Librarya
Leksyon 45: Lucas 3–4

Leksyon 45

Lucas 3–4

Pasiuna

Si Juan Bautista misangyaw sa paghinulsol ug mipamatuod sa umaabut nga Mesiyas. Si Jesukristo gibunyagan ni Juan ug dayon nagpuasa sulod sa 40 ka adlaw didto sa kamingawan. Human sa pagbiyahe ngadto sa Galilea, si Jesus mipahayag didto sa Nazaret nga Siya mao ang Mesiyas. Ang mga tawo sa Nazaret misalikway Kaniya, ug Siya miadto sa Capernaum, diin Siya miayo sa mga masakiton ug mipapahawa sa mga yawa.

Mga Sugyot alang sa Pagtudlo

Lucas 3:1–22

Si Juan Bautista nanagna mahitungod ni Jesukristo

Sa dili pa magklase, hangyoa ang usa ka estudyante sa pagtuon sa istorya ni Elijah ug ang biyuda sa Sarepta sa 1 Mga Hari 17:1–16 ug ang laing estudyante sa pagtuon sa istorya ni Naaman ug Eliseo sa 2 Mga Hari 5:1–15. Ipasabut nga sila mohatag unya og mubo nga summary niini nga mga istorya atol sa leksyon. Hangyoa sila nga hatagan og gibug-aton ang gibuhat ni Naaman ug sa biyuda sa Sarepta aron sa pagpakita sa ilang hugot nga pagtuo ug ipasabut nga silang duha mga Hentil (dili kabahin sa balay ni Israel).

Sa pagsugod sa leksyon, pasulata ang mga estudyante diha sa usa ka piraso nga papel sa usa ka panahon nga mibati sila nga nahimulag o nalahi gikan niadtong naglibut kanila isip resulta sa pagsunod sa gipahiuli nga ebanghelyo ni Jesukristo (siguroha nga ang mga estudyante dili mosulat sa ilang mga ngalan sa ilang mga papel). Human sa igong panahon, hangyoa ang mga estudyante sa paghatag kanimo sa ilang mga papel. Basaha og kusog ang pipila sa mga kasinatian ngadto sa klase.

Dapita ang mga estudyante sa pagpangita og usa ka kamatuoran samtang magtuon sila sa Lucas 3:1–22 nga makapasabut nganong ang mga tawo nga nagsunod sa ebanghelyo mahimong mobati usahay nga nahimulag gikan sa uban.

Ipasabut nga ubos sa balaod ni Moises, ang labawng sacerdote [high priest] molihok isip nagdumala nga opisyal sa Aaronic Priesthood ug politikanhong pangulo sa nasud sa Israel. Hinoon, sa panahon sa pagpangalagad sa Manluluwas, ang katungdanan sa labawng sacerdote nahimong dautan. Imbis nga pilion sa Dios, ang labawng sacerdote gipili sa mga tawo nga sama ni Herodes ug sa ubang mga opisyales sa Roma (tan-awa sa Bible Dictionary sa LDS English version nga Biblia, “High priest”).

Dapita ang usa ka estudyante sa pagbasa og kusog sa Lucas 3:2–6. Hangyoa ang klase sa pagsunod, nga mangita kon kang kinsa namulong ang Dios imbis nga sa labaw nga mga sacerdote.

  • Ngadto kang kinsa man miabut ang mga pulong sa Ginoo imbis nga sa labaw nga mga sacerdote? (“Juan nga anak ni Zacarias,” nga nailhan usab isip Juan Bautista.)

  • Unsa ang gitudlo ni Juan Bautista?

Ipasabut nga sa kapanahunan ni Juan ang ubang mga tawo nagtuo nga tungod kay sila mga kaliwat ni Abraham, sila mas maayo o mas gihigugma sa Dios kay sa dili mga Israelite. Dapita ang usa ka estudyante sa pagbasa og kusog sa Lucas 3:7–9, ug hangyoa ang klase sa pagpangita kon unsay gitudlo ni Juan Bautista sa mga Judeo sa kinahanglan nilang buhaton aron mapahimuot ang Dios.

  • Unsa man ang gitudlo ni Juan sa mga Judeo nga gikinahanglan nilang buhaton aron sa pagpahimuot sa Dios? (Ipasabut nga ang “bunga” usa ka simbolo sa mga resulta sa mga pagpili nga atong gihimo.)

  • Sumala sa bersikulo 9, unsay mahitabo niadtong dili mohatag og “maayong bunga,” o magpuyo nga matarung?

I-summarize ang Lucas 3:10–15 pinaagi sa pagpasabut nga si Juan mitudlo sa piho nga mga grupo sa mga Judeo kon unsaon nila nga makapamunga og maayo nga bunga. Ang pagpangalagad ni Juan dalaygon, ug ang pipila nagtuo nga siya tingali ang Mesiyas.

Dapita ang usa ka estudyante sa pagbasa og kusog sa Lucas 3:16–17, ug hangyoa ang klase sa pagpangita kon unsay gisulti ni Juan nga buhaton sa Mesiyas inig-abut Niya.

  • Unsa ang gisulti ni Juan nga buhaton sa umaabut nga Mesiyas?

Ipasabut nga ang mga pulong “kaninyo ang iyang igabautismo mao ang Espiritu Santo ug kalayo” (bersikulo 16) nagpasabut sa makapaputli ug makapabalaan nga epekto sa pagdawat sa gasa sa Espiritu Santo.

Aron sa pagtabang sa mga estudyante nga mas makasabut sa bersikulo 17, ipakita ang usa ka kumkum sa mga lugas o gagmayng mga bato ug diyutayng ginabas o gagmayng mga piraso sa newspaper. Isagol ang mga lugas ug ginabas, ug ibutang ang sinagol sa usa ka mabaw nga tray.

  • Sa unsang paagi mabulag sa usa ka tawo ang mga lugas gikan sa ginabas?

Ipasabut nga human ang trigo giani ug gigiuk (ang pagbulag sa mga lugas gikan sa uhay sa tanom), ang mga lugas ayagon. Ang pag-ayag mao ang karaang pamaagi nga gigamit sa pagbulag sa mga lugas sa trigo gikan sa mga uhot (panit) ug mga tipaka. Ang usa ka mag-aayag mogamit og dagkong pala o tinidor nga kahoy (gihubad sa mga kasulatan isip “kakha”) aron ipapadpad sa hangin ang gigiuk nga trigo. Ang hangin dayon mopadpad sa mas gaan, wala magustuhi nga mga uhot, ug ang mas bug-at nga lugas sa trigo mangahulog nga magtapok diha sa giukanan nga salog.

Sa paghulagway niini nga konsepto, ipakita ang usa ka pamaypay (mahimo ka nga mogamit og baga nga papel, karton, o gipilo nga papel kon gikinahanglan). Pagdapit og usa ka estudyante sa pag-adto sa atubangan sa klase, ug hangyoa siya nga ipaypay ang pamaypay ibabaw sa mga lugas ug ginabas. Samtang ang estudyante namaypay, hinaya pag-itsa ang sinagol aron ang naglihok nga hangin mopadpad sa ginabas samtang ang mga lugas mangahulog og balik ngadto sa tray. Dapita ang estudyante sa paglingkod.

  • Unsa man ang girepresentar sa trigo ug sa uhot? (Ang trigo nagrepresentar sa mga matarung, ug ang mga uhot nagrepresentar sa mga dautan.)

  • Sumala sa bersikulo 16–17, kinsa ang mobulag sa matarung gikan sa dautan? (Human makatubag ang mga estudyante, isulat sa pisara ang mosunod nga kamatuoran: Si Jesukristo mobulag sa mga matarung gikan sa mga dautan.)

  • Bisan tuod ang katapusan nga panagbulag sa mga matarung gikan sa dautan mahitabo sa Adlaw sa Paghukom, sa unsang mga paagi ang pagsunod ni Jesukristo ug pagsunod sa Iyang ebanghelyo makahimo sa Iyang mga disipulo nga mahimulag gikan sa uban karon?

  • Nganong gikinahanglan man natong masabtan nga ang pagtinguha sa pagsunod ni Jesukristo ug pagsunod sa Iyang ebanghelyo makahimo kanato nga mahimulag o mobati nga nahimulag gikan sa uban?

I-summarize ang Lucas 3:18–22 pinaagi sa pagpasabut nga si Jesus miabut aron magpabunyag ni Juan Bautista. Wala madugay, si Juan Bautista gipapriso ni Herodes.

Lucas 3:23–38

Ang kaliwatan ni Jesus gihan-ay

I-summarize ang Lucas 3:23–38 pinaagi sa pagpasabut nga si Lucas milakip og genealogy ni Jesus ug mipamatuod nga si Jose mao ang “gituohan” (dili aktwal) nga amahan ni Jesus, kinsa mao ang Anak sa Dios.

Lucas 4:1–13

Si Jesus gitintal ni Satanas didto sa kamingawan

Ipasabut nga ang Lucas 4:1–13 naglangkob sa istorya ni Jesus nga nagpuasa sulod sa 40 ka adlaw didto sa kamingawan ug nagsalikway sa mga tintasyon ni Satanas.

Lucas 4:14–30

Si Jesus mipahibalo nga Siya mao ang Mesiyas

Ilista sa pisara ang mga pulong masulub-on, dinaug-daog, binilanggo, kabus, ug buta. Hangyoa ang mga estudyante sa pagpamalandong og usa ka higayon diin ang usa o daghan pa niini nga mga pulong tingali naghulagway sa unsay ilang gibati mahitungod sa ilang mga kaugalingon. Dapita sila samtang nagtuon sila sa Lucas 4:14–30 nga mangita kon sa unsang paagi sila makakaplag og kahupayan gikan niini nga mga pagbati.

I-summarize ang Lucas 4:14–17 pinaagi sa pagpasabut nga human si Jesus mibalik gikan sa kamingawan, Siya misugod sa pagsangyaw sa mga sinagoga sa Galilea. Wala madugay, Siya mibalik ngadto sa Iyang kaugalingong lungsod sa Nazaret. Samtang naa didto, Siya mibarug diha sa usa ka sinagoga ug mibasa gikan sa basahon ni Isaias.

Dapita ang usa ka estudyante sa pagbasa og kusog sa Lucas 4:18–21, ug hangyoa ang klase sa pagpangita kon unsay gitudlo ni Isaias kabahin sa balaanong misyon sa Mesiyas.

  • Unsa ang gipanghimatud-an ni Jesus sa mga tawo sa Iyang kaugalingong lungsod sa Nazaret? (Ang mga estudyante mahimong mogamit og lain-laing mga pulong, apan siguroa nga mahibalo sila sa mosunod nga kamatuoran: Si Jesus mao ang Mesiyas kinsa gipadala sa pag-ayo sa mga masulub-on ug pagluwas niadtong espirituhanong nangabihag.)

  • Unsa nga mga kasinatian ang inyong nasinati nga nagpakita kaninyo nga si Jesukristo padayon nga nag-ayo ug nagluwas kanato sa atong panahon?

Dapita ang usa ka estudyante sa pagbasa og kusog sa Lucas 4:22, ug hangyoa ang klase sa pagpangita kon giunsa pagtubag sa katawhan sa Nazaret ang maisugong pahayag ni Jesus nga Siya ang dugay nang gipaabut nga Mesiyas.

  • Unsay reaksyon sa mga katawhan sa pamahayag ni Jesus?

  • Basi sa bersikulo 22, sa inyong hunahuna ngano kaha nga ang mga tawo sa Nazaret naglisud man sa pagtuo nga si Jesus mao ang Mesiyas?

I-summarize ang Lucas 4:23 pinaagi sa pagpasabut nga si Jesus nasayud nga ang mga tawo sa Nazaret mohagit Kaniya sa pagpamatuod nga Siya mao ang Mesiyas pinaagi sa pagbuhat og usab sa mga milagro nga Iyang gihimo sa Capernaum.

Ipadali sa pagbasa sa mga estudyante ang Lucas 4:24-27 sa hilum nga paagi, nga mangita sa duha ka istorya sa Daang Tugon nga maoy gipasabut sa Manluluwas sa dihang Siya mitubag sa mga tawo sa Nazaret. (Mahimo nimong klaruhon nga ang Elias nagpasabut ngadto ni Elijah ug ang Eliseo nagpasabut ni Eliseo.) Dapita ang mga estudyante nga moreport sa unsay ilang nakat-unan.

Hangyoa ang duha ka mga estudyante nga gidapit na nimong daan sa pagtuon niining duha ka mga istorya sa pagpresentar karon sa ilang mga summary. Pagkahuman, ipasabut nga gitudlo ni Jesus sa mga tawo sa Nazaret nga bisan og adunay mga Israelite nga biyuda ug mga sanlahon, ang duha ka dili mga Israelite (Hentil) ang nakasinati sa mga milagro.

  • Sa unsang mga paagi nga si Naaman ug ang biyuda sa Sarepta nagpakita sa hugot nga pagtuo?

  • Sa unsang paagi ang hugot nga pagtuo sa biyuda ug ni Naaman lahi kay sa hugot nga pagtuo sa mga tawo sa Nazaret?

Ipasabut nga si Jesus mipahigayon og diyutay ra kaayo nga mga milagro sa Nazaret tungod kay kadaghanan sa mga tawo didto kulang sa hugot nga pagtuo diha Kaniya (tan-awa sa Mateo 13:54–58; Marcos 6:1–6).

  • Unsa nga baruganan ang atong makat-unan mahitungod sa hugot nga pagtuo kon atong itandi ang mga tawo sa Nazaret ngadto sa biyuda ug ni Naaman? (Tabangi ang mga estudyante nga mahibalo og usa ka baruganan sama sa mosunod: Kon atong ipakita ang atong hugot nga pagtuo diha ni Jesukristo, atong makita nga mahitabo ang mga milagro.)

Hangyoa ang mga estudyante sa pagduol sa pisara ug paghimo og lista sa mga paagi nga kita makapakita sa atong hugot nga pagtuo nga si Jesukristo mao ang atong Manluluwas. Human makompleto sa mga estudyante ang lista, pangutan-a:

  • Unsa ang mga ehemplo sa mga panalangin o mga milagro nga moabut lamang kon kita molihok una diha sa hugot nga pagtuo?

Dapita ang usa ka estudyante sa pagbasa og kusog sa Lucas 4:28–30, ug hangyoa ang klase sa pagpangita kon giunsa pagtubag niadtong anaa sa sinagoga kang Jesus. Dapita ang mga estudyante nga moreport sa unsay ilang nakat-unan.

  • Sa unsang paagi nga kini nga istorya naghulagway kon sa unsang paagi si Jesukristo mobulag sa dautan gikan sa mga matarung? (Tan-awa sa Lucas 3:17.)

Lucas 4:31–44

Si Jesus nagpapahawa sa mga yawa ug nag-ayo sa masakiton

Ipares-pares ang mga estudyante. Dapita sila sa pagbasa og kusog sa Lucas 4:31–44 uban sa ilang pares ug mangita sa mga panalangin nga nadawat sa mga tawo sa Capernaum ikumpara sa mga panalangin nga nadawat sa mga tawo sa Nazaret. Human sila makabasa, dapita sila sa paghisgut sa ilang mga tubag sa mosunod nga mga pangutana uban sa ilang mga pares (mahimo nimong isulat kini nga mga pangutana sa pisara):

  • Sa unsang paagi nga lahi ang reaksyon sa mga tawo sa Capernaum ngadto ni Jesus, kon ikumpara sa mga tawo sa Nazaret?

  • Unsa nga mga panalangin ang nadawat sa mga tawo sa Capernaum, kon ikumpara sa mga panalangin nga nadawat sa mga tawo sa Nazaret?

  • Giunsa man sa paghulagway niini nga mga istorya ang baruganan nga samtang kita mopakita sa atong pagtuo kang Jesukristo, atong makita ang mga milagro nga mahitabo?

Pagdapit og pipila ka mga estudyante sa pagpakigbahin sa ilang mga tubag sa katapusang duha ka mga pangutana diha sa klase.

Tapusa ang leksyon pinaagi sa pagpakigbahin sa imong pagpamatuod kabahin ni Jesukristo ug sa mga panalangin nga imong nadawat samtang ikaw mipakita og hugot nga pagtuo diha Kaniya. Hangyoa ang mga estudyante sa pagsulat diha sa ilang mga notebook sa klase o scripture study journal sa pipila ka mga paagi nga ilang mapakita ang ilang hugot nga pagtuo kang Jesukristo. Dapita sila sa paghimo og tumong sa pagbuhat sa mga butang nga ilang gisulat.

Komentaryo ug Background nga Impormasyon

Lucas 3:17. “[Siya mo]hipos sa trigo ngadto sa iyang dapa”

Usa ka pagsabut sa dapa nga maoy pundokanan sa mga trigo, o mga matarung, mao nga kini nagrepresentar sa templo. Nagkutlo og susama nga pasumbingay (tan-awa sa Alma 26:5) ingon man sa Lucas 3:17, si Elder David A. Bednar sa Korum sa Napulog Duha ka mga Apostoles miingon sa mosunod:

“Ang kamalig [dapa] mao ang balaang mga templo. Si Elder Neal A. Maxwell mipasabut: ‘Tataw kaayo, sa dihang kita nabunyagan, ang atong mga mata naglantaw lapas pa sa bunyaganan ngadto sa balaang templo. Ang mahinungdanong kamalig diin kini nga mga bugkos ipundok mao ang balaang templo’ (sa John L. Hart, ‘Make Calling Focus of Your Mission,’ Church News, Sep. 17, 1994, 4). Kini nga pahimangno miklaro ug mipasabut og maayo sa kamahinungdanon sa sagrado nga mga ordinansa ug mga pakigsaad sa templo—nga ang mga bugkos dili mausik” (“Madungganon nga Naghupot og usa ka Pangalan ug Katungdanan,” Ensign o Liahona, Mayo 2009, 97).

Lucas 4:25–27. Si Naaman ug ang biyuda sa Sarepta

Si Elder Bruce R. McConkie sa Korum sa Napulog Duha ka mga Apostoles mihatag sa mosunod nga komentaryo mahitungod sa hugot nga pagtuo nga gipakita sa biyuda sa Sarepta ug ni Naaman kon itandi ngadto sa hugot nga pagtuo niadtong anaa sa Nazaret sa panahon ni Jesus:

“Kon adunay hugot nga pagtuo, adunay milagro; kon walay hugot nga pagtuo, walay milagro nga mahimo. Ug kon ang mga propeta sa karaan migawas sa panon sa Israel aron mangita niadtong takus sa ilang pagpangalagad, mao usab si Jesus nga migawas sa Nazaret sa pagpangita og madawaton sa mga kalag kinsa motuo diha kaniya ug modawat sa mga panalangin nga iyang ihatag. Kon ang mga tawo sa Nazaret magtinguha nga makakita sa talagsaon nga mga buhat nga gihimo sa laing mga dapit, nan kinahanglang sila modawat Kaniya kinsa karon nagsangyaw diha sa ilang sinagoga, ug sila usab makadawat sa mga panalangin sa langit” (The Mortal Messiah, 4 vols. [1979–81], 2:26).