Leksyon 42
Marcos 11–16
Pasiuna
Sa hinapos nga bahin sa Iyang mortal nga pangalagad, ang Manluluwas nakaobserbar og usa ka kabus nga babayeng balo [biyuda] nga mihulog og duha ka diyot sa panudlanan sa templo. Sa wala madugay, samtang nanihapon sa Betania, gidihugan ni Maria si Jesus isip timaan sa Iyang paglubong. Ang Manluluwas nag-antus sa Getsemani. Siya gikasohan ug gihukman nga patyon. Human Siya namatay sa krus ug nabanhaw, ang Ginoo mipakita sa Iyang mga Apostoles ug gisugo sila sa pagdala sa ebanghelyo ngadto sa kalibutan.
Mga Sugyot alang sa Pagtudlo
Marcos 11–13
Ang Manluluwas nagtudlo didto sa templo ug nakaobserbar sa usa ka biyuda nga mihulog og mga diyot ngadto sa panudlanan sa templo
Basaha og kusog ang mosunod nga mga sitwasyon, ug hangyoa ang mga estudyante sa pagpaminaw alang sa mga kalainan tali sa mga halad nga gipresentar ngadto sa Ginoo sa matag sitwasyon.
-
Usa ka babaye mihatag sa iyang bishop og dako kaayo nga kantidad sa kwarta isip halad sa puasa. Laing babaye nga nagpuyo sa samang ward mihatag sa iyang bishop og gamay kaayo nga kantidad isip halad sa puasa.
-
Usa ka tawo nagserbisyo isip presidente sa stake. Lain nga tawo sa samang stake nagserbisyo isip magtutudlo sa primary.
-
Unsay kalainan ang inyong namatikdan diha sa mga halad nga gihatag sa matag sitwasyon?
-
Unsa kaha ang bation sa usa ka tawo kon ang iyang halad ngadto sa Ginoo makita nga gamay ra kon itandi ngadto sa mga halad sa uban?
Dapita ang mga estudyante sa pagpangita og mga kamatuoran samtang sila nagtuon sa Marcos 11–14 nga makatabang kanila nga masayud kon unsay pagtan-aw sa Ginoo sa ilang mga halad Kaniya.
Ipakita ang litrato nga Madaugon nga Pagsulod (Libro sa mga Hulagway sa Ebanghelyo [2009], nu. 50; tan-awa usab sa LDS.org). I-summarize og kadali ang Marcos 11:1–12:40 pinaagi sa pagpasabut nga samtang nagkaduol na ang Manluluwas sa katapusan sa Iyang mortal nga pangalagad, Siya misulod nga madaugon ngadto sa Jerusalem, mihinlo sa templo, ug mitudlo sa mga tawo didto. Pahinumdumi ang mga estudyante nga sa pagsulay nga maulawan ang Manluluwas, ang mga Pariseo ug mga escriba nangutana Kaniya og lisud nga mga pangutana samtang nagtudlo Siya diha sa templo. Human gitubag sa Manluluwas ang ilang mga pangutana, Iyang gisaway ang pagpakaaron-ingnon sa mga Pariseo ug mga escriba (tan-awa sa Mateo 23).
Ipasabut nga samtang si Jesus didto sa templo, Siya nakasaksi og mga tawo nga nagdala og kwarta ngadto sa panudlanan sa templo isip halad ngadto sa Dios. Ipabasa og kusog sa usa ka estudyante ang Marcos 12:41–44, ug hangyoa ang klase sa pagpangita kon unsay nakita sa Manluluwas diha sa panudlanan.
-
Unsay nakita sa Manluluwas diha sa panudlanan?
Ipakita ang sinsilyo nga pinakaubos og bili nga kwarta sa inyong nasud, ug ipasabut nga ang usa ka diyot mao “ang pinakagamay nga bronse nga salapi nga gigamit sa mga Judeo” (Bible Dictionary sa LDS English vesion sa Biblia, “Money”).
-
Unsa kaha ang bation sa usa ka tawo kon duha lamang ka diyot ang iyang mahatag isip halad ngadto sa Dios?
-
Unsa ang gisulti sa Manluluwas mahitungod sa halad sa biyuda kon itandi ngadto sa mga halad sa uban?
-
Ngano kaha nga ang Manluluwas mikonsiderar sa iyang halad nga “labaw” pa kay sa ubang mga halad?
-
Basi sa unsay gisulti sa Ginoo kabahin sa biyuda, unsa nga baruganan ang atong makat-unan mahitungod sa paghatag ngadto sa Ginoo? (Ang mga estudyante mahimong mogamit og lain-laing mga pulong apan kinahanglang mahibalo og baruganan sama sa mosunod: Kon kita andam sa paghatag sa tanan nga anaa kanato ngadto sa Ginoo, Siya modawat sa atong halad bisan kon kini daw gamay ra kon itandi ngadto sa uban.)
I-summarize ang Marcos 13 pinaagi sa pagpasabut nga ang Manluluwas mitudlo sa Iyang mga Apostoles mahitungod sa Ikaduhang Pag-anhi. Pahinumdumi ang mga estudyante nga sila nagtuon niini nga mga pagtulun-an diha sa Joseph Smith—Mateo.
Marcos 14:1–9
Si Maria nagdihog sa Manluluwas
Ipasabut nga human ang Manluluwas mitudlo sa Iyang mga disipulo mahitungod sa mga timailhan sa Iyang Ikaduhang Pag-anhi, Siya mibiya sa Jerusalem ug miadto sa Betania sa balay sa tawo nga ginganlan og Simon, kinsa kaniadto nasakit sa sanla.
Dapita ang usa ka estudyante sa pagbasa og kusog sa Marcos 14:3 ug ang laing estudyante sa pagbasa og kusog sa Juan 12:3. Hangyoa ang klase sa pagpaminaw sa unsay nahitabo ngadto sa Manluluwas samtang siya milingkod alang sa panihapon.
-
Unsa ang nahitabo sa Manluluwas samtang naglingkod Siya aron manihapon sa balay ni Simon? (Ipasabut nga ang babaye nga midihog sa Manluluwas mao si Maria ang igsoon ni Marta ug Lazaro [tan-awa sa Juan 12:1–3].)
-
Giunsa ni Maria pagpakita sa Manluluwas sa iyang gugma ug debosyon?
Ipasabut nga ang pagdihog ni Maria sa ulo ug tiil sa Manluluwas gamit ang lunsayng nardo (mahalon nga pahumot) usa ka buhat sa pagtahud nga bisan ang mga hari talagsa ra nga makadawat (tan-awa sa James E. Talmage, Jesus the Christ, 3rd ed. [1916], 512).
Dapita ang pipila ka mga estudyante sa pagpuli-puli og basa og kusog gikan sa Marcos 14:4–9. Hangyoa ang klase sa pagsunod, nga mangita kon unsa ang reaksyon sa pipila ka mga tawo diha sa panihapon sa gibuhat ni Maria. Ipasabut nga atong makat-unan gikan sa Juan 12:4–5 nga si Judas Iscariote mao ang mireklamo sa buhat ni Maria.
-
Unsa man ang reaksyon ni Judas Iscariote sa pagdihog ni Maria sa Manluluwas gamit ang mahalon nga pahumot?
-
Sumala sa bersikulo 5, pila man ang bili sa pahumot? (Ipasabut nga ang tulo ka gatus nga denario katumbas sa kantidad nga kitaon sa usa ka ordinaryong trabahante sa usa ka tuig.)
-
Giunsa man pagtubag sa Manluluwas ang pagpanaway ni Judas kang Maria?
Itudlo ang mga pulong “usa ka maayong buhat kining iyang gihimo alang kanako” diha sa bersikulo 6, ug ipasabut nga kini nagpasabut nga ang Manluluwas nahimuot sa gibuhat ni Maria. Itudlo usab ang mga pulong “gihimo niya ang maarangan niya sa paghimo” diha sa bersikulo 8, ug ipasabut nga kini nagpasabut nga si Maria mihatag sa iyang labing maayo ngadto sa Ginoo.
-
Unsa nga kamatuoran ang atong makat-unan gikan niini nga mga bersikulo mahitungod sa unsay bation sa Manluluwas kon atong ihatag ang atong pinakamaayo ngadto Kaniya? (Ang mga estudyante mahimong mogamit og lain-laing mga pulong apan kinahanglang mahibalo sa mosunod nga baruganan: Ang Manluluwas mahimuot kon atong ihatag Kaniya ang atong pinakamaayo.)
I-refer ngadto sa duha ka mga sitwasyon nga gipresentar sa pagsugod sa klase. Hangyoa ang mga estudyante sa paggamit sa mga kamatuoran nga ilang nahibaloan diha sa Marcos 12 ug Marcos 14 aron sa pagpasabut kon sa unsang paagi ang mga tawo sa matag sitwasyon mahimong makapahimuot sa Ginoo.
-
Sa unsang paagi ang pagtuo niini nga mga kamatuoran makatabang sa tawo kinsa mibati nga wala kaayo silay mahatag ngadto sa Ginoo?
-
Kanus-a man kamo nakakita og tawo nga mihatag sa ilang pinakamaayo ngadto sa Ginoo?
Dapita ang mga estudyante sa pagkonsiderar kon sila ba karon naghatag sa ilang pinakamaayo ngadto sa Ginoo. Awhaga sila sa pagpili og usa ka aspeto sa ilang kinabuhi nga ilang mapalambo ug sa paghimo og tumong nga makatabang kanila sa paghatag sa ilang pinakamaayo ngadto sa Ginoo.
Marcos 14:10–16:20
Si Jesus nagsugod sa Iyang Pag-ula samtang Siya nag-antus sa Getsemani alang sa atong mga sala; Siya gibudhian ni Judas Iscariote ug gidala atubangan sa mga lider sa Judeo
Hangyoa ang mga estudyante nga mamalandong sa hilum sa mosunod nga mga pangutana:
-
Gibati na ba ninyo nga walay usa nga nakasabut kaninyo o sa unsay inyong gisinati karon?
-
Gibati na ba ninyo nga dili kamo mapasaylo sa inyong nangaging mga sala?
Dapita ang mga estudyante sa pagpangita og mga kamatuoran samtang sila nagtuon sa Marcos 14 nga makatabang og tawo nga tingali aduna niini nga mga pagbati.
I-summarize ang Marcos 14:10–31 pinaagi sa pagpasabut nga pipila ka adlaw human gidihugan ni Maria si Jesus, si Jesus ug ang mga Apostoles misaulog sa Pagpalabay. Pagkahuman, si Jesus miadto sa Tanaman sa Getsemani.
Dapita ang usa ka estudyante sa pagbasa og kusog sa Marcos 14:32–34. Hangyoa ang klase sa pagsunod, nga mangita kon unsa ang gibati sa Manluluwas diha sa Tanaman sa Getsemani.
-
Unsa ang gibati sa Manluluwas didto sa Tanaman sa Getsemani?
Human makatubag ang mga estudyante, isulat sa pisara ang mosunod nga mga pulong: pagbati sa kakulba, pag-antus, natugob sa kasubo.
Ipasabut nga kini nga mga pulong nagpasabut sa pag-antus nga nasinati ni Jesukristo isip kabahin sa Iyang Pag-ula.
-
Unsa ang gitudlo niini nga mga pulong ngari kanato mahitungod sa Pag-ula ni Jesukristo? (Human makatubag ang mga estudyante, isulat sa pisara ang mosunod nga kamatuoran: Isip kabahin sa Iyang Pag-ula, si Jesukristo nag-antus ug nasubo didto sa Tanaman sa Getsemani.)
Dapita ang pipila ka mga estudyante sa pagpuli-puli og basa og kusog gikan sa Marcos 14:35–42. Hangyoa ang klase sa pagsunod, nga mangita kon unsay gibuhat sa Manluluwas tungod sa Iyang grabe nga pag-antus.
-
Unsa ang gibuhat sa Manluluwas tungod sa Iyang grabe nga pag-antus? (Tabangi ang mga estudyante nga makasabut nga ang pag-antus ni Jesus grabe kaayo nga Siya mihangyo kon mahimo ba nga dili Niya kini masinati.)
Isulat ang mosunod nga mga pulong diha sa pisara: Si Jesukristo nag-antus … aron Siya …
Ipasabut nga ang ubang mga tudling sa kasulatan makatabang kanato nga makasabut sa pag-antus ni Jesukristo ug nganong Siya andam nga mag-antus alang kanato.
Isulat ang mosunod nga mga pakisayran diha sa pisara: Isaias 53:3–5 ug Alma 7:11–13. Ipares-pares ang mga estudyante, ug ipabasa kanila og dungan ang mga bersikulo, nga mangita kon unsa ang giantus sa Manluluwas ug nganong Siya nag-antus. Hangyoa ang mga estudyante sa pagsulat diha sa ilang mga notebook sa klase o scripture study journal kon unsaon nila pagkompleto ang mga pulong nga gisulat sa pisara gamit ang ilang nakat-unan sa Isaias 53:3–5 ug Alma 7:11–13. (Tingali kinahanglan nimong ipasabut nga ang pulong pagtabang sa Alma 7:12 nagpasabut nga magdali sa paghatag og kahupayan o tabang sa usa ka tawo.)
Human sa igong panahon, dapita ang pipila ka mga estudyante sa pagreport kon giunsa nila pagkompleto ang mga pulong. Ang ilang mga tubag kinahanglang susama sa mosunod: Si Jesukristo miantus sa atong mga kasakit, mga kalisdanan, mga tintasyon, mga sakit, mga balatian, ug mga kaguol aron Siya mahibalo unsaon sa pagtabang kanato. Si Jesukristo nag-antus sa atong mga sala aron Siya makapapas sa atong mga kalapasan. Pahinumdumi ang mga estudyante nga ang pag-antus sa Manluluwas alang sa mga sala sa katawhan nagsugod sa Getsemani ug nagpadayon ug gitapos diha sa Iyang Pagkalansang sa krus.
-
Sa unsang paagi ang pagkasayud kon unsa ang giantus sa Manluluwas ug nganong Siya nag-antus makatabang kaninyo samtang kamo nag-atubang sa mga pagsulay, mga kasakit, ug mga kalisdanan?
-
Kanus-a man ninyo gibati ang Manluluwas nga mitabang kaninyo sa panahon sa kasakit, balatian, o kasubo?
-
Unsa nga mga pagbati ang inyong nasinati samtang naghinulsol kamo ug mibati nga ang inyong mga sala giwagtang (o gipapas) pinaagi sa Pag-ula ni Jesukristo?
I-summarize ang Marcos 14:43–16:20 pinaagi sa pagpasabut nga si Jesus gidala ngadto sa usa ka ilegal nga pagtaral atubangan sa Sanhedrin ug gihukman nga patyon. Human ang Manluluwas namatay sa krus ug nabanhaw, Siya mipakita sa Iyang mga Apostoles ug misugo kanila sa pagdala sa ebanghelyo ngadto sa kalibutan.
Mahimo nimong tapuson pinaagi sa pagpamatuod sa mga kamatuoran nga imong nahisgutan karon.
Komentaryo ug Background nga Impormasyon
Marcos 12:41–44. Ang mga diyot sa biyuda
“Ang mga diyot nga gidonar sa biyuda ngadto sa panudlanan sa templo mao ang gagmay nga mga sinsilyo sa Judeo nga gitawag og lepta (Gresyanhon sa gamay). Kini motimbang og mga 1/2 gramo (dili kaabut og 1/50 ka onsa) ug ang bili ubos pa kay sa usa ka ‘daku’ o quadran, nga mao ang Romano nga sinsilyo nga may pinakaubos og bili nianang panahona (tan-awa sa Marcos 12:42).
“Ang kamatuoran nga ang biyuda mihatag sa ‘tanan nga diha kaniya’ mihulagway sa iyang sinsero nga debosyon ngadto sa Dios, ikumparar sa pagpakaaron-ingnon sa mga escriba (tan-awa sa Marcos 12:38–40). Si Elder James E. Talmage (1862–1933) sa Korum sa Napulog Duha ka mga Apostoles mipasabut nganong ang Ginoo midayeg sa biyuda bisan tuod ang iyang halad gamay ra nga donasyon: ‘Ang adunahan mihatag og daghan apan mas daghan ang gibilin; ang gasa sa biyuda mao ang tanan nga anaa kaniya. Dili ang pagkagamay sa iyang halad ang hinungdan nga espesyal ang pagdawat niini, apan ang espiritu sa pagsakripisyo ug mapahinunguron nga katuyoan sa iyang paghatag’ (Jesus the Christ, 3rd ed. [1916], 561–62). Si Elder Talmage mipahayag usab: ‘Magasa man kini sa usa ka tawo o sa usa ka nasud, ang labing maayo, kon gitanyag nga tinud-anay ug uban sa tiunay nga katuyoan, kanunay nga maayo diha sa panan-aw sa Dios, bisan unsa pa ka kabus kana nga pagkamaayo kon ikumpara sa uban’ (The House of the Lord, rev. ed. [1968], 3)” (New Testament Student Manual [manwal sa Church Educational System, 2014], 128–29).
Marcos 14:3–9. Si Jesus gidihugan ni Maria
Mipasabut si Elder James E. Talmage nga ang mga lihok ni Maria mipakita sa iyang dakong gugma alang ni Jesus:
“Ang pagdihog sa usa ka dinapit gamit ang ordinaryo nga lana mao ang pagpasidungog kaniya; ang pagdihog usab sa iyang mga tiil nagpakita og dili kasagaran ug talagsaon nga pagtagad; apan ang pagdihog sa ulo ug tiil gamit ang lunsay nga nardo, ug sa ingon nga kaabunda, usa ka buhat sa balaang pagtahud nga panagsa rang buhaton bisan gani ngadto sa mga hari. Ang gibuhat ni Maria usa ka pagpakita og pagdayeg; usa kadto ka humot nga pangalimyon gikan sa kasingkasing nga nag-awas-awas uban sa pagsimba ug pagbati” (Jesus the Christ, 3rd ed. [1916], 512).
Marcos 14:32–36. Ang Pag-antus sa Manluluwas sa Getsemani
“Ang pinulongan ni Marcos nagsaksi sa kamatuoran ug paghingapin sa pag-antus sa Manluluwas (tan-awa sa Marcos 14:23–36). Ang Gresyanhon nga pulong nga gihubad isip ‘pagbati sa kakulba’ diha sa teksto mahimong nagpasabut og lain-laing emosyon, lakip ang katingala, kahadlok, kahingangha nga nagsunod sa dakong kakurat, ug hilabihan nga kalisud. Ang Gresyanhon nga berbo nga gihubad isip ‘pag-antus’ mahimong nagpasabut sa kaguol, kasubo, ug puno sa kasakit o kagul-anan. Kon hiusahon, kini nga mga pulong naghulagway og usa ka lawom ug naghingapin nga kasakit. Ang Manluluwas miingon nga ang Iyang kalag ‘natugob sa kasubo nga ikamatay’ (Marcos 14:34)—buot ipasabut, ang Iyang kasakit grabe kaayo nga Siya mibati nga duol na sa kamatayon. …
“Si Elder Neal A. Maxwell (1926–2004) sa Korum sa Napulog Duha ka mga Apostoles … namulong kabahin sa pag-antus sa Pag-ula:
“‘Sa Getsemani, ang pag-antus ni Jesus misugod na nga “[ma]kakulba” (Marcos 14:33), o, sa Gresyanhon,“makahadlok” ug “makahingangha.”
“‘Hunahunaa, si Jehovah, ang Tiglalang niini nga kalibutan ug sa uban pa, nga “nahingangha”! … Wala pa gayud Siya sukad masayud sa grabeng kasakit ug higpit nga proseso sa pag-ula. Sa ingon, sa diha nga ang paghingutas miabut diha sa kahingpitan niini, kini sobra pa, sobra pa gayud kaayo kay sa nahunahuna Niya bisan pa sa Iyang talagsaon nga salabutan! …
“‘Ang nahiusa nga gibug-aton sa tanang mortal nga kasal-anan—nangagi, karon, ug sa umaabut—midat-ug nianang hingpit, walay sala, ug sensitibo nga Kalag! Ang tanan natong mga kahuyang ug mga sakit nahimo, usab, nga parte sa makalilisang nga kwentada sa Pag-ula. (Tan-awa sa Alma 7:11–12; Isa. 53:3–5; Mat. 8:17.)’ (‘Willing to Submit,’ Ensign, Mayo 1985, 72–73)” (New Testament Student Manual [manwal sa Church Educational System, 2014], 130).