Librarya
Leksyon 37: Marcos 6

Leksyon 37

Marcos 6

Pasiuna

Si Jesus gisalikway sa Iyang kaugalingong lungsod sa Nazaret. Siya mipadala sa Napulog Duha ka mga Apostoles sa pagsangyaw sa ebanghelyo. Si Juan Bautista gipatay pinaagi sa mando ni Herodes Antipas. Si Jesus milagrosong mipakaon sa sobra sa lima ka libo nga mga tawo, milakaw sa tubig, mipahunong sa unos, ug miayo sa masakiton.

Mga Sugyot alang sa Pagtudlo

Marcos 6:1–29

Si Jesus gisalikway sa Nazaret ug mipadala sa Napulog Duha; gisaysay ang kamatayon ni Juan Bautista

Sugdi ang klase pinaagi sa pagdapit sa mga estudyante sa paghunahuna sa milabay nga higayon nga sila mibati og pagpamugos sa pagbuhat og butang nga sila nasayud nga dili matarung.

Isulat sa pisara ang mosunod nga pamahayag (kini nga pamahayag makita diha sa “Making the Right Choices,” Ensign, Nob. 1994, 37):

“Ang mga tawo nga nagbuhat og sayop gusto nga moapil ka kanila tungod kay mas komportable sila sa ilang gibuhat kon ang uban nagbuhat usab niini” (Richard G. Scott).

  • Unsa ang pipila ka mga ehemplo kon unsaon sa uban sa pagpugos kanimo sa pagbuhat og butang nga ikaw nasayud nga sayop?

Dapita ang mga estudyante sa pagpangita og usa ka kamatuoran samtang sila nagtuon sa Marcos 6 nga makatabang kanila sa pagbalibad sa negatibo nga mga pagpamugos sa kahigalaan.

I-summarize ang Marcos 6:1–16 pinaagi sa pagpasabut nga si Jesus misangyaw ngadto sa Iyang kaugalingong lungsod sa Nazaret. Hinoon, tungod sa pagkawalay pagtuo sa mga katawhan Siya wala mohimo og daghang mga milagro taliwala kanila. Samtang naa didto, si Jesus mipadala sa Napulog Duha ka mga Apostoles nga magtinagurha aron sa pagsangyaw sa ebanghelyo. Samtang nagsangyaw sa ebanghelyo, sila usab mipapahawa sa mga yawa ug miayo sa masakiton. Dihang si Herodes nakadungog kabahin sa daghang mga milagro nga gihimo ni Jesus, siya nahadlok nga si Juan Bautista mabanhaw gikan sa patay ug maoy maghimo niini nga mga milagro.

Ipasabut nga ang Marcos 6:17–29 nagsaysay kon unsa ang nahitabo ni Juan Bautista. Dapita ang usa ka estudyante sa pagbasa og kusog sa Marcos 6:17–18. Hangyoa ang klase sa pagsunod, nga mangita kon unsay gibuhat ni Herodes ngadto ni Juan Bautista.

  • Sumala niini nga mga bersikulo, unsa ang gibuhat ni Herodes ngadto ni Juan ug ngano?

Ipasabut nga ang Herodes nga gihisgutan niini nga mga bersikulo mao si Herodes Antipas, nga maoy nagdumala sa mga rehiyon sa Galilea ug sa Perea human sa kamatayon sa iyang amahan, si Herodes ang Halangdon. Si Herodes Antipas midiborsyo sa iyang asawa ug nakigminyo ni Herodias, ang asawa sa iyang igsoon nga si Felipe. Kini nga buhat usa ka klaro nga paglapas sa balaod sa Judeo (tan-awa sa Levitico 18:16), ug si Juan Bautista nanghimaraut niini og maayo. Ang pagsupak ni Juan niini nga kaminyoon nakapasuko ni Herodias, mao nga gipapriso ni Herodes si Juan aron sa paghupay ni Herodias.

Dapita ang usa ka estudyante sa pagbasa og kusog sa Marcos 6:19–20. Hangyoa ang klase sa pagsunod, nga mangita kon unsay gustong buhaton ni Herodias ngadto ni Juan Bautista.

  • Unsay gustong buhaton ni Herodias ngadto ni Juan Bautista?

  • Nganong dili man siya makapapatay kaniya? (Tungod kay si Herodes nahadlok ni Juan ug nasayud nga siya usa ka tawo sa Dios; tan-awa usab ang Joseph Smith Translation, Mark 6:21 alang sa dugang pa mahitungod sa unsay gibati ni Herodes kabahin ni Juan Bautista.)

Dapita ang pipila ka mga estudyante sa pagpuli-puli sa pagbasa og kusog gikan sa Marcos 6:21–29. Hangyoa ang klase sa pagsunod, nga mangita kon unsay gibuhat ni Herodes ngadto ni Juan Bautista.

  • Sumala sa bersikulo 26, unsay gibati ni Herodes kabahin sa pagpatay kang Juan Bautista?

  • Nganong gipaputlan man ni Herodes sa ulo si Juan kon nasayud siya nga sayop kini ug dili siya gustong mobuhat niini? (Mahimo nimong isugyot nga markahan sa mga estudyante ang mga pulong nga “tungod … sa iyang mga dinapit,” nga nagpasabut nga si Herodes nabalaka sa opinyon niadtong nanaglingkod uban kaniya.)

  • Unsa nga baruganan ang atong makat-unan gikan sa mga pagpili ni Herodes kabahin sa unsay mahitabo kon mosulay kita sa pagpahimuot sa uban imbis nga mobuhat sa unsay matarung? (Ang mga estudyante mahimong mogamit og lain-laing mga pulong, apan siguroa nga mahibalo sila sa mosunod nga baruganan: Ang pagtinguha sa pagpahimuot sa uban imbis sa pagbuhat sa unsay atong nasayran nga matarung mopadulong ngadto sa sayop nga mga pagpili, kagul-anan, ug pagbasol.)

Aron sa pagtabang sa mga estudyante nga mas makasabut pa niini nga kamatuoran, grupoha sila nga tinagurha ngadto sa tinagup-at ug pahunahunaa sila og pipila ka mga ehemplo nga sitwasyon diin ang mga kabatan-onan kinahanglang mopili tali sa pagtinguha sa pagpahimuot sa uban ug sa pagbuhat sa unsay ilang nahibaloan nga matarung. Human sa igong panahon, dapita ang kada grupo sa pagreport. Samtang sila nag-report, isulat ang pipila sa ilang mga ehemplo sa pisara.

  • Sa unsa nga paagi nga inyong nakita nga ang pagpadala sa pagpamugos sama niini nga mga ehemplo nakahatag og kasubo ug pagmahay?

  • Kanus-a man kamo nakakita og usa ka tawo nga mipili sa pagbuhat sa matarung imbis nga nagtinguha sa pagpahimuot sa uban?

  • Unsay makatabang kanato sa pagpili sa pagbuhat sa matarung imbis nga magtinguha sa pagpahimuot sa uban?

Dapita ang mga estudyante sa pagpamalandong sa ilang umaabut nga semana ug sa pag-ila og posibleng mga sitwasyon diin sila tingali kinahanglang mopili tali sa pagpahimuot sa uban ug sa pagbuhat unsay matarung. Awhaga sila sa pagplano unsaon nila pagtubag niini nga pagpamugos kon ila kining masinati.

Marcos 6:30–44

Si Jesus milagrosong mipakaon sa kapin sa lima ka libo ka mga tawo

Dapita ang mga estudyante sa pagkonsiderar sa mosunod nga sitwasyon: Ang usa ka bag-ong gitawag nga misyonaryo nakuyawan kaayo sa pagbiya alang sa iyang misyon. Kini nga tawo dili maayo nga mamumulong ug maglisud sa mga tapok-tapok.

  • Unsay inyong isulti niining batan-ong misyonaryo?

Dapita ang mga estudyante sa pagpangita og usa ka baruganan samtang magtuon sila sa Marcos 6:30–44 nga makatabang niining batan-ong misyonaryo ug kanatong tanan kon kita mobati og kakulang sa pagbuhat sa unsay gisugo sa Ginoo kanato.

I-summarize ang Marcos 6:30–33 pinaagi sa pagpasabut nga ang Napulog Duha ka mga Apostoles mibalik gikan sa pagsangyaw sa ebanghelyo ug mireport ngadto ni Jesus sa unsay ilang gihimo ug gitudlo. Si Jesus ug ang Napulog Duha ka mga Apostoles misakay sa barko aron moadto sa usa ka dapit diin sila mahimo nga mag-inusara ug mopahulay. Hinoon, ang mga tawo sa pipila ka dug-ol nga mga lungsod miadto sa dapit kon asa modunggo si Jesus ug naghulat na Kaniya sa Iyang pag-abut.

Ipabasa og kusog sa usa ka estudyante ang Marcos 6:34, ug hangyoa ang klase sa pagpangita kon giunsa pagtubag sa Manluluwas ang pundok sa katawhan.

  • Sa inyong hunahuna unsa kaha ang kahulugan sa mga pulong nga “sila sama sa mga karnero nga walay magbalantay”?

handout iconIpasabut nga human sa pagtudlo sa pundok sa katawhan sa tibuok adlaw, ang Manluluwas mihimo og usa ka dako nga milagro. Aron sa pagtabang sa mga estudyante nga makasabut niini nga milagro, ipares-pares sila ug hatagi ang matag paris og kopya sa mosunod nga handout. Dapita ang matag paris sa pagbasa og dungan sa Marcos 6:35–44 ug Mateo 14:18 ug dayon numerohan ang mga panghitabo nga anaa sa handout sa kronolohiya nga pagkahan-ay.

handout, The Feeding of the 5000

Ang Pagpakaon sa 5000

Manwal sa Seminary Teacher sa Bag-ong Tugon—Leksyon 37

  • ____ Ang Manluluwas mipilo-pilo sa unsay gidala sa mga disipulo, nakab-ot ug nalabwan ang unsay gikinahanglan.

  • ____ Ang mga disipulo miingon nga sila adunay lima ka tinapay ug duha ka isda.

  • ____ Ang mga disipulo misugyot nga palakton ang mga tawo aron makapamalit og makaon.

  • ____ Ang Manluluwas nangutana kon unsa ang mahatag sa mga disipulo.

  • ____ Ang Manluluwas misulti sa mga disipulo nga hatagan og pagkaon ang mga tawo.

  • ____ Ang pundok sa katawhan walay makaon.

  • ____ Ang Manluluwas mihangyo sa mga disipulo nga ihatag Kaniya kon unsay anaa kanila.

© 2015 pinaagi sa Intellectual Reserve, Inc. Tanang mga katungod gigahin.

Human ang mga estudyante adunay igong panahon sa pagkompleto niini nga kalihokan, ribyuha ang mga tubag sa tibuok klase. (Ang husto nga han-ay sa mga tubag mao ang 7, 5, 2, 4, 3, 1, 6.)

  • Pila ka mga tawo ang napakaon? (Ipasabut nga ang Gresyanhon nga teksto sa Marcos 6:44 nagklaro nga ang mga pulong “lima ka libo ka mga tawo” nagpasabut sa lima ka libo ka hamtong nga mga lalaki. Sa ingon, ang gidaghanon sa napakaon malagmit nga sobra pa, ilabi na nga may mga babaye ug mga bata usab didto [tan-awa usab sa Mateo 14:21].)

Ipasabut nga sa wala pa mopahigayon niini nga milagro, ang Manluluwas mihangyo una sa Iyang mga disipulo nga ihalad ang lima ka tinapay ug duha ka isda—nga mao lamang ang anaa kanila—ngadto Kaniya.

  • Unsa nga baruganan ang atong makat-unan gikan niini nga milagro mahitungod sa unsay mabuhat sa Manluluwas kon atong ihalad Kaniya ang tanan nga anaa kanato? (Ang mga estudyante kinahanglang moila og baruganan sama sa mosunod: Kon kita mohalad sa Manluluwas sa tanan nga anaa kanato, Siya makapalambo sa atong halad aron matuman ang Iyang mga katuyoan. Isulat kini nga baruganan sa pisara.)

Aron sa pagtabang sa mga estudyante nga makasabut niini nga baruganan, pahinumdumi sila sa kahimtang sa nakuyawan, bag-ong gitawag nga misyonaryo nga gihisgutan kaganina.

  • Bisan pa sa mga kahuyang niining batan-ong lalaki o babaye, unsa kaha ang ihangyo sa Manluluwas niini nga misyonaryo nga dad-on ngadto Kaniya? (Ang Manluluwas nagdapit sa tanan nga nagtinguha sa pagbuhat sa Iyang mga katuyoan sa paghatag ngadto Kaniya sa tanan nilang mga tinguha, abilidad, talento, kahanas, kalig-on, gasa, ug mga paningkamot [tan-awa sa Omni 1:26; 2 Nephi 25:29].)

  • Unsa kaha ang resulta kon kini nga misyonaryo mohatag sa tanan nga anaa kaniya ngadto sa Manluluwas?

  • Unsa ang uban pa nga mga sitwasyon nga masugatan sa usa ka batan-ong miyembro sa Simbahan diin ang pagkasayud niini nga baruganan makatabang?

Dapita ang mga estudyante sa pagpamalandong ug sa pagsulat sa ilang mga notebook sa klase o scripture study journal kon sa unsang paagi ang Ginoo mipalambo sa ilang mga paningkamot aron makahimo kanila sa unsay Iyang gisugo kanila. Ikonsiderar ang pagdapit og pipila ka mga estudyante sa pagpakigbahin sa klase kon unsay ilang gisulat, kon komportable sila nga mobuhat niini.

Ipakigbahin ang imong pagpamatuod nga kon kita mohalad sa Manluluwas sa tanan nga anaa kanato, Siya makapalambo sa atong halad aron matuman ang Iyang mga katuyoan. Awhaga ang mga estudyante sa paggamit niini nga baruganan diha sa ilang kinabuhi.

Marcos 6:45–56

Si Jesus naglakaw diha sa tubig ug nag-ayo sa masakiton

I-summarize ang Marcos 6:45–56 pinaagi sa pagpasabut nga human si Jesus mipakaon sa lima ka libo, Iyang gisugo ang Iyang mga disipulo sa pagsulod sa barko ug sa paglawig ngadto sa pikas nga daplin sa Dagat sa Galilea. Siya dayon mipalakaw sa pundok sa mga katawhan. Pagkagabii usa ka unos ang miabut, ug ang Manluluwas mitan-aw gikan sa bukid samtang ang Iyang mga disipulo nanlimbasug apan wala mouswag sa ilang panaw. Siya dayon milakaw sa tubig padulong kanila, ang unos nahunong, ug sila luwas nga miabut sa pikas nga daplin sa Dagat sa Galilea.

  • Niini nga higayon, giunsa man sa gahum sa Ginoo sa pagtabang sa mga disipulo aron matuman ang unsay Iyang gisugo kanila nga buhaton?

Ikonsiderar ang pagtapos sa leksyon pinaagi sa pagdapit og mga estudyante kinsa andam sa pagpakigbahin sa ilang mga pagbati o pagpamatuod sa mga kamatuoran nga gihisgutan karon.

Komentaryo ug Background nga Impormasyon

Marcos 6:26. “Tungod sa iyang mga dinapit”

Si Elder Richard G. Scott sa Korum sa Napulog Duha ka mga Apostoles mihatag og pipila ka mga ideya nga makatabang sa kabatan-onan sa pagpakigbatok sa negatibong pagpamugos sa kahigalaan:

“Dili ninyo mapahimuot ang Dios nga dili masuko si Satanas, mao nga makadawat kamo og mga pagpamugos gikan niadtong iyang gitintal sa paghimo og sayop. Ang mga tawo nga nagbuhat og sayop gusto nga moapil kamo kanila tungod kay mas komportable sila sa ilang gibuhat kon ang uban nagbuhat usab niini. Mahimo usab nga magpahimulos sila kaninyo. Natural lang nga gusto nga madawat sa mga kahigalaan, nga mahimong kabahin sa usa ka grupo—ang pipila gani moapil og mga gang tungod niana nga tinguha nga mahilakip, apan sila mawagtangan sa ilang kagawasan, ug ang pipila mawagtangan sa ilang kinabuhi. Usa sa labing lisud mahibaloan nga butang alang kaninyo mao ang kon unsa gayud kamo kalig-on ug sa unsang paagi ang uban hilum nga nagtahud kaninyo. Kami adunay dakong pagsalig kaninyo. Dili kinahanglan nga inyong ikompromiso ang inyong mga sumbanan aron madawat sa maayong mga higala. Kon kamo mas masulundon, kon kamo mas mobarug sa tinuod nga mga baruganan, mas makatabang ang Ginoo kaninyo sa pagbuntog sa tintasyon. Kamo usab makatabang sa uban tungod kay sila mobati sa inyong kalig-on. Pahibaloa sila sa inyong mga sumbanan pinaagi sa makanunayong pagsunod niini. Tubaga ang mga pangutana mahitungod sa inyong mga baruganan kon pangutan-on kamo, apan likayi ang pagpang-sermon. Nasayud ako gikan sa personal nga kasinatian nga kana mosalir.

“Walay usa nga tuyo nga mohimo og seryoso nga sayop. Kini moabut kon inyong ipaubos ang inyong mga sumbanan aron mas dawaton sa uban. Kamo ang magpakalig-on. Kamo ang mag-lider. Pagpili og buotan nga mga higala ug maghiusa sa pagbatok sa mga pagpamugos sa kahigalaan” (“Paghimo sa Matarung nga mga Pagpili,” Ensign, Nob. 1994, 37).

Si Elder Lynn G. Robbins sa Seventy mitudlo sa mosunod mahitungod sa pagpamugos sa kahigalaan:

“Ang pagsulay sa pagpahimuot sa uban og una kay sa pagpahimuot sa Dios nagbali sa una ug ikaduhang dako nga mga sugo (tan-awa sa Mateo 22:37–39). Kini nakapalimot nato kon asa kita nag-atubang. Ug bisan pa niana, kitang tanan nakabuhat niana nga sayop tungod sa kahadlok sa tawo. Sa Isaias ang Ginoo nagpasidaan nato, ‘Ayaw ninyo kahadloki ang pagtamay sa mga tawo’ (Isaias 51:7; tan-awa usab sa 2 Nephi 8:7). Sa damgo ni Lehi, kini nga kahadlok nasugdan sa tulisok sa pagbugal-bugal gikan sa dako ug lapad nga gambalay, nakapahimo sa daghan nga makalimot hain sila mag-atubang ug mibiya sa kahoy nga ‘naulaw’ (tan-awa sa 1 Nephi 8:25–28).

“Kining pagpamugos sa kahigalaan makapausab sa kinaiya sa tawo, kon dili sa batasan, pinaagi sa pagpabati nga siya sad-an tungod sa binuhatan. Kita nagtinguha sa pagpakabuhi uban niadtong manulisok, apan kon kini nga kahadlok sa tawo motintal nato nga paundayunan ang sala, kini mahimong ‘lit-ag’ sumala sa basahon sa Mga Proverbio (tan-awa sa Mga Proverbio 29:25). Ang lit-ag dili mailhang paon nga makadani sa atong maloloy-ong kinaiya sa pagtugot o gani sa pag-aprubar sa butang nga gipanghimaraut sa Dios. Alang sa huyang og pagtuo, kini mahimong usa ka dakong babag. Sama pananglit, pipila ka batan-ong mga misyonaryo mibati niining kahadlok sa tawo diha sa natad sa misyon ug napakyas sa pagreport sa dayag nga pagkamasinupakon sa kompanyon ngadto sa ilang presidente sa misyon tungod kay dili sila gusto nga masilo ang ilang masupilon nga kompanyon. Ang mga desisyon sa kinaiya gihimo pinaagi sa paghinumdom sa husto nga pagkahan-ay sa una ug ikaduhang dagko nga mga sugo (tan-awa sa Mateo 22:37–39). Kon kining naglibug nga mga misyonaryo makaamgo nga sila may tulubagon sa Dios ug dili sa ilang kompanyon, kini makahatag nila og kaisug sa pag-atubang” (“Hain Ka Nag-atubang?” Ensign o Liahona, Nob. 2014, 9).

Marcos 6:35–44. Ang pagpakaon sa lima ka libo

Si Presidente James E. Faust sa Unang Kapangulohan nagtudlo nga ang gahum sa Manluluwas sa pagpilo-pilo sa tinapay ug isda nagpakita nga Siya mopalambo sa atong matinud-anong mga paningkamot sa pagserbisyo sa Iyang Simbahan, bisan kon mobati kita nga ang atong mga paningkamot katumbas lamang sa pipila ka tinapay ug isda:

“Daghang dili ilado nga mga tawo nga may mga gasa nga katumbas lamang sa lima ka tinapay ug duha ka gagmayng isda nagpalambo sa ilang mga calling [sa simbahan] ug nagserbisyo sa walay pagtagad o pahalipay, tinud-anay nga nag-amuma sa liboan. … Kini mao ang gatusan ka libo nga mga lider ug magtutudlo diha sa tanan nga mga auxiliary ug mga korum sa priesthood, mga home teacher, mga visiting teacher sa Relief Society. Kini mao ang daghan nga mapainubsanong mga bishop sa Simbahan, diin ang pipila walay pormal nga pagbansay, apan gipalambo og maayo, kanunay nga nagkat-on, uban sa mapainubsanong tinguha sa pagserbisyo sa Ginoo ug sa katawhan sa ilang mga ward. …

“Usa ka dakong rason nga kini nga simbahan mitubo gikan sa mapainubsanong sinugdanan niini ngadto sa kalig-on niini karon mao ang pagkamatinud-anon ug debosyon sa minilyon ka mga mapainubsanon ug matinud-anong mga tawo kinsa aduna lamang lima ka tinapay ug duha ka gagmayng isda nga mahalad sa pag-alagad sa Agalon” (“Five Loaves and Two Fishes,” Ensign, Mayo 1994, 5, 6).