Marcos 4–9 (Unit 8)

Materyal sa Pagpangandam alang sa Magtutudlo sa Home-Study

Summary sa mga Leksyon sa Daily Home-Study

Ang mosunod nga summary sa mga panghitabo, doktrina, ug mga baruganan nga nakat-unan sa inyong mga estudyante samtang sila nagtuon sa Marcos 4–9 (unit 8) wala gitumong nga itudlo isip kabahin sa inyong leksyon. Ang leksyon nga imong gitudlo nakatutok lamang sa pipila niini nga mga doktrina ug mga baruganan. Sunda ang mga aghat sa Espiritu Santo samtang ikonsiderar nimo ang mga panginahanglan sa imong mga estudyante.

Day 1 (Marcos 4–5)

Ang mga estudyante nakat-on nga kon magtinguha kita sa tabang sa Ginoo sa mga panahon sa kasamok o kahadlok, Siya makahatag kanato og kalinaw. Sila usab nakat-on nga kon kita makasinati sa gahum sa Manluluwas sa atong kinabuhi, kita makapamatuod ngadto sa uban sa Iyang mga panalangin ug kapuangod. Gikan sa mga istorya sa anak nga babaye ni Jairo ug sa babaye sa gitalinug-an, ang mga estudyante nakat-un nga kon kita mopakita sa atong pagtuo kang Jesukristo pinaagi sa atong mga paningkamot sa pagduol ngadto Kaniya, Siya makaayo kanato ug nga ang paggamit sa hugot nga pagtuo diha ni Jesukristo nagkinahanglan kanato nga magpadayon sa pagtuo Kaniya bisan sa mga panahon sa pagduha-duha.

Day 2 (Marcos 6–8)

Gikan sa milagro sa pagpakaon sa sobra sa 5,000 ka mga tawo, ang mga estudyante nakat-on nga kon kita mohalad sa Manluluwas sa tanan nga anaa kanato, Siya makapalambo sa atong halad aron matuman ang Iyang mga katuyoan. Ang mga estudyante nakat-on usab nga makasunod kita sa ehemplo sa Manluluwas pinaagi sa pagtan-aw sa mga panginahanglan sa uban ug dayon motabang sa pagtubag niadto nga mga panginahanglan.

Day 3 (Marcos 9:1–29)

Gikan sa istorya ni Jesus nga nagpagula sa dautang espiritu gikan sa usa ka batang lalaki, ang mga estudyante nakat-on nga kon kita motuo ni Jesukristo, tanan nga mga butang mahimong posible alang kanato. Ang ubang mga baruganan gikan niini nga leksyon naglakip sa mosunod: Kon kita mopadayon sa unsay atong gituohan ug magtinguha sa tabang sa Ginoo, Siya motabang kanato sa paglig-on sa atong hugot nga pagtuo. Kita makapalambo sa atong hugot nga pagtuo kang Jesukristo pinaagi sa pag-ampo ug pagpuasa.

Day 4 (Marcos 9:30–50)

Samtang ang mga estudyante nagtuon sa Marcos 9:30–50, sila nakat-on nga kon kita moimpluwensya sa mga katawhan kinsa nagtuo ni Jesukristo nga makasala, kita adunay tulubagon sa atubangan sa Dios. Gikan sa mga pagtulun-an sa Manluluwas niini nga mga bersikulo, ang mga estudyante nakat-on nga mas maayo nga ipalayo ang atong mga kaugalingon gikan sa dili matarung nga mga impluwensya kay sa mahilayo sa Dios sa katapusan.

Pasiuna

Kini nga leksyon makatabang sa mga estudyante nga makasabut nga ang pagtinguha sa pagpahimuot sa uban imbis sa pagbuhat sa unsay atong nasayran nga matarung mopadulong ngadto sa sayop nga mga pagpili, kagul-anan, ug pagbasol.

Mga Sugyot alang sa Pagtudlo

Marcos 6:1–29

Si Jesus gisalikway sa Nazaret ug mipadala sa Napulog Duha ka mga Apostoles; gisaysay ang kamatayon ni Juan Bautista

Sugdi ang klase pinaagi sa pagdapit sa mga estudyante sa paghunahuna sa milabay nga higayon nga sila mibati og pagpamugos sa pagbuhat og butang nga sila nasayud nga dili matarung.

Isulat sa pisara ang mosunod nga pamahayag (kini nga pamahayag makita diha sa “Making the Right Choices,” Ensign, Nob. 1994, 37):

“Ang mga tawo nga nagbuhat og sayop gusto nga moapil ka kanila tungod kay mas komportable sila sa ilang gibuhat kon ang uban nagbuhat usab niini” (Elder Richard G. Scott).

Unsa ang pipila ka mga ehemplo unsaon sa uban sa pagpugos kanimo sa pagbuhat og butang nga ikaw nasayud nga sayop?

Dapita ang mga estudyante sa pagpangita og usa ka kamatuoran samtang sila nagtuon sa Marcos 6 nga makatabang kanila sa pagbalibad sa negatibo nga mga pagpamugos sa kahigalaan.

Dapita ang usa ka estudyante sa pagbasa og kusog sa Marcos 6:17–18. Hangyoa ang klase sa pagsunod, nga mangita kon unsay gibuhat ni Herodes ngadto ni Juan Bautista. Ipareport sa mga estudyante kon unsay ilang nakat-unan.

Unsa ang gibuhat ni Herodes ngadto ni Juan ug ngano?

Si Herodes midiborsyo sa iyang asawa ug nakigminyo ni Herodias, ang asawa sa iyang igsoon nga si Felipe. Kini nga buhat usa ka klaro nga paglapas sa balaod sa Judeo (tan-awa sa Levitico 18:16), ug si Juan Bautista nanghimaraut niini og maayo. Ang pagsupak ni Juan niini nga kaminyoon nakapasuko ni Herodias, mao nga gipapriso ni Herodes si Juan aron sa paghupay ni Herodias.

Dapita ang usa ka estudyante sa pagbasa og kusog sa Marcos 6:19–20. Hangyoa ang klase sa pagsunod, nga mangita kon unsay gustong buhaton ni Herodias ngadto ni Juan Bautista.

Unsay gustong buhaton ni Herodias ngadto ni Juan Bautista?
Nganong dili man siya makapapatay kaniya? (Tungod kay si Herodes nahadlok ni Juan ug nasayud nga siya usa ka tawo sa Dios.)

Dapita ang pipila ka estudyante nga magpuli-puli sa pagbasa og kusog gikan sa Marcos 6:21–29. Hangyoa ang klase sa pagsunod, nga mangita kon unsay gibuhat ni Herodes ngadto ni Juan Bautista.

Sumala sa bersikulo 26, unsay gibati ni Herodes kabahin sa pagpatay kang Juan Bautista?
Nganong gipaputlan man ni Herodes sa ulo si Juan kon nasayud siya nga sayop kini ug dili siya gustong mobuhat niini? (Si Herodes nabalaka sa mga opinyon niadtong nanaglingkod uban kaniya.)
Unsa nga baruganan ang atong makat-unan gikan sa mga pagpili ni Herodes kabahin sa unsay mahitabo kon mosulay kita sa pagpahimuot sa uban imbis nga mobuhat sa unsay matarung? (Ang mga estudyante mahimong mogamit og lain-laing mga pulong, apan siguroa nga mahibalo sila sa mosunod nga baruganan: Ang pagtinguha sa pagpahimuot sa uban imbis sa pagbuhat sa unsay atong nasayran nga matarung mopadulong ngadto sa sayop nga mga pagpili, kagul-anan, ug pagbasol.)

Aron sa pagtabang sa mga estudyante nga mas makasabut pa niini nga kamatuoran, grupoha sila nga tinagurha ngadto sa tinagup-at ug pahunahunaa sila og pipila ka mga ehemplo nga sitwasyon diin ang mga kabatan-onan kinahanglang mopili tali sa pagtinguha sa pagpahimuot sa uban ug sa pagbuhat sa unsay ilang nahibaloan nga matarung. Human sa igong panahon, dapita ang kada grupo sa pagreport. Samtang sila nag-report, isulat ang pipila sa ilang mga ehemplo sa pisara.

Sa unsa nga paagi nga inyong nakita nga ang pagpadala sa pagpamugos sama niini nga mga ehemplo nakahatag og kasubo ug pagmahay?
Kanus-a man kamo nakakita og usa ka tawo nga mipili sa pagbuhat sa matarung imbis nga nagtinguha sa pagpahimuot sa uban?
Unsay makatabang kanato sa pagpili sa pagbuhat sa matarung imbis nga magtinguha sa pagpahimuot sa uban?

Basaha og kusog ang mosunod nga pamahayag ni Presidente Spencer W. Kimball mahitungod sa paghimo og husto nga mga desisyon:

“Ang husto nga mga desisyon maoy pinakasayon nga himoon kon gipangandaman na natong daan … ; makapawala kini sa daghang kabalaka sa panahon sa pagdesisyon, kon kapuyon ug gitintal kita og maayo” (Mga Pagtulun-an sa mga Presidente sa Simbahan: Spencer W. Kimball [2006], 108).

Dapita ang mga estudyante sa pagpamalandong sa ilang umaabut nga semana ug sa pag-ila og posibleng mga sitwasyon diin sila tingali kinahanglang mopili tali sa pagpahimuot sa uban ug sa pagbuhat unsay matarung. Awhaga sila sa pagplano unsaon nila pagtubag niini nga pagpamugos kon ila kining masinati.

Ipasabut nga dihang si Herodes nakadungog kabahin sa daghang mga milagro nga gihimo ni Jesus sa Galilea, siya nahadlok nga si Juan Bautista mabanhaw gikan sa patay ug maoy maghimo niini nga mga milagro (tan-awa sa Marcos 6:14–16).

Marcos 7–8

Si Jesus nag-ayo sa duha ka mga tawo ug nagtudlo sa Iyang mga disipulo

Ipasabut nga ang Marcos 7–8 naglakip og duha ka istorya sa Manluluwas nga nag-ayo og tawo. Ipares-pares ang mga estudyante. I-assign ang usa ka estudyante sa matag pares sa pagbasa sa Marcos 7:31–35 ug ang laing estudyante sa pagbasa sa Marcos 8:22–25. Dayon dapita ang mga estudyante sa paghulagway ngadto sa ilang pares sa milagro sa pag-ayo sa mga bersikulo nga ilang gibasa.

Human sa igong panahon, dapita ang mga estudyante sa pagpasabut kon sa unsang paagi ang Manluluwas miayo niining duha ka mga tawo.

Unsa nga mga leksyon ang atong makat-unan gikan sa kamatuoran nga ang buta nga tawo wala pa mahingpit sa pagkaayo sa sinugdanan?

Dapita ang usa ka estudyante sa pagbasa og kusog sa mosunod nga pamahayag ni Elder Bruce R. McConkie sa Korum sa Napulog Duha ka mga Apostoles: Hangyoa ang mga estudyante sa pagpaminaw sa mga rason nganong si Jesus miayo sa tawo sa hinay-hinay, o anam-anam, nga paagi.

“Kini nga milagro walay kapareha; mao lamang kini ang hitabo nga narekord diin anam-anam nga giayo ni Jesus ang usa ka tawo. Tingali gisunod kini sa Ginoo nga pamaagi aron sa paglig-on sa huyang apan nagpalambo sa pagtuo sa tawo nga buta. Makita nga ang sunod-sunod nga mga higayon sa pisikal nga kasuod uban kang Jesus nakadugang og paglaum, kasiguroan, ug hugot nga pagtuo sa tawo nga dili makakita. Si Jesus personal nga (1) migunit sa kamot sa buta nga tawo aron sa paggiya kaniya pagawas sa balangay, (2) mitalithi sa mga mata sa buta, (3) mipahigayon sa ordinansa sa pagpandong sa mga kamot, ug (4) mitapion pag-usab sa iyang mga kamot ngadto sa mga mata sa tawo.

“Sigurado nga ang pamaagi sa paghimo niini nga pagpang-ayo nagtudlo nga ang tawo kinahanglang magtinguha sa makaayo nga grasya sa Ginoo sa tibuok nilang kusog ug hugot nga pagtuo, bisan og ang ingon paigo alang sa anam-anam lamang nga pagkaayo , hinoon, human kini madawat, sila mahimong makadawat og dugang nga kasiguroan ug hugot nga pagtuo nga hingpit nga mamaayo. Ang mga tawo usab sa kasagaran mamaayo sa espirituhanon nilang mga kalisdanan sa anam-anam nga paagi, lakang sa usa ka lakang samtang gipasubay nila ang ilang kinabuhi uyon sa mga plano ug mga katuyoan sa Dios” (Doctrinal New Testament Commentary, 3 vols. [1965–73], 1:379–80).

Sa unsang paagi nga ang anam-anam nga pagkaayo makadugang sa hugot nga pagtuo sa usa ka tawo diha ni Jesukristo?
Nganong importante man nga masabtan nga ang pipila ka mga panalangin, sama sa pagkaangkon og pagpamatuod sa ebanghelyo o pagdawat og pisikal o espiritwal nga pag-ayo, kasagaran moabut sa hinay-hinay o anam-anam, kay sa diha-diha dayon o kausahon ra?

I-summarize ang Marcos 8:27–28 pinaagi sa pagpasabut nga si Jesus nangutana sa Iyang mga disipulo kon unsay sulti sa uban kon si kinsa Siya. Sila mitubag nga nag-ingon nga ang uban miingon nga Siya mao si Juan Bautista o lain nga propeta.

Dapita ang usa ka estudyante sa pagbasa og kusog sa Marcos 8:29. Hangyoa ang klase sa pagsunod, nga mangita kon unsay gideklarar ni Pedro mahitungod ni Jesus.

Unsay sulti ni Pedro kon kinsa si Jesus? (Ang pulong nga Kristo mao ang Gresyanhon nga pulong para sa Mesiyas.)

I-summarize ang Marcos 8:30–31 pinaagi sa pagpasabut nga si Jesus mitudlo sa mga disipulo nga Siya isalikway sa mga Judeo ug pagapatyon. Dapita ang usa ka estudyante sa pagbasa og kusog sa Marcos 8:32–33. Hangyoa ang klase sa pagsunod, nga mangita kon unsay reaksyon ni Pedro niini nga balita.

Ipasabut nga tungod sa komon nga gidahuman sa mga Judeo sa usa ka tigbuntog nga Mesiyas, lisud alang ni Pedro, ingon man usab sa daghang mga Judeo niana nga panahon, sa pagsabut ug pagdawat sa ideya sa usa ka Mesiyas nga mag-antus ug mamatay.

Sa unsang paagi nga si Pedro sama sa buta nga tawo nga gihulagway diha sa Marcos 8:22–25? (Si Pedro hinay-hinay nga “nakakita” sa kamatuoran. Siya adunay hugot nga pagtuo sa Manluluwas, apan ang iyang pagsabut sa misyon sa Manluluwas hinay-hinay nga milambo.)
Sa unsang paagi ang Ginoo mitabang kaninyo o inyong kaila nga hinay-hinay nga mas klaro nga makakita sa kamatuoran?

Tapusa ang leksyon karon pinaagi sa pagdapit sa mga estudyante sa pagbasa sa hilum sa Marcos 8:34–38, mamalandong kon sa unsang paagi ang leksyon karong adlawa makatabang kanila nga unahon ang Ginoo sa ilang kinabuhi.

Sunod nga Unit (Marcos 10–Lucas 4)

Ipasabut nga ang mga estudyante motapos sa ilang pagtuon sa Ebanghelyo ni Marcos ug magsugod sa pagtuon sa mga sinulat ni Lucas. Dapita sila sa pagpangita og bag-o nga mga detalye samtang sila magbasa pag-usab mahitungod sa katapusang mga panghitabo sa kinabuhi ni Jesukristo ug sa Iyang Pag-ula ug sa pagtimaan sa mga pagbugal-bugal nga gihimo ngadto ni Jesus samtang anaa Siya sa krus. Diha sa Ebanghelyo ni Lucas sila magbasa sa usa sa pinakasikat nga mga kapitulo diha sa Biblia—Lucas 2—ug mga istorya sa mga gisakit, sinalikway, ug makasasala.