Librarya
Leksyon 69: Juan 9

Leksyon 69

Juan 9

Pasiuna

Si Jesus miayo og usa ka tawo nga gipakatawo nga buta. Giusisa sa mga Pariseo kining tawhana ug gipalayas sa sinagoga tungod kay dili siya mohukom ni Jesus nga usa ka makasasala gumikan sa pagpang-ayo atol sa Igpapahulay. Gipangita sa Manluluwas ang maong tawo, ug ang tawo miyukbo kang Jesus isip Anak sa Dios.

Mga Sugyot alang sa Pagtudlo

Juan 9:1–7

Si Jesus miayo og usa ka tawo nga gipakatawo nga buta.

Pagdala sa klase og usa ka artikulo sa news nga naghulagway og usa ka tawo kinsa nag-atubang og kalisdanan. I-summarize ang artikulo para sa mga estudyante, o isulat ang headline diha sa pisara.

  • Unsa ang ubang ehemplo nga imong nakita sa mga tawo kinsa nakasinati og kalisdanan?

Ipasabut nga ang ubang tawo naglibug nganong ang Dios motugot og kalisdanan nga grabing nakaapekto sa ilang kinabuhi.

Hangyoa ang mga estudyante sa pagpangita og kamatuoran samtang magtuon sila sa Juan 9:1-5 nga makatabang nato nga makasabut nganong ang Dios motugot nga ang kalisdanan moabut sa atong kinabuhi.

Dapita ang usa ka estudyante sa pagbasa og kusog sa Juan 9:1-2 . Hangyoa ang klase sa pagsunod, nga mangita kon unsa nga kalisdanan ang giatubang niining tawhana. Dapita ang mga estudyante sa pagreport sa ilang nakit-an.

  • Sumala sa bersikulo 2, unsa ang gipangutana sa mga disipulo mahitungod sa hinungdan sa kalisdanan niining tawhana?

Ipasabut nga daghang tawo sa kapanahunan sa Manluluwas mituo, sama sa mga tawo sa atong panahon, nga ang mga kalisdanan nga giatubang sa mga tawo mga sangputanan sa mga sala nga ilang nabuhat o nabuhat sa ilang mga ginikanan. (Mahimo nimong ipasabut nga ang pangutana sa mga disipulo nagpakita sa reyalidad sa usa ka premortal nga kinabuhi.)

  • Sa inyong hunahuna husto kaha kini nga pagtuo? Ngano o nganong dili man?

Dapita ang usa ka estudyante sa pagbasa og kusog sa Juan 9:3–5 . Hangyoa ang klase sa pagsunod, nga mangita sa mga pagtulun-an ni Jesus mahitungod sa pagkabuta niining tawhana.

  • Sa inyong hunahuna unsay ipasabut sa “aron ang mga buhat sa Dios ikapadayag diha kaniya”? (bersikulo 3).

  • Gikan sa mga pagtulun-an sa Manluluwas niini nga mga bersikulo, unsa nga kamatuoran ang atong makat-unan mahitungod sa atong mga kalisdanan? (Ang mga estudyante mahimong mogamit og lain-laing mga pulong apan kinahanglang mahibalo sa kamatuoran sama sa mosunod: Mahimong gamiton sa Dios ang atong mga kalisdanan aron ikapakita ang Iyang mga buhat ug gahum.)

Ipasabut nga samtang dunay daghang lain-laing mga hinungdan ang kalisdanan sa atong kinabuhi, mahimong gamiton sa Dios ang atong mga hagit aron pagtabang nga matuman ang Iyang matarung nga mga katuyoan.

Dapita ang mga estudyante sa paghunahuna og usa ka kalisdanan nga ilang naagian o kasamtangang giatubang. Samtang padayon sa pagtuon ang mga estudyante sa Juan 9, hangyoa sila sa paghunahuna og mga paagi diin ang ang Dios makapakita sa Iyang mga buhat ug gahum pinaagi niini tungod niana nga mga kalisdanan.

Dapita ang usa ka estudyante sa pagbasa og kusog sa Juan 9:6–7 . Hangyoa ang klase sa pagsunod, nga mangita sa paagi diin gipakita sa Dios ang Iyang mga buhat ug gahum pinaagi sa kasinatian niining tawo nga buta.

  • Unsay inyong ma-imagine dihang nakakita sa unang higayon kining tawhana?

  • Sa unsang paagi ang kalisdanan niining tawhana naghimo sa uban nga makasaksi sa gahum sa Dios?

  • Niini nga istorya, ang tawo nagkinahanglan nga manghugas didto sa tuburan sa Siloam aron mamaayo ang iyang panan-aw. Unsa kaha ang gikinahanglan ninyong buhaton aron ang Dios makapakita sa Iyang mga buhat ug gahum diha sa inyong kinabuhi?

Juan 9:8–41

Gipangita sa Manluluwas ang tawo nga Iyang giayo human ang mga Pariseo mipalayas sa maong tawo

I-summarize ang Juan 9:8–15 pinaagi sa pagpasabut nga human ang tawo nga buta naayo, ang pipila ka mga tawo naglalis kon siya ba gayud kaha katong tawo nga gipakatawo nga buta. Ang uban naglibug kon sa unsang paagi siya naayo ug gidala siya ngadto sa mga Pariseo, kinsa nagsugod sa pag-usisa kaniya.

Dapita ang mga estudyante sa pagsiksik sa Juan 9:14 para sa adlaw diin ang Manluluwas miayo sa tawo nga buta. Hangyoa ang usa ka estudyante nga moreport sa unsay iyang nakit-an.

  • Unsa kaha sa inyong hunahuna ang reaksyon sa mga Pariseo sa gibuhat ni Jesus sa pag-ayo sa tawo atol sa Igpapahulay?

Dapita ang pipila ka mga estudyante nga magpuli-puli sa pagbasa og kusog sa Juan 9:16–38 . Hangyoa ang klase sa pagsunod, nga mangita kon unsa pay laing kalisdanan nga giatubang sa naayo nga tawo.

video iconImbis nga pabasahon nimo ang mga estudyante, mahimo nimong ipasalida ang nahibilin sa video nga “Jesus Heals a Man Born Blind” [time code 3:37–7:47]. Sugoa ang mga estudyante nga mangita kon unsa pay laing kalisdanan nga giatubang sa naayo nga tawo.

Tabangi ang mga estudyante nga mahibalo sa usa ka baruganan gikan niini nga istorya pinaagi sa pagpahinumdom nila nga ang mga ginikanan sa tawo nga buta gidala sa atubangan sa mga Pariseo aron usisahon.

  • Sumala sa bersikulo 22, nganong ang mga ginikanan sa tawo nga buta nag-agad man sa ilang anak nga mopasabut kon unsang paagiha siya nakakita?

Ipasabut nga ang mga “sinagoga nagsilbi nga sentro alang sa relihiyuso ug sosyal nga mga kalihokan para sa daghang mga komunidad sa mga Judeo. Ang mga sinagoga mitanyag nga mahimo kining gamiton sa espirituhanong mga instruksyon ug pagsimba, ingon man sa edukasyon ug sosyal nga mga oportunidad. Tungod kay ang sinagoga gikinahanglan man kaayo sa katilingban sa mga Judeo, ang pagkasalikway gikan sa sinagoga … nagpasabut og labaw pa sa pagka-excommunicate ug pagkawala sa fellowship uban sa relihiyusong komunidad. Nagpasabut kana sa pagkawala na nimoy labut sa kultural ug sosyal usab nga mga kalihokan. Kini nga hulga ingon og grabe gayud nga ang mga ginikanan sa tawo nga gipakatawo nga buta dili gusto nga malakip sa imbestigasyon bahin sa [pagkaayo sa ilang anak]” (New Testament Student Manual [manwal sa Church Educational System, 2014], 230).

  • Sumala sa bersikulo 24, unsa sa inyong hunahuna ang nasinati nga suliran sa naayo nga tawo?

Dapita ang mga estudyante sa pagbasa og hilum sa mga bersikulo 30–33, nga mangita sa tubag sa tawo ngadto sa mga Pariseo, ug pahibaloa ang mga estudyante nga ang Joseph Smith Translation sa Juan 9:32 midugang sa mga pulong nga “gawas kon siya iya sa Dios” diha sa katapusan sa bersikulo.

  • Unsa nga pagpangatarungan ang gigamit sa tawo aron mapanalipdan si Jesus? (Mahimo nimong isugyot nga markahan sa mga estudyante ang mga pulong diha sa bersikulo 33.)

  • Unsa man ang nahibaloan niining tawhana mahitungod ni Jesukristo?

Ipasabut nga kining tawhana gipalayas sa sinagoga tungod sa walay kahadlok niya nga pagpanalipud sa tawo nga miayo kaniya (tan-awa sa bersikulo 34).

  • Ngano kaha nga andam man kining tawhana nga magpabiling matinud-anon sa unsay iyang nahibaloan mahitungod ni Jesukristo bisan og nagpasabut kini nga isalikway siya sa sinagoga?

Pahinumdumi ang mga estudyante nga human ang tawo gipalayas sa sinagoga, nakit-an siya sa Manluluwas ug gipangutana kon siya “mituo ba sa Anak sa Dios” (bersikulo 35). Dapita ang usa ka estudyante sa pagbasa og kusog sa Juan 9:36–38, ug hangyoa ang klase sa pagpangita sa tubag sa tawo.

  • Unsa ang nahitabo sa pagpamatuod niining tawhana bahin ni Jesukristo? (Iyang nahibaloan nga si Jesukristo mao ang Anak sa Dios.)

  • Unsa nga baruganan ang atong makat-unan gikan niini nga tawo mahitungod sa pagpabiling matinuoron sa unsay atong nahibaloan? (Ang mga estudyante mahimong mahibalo og lain-laing mga baruganan, apan siguroha nga ilang masabtan ang mosunod nga baruganan: Kon magpabilin kitang matinuoron sa unsay atong nahibaloan bisan sa oposisyon, ang atong mga pagpamatuod malig-on. Isulat sa pisara kini nga baruganan.

Aron matabangan ang mga estudyante nga mas makasabut niini nga baruganan, dapita ang usa ka estudyante sa pagbasa og kusog sa Ether 12:6 . Hangyoa ang klase sa pagsunod, nga mangita kon unsay mahitabo human kita magpabiling matinuoron sa Ginoo kon masinati nato ang oposisyon sa atong pagtuo.

  • Ngano kaha nga ang atong mga pagpamatuod malig-on man human makabatok sa mga oposisyon o sa mga pagsulay sa pagtuo?

  • Sa unsang paagi ang inyong pagpamatuod nalig-on tungod sa oposisyon?

Aron matabangan ang mga estudyante nga mahibaloan ang ubang baruganan gikan niini nga istorya, pangutan-a kon pila kanila ang migamit og antipara (sama sa antiyuhos o mga contact lense).

  • Unsa ang nahimo niini nga mga lens sa inyong panan-aw?

  • Unsa nga pisikal nga panan-aw ang anaa niining tawhana human siya giayo ni Jesus?

  • Sa unsang paagi ang espirituhanong panan-aw niining tawhana o panabut sa Manluluwas naayo o napalambo?

Dapita ang mga estudyante sa pagbasa og hilum sa Juan 9:11, 17, 33, nga mangita sa mga pulong nga naghulagway sa panan-aw sa tawo o panabut kon si kinsa si Jesus. Hangyoa sila sa pagreport unsay ilang nakit-an. (Ang ilang mga tubag kinahanglang maglakip sa “tawo nga gitawag og Jesus,” “usa ka propeta,” ug tawo “sa Dios.” Isulat sa pisara kini nga mga pulong, ug dapita ang mga estudyante nga markahan ang ilang mga kasulatan.)

  • Sumala niini nga mga pulong, unsay nahitabo sa panan-aw niining tawhana? (Naayo kini ug milambo. Kini nga mga pulong nagpakita sa paglambo sa espirituhanong kahingkod niining tawhana ug panabut kon si kinsa gayud si Jesus.)

  • Ngano kaha nga ang iyang panan-aw ug panabut sa Manluluwas nagkaanam og kaklaro? (Gigamit niya ang pagtuo pinaagi sa pagpabiling matinud-anon sa unsay iyang nahibaloan.)

Hangyoa ang mga estudyante sa pagpakli ngadto sa Juan 9:36–38, nga mangita sa paagi nga miresulta sa pagkakita niining tawhana sa Manluluwas.

  • Unsa man ang nakat-unan niining tawhana sa pagkakita niya sa Manluluwas? (Iyang nahibaloan nga si Jesukristo mao ang Anak sa Dios.)

  • Unsa man kaeksakto sa pagkaayo ang panan-aw niining tawhana?

Dapita ang usa ka estudyante sa pagbasa og kusog sa mosunod nga pamahayag ni Presidente Howard W. Hunter. Hangyoa ang klase nga maminaw sa unsay gisulti ni Presidente Hunter nga mahitabo niining tawhana.

Presidente Howard W. Hunter

“Karon ang panan-aw gihatag na sa makaduha—ang usa mao ang pag-ayo sa congenital nga depekto [dala sa pagkatawo nga depekto] ug ang usa mao ang pagkakita niya sa Hari sa mga Hari sa wala pa Siya mokayab ngadto sa Iyang mahangturon nga trono. Giayo ni Jesus ang iyang temporal ug espiritwal nga panan-aw” (“The God That Doest Wonders,” Ensign, Mayo 1989, 16–17).

  • Sa unsang paagi ang pagkaayo niining tawhana sa pisikal nga pagkabuta nagrepresentar sa pagkaayo gikan sa espirituhanong pagkabuta?

  • Unsa nga baruganan ang atong makat-unan gikan niini nga istorya mahitungod sa posibling mahitabo kanato kon mogamit kita sa atong pagtuo kang Jesukristo? (Ang mga estudyante mahimong mogamit og lain-laing mga pulong apan kinahanglang mahibalo sa baruganan nga susama sa mosunod: Samtang gamiton nato ang atong pagtuo kang Jesukristo, ang atong espirituhanong panan-aw ug panabut magkatin-aw. Isulat sa pisara kini nga baruganan.

  • Ngano kaha nga ang paggamit sa pagtuo gikinahanglan man aron mas klaro nga makita ug masabtan ang espirituhanong mga kamatuoran?

Ipasabut nga pipila sa mga Pariseo nanagbarug sa duol dihang ang tawo nakakita ug miyukbo kang Jesus isip Anak sa Dios. Dapita ang usa ka estudyante sa pagbasa og kusog sa Juan 9:39–41 . Hangyoa ang klase sa pagsunod, nga mangita kon unsay gitudlo sa Manluluwas mahitungod sa pagkabuta.

  • Unsaon ninyo sa pag-summarize ang gitudlo sa Manluluwas ngadto sa mga Pariseo?

Ipasabut nga agig tubag sa pangutana sa mga Pariseo nga, “Mga buta ba diay usab kami?” (bersikulo 40), “migamit ang Manluluwas og usa ka pagkumpara, nagtudlo nga ang mga tawo nga ‘buta’—kadtong wala mahibalo kon si kinsa Siya—‘walay sala’ (Juan 9:41). Sa laing bahin, ang mga tawo kinsa ‘makakita’—mao kadtong nakadawat og igo nga saksi bahin sa Manluluwas ug sa Iyang balaan nga misyon nga sila unta nakaila kon si kinsa Siya—manubag sa ilang mga binuhatan. Ang mga Pariseo kauban niadtong kinsa ‘makakita,’ ug sa ingon ang ilang ‘sala magpabilin.’ Sa espirituhanon nga pagkasulti, gipili nila nga mahimong buta tungod kay nagdumili sila sa pag-ila ni Jesus isip Anak sa Dios, bisan pa sa daghang saksi nga ilang nadawat” (New Testament Student Manual, 231).

Sa pagtapos, dapita ang mga estudyante sa pagpangita sa duha ka mga baruganan diha sa pisara ug ipahunahuna asa niana ang gibati nila nga kinahanglan nilang gamiton sa ilang kinabuhi (mahimong mobati sila nga kinahanglan nilang gamiton ang duha ka baruganan). Hatagi og oras ang mga estudyante nga mosulat sa ilang mga class notebook o mga scripture study journal kon unsaon nila sa paggamit kini nga baruganan. Awhaga sila sa pag-ampo alang sa giya kon unsaon kini sa paghimo.

Komentaryo ug Background nga Impormasyon

Juan 9:2. “Kinsa may nakasala, kini bang tawhana o ang iya bang mga ginikanan, nga nahimugso man siyang buta?”

Si Elder Bruce R. McConkie sa Korum sa Napulog Duha ka mga Apostoles mihatag sa mosunod nga panabut sa unsay gitudlo ni Jesus sa Iyang mga disipulo dihang giayo Niya ang tawo nga buta:

“Si Jesus, pinaagi niini nga buhat sa paghatag og panan-aw sa makililimos nga buta, sa mahinuklugon ug sa dili malalis nga paagi, mipahayag sa iyang kaugalingon nga mao: (1) Ang Kahayag sa Kalibutan; ug (2) Ang tinuod nga Anak sa Dios. Pinaagi sa paghimo niini nga milagro iya usab nga: Gipamatud-an ang pagtuo sa mga disipulo bahin sa pre[mortal] nga kinabuhi; gisalikway ang pagtuo sa uban nga ang pisikal nga kakulangan resulta sa mga sala nga nahimo sa premortal nga kinabuhi; mitudlo nga ang kaugalingon niyang buhat gipabuhat sa Amahan kaniya; gipamatud-an pag-usab nga siya ang maghukom sa kalibutan; ug mitudlo nga ang pagsalikway sa kahayag ug kamatuoran moresulta sa kaalautan” (Doctrinal New Testament Commentary, 3 vols. [1965–73], 1:479).

Juan 9:8–38. Samtang gamiton nato ang atong pagtuo kang Jesukristo, ang atong espirituhanong panan-aw ug panabut magkatin-aw

Si Presidente Boyd K. Packer sa Korum sa Napulog Duha ka mga Apostoles mitudlo:

“Pagmatuohon kamo ug ang inyong pagtuo padayon nga madugangan, ug ang inyong kahibalo sa kamatuoran molambo, ug ang inyong pagpamatuod sa Manunubos, sa Pagkabanhaw, sa Pagpahiuli mahisama sa sa ‘usa ka tuburan sa buhi nga tubig, nga magatubod ngadto sa kinabuhing dayon’ [D&P 63:23; tan-awa usab sa Juan 4:14; Jer. 2:13). Dayon madawat ninyo ang giya para sa mapuslanong mga desisyon sa matag adlaw nga pagpakabuhi” (“Personal Revelation: The Gift, the Test, and the Promise,” Ensign, Nob. 1994, 61).

Si Elder Richard G. Scott sa Korum sa Napulog Duha ka mga Apostoles mitudlo:

“Magbaton og hugot nga pagtuo sa Manluluwas. Maningkamot nga makapatalinghug sa Iyang tambag ug mosunod sa Iyang mga sugo. Siya manalangin ug mogiya ninyo samtang magpadayon kamo niining usahay mabudhion nga kalibutan.

“Madasigon ko nga mopamatuod nga si Jesukristo naggiya niini, nga Iya nga Simbahan. Siya personal nga nakaila ug nahigugma kaninyo. Samtang maglakaw kamo sa kamatinud-anon nga pagsunod, Iya kamong panalanginan, dasigon kamo, ug giyahan kamo ngadto sa mas dakong kahibalo ug kapasidad. Mopamatuod ko nga Siya buhi” (“Acquiring Spiritual Knowledge,” Ensign, Nob. 1993, 88).