Lucas 10:38–17:37 (Unit 11)

Materyal sa Pagpangandam alang sa Magtutudlo sa Home-Study

Summary sa mga Leksyon sa Daily Home-Study

Ang mosunod nga summary sa mga panghitabo, doktrina, ug mga baruganan nga nakat-unan sa mga estudyante samtang sila nagtuon sa Lucas 10:38–17:37 (unit 11) wala gitumong nga itudlo isip kabahin sa inyong leksyon. Ang leksyon nga imong gitudlo nakatutok sa pipila lamang niini nga mga doktrina ug mga baruganan. Sunda ang mga aghat sa Espiritu Santo samtang ikonsiderar nimo ang mga panginahanglan sa imong mga estudyante.

Day 1 (Lucas 10:38–12:59)

Gikan sa mga pulong sa Manluluwas ngadto kang Marta, ang mga estudyante nakat-on nga kon kita mopili sa pagpahinungod sa atong kaugalingon sa espirituhanon nga mga butang kay sa temporal nga mga kabalaka, kita makadawat og malungtarong mga panalangin. Si Jesus nagtudlo usab nga kon kita makanunayon nga mag-ampo ug magtinguha sa mga panalangin sa Langitnong Amahan sa panahon sa panginahanglan, nan Siya, sa Iyang kaugalingong panahon ug sa Iyang kaugalingong paagi, motubag sa atong mga pag-ampo. Ubang mga kamatuoran nga nakat-unan sa mga estudyante mao ang: Ang Ginoo nagsugo kanato nga dili maibug sa kalibutanong mga butang. Kon kita magtinguha sa pagtukod sa gingharian sa Dios ug sa Iyang pagkamatarung, Siya motabang sa pagsangkap sa atong panginahanglan ug moandam og dapit alang kanato sa Iyang gingharian.

Day 2 (Lucas 13–15)

Niini nga mga kapitulo, ang mga estudyante nakat-on sa mosunod nga mga baruganan: Kon kita maningkamot sa pagtabang sa mga tawo kinsa ubos og kahimtang kay kanato, ang Ginoo moganti kanato panahon sa Pagkabanhaw. Kon atong unahon ang ubang mga prayoridad kay sa Ginoo ug sa Iyang ebanghelyo, kita mawad-an sa mga panalangin sa ebanghelyo nga ato untang madawat. Ang mga disipulo ni Jesukristo kinahanglan nga andam nga mosakripisyo sa tanan sa pagsunod Kaniya. Kon tabangan nato ang uban nga mobati og tinguha sa paghinulsol, mabati nato ang kalipay ug ang kalangitan magmaya.

Day 3 (Lucas 16)

Gikan sa sambingay sa malimbungon nga piniyalan ug ang dato nga tawo ug si Lazaro, ang mga estudyante nakat-on nga kon kita maalamong mangandam alang sa atong mahangturon nga kaugmaon ug mogamit sa yutan-ong mga bahandi sa matarung nga paagi, kita mapanalanginan og mahangturong mga bahandi. Nakakat-on usab sila sa mosunod nga mga baruganan: Kon kita magmaibugon ug dili mogamit sa atong yutan-ong mga bahandi sa matarung nga paagi, sa kadugayan atong masinati ang pag-antus ug pagmahay. Ang pagkakabig mahitabo pinaagi sa pagtuo ug pagsunod sa mga pulong sa mga propeta, dili pinaagi sa pagsaksi og mga milagro o pagkakita og mga anghel.

Day 4 (Lucas 17)

Sa Lucas 17, ang mga Apostoles mihangyo ni Jesus nga dugangan ang ilang pagtuo. Ang mga estudyante nakat-on nga ang atong hugot nga pagtuo molambo samtang kita naningkamot sa pagbuhat sa tanan nga mga sugo sa Langitnong Amahan ug samtang atong hinumduman nga kita kanunay nga utangan ngadto Kaniya. Ang mga estudyante nakat-on usab nga atong madawat ang mga panalangin sa Ginoo samtang kita nagbuhat sa unsay Iyang gisugo kanato nga buhaton, ug importante nga magpasalamat alang sa mga panalangin nga atong madawat.

Pasiuna

Ang Manluluwas mitubag sa reklamo sa mga Pariseo mahitungod sa Iyang pagpakig-uban sa mga maniningil sa buhis ug mga makasasala pinaagi sa paghatag sa mga sambingay sa karnero nga nawala, sinsilyo [drakma] nga nawala, ug anak nga nawala.

Mga Sugyot alang sa Pagtudlo

Lucas 15

Si Jesus naghatag sa mga sambingay sa karnero nga nawala, sinsilyo nga nawala, ug anak nga nawala

Sugdi ang klase pinaagi sa pagpangutana sa mga estudyante kon nakasulay na ba sila nga mawad-an og usa ka butang nga bililhon ngadto kanila.

Unsay andam ninyong buhaton aron makit-an kini? Ngano man?
Unsa sa inyong hunahuna ang gipasabut sa usa ka tawo nga “nawala” sa espirituhanong paagi ? (Tabangi ang mga estudyante nga makasabut nga kini mahimong mag-refer ngadto sa mga tawo nga wala pa makadawat sa gipahiuli nga ebanghelyo ni Jesukristo o sa karon wala magpuyo sumala sa mga pagtulun-an sa ebanghelyo.)

Dapita ang klase sa paghunahuna og ilang kaila nga tingali nawala sa espirituhanong paagi. Hangyoa sila sa pagpamalandong kon unsay ilang gibati kabahin niini nga tawo.

Ipasabut nga ang Lucas 15 naglangkob og mga pagtulun-an sa Manluluwas mahitungod niadtong kinsa nawala sa espirituhanong paagi. Dapita ang mga estudyante sa pagpangita og mga kamatuoran diha sa Lucas 15 mahitungod sa unsay bation sa Langitnong Amahan kabahin niadtong kinsa nawala sa espirituhanong paagi ug sa atong mga responsibilidad ngadto kanila.

Hangyoa ang usa ka estudyante sa pagbasa og kusog sa Lucas 15:1–2. Dapita ang klase sa pagsunod, nga mangita kon unsa ang gireklamo sa mga Pariseo ug mga escriba.

Nganong mireklamo man ang mga Pariseo ug mga escriba?
Unsa man ang gipadayag niini nga reklamo mahitungod sa mga Pariseo ug mga escriba?

Ipasabut nga ang Manluluwas mitubag pinaagi sa paghatag og tulo ka mga sambingay: ang usa mahitungod sa nawala nga karnero, ang usa mahitungod sa nawala nga sinsilyo, ug ang usa mahitungod sa nawala nga anak. Hangyoa sila sa paghatag og atensyon kon ngano nga ang hilisgutan sa matag sambingay nawala ug sa unsang paagi kini nga nakit-an.

Ipasabut nga diha sa sambingay sa nawala nga karnero ug nawala nga sinsilyo, ang Manluluwas mihulagway kon sa unsang paagi ang magbalantay sa karnero ug ang babaye kinsa nawad-an sa sinsilyo nagsiksik uban sa dako nga kakugi hangtud nga ilang nakit-an ang nawala.

Dapita ang usa ka estudyante sa pagbasa og kusog sa Lucas 15:4–6, 8–9. Hangyoa ang klase sa pagsunod, nga mangita kon unsay gibati sa magbalantay sa karnero ug sa babaye sa dihang ilang nakit-an ang karnero ug ang sinsilyo.

Unsay kalainan tali sa paagi nga ang karnero ug ang sinsilyo nawala? (Ang karnero nawala pinaagi sa pagsunod sa normal nga dagan sa kinabuhi niini ug dili sayop niini, samtang ang sinsilyo nawala tungod sa pagpabaya o pagkawalay pag-amping sa tag-iya niini [tan-awa sa David O. McKay, sa Conference Report, Abr. 1945, 120–22].)
Unsa nga pulong ang gigamit sa paghulagway sa gibati sa magbalantay sa karnero ug sa babaye?

Dapita ang mga estudyante sa pagbasa sa hilum nga paagi sa Lucas 15:7, 10, nga mangita kon unsay gitandian sa Manluluwas sa kalipay sa magbalantay sa karnero ug sa babaye. (Ang kalipay sa langit tungod sa usa ka makasasala nga naghinulsol.)

Ipasabut nga ang ikatulo nga sambingay sa Lucas 15 mao ang istorya sa usa ka nawala nga anak (nagpasabut sa usa ka usikan ug hilabihan nga nakawaldas), sa iyang magulang nga lalaki, ug sa ilang amahan.

Ikonsiderar ang pagbahin-bahin sa mga estudyante ngadto sa tag-tinagutlo nga mga grupo. Hatagi ang matag grupo og kopya sa mosunod nga handout. Dapita sila sa pagbasa og kusog sa Lucas 15:11–32 sa ilang mga grupo. I-assign sa usa ka estudyante ang pagkonsiderar sa sambingay gikan sa panglantaw sa anak nga nawala, ang ikaduha nga estudyante sa pagkonsiderar niini gikan sa panglantaw sa amahan, ug ang ikatulo nga estudyante sa pagkonsiderar niini gikan sa panglantaw sa magulang nga lalaki.

Pagkahuman og basa sa mga estudyante, hangyoa sila sa paghisgut diha sa ilang mga grupo sa mga pangutana nga anaa sa handout.

Imbis mohangyo sa mga estudyante sa pagbasa ug paghisgut sa sambingay, mahimo ka nga mopasalida sa video nga “The Prodigal Son” (5:35) gikan sa The Life of Jesus Christ Bible Videos. Hatagi ang matag estudyante og kopya sa mosunod nga handout, ug hangyoa ang mga estudyante sa pagpangita sa mga tubag sa mga pangutana samtang sila magtan-aw sa video. Kini nga video anaa sa LDS.org.

handout, The Parable of the Prodigal Son

Ang Sambingay sa Anak nga Nawala

Manwal sa Seminary Teacher sa Bag-ong Tugon—Leksyon sa Home-Study (Unit 11)

Ang Nawala nga Anak nga Lalaki

Unsay nakatabang kaninyo nga makaamgo, o makabantay sa ngil-ad nga sitwasyon nga inyong nahimutangan?
Unsay inyong gituohan nga reaksyon sa inyong amahan sa inyong pag-uli?
Unsa kaha ang inyong hunahunaon ug bation kon ang inyong amahan motagad kaninyo og sama sa iyang gibuhat?

Ang Amahan

Unsa kaha ang inyong hunahunaon ug bation samtang nawala ang inyong batan-on nga anak?
Nganong hangupon man ninyo sa iyang pag-uli ang inyong nawala nga anak sa paagi nga inyong gibuhat?
Kon ang inyong magulang nga anak naglagot sa inyong pagtratar sa iyang manghud, giunsa ninyo siya pagtabang nga makasabut sa inyong mga lihok?

Ang Magulang nga Lalaki

Unsa kaha ang inyong hunahunaon ug bation samtang nawala ang inyong manghud nga lalaki?
Nganong lisud man alang kaninyo nga maglipay sa pagbalik sa inyong igsoon?
Unsa nga mga panalangin ang inyong nadawat sa inyong pagkamatinud-anon sa inyong amahan?

Nganong nawala man ang anak nga nawala? (Sukwahi sa karnero ug sa sinsilyo, nawala ang anak nga nawala tungod sa iyang kaugalingon nga pagkamasinupakon.)
Pagkasabut nga ang amahan niini nga sambingay nagrepresentar sa Langitnong Amahan, unsay atong makat-unan kabahin sa reaksyon sa Langitnong Amahan niadtong mobalik ngadto Kaniya pinaagi sa paghinulsol? (Ang mga estudyante kinahanglang moila og baruganan sama sa mosunod: Kon kita mobalik ngadto sa Langitnong Amahan pinaagi sa paghinulsol ug pagtinguha sa Iyang pagpasaylo, Siya malipay ug mo-welcome og balik kanato uban sa bukas nga mga bukton. Isulat kini nga baruganan diha sa pisara.)
Sa unsang paagi kini nga baruganan makatabang niadtong mibati nga nawala sa espirituhanong paagi?

Pahinumdumi ang mga estudyante sa magulang nga lalaki diha sa sambingay.

Ngano kaha nga naglagot ang magulang nga lalaki?

Dapita ang usa ka estudyante sa pagbasa og kusog sa mosunod nga pamahayag ni Elder Jeffrey R. Holland sa Korum sa Napulog Duha ka mga Apostoles, ug hangyoa ang klase sa pagpaminaw og mga ideya kon nganong nasuko ang magulang nga lalaki:

“Mibati nga wala mahatagi og bili ug tingali medyo nalooy sa kaugalingon, kining buotang anak—ug siya talagsaon ka buotan—nakalimot sa makadiyot nga bisan sa usa ka higayon wala siya makasinati og kahugaw o kasagmuyo, kahadlok o kasilag sa kaugalingon. Nakalimot siya sa makadiyot nga ang matag baka sa ranso iyaha na ug mao usab ang tanan nga mga kupo diha sa kabinet ug matag singsing sa hunos. Nakalimot siya sa makadiyot nga ang iyang pagkamatinud-anon nagantihan ug kanunay nga pagagantihan. …

“… Siya kinsa aduna sa halos tanang butang, ug kinsa tungod sa iyang kakugihan, sa talagsaong paagi nakaangkon niini, nagkulang sa usa ka butang nga mohimo unta kaniya nga hingpit nga tawo sa Ginoo nga siya hapit na nga mahimo. Kinahanglan pa siya nga mopalambo og kapuangod ug kalooy, sa halapad nga panglantaw aron makita nga kining mipauli dili usa ka kaaway. Kini mao ang iyang igsoon nga lalaki. …

“Sigurado nga kini nga manghud nga lalaki nahimong usa ka binilanggo—binilanggo sa sala, pagkahungog, ug sa tangkal sa baboy. Apan ang magulang nga igsoon binilanggo usab sa ubang paagi. Siya, sa gihapon, wala pa makalingkawas sa pagkabilanggo sa iyang kaugalingon. Siya grabe nga gihasul sa tumang kasina. Siya mibati nga gibale-wala sa iyang amahan ug gihikawan sa katungod sa iyang igsoon, nga pulos dili tinuod” (“The Other Prodigal,” Ensign, Mayo 2002, 63).

Sumala ni Elder Holland, nganong naglagot man ang magulang nga lalaki? Sa unsang paagi nga ang magulang nga lalaki nawala usab?
Unsay angay natong hinumduman kon kita makakita sa Dios nga maloloy-on ug nagpanalangin niadtong naghinulsol ug mobalik ngadto Kaniya?
Unsa nga baruganan ang atong makat-unan gikan niini nga sambingay mahitungod sa pagkahimong mas mahisama sa atong Amahan sa Langit? (Ang mga estudyante kinahanglang moila og baruganan sama sa mosunod: Kita mamahimong mas mahisama sa atong Amahan sa Langit pinaagi sa pagtubag uban sa kalooy ug hingpit nga kalipay kon ang uban maghinulsol.)

Pahinumdumi ang mga estudyante sa tawo nga ilang gihunahuna sa sinugdanan sa klase nga posibleng nawala sa espirituhanong paagi. Awhaga sila nga mainampoong maghunahuna kon sa unsang paagi sila makatabang niana nga tawo sa paghinulsol ug mapaduol sa Langitnong Amahan. Dapita sila sa paghunahuna usab sa unsang mga paagi sila mismo mahimong mawala ug kinahanglan nga maghinulsol ug mobalik ngadto sa Manluluwas.

Sunod nga Unit (Lucas 18–Juan 1)

Dapita ang mga estudyante sa pagpamalandong sa usa ka panahon dihang adunay tawo nga mipasipala kanila ug unsay ilang gibati niini. Ipasabut nga samtang magtuon sila sa sunod nga unit, sila makakat-on kon sa unsang paagi ang Manluluwas mipili sa pagtubag niadtong mipasipala Kaniya. Hangyoa sila sa pagtimaan sa dugang nga mga detalye sa istorya ni Lucas kabahin sa pag-antus ni Jesukristo sa Getsemani ug sa unsay gikaon ni Jesus human sa Iyang Pagkabanhaw.