Leksyon 113

2 Mga Taga-Corinto 1–3

Pasiuna

Si Pablo misulat sa mga Santos sa Corinto ug mipasabut kon sa unsang paagi nga sila makahimo sa paghupay sa uban. Giawhag usab niya sila sa pagpasaylo sa usa ka makasasala nga didto sa ilang kongregasyon. Mitudlo si Pablo sa mga Santos nga kon sila mobalik ngadto sa Ginoo, sila mahimong mas mahisama sa Dios.

Mga Sugyot alang sa Pagtudlo

2 Mga Taga-Corinto°1

Nagtudlo si Pablo sa mga Santos sa Corinto unsaon sa paghupay sa uban

Dapita ang mga estudyante sa paghunahuna og higayon nga ang ilang kaila nakasinati og lisud nga pagsulay o kasakit.

• Unsay inyong nahimo aron matabangan siya?

• Nasulayan naba ninyo sukad nga gustong mohupay sa usa ka tawo panahon sa pagsulay apan wala masayud kon unsaon?

Dapita ang mga estudyante sa pagpangita sa kamatuoran samtang ilang tun-an ang 2 Mga Taga-Corinto 1 nga makatabang nila nga makahibalo kon unsaon sa paghupay ang uban sa ilang mga pagsulay ug mga kasakit.

Ipasabut nga human misulat si Pablo sa 1°Mga Taga-Corinto, miulbo ang kagubot sa Efeso agi og tubag sa iyang mga pagtulun-an. (Tan-awa sa Mga Buhat 19:23–41. Pahinumdom: Ang Asia usa ka probinsya sa Roma sa modernong Turkey.) Mibiya si Pablo sa Ephesus ug miadto sa Macedonia, diin si Tito midala kaniya sa balita nga ang nag-unang sulat ni Pablo maayong pagkadawat sa mga Santos sa Corinto. Nahibaloan usab ni Pablo nga ang mga Santos nakasinati og mga kalisdanan ug nga pipila ka mini nga mga magtutudlo sa Corinto mituis sa tinuod nga doktrina ni Kristo. Misulat si Pablo sa 2°Mga Taga-Corinto sa paghupay sa mga Santos ug sa pagsulbad sa mga problema nga gihimo niining dili dinapit nga mga magtutudlo.

Dapita ang pipila ka mga estudyante nga magpuli-puli sa pagbasa og kusog sa 2 Mga Taga-Corinto. Hangyoa ang klase sa pagsunod, nga mangita kon unsay gisulti ni Pablo sa mga Santos mahitungod sa ilang mga kalisdanan.

• Unsa ang gisulti ni Pablo sa mga Santos mahitungod sa Dios diha sa bersikulo 3 nga tingali nakahupay kanila sa ilang mga kalisdanan?

• Unsa nga baruganan ang atong makat-unan gikan sa bersikulo 4 mahitungod sa unsay atong buhaton aron makadawat sa paghupay sa Langitnong Amahan? (Kinahanglang mahibaloan sa mga estudyante ang kamatuoran nga susama sa mosunod: Kon ang Langitnong Amahan mohupay kanato sa atong mga kalisdanan, makatabang kita sa uban nga makadawat sa Iyang paghupay.)

• Sa unsang paagi nga ang pagdawat og kahupayan sa Dios panahon sa pagsulay nakatabang ninyo nga matabangan ang laing tawo nga madawat ang Iyang paghupay? (Ikonsiderar ang pagpakigbahin sa inyong mga kasinatian samtang ang mga estudyante maghunahuna sa ilang kaugalingong mga kasinatian.)

I-summarize ang 2 Mga Taga-Corinto 1:6–8 pinaagi sa pagpasabut nga si Pablo misulti sa mga Santos sa Corinto mahitungod sa grabe ug makahulga sa kinabuhi nga mga kalisdanan nga nasinati niya ug sa iyang kaubanan samtang nagsangyaw sa ebanghelyo didto sa Efeso.

Dapita ang usa ka estudyante sa pagbasa og kusog sa 2 Mga Taga-Corinto 1:9–11. Hangyoa ang klase sa pagsunod, nga mangita kon unsay nakatabang ni Pablo ug sa iyang mga kaubanan panahon sa ilang mga pagsulay.

• Unsa ang nakatabang ni Pablo ug sa iyang kaubanan panahon sa ilang mga pagsulay?

• Unsang kamatuoran ang inyong mailhan sa bersikulo 11 mahitungod kon sa unsang paagi matabangan nato ang mga tawo kinsa nakasinati og mga pagsulay? (Ang mga estudyante mahimong mogamit og laing mga pulong, apan siguraduha nga ilang mailhan ang mosunod nga kamatuoran: Ang atong mga pag-ampo makatabang niadtong kinsa nakasinati og mga pagsulay.)

• Sa unsa nga paagi nga ang atong mga pag-ampo makatabang sa usa ka tawo kinsa nagsinati og mga pagsulay?

• Sa unsa nga paagi nga ang mga pag-ampo sa uban nakatabang ninyo panahon sa usa ka pagsulay nga inyong nasinati?

I-summarize ang 2 Corinthians 1:12–24 pinaagi sa pagpasabut nga si Pablo naglipay niadtong kinsa nakadawat sa tambag nga iyang gihatag sa iyang unang sulat. Sa mga bersikulo 15–20 si Pablo mitubag niadtong nangita og sayop niya sa dihang miusab siya sa iyang mga plano sa pagbisita kanila. Ang pipila sa mga kritiko ni Pablo daw nag-ingon nga tungod kay giusab ni Pablo ang iyang plano sa byahe dili na sila makasalig kaniya o sa iyang mga pagtulun-an. Gipahayag ni Pablo nga ang mensahe sa ebanghelyo tinuod, bisan sa iyang kausaban sa mga plano.

2 Mga Taga-Corinto°2

Giawhag ni Pablo ang mga Santos sa Corinto sa pagpasaylo sa usa ka makasasala

Dapita ang mga estudyante sa paghunahuna og panahon sa dihang ang usa ka tawo nasakitan o nasilo kanila o sa ilang minahal.

• Nganong lisud man ang pagpasaylo nianang tawhana?

Dapita ang mga estudyante sa pagpangita sa mga kamatuoran samtang sila nagtuon sa 2 Mga Taga-Corinto 2 nga makatabang nila nga makahibalo kon nganong importante nga mopasaylo sa tanang tawo.

Pahinumdumi ang mga estudyante nga sa unang sulat ni Pablo ngadto sa Mga Taga-Corinto siya mipanton kanila sa ilang pagkamasinupakon ug kakulang sa hugot nga pagtuo. Dapita ang usa ka estudyante sa pagbasa og kusog sa 2 Mga Taga-Corinto 2:1–4. Hangyoa ang klase sa pagsunod, nga mangita sa unsay gilauman ni Pablo sa mga Santos sa Corinto nga masayran mahitungod sa iyang pagpanton.

• Sumala sa bersikulo 4, unsa ang gusto ni Pablo nga mahibaloan sa mga Santos mahitungod sa iyang mga motibo sa pagpanton kanila?

• Sa unsang paagi nga ang pagpanton o pagkorihir mahimong ebidensya sa gugma sa usa ka tawo alang kanato?

I-summarize ang 2 Mga Taga-Corinto 2:5–6 pinaagi sa pagpasabut nga si Pablo misulat mahitungod sa usa ka miyembro sa Simbahan nga nakasala batok sa laing mga miyembro sa Simbahan ug nga nakaingon sa ilang kasub-anan. Agig resulta, ang Simbahan midisiplina niini nga tawo.

Dapita ang usa ka estudyante sa pagbasa og kusog sa 2 Mga Taga-Corinto 2:7–8. Hangyoa ang klase sa pagsunod, nga mangita kon unsay gisulti ni Pablo mahitungod kon sa unsang paagi nga ang mga Santos angayng motratar niining tawhana.

• Sa unsang paagi man nga ang mga Santos motratar niining tawo nga nakaingon sa tumang kasubo?

Ipasabut nga bisan tuod kining tawhana nakasala, ang bili sa iyang kalag mahinungdanon sa panan-aw sa Dios (tan-awa sa D&P 18:10). Miawhag si Pablo sa mga Santos sa pagpasaylo, paghupay, ug paghigugma niining tawhana sa pagtabang kaniya nga maghinulsol.

Dapita ang mga estudyante sa pagbasa sa hilum ang 2°Mga Taga-Corinto 2:9–11, nga mangita og laing rason nganong si Pablo miingon sa mga Santos kinahanglang mopasaylo sa uban.

• Sumala sa unsay gitudlo ni Pablo sa mga Santos diha sa bersikulo 11, unsa pa man ang laing rason nga kita kinahanglang mopasaylo sa uban? (Gamit ang kaugalingon nilang mga pulong, kinahanglang mahibalo ang mga estudyante sa mosunod nga kamatuoran: Kon kita dili mopasaylo sa uban, si Satanas adunay bintaha kanato. Mahimo nimong isugyot nga markahan sa mga estudyante kini nga kamatuoran diha sa bersikulo 11.)

Ipasabut nga ang pagpasaylo sa uban wala nagpasabut nga ang makasasala dili na manubag sa iyang mga binuhatan. Wala kini magpasabut sa pagbutang sa atong mga kaugalingon sa sitwasyon diin ang katawhan makapadayon sa pagmaltrato kanato. Hinoon, ang pagpasaylo sa uban nagpasabut sa pagtratar uban sa gugma niadtong mimaltrato kanato ug walay pagbati nga kayugot o kasuko ngadto kanila. Kita gimandoan sa pagpasaylo sa tanang tawo. (Tan-awa sa Giya ngadto sa mga Kasulatan, “Pagpasaylo,” scriptures.lds.org; D&P 64:9–11.)

• Unsa sa inyong hunahuna si Satanas adunay bintaha ngari kanato kon dili kita mopasaylo sa uban?

Tabangi ang mga estudyante nga makapalambo og mas lawom nga panabut sa baruganan

Ang mga estudyante nagkinahanglan nga makasabut og usa ka doktrina o baruganan sa dili pa nila kini magamit. Makatabang kamo sa mga estudyante nga makasabut sa mga doktrina ug mga baruganan pinaagi sa pagpangutana nga mogiya ngadto sa usa ka klaro nga pagsabut sa kahulugan sa usa ka piho nga baruganan o doktrina, nga nag-awhag sa mga estudyante sa paghunahuna mahitungod sa baruganan diha sa modernong kontexto, o pagdapia sa mga estudyante sa pagpasabut sa ilang nasabtan sa usa ka baruganan.

Pagpamatuod sa kaimportante sa pagpasaylo sa uban. Hangyoa ang mga estudyante sa paghunahuna kabahin sa usa ka tawo nga kinahanglan nilang pasayloon. Dapita sila sa paghimo og usa ka tumong sa pagpasaylo niining tawo aron nga si Satanas dili makabaton og bintaha diha kanila.

Ipasabut nga atong mabasa sa 2 Corinthians 2:14 nga si Pablo misulat nga siya nagpasalamat sa Dios, kinsa kanunay “nagamando [kaniya] kanunay paingon sa kadaugan diha ni Kristo,” bisan sa panahon sa kalisud.

2 Mga Taga-Corinto 3

Nagtudlo si Pablo sa mga Santos sa Corinto nga samtang sila mobalik ngadto sa Ginoo, sila mahimong mas mahisama sa Dios

Ipasabut nga sa panahon nga wala si Pablo sa Corinto, pipila ka mini nga mga magtutudlo misugod sa pagsupak sa mga pagtulun-an ni Pablo ug misulay sa pagpakaulaw ni Pablo pinaagi sa pagsulti sa mga kinabig nga nagkinahanglan gihapon sila nga magsunod sa balaod ni Moises. I-summarize ang 2 Mga Taga-Corinto 3:1 pinaagi sa pagpasabut nga agig tubag niadtong misulay sa pagpakaulaw kaniya, nangutana og balik si Pablo sa mga miyembro sa Corinto kon kinahanglan ba siya nga mohatag nila og usa ka “[sulat] sa pagpaila” nga nagpamatuod sa iyang kinaiya ug sa iyang ka lihitimo isip tinuod nga Apostol ni Jesukristo. (Ipasabut nga sa kapanahunan ni Pablo, ang bag-o sa usa ka komunidad modala og mga sulat sa pagdayeg kanila. Kini nga sulat magpaila sa bag-ong abut ug magpamatuod sa ilang maayong kinaiya.)

Dapita ang usa ka estudyante sa pagbasa og kusog sa 2 Mga Taga-Corinto 3:2–3. Hangyoa ang klase sa pagsunod, nga mangita sa unsay gisulti ni Pablo nga maoy nagsilbing sulat sa pagdayeg.

• Unsay nagsilbi nga sulat sa pagdayeg ni Pablo? (Ang mga Santos nga nausab ang kinabuhi sama ra nga gikan ni Kristo Mismo ang sulat.)

• Unsay kahulugan sa mga pulong “pagahibaloan ug pagabasahon sa tanang mga tawo” sa bersikulo°2? (Daghang mga tawo ang mahibalo sa Simbahan ug mohukom sa katinuod niini pinaagi sa personal nga pamatasan ug mga ehemplo sa mga miyembro sa Simbahan.)

Ipasabut nga ang mga pulong nga “dili diha sa mga papan nga bato kondili sa mga papan nga mga kasingkasing sa tawo” sa bersikulo 3 ug ipasabut nga atol sa panahon ni Moises, ang mga sugo gisulat diha sa mga papan nga bato. Mitudlo si Pablo sa mga Santos sa Corinto nga, pinaagi sa gahum sa Espiritu Santo, ang mga sugo nahisulat diha sa ilang mga kasingkasing.

I-summarize ang 2 Mga Taga-Corinto 3:5–13 pinaagi sa pagpasabut nga si Pablo nangatarungan nga kon ang karaan nga balaud ni Moises, diin angay nang wagtangon, mismo mahimayaon, nan ang himaya sa hangtud sa kahangturan nga pakigsaad sa ebanghelyo gani mas labaw pa. Mipahinumdom si Pablo sa mga Santos sa Corinto nga si Moises nagsul-ob og usa ka tabil sa iyang nawong sa dihang siya nanaug gikan sa pagpakigsulti sa Ginoo didto sa Bukid sa Sinai tungod kay ang mga anak sa Israel nangahadlok sa himaya nga naggikan sa iyang nawong.

Dapita ang usa ka estudyante sa pagbasa og kusog sa 2°Mga Taga-Corinto 3:14–15, ug hangyoa ang klase sa pagsunod, nga mangita kon giunsa pagkomparar ni Pablo ang mga Isralita kinsa nahadlok sa himaya nga naggikan sa nawong ni Moises ngadto sa mga Judeo sa iyang panahon.

• Giunsa pagkumparar ni Pablo sa mga Israelite kinsa namugos kang Moises sa pagsul-ob og usa ka taptap ngadto sa mga Judeo sa iyang panahon?

• Unsa kaha ang mga pulong nga “ilang mga salabutan nangagahi” diha sa bersikulo 14 ug “[sila adunay usa ka] taptap … sa ilang mga hunahuna” diha sa bersikulo 15 nagpasabut?

Dapita ang usa ka estudyante sa pagbasa og kusog sa 2 Mga Taga-Corinto 3:16–18. Hangyoa ang klase sa pagsunod, nga mangita kon unsa ang gisaad ni Pablo nga mokuha sa taptap sa dili pagsinabtanay sa mga kasingkasing ug hunahuna sa mga katawhan. Ipasabut nga sa Joseph Smith Translation nausab ang mga pulong nga “sa diha nga ang tawo makadangop na sa Ginoo” diha sa bersikulo 16 sa “sa diha nga ang kasingkasing sa tawo makadangop na sa Ginoo” (Joseph Smith Translation, 2°Mga Taga-Corinto 3:16).

• Sumala sa Joseph Smith Translation sa 2 Mga Taga-Corinto 3:16, unsa ang angayng buhaton sa mga tawo aron makuha ang taptap sa dili pagsinabtanay?

Isulat diha sa pisara: Samtang idangop nato ang atong mga kasingkasing ngadto sa Ginoo …

• Sumala sa bersikulo 18, unsa ang mahitabo niadtong modangop sa Ginoo ug makuha ang taptap sa dili pagsinabtanay? (Ipasabut nga ang mga pulong “ginausab kita ngadto sa pagkasama sa iyang panagway gikan sa kasanag ngadto sa kasanag” nagpasabut sa inanay nga kausaban nga atong madawat pinaagi sa Espiritu nga nagtabang kanato nga mahimong mas mahisama sa Dios.)

Kompletuha ang pamahayag sa pisara aron mabasa nga, “Samtang idangop nato ang atong mga kasingkasing ngadto sa Ginoo, makabaton kita sa Espiritu, nga hinay-hinayng motabang nato nga mahimong mas mahisama sa Dios.”

• Sa inyong hunahuna unsa ang ipasabut sa idangop ang atong mga kasingkasing ngadto ni Jesukristo?

Dapita ang mga estudyante nga mogahin og usa ka minuto aron maglista diha sa ilang class notebook o scripture study journal sa mga paagi nga ang mga kasingkasing sa tawo modangop ngadto ni Jesukristo. Pagdapit og pipila ka mga estudyante sa pagpakigbahin sa ilang mga lista diha sa klase.

Dapita ang mga estudyante sa pagpamalandong kon sa unsang paagi nga ang Espiritu miusab kanila o sa tawo nga ilang nailhan. Hangyoa ang pipila ka mga estudyante sa pagpakigbahin sa ilang mga kasinatian uban sa klase.

Dapita ang mga estudyante sa paghunahuna mahitungod sa unsay ilang mahimo aron mas makadangop ngadto sa Ginoo. Hangyoa sila sa paghimo og tumong nga modangop ngadto sa Ginoo aron sila makadawat sa Espiritu ug mahimong mas mahisama sa Dios.

Komentaryo ug Background nga Impormasyon

2 Mga Taga-Corinto 2:1–4. Ang mga lider sa Simbahan mopanton sa mga miyembro sa Simbahan tungod sa gugma

Si Presidente Brigham Young mipasabut sa rason nga siya mipanton sa mga miyembro sa Simbahan:

“May mga panahon nga ako sa daghang mga kaigsoonan daw sobra ra. Ako mopanton nila usahay; apan tungod kini kay nanghinaut ko nga sila mosunod aron ang gahum sa Dios, sama sa usa ka siga sa kalayo, mopuyo diha kanila ug maanaa kanila” (Discourses of Brigham Young, sel. John A. Widtsoe [1954], 115).

2 Mga Taga-Corinto 2:5–11. Ang kaimportante sa pagpasaylo sa uban

Makabaton kita og usa ka panabut sa gugma ug kalooy ni Pablo gikan sa 2 Mga Taga-Corinto 2:5–11. Wala kita masayud kon ang malapason nga gipasabut ni Pablo mao ang gihisgutan sa 1°Mga Taga-Corinto 5:1 o laing sad-an—tingali usa sa mga mini nga mga magtutudlo sa Corinto kinsa misupak ni Pablo ug sa iyang mga pagtulun-an. Miawhag si Pablo sa mga miyembro sa Simbahan sa pagpasaylo sa tawo ug paghupay kaniya aron siya unta dili “dag-on sa hilabihang kaguol” (2°Mga Taga-Corinto 2:7).

2 Mga Taga-Corinto 3:1–2. Ang uban mohukom sa Simbahan pinaagi sa mga ehemplo sa mga miyembro

“Daghang mga tawo sa tibuok kalibutan adunay mabination nga pagbati sa Simbahan tungod sa mga buhat sa kamabination ug pagserbisyo nga ilang nakita diha sa mga kinabuhi sa mga miyembro sa Simbahan (tan-awa sa 2 Mga Taga-Corinto 3:2).

“Ang pamahayag ni Pablo nga ang mga miyembro sa Simbahan sama sa mga epistola, ‘pagabasahon sa tanang mga tawo,’ nagsugyot nga ang personal nga kinaiya sa mga miyembro sa Simbahan mao ang paagi nga daghan ang makahibalo sa Simbahan ug mohukom sa katinuod niini. Sama sa usa ka tindero mahukman pinaagi sa iyang mga paninda, ingon usab ang Simbahan—ug usahay bisan si Jesukristo—gihukman pinaagi sa atong pagpakabuhi. Si Elder Bruce R. McConkie … mitudlo, ‘Sa kinatas-an nga pagsabut, ang ebanghelyo wala isulat diha sa mga papan nga bato o sa mga basahon sa kasulatan, apan diha sa mga lawas sa matinud-anon ug masulundon nga mga tawo; ang mga Santos mao, sa ingon, gipakabuhi ang mga epistola sa kamatuoran, ang mga basahon kansang mga kinabuhi abli alang sa tanan sa pagbasa’ (Doctrinal New Testament Commentary, 3 vols. [1965–73], 2:414)” (New Testament Student Manual [manwal sa Church Educational System, 2014], 395).