Leksyon 48
Lucas 7:18–50
Pasiuna
Si Jesus midayeg kang Juan Bautista ug mipamatuod nga si John miandam sa agianan alang sa Iyang pagpangalagad. Samtang si Jesus nagkaon uban ni Simon nga Pariseo, usa ka mahinulsulon nga babaye mipakita sa iyang hugot nga pagtuo ug gugma sa Manluluwas.
Mga Sugyot alang sa Pagtudlo
Lucas 7:18–35
Si Jesus nagdayeg ni Juan Bautista ug nagpamatuod sa misyon ni Juan
Dapita ang mga estudyante nga magpares, ug hatagi ang matag paris og usa ka piraso nga papel. Hangyoa ang mga pares sa pagsulat og pinakadaghan nga mga kamatuoran nga ilang mahinumduman mahitungod ni Juan Bautista sulod sa usa ka minuto. Human sa usa ka minuto, ipaihap sa mga estudyante ang gidaghanon sa mga kamatuoran diha sa ilang papel.
-
Pila ka mga kamatuoran mahitungod ni Juan Bautista ang inyong nalista?
Dapita ang mga estudyante sa pagsulti sa klase sa pipila sa mga kamatuoran nga ilang nalista.
Kon mahimo, ipakita ang usa ka taas nga dahon sa sagbut ug usa ka humok nga piraso sa panapton. Ipasabut nga gigamit ni Jesus kini nga mga butang sa pagtudlo sa mga katawhan kabahin sa kinaiya ni Juan Bautista. Dapita ang usa ka estudyante sa pagbasa og kusog sa Lucas 7:24–26. Hangyoa ang klase sa pagsunod, nga mangita kon unsay gitudlo ni Jesus mahitungod ni Juan Bautista samtang naghisgut sa taas nga dahon ug humok nga sinina.
-
Sa unsang paagi nga si Juan Bautista lahi kay sa taas nga dahon sa sagbut? (Dili sama sa usa ka taas nga dahon, nga mauyug o malabyug sa hangin, si Juan Bautista lig-on ug dili matarug diha sa iyang pagpamatuod ug sa pagbuhat sa iyang misyon.)
Si Juan Bautista nagsangyaw
Ipakita ang kauban nga hulagway ni Juan Bautista ug pangutana:
-
Sa unsang paagi nga si Juan Bautista lahi niadtong mga “nagsul-ob og luho nga mga bisti” ug nagpuyo sa kaharuhay diha “sa mga palasyo sa mga hari” (bersikulo 25)? (Si Juan Bautista nagpuyo sa disyerto ug nagsul-ob og sinina nga hinimo sa buhok sa kamelyo, nga hilabihan ka sapnot. Imbis nga magtinguha og temporal nga mga kaharuhay, si Juan Bautista nagtinguha lamang sa pagbuhat sa kabubut-on sa Dios.)
-
Unsa ang gisulti ni Jesus mahitungod ni Juan Bautista sa bersikulo 26?
Aron sa pagtabang sa mga estudyante nga makasabut sa talagsaong tahas ni Juan Bautista, ipasabut nga si Jesus mikutlo og usa ka panagna nga gisulat sa gatusan ka mga tuig na ang milabay nga namulong sa usa ka “sinugo” nga “magaandam sa dalan sa atubangan [sa Mesiyas]” (Malaquias 3:1). Dapita ang usa ka estudyante sa pagbasa og kusog sa Lucas 7:27–28, ug hangyoa ang klase sa pagsunod, nga mangita sa rason nganong si Juan Bautista lahi sa ubang mga propeta.
-
Unsa ang talagsaon ug importante nga tahas nga si Juan Bautista gi-orden nang daan nga buhaton? (Ang mga estudyante mahimong mogamit og lain-laing mga pulong, apan kinahanglang mahibalo sila sa mosunod nga kamatuoran: Si Juan Bautista mao ang propeta nga gi-orden nang daan nga moandam sa agianan alang sa ug mobunyag sa Anak sa Dios.)
-
Sa unsang paagi si Juan Bautista miandam sa agianan alang sa pag-abut ni Jesukristo?
Ipasabut nga ang Propeta Joseph Smith miingon sa mosunod mahitungod sa Lucas 7:28:
“Giisip si Jesus nga adunay pinakagamay nga pangangkon sa katungod sa gingharian sa Dios, ug [sa ingon] pinakaubos nga ilhon isip usa ka propeta; sama nga daw siya misulti—‘Siya nga giisip nga pinakagamay diha kaninyo mas labaw pa kay ni Juan—kana mao Ako’” (Mga Pagtulun-an sa mga Presidente sa Simbahan: Joseph Smith [2007], 82).
I-summarize ang Lucas 7:29–35 pinaagi sa pagpasabut nga daghan ang mituo sa mga pagtulun-an ni Jesus, apan ang mga Pariseo ug mga batid sa balaod [abogado] kinsa anaa misalikway sa Iyang mga pagtulun-an. Si Jesus mipasabut nga sila misalikway sa kamatuoran bisan pa kon Siya o si Juan Bautista ang mitudlo niini.
Lucas 7:36–50
Samtang si Jesus nagkaon uban ni Simon ang Pariseo, usa ka babaye mihugas sa mga tiil ni Jesus pinaagi sa iyang mga luha
Isulat sa pisara ang mosunod nga pangutana: Mapasaylo ba ko?
Dapita ang mga estudyante sa pagkonsiderar og mga higayon nga tingali naghunahuna sila kon mahimo ba silang mapasaylo. Dapita sila sa pagpangita sa mga kamatuoran nga motubag niini nga pangutana samtang sila padayon nga magtuon sa Lucas 7.
Aron sa pagtabang sa mga estudyante nga makasabut sa kinatibuk-ang kahulugan ug sulod sa Lucas 7:36–50, dapita ang usa ka estudyante sa pagbasa og kusog sa mosunod nga summary ug pagpasabut:
Usa ka Pariseo nga ginganlan og Simon midapit ni Jesus sa usa ka kumbira didto sa iyang panimalay. Sa mga kumbira nga sama niini, ang mga dinapit mosandig sa mga kutson libut sa mubo nga lamesa ug ituy-od ang ilang mga tiil palayo sa lamesa. Ang sosyal nga pamatasan nianang panahona nagtugot sa mga tawo nga nanginahanglan sa pagkolekta sa nahabilin nga mga pagkaon gikan sa mga bangkete. Busa, dili talagsaon alang sa mga tawo nga wala imbitara sa pagsulod sa balay atol sa usa ka kumbira (tan-awa sa James E. Talmage, Jesus the Christ, 3rd ed. [1916], 261).
-
Giunsa paghulagway ni Lucas ang babaye nga gihisgutan sa Lucas 7:37?
-
Giunsa sa babaye pagpakita sa iyang gugma alang sa Manluluwas? (Mahimo nimong ipasabut nga ang “pahumot nga sinulod sa usa ka tibudtibod nga alabastro” usa ka botelya nga puno sa mahalon nga pinahumot nga lana.)
-
Unsay gihunahuna ni Simon sa dihang iyang nakita unsay gibuhat sa babaye?
Aron sa pagrebyu sa sambingay nga gitudlo ni Jesus, hangyoa ang usa ka estudyante sa pagbasa og kusog sa Lucas 7:40–43. Dapita ang klase sa pagsunod, nga mangita kon unsay gitudlo sa Manluluwas kang Simon.
Kopyaha sa pisara ang mosunod nga tsart.
|
Tigpautang = | |
|
Utangan og 50 ka denario = |
Utangan og 500 ka denario = |
Ipasabut nga ang tigpautang usa ka tawo nga nagpahulam og kwarta; ang tawo nga nanghulam og kwarta mao ang utangan. Ang utangan miuyon nga mobayad og balik sa tigpautang o mapriso. Hangyoa ang usa ka estudyante sa pag-summarize sa sambingay sa iyang kaugalingong mga pulong.
-
Kinsa ang girepresentaran sa tigpautang? (Isulat ang Jesukristo diha sa pisara tapad sa “Tigpautang.”)
-
Hain sa mga utangan ang mahimong morepresentar sa babaye, ug hain ang mahimo nga morepresentar ni Simon nga Pariseo? Ngano man? (Isulat ang Simon nga Pariseo ubos sa “Utangan og 50 ka denario” ug ang Babaye ubos sa “Utangan og 500 ka denario.”)
Ipasabut nga sa panahon ni Jesus nabatasan na nga pasidunggan sa tagbalay ang iyang inila nga mga bisita pinaagi sa paghatag og mga buhat sa pagkamabination sama sa paghalok kanila sa pag-abi-abi, paghatag og tubig aron hugasan ang ilang mga tiil, ug pagdihog og lana sa ilang mga ulo (tan-awa sa James E. Talmage, Jesus the Christ, 261).
Ipadayon ang video sugod sa time code 7:25 ug hunonga kini human si Jesus moingon, “Lumakaw ka nga malinawon” (Lucas 7:50) (time code 8:52). O, dapita ang pipila ka mga estudyante sa pagpuli-puli sa pagbasa og kusog gikan sa Lucas 7:44–47. Hangyoa ang klase sa pagpangita kon giunsa ni Simon pagtratar si Jesus itandi ngadto sa pagtratar sa babaye Kaniya ug unsa kaha ang gibati sa matag usa nila ngadto ni Jesus.
-
Sumala sa mga bersikulo 44–47, unsa man ang pipila ka kalainan tali sa pagtratar ni Simon kang Jesus ug sa pagtratar sa babaye Kaniya ug unsa kaha ang gibati sa matag usa nila ngadto ni Jesus? (Isulat sa tsart sa pisara ang mga tubag sa mga estudyante.)
Kon ang mga estudyante mahuman na sa pagreport sa unsay ilang nahibaloan, ang tsart kinahanglan makita nga susama sa mosunod:
|
Tigpautang = Jesukristo | |
|
Utangan og 50 ka denarioSimon nga Pariseo Wala mohatag og tubig kang Jesus aron sa paghugas sa Iyang mga tiil Wala mohalok Kaniya Wala modihog Kaniya og lana Gamay ra og paghigugma Kaniya |
Utangan og 500 ka denarioBabaye Mihugas sa Iyang mga tiil pinaagi sa iyang mga luha ug gipahiran kini gamit ang iyang buhok Mihalok sa Iyang mga tiil Midihog og lana sa Iyang tiil Dako kaayo og paghigugma Kaniya |
-
Unsa nga panalangin ang nadawat sa babaye gikan sa Manluluwas?
Ipasabut nga pinaagi sa pagkompara kang Simon ngadto sa utangan og 50 ka denario, ang Manluluwas nagsugyot nga si Simon nagkinahanglan usab og kapasayloan sa iyang mga sala.
Dapita ang mga estudyante sa pagbasa sa hilum nga paagi sa Lucas 7:47-50, ug hangyoa sila sa pagpangita kon unsay nakapahimong posible alang niini nga babaye nga mapasaylo.
-
Unsa nga mga baruganan ang atong makat-unan gikan niini nga istorya? (Gamit ang mga pulong sa mga estudyante, isulat sa pisara ang mosunod nga mga baruganan: Samtang atong gamiton ang atong hugot nga pagtuo pinaagi sa pagpakita sa atong gugma ug debosyon ngadto sa Ginoo, atong masinati ang Iyang pagpasaylo. Samtang atong madawat ang kapasayloan gikan sa Ginoo, kita mapuno sa tinguha nga mas mohigugma ug moserbisyo Kaniya.)
-
Ngano kaha nga kita mas magtinguha sa paghigugma ug pagserbisyo sa Manluluwas kon atong masinati ang Iyang pagpasaylo?
Dapita ang tulo ka mga estudyante sa pagbasa og kusog og tagsa ka paragraph gikan sa mosunod nga pamahayag ni Elder Neil L. Andersen sa Korum sa Napulog Duha ka mga Apostoles:
“Adunay daghang matang sa personal nga katakus ug pagkamatarung. Sa gihapon ang paghinulsol maoy usa ka panalangin alang kanatong tanan. Matag usa kanato nagkinahanglan nga mobati sa mga bukton sa kalooy sa Manluluwas pinaagi sa kapasayloan sa atong mga sala.
“Sa milabay nga katuigan, gihangyo ako sa pagpakigkita sa usa ka tawo kinsa, kaniadto sa wala pa ang among panagkita, nakabaton og usa ka panahon sa gubot nga pagpuyo. Isip sangputanan sa iyang sayop nga mga pagpili, nawala ang iyang pagkamiyembro sa Simbahan. Dugay na siyang mibalik sa Simbahan ug matinud-anon nga nagsunod sa mga sugo, apan ang iyang mga kalihokan kaniadto misamok kaniya. Sa pagpakigkita kaniya, akong gibati ang iyang kaulaw ug ang iyang dakong pagbasol sa paghiklin sa iyang mga pakigsaad. Human sa among interbyu, akong gibutang ang akong mga kamot diha sa iyang ulo aron sa paghatag kaniya og panalangin sa priesthood. Sa wala pa mosulti og usa ka pulong, mibati ko og labihan ka dako nga pagbati sa gugma ug pagpasaylo sa Manluluwas alang kaniya. Human sa pagpanalangin, kami naggakos ug ang tawo madayagon nga mihilak.
“Natingala ako sa nagliyok nga mga bukton sa kalooy ug gugma sa Manluluwas alang sa mahinulsulon, bisan unsa ka maakuhon ang gisalikway nga sala. Ako mopamatuod nga ang Manluluwas makahimo ug andam nga mopasaylo sa atong mga sala. Gawas sa mga sala niadtong pipila kinsa mipili sa kapildihan human makahibalo sa kahingpitan, walay sala nga dili mapasaylo. Unsa ka talagsaon nga kahigayunan alang sa matag usa kanato nga mopalayo gikan sa atong mga sala ug moduol ngadto ni Kristo. Ang balaan nga pagpasaylo maoy usa sa pinakatam-is nga bunga sa ebanghelyo, nagkuha sa sala ug kasakit gikan sa atong mga kasingkasing ug pagpuli niini sa hingpit nga kalipay ug kalinaw sa tanlag” (“Paghinulsol … Aron Ako Moayo Kaninyo,” Ensign o Liahona, Nob. 2009, 40–41).
Dapita ang mga estudyante sa paghunahuna og higayon nga sila nakasinati sa pagpasaylo sa Ginoo. Hangyoa sila sa pagpamalandong kon unsay ilang hunahuna ug unsay ilang gibati mahitungod sa Manluluwas.
I-refer ngadto sa pangutana diha sa pisara. Hangyoa ang mga estudyante sa pagpasabut kon unsaon nila sa pagtubag kon ang usa ka tawo mangutana kanila, “Mapasaylo ba ko?”
Tapusa ang leksyon pinaagi sa pagpamatuod nga si Jesukristo adunay gahum sa pagpasaylo kanato kon kita mogamit sa hugot nga pagtuo diha Kaniya ug maghinulsol sa atong mga sala.
Scripture Mastery Review
Aron sa pagtabang sa mga estudyante sa pagribyu sa lima ka mga scripture mastery passage nga ila nang natun-an niini nga kurso, mahimo kang mohatag kanila og usa ka mubo nga eksamin. Ihatag ang importanteng mga pulong gikan sa seminary bookmark, ug hangyoa ang mga estudyante sa pagsulat sa katugma nga mga scripture reference. Tan-awa sa appendix niini nga manwal alang sa dugang nga mga ideya.
Komentaryo ug Background nga Impormasyon
Lucas 7:18–20. Nagduha-duha ba si Juan Bautista nga si Jesus mao ang Mesiyas?
Si Elder Bruce R. McConkie sa Korum sa Napulog Duha ka mga Apostoles mihatag og klaro nga tubag niini nga pangutana:
“Ang bisan unsa nga paghukom nga ang Bautista dili siguro o nagduda diha sa iyang kaugalingong hunahuna, mahitungod sa pagkatawo ug misyon sa Agalon, sa hingpit walay kapasikaran. Sa pagkatinuod, ang gipriso nga Elias ug ang mag-uuna sa atong Ginoo migamit niini nga paagi sa paghaylo sa iyang mga disipulo sa pagbiya kaniya ug sa pagsunod ni Jesus.
“Nahibalo si Juan kinsa si Jesus; ang Bautista wala magduhaduha sama sa usa ka bagakay nga gikusokuso sa hangin. … Kini nga buhat sa pagpadala sa iyang mga disipulo ngadto ni Jesus sa tinuod usa ka katapusan nga dakong pagpamatuod sa bahin ni Juan nga si Jesus mao ang Kordero sa Dios, tungod kay ang Bautista nahibalo nga ang iyang mga disipulo, personal nga nakakita sa Agalon ug nakadungog sa iyang mga pagtulun-an, dili makapugong apan sa pagsunod sa mas dakong kahayag” (Doctrinal New Testament Commentary, 3 vols. [1965–73], 1:261–62).
Si Juan Bautista nakasabut og importante nga kamatuoran nga si Presidente James E. Faust sa Unang Kapangulohan mipasabut og usab:
“Ang matag usa kanato kinahanglang makadawat sa atong kaugalingong pagsaksi kabahin ni Jesus isip ang Kristo. Dili nato kini madawat nga segunda mano gikan sa laing tawo” (“Usa ka Pagpamatuod kang Kristo, ” Ensign o Liahona, Mar. 2005, 3).
Lucas 7:20–22. Ngano nga ang Ginoo nagbuhat man og mga milagro?
Si Presidente Brigham Young mihulagway sa papel sa mga milagro diha sa buhat sa Ginoo:
“Ang mga milagro … mohupay sa mga Santos, ug molig-on ug mopamatuod sa hugot nga pagtuo niadtong kinsa nahigugma, nagtahud, ug nagserbisyo sa Dios” (Discourses of Brigham Young, sel. John A. Widtsoe (1954), 341.
Lucas 7:24–28. “Sa mga gianak og babaye, walay molabaw pa ka dako kay kang Juan”
Si Propeta Joseph Smith mipasabut nganong gikonsiderar ni Jesus si Juan Bautista nga labing bantugan nga propeta:
“Una. Gisaligan siya og usa ka balaan nga misyon sa pag-andam sa dalan nga mag-una sa Ginoo. Kinsa ang adunay ingon nga pagsalig nga gihatag nganha kaniya kaniadto o sukad? Walay usa ka tawo.
“Ikaduha. Gisaligan siya sa importante nga misyon, ug kini gikinahanglan diha sa iyang mga kamot, sa pagbunyag sa Anak sa Tawo. Kinsa ang nakabaton og dungog sa pagbuhat niana? Kinsa ang nakabaton og hilabihan ka dako nga pribilihiyo ug himaya? Kinsa ang migiya sa Anak sa Tawo ngadto sa katubigan sa bunyag, ug nakabaton sa pribilihiyo sa pagtan-aw sa Espiritu Santo nga nanaog sa porma sa usa ka salampati, o daw sa simbolo sa usa ka salampati, agig pagsaksi niana nga pagpahigayon? …
“Ikatulo. Si Juan, niana nga panahon, mao lamang ang legal nga tigdumala sa mga kalihokan sa gingharian nga naa na diha sa kalibutan, ug naghupot sa mga yawe sa gahum. Ang mga Judeo kinahanglang mosunod sa iyang mga panudlo o pagasilutan, pinaagi sa ilang kaugalingong balaod; ug si Kristo Mismo mituman sa tanan nga pagkamatarung diha sa pagkamasulundon sa balaod nga Iyang gihatag ni Moses didto sa bungtod, ug sa ingon mipalambo niini ug naghimo niini nga madungganon, kay sa paglaglag niini. Ang anak nga lalaki ni Zacarias nakigbisog sa mga yawe, sa gingharian, sa gahum, sa himaya gikan sa mga Judeo, pinaagi sa balaan nga pagdihog ug mando sa langit, ug niining tulo ka mga rason maoy nakapahimo kaniya nga labing bantugan nga propeta nga natawo sa usa ka babaye” (Mga Pagtulun-an sa mga Presidente sa Simbahan: Joseph Smith [2007], 96).
Lucas 7:37–50. Unsay atong nahibaloan mahitungod sa babaye?
Si Elder Bruce R. McConkie sa Korum sa Napulog Duha ka mga Apostoles misulat nga ang babaye nga gipasabut diha sa Lucas 2:37–50 miduol sa Manluluwas nga nakahinulsol na ug nagtinguha sa pagpakita sa iyang gugma. Nagpasabut sa gugma nga gipakita sa babaye, siya miingon, “Tanan kini mao ang buhat ug pagsimba sa usa ka relihiyuso ug matinud-anong babaye nga kanhi usa ka makasasala apan karon nalimpyohan na; kinsa karon gawasnon na gikan sa makalaglag nga gibug-aton sa daghang kalapasan; kinsa karon naglakaw sa bag-o nga kinabuhi tungod kaniya kansang mga tiil iya karon nga gihalokan ug kang kinsa siya mitugyan karon sa tanan niyang balaang pagtahud ug dinasig sa kataha nga paghigugma diin ang iyang kinatibuk-ang kalag adunay gahum sa pag-angkon” (The Mortal Messiah, 4 vols. [1979–81], 2:200).
Lucas 7:47–50. “Ang iyang daghan nga mga sala gipasaylo”
Si Elder Shayne M. Bowen sa Korum sa Seventy nangutana ug mitubag sa pangutana kon ang usa ka tawo nga nagtinguha og kapasayloan posibleng dili na mahimong makadawat niini pinaagi sa Pag-ula ni Jesukristo:
“Posible ba ang pagpabalik sa usa ka kinabuhi nga pinaagi sa kawalay pagtagad nga pagbiya nahimong labayanan sa basura nga mura og ang tawo dili na mapasaylo? O unsa kaha kadtong usa nga nagminatarung apan nakasala na usab og balik sa makadaghan nga gibati niyang dili na siya makalingkawas sa maong pagkabutang? O unsa kaha kadtong tawo nga nagbag-o na sa iyang kinabuhi apan dili lang gyud makapasaylo sa iyang kaugalingon? …
“Ang Pag-ula ni Jesukristo anaa alang sa matag usa kanato. Ang Iyang Pag-ula walay kinutuban. Alang kini sa matag usa, bisan kaninyo. Kini makalimpyo, makabawi, ug makabalaan bisan kaninyo. Mao kanay kahulugan sa walay kinutuban—tibuok, kompleto, tanan, walay katapusan” (“Ang Pag-ula Makalimpyo, Makabawi, ug Makabalaan sa Atong mga Kinabuhi,” Ensign o Liahona, Nob. 2006, 33–34).