Leksyon 72

Juan 12

Pasiuna

Si Maria sa Betania, ang igsoon ni Marta ug Lazaro, midihog sa tiil ni Jesus isip simbolo sa nagsingabut Niya nga paglubong. Sa pagkasunod adlaw gihimo ni Jesus ang madaugon Niyang pagsulod sa Jerusalem ug nanagna bahin sa Iyang kamatayon. Bisan pa sa mga milagro ni Jesus, ang ubang mga tawo wala motuo Kaniya. Gitudlo Niya ang mga sangputanan sa pagtuo Kaniya ug sa dili pagtuo Kaniya.

Mga Sugyot alang sa Pagtudlo

Juan 12:1–19

Si Maria midihog sa tiil ni Jesus, ug si Jesus mihimo sa Iyang madaugong pagsulod ngadto sa Jerusalem

Ipadrowing sa pipila ka estudyante diha sa pisara ang paghulagway sa usa sa mga milagro sa Manluluwas nga narekord sa Bag-ong Tugon. Human ang matag estudyante mahuman sa pagdrowing, ipatag-an sa klase ang milagro nga gihulagway. Hangyoa ang estudyante kinsa midrowing niini sa pagpasabut nganong gipili niya sa paghulagway niini nga milagro.

Hangyoa ang mga estudyante sa pagpamalandong kon sa unsang paagi ang pagsaksi sa usa niini nga mga milagro makaimpluwensya sa ilang pagtuo sa Manluluwas. Dapita sila sa pagpangita samtang tun-an nila ang Juan 12 sa lain-laing mga paagi sa pagsanong sa mga tawo ngadto sa mga milagro sa Manluluwas, ingon man sa mga kamatuoran nga makatabang nato nga makasabut niini nga mga pagsanong.

I-summarize ang Juan 12:1–9 pinaagi sa pagpasabut nga sa unom ka adlaw sa wala pa ang Pagpalabay, nanihapon si Jesus kauban sa mga higala sa Betania. Si Maria, ang igsoon ni Marta ug ni Lazaro, midihog sa tiil ni Jesus gamit ang mahalon nga lana. Daghang tawo nakadungog nga naa si Jesus sa Betania ug nangadto sila sa pagtan-aw Kaniya ug kang Lazaro, kinsa gibuhi ni Jesus gikan sa pagkamatay.

Dapita ang usa ka estudyante sa pagbasa og kusog sa Juan 12:10–11 . Hangyoa ang klase sa pagsunod, nga mangita kon unsay gustong buhaton sa punoang mga pari kang Lazaro. Mahimo usab nimong ipasabut nga ang pagbuhi kang Lazaro usa ka dili malalis nga ebidensya nga si Jesukristo dunay gahum labaw sa kamatayon.

• Unsa ang gustong buhaton sa punoang mga pari ngadto ni Lazaro? Ngano man?

• Sa unsang paagi kini nga mga bersikulo makatabang nato nga makasabut sa kadautan niining mga punoang mga pari ug mga Pariseo? (Mahimo nimong pahinumduman ang mga estudyante nga kining mga lider sa mga Judeo gusto usab nga mopatay sa Manluluwas [tan-awa sa Juan 11:47–48, 53].)

I-summarize ang Juan 12:12–16 pinaagi sa pagpasabut nga human sa adlaw nga gidihugan ni Maria ang till ni Jesus, mihimo Siya sa Iyang madaugong pagsulod ngadto sa Jerusalem. (Ang una nga mga detalye sa madaugong pagsulod gitudlo sa Mateo 21:1–11.)

Dapita ang usa ka estudyante sa pagbasa og kusog sa Juan 12:17–19 . Hangyoa ang klase sa pagsunod, nga mangita kon unsa ang gihimo sa mga tawo nga nakadungog mahitungod sa pagbuhi ni Jesus kang Lazaro gikan sa pagkamatay atol sa madaugon Niya nga pagsulod sa Jerusalem.

• Unsa ang gihimo sa mga tawo atol sa madaugong pagsulod sa Manluluwas ngadto sa Jerusalem?

• Sumala sa bersikulo 19, sa unsang paagi ang mga Pariseo misanong sa mga nanghitabo?

Juan 12:20–36

Si Jesus nanagna sa Iyang kamatayon

I-summarize ang Juan 12:20–22 pinaagi sa pagpasabut nga may “piho nga mga Gresyanhon” sa (bersikulo 20)—nga posibling mga kinabig sa Judaism—nangadto sa Jerusalem aron sa pagsaulog sa Pagpalabay ug mihangyo nga makigkita kang Jesus. Dihang nahibaloan ni Jesus ang ilang hangyo, gitudlo Niya ang mahitungod sa nagsingabut Niya nga pag-antus, kamatayon, ug Pagkabanhaw. Dapita ang mga estudyante sa pagbasa og hilum sa Juan 12:27–33, nga mangita kon unsay gitudlo ni Jesus mahitungod sa Iyang Pag-ula. Mahimo nimong pamarkahan sa mga estudyante ang ilang nakit-an.

• Sumala sa bersikulo 27, unsa man ang andam nga buhaton ni Jesus bisan og ang Iyang “kalag naguol”? (Bisan og Iyang gibati ang kabug-aton sa nagsingabut Niya nga pag-antus, mihukom si Jesus nga magpadayon sa pagtuman sa Iyang mga katuyoan.)

• Sumala sa bersikulo 28, para sa unsa ang giampo ni Jesus? Giunsa man sa pagtubag sa Langitnong Amahan? (Ipasabut nga ang “gipasidunggan ko … ug pagapasidunggan ko kini pag-usab” nagpakita sa hingpit nga pagsalig sa Langitnong Amahan ngadto sa Iyang Anak nga Siya makakompleto sa Pag-ula.)

• Sa unsang paagi ang mga pulong ni Jesus nga narekord sa bersikulo 32 may kalabutan sa Iyang Pag-ula?

Ipasabut nga human madungog ang mga pagtulun-an ni Jesus, miingon ang mga tawo nga nakat-unan nila gikan sa mga kasulatan nga ang Mesiyas dili gayud mamatay, ug nangutana sila kon si kinsa ang “Anak sa tawo” nga kinahanglang “igaisa” (Juan 12:34).

Dapita ang usa ka estudyante sa pagbasa og kusog sa Juan 12:35–36 . Hangyoa ang klase sa pagsunod, nga mangita kon giunsa sa pagtubag ni Jesus ang ilang pangutana.

• Unsa ang gisulti ni Jesus agig tubag sa mga pangutana sa mga tawo? (Gi-refer sa Manluluwas ang Iyang kaugalingon nga mao “ang kahayag.”)

Juan 12:37–50

Gitudlo ni Jesus ang mga sangputanan sa pagtuo ug ang dili pagtuo Kaniya

Idirekta ang atensyon sa mga estudyante ngadto sa mga drowing nga naa sa pisara nga naghulagway sa mga milagro ni Jesus. Dapita ang usa ka estudyante sa pagbasa og kusog sa Juan 12:11 ug laing estudyante nga mobasa og kusog sa Juan 12:37 . Hangyoa ang klase sa pagsunod, nga mangita sa lain-laing mga paagi giunsa sa pagsanong sa mga tawo ang mga milagro nga nahimo ni Jesus.

• Giunsa sa pagsanong sa mga tawo ang mga milagro ni Jesus?

• Unsa nga kamatuoran ang atong makat-unan gikan niining managlahi nga reaksyon mahitungod sa relasyon tali sa mga milagro ug sa pagtuo kang Jesukristo? (Ang mga estudyante mahimong mogamit og lain-laing mga pulong, apan siguroha ang pagklaro nga dili lamang tungod sa milagro nga kita motuo ni Jesukristo.)

• Bisan og dili lamang tungod sa milagro nga kita motuo ni Jesukristo, sa unsang paagi kini moimpluwensya sa atong pagtuo Kaniya.

• Ngano kaha nga ang ubang mga tawo mituo man ni Jesukristo human makakita o mahibalo sa Iyang mga milagro samtang ang uban wala?

I-summarize ang Juan 12:38–41 pinaagi sa pagpasabut nga sa katinuod ang pagpili sa ubang tawo nga dili tuohan si Jesus usa ka ka katumanan sa mga panagna nga gihimo ni propeta Isaias (tan-awa sa Isaias 6:9–10; 53:1–3). Bisan pa sa talagsaong mga nabuhat sa Manluluwas, pipila sa mga tawo mipili nga magpakabuta ug mipatig-a sa ilang kasingkasing batok Kaniya.

Dapita ang usa ka estudyante sa pagbasa og kusog sa Juan 12:42–43 . Hangyoa ang klase sa pagsunod, nga mangita kon nganong ang ubang mga lider sa mga Judeo nga wala mituo kang Jesus wala man “motug-an” (bersikulo 42), o dili dayag nga mipakita sa ilang gituohan.

• Ngano nga ang ubang mga punoang tigmando wala man mopakita sa dayag sa ilang gituohan kang Jesus?

• Unsa ang ipasabut sa mas gipalabi ang “pagdalayeg gikan sa mga tawo kay sa pagdalayeg gikan sa Dios”? (bersikulo 43).

• Unsa nga baruganan ang atong makat-unan gikan niini nga mga bersikulo? (Tabangi ang mga estudyante nga mahibaloan ang mosunod nga baruganan: Ang hunahuna nga palabihon ang pagpahimuot sa uban kay sa mapahimuot ang Dios makapugong sa dayag natong pag-ila sa atong pagtuo kang Jesukristo ug sa Iyang ebanghelyo.)

Aron matabangan ang mga estudyante nga makasabut niini nga baruganan, pangutan-a:

• Unsa ang pipila ka mga ehemplo bahin niini nga baruganan sa atong panahon?

• Unsa ang tukmang mga paagi nga atong ikapakita nga mituo kita kang Jesukristo ug sa Iyang ebanghelyo?

• Unsang positibo nga mga sangputanan ang moabut gumikan sa pagpakita nga kita mituo ni Jesukristo ug sa Iyang ebanghelyo?

Aron maandam ang mga estudyante nga mahibalo sa usa ka baruganan nga gitudlo sa Juan 12:44–46, hangyoa sila sa paghunahuna og usa ka panahon dihang wala silay makita tungod sa pisikal nga kangitngit (sama pananglit, dihang naa sila sulod sa ngitngit nga kwarto o naa sa gawas sa ngitngit kaayong gabii). Dapita ang pipila ka estudyante sa paghulagway sa ilang mga kasinatian, lakip kon unsay ilang gibati, dihang naa sila sa nag-ungaw nga peligro, ug sa unsang paagi ang kahayag unta makatabang nila.

Kon angay, palunga ang mga suga sa kwarto apan pasigaa gihapon ang ubang suga. Ipasabut nga ang pisikal nga kangitngit makatabang nga kita makasabut kon sama sa unsa ang espirituhanong kangitngit.

• Sa unsang paagi ang pisikal nga kangitngit susama sa espirituhanong kangitngit?

• Unsa nga mga peligro ang moabut gumikan sa pagpuyo sa espirituhanong kangitngit?

Dapita ang usa ka estudyante sa pagbasa og kusog sa Juan 12:44–46 . Hangyoa ang klase sa pagsunod, nga mangita kon sa unsang paagi nga kadtong motuo ni Jesukristo mapanalanginan.

• Sumala sa Juan 12:46, sa unsang paagi kadtong motuo ni Jesukristo mapanalanginan? (Human makatubag ang mga estudyante, pasigaa ang mga suga sa kwarto kon gipalong ninyo kini. Gamit ang mga pulong sa estudyante, isulat sa pisara ang mosunod nga baruganan: Kon motuo kita ni Jesukristo, dili kita magpuyo sa espirituhanong kangitngit.)

• Sa unsang paagi si Jesukristo usa ka kahayag? Sa unsang paagi ang pagtuo Kaniya makatangtang sa espirituhanong kangitngit gikan sa kinabuhi sa usa ka tawo? (Tan-awa usab sa D&P 50:23–25; 93:36–39.)

Aron matabangan ang mga estudyante nga makasabut sa unsang paagi maabug ni Jesukristo ang espirituhanong kangitngit pinaagi sa paghatag og kahayag (o direksyon ug katin-awan) sa atong kinabuhi, grupoha ang mga estudyante nga magtinagurha og tinagutlo. Hatagi ang matag grupo og kopya sa mosunod nga handout:

Si Jesukristo Moabug sa Espirituhanong Kangitngit pinaagi sa Paghatag og Kahayag

Manwal sa Seminary Teacher sa Bag-ong Tugon—Leksyon 72

Alang sa matag usa sa mosunod nga mga hilisgutan, hisguti ang mosunod nga mga pangutana:

• Unsa kaha ang gituohan sa mga tawo nga naa sa espirituhanong kangitngit mahitungod niini nga hilisgutan?

• Unsa nga kahayag ang gihatag ni Jesukristo ug sa Iyang ebanghelyo mahitungod niini nga hilisgutan?

Mga hilisgutan:

• Ang katuyoan sa atong pisikal nga lawas

• Kalingawan ug media

• Pag-angkon og kalinaw ug kalipay

• Kaminyoon ug pamilya

• Kinabuhi human sa kamatayon

© 2015 pinaagi sa Intellectual Reserve, Inc. Tanang mga katungod gigahin.

Isip usa ka klase, hisguti ang usa sa mga hilisgutan nga gilista sa handout, gamit ang nag-uban nga mga pangutana. Dayon dapita ang pipila ka estudyante sa paggahin og pipila ka minutos nga hisgutan ang nahibiling mga hilisgutan gamit kini nga mga pangutana. (Mahimo nimong pulihan ang uban niini nga mga hilisgutan og mas haum para sa mga estudyante.)

Ginagmayng group discussion ug mga assignment

Ang ginagmayng group activities sagad nga magtugot og daghang estudyante nga moapil sa leksyon ug makahatag og luwas nga palibut diin ang mga estudyante makapaambit sa ilang mga pagbati, hunahuna, ug mga pagpamatuod sa usag usa. Mas maandam ang mga estuyante sa pagkompleto sa ubang group activities kon giyahan una ninyo sila og usa ka example sa task nga kinahanglan nilang kompletuhon diha sa ilang mga grupo.

Human sa igo nga panahon, pagdapit og usa ka estudyante gikan sa matag grupo nga mopili og usa ka hilisgutan diha sa handout ug moreport sa ilang group discussion bahin niini nga hilisgutan. Dayon pangutan-a ang klase:

• Sa unsang paagi ang baruganan nga atong nahibaloan diha sa bersikulo 46 nakatabang nato nga makasabut kon nganong lahi ang atong pagtan-aw sa piho nga mga hilisgutan ug mga isyu kay sa ubang mga tawo?

• Sa unsang mga sitwasyon nga ang kahayag nga gihatag ni Jesukristo ug sa Iyang ebanghelyo nakatabang kaninyo?

Dapita ang usa ka estudyante sa pagbasa og kusog sa mosunod nga pamahayag ni Elder Gerrit W. Gong sa Seventy diin mipamatuod siya bahin sa mga panalangin nga moabut gumikan sa pagpili sa pagtuo ug pagsunod ni Jesukristo.

“Ang pagtuo usa ka pagpili [tan-awa sa Mosiah 4:9]. …

“Kon pilion nato nga motuo, atong masabtan ug makita ang mga butang sa lahi nga paagi. Kon kita motan-aw ug magpakabuhi sa ingon niana nga paagi, malipayon kita ug magmaya sa paagi nga ang ebanghelyo ra ang makahatag” (“Choose Goodness and Joy,” New Era, Ago. 2011, 44).

I-summarize ang Juan 12:47–50 pinaagi sa pagpasabut nga si Jesus mitudlo nga kadtong dili motuo sa Iyang mga pulong ug mosalikway Kaniya pagahukman pinaagi sa mga pulong nga Iyang gipamulong, nga mao ang mga pulong nga gihatag sa Langitnong Amahan nga Iyang ipamulong.

Ipaambit ang imong pagpamatuod bahin sa mga panalangin nga imong nasinati isip resulta sa pagpili nga motuo ni Jesukristo ug sa Iyang ebanghelyo. Dapita ang mga estudyante nga isulat diha sa ilang mga class notebook o mga scripture study journal kon unsaon nila sa paggamit kining usa sa mga baruganan nga ilang nakat-unan. Awhaga ang mga estudyante sa pagpili nga tuohan si Jesukristo.

Komentaryo ug Background nga Impormasyon

Juan 12:11, 37. Sa unsang paagi ang mga milagro makaimpluwensya sa atong pagtuo kang Jesukristo

Gitudlo ni Presidente Brigham Young sa unsang paagi ang mga milagro makaimpluwensya sa atong pagtuo kang Jesukristo:

“Ang mga milagro, o kining dili ordinaryo nga mga pagpakita sa gahum sa Dios, dili alang sa dili tumutuo; kini mohupay sa mga Santos, ug molig-on ug mopamatuod sa hugot nga pagtuo niadtong kinsa nahigugma, nagtahud ug nagserbisyo sa Dios, ug dili alang niadtong dili sakop sa mga katawhan sa Dios” (Mga Pagtulun-an sa mga Presidente sa Simbahan: Brigham Young [1997], 296–97).

Juan 12:27–34. “Kay alang niining maong tuyo nahiabut ako niining taknaa.”

Si Elder Neal A. Maxwell sa Korum sa Napulog Duha ka mga Apostoles mitudlo kon sa unsang paagi ang mga pulong sa Manluluwas nga narekord sa Juan 12:27 nagpakita sa Iyang kamatugyanon dihang nagkaduol na ang Iyang Pag-ula:

“Dihang ang dili mahunahuna nga palas-anon nagsugod sa pagpabug-at diha ni Kristo, mipamatuod kini sa dugay na Niyang gihuptan ug tin-aw nga panabut sa maalamong paagi sa unsay kinahanglan na Niyang buhaton karon. Ang Iyang buluhaton nagsugod na, ug gipahayag ni Jesus: ‘Ug karon naguol ang akong kalag; ug unsa may akong ginaingon? Amahan, luwasa ako gikan niining taknaa.’ Niana, sa espirituhanon man nga pagsultihanay o pinaagi sa instruksyon bahin Kaniya, nakabantay Siya, ‘kay alang niining maong tuyo nahiabut ako niining taknaa.’ (Juan 12:27.)” (“Willing to Submit,” Ensign, Mayo 1985, 72).

Juan 12:46. Napanalipdan pinaagi sa kahayag nga gihatag ni Jesukristo

Si Elder Robert D. Hales sa Korum sa Napulog Duha ka mga Apostoles mitudlo mahitungod sa panalipud nga anaa pinaagi sa kahayag nga gihatag ni Jesukristo:

“Apil kita sa gubat tali sa mga pwersa sa kahayag ug sa kangitngit. …

“Ang Ginoo mao ang atong kahayag ug ang atong kaluwasan (tan-awa sa Salmo 27:1). Sama sa sagradong kalayo nga mipalibut sa mga bata diha sa 3 Nephi (tan-awa sa 3 Nephi 17:24), ang Iyang kahayag mohulma og usa ka panalipud tali kaninyo ug sa kangitngit sa kaaway kon magpakabuhi kamong takus niini. Gikinahanglan ninyo kana nga kahayag. Gikinahanglan nato kana nga kahayag. Tun-i og maayo ang mga kasulatan ug ang Alang sa Kalig-on sa mga Kabatan-onan ug paminawa ang mga pagtulun-an sa inyong mga ginikanan ug mga lider. Dayon, pinaagi sa kamasulundon sa maalamong tambag, kat-uni ang pag-angkon sa makapanalipud nga kahayag sa ebanghelyo sama nga inyong kaugalingon” (“Out of Darkness into His Marvelous Light,” Ensign, Mayo 2002, 70).

Alang sa dugang pa mahitungod sa “kahayag ni Kristo” tan-awa sa D&P 88:7–13. Sa iyang pakigpulong nga “Ang Kahayag ni Kristo” (Ensign o Liahona, Abr. 2005), si Presidente Boyd K. Packer sa Korum sa Napulog Duha ka mga Apostoles mitudlo sa kalainan tali sa Espiritu Santo ug sa “kahayag ni Kristo” (D&P 88:7). Ang kahayag ni Kristo maoy lahi nga tinubdan sa inspirasyon nga gibatunan sa matag tawo. Usahay gitawag kini og kahayag nga anaa sa sulod o kahibalo sa husto ug sayop, usa ka moral nga pagbati, o usa ka konsensya.