Juan 11–15 (Unit 15)

Materyal sa Pagpangandam alang sa Magtutudlo sa Home-Study

Summary sa mga Leksyon sa Daily Home-Study

Ang mosunod nga mga summary sa panghitabo, mga doktrina, ug mga baruganan nga nakat-unan sa mga estudyante dihang gitun-an nila ang Juan 11–15 (unit 15) dili tuyo nga itudlo isip kabahin sa imong leksyon. Ang mga leksyon nga imong itudlo magtutok lamang sa pipila niining mga doktrina ug mga baruganan. Sunda ang mga pag-aghat sa Espiritu Santo samtang magkonsiderar ka sa mga panginahanglan sa imong mga estudyante.

Day 1 (Juan 11)

Dihang gibasa sa mga estudyante nga si Jesus mibuhi ni Lazaro gikan sa pagkamatay, ilang nakat-unan ang mosunod nga mga baruganan: Mahimo nga pilion nato ang paggamit sa atong pagtuo kang Jesukristo atol sa atong mga pagsulay. Si Jesukristo mao ang Pagkabanhaw ug ang Kinabuhi. Kon motuo kita ni Jesukristo, makabaton kita og kinabuhing dayon. Kon pilion nato nga mogamit sa pagtuo kang Jesukristo atol sa atong mga pagsulay, niana ang atong pagtuo Kaniya mapamatud-an ug molambo.

Day 2 (Juan 12)

Niini nga leksyon gitun-an sa mga estudyante ang mahitungod ni Maria, igsoon ni Marta ug Lazaro, nga midihog sa mga tiil ni Jesus ug sa madaugong pagsulod sa Manluluwas ngadto sa Jerusalem. Gitun-an sab nila ang mahitungod sa mga pagtulun-an sa Manluluwas didto sa Jerusalem. Gikan sa mga pagtulun-an sa Manluluwas, nakat-unan sa mga estudyante ang mosunod nga mga kamatuoran: Dili gumikan lamang sa milagro nga kita makatuo ni Jesukristo. Ang hunahuna sa pagpahimuot sa uban kay sa mapahimuot ang Dios makapugong sa dayag natong pag-ila sa atong pagtuo kang Jesukristo ug sa Iyang ebanghelyo. Kon motuo kita ni Jesukristo, dili ta kinahanglang magpuyo sa espirituhanong kangitngit.

Day 3 (Juan 13)

Dihang gibasa sa mga estudyante ang istorya bahin sa Manluluwas nga mihugas sa tiil sa mga Apostoles, ilang nakat-unan ang mosunod nga mga kamatuoran: Kon atong sundon ang ehemplo sa Manluluwas pinaagi sa pagserbisyo sa uban, mas malipayon kita. Kon maghigugmaay kita sa usag usa sama nga si Jesus nahigugma kanato, ang uban mahibalo nga kita Iyang mga disipulo.

Day 4 (Juan 14–15)

Dinhi niini nga leksyon, gitun-an sa mga estudyante ang mga pagtulun-an nga gipresentar sa Manluluwas ngadto sa Iyang mga Apostoles sa wala pa Niya sugdi ang Iyang maulaon nga sakripisyo. Nakat-unan nila nga pinaagi lamang sa Pag-ula ni Jesukristo ug pagsunod sa Iyang pamaagi kita makasulod sa gingharian sa Langitnong Amahan. Nakat-unan sab nila nga atong ikapakita ang atong paghigugma ni Jesukristo pinaagi sa pagtuman sa Iyang mga sugo ug ang Espiritu Santo mohupay kanato, motudlo sa tanang butang, ug modala sa tanang butang sa atong panumduman. Dihang gitun-an sa mga estudyante ang mahitungod sa tanom nga parras ug sa mga sanga, ilang nakat-unan nga kon atong tumanon ang mga sugo, magpabilin kita sa paghigugma sa Manluluwas ug makadawat og hingpit nga kalipay.

Pasiuna

Kini nga lesyon makatabang sa mga estudyante nga masabtan unsay angay nilang buhaton aron makabalik ngadto sa Langitnong Amahan. Agig dugang, dihang giribyu sa mga estudyante ang tambag sa Ginoo nga narekord sa Juan 14, ilang makonsiderar kon sa unsang paagi nila mas masunod ang pamaagi sa Manluluwas.

Mga Sugyot alang sa Pagtudlo

Juan 14:1–14

Gitudloan sa Manluluwas ang Iyang mga Apostoles unsaon nga makabalik ngadto sa Langitnong Amahan

Kon mahimo, pag-display og mapa sa inyong siyudad ug dapita ang mga estudyante sa pagpangita kon asa sila karon. Diha sa mapa, pangita og laing dapit nga pamilyar sa mga estudyante. Hangyoa sila sa pagsulat diha sa usa ka papel kon unsaon nga makaabut sila didto gikan sa nahimutangan nila karon. Dapita ang usa o duha ka estudyante sa pagreport sa unsay ilang gisulat.

Isulat sa pisara ang Celestial nga Gingharian. Hangyoa ang mga estudyante sa pagkonsiderar unsa nga direksyon ang ilang ihatag ngadto sa tawo kinsa gustong mahibalo unson nga makaabut sa celestial nga gingharian.

Pahinumdumi ang mga estudyante nga dihang gitun-an nila ang Juan 14 sa ilang inadlaw nga leksyon nakat-unan nila ang kamatuoran nga makatabang nila nga mahibalo unsaon nga makabalik sa Langitnong Amahan ug makasulod sa celestial nga gingharian. Ipasabut nga dinhi niini nga leksyon makakat-on pa sila og dugang niana nga kamatuoran.

Aron matabangan ang mga estudyante nga masabtan ang kinatibuk-ang kahulugan sa Juan 14, pahinumdumi sila nga gisaulog ni Jesus ang Pagpalabay kauban sa Iyang mga Apostoles sa ibabaw nga kwarto sa Jerusalem. Human makapangaon sa Pagpalabay, giingnan ni Jesus ang Iyang mga disipulo nga Siya mobiya Kanila sa dili madugay (tan-awa sa Juan 13:33).

Dapita ang pipila ka estudyante nga magpuli-puli sa pagbasa og kusog sa Juan 14:1–5 . Hangyoa ang klase sa pagsunod, nga mangita kon unsay gitudlo ni Jesus ngadto sa Iyang mga Apostoles aron matabangan sila nga mahupay.

Ipasabut nga ang Joseph Smith Translation, Juan 14:3 nag-ingon nga, “Ug sa mahiadto na ako, mag-andam akog luna alang kaninyo, ug moanhi ako pag-usab, ug pagadawaton ko kamo nganhi uban kanako; nga kon asa man ako, anaa usab kamo.”

Unsa ang gitudlo ni Jesus sa Iyang mga Apostoles aron matabangan sila nga mahupay?
Sa inyong hunahuna unsa ang ipasabut sa mga pulong nga “sa balay sa akong Amahan anaay daghang puy-anan” sa (bersikulo 14:2)?

Dapita ang usa ka estudyante sa pagbasa og kusog sa mosunod nga pamahayag ni Propeta Joseph Smith. Hangyoa ang klase nga maminaw sa iyang gisulti nga maoy buot ipasabut sa mga pulong.

“[Ang pamahayag] nga ‘Sa balay sa akong Amahan anaay daghang puy-anan’ … ingon unta niini—‘Sa gingharian sa akong Amahan may daghan nga gingharian,’ aron nga kamo mahimong manununod sa Dios ug isigka-manununod kanako. … Adunay mga mansyon alang niadtong nagtuman sa celestial nga balaod, ug adunay lain nga mga mansyon alang niadtong wala makatuman sa balaod, ang matag tawo mahiadto asa siya angay” (Mga Pagtulun-an sa mga Presidente sa Simbahan: Joseph Smith [2007], 262).

Mahimo nimong isugyot nga isulat sa mga estudyante ang mga pulong nga gingharian ug mga gingharian diha sa ilang mga kasulatan ibabaw sa mga pulong nga balay ug mga mansyon diha sa Juan 14:2.

Asa sa mga pagtulun-an diha sa Juan 14:1–4 ang tingali makahupay sa mga Apostoles?
Sumala sa bersikulo 5, giunsa sa pagsanong ni Tomas ang pagtulun-an sa Manluluwas nga ang mga Apostoles nahibalo sa dalan padulong sa gingharian sa Langitnong Amahan?

Dapita ang usa ka estudyante sa pagbasa og kusog sa Juan 14:6 . Hangyoa ang klase sa pagsunod, nga mangita sa tubag ni Jesus ngadto ni Tomas. Pahinumdumi sila nga usa kini ka scripture mastery passage.

Giunsa sa pagtubag ni Jesus ang pangutana ni Tomas?

Pagdrowing og dalan sa pisara. Sa pikas tumoy sa dalan isulat ang Kita, ug sa pikas tumoy isulat ang Gingharian sa Langitnong Amahan. Isulat ang Ang Dalan ubos sa dalan, ug ipasabut nga kini nga mga pulong nagpasabut sa dalan gikan sa usa ka dapit padulong sa lain.

Sa unsang paagi ang Manluluwas mao ang Dalan? (Ang mga estudyante mahimong motubag nga ang Manluluwas mipakita kon unsaon nato sa pagpakabuhi aron mamahimong sama sa Dios ug unsaon nga mahimong takus nga mopuyo sa presensya sa Langitnong Amahan.)

Isulat sa pisara ang Ang Kamatuoran ug ang Ang Kinabuhi ubos sa “Ang Dalan.”

Sa unsang paagi nga si Jesukristo mao ang Kamatuoran? (Siya ang tinubdan sa tanang kamatuoran ug hingpit nga nagsunod sa tanang kamatuoran.)
Sa unsang paagi si Jesus mao ang Kinabuhi? (Gihimo Niyang posible nga kita makabuntog sa pisikal nga kamatayon ug mabanhaw uban sa pisikal nga lawas nga usa na ka imortal ug makabuntog sa espirituhanong kamatayon aron maangkon ang kinabuhing dayon. Siya “ang kahayag nga anaa sa tanan nga mga butang, nga naghatag og kinabuhi sa tanan nga mga butang” [D&P 88:13].)

Ubos sa gidrowing nga dalan diha sa pisara, isulat ang Si Jesukristo Mao ang sa tapad sa “Ang Dalan.”

Basi sa unsay atong nahisgutan ug sa inyong nakat-unan sa inadlaw ninyo nga leksyon, unsaon ninyo sa pag-summarize ang kahulugan sa pamahayag sa Manluluwas nga “walay bisan kinsa ang makaadto sa Amahan, gawas kon pinaagi kanako”? (Juan 14:6). (Ang mga estudyante mahimong mogamit og lain-laing mga pulong, apan kinahanglang mahibalo og kamatuoran sama sa mosunod: Pinaagi lamang sa Pag-ula ni Jesukristo ug pagsubay sa Iyang dalan kita makasulod sa gingharian sa Langitnong Amahan.)
Unsa ang mahitabo kon mosulay ta sa pagsubay og dalan nga dili dalan sa Manluluwas?

Dapita ang usa ka estudyante sa pagbasa og kusog sa mosunod nga pamahayag ni Elder Lawrence E. Corbridge sa Seventy. Unsa ang mahitabo kon sulayan nato ang pagsubay og dalan nga dili dalan sa Manluluwas?

“Si Jesukristo mao ang Dalan. Siya ang Kahayag ug Kinabuhi, Tinapay ug Tubig, ang Sinugdanan ug ang Katapusan, ang Pagkabanhaw ug ang Kinabuhi, ang Manluluwas sa kalibutan, ang Kamatuoran, ug ang Dalan.

“May usa lamang ka dalan sa kalipay ug sa katumanan. Siya ang Dalan. Ang uban nga dalan, bisan unsang lahi nga dalan, mga kabuang. …

“Ang dalan sa Ginoo dili lisud. Ang kinabuhi lisud, dili ang ebanghelyo. ‘Kanunayng adunay katugbang sa tanan nga mga butang’ [2 Nephi 2:11], bisan asa, alang sa tanan. Ang kinabuhi lisud para natong tanan, apan ang kinabuhi sayon usab. Kita adunay duha lamang ka kapilian. Mahimo natong sundon ang Ginoo ug matugahan sa Iyang gahum ug makaangkon og kalinaw, kahayag, kalig-on, kahibalo, pagsalig, gugma, ug kamaya, o mahimo kitang mosubay sa laing dalan, bisan asa nga dalan, bisan unsa nga dalan, ug walay suporta gikan Kaniya, nga wala ang Iyang gahum, walay giya, diha sa kangitngit, kasamok, pagduha-duha, kasubo, ug kasagmuyo. Ug ako mangutana, asa nga dalan ang mas sayon? …

“May usa lamang ka dalan sa kalipay ug sa katumanan. Si Jesukristo mao ang Dalan” (“Ang Dalan,” Ensign o Liahona, Nob. 2008, 34, 36).

Sumala ni Elder Corbridge, unsa ang mahitabo kon dili nato subayon ang dalan sa Manluluwas?
Unsa ang mahitabo kon subayon nato ang dalan sa Manluluwas?
Unsa ang dalan sa Manluluwas? (Kon gikinahanglan, pahinumdumi ang mga estudyante nga ang dalan sa Manluluwas naglakip sa pagpalambo sa atong pagtuo Kaniya ug sa Langitnong Amahan; sa paghinulsol; pagdawat og mga ordinansa sa kaluwasan, sama sa bunyag ug mga ordinansa sa templo; ug paglahutay hangtud sa katapusan uban sa pagtuo ug kamasulundon.)

Hangyoa ang mga estudyante sa pagpamalandong og ilang mga kasinatian diin sila napanalanginan pinaagi sa pagsubay sa dalan sa Manluluwas. Dapita ang pipila kanila sa pagpakigbahin sa ilang mga kasinatian.

Dapita ang mga estudyante sa paghunahuna kon unsa kamaayo ang ilang nahimo sa pagsubay sa dalan sa Manluluwas. Hangyoa sila sa paghunahuna og usa ka paagi diin mas masunod nila ang Manluluwas ug sa paghimo og tumong aron malihok ang mao nga tumong.

I-summarize ang Juan 14:7–14 pinaagi sa pagpasabut nga ang Manluluwas mitudlo sa Iyang mga Apostoles nga usa sa Iyang katuyoan sa pag-anhi sa yuta mao ang pagpadayag pinaagi sa Iyang mga pulong ug mga buhat sa matuod nga kinaiyahan sa Langitnong Amahan. Iya usab nga gisaaran ang Iyang mga Apostoles nga makabaton sila og gahum aron makahimo og talagsaong mga buhat.

Sunod nga Unit (Juan 16–21)

Dapita ang mga estudyante sa pagpangita sa mga tubag sa mosunod nga mga pangutana samtang magkompleto sila sa ilang pagtuon sa Ebanghelyo ni Juan: Unsa ang gisulti ni Jesus sa Iyang inahan samtang nagbitay Siya sa krus? Kinsa ang unang tawo nga nakakita ni Jesukristo human Siya nabanhaw? Kinsa ang dili motuo sa pagpamatuod sa uban nga si Jesus nabanhaw? Dapita ang mga estudyante sa pag-imagine kon unsa kaha ang isulti sa Manluluwas ngadto sa Iyang mga disipulo kinsa nahimong mga saksi Kaniya ug sa Iyang Pagkabanhaw apan mibalik sa kanhi nilang mga trabaho imbis magsangyaw sa ebanghelyo. Hangyoa sila sa pagpangita diha sa sunod nga unit sa unsay gisulti sa Manluluwas niadto nga mga disipulo.