Leksyon 54

Lucas 16

Pasiuna

Si Jesus mitudlo sa sambingay sa piniyalan nga malimbungon Ang mga Pariseo nakadungog sa mga pagtulun-an ni Jesus ug mibiay-biay Kaniya. Si Jesus dayon mibadlong sa mga Pariseo ug mitudlo kanila sa sambingay sa dato nga tawo ug si Lazaro.

Mga Sugyot alang sa Pagtudlo

Lucas 16:1–12

Nagtudlo si Jesus sa sambingay sa piniyalan nga malimbungon

Ikonsiderar ang pagdala sa klase og mga butang nga nagrepresentar sa kalibutanong mga bahandi ug gahum, sama sa kwarta, usa ka electronic device, diploma, dulaan nga sakyanan, o litrato sa usa ka balay.

Sugdi ang leksyon pinaagi sa pagpangutana:

• Unsa ang pipila ka mga butang nga kasagaran gitinguha og maayo sa mga tawo ug gipaningkamutan nga maangkon? (Kon nagdala ka og susama nga mga butang, ipakita kini samtang ang mga estudyante maghisgot niini. Kon dili, hangyoa ang usa ka estudyante sa paglista sa mga tubag sa mga sakop sa klase diha sa pisara.)

• Unsa man ang pipila sa mga bahandi nga gusto sa Langitnong Amahan nga atong tinguhaon? (Pagdapit og usa ka estudyante sa paglista diha sa pisara sa mga tubag sa mga sakop sa klase, nga tingali maglakip sa mahangturong mga pamilya, kalinaw, kalipay, ug celestial nga himaya. Sugoa ang estudyante sa pagsulat sa ulohan nga Mahangturon nga mga Bahandi ibabaw sa lista.)

Ipasabut nga kita makatagamtam sa pipila niining mahangturong mga bahandi niining kinabuhia. Hangyoa ang mga estudyante sa pagpamalandong kon asa nga mahangturong mga bahandi ang importante kaayo ngadto kanila. Dapita ang mga estudyante sa pagpangita og mga kamatuoran samtang sila nagtuon sa Lucas 16 nga makatabang kanila nga makaangkon og mahangturong mga bahandi.

Ipasabut nga human sa pagtudlo sa mga sambingay sa nawala nga karnero, nawala nga sinsilyo [drakma], ug nawala nga anak, ang Manluluwas mitudlo sa sambingay sa malimbungon nga piniyalan. Mahimo nimong ipasabut nga ang usa ka piniyalan mao ang usa ka tawo nga maoy nagdumala sa negosyo, kwarta, o kabtangan sa laing tawo.

Dapita ang usa ka estudyante sa pagbasa og kusog sa Lucas 16:1–2. Hangyoa ang klase sa pagsunod, nga mangita kon unsay nasayran sa dato nga tawo diha sa sambingay mahitungod sa iyang piniyalan.

• Unsa ang gibuhat sa piniyalan sa mga kabtangan sa dato nga tawo?

• Unsa man ang sangputanan sa pag-usik-usik sa piniyalan? (Mawagtangan siya og trabaho.)

I-summarize ang Lucas 16:3–7 pinaagi sa pagpasabut nga ang piniyalan nabalaka kon unsay iyang buhaton kon siya mawagtangan na sa iyang trabaho tungod kay iyang gibati nga dili niya kaya ang hagu nga trabaho ug maulaw kaayo nga magpakilimos. Siya mihimo og plano nga sa iyang pagtuo makahatag og mga oportunidad sa panarbaho diha sa ubang mga pamilya. Siya mibisita sa duha sa mga nakautang sa dato nga tawo ug gipaminosan og maayo ang ilang mga utang, diin siya naglaum nga makakuha og pabor kanila.

Dapita ang usa ka estudyante sa pagbasa og kusog sa Lucas 16:8. Hangyoa ang klase sa pagsunod, nga mangita kon unsa ang reaksyon sa dato nga tawo sa dihang iyang nasayran ang mga gibuhat sa iyang piniyalan. Ipasabut nga “ang mga anak niining kalibutana” mao ang mga tawo nga kalibutanon og panghunahuna ug nga ang “mga anak sa kahayag” mao ang mga sumusunod sa Dios, o mga tawo nga espirituhanon og panghunahuna.

• Unsa ang reaksyon sa dato nga tawo sa dihang iyang nasayran ang mga gibuhat sa iyang piniyalan? Unsa man ang gidayeg sa dato nga tawo? (Ang dato nga tawo midayeg sa kaigmat sa pinayalan aron makakuha og pabor gikan sa mga nakautang sa datu nga tawo. Wala siya modayeg sa pagkamalimbungon sa piniyalan.)

Hatagi ang mga estudyante og kopya sa mosunod nga pamahayag ni Elder James E. Talmage sa Korum sa Napulog Duha ka mga Apostoles: Dapita ang usa ka estudyante sa pagbasa og kusog sa pamahayag. Hangyoa ang klase sa pagsunod, nga mangita kon unsay gitudlo sa Manluluwas pinaagi sa sambingay sa malimbungon nga piniyalan.

“Ang katuyoan sa atong Ginoo mao ang pagpakita sa kalainan tali sa kamainampingon, kamanggihunahunaon, ug debosyon sa mga tawo nga okupado sa pangwarta nga mga kalihokan sa kalibutan, ug sa dili kaayo tinud-anay nga mga paagi sa kadaghanan kinsa nangangkon nga nagtinguha sa espirituhanong mga bahandi. …

“…Pagkat-on bisan gikan sa malimbungon ug dautan; kon sila mabinantayon kaayo sa pagsangkap alang sa bugtong umaabut nga ilang mahunahuna, unsa pa kaha kamo, kinsa nagtuo sa mahangturong umaabut, kinahanglang mangandam alang niana nga umaabut! … Sunda ang malimbungon nga piniyalan ug ang nagahigugma sa bahandi, dili sa ilang pagkadili matinuoron, pagkadalo [pagkahakog], ug pagkainut sa pagtigum og bahandi nga sa labing maayo niini lumalabay [temporaryo] lamang, apan sa ilang kasibut, pagpangandam daan, ug pagsangkap alang sa umaabut” (Jesus the Christ, 3rd ed. [1916], 463, 464).

• Unsa man ang gusto sa Manluluwas nga makat-unan sa Iyang mga disipulo gikan sa kalibutanon og hunahuna nga mga tawo sama sa malimbungon nga piniyalan?

Isulat sa pisara ang mosunod nga dili kompleto nga pamahayag: Kon maalamon kita nga mangandam alang sa atong mahangturong kaugmaon …

Dapita ang usa ka estudyante sa pagbasa og kusog sa Lucas 16:10–12. Hangyoa ang klase sa pagsunod, nga mangita kon unsay gisulti sa Manluluwas nga kinahanglan natong buhaton aron mapanalanginan og mahangturong mga bahandi. Ipasabut nga ang bahandi nagpasabut sa yutan-ong mga katigayunan, lakip ang kwarta, mga kabtangan, ug mga pakig-uban.

• Unsa kaha ang gipasabut nga mahimong “kasaligan sa gagmay kaayong mga butang” (bersikulo 10)? (Human makatubag ang mga estudyante, idugang ang mosunod sa mga pulong sa pisara: ug mogamit sa yutan-ong mga bahandi sa matarung nga paagi …)

Idirekta ang atensyon sa mga estudyante ngadto sa lista sa mahangturong mga bahandi diha sa pisara.

• Unsa ang naghimo niini nga “matuod nga bahandi” (bersikulo 11)?

Hangyoa ang mga estudyante sa pagkompleto sa pamahayag diha sa pisara aron momugna kini og usa ka baruganan kon unsaon nato nga makaangkon og mahangturong mga bahandi. (Ang mga estudyante kinahanglang mahibalo sa mosunod nga baruganan: Kon kita maalamon nga mangandam alang sa atong mahangturong kaugmaon ug mogamit sa yutan-ong mga bahandi sa matarung nga paagi, kita mapanalanginan og mahangturong mga bahandi.)

• Nganong lisud man usahay ang maalamon ug makugihong pagpangandam alang sa atong mahangturong kaugmaon?

• Unsaon nato sa paggamit ang yutan-ong mga katigayunan sa matarung nga paagi?

• Sa unsang paagi nga ang atong matarung nga paggamit sa yutan-ong mga bahandi nagpakita sa atong katakus nga masaligan sa mahangturong mga bahandi?

Ayoha pagdawat ang mga tubag sa mga estudyante

Siguroha nga maayo pagkadawat ang mga tubag sa mga estudyante, tingali pinaagi sa pagpasalamat kanila o pagkomento kabahin sa ilang mga tubag. Ang pagbuhat niini makatabang sa mga estudyante nga mobati nga imo silang gipaminaw ug nga ang ilang opinyon balido ug makatabang kanila nga mobati nga mas komportable sa pagpakigbahin og mga tubag, mga panabut, ug mga kasinatian sa umaabut.

Lucas 16:13–31

Si Jesus nagbadlong sa mga Pariseo ug nagtudlo kanila sa sambingay sa dato nga tawo ug si Lazaro.

Idirekta ang atensyon sa mga estudyante ngadto sa lista diha sa pisara (o, kon nagdala ka, ngadto sa mga butang nga nagrepresentar sa yutan-ong mga bahandi), ug hangyoa sila sa pagpamalandong kon sa unsang paagi ang pagkaibug sa yutan-ong mga bahandi makapugong nato sa pag-angkon sa mahangturong mga bahandi. Dapita ang mga estudyante sa pagpangita og usa ka tubag niini nga pangutana samtang sila magtuon sa Lucas 16:13–26.

I-summarize ang Lucas 16:13–14 pinaagi sa pagpasabut nga ang Manluluwas mitudlo nga “dili [kita] makaalagad sa Dios ug sa mga bahandi” (bersikulo 13). Ang mga Pariseo nakadungog sa mga pagtulun-an sa Manluluwas ug “nangyam-id” (bersikulo 14), o mibiaybiay, Kaniya. Hangyoa ang mga estudyante sa pagsiksik sa Lucas 16:14 alang sa pulong nga naghulagway sa mga Pariseo ug naghatag og usa ka pagpasabut kon nganong gibiay-biay nila ang Manluluwas tungod sa Iyang mga pagtulun-an.

• Gikan sa unsay inyong nakat-unan mahitungod sa mga Pariseo, unsa ang ilang gikaibgan? (Kalibutanong bahandi ug gahum [tan-awa sa Mateo 23:2–6, 14].)

• Ngano kaha nga ang pagkamaibugon sa mga Pariseo nakahimo kanila sa pagbiaybiay sa Manluluwas?

Ipasabut nga ang Hubad ni Joseph Smith sa Lucas 16:16–23 (sa Giya ngadto sa mga Kasulatan) naghatag og dugang nga panabut sa panaghisgot tali sa mga Pariseo ug sa Manluluwas. Dapita ang usa ka estudyante sa pagbasa og kusog sa mosunod nga summary niini nga paghubad:

Ang mga Pariseo nangangkon nga ang balaod ni Moises ug uban pang mapanagnaong kasulatan (ang Daang Tugon) maoy nagsilbing ilang balaod, ug busa sila misalikway kang Jesus isip ilang maghuhukom. Si Jesus mipasabut nga ang balaod ni Moises ug ang mga propeta nagpamatuod kaniya. Iyang gipangutana ang mga Pariseo tungod sa paglimud sa unsay nasulat na ug mibadlong kanila tungod sa “[p]agtuis sa matarung nga agianan” (Hubad ni Joseph Smith, Lucas 16:21). Aron sa pagtabang sa mga Pariseo, kansang mga kasingkasing nagtinguha sa kalibutanong mga bahandi ug gahum, nga makasabut sa ilang mga kinaiya ug sa mga sangputanan niini, ang Manluluwas mitandi kanila ngadto sa dato nga tawo diha sa sambingay nga narekord sa Lucas 16:19–31.

Paghangyo og tulo ka mga boluntaryo nga moapil sa usa ka drama nga magbasa. I-assign ang usa ka boluntaryo sa pagbasa sa mga pulong sa Manluluwas (Lucas 16:19–23), ang ikaduha nga boluntaryo sa pagbasa sa mga pulong sa dato nga tawo (Lucas 16:24, 27, 28, 30), ug ang ikatulo nga boluntaryo sa pagbasa sa mga pulong ni Abraham (Lucas 16:25, 26, 29, 31). Sugoa kini nga mga estudyante sa pagbasa og kusog sa ilang mga bahin diha sa Lucas 16:19–26. Hangyoa ang klase sa pagsunod, nga mangita kon unsay nasinati sa usa ka kabus nga tawo nga ginganlan og Lazaro ug sa usa ka dato nga tawo.

• Unsa ang kalainan sa mortal nga mga kinabuhi sa dato nga tawo ug ni Lazaro?

• Unsa ang kalainan sa sunod nilang mga kinabuhi human sa pagkamortal? (Tingali kinahanglan nimong ipasabut nga ang “sabakan ni Abraham” [bersikulo 22] nagrepresentar sa paraiso diha sa kalibutan sa espiritu ug ang “hades” [bersikulo 23] nagpasabut sa bilangguan sa espiritu [tan-awa sa Bible Dictionary sa LDS English version nga Biblia, “Abraham’s Bosom,” Giya ngadto sa mga Kasulatan, “Impyerno”].)

• Sa unsang paagi nga ang dato nga tawo napakyas sa matarung nga paggamit sa iyang yutan-ong mga bahandi?

Pahinumdumi ang mga estudyante nga ang dato nga tawo niini nga sambingay nagrepresentar sa maibugon nga mga Pariseo.

• Unsa ang atong makat-unan gikan niini nga sambingay mahitungod sa unsay mahitabo kon kita magmaibugon ug dili gamiton ang atong yutan-ong mga bahandi sa matarung nga paagi? (Human makatubag ang mga estudyante, isulat sa pisara ang mosunod nga baruganan: Kon kita magmaibugon ug dili mogamit sa atong yutan-ong mga bahandi sa matarung nga paagi, sa kadugayan atong masinati ang pag-antus ug pagmahay [tan-awa usab D&P 104:18].)

Aron sa pag-andam sa mga estudyante nga mahibalo og dugang nga kamatuoran gikan niini nga sambingay, dapita sila sa paghunahuna og usa ka tawo nga ilang gikabalak-an kinsa nagpili nga mopuyo nga masinupakon sa mga pagtulun-an sa Manluluwas.

• Unsa sa imong hunahuna ang makakombinser nianang tawhana sa paghinulsol ug pag-usab sa paagi sa iyang pagpuyo?

Dapita ang gi-assign nga mga estudyante sa pagbasa og kusog sa ilang mga bahin diha sa Lucas 16:27-31. Hangyoa ang klase sa pagsunod, nga mangita kon unsay gihangyo sa dato nga tawo.

• Unsa ang gusto sa dato nga tawo nga buhaton alang sa iyang lima ka mga igsoong lalaki? Ngano man?

• Unsa ang gituohan sa dato nga tawo nga mahitabo kon si Lazaro magpakita ngadto sa mga igsoong lalaki sa datu nga tawo?

Ipasabut nga ang dato nga tawo nagtuo nga ang iyang mga igsoong lalaki maghinulsol ug makabig ngadto sa kamatuoran kon si Lazaro magpakita ngadto kanila. Ang pagkakabig mao ang “pag-usab sa usa ka tawo sa mga tinuohan, kasingkasing, ug kinabuhi aron sa pagdawat ug pag-uyon sa kabubut-on sa Dios” (Giya ngadto sa mga Kasulatan, “Kinabig, Pagkakabig,” scriptures.lds.org).

• Sumala sa sambingay, nganong wala man gipadala ni Abraham si Lazaro ngadto sa mga igsoong lalaki sa dato nga tawo?

Ipasabut nga pinaagi sa paghisgut ni “Moises ug ang mga propeta” (Lucas 16:29, 31), ang Manluluwas mihisgut na usab sa mga kasulatan nga giangkon sa mga Pariseo nga ilang gituohan ug gisunod apan sa pagkatinuod gisalikway. Ipasabut nga usa ka tinuod nga tawo nga ginganlan og Lazaro sa wala madugay “[n]abanhaw gikan sa mga patay” (bersikulo 31) sa dihang ang Manluluwas mibuhi kaniya pag-usab (tan-awa sa Juan 11). Wala madugay, si Jesus nahimo nga ang Usa kinsa mibangon gikan sa mga patay sa dihang Siya nabanhaw. Hinoon, niining duha ka mga higayon, ang mga Pariseo ug ang uban misalikway sa ebidensya sa kabalaan sa Manluluwas ug wala maagni sa paghinulsol.

• Unsa nga kamatuoran kabahin sa pagkakabig ang atong makat-unan gikan sa unsay gitudlo ni Abraham ngadto sa dato nga tawo niini nga sambingay? (Ang mga estudyante mahimong moila og lain-laing mga pulong, apan siguroa nga mahibalo sila sa mosunod nga kamatuoran: Ang pagkakabig mahitabo pinaagi sa pagtuo ug pagsunod sa mga pulong sa mga propeta, dili pinaagi sa pagsaksi og mga milagro o pagkakita og mga anghel.)

• Ngano kaha nga ang pagkakabig mahitabo pinaagi sa pagtuo ug pagsunod sa mga pulong sa mga propeta imbis nga pinaagi sa pagsaksi og mga milagro o pagkakita og mga anghel.

• Unsaon nato pagtabang sa mga tawo nga motuo ug mosunod sa mga pulong sa mga propeta?

• Unsang piho nga mga pagtulun-an gikan sa mga propeta ang nakaimpluwensya sa inyong pagkakabig?

Dapita ang mga estudyante sa pagsulat sa ilang mga notebook sa klase o scripture study journal og mga paagi diin sila mas makatuo o maminaw sa piho nga mga pagtulun-an o sa tambag gikan sa mga propeta, aron sa paglig-on sa ilang pagkakabig. Awhaga ang mga estudyante sa paggamit sa unsay ilang gisulat.

Komentaryo ug Background nga Impormasyon

Lucas 16:9. “Pangita kamog mga higala alang sa inyong kaugalingon pinaagi sa malimbungon nga bahandi”

Ang paghimo og “mga higala alang sa inyong kaugalingon pinaagi sa malimbungon nga bahandi” nagpasabut sa paggamit sa kalibutanong mga kwarta, kabtangan, impluwensya, ug pakig-uban aron sa pagkab-ot sa matarung nga mga katuyoan. Ang Manluluwas mihatag niini nga tambag ngadto sa Iyang mga disipulo panahon sa Iyang mortal nga pangalagad ug ngadto sa mga Santos sa Ulahing mga Adlaw (tan-awa sa D&P 82:22). Si Presidente Joseph Fielding Smith mihulagway kon unsaon sa Santos sa Ulahing mga Adlaw sa paggamit niini nga tambag:

“Kini wala gituyo nga sa paghimo og mga higala sa ‘malimbungon nga bahandi’ nga ang mga kaigsoonan makig-ambit uban kanila sa ilang mga sala; sa pagdawat kanila diha sa ilang mga dughan, pakigminyo uban kanila ug magpakadili matarung uban kanila. Sila magpakabuhi nga ang kalinaw uban sa ilang mga kaaway masiguro. Sila kinahanglang tagdon nila nga mabination, magmahigalaon ngadto kanila kutob sa mahimo subay sa sakto ug mahiyason nga mga baruganan, apan dili gayud mamalikas uban kanila o makig-inom ug makighugoy-hugoy uban kanila. Kon ilang mapaminosan ang pagkamapihigon ug magpakita og kaandam nga makigsabut ug magpakita og mabination nga espiritu, kini makatabang sa pagpabiya kanila gikan sa ilang mga kalagot. Ang paghukom kinahanglang isalig sa Ginoo” (Church History and Modern Revelation, 2 vols. [1953], 1:323).

Isip mga disipulo ni Jesukristo, kita kinahanglan nga matinahuron ug mahigalaon ngadto sa uban. Sa pagbuhat niini, kita makapalapad sa atong pundok sa mga kaila ug makat-on gikan sa uban. Pinaagi sa tinud-anay nga inter-aksyon, kadtong atong mga makauban makahimo og pabor nga mga opinyon ngari kanato ug sa Simbahan sa Ginoo. Posible gani nga sila modepensa kanato ug sa Simbahan kon ang panginahanglan motumaw.

Lucas 16:1–12. Pagkat-on gikan sa sambingay sa piniyalan nga malimbungon

Alang sa dugang nga mga leksyon nga atong makat-unan gikan sa sambingay sa piniyalan nga malimbungon, tan-awa si Brother Tsung-Ting Yang, kanhi Area Seventy, “Parables of Jesus: The Unjust Steward,” Ensign, Hulyo 2003, 28–31.

Lucas 16:19–26. Mga resulta sa pagbaliwala sa mga panginahanglan sa uban

Ang dato nga tawo nagpuyo sa kaharuhay samtang si Lazaro nag-antus sa kakabus. Bisan kon walay piho nga sala sa dato nga tawo ang gihisgutan niini nga sambingay, ang deskripsyon ni Lazaro, lakip ang kamatuoran nga siya “gipalubog [sa guwa sa pultahan sa dato nga tawo]” (Lucas 16:20), nagpasabut nga ang dato nga tawo mibalewala sa pagtubag sa pangamuyo ni Lazaro alang sa kahupayan. Si Elder Jeffrey R. Holland sa Korum sa Napulog Duha ka mga Apostoles mipahinumdom kanato nga kitang tanan mga makililimos alang sa kalooy sa Dios ug mitudlo kabahin sa atong responsibilidad sa pagtabang sa uban nga adunay temporal nga mga panginahanglan. Siya mihimo sa mosunod nga saad kon sa unsang paagi kita masayud sa matarung nga paagi sa paghatag niini nga tabang:

“[Ang Dios] motabang ug mogiya kaninyo sa inyong manggiloy-ong mga buhat sa pagkadisipulo kon mahunahunaon ug mainampoon ug mangita kamo og paagi sa pagsunod sa sugo nga balik-balik Niyang gihatag kanato” (“Dili ba Kitang Tanan Makililimos?” Ensign o Liahona, Nob. 2014, 41).

Lucas 16:19–31. Pagkorihir sa mga dili makiangayon sa mortal nga kinabuhi

Diha sa sambingay sa dato nga tawo ug si Lazaro, ang dato nga tawo gisultihan, “Sa buhi ka pa nakadawat ikaw sa mga maayo mong butang, ug si Lazaro usab nakadawat sa dili mga maayong butang; apan siya ginalipay karon diri, samtang anaa ikaw diha sa kasakit” (Lucas 16:25). Ang lain-laing mga kasinatian sa dato nga tawo ug ni Lazaro sa pagka-mortal ug sa kalibutan sa espiritu naghulagway sa gahum sa Pag-ula sa pag-usab o pagkorihir sa kawalay kaangayan ug inhustisya nga nasinati niini nga kinabuhi. Tungod sa Pag-ula ni Jesukristo, ang hustisya mopabor sa, ug higala sa, mga matarung.

Si Elder D. Todd Christofferson sa Korum sa Napulog Duha ka mga Apostoles mitudlo:

“Ang Manluluwas mihimo sa tanang butang nga matarung. Walay inhustisya sa mortalidad nga permanente, bisan ang kamatayon, kay Siya mipahiuli sa kinabuhi pag-usab. Walay mga kasakit, kakulangan, pagluib, o pang-abuso nga dili kabayran sa katapusan tungod sa Iyang walay kinutuban nga kaangayan ug kalooy” (“Ang Pagkabanhaw ni Jesukristo,” Ensign o Liahona, Mayo 2014, 112).

Lucas 16:19–31. Ang kalibutan sa espiritu sa sambingay sa dato nga tawo ug ni Lazaro.

“Ang sambingay sa dato nga tawo ug ni Lazaro naghisgut sa duha ka lain-laing mga kahimtang sa kalibutan sa espiritu human sa pagkamortal: ang ‘sabakan ni Abraham’ ug ang ‘impyerno’ (tan-awa sa Lucas 16:22–23). Ang nag-una gihulagway isip usa ka dapit sa paghupay kauban ang mga matinud-anon (nga ang labing maayong ehemplo mao ang amahan nga si Abraham), ang naulahi isip usa ka dapit sa kasakit. … Tali niining puy-anan sa mga matinud-anon ug ‘impyerno’ dihay ‘gipahimutang [nga] usa ka dakong bung-aw’ (Lucas 16:26), nga nakapugong sa pagbinayloay tali sa duha. …

“… Sa wala pa ang kamatayon ni Kristo, ang mga espiritu gikan sa paraiso dili makabisita niadtong anaa sa bilanggoan sa espiritu. Ang Iyang pagpangalagad sa kalibutan sa espiritu nagsumpay sa paraiso ug sa bilangguan sa espiritu, naghimong posible alang sa mga espiritu sa bilanggoan nga makadawat sa mensahe sa ebanghelyo gikan sa awtorisadong mga ministro nga gipadala gikan sa paraiso (tan-awa sa D&P 138:18–37; Juan 5:25–29; 1 Pedro 3:18–21; 4:6)” (New Testament Student Manual [manwal sa Church Educational System, 2014], 173). Alang sa usa ka visual nga representasyon sa bung-aw tali niining duha ka mga kahimtang nga nasumpay ni Kristo, tan-awa sa komentaryo alang sa Lucas 16:19–31 sa New Testament Student Manual.

Hubad ni Joseph Smith, Lucas 16:16–23 (sa Giya ngadto sa mga Kasulatan). Ang kadautan sa mga Pariseo

Sumala sa narekord diha sa Hubad ni Joseph Smith, Lucas 16:16–23, si Jesus mibadlong sa mga Pariseo tungod sa “[p]agtuis sa matarung nga agianan” (Hubad ni Joseph Smith, Lucas 16:21 [sa Giya ngadto sa mga Kasulatan]). Usa ka paagi nga gibuhat kini sa mga Pariseo mao ang pagpakaaron-ingnon nga nagsunod sa balaod ni Moises ug uban pang mga kasulatan samtang sila sa tinuod naggamit niini alang sa dautan nga mga katuyoan. Si Jesus mipasabut sa usa ka ehemplo niini dihang siya mitawag sa mga Pariseo nga mga mananapaw, diin sila masuk-anong mitubag pinaagi sa pagbiay-biay Kaniya pag-usab. Si Jesus dayon mihulagway sa dili matarung nga pag-uyon sa mga Pariseo sa diborsyo alang sa mga rason gawas sa pakighilawas sa uban, nga ilang gisulayan sa pagpangatarungan pinaagi sa pagtuis sa usa ka balaod nga gihatag ni Moises (tan-awa usab sa Mateo 19:3–9). Ang Manluluwas mipahayag usab nga diha sa ilang mga kasingkasing kini nga mga tawo wala gayud motuo sa Dios.

Sa tibuok Niyang pagpangalagad, gibutyag ni Jesus ang mga pang-abuso sa mga Pariseo ug ang ilang tinuis nga interpretasyon sa balaod ni Moises ug uban pang mga pagtulun-an sa karaang mga propeta. Nahimo siyang hulga sa sosyal ug politikanhung gahum nga naangkon sa mga Pariseo pinaagi sa ilang pagkadautan. Tungod niini, daghang mga Pariseo ang nagtinguha nga mamatay si Jesus.