Leksyon 73

Juan 13

Pasiuna

Saligi ang gahum sa pulong

Mahimong tintalon ka nga magtuo nga ang mga estudyante dili ganahang magtuon sa mga kasulatan, o nga ikaw dili makatudlo sa mga kasulatan sa matag adlaw ug magpadayon ang interes sa mga estudyante. Hinumdumi, hinoon nga ang mga kasulatan naglangkob “sa mga pulong sa kinabuhi” (D&P 84:85) ug ang pulong adunay “labaw nga gamhanan nga sangputanan diha sa hunahuna … kay sa espada o bisan unsa pa” (Alma 31:5).

Human makapangaon sa pagkaon sa Pagpalabay, gihugasan ni Jesus ang mga tiil sa Iyang mga Apostoles ug gitug-an nga si Judas ang mobudhi Kaniya. Bisan sa kagubot sa katapusang semana sa mortal Niyang pagpangalagad, gitutok ni Jesus ang Iyang mga pagtulun-an ngadto sa kamasulundon, serbisyo, ug gugma—mga hiyas nga naghulagway sa Iyang kinabuhi ug kinahanglang maoy maghulagway sa kinabuhi sa Iyang mga disipulo sa tanang kapanahunan.

Mga Sugyot alang sa Pagtudlo

Juan 13:1–17

Gihugasan ni Jesus ang tiil sa Iyang mga Apostoles

Sa dili pa magklase, kopyaha diha sa pisara ang mosunod nga diagram:

Basaha og kusog ang mosunod nga mga pangutana, ug dapita ang mga estudyante sa pagpamalandong kon unsaon nila sa pagtubag (ipasabut nga dili sila kinahanglang motubag og kusog):

• Asa kaha ninyo mabutang ang inyong kaugalingon dinhi niining continuum [graph sa kalipay]?

• Gusto ba mong mas magmalipayon pa kay sa karon?

• May mahunahunaan ba mong tawo kinsa gusto ninyong tabangan aron mas magmalipayon?

Dapita ang mga estudyante nga mangita og usa ka baruganan samtang magtuon sila sa Juan 13 nga makatabang nilang mahibalo unsay ilang mahimo aron mas magmalipayon.

Aron matabangan ang mga estudyante nga masabtan ang kinatibuk-ang kahulugan sa Juan 13, pahinumdumi sila nga gisaulog ni Jesus ang fiesta sa Pagpalabay kauban sa Iyang mga Apostoles. I-summarize ang Juan 13:1–3 pinaagi sa pagpasabut nga samtang mipakigbahin si Jesus niining katapusang panihapon uban sa Iyang mga Apostoles sa wala pa Siya Ilansang sa krus, nasayud Siya nga sa dili madugay patyon na Siya ug mobalik ngadto sa Iyang Langitnong Amahan.

Dapita ang usa ka estudyante sa pagbasa og kusog sa Juan 13:4–5, ug hangyoa ang klase sa pagsunod, nga mangita sa unsay gihimo ni Jesus ug sa Iyang mga Apostoles human makapangaon sa pagkaon sa Pagpalabay. Ipasabut nga ang mga pulong nga “mihukas sa iyang mga sapot” diha sa bersikulo 4 nagpasabut nga si Jesus mihubo sa iyang sapaw nga gisul-ot, sama sa usa ka tawo nga gihubo ang jacket sa atong panahon.

• Unsa nga serbisyo ang gihimo sa Manluluwas alang sa Iyang mga disipulo?

Ipasabut nga sa “mga kapanahunan sa Bag-ong Tugon, ang mga tawo nagsul-ob og mga sandal, kasagaran maglakaw sa dalan nga anaa ang mga tai sa hayop, ug dili kanunay dunay tubig nga pangkaligo. Magkahugaw kaayo ang ilang mga tiil, ug ang paghugas sa tiil sa laing tawo tingali dili makahimuot nga buluhaton. … Kini nga kustombre sa pag-abi-abi kasagaran nga buhaton sa pinakaubos sa mga sulugoon” (New Testament Student Manual [manwal sa Church Educational System, 2014], 242). Atol niining katapusang panihapon, “sa hinay mibarug si Kristo, mihimo sa buluhaton sa usa ka ulipon, o sulugoon, ug miluhod aron sa paghugas sa mga tiil sa mga Apostoles” (Jeffrey R. Holland, “He Loved Them unto the End,” Ensign, Nob.1989, 25).

I-display ang litrato nga Si Jesus Naghugas sa mga Tiil sa mga Apostoles (Libro sa mga Hulagway sa Ebanghelyo [2009], nu. 55; tan-awa usab sa LDS.org).

• Kon didto pa mo dihang gihugasan ni Jesus ang mga tiil sa Iyang mga Apostoles, unsa kaha ang inyong reaksyon dihang sugdan na ni Jesus ang paghugas sa inyong mga tiil?

• Unsa ang gipadayag bahin sa kinaiya ni Jesus sa Iyang gibuhat nga paghugas sa mga tiil sa Iyang mga Apostoles?

Dapita ang usa ka estudyante sa pagbasa og kusog sa Hubad ni Joseph Smith, Juan 13:8 (sa Ang Giya ngadto sa mga Kasulatan). Hangyoa ang klase sa pagsunod, nga mangita kon unsay gisulti ni Pedro dihang gisugdan sa Manluluwas ang paghugas sa iyang tiil.

• Sumala sa Hubad ni Joseph Smith, Juan 13:8, unsa ang gisulti ni Pedro dihang gisugdan sa Manluluwas ang paghugas sa iyang tiil?

Dapita ang usa ka estudyante sa pagbasa og kusog sa Hubad ni Joseph Smith, Juan 13:9-10 (sa Ang Giya ngadto sa mga Kasulatan). Hangyoa ang klase sa pagsunod, nga mangita sa tubag ni Pedro sa gisulti sa Ginoo kaniya.

• Unsa ang atong nakat-unan bahin ni Pedro gikan sa iyang tubag, nga narekord diha sa bersikulo 9, sa unsay gisulti sa Ginoo kaniya? (Girespeto ni Pedro ang Ginoo ug gustong mosunod Kaniya sa hingpit.)

Ipasabut nga pinaagi sa paghugas sa tiil sa Iyang mga Apostoles, gihimo sa Manluluwas dili lang ang matahum nga buhat sa pagserbisyo, apan gituman sab Niya ang balaod ni Moises ug mipahigayon og sagradong ordinansa (tan-awa sa Bruce R. McConkie, Doctrinal New Testament Commentary, 3 vols. [1965–73], 1:708–9). Kini nga ordinansa napahiuli sa atong dispensasyon pinaagi ni Propeta Joseph Smith (tan-awa sa D&P 88:74–75, 137–41).

Dapita ang usa ka estudyante sa pagbasa og kusog sa Juan 3:11, ug hangyoa ang klase sa pagsunod, nga mangita kon nganong miingon si Jesus sa mga Apostoles nga “dili tanan kamo mga mahinlo.”

• Kinsa ang gipasabut sa Manluluwas dihang miingon Siya sa mga Apostoles nga, “dili tanan kamo mga mahinlo”? (Judas Iscariote, kinsa mobudhi Kaniya sa dili madugay.)

Dapita ang pipila ka estudyante nga magpuli-puli sa pagbasa og kusog sa Juan 13:12–17 . Hangyoa ang klase sa pagsunod, nga mangita kon unsay gitudlo sa Manluluwas sa Iyang mga Apostoles human gihugasan Niya ang ilang mga tiil.

• Sumala sa bersikulo 13-16, unsa nga ehemplo ang gipakita sa Manluluwas ug gidapit nga sundon sa ang Iyang mga Apostoles? (Bisan og ang Manluluwas mao ang “Magtutudlo ug ang Ginoo” [bersikulo 13] ug pinakalabaw sa tanan, giserbisyuhan Niya ang uban.)

• Basi sa saad sa Manluluwas ngadto sa Iyang mga Apostoles nga narekord sa bersikulo 17, unsa nga panalangin ang ang atong madawat kon sundon nato ang Iyang ehemplo pinaagi sa pagserbisyo sa uban? (Gamit ang kaugalingon nilang mga pulong, kinahanglang mahibalo ang mga estudyante og usa ka baruganan sama sa mosunod: Kon atong sundon ang ehemplo sa Manluluwas pinaagi sa pagserbisyo sa uban, mas malipayon kita.)

• Ngano kaha nga mas malipayon man ta kon moserbisyo ta sa uban sama sa gihimo sa Manluluwas?

Hangyoa ang mga estudyante sa paghunahuna og usa ka panahon dihang mas malipayon sila tungod kay gisunod nila ang ehemplo sa Manluluwas pinaagi sa pagserbisyo sa uban. Pagdapit og pipila ka estudyante nga mopakigbahin sa ilang mga kasinatian diha sa klase. Mahimo sab nimong ipakigbahin ang usa sa imong kaugalingon.

Aron matabangan ang mga estudyante nga makakat-on og usa ka paagi nga ilang magamit kini nga baruganan, dapita ang usa ka estudyante sa pagbasa og kusog sa mosunod nga pamahayag ni Elder M. Russell Ballard sa Korum sa Napulog Duha ka mga Apostoles:

“Sa inyong pag-ampo sa buntag matag adlaw, pangayo sa Langitnong Amahan nga giyahan kamo aron makakita og oportunidad nga makaserbisyo sa usa sa Iyang bililhong mga anak. Dayon lakaw tibuok adlaw nga ang inyong kasingkasing puno sa pagtuo ug gugma, mangita og tawo nga katabangan. Kon buhaton ninyo kini, ang inyong espirituhanong kasensitibo molambo ug makakita kamo og mga oportunidad sa pagserbisyo nga sa una wala ninyo masayri nga posible” (“Magmatinguhaong Moapil,” Ensign o Liahona, Nob. 2012, 31).

• Sumala ni Elder Ballard, unsaon nato nga makakita kita og oportunidad nga makatabang sa uban?

Awhaga ang mga estudyante nga mosunod sa ehemplo sa Manluluwas pinaagi sa pagserbisyo sa uban. Ikonsiderar ang pagdapit og mga estudyante nga mangandam para sa sunod nga pipila ka sesyon sa klase sa pagreport sa ilang mga kasinatian sa pagserbisyo sa uban.

Juan 13:18–30

Si Jesus miila sa magbudhi Kaniya

I-summarize ang Juan 13:18–30 pinaagi sa pagpasabut nga human gitudloan ni Jesus ang Iyang mga Apostoles nga magmalipayon sila kon moserbisyo sila sa uban, miingon Siya nga usa kanila mobudhi Kaniya. Dihang nangutana si Juan kang Jesus kon si kinsa ang mobudhi Kaniya, miingon si Jesus nga usa sa Iyang mga Apostoles (si Judas) mobudhi Kaniya.

Juan 13:31–38

Gitudloan ni Jesus ang Iyang mga disipulo nga maghigugmaay

Pangutan-a ang mga estudyante kon duna bay mipasangil nila nga dili sila Kristiyano, o dili sila tinuod nga disipulo ni Jesukristo, tungod kay miyembro sila sa Ang Simbahan ni Jesukristo sa mga Santos sa Ulahing mga Adlaw. Kon dunay mga estudyante nga moisa sa ilang kamot, pangutan-a kon giunsa nila sa pagtubag ang mga pasangil nga sila dili Kristiyano. Kon walay bisan usa nga aduna niini nga kasinatian, pangutan-a:

• Unsaon ninyo sa pagtubag kon dunay tawo nga moingon ninyo nga dili mo Kristiyano?

Dapita ang usa ka estudyante sa pagbasa og kusog sa Juan 13:34–35 . Hangyoa ang klase sa pagsunod, nga mangita kon unsay gisulti sa Manluluwas nga makatabang sa uban sa pag-ila nga ang mga Apostoles mga disipulo ni Jesukristo.

• Sumala sa bersikulo 34, unsa nga sugo ang gihatag ni Jesus sa Iyang mga Apostoles?

• Sumala sa bersikulo 35, unsay angay nga mahibaloan sa uban kon ang mga Apostoles naghigugmaay sama nga si Jesus nahigugma kanila?

• Unsa nga baruganan ang atong makat-unan gikan sa mga pagtulun-an sa Manluluwas ngadto sa Iyang mga Apostoles? (Gamit ang kaugalingon nilang mga pulong, kinahanglang mahibalo ang mga estudyante og usa ka baruganan sama sa mosunod: Kon maghigugmaay kita sama nga si Jesus nahigugma kanato, ang uban mahibalo nga kita Iyang mga disipulo.)

• Sumala sa unsay inyong natun-an niining tuiga mahitungod ni Jesukristo, sa unsang mga paagi nga Iyang gipakita nga gihigugma Niya ang mga tawo?

Aron matabangan ang mga estudyante nga mobati sa kamatuoran ug kaimportante sa baruganan nga bag-o lang nilang nahibaloan, dapita ang usa ka estudyante sa pagbasa og kusog sa mosunod nga istorya, nga giistorya ni Elder Paul E. Koelliker sa Seventy:

“Duha ka misyonaryo nanuktok sa pultahan, nanghinaut nga makakita og tawo nga modawat sa ilang mensahe. Giablihan ang pultahan, ug usa ka dakong tawo mitagad nila nga dili kaayo mahigalaon. ‘Siguro nasultihan ko na kamo nga dili na manuktok Gipasidan-an ko na kamo nga kon mobalik gani mo, dili nindot ang inyong masinati. Karon lakaw na mo.’ Kalit niyang gisira ang pultahan.

“Sa paglakaw sa mga elder, ang mas dugay, mas sinati nga misyonaryo miagbay sa mas bag-ong misyonaryo sa paghupay ug pagdasig niya. Wala sila masayud, ang tawo nagtan-aw nila sa bintana sa pagsiguro nga nasabtan nila ang iyang gisulti. Nagtuo siya nga makita sila nga mangatawa ug ibaliwala lang ang iyang dili maayong pagtagad. Apan, sa iyang pagtan-aw sa kamabination sa duha ka misyonaryo, nahumok dayon ang iyang kasingkasing. Giablihan niyag balik ang pultahan ug gipabalik ang mga misyonaryo ug gipakigbahin ang ilang mensahe niya.

“… Kining baruganan sa paghigugmaay ug pagpalambo sa abilidad nga nakasentro kang Kristo importante isip disipulo ni Kristo” (“Tinuod Siya nga Nahigugma Kanato,” Ensign o Liahona, Mayo 2012, 17).

• Sa unsang paagi ang mga misyonaryo nga gihulagway dinhi niini nga istorya misunod sa tambag sa Manluluwas sa paghigugmaay?

Dapita ang mga estudyante sa pagkanta sa “Maghigugmaay” (Songbook sa mga Bata, nu. 74), ug hangyoa sila sa paghunahuna og tawo nga ilang nailhan kinsa dali rang mahibaloan nga usa ka disipulo ni Jesukristo tungod sa gugma nga iyang gipakita ngadto sa uban. Human makanta ang himno, dapita ang mga estudyante nga isulti ang ngalan sa mga tawo nga ilang nahunahunaan ug ipasabut ang piho nga mga paagi diin gipakita niadtong mga tawhana ang ilang gugma ngadto sa uban. Hunahunaa ang pagsulti sa klase mahitungod sa usa ka tawo nga imo sab nga nahibaloan.

Ipasulat sa mga estudyante diha sa ilang mga class notebook o mga scripture study journal kon unsay ilang buhaton aron mas makahigugma sa uban sama sa paghigugma sa Manluluwas kanila.

I-summarize ang Juan 13:36–38 pinaagi sa pagpasabut nga human gipahayag ni Pedro nga ihalad niya ang iyang kinabuhi sa pagpakamatay para ni Jesukristo, giingnan ni Jesus si Pedro nga ilimud niya si Jesus sa katulo ka higayon sa dili pa motuktugaok ang manok.

Scripture Mastery Review

Giyahi ang mga estudyante sa usa ka scripture chase pinaagi sa paggamit og mga clue aron matabangan sila nga dali rang makapangita sa mga tudling sa ilang mga kasulatan. Alang sa mga clue, mahimo kang mogamit og mga keyword [mahinungdanong mga timailhan], mga doktrina ug baruganan, ug mga application ideas gikan sa mga scripture mastery card. Mahimo sab nga maghimo ka og kaugalingon nimong mga clue. Ang scripture chase nga mga kalihokan diin maglumba ang mga estudyante og pangita sa mga tudling makatabang nga maaktibo ang ilang pag-apil sa pagkat-on sa mga scripture mastery passage. Kon mogamit ka og scripture chase nga mga kalihokan, buhata kini sa paagi nga dili masakitan o masilo ang Espiritu. Tabangi ang mga estudyante nga likayan ang walay pagtahud nga paggamit nila sa mga kasulatan o mosubra ang kompetisyon. Ikonsiderar usab ang pagdapit sa mga estudyante nga makigkompetensya sa usa ka sumbanan kay sa makigkontra sa usag usa. Sama pananglit, ang mga estudyante makiglumba sa teacher, o makiglumba sila aron masuta kon ang piho nga gidaghanon sa klase makakita ba sa partikular nga tudling sa piho nga gidugayon sa oras.

Komentaryo ug Background nga Impormasyon

Juan 13:1–17. Ang paghugas sa Manluluwas sa mga tiil sa Iyang mga disipulo

Si Elder Jeffrey R. Holland sa Korum sa Napulog Duha ka mga Apostoles mipasabut nga ang gihimo sa Manluluwas nga paghugas sa tiil sa mga disipulo nagpakita sa Iyang walay pagkapakyas nga debosyon ngadto sa Iyang mga disipulo:

“Sa tunga-tunga [sa Katapusang Panihapon], sa hinay mibarug si Kristo, mihimo sa buluhaton sa usa ka ulipon, o sulugoon, ug miluhod aron sa paghugas sa mga tiil sa mga Apostoles. (Tan-awa sa Juan 13:3–17.) Kining gagmayng grupo sa mga magtutuo niining talagsaong natukod nga gingharian diin nakasinati sa ilang pinakalisud nga pagsulay, busa gihikling una niya ang iyang kaugalingong nagkabug-at nga kasakit aron siya sa makausa makaserbisyo ug makalig-on kanila. Dili igsapayan kon walayk mohugas sa iyang mga tiil. Sa kinamaayuhang pagpaubos nagpadayon siya sa pagtudlo ug paglimpyo kanila. Gibuhat gayud Niya hangtud sa katapusang mga oras—ug lapas pa—ilang mapdayunon nga sulugoon” (“He Loved Them unto the End,” Ensign, Nob. 1989, 25).

Juan 13:4–12. Ang paghugas sa mga tiil usa ka ordinansa sa ebanghelyo

Ang Hubad ni Joseph Smith naghatag og dugang nga panabut sa paghugas sa tiil sa mga disipulo: ‘Karon kini mao ang batasan sa mga Judeo ubos sa ilang balaod; busa, si Jesus mihimo niini aaron ang balaod unta matuman’ (Hubad ni Joseph Smith, Juan 13:10 [sa Ang Giya Ngadto sa mga Kasulatan]).

Si Elder Bruce R. McConkie (1915–85) sa Korum sa Napulog Duha ka mga Apostoles mitudlo:

“Ang kinatibuk-ang kahulugan niini dili kaayo klaro sa kaswal lang nga tigbasa, o kinahanglang maklaro, kay ang paghugas sa mga tiil usa ka sagrado nga ordinansa nga gigahin nga himoon sa balaang mga dapit niadtong maghimong takus sa ilang kaugalingon. Dayag, hinoon, nga ang mga Judeo usab dunay sagradong mga ordinansa nga gipanghimo sa ilang templo, usa ka kahibalo nga wala mapreserbar, dili gayud mapreserbar, sa bisan unsang literatura nga miabut kanato” (The Mortal Messiah, 4 vols. [1979–81], 4:38–39).

Usa ka pahinumdom sa pagpahimangno: Wala kinahanglana nga inyo pang idetalye nga labaw pa sa pamahayag ni Elder McConkie ang mahitungod sa sagradong ordinansa sa paghugas sa mga tiil nga gihimo sa mga templo “alang niadtong maghimong takus sa ilang kaugalingon.” Hinudumi kini nga pahimangno ni Presidente Spencer W. Kimball:

“Panagsa dunay mangutana o mosulay sa pagpamulong mahitungod sa mga ordinansa nga wala nila mahibaloli ug dili nila responsibilidad. Dili maayo nga himoon sa usa ka magtutudlo ngadto sa iyang mga estudyante kon siya motudlo nila sa pagpangusisa o mag-awhag og panaghisgut mahitungod sa mga butang nga dili kabahin sa ilang kinabuhi o sa ilang kasinatian—sa pipila ka mga panalangin nga gihisgutan sa mga kasulatan, sa pipila ka mga oportunidad nga dunay limitasyon ug gihatag lamang niadtong kinsa dunay espesyal nga awtoridad ug ubos sa espesyal nga mga sirkumstansya. … Mas maayo unta alang sa mga magtutudlo nga dili lang tandugon kini nga hilisgutan ug dili mabalaka mahitungod niini o mabalaka sa ilang mga estudyante mahitungod niini” (“The Ordinances of the Gospel” [gi-address ngadto sa mga faculty sa seminary and institute of religion, Hunyo 18, 1962], 2–3).

Juan 13:17 “Dalaygon kamo kon kini inyong buhaton”

Si Presidente Thomas S. Monson miingon nga ang kalipay moabut gumikan sa pagserbisyo ngadto sa uban:

“Sa pagpangita sa tinuod nga kalipay, kinahanglan nga kita mopokus dili lamang sa atong mga kaugalingon. Walay bisan usa nga nakakat-on sa kahulugan sa pagpakabuhi hangtud nga ang iyang kaugalingong pagsalig iyang himoon pinaagi sa pagserbisyo sa iyang isigkatawo. Ang pagserbisyo sa uban sama ra kaayo sa pangatungdanan—ang katumanan niini magdala og tinuod nga kalipay” (“Guideposts for Life’s Journey” [Brigham Young University devotional, Nob. 13, 2007], 4, speeches.byu.edu).

Juan 13:23. “May usa nga mipauraray sa dughan ni Jesus nga usa sa iyang mga disipulo”

“Sa kapanahunan sa Bag-ong Tugon, kadtong mangaon sa usa ka pormal nga pagpangaon sagad nga mag-irag sa mugbong mga lingkuranan nga nagpalibut sa lamesa, nga ang ilang wala nga bukton itukod sa ilang mga ulo maghilig ngadto sa lamesa ug ang ilang mga tiil palayo sa lamesa. Busa, ang bisita nga maglingkod sa tuo nga bahin sa gibisitahan nga mag-irag dapit sa gibisitahan. Ingon og mao kini ang dapit nga gilingkuran ni Apostol Juan, ‘nagpauraray sa dughan ni Jesus,’ o nag-irag paduol ni Jesus, atol sa pagpangaon (ikumpara sa Lucas 16:22). Kini nga posisyon nagtugot kang Juan, ang disipulo ‘nga hinigugma ni Jesus,’ nga may pribadong pag-istoryahanay uban sa Manluluwas nga tingali wala madungog sa tanan nga nangaon, sama sa butang nga may kalabutan sa pagbudhi ni Judas (tan-awa sa Juan 13:23–28)” (New Testament Student Manual [manwal sa Church Educational System, 2014], 242).

Juan 13:34–35. “Maghigugmaay”

Si Elder Joseph B. Wirthlin sa Korum sa Napulog Duha Ka mga Apostoles naghisgot mahitungod sa kaimportante sa gugma ug pagkadisipulo:

“Ang gugma mao ang sinugdanan, ang tunga-tunga, ug ang katapusan sa dalan sa pagkadisipulo. … Sa katapusan, ang gugma mogiya kanato ngadto sa himaya ug kahamili sa kinabuhing dayon. …

“Sa dihang si Jesus mihatag sa Iyang mga disipulo og bag-ong sugo nga ‘maghigugmaay kamo sa usag, usa maingon nga Ako nahigugma kaninyo’ [Juan 13:34], Iyang gihatag kanila ang importanting yawe sa kalipay niini nga kinabuhi ug himaya sa sunod.

“Ang gugma mao ang pinakaimportante sa tanang mga kasugoan—ang uban gibasi niini. Mao kini ang atong tumong isip sumusunod sa buhi nga Kristo” (“Ang Dako nga Sugo,” Ensign o Liahona, Nob. 2007, 28–29, 30–31).

Human mikutlo sa Juan 13:34–35, si Elder M. Russell Ballard Korum sa Napulog Duha ka mga Apostoles mitudlo:

“Ang gugma nga gihulagway sa Manluluwas usa ka aktibo nga gugma. Dili kini makita pinaagi sa dagko ug bayanihong mga binuhatan hinoon pinaagi sa yanong mga buhat sa kamabination ug pagserbisyo” (“Pagkaplag og Kalipay pinaagi sa Mahigugmaong Pagserbisyo,” Ensign o Liahona, Mayo 2011, 47).

Si Presidente Dieter F. Uchtdorf sa Unang Kapangulohan, miingon:

“Ang gugma mao ang mahulagwayon nga kinaiya sa usa ka disipulo ni Kristo” (“Ang Gugma sa Dios,” Ensign o Liahona, Nob. 2009, 22).