1 Mga Taga-Corinto 15–2 Mga Taga-Corinto 7 (Unit 23)

Materyal sa Pagpangandam alang sa Home-Study Teacher

Summary sa mga Leksyon sa Daily Home-Study

Ang mosunod nga summary sa mga panghitabo, doktrina, ug mga baruganan nga nakat-unan sa mga estudyante samtang sila nagtuon sa 1 Mga Taga-Corinto 15–2 Mga Taga-Corinto 7 (unit 23) wala gituyo nga itudlo isip kabahin sa imong leksyon. Ang mga leksyon nga imong itudlo magtutok lamang sa pipila niining mga doktrina ug mga baruganan. Sunda ang mga pag-aghat sa Balaang Espiritu samtang naghunahuna ka sa mga panginahanglan sa imong mga estudyante.

Day 1 (1 Mga Taga-Corinto 15:1–29)

Samtang ang mga estudyante nagtuon sa unang katunga sa 1 Mga Taga-Corinto 15, ilang nakat-unan nga ang mga Apostoles mipamatuod nga si Jesukristo namatay alang sa atong mga sala ug nabanhaw gikan sa patay. Nakat-unan usab sa mga estudyante nga kadtong kinsa namatay nga walay pagbunyag mahimong makadawat niining mahinungdanon nga ordinansa.

Day 2 (1 Mga Taga-Corinto 15:30–16:24)

Dinhi niining leksyon ang mga estudyante nagpadayon sa pagtuon sa mga pagtulun-an ni Pablo mahitungod sa Pagkabanhaw. Ilang nakat-unan nga adunay tulo ka managlahing ang-ang sa himaya alang sa mga nabanhaw nga lawas. Agig dugang, nakat-unan nila nga kon kita makanunayon ug dili matarug sa pagsunod sa ebanghelyo, ang ikos sa kamatayon nga moabut gikan sa sala gitangtang na pinaagi sa Pag-ula ni Jesukristo.

Day 3 (2 Mga Taga-Corinto 1–3)

Gikan sa ikaduhang sulat ni Pablo ngado sa mga taga-Corinto, ang mga estudyante nakat-on nga kon ang Langitnong Amahan mohupay kanato sa atong panahon sa mga kalisud, mahimo kitang makatabang sa uban nga madawat ang Iyang kahupayan. Nakat-unan usab nila nga kon kita dili mopasaylo sa uban, si Satanas adunay bintaha kanato, ug samtang atong idangup ang atong mga kasingkasing ngadto sa Ginoo, makabaton kita sa Espiritu, diin sa hinayhinay matabangan ta nga mas mahisama sa Dios.

Day 4 (2 Mga Taga-Corinto 4–7)

Samtang ang mga estudyante nagtuon sa paghulagway ni Pablo sa iyang pagpangalagad dinhi niining leksyon, ilang madiskubrehan ang mosunod nga mga kamatuoran: Ang atong mga pagsulay ug mga kasakit niining kinabuhia gagmay ra kon itandi ngadto sa walay katapusan nga mga panalangin ug pagtubo nga moabut samtang kita matinud-anong molahutay niini. Tungod kay kita nahimulag gikan sa Dios dinhi sa mortalidad, kita kinahanglan nga maglakaw pinaagi sa hugot nga pagtuo ug dili sa panan-aw. Matag usa kanato pagahukman ni Jesukristo sumala sa unsay atong nahimo dinhi sa mortalidad. Pinaagi sa Pag-ula ni Jesukristo, kita mahimong bag-ong linalang ug makig-uli sa Dios. Samtang atong ilain ang atong mga kaugalingon gikan sa mga sayop nga mga praktis ug hugaw nga mga butang, ang Ginoo modawat kanato.

Pasiuna

Dinhi sa iyang ikaduha nga sulat ngadto sa mga Santos nga mga taga-Corinto si Pablo mipalig-on sa iyang pagsalig ngadto kanila ug miingon nga siya naglipay sa pagkasayud nga ilang gidawat ang iyang nag-unang mga tambag. Siya nagtudlo nga ang diosnon nga kasubo sa sala makadala ngadto sa paghinulsol.

Mga Sugyot alang sa Pagtudlo

2 Mga Taga-Corinto 7:8–11

Si Pablo nagmaya sa tinuod nga paghinulsol sa mga Santos

Dapita ang usa ka estudyante sa pagbasa og kusog sa mosunod nga senaryo:

Sa usa ka interbyu alang sa usa ka rekomen sa templo alang sa kaminyoon, usa ka batan-ong babaye mikompisal sa iyang bishop sa pipila ka mga sala nga nangagi. Human sa dugang nga hilisgutan, nasabtan sa bishop nga ang batan-ong babaye wala makahinulsol sa tinud-anay nga paagi ug ang iyang mga sala bug-at nga makapahimo niyang dili takus sa usa ka rekomen sa templo. Ang bishop mipasabut nga ang batan-ong babaye kinahanglan nga maghulat aron makadawat sa usa ka rekomen hangtud hingpit na siya nga nakahinulsol. Nakalitan siya, nangangkon nga siya naghinulsol na tungod kay wala na niya kini buhata og usab sulod sa dugayng panahon. Ang bishop mipasabut nga ang paghunong lamang sa sala dili usa ka kompleto nga paghinulsol ug midapit kaniya sa tinuoray nga pagsugod sa proseso sa matuod nga paghinulsol.

Sa inyong hunahuna unsa kaha ang gibati sa batan-ong babaye niini nga pontoha sa interbyu?

Dapita ang estudyante nga ipadayon ang pagbasa og kusog sa senaryo:

Ang batan-ong babaye mipasabut ngadto sa iyang bishop nga naglagot siya og maayo tungod kay ang mga imbitasyon sa kasal ug ang salo-salo napahibalo na. Miingon siya nga wala siyay nawong nga ikaatubang sa tanang mga pangutana ug sa kaulaw kabahin sa kalangay sa iyang plano sa pagpakasal. Mihangyo siya kon aduna bay paagi alang niya aron ma-seal sa templo sumala sa giplano ug dayon buhaton lang ang proseso sa paghinulsol inigka human.

Base sa tubag sa batan-ong babaye ngadto sa bishop, unsa ang iyang gikabalak-an pag-ayo?

Dapita ang mga estudyante sa pagpangita sa kamatuoran samtang sila magtuon sa 2 Mga Taga-Corinto 7:8–11 nga ang batan-ong babaye diha sa senaryo kinahanglan makasabut usa pa siya tinuoray nga makahinulsol sa iyang mga sala.

Dapita ang usa ka estudyante sa pagbasa og kusog sa 2 Mga Taga-Corinto 7:8–9. Hangyoa ang klase sa pagsunod, nga mangita kon sa unsang paagi nga ang mga unang sulat ni Pablo nakaapekto sa mga Santos nga taga-Corinto.

Sa unsang paagi nga ang sulat nakaapekto sa mga Santos?
Nganong naglipay si Pablo sa ilang mga kasub-anan?

Hangyoa ang mga estudyante sa pagbasa sa hilom sa 2 Mga Taga-Corinto 7:10–11. Mahimo nimong isugyot nga ilang markahan ang duha ka matang sa kasubo nga gihisgutan ni Pablo ug unsa ang gisangputan sa matag usa.

Unsa ang duha ka matang sa kasubo nga gihisgutan ni Pablo?

Isulat ang mga ulohan Diosnon nga Kasubo ug ang Kalibutanon nga Kasubo sa pisara. Dapita ang usa ka estudyante sa pagbasa og kusog sa mosunod nga pamahayag ni Presidente Ezra Taft Benson. Hangyoa ang klase sa pagpaminaw sa paghulagway sa kalibutanon nga kasubo.

“Kasagaran nga makakita kita og mga lalaki ug mga babaye sa kalibutan kinsa mobati og kasubo alang sa mga sayop nga ilang gibuhat. Usahay kini tungod kay ang ilang mga lihok naghatag kanila o sa ilang mga minahal og hilabihan nga kasubo ug kaalaut. Usahay ang ilang kasubo nahimo tungod kay nasakpan sila ug nasilutan alang sa ilang mga lihok. Ang ingon niana nga kalibutanong kasubo wala magdala og ‘diosnon nga kasubo’” (Mga Pagtulun-an sa mga Presidente sa Simbahan: Ezra Taft Benson [2014], 98).

Unsaon nimo pag-summarize kon unsa ang kalibutanon nga kasubo?
Base sa 2 Mga Taga-Corinto 7:10, unsay sangputan sa kalibutanon nga kasubo? (Ipasabut nga ang pulong nga kamatayon sa bersikulo 10 nagpasabut sa espirituhanon nga kamatayon, nangahulugan sa pagkabulag gikan sa Dios. Ubos sa ulohan nga “Kalibutanong Kasubo” sa pisara, isulat ang mosunod nga kamatuoran: Kalibutanong kasubo mahimong mosangput sa espirituhanon nga kamatayon, o pagkabulag gikan sa Dios.)
Sa unsa nga mga pamaagi nga ang kalibutanon nga kasubo maghatud sa usa ka tawo ngadto sa espirituhanon nga kamatayon? (Kini makapugong sa usa ka tawo gikan sa tinud-anay nga paghinulsol ug pagdawat sa kapasayloan sa Langitnong Amahan.)
Base sa bersikulo 10, unsa ang sangputan sa diosnon nga kasubo? (Ubos sa ulohan nga “Diosnon nga Kasubo” sa pisara, isulat ang mosunod nga kamatuoran: Ang Diosnon nga kasubo modala kanato ngadto sa paghinulsol sa atong mga sala ug makadawat og kaluwasan.)

Aron matabangan ang mga estudyante nga mas masabtan kon nganong diosnon nga kasubo ang modala kanato sa paghinulsol, dapita ang usa ka estudyante sa pagbasa og kusog sa mosunod nga pamahayag ni Presidente Ezra Taft Benson:

“Ang diosnong kasubo usa ka gasa sa Espiritu. Usa kini ka halawom nga pagkaamgo nga ang atong mga gipangbuhat nakapasakit sa atong Amahan ug sa atong Dios. Ang sakit ug maayo kaayo nga pag-ila nga ang atong mga pamatasan ang mihimo sa Manluluwas, Siya kinsa walay sala, gani ang labing gamhanan sa tanan, sa paglahutay sa panghingutas ug sa pag-antus. Ang atong mga sala mihimo sa pag-agas sa dugo sa matag lungag sa Iyang panit. Kining tinuod gayud nga pag-antus sa hunahuna ug sa espirituhanon mao ang gipasabut sa mga kasulatan nga makabaton og “masulub-on nga kasingkasing ug mahinulsulon nga espiritu.” … Ang mao nga espiritu mao ang hingpit nga kinahanglanon alang sa tinuod nga paghinulsol” (Mga Pagtulun-an: Ezra Taft Benson, 99).

Sa inyong hunahuna ngano nga ang diosnon nga kasubo modala kanato ngadto sa tinuod nga paghinulsol sa atong mga sala?

Dapita ang mga estudyante sa pagpamalandong sa kahimtang kalabut sa batan-ong babaye nga nagtinguha og usa ka rekomen sa templo.

Atol sa interbyu sa batan-ong babaye uban sa bishop, makita ba nga nasinati niya ang diosnon nga kasubo sa iyang sala? Nganong dili man? (Mas nabalaka siya sa kalangay sa iyang mga plano sa kaminyoon ug sa mga opinyon sa ubang mga tawo bahin niya kay sa tinuoray niya nga paghinulsol ug pagdawat sa kapasayloan sa Langitnong Amahan.)
Unsa ang atong mahimo aron ang kalibutanon nga kasubo mapulihan sa diosnon nga kasubo? (Makapuasa ug maka-ampo kita, maghangyo sa Langitnong Amahan sa pagpanalangin nato uban sa gasa sa diosnon nga kasubo. Makatuon usab kita mahitungod sa Pag-ula ni Jesukristo ug magtinguha og usa ka mas lawom nga salabutan kon sa unsang paagi nga ang atong mga sala nakatampo sa Iyang pag-antus.)

Ipamatuod nga samtang kita mobati og diosnon nga kasubo imbis kalibutanon nga kasubo alang sa atong mga sala, kita mahimong tinuoray nga naghinulsol, malimpyohan gikan sa atong mga sala, ug sa katapusan madawat ang kaluwasan. Dapita ang mga estudyante nga tinguhaon ang diosnon nga kasubo diha sa ilang mga paningkamot sa paghinulsol.

Kon adunay panahon, rebyuha og kadiyot ang mga kamatuoran nga nailhan sa mga estudyante samtang sila nagtuon sa mga leksyon sa unit 23, ug awhaga sila sa pagsunod sa bisan unsang pag-aghat nga mahimo nilang bation aron magamit kini nga mga kamatuoran. Mahimo nimong rebyuhon ang mga scripture mastery passage sa 1 Mga Taga-Corinto 15:20–22 ug 1 Mga Taga-Corinto 15:40–42. Dapita ang mga estudyante sa pagpasabut sa mga doktrina niini nga mga tudling sa mga bersikulo aron sa pagtudlo sa plano sa kaluwasan ngadto ni bisan kinsang tawo.

Sunod nga Unit (2 Mga Taga-Corinto 8–Mga Taga-Efeso 1)

Hangyoa ang mga estudyante sa pagkonsiderar sa mosunod nga mga pangutana: Sa unsang paagi nga inyong mahibaloan nga nabati ninyo ang Espiritu? Unsa ang mga bunga o pagbati sa Espiritu? Unsa ang mga gi-orden nang daan nga madawat sa mga Santos? Unsa ang atong mga responsibilidad niadtong kinsa nagkulang sa ubang temporal nga panginahanglan sa kinabuhi, sama sa pagkaon, sinina, ug pinuy-anan? Unsa kaha kon kita mismo adunay sama nga mga panginahanglan? Ipasabut nga atol sa sunod semana ilang tun-an kon giunsa ni Pablo sa pagtubag kining mga pangutana ug uban pa.