Leksyon 68: Juan 8:31–59

Leksyon 68

Juan 8:31–59

Pasiuna

Mipadayon sa pagpanudlo ang Manluluwas sa templo human sa Fiesta sa mga Payag. Gitudlo Niya ang mahitungod sa kagawasan gikan sa sala. Dihang gisangyaw ni Jesukristo nga Siya ang talagsaong Jehova, gisulayan siya sa pagbato sa mga Judeo.

Mga Sugyot alang sa Pagtudlo

Juan 8:31–36

Gitudlo ni Jesus ang mahitungod sa kagawasan gikan sa sala

Aron matabangan ang mga estudyante nga mahinumdom sa ilang nakat-unan sa miaging leksyon, guniti pataas ang usa ka gamayng bato. Dapita ang mga estudyante nga mo-summarize og kadali sa unsang paagi gitubag sa Manluluwas ang pipila ka mga escriba ug mga Pariseo dihang gidala nila ang usa ka babaye nga giakusahang nanapaw ug unsa ang Iyang gitudlo human niini (tan-awa sa Juan 8:1–30). (Wala hukmi sa Manluluwas ang babaye ug giingnan nga “ayaw na pagpakasala” [bersikulo 11]. Pagkahuman gitudlo ni Jesus nga Siya ang “kahayag sa kalibutan” [bersikulo 12] ug kon kita motuo ug mosunod sa Iyang mga pagtulun-an, makaila kita sa Amahan.)

Sumala sa Juan 8:30, sa unsang paagi nakaapektar ang mga buhat ug mga pulong ni Jesus sa daghang mga Judeo?

Ipasabut nga bisan og daghang mga Judeo ang mituo ni Jesus, ang pipila sa mga Judeo mipadayon sa paghagit Kaniya samtang nanudlo Siya sa mga tawo mahitungod sa pagkadisipulo, kamatuoran, ug kagawasan batok sa pagkabihag.

Drowinga sa pisara ang mosunod nga diagram:

Dapita ang usa ka estudyante sa pagbasa og kusog sa Juan 8:31–32 . Hangyoa ang klase sa pagsunod, nga mangita kon unsay gisulti ni Jesus nga kinahanglan natong buhaton aron mahimong gawasnon.

Dapita ang mga estudyante sa pagduol sa pisara ug sulatan ang mga blangko basi sa unsay gisulti ni Jesus nga kinahanglan natong buhaton aron mahimong gawasnon. Ang nakompleto nga diagram kinahanglang parehas nga tan-awon sa mosunod:

Unsay buot ipasabut sa “pabilin kamo sa pulong [ni Kristo]”? (bersikulo 31).
Unsaon man ninyo sa pag-summarize isip usa ka pamahayag sa baruganan ang mga pagtulun-an ni Jesukristo nga narekord diha sa mga bersikulo 31–32? (Ang mga estudyante mahimong mogamit og lainlaing mga pulong, apan siguroha nga maklaro nga kon magpabilin kita sa pulong ni Jesukristo, niana kita ma-Iyaha nga mga disipulo ug mahibalo sa kamatuoran, nga maghimo natong gawasnon. Ikonsiderar ang pagsulat niini nga baruganan sa pisara. Mahimo usab nimong ipasabut nga ang Juan 8:36 mihatag og gibug-aton nga tungod kang Jesukristo kita mamahimong gawasnon.)

Dapita ang usa ka estudyante sa pagbasa og kusog sa mosunod nga pamahayag ni Elder Bruce R. McConkie sa Korum sa Napulog Duha ka mga Apostoles. Hangyoa ang klase sa pagpaminaw kon sa unsang sitwasyon kita magawasnon kon magpakabuhi kita sumala sa mga pulong sa Manluluwas.

“Gawasnon gikan sa makalaglag nga impluwensya sa sayop nga doktrina; gawasnon gikan sa pagkaulipon sa gana sa pagkaon ug kamaulagon; gawasnon sa mga kadena sa pagpakasala; gawasnon gikan sa kadautan ug sa hiwi nga impluwensya ug gikan sa matag makapugong ug makapahunong nga gahum; gawasnon sa pagpadayon ngadto sa walay kinutuban nga kagawasan diin ang kinatibuk-an niini matagamtam lamang sa nahimaya nga mga binuhat” (Doctrinal New Testament Commentary, 3 vols. [1965–73], 1:456–57).

Dapita ang usa ka estudyante sa pagbasa og kusog sa Juan 8:33 . Hangyoa ang klase sa pagsunod, nga mangita kon unsay gituohan sa mga Judeo nga makahimo nilang gawasnon.

Unsa man ang gituohan sa mga Judeo nga makahimo nilang gawasnon? (Nasayop sila sa pagtuo nga tungod kay mga kaliwat sila ni Abraham ug mga manununod sa Abrahamic nga pakigsaad anaa na kanila ang espirituhanong kagawasan.)

Dapita ang usa ka estudyante sa pagbasa og kusog sa Juan 8:34–36 . Hangyoa ang klase sa pagsunod, nga mangita kon unsa nga matang sa pagkagawasnon ang gipasabut ni Jesus nga maoy gikinahanglan sa mga tawo.

Sumala sa bersikulo 34, unsa nga matang sa pagkagawasnon ang gipasabut ni Jesus nga maoy gikinahanglan sa mga tawo?

Ipasabut nga ang verb sa Gresyanhon nga gihubad nga “magapakasala” diha sa bersikulo 34 nagsugyot sa ideya nga magpabilin sa pagpakasala kay sa maghinulsol.

Unsa nga baruganan ang atong makat-unan gikan sa bersikulo 34? (Human makatubag ang mga estudyante, isulat sa pisara ang mosunod nga baruganan: Kon kita makasala ug dili maghinulsol, niana mamahimo kitang mga alagad sa sala.)
Unsa man ang buot ipasabut sa pagkahimong “alagad sa sala”? (Mahimo nimong ipasabut nga ang pulong nga gihubad isip “alagad” matawag usab nga “ulipon.”)

Aron matabangan ang mga estudyante nga makahunahuna sa relasyon tali sa duha ka mga baruganan nga ilang nahibaloan, idrowing ang mosunod nga diagram sa pisara:

Ngano nga ang ubang tawo karon molibug man niini nga mga kamatuoran pinaagi sa pagtuo nga ang pagsunod sa Manluluwas naghimo nato nga usa ka bihag, samtang ang pagpakasala mosangput sa kagawasan?

Aron matabangan ang mga estudyante nga makasabut sa duha ka baruganan nga ilang nahibaloan, dapita ang usa ka estudyante sa pagbasa og kusog sa mosunod nga pamahayag ni Elder D. Todd Christofferson sa Korum sa Napulog Duha ka mga Apostoles:

“Ang pagtugyan ngadto sa mga tintasyon ni [Satanas] maghatod ngadto sa nagkapig-ot nga dalan sa kapilian hangtud nga wala nay mahibilin ug ngadto sa pagkaadik diin mahutdan kita sa gahum sa pagbatok niini. …

“… Ang kalibutan mogamit sa mga butang sa pamaagi ni Korihor, magkonsiderar sa kamasulundon sa mga balaod ug ordinansa sa Dios nga usa ka ‘pagkabihag’ (Alma 30:24, 27). …

“… Duna bay mga nagduhaduha nga, isip sangputanan sa pagbaton sa tanang kahayag ug kamatuoran, ang Dios naghupot sa kinadak-ang kagawasan nga mamahimo ug sa paghimo?

“Sa samang paagi, samtang motubo ang atong panabut sa mga doktrina ug mga baruganan sa ebanghelyo, ang atong kabubut-on modako. Una, mas daghan kitag kapilian ug makakab-ot og daghan ug makadawat og mas dakong mga panalangin tungod kay mas daghan kitag balaod nga mahimo ra natong sundon. … Ikaduha, uban sa gidugang nga panabut makahimo kita og mas maalamong mga pagpili tungod kay mas klaro natong makita dili lang ang mga kapilian apan ang malagmit usab nga mga sangputanan” (“Moral Agency,” Ensign, Hunyo 2009, 49, 50–51).

Ipares-pares ang mga estudyante. Dapita ang matag pares sa pagtuon sa gi-assign nga seksyon sa Alang sa Kalig-on sa Kabatan-onan (booklet, 2011). Hangyoa ang mga estudyante sa pagdrowing sa mosunod nga tsart diha sa ilang mga class notebook o mga scripture study journal (mahimo nimong drowingon kini sa pisara). Dapita ang matag pares nga basahon ang gi-assign sa ilaha nga seksyon sa Alang sa Kalig-on sa Kabatan-onan ug sulatan ang tsart.

Ang sumbanan nga gihisgutan sa Alang sa Kalig-on sa mga Kabatan-onan:	Sa unsang mga paagi ang pagsunod niini nga sumbanan magdala og kagawasan?	Sa unsang mga paagi ang kapakyas sa pagsunod niini nga sumbanan magdala sa pagkaulipon?

Human sa igo nga panahon, pailisa ang matag pares og laing mga kapares ug motudlo unsa nga sumbanan ang ilang natun-an. Human sa igo nga panahon, dapita ang pipila ka estudyante nga moreport sa unsay ilang nakat-unan.

Unsa nga mga kagawasan ang gisaad diha sa Alang sa Kalig-on sa mga Kabatan-onan ang personal ninyo nga nasinati?

Dapita ang mga estudyante sa pagsulat og piho nga paagi nga sila magtinguha nga mahimong gawasnon pinaagi sa pagpakabuhi nga uyon sa mga pulong sa Manluluwas.

Juan 8:37–59

Si Jesukristo mipamatuod sa Iyang kabalaan

Dapita ang mga estudyante nga mohatag og mugbong tubag sa mosunod nga pangutana.

Kinsa ang inyong nailhan nga liwat kaayo sa iyang amahan?

Dapita ang pipila ka estudyante nga magpuli-puli sa pagbasa og kusog sa Juan 8:37–40, 44–45 . Hangyoa ang klase sa pagsunod, nga mangita kon sa unsang paagi ang mga lider sa mga Judeo nga misupak sa Ginoo lahi kay sa bantugang propeta sa Daang Tugon nga si Abraham, kinsa ilang giangkon nga ilang amahan.

Sumala sa bersikulo 39, unsa ang gisulti sa Manluluwas nga angay nilang buhaton kon sila mga anak ni Abraham?
Sumala sa bersikulo 40, unsa man ang gitinguha nila nga buhaton nga dili gayud buhaton ni Abraham?
Sumala sa mga bersikulo 44–45, kinsa ang giingon ni Jesus nga mao ang ilang amahan? (Ang yawa.) Sa unsang mga paagi nga yawa ang ilang gisunod?

I-summarize ang Juan 8:46–50 pinaagi sa pagpasabut nga gitudlo sa Manluluwas nga kadtong Iya sa Dios makadawat sa Iyang pulong. Ang mga lider sa mga Judeo miinsulto ni Jesus pinaagi sa pagtawag Niya nga usa ka Samarianhon (kay ang mga Samarianhon gigao-gao man sa mga Judeo) ug nanag-ingon nga Siya gisudlan og yawa.

Dapita ang usa ka estudyante sa pagbasa og kusog sa Juan 8:51–53 . Hangyoa ang klase sa pagsunod, nga mangita sa pangutana nga gipangutana sa mga lider sa mga Judeo kang Jesus.

Unsa man ang ilang pangutana kang Jesus? (Mahimo nimong dapiton ang mga estudyante nga markahan ang pangutana nga “Labaw ka pa ba sa atong amahan nga si Abraham?” sa bersikulo 53.)

Dapita ang usa ka estudyante sa pagbasa og kusog sa Juan 8:56–58 . Hangyoa ang klase sa pagsunod, nga mangita sa tubag ni Jesus sa pangutana sa mga Judeo.

Unsa ang tubag ni Jesus sa pangutana nga “Labaw ka pa ba sa atong amahan nga si Abraham?” (Mahimo nimong dapiton ang mga estudyante nga markahan ang mga pulong nga “sa wala pa si Abraham, mao na ako” sa bersikulo 58.)

Ipasabut nga ang pulong “mao na ako” diha sa bersikulo 58 nagpasabut nga si Jehovah (tan-awa sa Exodo 3:14). Dayon pangutan-a sa mosunod nga mga pangutana:

Unsa ang buot ipasabut sa pulong nga “mao na ako”? (Ang mao nga pulong nagpaila kang Jehova, ang Dios ni Abraham, Isaac, ug Jacob; mahimo usab nimong ipasabut nga ang Septuagint mao ang hubad sa Gresyanhon sa Daang Tugon. Mahimo nimong dapiton ang mga estudyante nga isulat diha ilang mga kasulatan ang mosunod nga kamatuoran. Si Jesukristo mao si Jehova, ang Dios sa Daang Tugon.)
Basi sa inyong pagtuon sa bersikulo 58, unsa ang tubag ni Jesus sa pangutana mahitungod sa kon Siya mas labaw pa ba kay ni Abraham?

I-display ang daghang litrato gikan sa Libro sa mga Hulagway sa Ebanghelyo ([2009]; tan-awa usab sa LDS.org) nga nagpakita sa mga milagro nga narekord sa Daang Tugon (sama sa Ang Tulo ka mga Lalaki sa Nagdilaab nga Hudno, nu. 25; or Daniel sulod sa Langub sa mga Leon, nu. 26).

Kon nagbarug mo atubangan ni Jesus ug nakadungog Niya nga namahayag nga Siya ang tawo nga mihimo sa mga milagro nga narekord sa Daang Tugon, unsaon man kaha ninyo Siya sa pagtubag?

Dapita ang usa ka estudyante sa pagbasa og kusog sa Juan 8:59 . Hangyoa ang klase sa pagsunod, nga mangita kon giunsa sa pagtubag ang pamahayag ni Jesus nga Siya mao si Jehova. Dapita ang mga estudyante sa pagreport sa ilang nakit-an.

Nganong gibati man ninyo nga importante alang nato ang pagkahibalo nga si Jesukristo mao si Jehova, ang anak sa Dios sa Daang Tugon.

Ikonsiderar ang pagdapit og pipila ka mga estudyante nga mopakigbahin sa klase sa ilang mga pagpamatuod bahin ni Jesukristo. Mahimo usab nimong tapuson pinaagi sa pagpakigbahin sa imong kaugalingong pagpamatuod.

Scripture Mastery Review

Ang mga quiz ug test makahatag sa mga estudyante og oportunidad nga matestingan ang ilang memory sa scripture mastery passages. Ang mga clue maglakip sa mga key word [mahinungdanong mga timailhan] o mga scripture reference, mga kinutlo gikan sa mga tudling sa kasulatan, o mga sitwasyon nga naghulagway sa mga kamatuoran nga gitudlo diha sa mga tudling. Ang mga quiz ug test mahimong idikta, o isulat sa pisara, o sa papel. Human ang mga estudyante makakuha og quiz o test, ikonsiderar ang pagpares-pares ni bisan kinsang estudyante nga naglisud sa scripture mastery passages nga makig-uban sa taas og score nga mga estudyante. Ang taas og score nga estudyante mahimong maoy mag-tutor aron matabangan ang mas mubo og score nga estudyante sa pagtuon ug molambo. (Kon buhaton ninyo kini, siguroha nga inyo kining mabuhat sa paagi nga dili maulawan ang mga estudyante nga naglisud.)

Komentaryo ug Background nga Impormasyon

Juan 8:33. “Mga kaliwat baya kami ni Abraham”

Ang pahayag sa mga Judeo nga sila mga kaliwat ni Abraham nagpakita og komon nga sayop nga panabut bahin sa Abrahamic nga pakigsaad ug sa doktrina sa pag-orden daan [foreordination]. Ang mosunod nga pagpasabut gikan sa Bible Dictionary nagklaro sa mga saad nga gihimo ug sa mga responsibilidad sa mga kaliwat ni Abraham:

“Gidawat ni Abraham og una ang ebanghelyo pinaagi sa pagpabunyag (nga mao ang pakigsaad sa kaluwasan). Dayon gitugyanan siya sa mas taas nga priesthood, ug misulod siya sa celestial nga kaminyoon (nga mao ang pakigsaad sa kahimayaan), nagbaton og kasiguroan nga maangkon niya ang mahangturong paglambo. Sa katapusan nakadawat siya og saad nga tanan niini nga panalangin igatanyag ngadto sa tanan sa iyang mortal nga kaliwatan (D&P 132:29–50; Abr. 2:6-11). … Ang kaliwatan ni Abraham makadawat og piho nga kayutaan isip usa ka mahangturon nga kabilin (Gen. 17; 22:15–18; Gal. 3; Abr. 2). Kini nga mga saad kon tingubon gitawag og Abrahamic nga pakigsaad. …

“Ang mga porsyon sa pakigsaad nga may kalabutan sa personal nga kaluwasan ug mahangturong paglambo gibag-o sa matag indibidwal kinsa nakadawat sa ordinansa sa celestial nga kaminyoon (tan-awa sa D&P 132:29–33). Kadtong dili kaliwatan sa Israelite, sagad nga nailhan nga mga hentil, gisagop ngadto sa balay sa Israel, ug nahimong mga manununod sa pakigsaad ug sa binhi ni Abraham, pinaagi sa mga ordinansa sa ebanghleyo (Gal. 3:26–29).

“Ang pagka-manununod sa Abrahamic nga pakigsaad wala maghimo sa usa ka tawo nga ‘pinili nga tawo’ sa iyang kaugalingon apan nagpasabut nga ang ingon gipili aron responsabling mosangyaw sa ebanghelyo ngadto sa tanang tawo sa kalibutan. Ang mga kaliwat ni Abraham midala sa misyonaryong kalihokan sa tanang kanasuran sukad sa kapanahunan ni Abraham. (Mat. 3:9; Abr. 2:9–11)” (Ang Giya ngadto sa mga Kasulatan, “Abraham, Pakigsaad sa”).

Juan 8:58. Unsa ang buot ipasabut sa pulong nga “sa wala pa si Abraham, mao na ako”?

Si Elder Bruce R. McConkie sa Korum sa Napulog Duha ka mga Apostoles mipasabut sa kahulugan sa pulong nga “mao na ako”:

“Si Jesus mao ang Jehova … (tan-awa sa Ex. 6:3; Ps. 83:18; Isa. 12:2; Isa. 26:4). Ang paggamit niining balaan nga ngalan gikumpirmar usab sa modernong kasulatan (tan-awa sa Moro. 10:34; D&P 109:68; D&P 110:3; D&P 128:9). Ang Jehova gikuha gikan sa pulong sa Hebrew nga hayah, nagpasabut nga ‘umaabut’ o ‘moabut.’ Ang porma sa pulong nga hayah sa Hebrew nga teksto sa Daang Tugon gihubad nga MAO AKO (tan-awa sa Ex. 3:14).

“Sa talagsaong paagi, ang MAO AKO gigamit ni Jehova nga ngalan para sa Iyang kaugalingon (tan-awa sa D&P 29:1; D&P 38:1; D&P 39:1). Basaha ang mosunod nga maka-intriga nga dayalogo gikan sa Daang Tugon. Si Moises bag-o pa lang nakadawat og balaang sugo nga wala niya panganduya, usa ka sugo sa pagluwas sa mga anak sa Israel gikan sa pagkabihag. Ang eksena nahitabo sa tumoy sa Mount Sinai:

“Ug si Moises mitubag sa Dios, Kinsa ba ako, aron ako moadto kang Faraon, ug magakuha gikan sa Ehipto sa mga anak sa Israel?

“Walay duda nga gibati ni Moises ang kakulangan para sa iyang tawag, bisan gani kamo ug ako tingali kon hatagan og mahagiton nga assignment.

“‘Ug miingon [pag-usab] si Moises sa Dios: Ania karon, kung ako makadangat sa mga anak sa Israel, ug magaingon ako kanila: Ang Dios sa inyong mga ginikanan nagsugo kanako nganhi kaninyo: ug kung sila mangutana kanako: Kinsa ang iyang ngalan? unsa ang igatubag ko kanila?

“‘Ug mitubag ang Dios kang Moises: AKO MAN ANG MAO AKO: Ug miingon siya: Mao kini ang igaingon mo sa mga anak sa Israel: AKO MAN, mao ang nagsugo kanako nganha kaninyo.

“‘Ug labut pa miingon ang Dios kang Moises: Mao kini ang igaingon mo sa mga anak sa Israel: Si Jehova, ang Dios sa inyong mga ginikanan, ang Dios ni Abraham, ang Dios ni Isaac ug ang Dios ni Jacob, nagsugo kanako nganhi kaninyo. Kini mao ang akong ngalan nga sa walay katapusan’ (Ex. 3:11, 13–15).

“Gipadayag ni Jehova ngadto kang Moises kini gayud nga pangalan nga sa kaaghup ug kaligdong Iyang gipili para sa Iyang kaugalingong premortal nga ilhanan: ‘I AM’” (“Jesus the Christ: Our Master and More,” Ensign, Abr. 2000, 6–7).