa unsang paagi ang pasumbingay ni Santiago sa manlilimos makatabang nato nga makasabut niini nga mga pulong?

• Sumala sa bersikulo 17, unsa nga kamatuoran ang gitudlo ni Santiago mahitungod sa hugot nga pagtuo kang Jesukristo? (Ang mga estudyante mahimong mogamit og lain-laing mga pulong apan kinahanglang mahibalo og usa ka kamatuoran nga susama sa mosunod: Ang tinuod nga hugot nga pagtuo kang Jesukristo makita pinaagi sa atong matarung nga binuhatan. Isulat sa pisara kini nga kamatuoran.)

Dapita ang usa ka estudyante sa pagbasa og kusog sa Santiago 2:19–20. Ipasabut nga ang Joseph Smith Translation sa Santiago 2:19 nag-ingon, “Ikaw nagatoo nga ang Dios usa ra; husto ka niana. Ngani bisan pa ang mga yawa nagatoo man usab--ug nagapangurog sa kalisang; gihimo nimo ang imong kaugalingon nga sama kanila, wala gihatagan og kaangayan.” Hangyoa ang klase sa pagsunod, nga mangita sa ehemplo nga gigamit ni Santiago aron sa pagpakita nga ang pagtuo sa Dios wala gikinahanglan nga lakip ang pagbaton og hugot nga pagtuo sa Dios.

• Unsa nga ehemplo ang gigamit ni Santiago sa pagpakita nga ang pagtuo sa Dios wala gikinahanglan nga lakip ang hugot nga pagtuo diha sa Dios?

Dapita ang usa ka estudyante sa pagbasa og kusog sa mosunod nga pamahayag ni Elder David A. Bednar sa Korum sa Napulog Duha ka mga Apostoles:

“Ang tinuod nga hugot nga pagtuo nagtumong diha ni Ginoong Jesukristo ug sa kanunay mosangpot sa matarung nga aksyon. … Ang aksyon lamang dili matawag og pagtuo diha sa Manluluwas, apan ang pagbuhat sumala sa husto nga baruganan mao ang importante nga bahin sa hugot nga pagtuo” (“Pangayo pinaagi sa Hugot nga Pagtuo,” Ensign o Liahona, Mayo 2008, 95).

• Sumala ni Elder Bednar, unsa ang “importante nga bahin sa hugot nga pagtuo”?

• Nganong importante man nga makasabut nga ang hugot nga pagtuo kang Jesukristo nagpasabut nga pagtuo Kaniya ug paglihok sumala sa husto nga mga baruganan?

Pahinumdumi ang mga estudyante sa batan-ong lalaki sa sitwasyon diha sa sinugdanan niini nga seksyon sa leksyon.

• Sa unsa kahang paagi nga ang panabut nga ang hugot nga pagtuo naglakip sa pagtuo ug buhat makatabang sa usa ka tawo nga nagtinguha og kapasayloan alang sa iyang mga sala?

I-summarize ang Santiago 2:21–26 pinaagi sa pagpasabut nga mitudlo si Santiago kang Abraham ug Rahab isip duha ka mga ehemplo sa mga tawo kansang hugot nga pagtuo sa Dios napakita sa ilang binuhatan. (Ang istorya sa maisugong babaye nga si Rahab makita sa Josue 2:1–22.)

Dapita ang mga estudyante sa paggamit sa ilang mga class notebook o mga scripture study journal sa pagsulat mahitungod sa usa ka panahon diin mipakita sila og hugot nga pagtuo kang Jesukristo pinaagi sa ilang binuhatan ug sa unsang paagi sila napanalanginan sa pagbuhat sa ingon. Awhaga ang mga estudyante nga ilakip ang ilang mga pagpamatuod sa Manluluwas ug sa unsang paagi sila mopakita niana nga pagtuo pinaagi sa ilang mga buhat. Dapita ang pipila ka mga estudyante nga ipakigbahin uban sa klase kon unsay ilang gisulat.

Dapita ang mga estudyante sa pagkonsiderar sa mainampuong paagi kon sa unsang paagi nila mas hingpit nga mapakita ang hugot nga pagtuo kang Jesukristo pinaagi sa pagsunod Kaniya. Awhaga sila sa pagsunod sa bisan unsang mga aghat nga ilang madawat.

Scripture Mastery—Santiago 2:17–18

Aron matabangan ang mga estudyante nga magamit ang mga kamatuoran nga gitudlo niini nga scripture mastery passage, hatagi ang matag usa kanila og usa ka gamay nga piraso sa papel. Dapita sila sa pagsulat sa mga pulong niini nga tudling sa usa ka bahin sa papel. Ug dayon hangyoa sila nga kompletuhon ang mosunod nga han-ay sa mga pulong diha sa pikas nga bahin sa papel: Akong ipakita sa Ginoo ang akong hugot nga pagtuo Kaniya pinaagi sa … Awhaga ang mga estudyante sa paghipos niini nga piraso sa papel diha sa ilang mga bulsa sa tibuok adlaw ug sa pagpadayon sa paglista og mga ideya sa pagpakita sa ilang hugot nga pagtuo ngadto sa Ginoo. Samtang nagdugang sila ngadto sa ilang mga listahan, mahimo nilang ribyuhon ang scripture mastery passage. Awhaga sila sa pagbutang sa piraso sa papel diin kanunay nila kining makit-an ug mapahinumduman sa ilang mga tumong.

Komentaryo ug Background nga Impormasyon

Santiago 2:10. Kon malinapason kita sa usa ka sala, malinapason ba gayud kita sa tanan?

Ang pagtulun-an ni Santiago nga natala sa Santiago 2:10 importanting masabtan apan mahimo usab nga dali ra masaypan sa pagsabut. Si Presidente Joseph Fielding Smith mitudlo sa mosunod mahitungod niini nga bersikulo:

“Miingon si Santiago sa iyang sulat: ‘Kay bisan kinsa nga magabantay sa kinatibok-an sa kasugoan apan makalapas siya sa usa ka bahin niini, siya mahimong malinapason sa tanan niini’ [Santiago 2:10]. Ngadto sa uban kini daw usa ka butang nga lisud dawaton, apan kini tinuod. Hingpit ang mga balaod nga nagdumala sa celestial nga gingharian ug sa dili pa kita makasulod didto kinahanglan natong ibutang ang atong kaugalingon nga magmasulundon niining tanan. Ang usa ka tawo kinsa nagsupak sa bisan usa ka mahangturon nga kasugoan dili mahatagan og kaangayan ug dili makasulod sa celestial nga gingharian. Kon gitugutan siya sa pagbuhat sa ingon magdala siya og kalibog niana nga gingharian, ug ang ingon nga kahimtang dili mahatagan og kaangayan” (“The Standards of the Church,” Improvement Era, Hul. 1957, 506).

Santiago 2:14–18. Dili kita maluwas sa atong binuhatan

Si Presidente Dieter F. Uchtdorf sa Unang Kapangulohan miklaro nga dili ang atong pagkamasulundon sa mga kasugoan sa Dios maoy makaluwas nato:

“Ang kaluwasan dili makuha pinaagi sa pagkamasulundon; kini gipalit pinaagi sa dugo sa Anak sa Dios [tan-awa sa Mga Buhat 20:28]. Naghunahuna nga atong mapailisan ang atong maayong mga buhat alang sa kaluwasan sama ra og nagpalit og tiket sa eroplano ug unya naghunahuna nga gipanag-iya nato ang eroplano. O naghunahuna nga human og bayad sa abang sa atong balay, ato na ang tibuok planeta sa kalibutan” (“Ang Gasa sa Grasya,” Ensign o Liahona, Mayo 2015, 109).

Santiago 2:18–26. “Pinaagi sa akong binuhatan pakitaan ko ikaw sa akong pagtoo”

“Mitubag si Santiago sa mga report sa mga tawo kinsa yano nga namulong sa hugot nga pagtuo isip usa ka butang nga bulag gikan sa mga lihok, o ‘binuhatan’ sa usa ka tawo (tan-awa sa Santiago 2:14–26). …

“… Si Santiago wala nagtudlo nga ang hugot nga pagtuo walay makaluwas nga gahum; nagtudlo siya nga ang dili aktibo nga pagtuo nga wala moresulta sa buhat dili tinuod ug dili makaluwas nga pagtuo. Sa dihang gihagit ni Santiago ang iyang mga magbabasa nga ‘pakitai ako sa imong pagtoo nga bulag sa binuhatan’ (Santiago 2:18), iyang gipasabut nga dili mahimo ang pagpakita sa hugot nga pagtuo gawas kon pinaagi sa mga buhat—ang tinuod nga hugot nga pagtuo dili mahitabo nga mabulag gikan sa matarung nga mga buhat” (New Testament Student Manual [manwal sa Church Educational System, 2014], 495).

Si Santiago mipasabut nga si Abraham ug Rahab duha ka ehemplo sa mga tawo kansang hugot nga pagtuo diha ni Jesukristo naipakita pinaagi sa ilang binuhatan. Mipasabut si Santiago nga si Abraham ug Rahab “gimatarung man pinaagi sa binuhatan.” Ang gimatarung [gihatagan og kaangayan] nagkahulugan nga “mapasaylo gikan sa silot sa sala ug ipahayag nga walay sala. Ang usa ka tawo kahatagan og kaangayan pinaagi sa grasya sa Manluluwas pinaagi sa hugot nga pagtuo nga diha Kaniya. Kini nga hugot nga pagtuo gipakita pinaagi sa paghinulsol ug pagsunod sa mga balaod ug mga ordinansa sa ebanghelyo” (Giya ngadto sa mga Kasulatan, “Kapaangayan,” scriptures.lds.org). Busa, si Abraham ug si Rahab wala naluwas tungod sa ilang binuhatan, apan ang ilang binuhatan ug pagkamasulundon ngadto sa Ginoo mipakita nga sila adunay tinuod nga hugot nga pagtuo diha kang Jesukristo ug sa Iyang gahum sa pagluwas.