Leksyon 70: Juan 10

Leksyon 70

John 10

Pasiuna

Gitudlo ni Jesus nga Siya ang Maayong Magbalantay ug ihalad Niya ang Iyang kinabuhi sa pagpakamatay alang sa Iyang karnero. Mipamatuod usab Siya nga ang Langitnong Amahan mihatag Niya og gahum labaw sa kamatayon. Ang uban miakusar ni Jesus nga nanamastamas gumikan sa pagsangyaw nga Siya ang Anak sa Dios.

Mga Sugyot alang sa Pagtudlo

Juan 10:1–24

Gitudlo ni Jesus nga Siya ang Maayong Magbalantay ug ihalad Niya ang Iyang kinabuhi sa pagpakamatay alang sa Iyang katawhan

Dapita ang usa ka estudyante sa pagduol sa atubangan sa klase. Taptapi ang estudyante, ug dayon punduka ang mga kasulatan [scriptures], lakip ang kasulatan sa gitaptapan nga estudyante. Hangyoa ang gitaptapan nga estudyante nga mohikap sa mga kasulatan ug sulayan sa pag-ila kon asa niini ang iyaha. Human kini mahimo sa estudyante, pangutan-a:

Ngano nga nakaila ka (o wala makaila) sa imong mga kasulatan?
Kon ipahikap nako nimo ang mga nawong sa imong mga classmate, pila kaha nila ang tukma nimong mailhan? (Ayaw pahimoa niini sa aktwal ang estudyante.)

Ipatangtang sa estudyante ang taptap ug palingkura og balik. Ipasabut nga usa ka magbalantay sa karnero sa Middle East kausa gipangutana kon nakaila ba gayud siya sa iyang mga karnero. Mitubag siya, “Kon inyo kong taptapan, ug magdala mo diri nako og bisan unsa nga karnero ug bisan pahikapon lang ko ninyo sa iyang nawong, diha dayon akong mahibaloan kon akoa ba kini o dili” (G. M. Mackie, Bible Manners and Customs [n.d.], 35).

Kon ikaw ang magbalantay sa karnero, unsa kaha ang gikinahanglan aron makaila ka gayud sa karnero sa imong panon sama sa gihimo niini nga magbalantay?

Dapita ang mga estudyante sa pagbasa og hilum sa Juan 10:14, nga mangita kon unsay tawag ni Jesus sa Iyang kaugalingon. Hangyoa sila sa pagreport unsay ilang nakit-an. Isulat ang mosunod nga pamahayag diha sa pisara: Si Jesukristo mao ang Maayong Magbalantay.

Ngano kaha nga ang “maayong magbalantay” usa man ka tukma nga tawag para sa Manluluwas?

Awhaga ang mga estudyante sa pagpangita sa mga kamatuoran samtang magtuon sila sa Juan 10 nga nagtudlo kanato sa unsang paagi ang Manluluwas mao ang atong Maayong Magbalantay.

Aron matabangan ang mga estudyante nga makasabut sa kultural nga setting sa Juan 10:1–5, ipasabut nga sa kapanahunan sa Manluluwas, ang mga magbalantay mogiya sa ilang mga karnero sa pagpakaon, pagpainom, ug kasilungan atol sa adlaw. Inig kagabii, ang ubang mga magbalantay mopundok sa ilang mga karnero ngadto sa usa ka komon nga toril. Ang toril usa ka kuweba o sarado nga dapit nga gilibutan og mga koral nga bato nga may hait nga mga tunok nga gitusok sa ibabaw aron ang ihalas nga mga hayop dili makasulod.

Ipares-pares ang mga estudyante. Dapita ang matag pares sa pagbasa og kusog sa Juan 10:1–5, nga mangita kon unsay buluhaton sa usa ka maayong magbalantay. Human sa igo nga panahon, dapita ang pipila ka estudyante sa pagreport unsay ilang nakit-an. Isulat ang ilang mga tubag sa pisara ubos sa Si Jesukristo mao ang Maayong Magbalantay. (Ang mga tubag tingali maglakip sa mosunod: Moagi Siya sa pultahan, Iyang pagatawgon ang mga karnero sa iyang ngalan, ug mag-una Siya sa Iyang mga karnero.)

Sumala sa bersikulo 3, sa unsang paagi ang magbalantay sa mga karnero mogiya sa iyang mga karnero paggawas sa toril?
Sumala sa mga bersikulo 4-5, ngano nga ang sundon sa mga karnero ang ila ra man nga magbalantay?
Unsa ang gingalan sa Manluluwas niadtong maningkamot nga mosulod sa toril sa karnero nga dili moagi sa pultuhan?

Ipasabut nga ang mga Pariseo kauban sa grupo sa mga tawo nga maoy gisultihan ni Jesus (tan-awa sa Juan 9:41).

Sa unsang paagi ang mga Pariseo susama sa mga kawatan, tulisan, ug mga estranghero sa toril sa karnero?

Dapita ang mga estudyante sa pagbasa og hilum sa Juan 10:6, nga mangita sa gisanong sa mga Pariseo sa pagtulun-an sa Manluluwas. Hangyoa sila sa pagreport unsay ilang nakit-an.

Ipasabut nga sumala sa narekord sa Juan 10:7–16, ang Manluluwas mipadayon sa pagtudlo mahitungod sa kalainan tali Kaniya ug sa mga Pariseo. Dapita ang usa ka estudyante sa pagbasa og kusog sa mga bersikulo 7–10, dayon ipabasa ang Joseph Smith Translation niini nga bersikulo: “Ang tanan nga nahianhi una kanako kinsa wala mopamatuod kanako sila mga kawatan ug mga tulisan, apan ang mga karnero wala magpatalinghug kanila.” Hangyoa ang klase sa pagsunod, nga mangita sa mga pagtulun-an ni Jesus niini nga mga bersikulo.

Unsa ang dugang nga panabut mahitungod sa mga kawatan ang gihatag diha sa bersikulo 8 sa Joseph Smith Translation?
Sa inyong hunahuna unsa kaha ang buot ipasabut sa Manluluwas sa Iyang giingon nga “Ako mao ang pultahan” (mga bersikulo 7, 9)?

Ipasabut nga ang “mga magbalantay sa karnero didto sa Israel magbarug sa may pultahan sa toril ug mosusi sa matag karnero samtang nanulod kini, manambal sa mga samad kon gikinahanglan. Human mapundok ang mga karnero ngadto sa toril sa pagkagabii, ang magbalantay mohigda aron matulog diha sa may pultahan, mag-atang sa agianan aron ang mga mamugno nga hayop o mga tulisan dili makahilabut sa karnero” (New Testament Student Manual [manwal sa Church Educational System, 2014], 231–32).

Sa unsang paagi ang mga binuhatan sa magbalantay sa karnero susama ra sa gibuhat sa Manluluwas ngari kanato?
Sa inyong hunahuna unsaon sa Manluluwas sa paghatag og kinabuhi “sa madagayaon gayud” (Juan 10:10) kadtong mga mosunod Kaniya?

Dapita ang usa ka estudyante sa pagbasa og kusog sa Juan 10:11–15 . Hangyoa ang klase sa pagsunod, nga mangita kon unsa pay laing gisulti sa Manluluwas nga buhaton sa maayong magbalantay sa karnero. Ipasabut nga ang usa ka sinuholan usa ka tawo kansang unang motibo sa pagtrabaho mao ra ang sweldo.

Dapita ang pipila ka estudyante sa pagduol sa pisara ug isulat ang bisan unsa nga ilang nakit-an mahitungod sa Maayong Magbalantay ubos sa Si Jesukristo ang Maayong Magbalantay. (Ang mga tubag tingali maglakip sa mosunod: Gihatag Niya ang Iyang kinabuhi para sa Iyang mga karnero, nakaila Siya sa Iyang mga karnero, ug nakaila Kaniya ang Iyang mga karnero.)

Unsa ang andam nga buhaton sa usa ka magbalantay sa karnero nga dili andam nga buhaton sa usa ka sinuholan?
Unsa nga kamatuoran ang atong makat-unan mahitungod sa Manluluwas gikan niini nga mga bersikulo? (Ang mga estudyante mahimong mogamit og lain-laing mga pulong, apan siguroha nga mahibalo sila sa mosunod nga kamatuoran: Isip Maayong Magbalantay sa karnero, si Jesukristo nakaila sa matag usa kanato ug mihalad sa Iyang kinabuhi sa pagpakamatay alang kanato. Isulat sa pisara kini nga kamatuoran ubos sa Si Jesukristo mao ang Maayong Magbalantay.)

Pahinumdumi ang mga estudyante bahin sa Middle Eastern nga magbalantay sa karnero kinsa nakaila kaayo sa matag usa niya nga karnero.

Sa inyong hunahuna nailhan gyud kaha kaayo kamo sa Manluluwas?
Sa unsang paagi kaha ang inyong inadlawng pagpakabuhi maapektuhan sa inyong pagkasabut nga ang Manluluwas nakaila kaninyo ug andam Siyang mihalad sa Iyang kinabuhi sa pagpakamatay alang kaninyo?

Ipasabut nga human sa iyang pagpanudlo nga Iyang ihalad ang Iyang kinabuhi sa pagpakamatay alang kanato, gipasabut sa Manluluwas ang uban pa Niyang mga buhatunon. Dapita ang usa ka estudyante sa pagbasa og kusog sa Juan 10:16 . Hangyoa ang klase sa pagpangita sa unsa pay giingon sa Manluluwas nga Iyang buhaton alang sa Iyang karnero (buot ipasabut sa Iyang katawhan).

Unsa ang giingon sa Manluluwas nga Iyang buhaton alang sa Iyang karnero?
Unsa man ang giingon niini nga bersikulo mahitungod sa lokasyon sa Iyang karnero?

Ipasabut nga ang Manluluwas nanudlo sa mga Judeo sa Jerusalem nga mobisita Siya sa mga anak sa Dios sa ubang kayutaan, motudlo kanila sa Iyang ebanghelyo, ug dad-on sila ngadto sa Iyang panon (Iyang Simbahan). Ipasabut nga ang Basahon ni Mormon naghatag og katin-awan niini nga bersikulo.

Dapita ang pipila ka mga estudyante nga magpuli-puli sa pagbasa og kusog sa 3 Nephi 15:15–17, 21; 16:1–3 . Mahimo nimong isugyot nga isulat sa mga estudyante kini nga reference diha sa margin sa ilang mga kasulatan tapad sa Juan 10:16.

Sa unsang paagi kini nga mga bersikulo nagtabang nato nga mas makasabut sa Juan 10:16? (Ang “ubang karnero” nag-refer ngadto sa mga Nephite ug sa nawala nga mga tribo, dili sa mga Hentil.)

Hangyoa ang mga estudyante sa pagbasa og hilum sa Juan 10:17–18, nga mangita sa doktrina mahitungod sa Manluluwas. Dapita sila sa pagreport unsay ilang nakit-an. (Ang mga estudyante mahimong mogamit og lain-laing mga pulong apan kinahanglang mahibaloan nila ang mosunod nga doktrina: Isip literal nga Anak sa Dios, si Jesukristo dunay gahum sa paghalad sa Iyang kinabuhi sa pagpakamatay ug pagbuhi niini og balik. Awhaga ang mga estudyante sa pagmarka sa mga pulong nga nagtudlo niini nga doktrina dinhi niini nga mga bersikulo.)

Nganong ang Manluluwas duna may katakus nga mamatay ug katakus nga mabuhi pag-usab human mamatay? (Gikan sa Iyang mortal nga inahan, si Maria, mortal nga babaye, napanunod ni Jesus ang pagka-mortal, lakip na ang kapasidad nga mamatay. Gikan ni Elohim, Iyang Amahan, Iyang napanunod ang pagka-imortal, ang gahum nga mabuhi sa hangtud. Sa ingon, Siya nakapanunod sa mga abilidad nga mamatay ug mabanhaw, nga gikinahanglan ni Jesus aron Iyang mahimo ang Pag-ula. [Tan-awa sa leksyon sa Mateo 1–2.])

I-summarize ang Juan 10:19–24 pinaagi sa pagpasabut nga human ang Manluluwas mitudlo niining mga butanga, nabahin ang mga tawo sa ilang mga opinyon kon si kinsa si Jesus. Giduol nila si Jesus didto sa templo ug gipugos nga itug-an Niya ang tinuod Niyang pagkatawo nga mao ang Kristo.

Juan 10:25–42

Gitug-an ni Jesus nga Siya ang Anak sa Dios

Dapita ang laing estudyante nga moadto sa atubangan sa klase. Taptapi ang estudyante, ug dayon sugoa ang ubang estudyante nga magpuli-puli sa pagsulti sa pulong nga (sama pananglit, “magbalantay sa karnero”). Hangyoa ang gitaptapan nga estudyante sa pagpaminaw sa matag usa ka tawo nga mosulti sa pulong ug tinoa kon iya bang mailhan pinaagi sa tingog kon si kinsa ang nagsulti.

Ngano nga ang ubang tingog mas dali nga mailhan kay sa uban?

Ipatangtang sa estudyante ang taptap ug palingkura siya og balik. Dapita ang usa ka estudyante sa pagbasa og kusog sa Juan 10:25–30 . Hangyoa ang klase sa pagsunod, nga mangita sa tubag ni Jesus sa hangyo sa mga tawo nga sultihan sila kon Siya ba si Kristo.

Giunsa sa paghulagway sa Manluluwas ang Iyang karnero? (Ang karnero sa Manluluwas maminaw sa Iyang tingog ug mosunod Kaniya.)
Sumala sa bersikulo 28, unsa man ang madawat sa mga tawo nga maminaw ug mosunod sa tingog sa Manluluwas?
Unsa nga baruganan ang atong makat-unan gikan niini nga mga bersikulo? (Ang mga estudyante mahimong makahibalo og lain-laing mga baruganan, apan siguroha ang paghatag og empasis nga kon kita makaila sa tingog sa Maayong Magbalantay ug mosunod Kaniya, Siya mogiya kanato ngadto sa kinabuhing dayon.) Isulat sa pisara ang ilang mga tubag ubos sa Si Jesukristo mao ang Maayong Magbalantay. Mahimo nimong isugyot nga isulat sa mga estudyante kini nga baruganan diha sa margin sa ilang mga kasulatan tapad sa Juan 10:27–28.)

Pahinumdumi ang klase bahin sa ikaduhang estudyante nga gitaptapan ug sa iyang abilidad sa pag-ila sa tingog sa iyang mga classmate.

Unsa man ang atong mahimo aron makaila sa tingog sa Manluluwas? (Tan-awa usab sa D&P 18:34–36.)
Unsa man ang inyong gihimo aron mas mapamilyar ninyo ang tingog sa Manluluwas?
Sa unsang mga paagi nga mapakita nato nga atong gisunod ang Manluluwas?

Hatagi ang mga estudyante og panahon sa pagpamalandong unsaon nila nga mas makadungog sa tingog sa Manluluwas ug mosunod Kaniya. Sa ilang mga scripture study journal, dapita sila nga ilang sulatan og (1) usa ka tumong nga maminaw og maayo sa tingog sa Manluluwas ug sa pihong mga paagi kon unsaon nila sa pagbuhat niini o (2) usa ka tumong nga mas mosunod sa Iyang tingog ug unsaon nila sa pagplano ang paghimo niini.

I-summarize ang Juan 10:31–42 pinaagi sa pagpasabut nga human ang Manluluwas mipamatuod nga Siya ug ang Iyang Amahan usa ra, ang mga lider sa mga Judeo nagtinguha sa pagbato Kaniya tungod sa pagpanamastamas. Hinoon, gitubag Niya ang ilang mga akusasyon pinaagi sa pagkutlo sa Salmo 82:6, nga mabasa, “Ako miingon, Kamo mao ang mga dios, Ug kamong tanan mga anak sa Hataas Uyamut.” Dayon nangutana ang Manluluwas sa mga Judeo nganong Siya giakusahan man nila og panamastamas dihang miingon Siya nga Siya ang Anak sa Dios, nga ang kasulatan nag-ingon man nga kita mga anak sa Dios ug mamahimong mga dios sa atong kaugalingon.

Tapusa pinaagi sa pagpamatuod sa mga kamatuoran ug sa mga baruganan nga gitudlo diha sa Juan 10 ug pinaagi sa pag-awhag sa mga estudyante nga gamiton kini.

Komentaryo ug Background nga Impormasyon

Juan 10:30. “Ako ug ang Amahan usa ra”

Si Elder Jeffrey R. Holland sa Korum sa Napulog Duha ka mga Apostoles mihatag og katin-awan sa kahulugan sa pamahayag nga ang Manluluwas usa ra sa Iyang Amahan:

“Ang atong una ug pinakaimportante nga artikulo sa Ang Simbahan ni Jesukristo sa mga Santos sa Ulahing mga Adlaw mao nga “Kita nagtuo sa Dios, ang Amahan sa Kahangturan, ug sa Iyang Anak, si Jesukristo, ug sa Espiritu Santo” [Mga Artikulo sa Hugot nga Pagtuo 1:1]. Kita nagtuo nga kining tulo ka balaanong mga tawo nga naglangkob sa usa ka Dios nga Kapangulohan nagkahiusa sa katuyoan, sa pamaagi, sa pagpamatuod, sa misyon. Kita nagtuo Kanila nga puno sa samang diosnong pagbati sa kalooy ug gugma, kaangayan ug grasya, pailub, pagpasaylo, ug katubsanan. Sa akong hunahuna tukma kini sa pag-ingon nga kita nagtuo nga Sila usa sa mahinungdanon ug mahangturong kinaiya nga mahunahuna gawas nga kita wala magtuo Kanila nga tulo ka mga tawo nga giusa ra diha sa usa ka lawas, usa ka Trinitarian nga ideya nga dili gayud pinasikad diha sa mga kasulatan tungod kay dili kini tinuod” (“Sa Bugtong Tinuod nga Dios ug kang Jesukristo Nga Iyang Pinadala,” Ensign o Liahona, Nob. 2007, 40).

Si Elder B. H. Roberts sa Kapangulohan sa Seventy mitabang nato nga makasabut sa pangatarungan sa Manluluwas sa pagsupak sa mga Pariseo kinsa miakusar Kaniya og pagpanamastamas:

“Angay nga makita nga niana nga panagsultihanay sa dihang giakusahan si Jesus nga naghimo sa Iyang kaugalingon nga kauban sa Dios, wala Niya ilimud ang pasangil; apan sa sukwahi, mitawag sa ilang atensyon sa katinuod nga ang Dios diha sa balaod nga iyang gihatag ngadto sa Israel miingon ngadto sa pipila kanila—‘kamo mga Dios.’ Ug unya, misupak si Jesus, kon kadtong mga tawo diin ang mga pulong sa Dios miabut gitawag nga mga Dios sa pamalaod sa mga Judeo, ug ang kasulatan diin ang kamatuoran gipahayag nga dili masupak, nga mao nga, ang kamatuoran kon gilimud o gihimong bakak [gipahayag nga dili tinuod o inbalido]—nganong moreklamo man ang mga Judeo kon siya, usab, nga mao si Kristo, kinsa hilabihan nga gibalaan sa Dios nga Amahan, mitawag sa iyang kaugalingon nga Anak sa Dios?” (New Witnesses for God, 3 vols. [1909–11], 1:465–66).

Juan 10:27. “Ang akong mga karnero nagapatalinghug sa akong tingog, ug … sila nagasunod kanako”

Gitudlo ni Presidente Harold B. Lee ang mahitungod sa lain-laing pamaagi nga atong madungog ang tingog sa Manluluwas:

“Kon kita magpuyo nga takus, niana ang Ginoo mogiya kanato—pinaagi sa personal nga pagpakita, o pinaagi sa Iya gayud nga tingog, o pinaagi sa tingog nga moabut sa atong hunahuna, o pinaagi sa pagbati sa atong kasingkasing ug sa atong kalag. Ug o, unsa kita ka mapasalamaton kon ang Ginoo mopadala kanato sa damgo diin ipadayag ngari kanato ang kaanindot sa kahangturan o usa ka pasidaan ug direksyon alang sa atong espesyal nga kahupayan. Oo, kon kita magpakabuhi, ang Ginoo mogiya kanato alang sa atong kaluwasan ug alang sa atong kaayohan” (Mga Pagtulun-an sa mga Presidente sa Simbahan: Harold B. Lee [2000], 61–62).

Elder Joseph B. Wirthlin sa Korum sa Napulog Duha Ka mga Apostoles mitudlo kon unsaon nato pagsunod ang Manluluwas:

“Unsaon man nato sa pagsunod sa Manluluwas? Pinaagi sa paggamit sa hugot nga pagtuo. Pinaagi sa pagtuo Kaniya. Pinaagi sa pagtuo sa atong Langitnong Amahan. Pinaagi sa pagtuo nga ang Dios namulong sa tawo sa kalibutan karon.

“Gisunod nato ang Manluluwas pinaagi sa paghinulsol sa atong mga sala—pinaagi sa pagsinati og kasubo tungod niini ug sa pagbiya niini.

“Gisunod nato ang Manluluwas pinaagi sa pagsulod diha sa mga tubig sa pagbunyag ug pagdawat sa kapasayloan sa atong mga sala, pinaagi sa pagdawat sa Espiritu Santo ug tugutan kana nga impluwensya nga modasig, motudlo, mogiya, ug mohupay kanato.

“Unsaon man nato sa pagsunod sa Manluluwas? Pinaagi sa pagtuman Kaniya. Siya ug ang Langitnong Amahan mihatag kanato og mga sugo—dili aron kita silutan o paantuson, apan aron matabangan kita nga makaabut sa kahingpitan sa kalipay, dinhi niining kinabuhia ug sa mga kahangturang moabut, mga kalibutan nga walay katapusan” (“Follow Me,” Ensign, Mayo 2002, 16–17).