Librarya
Pasiuna sa Manwal sa Seminary Teacher sa Bag-ong Tugon

Pasiuna sa Manwal sa Seminary Teacher sa Bag-ong Tugon

Ang Atong Katuyoan

Ang Tumong sa Seminaries and Institutes of Religion namahayag:

“Ang atong katuyoan mao ang pagtabang sa mga batan-on ug mga young adult nga makasabut ug makasalig sa mga pagtulun-an ug Pag-ula ni Jesukristo, mahimong takus alang sa mga panalangin sa templo, ug makaandam sa ilang kaugalingon, sa ilang mga pamilya, ug sa uban alang sa kinabuhing dayon uban sa ilang Amahan sa Langit” (Gospel Teaching and Learning: A Handbook for Teachers and Leaders in Seminaries and Institutes of Religion [2012], 1).

Aron makab-ut ang atong tumong, motudlo kita sa mga estudyante sa mga doktrina ug mga baruganan sa ebanghelyo nga makita diha sa mga kasulatan ug sa mga pulong sa mga propeta. Kini nga mga doktrina ug mga baruganan gitudlo sa paagi nga mogiya ngadto sa pagsabut ug pagkalig-on. Kita motabang sa mga estudyante nga sila makatuman sa ilang bahin sa proseso sa pagkat-on ug moandam kanila sa pagtudlo sa ebanghelyo ngadto sa uban.

Aron sa pagtuman niini nga mga tumong, ikaw ug ang mga estudyante nga imong gitudloan giawhag sa paglakip sa mosunod nga Mga Sukaranan sa Pagtudlo ug Pagkat-on sa Ebanghelyo samtang dungan kamo nga magtuon sa mga kasulatan:

  • Motudlo ug magkat-on pinaagi sa Espiritu.

  • Mag-ugmad og kahimtang sa pagkat-on nga may gugma, pagtahud, ug katuyoan.

  • Magtuon sa mga kasulatan matag adlaw, ug magbasa sa teksto sa kurso. [Ang mga tsart sa pagsubay sa pagbasa sa kasulatan sa tibuok Bag-ong Tugon makita diha sa New Testament Scripture Mastery Cards sa LDS.org ug sa store.lds.org (item nu. 10480).]

  • Makasabut sa konteksto ug sulod [content] sa mga kasulatan ug sa mga pulong sa mga propeta.

  • Makaila, makasabut, ug mobati sa kamatuoran ug kaimportante, ug magamit ang mga doktrina ug mga baruganan.

  • Makapasabut, makapakigbahin, ug makapamatuod sa mga doktrina ug mga baruganan sa ebanghelyo.

  • Makasag-ulo sa importanting mga tudling sa kasulatan ug Sukaranang mga Doktrina” (Gospel Teaching and Learning, 10).

Agig dugang sa pagkab-ot niini nga mga tumong, kinahanglang imong tabangan ang mga estudyante nga magmatinud-anon sa ebanghelyo ni Jesukristo ug makat-on sa pag-ila sa kamatuoran gikan sa sayop. Ang mga estudyante mahimong adunay mga pangutana mahitungod sa doktrina, kasaysayan, o posisyon sa Simbahan kabahin sa sosyal nga mga isyu. Mahimo nimong maandam ang mga estudyante sa pagtubag sa ingon nga mga pangutana pinaagi sa pagtabang kanila nga “[pangitaon] ang pagtulun-an, gani pinaagi sa pagtuon ug usab pinaagi sa hugot nga pagtuo” (D&P 88:118) ug sa paggamit sa mga kapanguhaan diha sa Pangitaa ang Kamatuoran nga seksyon sa si.lds.org.

Kini nga manwal sa magtutudlo giandam sa pagtabang kaninyo nga magmalampuson sa pagkab-ot niini nga mga tumong.

Pagpangandam sa Leksyon

Ang Ginoo misugo niadtong nagtudlo sa Iyang ebanghelyo nga “magtudlo sa mga baruganan sa akong ebanghelyo, nga anaa sa Biblia ug sa Basahon ni Mormon, diin anaa ang kahingpitan sa ebanghelyol” (D&P 42:12). Siya dugang nga misugo nga kini nga mga kamatuoran kinahanglang itudlo ingon nga “gimandoan pinaagi sa Espiritu,” nga “ihatag … pinaagi sa pag-ampo sa hugot nga pagtuo” (D&P 42:13–14). Samtang nag-andam ka sa matag leksyon, magmainampuon sa pagtinguha sa giya sa Espiritu aron sa pagtabang kanimo sa pagsabut sa mga kasulatan ug sa mga doktrina ug mga baruganan nga anaa niini. Sa samang paagi, sunda ang mga aghat sa Espiritu samtang nagplano ka unsaon sa pagtabang sa imong mga estudyante nga makasabut sa mga kasulatan, makakat-on nga matudloan pinaagi sa Espiritu Santo, ug mobati og tinguha sa paggamit sa unsay ilang nakat-unan.

Niini nga kurso, ang Bag-ong Tugon mao ang nag-una nimong teksto sa imong pagpangandam ug pagtudlo. Magmainampuon sa pagtuon sa mga kapitulo o mga bersikulo nga imong itudlo. Tinguhaa ang pagsabut sa konteksto ug sulod sa scripture block, lakip ang dagan sa istorya, mga katawhan, mga dapit, ug mga panghitabo. Samtang mapamilyar ka sa konteksto ug sulod sa scripture block, paningkamuti ang pag-ila sa mga doktrina ug mga baruganan nga naglangkob niini, ug desisyuni unsa nga mga kamatuoran ang labing importante nga masabtan ug magamit sa imong mga estudyante. Kon matino na nimo kon unsay imong tutokan, ideterminar unsa nga mga paagi ug mga kalihokan ang labing makatabang sa imong mga estudyante nga makat-on ug magamit ang sagrado nga mga kamatuoran nga makaplagan diha sa mga kasulatan.

Kini nga manwal gidesinyo aron sa pagtabang kanimo niini nga proseso. Ribyuha og maayo ang materyal sa leksyon nga motukma sa scripture block nga imong itudlo. Mahimo kang mopili nga mogamit sa tanan o parte lang sa mga sugyot alang sa scripture block, o mahimo nimong ipahiangay ang gisugyot nga mga ideya ngadto sa mga panginahanglan ug mga sirkumstansya sa mga estudyante nga imong gitudloan.

Importante nga imong tabangan ang mga estudyante sa pagtuon sa tibuok nga scripture block sa matag leksyon. Ang pagbuhat niini makatabang sa mga estudyante nga masabtan ang hingpit nga mensahe nga gustong ipasabut sa tigsulat sa kasulatan. Hinoon, samtang magplano ka sa imong leksyon, mahimong madiskubrehan nimo nga wala kay igong panahon sa usa ka klasehan aron magamit ang tanang mga sugyot sa pagtudlo diha sa manwal. Tinguhaa ang giya sa Espiritu ug mainampuong ikonsiderar ang mga panginahanglan sa imong mga estudyante samtang imong ideterminar kon unsa nga bahin sa scripture block ang hatagan og gibug-aton aron sa pagtabang sa mga estudyante nga mobati sa kamatuoran ug kaimportante sa mga kamatuoran sa ebanghelyo ug gamiton kini diha sa ilang kinabuhi. Kon kulang ang oras, tingali kinahanglang ipahiangay nimo ang ubang bahin sa leksyon pinaagi sa daklit nga pag-summarize og usa ka grupo sa mga bersikulo o pinaagi sa paggiya sa mga estudyante nga daling mailhan ang usa ka baruganan o doktrina sa dili pa mopadayon sa sunod nga grupo sa mga bersikulo.

Samtang imong gikonsiderar unsaon sa pagpahiangay sa mga materyal sa leksyon, siguroha nga masunod kini nga tambag gikan ni Elder Dallin H. Oaks sa Korum sa Napulog Duha ka mga Apostoles:

“Si Presidente Packer kanunayng nagtudlo, sa akong pandungog, nga una atong hangupon, dayon atong ipahiangay. Kon tinud-anay kitang nakatutok sa gitakda nga leksyon nga atong ihatag, nan makasunod kita sa Espiritu sa pagpahiangay niini” (“4.3.4 Decide through Inspiration,” gikan sa “A Panel Discussion with Elder Dallin H. Oaks” [satellite broadcast sa Seminaries and Institutes of Religion, Ago. 7, 2012]; LDS.org).

Samtang nangandam ka sa pagtudlo, pagmahunahunaon sa mga estudyante nga adunay piho nga mga panginahanglan. Ipahiangay ang mga kalihokan ug mga ekspektasyon aron sa pagtabang kanila nga magmalampuson. Ang pagpakigsulti ngadto sa mga ginikanan ug mga lider makatabang nimo nga makahibalo sa mga panginahanglan sa mga estudyante ug makatabang nimo nga magmalampuson sa paghatag og makahuluganon ug makapalig-on nga kasinatian alang sa mga estudyante.

Atol sa imong pagpangandam sa leksyon, mahimo nimong gamiton ang Notes ug Journal tools diha sa LDS.org o diha sa Gospel Library sa mobile nga mga device. Makagamit ka niini nga mga himan sa pagmarka sa mga kasulatan, mga pakigpulong sa komperensya, mga artikulo sa mga magasin sa Simbahan, ug mga leksyon. Makahimo ka usab sa pagdugang ug pag-save og mga sulat aron magamit sa imong mga leksyon. Aron mas makat-on pa kon unsaon sa paggamit niini nga mga himan, tan-awa sa Notes and Journal Help nga pahina sa LDS.org.

Ang ubang mga materyal niini nga manwal gipahiangay gikan sa New Testament Student Manual (Manwal sa Church Educational System, 2014).

Paggamit sa Manwal sa Daily Teacher

Pasiuna sa Basahon

Ang mga pasiuna sa basahon naghatag og kinatibuk-ang pagpasabut sa matag basahon. Gawas sa uban pang mga butang, kini nagpasabut kinsa ang misulat sa matag basahon, naghulagway sa pipila ka mga butang nga nakalahi sa matag basahon, ug naghatag og usa ka summary sa sulod sa matag basahon.

Pasiuna sa Scripture Block

Ang mga pasiuna sa scripture block naghatag og mubo nga kinatibuk-ang pagpasabut sa konteksto ug sulod sa scripture block alang sa matag leksyon.

Grupo sa mga bersikulo ug Summary base sa Konteksto

Ang mga scripture block kasagaran gibahin ngadto sa gagmay nga mga bahin o mga grupo sa mga bersikulo nga nagtutok sa usa ka partikular nga hilisgutan o lihok. Ang pakisayran alang sa matag grupo sa bersikulo gisundan og mubo nga summary sa mga panghitabo o mga pagtulun-an sulod niana nga grupo sa mga bersikulo.

Mga Tabang sa Pagtudlo

Ang mga tabang sa pagtudlo nagpasabut sa mga baruganan ug mga pamaagi sa pagtudlo sa ebanghelyo. Makatabang kini kanimo sa imong mga paningkamot sa paglambo isip usa ka magtutudlo.

Sulod sa Leksyon

Ang sulod sa leksyon naglakip og giya alang kanimo samtang magtuon ug magtudlo ka. Nagsugyot kini og mga ideya sa pagtudlo, lakip sa mga pangutana, mga kalihokan, mga kinutlo, mga diagram, ug mga tsart.

Mga Doktrina ug mga Baruganan

Samtang ang mga doktrina ug mga baruganan natural nga motumaw gikan sa pagtuon sa teksto sa kasulatan, kini gipabaga [bold] aron matabangan ka sa pag-ila ug pagtutok niini sa imong diskusyon uban sa mga estudyante.

Mga Litrato

Ang mga litrato sa mga lider sa Simbahan ug mga panghitabo gikan sa mga kasulatan nagrepresentar sa mga visual aid nga mahimo nimong ipakita, kon anaa, samtang magtudlo ka.

Scripture Mastery

Ang 25 ka mga scripture mastery passage nga makita diha sa Bag-ong Tugon gi-highlight diha sa konteksto sa mga leksyon nga kini makita. Ang matag usa niini nga mga leksyon naglakip usab og usa ka ideya sa pagtudlo alang niini nga mga tudling. Aron matabangan ka nga magmakanunayon sa pagtudlo sa mga scripture mastery passage, ang pangribyu nga mga kalihokan sa scripture mastery nagkatap sa tibuok manwal. Alang sa dugang nga mga ideya sa pagtudlo sa scripture mastery, tan-awa sa apendiks niini nga manwal o sa Seminary Student Resources sa LDS.org.

Kolum nga Luna

Ang kolum nga luna diha sa giimprinta nga manwal sa magtutudlo mahimong magamit alang sa pagpangandam sa leksyon, lakip ang paghimo og mubo nga mga sulat, mga baruganan, mga kasinatian, o uban pang mga ideya, kon gidasig ka sa Espiritu Santo.

Komentaryo ug Background nga Impormasyon

Ang dugang nga mga kinutlo ug mga pagpasabut gihatag diha sa katapusan sa ubang mga leksyon aron madugangan ang imong pagsabut sa konteksto sa kasaysayan, piho nga mga konsepto, o mga tudling sa kasulatan. Gamita ang impormasyon niini nga seksyon sa pagpangandam sa pagtubag sa mga pangutana ug sa paghatag og dugang nga mga ideya samtang magtudlo ka. Ang dugang nga mga komentaryo makita diha sa digital nga mga bersyon niini nga manwal sa LDS.org ug sa Gospel Library app.

Dugang nga mga Ideya sa Pagtudlo

Ang dugang nga mga ideya sa pagtudlo makita diha sa katapusan sa ubang mga leksyon. Naghatag kini og mga sugyot sa pagtudlo sa mga doktrina ug mga baruganan nga mahimong wala gipaila o gipasabut og maayo diha sa sulod sa leksyon. Kini usab makahatag og mga sugyot sa paggamit og biswal nga media, sama sa mga pasundayag sa DVD ug mga video diha sa LDS.org. Ang dugang nga mga ideya sa pagtudlo makita diha sa digital nga mga bersyon niini nga manwal sa LDS.org ug sa Gospel Library app.

Programa sa Daily Seminary (Released-Time ug Sayo sa Buntag)

Kini nga manwal naglakip sa mosunod nga mga elemento alang sa mga magtutudlo sa daily seminary: 160 ka mga leksyon sa daily teacher, mga tabang sa pagtudlo, mga pasiuna sa basahon, ug mga kapanguhaan sa pagtudlo sa scripture mastery ug Sukaranang mga Doktrina.

Mga Pasiuna sa Basahon

Ang mga pasiuna sa mga basahon gibutang sa dili pa ang unang leksyon sa matag basahon sa kasulatan. Ang mga pasiuna sa mga basahon naghatag og kinatibuk-ang pagpasabut sa matag basahon pinaagi sa pagtubag sa mosunod nga mga pangutana: Ngano nga kinahanglang tun-an kini nga basahon? Kinsa ang nagsulat niini nga basahon? Kanus-a ug diin kini gisulat? Para kang kinsa kini gisulat ug ngano? ug Unsa ang pipila ka mga butang nga nakalahi niini nga basahon? Ang mga pasiuna daklit usab nga milatid sa sulod sa matag basahon. Ang mga magtutudlo kinahanglan mohiusa sa konteksto ug background nga impormasyon gikan sa mga pasiuna sa basahon ngadto sa mga leksyon kon gikinahanglan.

Mga Leksyon sa Daily Teacher

Format sa Leksyon

Ang matag leksyon niini nga manwal nagtutok sa usa ka scripture block imbis sa usa ka partikular nga konsepto, doktrina, o baruganan. Kini nga format makatabang kanimo ug sa imong mga estudyante sa pagtuon sa mga kasulatan sa pasunod nga paagi ug sa paghisgut sa mga doktrina ug mga baruganan kon natural kini nga motumaw gikan sa teksto sa kasulatan. Samtang ang mga estudyante makakat-on sa konteksto diin makita ang usa ka doktrina o baruganan, ang ilang pagsabut niana nga kamatuoran mahimong molambo. Agig dugang, ang mga estudyante mas makakita ug makasabut sa hingpit nga tumong sa mga mensahe nga gustong ipasabut sa dinasig nga mga tigsulat sa kasulatan. Ang pagtudlo sa mga kasulatan niini nga paagi makatabang usab sa mga estudyante nga makakat-on unsaon sa pagdiskobre ug sa paggamit sa mahangturong mga kamatuoran diha sa ilang personal nga pagtuon sa kasulatan.

Sa matag leksyon, dili ang tanang mga bahin sa scripture block gihatagan og gibug-aton. Ang pipila ka bahin makadawat og minos nga pagtagad tungod kay kini dili kaayo mahinungdanon sa kinatibuk-ang mensahe sa dinasig nga tigsulat o tungod kay kini dili kaayo magamit sa mga kabatan-onan. Imong responsibilidad nga ipahaum kini nga mga materyal sumala sa mga panginahanglan ug mga interes sa mga estudyante nga imong gitudloan. Mahimo nimong ipahaum ang mga ideya sa leksyon niini nga manwal pinaagi sa pagpili nga mas hatagan og gibug-aton ang usa ka partikular nga doktrina o baruganan kay sa gihatag diha sa materyal sa leksyon o pinaagi sa pagpili nga dili kaayo hatagan og gibug-aton ang usa ka bahin sa scripture block nga gipasabut og maayo diha sa manwal. Tinguhaa ang giya sa Espiritu Santo sa pagtabang kanimo sa paghimo niini nga mga pagpahiangay samtang nangandam ug nagtudlo ka.

Mga Doktrina ug mga Baruganan

Diha sa sulod sa matag leksyon, makita nimo nga ang pipila ka mahinungdanong mga doktrina ug mga baruganan gipaklaro pinaagi sa pagpabaga. Kini nga mga doktrina ug mga baruganan gitino diha sa kurikulum tungod kay (1) nagpakita kini sa importanting mensahe diha sa scripture block, (2) piho kining magamit ngadto sa mga panginahanglan ug mga kahimtang sa mga estudyante, o (3) mahinungdanon kining mga kamatuoran nga makatabang sa mga estudyante nga mapalambo ang ilang relasyon ngadto sa Ginoo. Magmatngon nga ang Bag-ong Tugon nagtudlo sa daghang mga kamatuoran nga sobra pa sa gitino diha sa kurikulum. Si Presidente Boyd K. Packer sa Korum sa Napulog Duha ka mga Apostoles mitudlo nga ang mga kasulatan naglakip sa “walay katapusan nga mga kombinasyon sa mga kamatuoran nga mohaum sa panginahanglan sa matag indibidwal diha sa matag kahimtang” (“The Great Plan of Happiness” [CES Symposium kabahin sa Doktrina ug mga Pakigsaad/Kasaysayan sa Simbahan, Ago. 10, 1993], si.lds.org; tan-awa usab sa Teaching Seminary: Preservice Readings [2004], 69, LDS.org).

Samtang magtudlo ka, kanunay hatagi ang mga estudyante og mga oportunidad sa pag-ila sa mga doktrina ug mga baruganan diha sa mga kasulatan. Samtang ang mga estudyante mopahayag sa mga kamatuoran nga ilang madiskobrehan, sila kasagaran mogamit og mga pulong nga lahi kay sa giunsa pagpahayag ang usa ka doktrina o baruganan niini nga manwal. Sila mahimo usab nga makadiskubre og mga kamatuoran nga wala gilakip diha sa outline sa leksyon. Pagmainampingon nga dili mosugyot nga sayop ang mga tubag sa mga estudyante tungod lang kay ang mga pulong nga ilang gigamit sa pagpahayag niini lahi kay sa niadtong gigamit sa manwal o tungod kay sila miila og usa ka kamatuoran nga wala mahisguti sa kurikulum. Hinoon, kon ang pamahayag sa usa ka estudyante sayop nga doktrina, imong responsibilidad nga hinay-hinay nga tabangan ang estudyante nga mokorihir sa iyang pamahayag samtang imentinar ang usa ka palibut sa gugma ug pagsalig. Ang pagbuhat sa ingon mahimong mohatag og importanteng kasinatian sa pagkat-on alang sa mga estudyante sa imong klase.

Gipaspason

Kini nga manwal naglakip sa 160 ka inadlaw nga mga leksyon sa seminary. Mahimo nimong ipahiangay ang mga leksyon ug gipaspason sigun sa gidugayon sa panahon nga imong itudlo kini nga kurso. Tan-awa ang apendiks niini nga manwal alang sa usa ka sampol sa giya sa gipaspason. Ang giya sa gipaspason gibase sa 36 ka semana o 180 ka adlaw nga school year ug naglakip og 20 ka “pailin-ilin nga mga adlaw” nga magamit nimo sa pagpahiangay sa inadlaw nga mga leksyon, pagtabang sa mga estudyante nga masag-ulo ang mahinungdanong mga tudling sa kasulatan ug Sukaranang mga Doktrina, pagribyu sa miaging mga materyal, pagpahigayon ug pagribyu sa gikinahanglan nga mga learning assessment, ug pagpangandam alang sa mga pagkabalda sa iskedyul.

Apas nga Buluhaton [Makeup Work]

Ang Giya sa Pagtuon sa Bag-ong Tugon alang sa mga Estudyante sa Home-Study Seminary mahimong gamiton sa mga programa sa daily seminary isip kapanguhaan aron sa pagsangkap sa mga estudyante nga adunay apas nga buluhaton [makeup work]. Ang mga leksyon sa giya sa pagtuon alang sa mga estudyante sa home-study motukma niadtong gipresentar niini nga manwal. Ang mga estudyante nga naghinobra ang palta sa klase mahimong i-assign sa pagkompleto sa mga buluhaton diha sa giya sa pagtuon nga motakdo sa hilisgutan nga ilang napaltahan sa klase. Ang mga assignment mahimong maimprinta gikan sa LDS.org, mao nga dili na nimo kinahanglang ihatag ang tibuok manwal ngadto sa mga estudyante nga kinahanglan mobuhat sa mga apas nga buluhaton. Ang dugang nga impormasyon mahitungod sa Giya sa Pagtuon sa Bag-ong Tugon alang sa mga Estudyante sa Home-Study Seminary gihatag diha sa seksyon nga giulohan og “Programa sa Home-Study Seminary” niini nga manwal.

Mga Tabang sa Pagtudlo

Ang mga tabang sa pagtudlo makita diha sa mga kilid niini nga manwal. Kini nga mga tabang sa pagtudlo nagpasabut ug naghulagway kon sa unsang paagi ikaw ug ang mga estudyante nga imong gitudloan makagamit sa Mga Sukaranan sa Pagtudlo ug Pagkat-on sa Ebanghelyo sa inyong pagtuon sa Bag-ong Tugon. Kini usab nagtanyag og mga sugyot kon unsaon ang epektibong paggamit og lain-laing mga pamaagi ug mga kahanas sa pagtudlo. Samtang makasabut ka sa mga baruganan nga anaa sa mga tabang sa pagtudlo, pangita og mga paagi sa kanunay nga pagpraktis ug paggamit niini sa imong pagtudlo.

Scripture Mastery ug Sukaranang mga Doktrina

Aron matabangan ang mga estudyante nga ipakabililhon ang mahangturong mga kamatuoran ug mapalambo ang ilang pagsalig diha sa pagkat-on ug pagtudlo gikan sa mga kasulatan, ang Seminaries and Institutes of Religion (S&I) mipili og pipila ka mga tudling sa kasulatan nga sag-ulohon sa mga estudyante sa matag kurso sa pagtuon. Dugang pa, usa ka lista sa Sukaranang mga Doktrina gilakip aron mapatataw ang importanting mga doktrina nga kinahanglang masabtan, matuohan, ug masunod sa mga estudyante sa tibuok upat ka tuig nila sa seminary ug sa tibuok nilang kinabuhi. Ang manwal sa kada kurso sa seminary gihimo aron mahatagan og gibug-aton ang Sukaranang mga Doktrina sa pagtumaw niini atol sa pasunod nga pagtuon sa usa ka estudyante sa mga kasulatan. Daghan sa mga scripture mastery passage gipili nga ang Sukaranang mga Doktrina maoy gihunahuna, mao nga samtang kamo magtudlo sa mga scripture mastery passage ngadto sa mga estudyante, imong matudlo usab ang Sukaranang mga Doktrina.

Samtang ang mga estudyante momanggad sa mahangturong mga kamatuoran diha sa ilang mga hunahuna ug kasingkasing, ang Espiritu Santo mopahinumdom kanila niini nga mga kamatuoran sa mga panahon sa panginahanglan ug mohatag nila og kaisug sa paglihok pinaagi sa hugot nga pagtuo (tan-awa sa Juan 14:26). Si Presidente Howard W. Hunter mitudlo:

“Kusganon akong moawhag kaninyo sa paggamit sa mga kasulatan sa inyong pagtudlo ug sa pagbuhat sa tanan diha sa inyong gahum sa pagtabang sa mga estudyante sa paggamit niini ug mahimong komportable niini. Gusto nako nga ang atong mga batan-on adunay pagsalig diha sa mga kasulatan. …

“… Gusto nato nga ang mga estudyante makabaton og pagsalig diha sa kalig-on ug mga kamatuoran sa mga kasulatan, pagsalig nga ang ilang Langitnong Amahan sa tinuod nakigsulti nganha kanila pinaagi sa mga kasulatan, ug pagsalig nga sila makabasa sa mga kasulatan ug makakaplag og mga tubag sa ilang mga problema ug sa ilang mga pag-ampo. …

“… Manghinaut kami nga walay usa sa inyong mga estudyante nga mobiya sa inyong classroom nga nahadlok o nasagmuyo o naulaw nga wala sila makakita sa tabang nga ilang gikinahanglan tungod kay wala kaayo sila mahibalo sa mga kasulatan aron makit-an ang tukma nga mga tudling”(“Eternal Investments” [pakigpulong ngadto sa mga CES religious educator, Peb. 10, 1989], 2, si.lds.org; tan-awa usab sa Teaching Seminary: Preservice Readings [2004], 20, LDS.org).

Tan-awa sa apendiks niini nga manwal alang sa dugang impormasyon kabahin sa scripture mastery ug Sukaranang mga Doktrina.

Paggamit sa mga Leksyon sa Home-Study

Summary sa mga Leksyon sa Estudyante

Ang summary motabang kanimo nga mapamilyar ang imong kaugalingon sa konteksto ug sa mga doktrina ug mga baruganan nga gitun-an sa mga estudyante atol sa semana diha sa giya sa pagtuon sa estudyante.

Pasiuna sa Leksyon

Ang pasiuna sa leksyon makatabang kanimo nga mahibalo kon unsa nga porsyon sa scripture block ang hatagan og gibug-aton diha sa leksyon.

Grupo sa mga bersikulo ug Summary base sa Konteksto

Ang mga bersikulo gigrupo sumala sa kon asa ang mga kausaban sa konteksto o sulod mahitabo sa tibuok scripture block. Ang pakisayran alang sa matag grupo sa bersikulo gisundan og mubo nga summary sa mga panghitabo o mga pagtulun-an sulod niana nga grupo sa mga bersikulo.

Sulod sa Leksyon

Ang sulod sa leksyon naghatag og giya alang kanimo samtang magtuon ug magtudlo ka. Nagsugyot kini og mga ideya sa pagtudlo, lakip sa mga pangutana, mga kalihokan, mga kinutlo, mga diagram, ug mga tsart.

Mga Doktrina ug mga Baruganan

Samtang ang mga doktrina ug mga baruganan natural nga motumaw gikan sa pagtuon sa teksto sa kasulatan, kini gipabaga [bold] aron matabangan ka sa pag-ila ug pagtutok niini sa imong diskusyon uban sa mga estudyante.

Pasiuna sa Sunod nga Unit

Ang katapusang paragraph sa matag leksyon naghatag og daklit nga panglantaw ngadto sa sunod nga unit. Ipakigbahin kini nga paragraph sa imong mga estudyante sa pagtapos sa matag leksyon aron sa pagtabang kanila nga maghinam-hinam sa pagtuon sa mga kasulatan atol sa umaabut nga semana.

Programa sa Home-Study Seminary

Ubos sa direksyon sa lokal nga mga lider sa priesthood ug sa representante sa S&I, ang mga klase sa home-study seminary mahimong i-organisar sa mga dapit diin ang mga estudyante dili makatambong og kada adlaw nga klase tungod sa distansya o uban pang mga rason (sama sa usa ka kakulangan). Ang mga klase sa home-study seminary sa kinatibuk-an dili himoon sa mga dapit nga ang inadlaw nga mga klase (sulod sa semana) gipahigayon pinaagi sa sayo sa buntag o released-time nga seminary.

Ang programa sa home-study nagtugot sa mga estudyante nga makadawat og kredito sa seminary pinaagi sa pagkompleto sa tagsa-tagsa ka mga leksyon diha sa panimalay kay sa pagtambong og mga klase sa mga adlaw sulod sa semana. Kini nga mga leksyon makita diha sa lahi nga manwal nga gitawag nga Giya sa Pagtuon sa Bag-ong Tugon alang sa mga Estudyante sa Home-Study Seminary. Kausa matag semana, ang mga estudyante mag-abut uban sa usa ka magtutudlo sa seminary aron sa pagsumiter sa ilang mga buhat ug pag-apil sa usa ka leksyon sa classroom. Ang giya sa pagtuon sa estudyante ug sinemanang mga leksyon sa classroom mas gipasabut og dugang sa ubos.

Giya sa Pagtuon alang sa mga Estudyante sa Home-Study

Ang Giya sa Pagtuon sa Bag-ong Tugon alang sa mga Estudyante sa Home-Study Seminary gidesinyo aron matabangan ang mga estudyante nga home-study nga makadawat og usa ka kasinatian sa pagtuon sa Bag-ong Tugon nga susama ngadto sa mga estudyante sa seminary nga magtambungan og mga klase sa mga adlaw sa semana. Busa, ang gipaspason sa giya sa pagtuon sa estudyante ingon man usab ang mga doktrina ug mga baruganan nga gihatagan og gibug-aton niini motukma sa materyal niini nga manwal. Ang giya sa pagtuon sa estudyante naglakip usab og instruksyon sa scripture mastery. Ang mga scripture mastery passage gihisgutan sa konteksto ingon nga kini makita diha sa teksto sa kasulatan, ug kasagaran ang mga kalihokan sa pagsulat gihatag diha sa mga leksyon diin ang mga tudling gihisgutan.

Matag semana, ang mga estudyante sa home-study nga seminary kinahanglang mokompleto og upat ka mga leksyon gikan sa giya sa pagtuon sa estudyante ug moapil sa sinemana nga leksyon nga ihatag sa ilang seminary teacher. Ang mga estudyante mokompleto sa ginumerohan nga mga buluhaton gikan sa giya sa pagtuon diha sa ilang mga scripture study journal. Ang mga estudyante kinahanglan nga adunay duha ka mga scripture study journal aron mabilin nila ang usa diha sa ilang magtutudlo ug makapadayon sa pagtrabaho diha sa lain. Samtang ang mga estudyante makigtagbo sa ilang magtutudlo matag semana, ang usa ka journal i-sumiter ngadto sa home-study teacher ug ang lain ihatag og balik ngadto sa estudyante aron gamiton alang sa mga leksyon sa sunod semana. (Sama pananglit, atol sa usa ka semana, ang estudyante mokompleto sa mga assignment diha sa primerong journal. Ang estudyante dayon modala niini nga journal sa klase ug mohatag niini ngadto sa magtutudlo. Atol sa sunod semana, ang estudyante mokompleto sa mga assignment diha sa ikaduhang journal. Kon ang estudyante mosumiter sa ikaduhang journal, ang magtutudlo mouli sa primerong journal. Gamiton dayon sa estudyante ang primerong journal aron kompletuhon ang mga assignment alang sa sunod nga semana.)

Ang tanang mga estudyante sa seminary giawhag sa pagtuon sa kasulatan sa matag adlaw ug sa pagbasa sa teksto alang sa kurso, apan ang mga estudyante sa home-study kinahanglang makasabut nga sila gilauman nga mogahin og dugang 30 ngadto sa 40 ka minutos sa matag usa sa upat ka mga leksyon sa home-study sa kada unit ug motambong sa sinemana nga leksyon sa home-study.

Sinemana nga mga Leksyon sa Home-Study nga Magtutudlo

Ang matag unit diha sa Giya sa Pagtuon sa Bag-ong Tugon alang sa mga Estudyante sa Home-Study Seminary motakdo ngadto sa lima ka mga leksyon diha sa manwal sa daily teacher. Human sa matag ikalima nga leksyon niini nga manwal, imong makita ang usa ka sinemana nga leksyon sa home-study nga magtutudlo. Ang mga leksyon sa home-study motabang sa mga estudyante sa pagribyu, pagpalawom sa ilang pagsabut, ug paggamit sa mga doktrina ug mga baruganan nga ilang nakat-unan samtang ilang gikompleto ang mga leksyon sa giya sa pagtuon sa estudyante atol sa semana. Kini nga mga leksyon mahimo usab nga mosuhid og dugang nga mga kamatuoran nga wala maapil sa giya sa pagtuon sa estudyante. (Alang sa tabang sa pagplano sa eskedyul sa imong leksyon, tan-awa ang giya sa gipaspason alang sa mga home-study teacher sa apendiks niini nga manwal.)

Isip usa ka magtutudlo sa home-study, kinahanglang makaangkon ka og lawom nga pagsabut sa gitun-an sa imong mga estudyante diha sa panimalay matag semana aron makatubag ka sa mga pangutana ug makahimo og makahuluganon nga mga diskusyon kon makigtagbo ka kanila. Hangyoa ang mga estudyante sa pagdala sa ilang mga kasulatan, mga scripture study journal, ug mga giya sa pagtuon sa estudyante ngadto sa sinemana nga klase aron makadangup sila niini atol sa leksyon. Ipahiangay ang mga leksyon sumala sa panginahanglan sa mga estudyante nga imong gitudloan ug sumala sa giya sa Espiritu Santo. Mahimo usab ka nga modangup sa mga leksyon sa daily teacher niini nga manwal samtang mangandam ug magtudlo ka. Ang pagtuon sa mga tabang sa pagtudlo ug mga pamaagi nga gigamit sa mga leksyon sa kada adlaw makatabang sa pagpalambo sa imong sinemana nga pagtudlo. Atimana ang bisan unsang partikular nga mga panginahanglan sa mga estudyante nga imong gitudloan. Sama pananglit, kon ang usa ka estudyante maglisud sa pagsulat, tugoti siya nga mogamit og voice-recording device o modiktar sa iyang mga hunahuna ngadto sa usa ka sakop sa pamilya o higala kinsa maoy mosulat sa iyang mga tubag.

Sa katapusan sa matag sinemana nga leksyon, kolektaha ang mga scripture study journal sa mga estudyante ug awhaga sila sa ilang padayon nga pagtuon. Hatagi sila og usa ka scripture study journal alang sa sunod semana nga mga assignment, sama sa gipasabut sa itaas diha sa seksyon nga gitawag og “Giya sa Pagtuon alang sa mga Estudyante sa Home-Study.” (Ubos sa direksyon sa mga lider sa priesthood ug sa mga ginikanan, ang mga seminary teacher sa stake [gitawag] mahimong makig-istorya sa elektronik nga paagi ngadto sa mga estudyante nga na-enrol sa home-study nga seminary.)

Samtang imong basahon ang mga assignment diha sa mga scripture study journal sa mga estudyante, tubaga matag karon ug unya ang ilang buhat pinaagi sa paghimo og mubo nga sulat o pagkomentaryo sa sunod higayon nga imo silang makit-an. Mahimo ka usab nga mangita og laing mga paagi sa paghatag og suporta ug makahuluganon nga feedback. Kini makatabang sa mga estudyante nga masayud nga nagpakabana ka sa ilang trabaho ug motabang sa pagdasig kanila nga tarungon og maayo ang ilang mga tubag.

Kadaghanan sa mga paningkamot sa mga estudyante sa pagsag-ulo sa mahinungdanong mga tudling sa kasulatan himoon samtang ilang kompletuhon ang ilang home-study nga mga leksyon. Ang mga magtutudlo sa home-study mahimong mo-follow up sa mga paningkamot sa mga estudyante atol sa mga leksyon sa home-study pinaagi sa pagdapit sa mga estudyante sa pag-recite o pagribyu sa mga scripture mastery passage nga motumaw diha sa teksto alang sa unit sa pagtuon niana nga semana.

Ubang mga Kapanguhaan

LDS.org

Ang Manwal sa Seminary Teacher sa Bag-ong Tugon (nttm.lds.org) ug ang Giya sa Pagtuon sa Bag-ong Tugon alang sa mga Estudyante sa Home-Study Seminary anaa sa LDS.org ug sa Gospel library sa mga mobile device. Ang digital nga mga bersyon sa manwal sa magtutudlo naglakip og dugang nga Komentaryo ug Background nga Impormasyon, Dugang nga mga Ideya sa Pagtudlo, ug media nga mga kapanguhaan nga wala ilakip niining giimprinta nga manwal tungod sa limitasyon sa luna.

si.lds.org

Ang mga magtutudlo makabisita sa Seminaries and Institutes of Religion website (si.lds.org) alang sa tabang sa pagpangandam sa leksyon ug sa pagpangita og dugang nga mga ideya sa pagtudlo.

Notes ug Journal Tools

Ang mga magtutudlo ug mga estudyante mahimong mogamit sa internet ug mobile nga mga Notes ug Journal tools sa pagmarka ug pagdugang og mubo nga sulat sa digital nga mga bersyon niini nga mga manwal samtang sila nag-andam sa mga leksyon ug nagtuon sa mga kasulatan. Ang mga manwal sa magtutudlo ug mga giya sa pagtuon sa estudyante anaa usab sa LDS.org aron ma-download sa lahi nga mga format (sama sa PDF, ePub, ug mobi [Kindle] nga mga file).

Dugang nga mga Butang

Ang mosunod nga mga kapanguhaan anaa sa internet, pinaagi sa imong superbisor, pinaagi sa lokal nga mga sentro sa pagpang-apud-apod sa Simbahan, ug pinaagi sa online store sa Simbahan (store.lds.org):