Leksyon 46
Lucas 5
Pasiuna
Human sa milagrusong pagkakuha og daghang isda uban sa tabang sa Manluluwas, si Pedro, Santiago, ug Juan mibiya sa tanan aron sa pagsunod sa Manluluwas ug mahimong mangingisdag tawo. Si Jesus miayo sa usa ka sanlahon ug usa ka paralitiko nga tawo. Iyang gitawag si Mateo nga mahimong usa ka disipulo ug mitudlo nga Siya mianhi aron sa pagtawag sa mga makasasala sa paghinulsol. Gitudlo usab ni Jesus ang sambingay sa bag-ong bino sa daang mga sudlanan.
Mga Sugyot alang sa Pagtudlo
Lucas 5:1–11
Si Jesus nagtawag kang Pedro, Santiago, ug Juan nga mamahimong mangingisda og tawo
Isulat sa pisara ang mosunod nga pangutana: Kanus-a ka gihangyo sa pagbuhat og usa ka butang nga wala masayud sa tanang rason sa pagbuhat niini? Hangyoa ang mga estudyante sa pagpamalandong sa pangutana, ug dapita ang pipila sa pagpakigbahin sa ilang mga kasinatian.
-
Nganong lisud man ang pagsunod sa mga instruksyon kon wala makasabut sa mga rason niini?
-
Unsa nga sugo o tambag gikan sa mga lider sa Simbahan ang tingali lisud sundon sa pipila ka batan-on kon wala sila makasabut sa hingpit nga mga rason alang niini? (Ikonsiderar ang paglista sa mga tubag sa mga estudyante diha sa pisara.)
Dapita ang mga estudyante sa pagpangita og usa ka baruganan diha sa Lucas 5:1–11 nga makatabang kanila kon sila wala makasabut sa hingpit nganong gisugo sila sa pagsunod sa tambag o mga sugo sa Ginoo.
Dapita ang pipila ka estudyante nga magpuli-puli sa pagbasa og kusog gikan sa Lucas 5:1-5. Hangyoa ang klase sa pagsunod, nga mangita kon unsa ang gihangyo sa Manluluwas nga ipabuhat kang Simon (Pedro) pagkahuman Niya og sangyaw. Hangyoa ang mga estudyante nga moreport sa unsay ilang nakat-unan. (Kon gikinahanglan, iklaro nga ang makakuha nagpasabut nga makasikup o makabaling og isda.)
-
Unsa ang gisulti ni Simon ngadto sa Manluluwas mahitungod sa ilang nangaging mga paningkamot sa pagkuha og isda?
-
Unsa kaha ang gihunahuna ni Simon base sa iyang kaugalingong kasinatian sa pagpangisda sa dihang gisultihan siya sa Manluluwas sa pagtaktak pag-usab sa mga pukot?
-
Unsa ang gisulti ni Simon nga nagpakita nga siya misalig sa Ginoo?
Dapita ang usa ka estudyante sa pagbasa og kusog sa Lucas 5:6–9, ug hangyoa ang klase sa pagpangita kon unsay nahitabo sa dihang gibuhat ni Simon ang gihangyo sa Ginoo.
-
Unsay nahitabo sa dihang si Simon mituman sa gisugo sa Ginoo?
-
Unsa nga baruganan ang atong makat-unan gikan sa kaandam ni Simon sa pagbuhat sa sugo sa Ginoo bisan kon siya wala makasabut ngano? (Ang mga estudyante mahimong mogamit og lain-laing mga pulong, apan siguroa nga mahibalo sila sa mosunod nga baruganan: Kon atong buhaton ang sugo sa Ginoo bisan kon kita wala makasabut sa rason, makahatag Siya og mas dagkong panalangin kay sa atong gilauman. Gamit ang mga pulong sa mga estudyante, isulat kini nga baruganan diha sa pisara.)
-
Sa unsa nga mga paagi ang pagsunod niini nga baruganan nagkinahanglan kanato nga mosalig ni Jesukristo?
Aron sa pagtabang sa mga estudyante nga makasabut niini nga baruganan, dapita ang usa ka estudyante sa pagbasa og kusog sa mosunod nga pamahayag ni Elder Richard G. Scott sa Korum sa Napulog Duha ka mga Apostoles. Ikonsiderar ang paghatag sa mga estudyante og kopya sa pamahayag:
“Kini nga kinabuhi usa ka kasinatian sa halawum nga pagsalig—pagsalig kang Jesukristo, pagsalig sa Iyang mga pagtulun-an, pagsalig sa atong kapasidad sumala sa paggiya sa Espiritu Santo sa pagsunod niadto nga mga pagtulun-an sa kalipay karon ug sa usa ka puno sa katuyoan, labing malipayon nga mahangturong pagpakabuhi. Ang pagsalig mao ang kaandam sa pagsunod bisan kon wala masayud sa katapusan gikan sa sinugdanan (tan-awa sa Mga Prov. 3:5–7). Aron mamunga, ang inyong pagsalig sa Ginoo kinahanglang mas gamhanan ug makalahutay kay sa inyong pagsalig sa inyong kaugalingong personal nga mga pagbati ug kasinatian” (“Trust in the Lord,” Ensign, Nob. 1995, 17).
-
Unsaon nato pagpalambo niini nga matang sa pagsalig sa Manluluwas?
-
Sa unsang paagi kamo o ang inyong pamilya nakadawat og mas dako nga mga panalangin kay sa inyong gilauman pinaagi sa pagsunod sa mga direksyon sa Ginoo bisan kon wala kamo hingpit nga nakasabut sa mga rason? (Ang mga tubag mahimong maglakip og mga kasinatian nga nakatabang sa mga estudyante nga makasabut nganong ang Ginoo mihatag sa ingon nga mga direksyon.)
Sa usa ka piraso nga papel nga ilang madala sa panimalay, dapita ang mga estudyante sa pagsulat og tambag o mga sugo gikan sa Ginoo nga sila makasunod nga mas matinud-anon bisan og sila wala makasabut sa hingpit sa mga rason sa pagbuhat niini. (Kon may oras pa, mahimo ka nga modapit sa mga estudyante sa pagpangita og mga ideya diha sa Alang sa Kalig-on sa mga Kabatan-onan [booklet, 2011].)
I-summarize ang Lucas 5:10–11 pinaagi sa pagpasabut nga si Pedro, Santiago, ug Juan mibiya sa ilang mga sakayan ug mga pukot aron sa pagsunod ni Jesus.
Lucas 5:12–26
Si Jesus nag-ayo sa usa ka sanlahon ug usa ka paralitiko nga tawo
Ipakita sa mga estudyante ang mosunod nga mga butang (o pagdrowing og mga hulagway niini diha sa pisara): syringe, bandage, sabon ug icepack.
-
Sa unsang paagi kini nga mga butang makatabang sa pag-ayo sa mga tawo nga adunay sakit o samad?
-
Gawas sa sakit ug pisikal nga pagkaangol, unsa pay gikinahanglan nga mamaayo ang usa ka tawo? (Ilista sa pisara ang mga tubag sa mga estudyante. Ang mga tubag mahimong maglakip sa sala, pagkaadik, kawalay paglaum, ug kapait.)
Dapita ang mga estudyante sa pagpangita og mga baruganan samtang magtuon sila sa Lucas 5:12–25 nga nagtudlo kanato unsay atong mahimo aron sa pagtabang sa atong kaugalingon ug sa uban nga makadawat sa gikinahanglang pagkaayo.
Drowinga ang mosunod nga tsart diha sa pisara ug dapita ang mga estudyante sa pagkopya niini ngadto sa ilang mga notebook sa klase o mga scripture study journal:
|
Mga Pagkasama |
Mga Kalainan |
|---|---|
Isulat ang mosunod nga mga pakisayran diha sa pisara: Lucas 5:12–15 ug Lucas 5:17–25. Ipasabut nga kini nga mga bersikulo nagsaysay nga ang Manluluwas miayo sa duha ka mga tawo. Usa sa mga tawo adunay sanla, ug ang laing tawo paralitiko, nagpasabut nga siya naparalisar. Ipares-pares ang mga estudyante. Hangyoa sila sa pagbasa sa matag istorya uban sa ilang pares ug hisguti ang mosunod nga mga pangutana:
-
Sa unsang paagi nga susama kining duha ka pagkaayo? Sa unsang paagi kini managlahi?
-
Unsay papel sa hugot nga pagtuo diha sa matag istorya?
Hangyoa ang mga estudyante nga irekord sa ilang mga tsart ang unsay ilang nakat-unan. Human sa igong panahon, dapita ang mga estudyante sa pagreport kon unsay ilang nakat-unan. Ikonsiderar ang pagdapit sa mga estudyante sa pagmarka sa mga pulong “sa pagkakita niya sa ilang pagsalig” diha sa bersikulo 20. Siguroha nga ang mga estudyante makasabut nga ang hugot nga pagtuo niadtong midala sa paralitiko ngadto sa Manluluwas nakatabang niini nga tawo nga mamaayo.
-
Unsa nga mga baruganan ang atong makat-unan gikan niini nga mga istorya mahitungod sa unsang paagi kita mamaayo ug unsay atong mahimo sa pagtabang sa uban nga mamaayo? (Ang mga estudyante mahimong mogamit og lain-laing mga pulong, apan siguroa nga mahibalo sila sa mosunod nga mga baruganan: Samtang kita mogamit sa hugot nga pagtuo ug moduol ngadto sa Manluluwas, Siya makaayo kanato. Kita makatabang sa uban nga moduol sa Manluluwas aron sila mamaayo. Isulat kini nga mga baruganan diha sa pisara.)
-
Sa unsang mga paagi nga makadawat kita og pagkaayo gikan sa Manluluwas? (Tabangi ang mga estudyante nga makasabut nga ang Manluluwas mahimong motangtang sa atong mga kahuyang gikan kanato, o Siya mohatag kanato sa kaisug, hugot nga pagtuo, kahupayan, ug kalinaw nga atong gikinahanglan sa paglahutay o pagbuntog sa atong mga kahuyang.)
Hangyoa ang mga estudyante sa pagkonsiderar sa mga kahuyang nga nalista sa pisara nga gikinahanglang mamaayo ang mga tawo.
-
Unsay inyong mabuhat aron sa pagtabang sa pagdala sa mga katawhan ngadto sa Manluluwas aron sa pagdawat sa Iyang makaayo nga gahum?
-
Kanus-a man nga kamo o inyong kaila naayo pinaagi sa paggamit og hugot nga pagtuo sa Manluluwas? (Pahinumdumi ang mga estudyante nga kinahanglang dili sila mopakigbahin og mga kasinatian nga personal o pribado ra kaayo.)
-
Kanus-a kamo nakakita og usa ka tawo nga midala og laing tawo ngadto sa Ginoo aron modawat sa makaayong gahum sa Manluluwas?
Hangyoa ang mga estudyante sa pagpamalandong kon unsay ilang mahimo sa paggamit og mas hugot nga pagtuo kang Jesukristo aron mamaayo, mapasaylo, o mahupay o unsay ilang mahimo sa pagdala og usa ka higala o laing tawo ngadto sa Manluluwas. Awhaga sila sa pagbuhat sa bisan unsang mga aghat nga mahimo nilang madawat.
Lucas 5:27–35
Ang mga escriba ug mga Pariseo nangutana nganong si Jesus nagkaon uban sa mga maniningil sa buhis ug mga makasasala
Dapita ang usa ka estudyante sa pagbasa og kusog sa Lucas 5:27–28, ug hangyoa ang klase sa pagpangita sa pagdapit sa Manluluwas kang Levi. Hangyoa ang mga estudyante nga moreport sa unsay ilang nakat-unan.
-
Unsay inyong nabantayan mahitungod sa reaksyon ni Levi sa pagdapit sa Manluluwas?
Pahinumdumi ang mga estudyante nga si Levi gitawag usab nga Mateo (tan-awa sa Mateo 9:9). Siya usa ka maniningil sa buhis, nagpasabut nga siya nangolekta og mga buhis gikan sa iyang kauban nga mga Judeo alang sa gobyerno sa Roma. Kadaghanan sa mga Judeo naglagot sa mga maniningil sa buhis ug gitan-aw sila isip mga sinalikway, makasasala, ug gani mga maluibon sa nasud sa Israel. I-summarize ang Lucas 5:29–35 pinaagi sa pagpasabut nga samtang si Jesus nagkaon uban ni Levi ug sa uban, ang mga escriba ug Pariseo mipanghimaraut Kaniya tungod sa pakigkaon uban sa mga makasasala. Si Jesus mitudlo nga Siya mianhi aron sa pagtawag sa mga makasasala sa paghinulsol.
Lucas 5:36–39
Si Jesus naghatag sa sambingay sa bag-ong bino sa daang mga sudlanan
Ipasabut nga ang Manluluwas migamit og sambingay aron sa pagtudlo sa mga escriba ug mga Pariseo. Dapita ang pipila ka estudyante nga magpuli-puli sa pagbasa og kusog gikan sa Lucas 5:36–39. Hangyoa ang klase sa pagsunod ug pagpangita kon unsa nga mga butang ang gigamit sa Manluluwas diha sa Iyang sambingay.
-
Unsa nga mga butang ang gigamit sa Manluluwas sa pagtudlo sa Iyang sambingay?
Ipakita sa mga estudyante ang usa ka bag-o nga piraso sa panapton ug usa ka daang piraso sa panapton nga adunay lungag. Ipasabut nga ang “bag-ong sinina” diha sa bersikulo 36 nagpasabut sa panapton nga wala pa mikulo. Ang usa ka tawo dili makatapak sa daan nga sinina gamit ang bag-ong panapton tungod kay kon ang bag-ong panapton mokulo, mas mograbe ang lungag. Sa samang paagi, ang ebanghelyo ni Jesukristo dili lamang usa ka pagtapak sa karaan nga mga tinuohan ug binuhatan apan usa ka hingpit nga pagpahiuli sa kamatuoran.
Ipasabut nga ang mga botilya nagpasabut sa mga “panit nga mga sudlanan og bino”, ug kon mahimo, pakit-a ang mga estudyante og mga piraso sa bag-o ug daan nga panit.
-
Unsa ang kalainan tali sa bag-o ug daan nga panit? (Ang bag-ong panit humok ug malumo; ang daan nga panit gahi ug gabukon.)
Ipasabut nga samtang ang bag-ong bino moaslum sa sulod sa panit nga sudlanan, ang alisngaw mosugod og pundo sa sulod ug moinat sa panit. Kon ang panit nga sudlanan sa bino mainat na niini nga paagi, ang pagsulay sa pagpaaslum og usab og bag-ong bino sulod niini posibleng makapasiak niini.
Niini nga sambingay, ang bag-ong bino nagrepresentar sa mga pagtulun-an sa Manluluwas ug sa kahingpitan sa walay katapusan nga ebanghelyo, ug ang karaan nga bino nagrepresentar sa mga binuhatan, mga tradisyon, ug mga tinuohan sa mga Pariseo ubos sa balaod ni Moises.
-
Sa unsang paagi nga ang “daang mga sudlanan” nagrepresentar sa mga escriba ug mga Pariseo? (Sama sa daang mga sudlanan nga kaging na kaayo aron sudlan og bag-ong bino, ang mga escriba ug Pariseo gahi na og kasingkasing ug dili gustong mag-usab aron modawat sa Manluluwas ug sa Iyang mga pagtulun-an.)
-
Kinsa kaha ang girepresentaran sa “bag-ong mga sudlanan”? (Kadtong mga katawhan kinsa mga mapainubsanon ug andam nga mousab aron modawat sa Manluluwas ug sa Iyang mga pagtulun-an.)
-
Unsa ang atong makat-unan gikan niini nga sambingay mahitungod sa unsay kinahanglan natong buhaton sa pagdawat sa Manluluwas ug sa Iyang ebanghelyo? (Ang mga estudyante kinahanglang mahibalo og baruganan sama sa mosunod: Aron modawat sa Manluluwas ug sa Iyang ebanghelyo, kita kinahanglang magmapainubsanon ug andam nga mousab. Dapita ang mga estudyante sa pagkonsiderar sa pagsulat niini nga baruganan diha sa margin sa ilang mga kasulatan tupad sa Lucas 5:36–39.)
Aron sa pagtabang sa mga estudyante sa pagsabut niini nga baruganan, dapita sila sa pagribyu sa Lucas 5 ug pagpangita og mga ehemplo kon sa unsang paagi ang mga indibidwal gahi ug dili matarug sa ilang kinaiya ngadto sa Manluluwas ug sa Iyang mga pagtulun-an ingon man usab mga ehemplo kon sa unsang paagi ang mga indibidwal nagmapainubsanon ug andam sa pag-usab ug paglambo pinaagi sa pagsunod sa Manluluwas. Dapita ang pipila ka mga estudyante nga moreport sa unsay ilang nakat-unan.
Tapusa ang leksyon pinaagi sa pagpakigbahin sa imong pagpamatuod sa mga baruganan nga gitudlo sa Lucas 5.
Komentaryo ug Background nga Impormasyon
Lucas 5:23. “Kay hain bay labi pang masayon, ang pag-ingon ba, ang imong mga sala gipasaylo na kanimo; o ang pag-ingon ba, Bumangon ka ug paglakaw?”
Si Presidente Harold B. Lee mitudlo sa mosunod mahitungod sa labing mahinungdanon nga mga milagro karon:
“Ang pinakadako nga mga milagro nga akong nakita karon dili mao ang pagpang-ayo sa masakitong mga lawas, apan ang pinakadakong mga milagro nga akong nakita mao ang pagpang-ayo sa masakitong mga kalag, kadtong masakiton sa kalag ug espiritu ug nawad-an sa kadasig ug nagmagul-anon, nga naluyahan na sa kusog. Kita nagtabang sa ingon nga mga tawo, tungod kay sila bililhon sa panan-aw sa Ginoo, ug gusto nato nga walay usa nga mobati nga sila gikalimtan” (“Stand Ye in Holy Places” Ensign, Hulyo 1973, 123).
Lucas 5:21–24. “Kinsa bay arang makapasaylog mga sala kondili ang Dios ra?”
Nagkomentaryo sa mga escriba ug mga Pariseo nga nangutana sa awtoridad sa Manluluwas sa pagpasaylo sa sala, si Elder Bruce R. McConkie sa Korum sa Napulog Duha ka mga Apostoles mitudlo sa mosunod:
“Kini nga panghitabo sa kinabuhi sa atong Ginoo mao ang makita ug dili malalis nga kamatuoran nga siya mao ang Mesiyas; ug mao man ang pagtan-aw niini niadtong iyang gialagaran. Siya nagpamatuod sa kanunay nga ang Dios mao ang Iyang Amahan ug gisuportahan kana nga personal nga pagsaksi uban sa usa ka dili hitupngan nga pangalagad sa pagsangyaw ug sa pagpang-ayo. Karon iyang tuyo nga ipahibalo nga iyang gibuhat ang unsay dili mabuhat ni bisan kinsa gawas sa Dios ug aron sa pagmatuod nga siya nakabuhat niini agi og dugang nga pagpakita sa gahum sa iyang Amahan.
“Si Jesus ug ang mga ‘doktor sa balaod’ nga anaa didto nasayud nga walay usa gawas sa Dios ang makapasaylo sa mga sala. Tungod niini, isip usa ka direkta ug mahinuklugong pagsaksi nga ang gahum sa Dios anaa diha kaniya … , gibuhat ni Jesus ang unsay dili mabuhat sa nagpakaaron ingnon—iyang gipamatud-an ang iyang balaan nga gahum pinaagi sa pag-ayo sa gipasaylo nga tawo” (Doctrinal New Testament Commentary, 3 vols. [1965–73], 1:177–78).
Lucas 5:20. “Sa pagkakita ni [Jesus] sa ilang pagsalig”
Nag-refer ngadto sa istorya sa tawo nga paralitiko ug sa mga pulong nga “sa pagkakita [ni Jesus] sa ilang pagsalig” (Lucas 5:20; mga italic gidugang), si Elder Chi Hong (Sam) Wong sa Seventy mitudlo:
“Ang atong hiniusang pagsalig makaapekto usab sa kaayohan sa uban.
“Kinsang mga tawhana kadtong gihisgutan ni Jesus? Maglakip kini sa upat nga midala sa paralitiko, ang tawo mismo, ang mga tawo nga nag-ampo para niya, ug tanang naminaw didto sa pagsangyaw ni Jesus ug miabiba sa tago alang sa umaabut nga milagro. Maglakip usab kini sa kapikas, ginikanan, anak, misyonaryo, presidente sa korum, presidente sa Relief Society, bishop, ug higala nga anaa sa layo. Makatabang kita sa usag usa. Kinahanglang aktibo kita sa pagluwas sa nanginahanglan” (“Magkahiusa sa Pagluwas,” Ensign o Liahona, Nob. 2014, 16).