Leksyon 59: Lucas 24

Leksyon 59

Lucas 24

Pasiuna

Sa ikatulong adlaw human sa kamatayon ni Jesukristo, ang mga anghel didto sa lubnganan mipahibalo sa Iyang Pagkabanhaw ngadto sa grupo sa kababayen-an. Pagkadungog sa report sa mga babaye, pipila sa mga disipulo nagduda sa posibilidad sa Pagkabanhaw sa Manluluwas. Duha ka mga disipulo mibiyahe ngadto sa Emaus ug, wala makaila sa nabanhaw nga Ginoo, nakig-istorya Kaniya samtang naglakaw. Si Jesus sa wala madugay mipakita ngadto sa Iyang mga Apostoles ug sa uban, mipakita kanila sa Iyang nabanhaw nga lawas, ug misugo kanila sa pagsangyaw sa paghinulsol ug mahimong Iyang mga saksi.

Mga Sugyot alang sa Pagtudlo

Lucas 24:1–12

Mga anghel nagpahibalo ngadto sa usa ka grupo sa kababayen-an nga si Jesus nabanhaw

Ipasalida ang usa ka bahin sa video nga “Jesus Is Laid in a Tomb” gikan sa The Life of Jesus Christ Bible Videos, mohunong sa wala pa mamulong ang mga anghel ngadto sa mga babaye (time code 0:00–2:27). Kini nga video anaa sa LDS.org.

Kon dili ka makapasalida sa video, dapita ang mga estudyante sa paghunahuna nga didto sila sa lubnganan sa dihang si Jesus gibutang didto ug nakakita sa bato nga giligid sa pag-ali sa ganghaan. Hangyoa sila sa paghunahuna sa posible nilang mga hunahuna ug mga pagbati didto. Dapita ang usa ka estudyante sa pagbasa og kusog sa Lucas 24:1–4. Hangyoa ang klase sa pagsunod, nga mangita kon unsay nadiskubrehan sa mga babaye sa dihang mibalik sila sa lubnganan paglabay sa tulo ka adlaw.

Human mapasalida ang video o mabasa ang mga bersikulo 1–4, pangutana:

Unsa ang nadiskubrehan sa mga babaye sa lubnganan?
Unsa kaha ang inyong reaksyon kon inyong nakita ang mga anghel nga nagbarug sa naabli nga lubnganan?

Dapita ang usa ka estudyante sa pagbasa og kusog sa Lucas 24:5–8. Hangyoa ang klase sa pagsunod, nga mangita kon unsay gisulti sa mga anghel ngadto sa mga babaye. Dapita ang mga estudyante nga moreport sa unsay ilang nakat-unan.

I-summarize ang Lucas 24:9–10 pinaagi sa pagpasabut nga ang mga babaye mibiya sa lubnganan ug nanugid ngadto sa mga disipulo sa unsay ilang nakita ug nadunggan.

Dapita ang usa ka estudyante sa pagbasa og kusog sa Lucas 24:11, ug hangyoa ang klase sa pagpangita sa reaksyon sa mga Apostoles ngadto sa mga pulong sa mga babaye. Dapita ang mga estudyante nga moreport sa unsay ilang nakat-unan.

Ipasabut nga human makadungog sa report sa mga babaye, si Pedro ug Juan midagan paingon sa lubnganan ug nakita nga wala na didto ang lawas ni Jesus (tan-awa sa Lucas 24:12; Juan 20:1–4).

Lucas 24:13–32

Ang nabanhaw nga Ginoo nakigsulti sa duha ka mga disipulo diha sa dalan padulong sa Emaus

Hangyoa ang mga estudyante sa pagpamalandong og usa ka panahon sa dihang sila, sama sa mga disipulo niini nga istorya, nanlimbasug sa pagtuo og usa ka konsepto sa ebanghelyo.

Ipasabut nga sa Lucas 24:13 atong makat-unan nga duha ka mga disipulo mibiya sa Jerusalem “sa maong adlaw,” milakaw og mga 6–7.5 ka milya (10–12 ka kilometro) “paingon sa usa ka balangay nga ginganlag Emaus.” Ang pagtuon sa ilang kasinatian diha sa dalan sa Emaus makatabang kanato nga masayud unsaon sa paglig-on sa atong mga pagpamatuod kabahin ni Jesukristo ug sa Iyang ebanghelyo.

Dapita ang usa ka estudyante sa pagbasa og kusog sa Lucas 24:14–17, ug hangyoa ang klase sa pagpangita kon kinsa ang miapil sa duha ka mga disipulo samtang sila naglakaw.

Kinsa ang mikuyog sa mga disipulo samtang mibiyahe sila?
Nganong wala man makaila ang mga disipulo kang Jesus? (Ipasabut nga ang pulong nahipugngan [bersikulo 16] nagpasabut nga nasanta o natabunan.)

Ipasalida ang video nga “Christ Appears on the Road to Emmaus” (3:32) gikan sa The Life of Jesus Christ Bible Videos, nga anaa sa LDS.org. Hangyoa ang mga estudyante sa pagtan-aw kon unsa ang nakat-unan sa mga disipulo gikan ni Jesus samtang naglakaw sila uban Kaniya nga wala makaila kon kinsa Siya. Sa dili pa ipasalida ang video, ipasabut nga ang panag-istorya diha sa video naggikan sa Lucas 24:17–33 aron ang mga estudyante makasunod diha sa mga kasulatan kon gusto nila. (Kon dili ka makapasalida sa video, dapita ang mga estudyante sa pagpuli-puli sa pagbasa og kusog gikan niini nga mga bersikulo.)

Ipasabut nga niini nga video, wala nato madungog kon unsay gitudlo ni Jesus sa mga disipulo samtang sila nanglakaw. Dapita ang usa ka estudyante sa pagbasa og kusog sa Lucas 24:27, ug hangyoa ang klase sa pagpangita kon unsa ang gitudlo ni Jesus sa mga disipulo.

Unsa ang gitudlo ni Jesus sa mga disipulo? Unsa nga himan ang Iyang gigamit sa pagtudlo kabahin sa iyang Kaugalingon?
Sumala sa Lucas 24:32, sa unsang paagi nga ang mga pagtulun-an sa Manluluwas gikan sa mga kasulatan nakaapekto sa duha ka mga disipulo?
Unsay gipasabut nga ang mga “kasingkasing [sa mga disipulo] nagdilaab man sa sulod” kanila? (Ang Espiritu Santo mipamatuod nga ang mga pagtulun-an mahitungod ni Jesus diha sa mga kasulatan tinuod.)

Dapita ang mga estudyante sa pagpamalandong kon unsa ang nakat-unan sa mga disipulo gikan sa paggamit ni Jesus sa mga kasulatan sa pagtudlo kanila imbis nga yanong magpaila kon kinsa Siya. Mahimo ka nga mohangyo og pipila ka mga estudyante sa pagpakigbahin sa ilang mga hunahuna.

Unsa man ang atong makat-unan gikan niini nga mga bersikulo kabahin sa mga epekto sa atong kaugalingong pagtuo sa kasulatan? (Human makatubag ang mga estudyante, isulat sa pisara ang mosunod nga baruganan: Samtang magtuon kita sa mga kasulatan, kita nagdapit sa Espiritu Santo sa pagtudlo kanato kabahin ni Jesukristo.)
Gawas sa pagdilaab diha sa atong mga kasingkasing, unsaon pa ninyo paghulagway sa unsay mahimo natong masinati samtang ang Espiritu Santo nagpamatuod kabahin ni Jesukristo?

Hangyoa ang mga estudyante sa pagpangita og usa ka kasulatan nga nakatabang kanila nga mobati sa Espiritu Santo nga nagtudlo kanila mahitungod ni Jesukristo. Dapita sila sa pagpakigbahin sa ilang mga kasulatan ug sa mga epekto sa unsay ilang gibati. Mahimo ka usab nga mopakigbahin og usa ka kasulatan nga nakatabang kanimo sa personal nga paagi.

Pahinumdumi ang mga estudyante nga bisan tuod importante ang pagbasa sa Bag-ong Tugon alang sa seminary credit, mas importante ang pagtuon sa kasulatan sa paagi nga ang Espiritu Santo makalig-on sa ilang mga pagpamatuod kabahin sa Manluluwas.

Panghatag og kopya sa usa ka bookmark nga naglakip sa mosunod nga pamahayag ni Elder D. Todd Christofferson sa Korum sa Napulog Duha ka mga Apostoles (o dapita ang mga estudyante sa pagsulat sa pamahayag sa usa ka blanko nga bookmark):

Manwal sa Seminary Teacher sa Bag-ong Tugon—Leksyon 59

“Ang sentrong katuyoan sa tanang kasulatan mao ang pagbusog sa atong mga kalag uban sa hugot nga pagtuo diha sa Dios nga Amahan ug sa Iyang Anak, si Jesukristo. …

“… Ang hugot nga pagtuo moabut pinaagi sa pagsaksi sa Balaang Espiritu sa atong mga kalag, Espiritu ngadto sa espiritu, samtang kita maminaw o magbasa sa pulong sa Dios. Ug ang hugot nga pagtuo mohingkod samtang magpadayon kita sa pagbusog sa pulong. …

“… Tun-i ang mga kasulatan sa mabinantayon nga paagi, nga may katuyoan. Hinuktuki ug pag-ampo niini. Ang mga kasulatan mga pagpadayag, ug kini modala og dugang pagpadayag” (D. Todd Christofferson, “Ang Panalangin sa Kasulatan,” Ensign o Liahona, Mayo 2010, 34, 35).

Dapita ang usa ka estudyante sa pagbasa og kusog sa pamahayag ni Elder Christofferson. Dapita ang klase sa pagsunod, nga mangita og mga paagi diin ilang mapalambo ang ilang pagtuon sa kasulatan.

Dapita ang mga estudyante sa paghimo og tumong sa pagtuon sa ilang mga kasulatan sa paagi nga nagdapit sa Espiritu Santo nga mapausbaw ang ilang hugot nga pagtuo ug kahibalo kabahin ni Jesukristo. Mahimo kang mosugyot nga isulat nila kini nga tumong sa luyo sa bookmark aron magamit nila kini isip pahinumdom atol sa ilang pagtuon sa kasulatan.

Lucas 24:33–53

Si Jesus nagpakita ngadto sa Iyang mga disipulo ug nagpakita kanila sa Iyang nabanhaw nga lawas

Pagdapit og duha ka mga estudyante sa pagdala sa ilang mga kasulatan ngadto sa atubangan sa klase aron motabang sa pagdrama-drama og usa ka sitwasyon nga nagpakita sa mga misyonaryo nga nagpadulong sa pultahan sa usa ka balay. Sugoa sila sa pagpanuktok. Pagpakaaron-ingnon nga nag-abli sa pultahan ug abiabiha sila. Sultihi sila sa pagpaila sa ilang mga kaugalingon. Human sila mobuhat niini, pagsulti og sama sa mosunod:

“Duna koy pangutana. Daghang mga tawo nga akong kaila dili motuo nga adunay kinabuhi human sa kamatayon. Ang uban kanila nag-ingon nga nagatuo sila kang Jesukristo apan wala motuo nga Siya nabanhaw uban sa usa ka pisikal nga lawas. Sila nag-ingon nga Siya padayon nga nabuhi isip usa lamang ka espiritu. Unsay inyong gituohan kabahin sa Pagkabanhaw ni Jesukristo?”

Hatagi ang duha ka mga estudyante og panahon sa pagtubag sa pangutana.

Ipasabut nga ang Lucas 24:36–39 usa ka scripture mastery passage ug makatabang sa pagtudlo kabahin sa literal nga Pagkabanhaw ni Jesukristo. Hatagi og kinatibuk-ang kahulugan kini nga tudling pinaagi sa pagpasabut nga ang mga disipulo nga kauban ni Jesus diha sa dalan sa Emaus mibalik dayon ngadto sa Jerusalem ug nanugid sa ilang mga kasinatian ngadto sa mga Apostoles ug sa ubang mga disipulo (tan-awa sa Lucas 24:33–35). Samtang sila nag-istoryahanay, mipakita ang Manluluwas (tan-awa sa bersikulo 36).

Dapita ang usa sa mga estudyante nga mitabang sa pagdrama-drama nga basahon og kusog ang Lucas 24:36–39. Hangyoa ang klase sa pagsunod, nga mangita og ebidensya nga si Jesus literal nga nabanhaw ug adunay lawas nga unod ug bukog.

Unsa man ang pagdapit ni Jesus nga buhaton sa Iyang mga disipulo aron makatabang kanila sa pagsabut nga Siya dili lamang usa ka espiritu apan adunay usa ka pisikal nga lawas? (Ikonsiderar ang pagpakita sa litrato nga Si Jesus Mipakita sa Iyang mga Samad [Libro sa mga Hulagway sa Ebanghelyo (2009), nu. 60; tan-awa usab sa LDS.org].)
Unsa kaha ang inyong bation kon anaa kamo sa diha nga si Kristo mipakita sa Iyang mga disipulo?

Pasalamati ang mga estudyante nga mitabang sa pagdrama-drama, ug hangyoa sila sa paglingkod. Dapita ang usa ka estudyante sa pagbasa og kusog sa Lucas 24:40–43. Hangyoa ang klase sa pagsunod, nga mangita kon unsa pa ang gibuhat ni Jesus sa pagpakita nga siya adunay mahikap (o pisikal) nga nabanhaw nga lawas.

Unsa pa man ang gihimo sa Manluluwas aron sa pagpakita nga Siya adunay usa ka nabanhaw nga lawas?
Unsa nga mga doktrina ang atong makat-unan gikan niini nga mga bersikulo? (Ang mga estudyante mahimong moila og lain-laing mga doktrina, apan siguroa nga mahatagan og gibug-aton nga si Jesukristo adunay nabanhaw nga lawas nga unod ug bukog. Isulat kini nga doktrina diha sa pisara.)
Nganong importante man nga masabtan ug tuohan kini nga kamatuoran?

Dapita ang usa ka estudyante sa pagbasa og kusog sa mosunod nga pamahayag:

“Pinaagi sa Pagtubos ni Jesukristo, ang tanang mga tawo mabanhaw—maluwas gikan sa pisikal nga kamatayon (tan-awa sa 1 Mga Taga-Corinto 15:22). Ang pagkabanhaw mao ang panaghiusa og balik sa espiritu uban sa lawas diha sa hingpit, imortal nga kahimtang, dili na mahimo nga maulipon sa sakit o kamatayon (tan-awa sa Alma 11:42–45). …

“Ang pagbaton og pagsabut ug pagpamatuod sa pagkabanhaw ang makahatag kanimo og paglaum ug panan-awon samtang ikaw nakasinati sa mga hagit, mga pagsulay, ug mga kalampusan sa kinabuhi. Ikaw makakaplag og kahupayan diha sa kasiguroan nga ang Manluluwas buhi ug nga pinaagi sa Iyang Pagtubos, ‘siya mibugto sa mga higot sa kamatayon, aron ang lubnganan walay kadaugan, ug aron ang kahapdos sa kamatayon kinahanglan lamyon diha sa mga paglaum sa himaya’ (Alma 22:14)” (Matinud-anon sa Tinuhoan: Usa ka Pakisayran sa Ebanghelyo (2004), 136, 137).

Unsa ang pipila ka mga ehemplo sa mga pagsulay nga ang paglaum sa atong kaugalingong pagkabanhaw makatabang kanato nga makalahutay?

Hangyoa ang pipila ka mga estudyante sa pagpamatuod kabahin sa Pagkabanhaw sa Manluluwas ug sa pagpasabut nganong ang doktrina sa Pagkabanhaw importante ngadto kanila.

Dapita ang usa ka estudyante sa pagbasa og kusog sa Lucas 24:44–53. Hangyoa ang klase sa pagpaminaw sa mga pulong sa Manluluwas nga daw sila apil sa pundok sa mga disipulo nga uban Kaniya ug sa pagkonsiderar asa nga mga pagtulun-an ang tingali labing makahuluganon alang kanila. Pagdapit og pipila ka mga estudyante sa pagpakigbahin sa ilang mga hunahuna kabahin sa mga pagtulun-an niini nga mga bersikulo.

Tapusa pinaagi sa pagpamatuod sa mga kamatuoran nga inyong gihisgutan.

Scripture Mastery—Lucas 24:36–39

Aron sa pagtabang sa mga estudyante nga makasag-ulo sa Lucas 24:36–39, bahina ang klase ngadto sa upat ka mga grupo. Pag-assign og usa ka lahi nga bersikulo gikan niini nga mga bersikulo ngadto sa matag grupo, ug sugoa ang mga estudyante sa matag grupo sa pagtinabangay aron sa pagsag-ulo sa gi-assign kanila nga bersikulo. Human sa pipila ka minutos, hangyoa ang matag grupo sa pag-recite sa gi-assign kanila nga bersikulo sumala sa han-ay sa mga bersikulo. Mahimo nimong dapiton ang mga estudyante sa pag-recite sa ilang mga bersikulo sa mosunod nga pipila ka mga klase hangtud nga ang mga bersikulo mahimo na nga pamilyar sa tanan.

Komentaryo ug Background nga Impormasyon

Lucas 24:11. “Sila wala nila tuohi”

Si Lucas nagpasabut nga lisud kaayo alang sa onse ka mga Apostoles nga tuohan ang mga babaye kinsa mipamatuod nga si Jesus nabanhaw gikan sa lubnganan. Bisan og adunay mga indibidwal nga temporaryong naulian gikan sa kamatayon apan sa katapusan mamatay pag-usab isip mga mortal, si Jesukristo mao ang unang tawo nga nabanhaw. Si Presidente Gordon B. Hinckley mipasabut:

“Wala pa gayud kini mahitabo sukad. Kamatayon lamang nga walay paglaum ang anaa. Karon aduna nay mahangturong kinabuhi. Usa ka Dios lamang ang makabuhat niini. Ang Pagkabanhaw ni Jesukristo mao ang dako nga panapos nga panghitabo sa Iyang kinabuhi ug misyon. Kini ang kinatas-an nga nakab-ut sa Pag-ula. Ang sakripisyo sa Iyang kinabuhi alang sa tanan nga katawhan dili makompleto kon wala ang Iyang pagbangon gikan sa lubnganan, uban sa kasiguroan sa Pagkabanhaw alang sa tanan nga nakapuyo sa yuta.

“Sa tanang mga kadaugan sa kasaysayan sa kalibutan, walay laing labaw ka talagsaon, walay laing labaw ka malukpanon sa mga epekto niini, walay labaw ka mahangturon sa mga sangputanan niini isip kadaugan sa gilansang nga Ginoo, kinsa mibangon gikan sa lubnganan nianang unang buntag sa Pagkabanhaw.

“Kadtong mga saksi niana nga hitabo, tanan nga nakakita ug nakadungog ug nakigsulti sa Nabanhaw nga Ginoo, mipamatuod sa katinuod niining labing mahinungdanon sa tanan nga mga milagro. Ang Iyang mga sumusunod sa paglabay sa mga siglo nabuhi ug namatay sa pagproklamar sa kamatuoran niining langitnong buhat.

“Ngadto niining tanan among idugang ang among pagpamatuod nga Siya nga namatay sa krus sa Kalbaryo mibangon pag-usab sa talagsaong katahum isip ang Anak sa Dios, ang Tiglalang sa kinabuhi ug kamatayon” (“Linain nga mga Saksi ni Kristo,” Ensign, Abr. 2001, 15, o Liahona, Abr. 2001, 16–17).

Lucas 24:36–43. “Ang espiritu walay unod ug mga bukog ingon sa inyong nakita nga ania kanako”

Si Elder Tad R. Callister, kinsa miserbisyo sa Kapangulohan sa Seventy, miingon sa mosunod kabahin sa sayop nga ideya nga ang Pagkabanhaw sa Manluluwas temporaryo lang:

“Human sa pagkabanhaw sa Manluluwas, Siya mipakita ngadto sa Iyang mga disipulo ug miingon, ‘Hikapa ninyo ako ug tan-awa; kay ang espiritu walay unod ug mga bukog, ingon sa inyong nakita nga ania kanako’ (Lucas 24:39). Ang uban misugyot nga kini usa ka temporaryong pisikal nga pagpakita ug nga sa dihang Siya misaka sa langit Siya mitangtang sa Iyang lawas ug mibalik sa Iyang pagka-espiritu. Apan ang mga kasulatan nagsulti kanato nga kadto dili posible. Si Pablo mitudlo, “Kay nahibalo kita nga si Kristo nabanhaw gikan sa mga patay ug nga dili na gayud siya mamatay; ang kamatayon wala nay kagahum batok kaniya” (Mga Taga-Roma 6:9). Nga sa ato pa, sa dihang si Kristo nabanhaw, ang Iyang lawas dili na gayud mahimulag pag-usab gikan sa Iyang espiritu, kon dili, Siya mamatay pa, ang mao lamang hinungdan nga si Pablo miingon nga dili mahimo human sa Iyang Pagkabanhaw” (“Joseph Smith—Propeta sa Pagpahiuli,” Ensign o Liahona, Nob. 2009, 35).