Leksyon 117
2 Mga Taga-Corinto 10–13
Pasiuna
Si Apostol Pablo mitudlo mahitungod sa espirituhanong gubat nga ang mga anak sa Dios malambigit. Midepensa siya sa iyang kaugalingon batok niadtong kinsa supak niya. Subli niyang giistorya kon sa unsang paagi nga siya nasakgaw ngadto sa ikatulo nga langit ug mihulagway kon sa unsang paagi nga ang iyang mga kahuyang namatud-an nga usa ka panalangin. Sa wala pa gitapos ang iyang, si Pablo miawhag sa mga Santos didto sa Corinto sa pagsuta sa ilang mga kaugalingon ug pamatud-an ang ilang kamatinud-anon.
Mga Sugyot alang sa Pagtudlo
2 Mga Taga-Corinto 10–11
Si Pablo nagsulat mahitungod sa espirituhanon nga pakiggubat, mga panglingla ni Satanas, ug sa iyang kaugalingon nga mga pagsulay
Isulat ang pulong nga gubat diha sa pisara.
-
Sa unsa nga mga paagi nga kita miapil sa usa ka gubat batok ni Satanas?
-
Unsa ang pipila sa labing lisud nga mga gira nga atong giatubang niining espirituhanong gubat?
Dapita ang usa ka estudyante sa pagbasa og kusog sa 2 Mga Taga-Corinto 10:3-6. Hangyoa ang klase sa pagsunod, nga mangita kon unsa ang gitudlo ni Pablo nga kinahanglan natong buhaton aron mahimong magmalampuson niining gubat batok ni Satanas.
-
Unsa man ang atong buhaton aron kita magmalampuson niining gubat batok ni Satanas?
-
Sa inyong hunahuna unsay buot ipasabut sa “ginabihag namo ang tanang panghunahuna aron kini magmasinugtanon kang Kristo”? (bersikulo 5).
-
Unsa nga baruganan ang atong makat-onan gikan sa bersikulo 5 mahitungod sa unsang paagi nga magmalampuson diha sa gubat batok ni Satanas? (Human ang mga estudyante makatubag, isulat ang mosunod nga kamatuoran sa pisara: Samtang atong gipugngan ang atong mga hunahuna diha sa pagkamasulundon kang Jesukristo, mahimo kita nga mas malampuson diha sa gubat batok ni Satanas.)
-
Unsa ang atong buhaton aron malig-on ang atong mga hunahuna? (Apil sa pipila ka mga butang, makaampo kita, momemorya sa mga kasulatan, ug mokanta o magsag-ulo sa mga hymn.)
Mahimo kang mopakigbahin sa imong mga kasinatian nga nagpakita kon giunsa nimo pagpugong ang imong mga hunahuna sa pagkamasulundon ngadto sa Manluluwas nakatabang nimo nga mabuntog ang mga impluwensya ni Satanas. Ikonsiderar ang pagdapit sa mga estudyante sa pagpakigbahin usab sa ilang kaugalingong mga kasinatian. Dapita ang mga estudyante sa paghimo ug mga tumong aron mas mapugngan ang ilang mga hunahuna diha sa pagkamasulundon ngadto sa Manluluwas.
Dapita ang usa ka estudyante sa pagbasa og kusog sa mosunod nga summary:
Sa 2 Mga Taga-Corinto 10:7–18 atong makat-onan nga si Pablo mihimaya sa Ginoo ug mitudlo nga ang iyang kaugalingong mga kahuyang dili angayng gamiton nga rason sa dili pagpaminaw kaniya. Sa 2 Mga Taga-Corinto 11 atong mabasa nga si Pablo naghisgut og dugang nga mga paagi nga si Satanas nagtinguha sa paghiwi sa atong mga hunahuna ug modala kanato palayo gikan ni Jesukristo, lakip ang paggamit sa mini nga mga Kristo ug mini nga mga apostoles. Si Pablo subling miistorya sa pag-antus nga iyang gilahutay isip usa ka tinuod nga Apostoles sa Manluluwas.
2 Mga Taga-Corinto°12
Si Pablo subling miistorya sa pagkasakgaw ngadto sa langit ug nagtudlo unsaon sa pag-ila nga ang atong mga kahuyang magbenepisyo kanato
Pagdala og usa ka tunok sa klase, o drowinga ang usa ka litrato sa usa diha sa pisara sama sa gipakita. Dapita ang mga estudyante sa pagkonsiderar sa mga panahon sa dihang sila nasakitan sa tunok.
-
Sa unsa nga mga paagi nga ang mga tunok makapalisud sa kinabuhi?
Ipasabut nga si Pablo migamit sa konsepto sa usa ka tunok sa pagsimbolo sa usa ka pagsulay o kahuyang nga iyang nasinati.
Dapita ang usa ka estudyante sa pagbasa og kusog sa mosunod nga pamahayag ni Elder Dallin H. Oaks sa Korum sa Napulog Duha ka mga Apostoles. Hangyoa ang klase sa pagpaminaw ug pagkonsiderar kon unsang matang sa pagsulay o kahuyang nga nasinati nila o sa ilang mga minahal:
“Ang uban nawad-an sa usa ka minahal tungod sa kamatayon o sa pag-amuma alang sa usa ka masakiton. Ang uban nasakitan tungod sa diborsyo. … May laing nangabakol o nagkadeperinsya sa panghunahuna. Ang uban naghigwaos tungod sa pagkaibog sa isigka lalake o isigka babaye. Ang uban may mapait nga pagbati sa pagka-ubos o wala kinahanglana. Sa laktud, daghan ang gibug-atan sa gipas-an” (“Iyang Papahulayon ang Nag-antus,” Ensign o Liahona, Nob. 2006, 6).
Dapita ang mga estudyante sa pagpangita sa kamatuoran samtang sila magtuon sa 2 Mga Taga-Corinto 12 nga makatabang kanila samtang ilang masinati ang mga pagsulay ug mga kahuyang.
Dapita ang usa ka estudyante sa pagbasa og kusog sa 2 Mga Taga-Corinto 12:1–4. Hangyoa ang klase sa pagsunod, nga mangita sa usa ka panan-awon ni Pablo. (Ipasabut nga kining mga bersikulo nagpasabut ngadto ni Pablo sa ikatulo nga tawo.)
-
Unsa sa inyong hunahuna ang ipasabut nga si Pablo “gisakgaw dala ngadto sa ikatulong langit”? (bersikulo 2). (Nakaangkon siya og usa ka panan-awon sa celestial nga gingharian.)
Ipasabut nga ang mga pulong “kon diha ba siya sulod sa lawas … o sa gawas, wala ako masayud” (bersikulo 2) nagpasabut nga si Pablo wala nakahibalo kon siya ba gikuha ngadto sa celestial nga gingharian o nakakita og usa ka panan-awon niini.
Dapita ang usa ka estudyante sa pagbasa og kusog sa 2 Mga Taga-Corinto 12:5–6. Hangyoa ang klase sa pagsunod, nga mangita kon sa unsa nga paagi nga si Pablo mitubag niini nga panan-awon.
-
Sa unsa nga paagi nga si Pablo mitubag niining panan-awon?
-
Unsa ang gikabalak-an ni Pablo nga lagmit mahitabo kon himayaon niya ang iyang kaugalingon? (Nabalaka si Pablo nga ang uban taas kaayo og gilauman nganha kaniya samtang siya aduna pa gihapoy mga panlimbasug nga buntugon.)
Dapita ang usa ka estudyante sa pagbasa og kusog sa 2 Mga Taga-Corinto 12:7–8. Hangyoa ang klase sa pagsunod, nga mangita kon sa unsang paagi ang Ginoo mitabang ni Pablo nga magpabiling mapaubsanon. Mahimo nimong ipasabut nga aron “magpasulabi sa pagkahimuot” (bersikulo 7) nagpasabut nga magmapagarbuhon.
-
Giunsa man pagtabang sa Ginoo si Pablo nga magpabilin nga mapaubsanon?
-
Pila ka higayon nga si Pablo nag-ampo aron kining “tunok dinhi sa lawas” makuha?
Ipasabut nga bisan sa mga pag-ampo ni Pablo, ingon og ang Ginoo mipili nga dili kuhaon ang “tunok dinhi sa lawas” ni Pablo.
-
Unsa ang atong nakat-onan gikan ni Pablo kon nganong itugot sa Ginoo nga masinati nato ang mga kahuyang ug mga pagsulay? (Ang mga estudyante mahimong mogamit og laing mga pulong, apan siguraduha nga ilang mailhan ang mosunod nga kamatuoran: Ang Ginoo mahimong motugot nga atong masinati ang mga kahuyang ug mga pagsulay aron kita makat-on nga mahimong mapaubsanon. Isulat kini nga kamatuoran diha sa pisara.)
Dapita ang mga estudyante sa pagbasa sa hilum nga paagi sa 2 Mga Taga-Corinto 12:9–10 nga mangita sa mga kamatuoran nga nakat-onan ni Pablo nga nakatabang niya nga makalahutay sa iyang mga kahuyang. Hangyoa ang mga estudyante sa pagsulat diha sa ilang mga notebook sa klase o sa scripture study journal sa mga kamatuoran nga ilang nailhan.
-
Unsa nga mga kamatuoran ang nakat-onan ni Pablo nga nakatabang niya nga makalahutay sa iyang mga kahuyang? (Ang mga estudyante mahimong moila og pipila ka mga kamatuoran, sama sa mosunod: Ang grasya ni Jesukristo makatagbaw sa paglig-on nato diha sa atong mga kahuyang. Ang Ginoo dili kanunayng motangtang sa atong mga hagit, apan Siya naglig-on nato samtang ato kining gilahutay sa matinud-anon nga paagi.)
Pahinumdumi ang mga estudyante nga ang grasya mao ang “balaan nga tabang o kalig-on” gihimong posible pinaagi sa Pag-ula ni Jesukristo (Giya ngadto sa mga Kasulatan, “Grasya”).
-
Unsa ang ipasabut niini nga ang grasya sa Manluluwas makapatagbaw sa pagpalig-on nato diha sa atong mga kahuyang? (Pinaagi sa kusog nga atong madawat gikan sa Manluluwas, makahimo kita sa tanan nga Iyang gihangyo nga atong buhaton.)
Dapita ang usa ka estudyante sa pagbasa og kusog sa mosunod nga pamahayag ni Elder Dallin H. Oaks:
“Ang gahum sa pag-ayo sa Ginoong Jesukristo—mahimong kini motangtang sa atong alantuson o mopalig-on kanato aron makalahutay ug makdawat kanila sama ni Apostol Pablo—anaa alang sa matag kalisdanan niining mortalidad” (“Iyang Papahulayon ang Nag-antus,” 8).
-
Sa unsang paagi nga ang mga kamatuoran nga atong nailhan sa mga bersikulo 9–10 makatabang nato samtang atong masinati ang mga kahuyang ug mga pagsulay?
-
Kanus-a nga ikaw o ang usa ka tawo nga imong kaila napalig-on pinaagi sa Manluluwas? (Pahinumdumi ang mga estudyante nga dili ipakigbahin ang bisan unsa nga pribado o pesonal kaayo.) Sa unsa nga paagi nga kanang kasinatian usa ka panalangin diha kanimo o kanila?
2 Mga Taga-Corinto 13
Si Pablo mipahimangno sa mga Santos sa pagsusi sa ilang mga kaugalingon ug pamatud-an ang ilang kamatinud-anon
Pahinumdumi ang mga estudyante nga adunay mga mini nga mga magtutudlo nga naapil sa mga Santos nga taga Corinto kinsa mihagit kang Pablo ug sa iyang awtoridad isip usa ka Apostol.
-
Unsa ang pipila ka mga ehemplo kon sa unsang paagi nga ang mga tawo karon lagmit mohagit niadtong natawag sa posisyon sa pagpangulo diha sa Simbahan?
Dapita ang estudyante sa pagbasa og kusog sa 2 Mga Taga-Corinto 13:3. Hangyoa ang klase sa pagsunod, nga mangita kon unsay uban pang gitinguha sa mga miyembro sa Simbahan didto sa Corinto nga mapamatud-an.
-
Unsay gitinguha sa ubang mga miyembro sa Simbahan nga mapamatud-an?
Dapita ang usa ka estudyante sa pagbasa og kusog sa 2 Mga Taga-Corinto 13:5–6. Hangyoa ang klase sa pagsunod, nga mangita sa unsay gipahimangno ni Pablo nga buhaton sa mga Santos sa Corinto imbis mangutana kon ang Ginoo namulong pinaagi kaniya isip usa ka Apostol. Ipasabut nga ang usa ka biniyaan [reprobate] mao ang usa ka limbongan o imoral nga tawo.
-
Sumala sa bersikulo 5, unsa ang gipasidaan ni Pablo nga buhaton sa mga Santos sa Corinto? (Mahimo nimong awhagon ang mga estudyante sa pagmarka sa mga verb susiha, pamatud-i, ug hibaloi niini nga bersikulo.)
-
Unsa ang gisulti ni Pablo ngadto niining mga Santos nga kinahanglan nilang susihon mahitungod sa ilang mga kinabuhi? (Ipasabut nga aron “nagapadayon ba sa inyong pagtuo” [bersikulo 5] nagpasabut sa pagkamatinud-anon ngadto sa Simbahan sa Ginoo.)
-
Unsa nga baruganan ang atong makat-unan gikan niini nga mga bersikulo mahitungod sa unsay atong buhaton imbis manaway sa mga lider sa Simbahan? (Ang mga estudyante kinahanglan makaila sa usa ka baruganan nga susama sa mosunod: Imbis manaway sa mga lider sa Simbahan, ang mga miyembro sa Simbahan kinahanglan mosusi sa ilang mga kaugalingong kamatinud-anon.)
Dapita ang usa ka estudyante sa pagbasa og kusog sa mosunod nga pamahayag ni Propeta Joseph Smith:
“[Kon ang usa ka tawo] kinsa mibarug aron paghukom sa uban, nangitag sayop diha sa Simbahan, moingon nga sila anaa sa dili maayong dalan, samtang siya sa iyang kaugalingon maoy matarung, nan hibaloi pag-ayo, nga kanang tawhana nagpaingon sa dalan sa apostasiya, ug kon siya dili maghinulsol, siya mobiya sa kamatuoran, ingon nga ang Dios buhi” (Mga Pagtulun-an sa mga Presidente sa Simbahan: Joseph Smith [2007], 384).
-
Unsa ang mahitabo kon manaway kita sa atong mga lider imbis mosusi sa atong kaugalingong kamatinud-anon?
Aron matabangan ang mga estudyante nga masusi ang ilang kamatinud-anon ug ang ilang kinaiya ngadto sa ilang mga lider sa Simbahan, hatagi sila og mga kopya sa mosunod nga mga pangutana. Hatagi ang mga estudyante og igong panahon aron mabasa ug matubag ang mga pangutana sa hilum.
Manwal sa Magtutudlo sa Seminary sa Bag-ong Tugon—Leksyon 117
-
Graduhi sa 1–10 (hingpit ang 10), unsa ka maayo ang inyong pagsunod sa tambag sa mga lider sa Simbahan?
-
Unsa ang usa ka sumbanan nga gitudlo sa mga propeta ug mga apostoles nga mas matinud-anon kamong makasunod?
-
Graduhi sa 1–10 (10 mao ang matag oportunidad nga inyong maangkon), kapila ninyo buhaton ang pagpasalamat sa inyong mga lider sa Simbahan, sa tawo mismo o diha sa pag-ampo?
-
Unsay inyong mahimo aron makapakita og dugang nga pagpasalamat alang sa gihimong sakripisyo ug paningkamot sa inyong mga lider alang sa inyong kaayohan?
© 2015 pinaagi sa Intellectual Reserve, Inc. Tanang mga katungod gigahin.
Human sa igong panahon, pangutana:
-
Unsa nga mga panalangin ang mahimong moabut gikan sa regular nga pagbuhat sa espirituhanon nga pagsusi sama niini?
I-summarize ang 2 Mga Taga-Corinto 13:7–14 pinaagi sa pagpasabut nga si Pablo mipasidaan sa mga Santos nga likayan ang kadautan ug maningkamot alang sa kahingpitan.
Pagpamatuod sa mga kamatuoran nga inyong nahisgutan dinhi niining leksyon. Dapita ang mga estudyante sa pagsulat og usa ka piho nga tumong kon unsaon nila paggamit ang usa niining mga kamatuoran diha sa ilang mga kinabuhi.
Scripture Mastery Review
Ang mga estudyante nga may pagsabut sa mga tudling sa kasulatan molambo samtang sila maghimo sa ilang kaugalingong mga pangutana mahitungod niadtong mga tudling. Bahina ang klase ngadto sa duha (o mas daghan pa) ka team. Dapita ang mga team sa pagsulat sa mga timailhan nga magtudlo ngadto sa piho nga mga scripture mastery passage. (Mahimo nimong pilion ang usa ka grupo sa mga tudling nga ganahan nimong makat-onan o maribyu sa mga estudyante.) Awhaga ang mga estudyante nga dili himoong lisud kaayo ang ilang mga timailhan. Human sa igong panahon, dapita ang mga team sa pagbanus-banos sa pagbasa og kusog sa ilang mga timailhan aron makita kon ang ubang team makaila sa husto nga tudling.
Pahinumdom: Kon wala kay panahon sa paghimo niini nga kalihokan isip kabahin niini nga leksyon, mahimo nimo kining gamiton sa laing adlaw. (Ang mosunod nga leksyon medyo mubo ra. Mahimong aduna na kay panahon sa paggamit niining kalihokan.) Alang sa uban nga pangribyu nga mga kalihokan, tan-awa ang appendix sa katapusan niining manwal.
Komentaryo ug Background nga Impormasyon
2 Mga Taga-Corinto 12:4. “Ginadili ang paglitok sa tawo”
Sama ni Pablo, kinsa “hingdunggan ang ‘dili arang malitok’ nga ‘ginadili ang paglitok sa tawo’ sa dihang siya gisakgaw ngadto sa ikatulo nga langit (2 Mga Taga-Corinto 12:2, 4), mahimo usab kitang makaangkon og espirituhanon nga mga kasinatian nga angay lang natong ipakigbahin kon gisugo sa pagbuhat sa ingon pinaagi sa espiritu. Si Presidente Boyd K. Packer sa Korum sa Napulog Duha ka mga Apostoles mitudlo:
“Nagtuo usab ako nga dili maalamon ang pagpadayon og pagpanabi sa dili kasagaran nga mga espirituhanong kasinatian. Kini kinahanglan mabantayan inubanan og pag-amping ug ipakigbahin lang kon ang Espiritu mismo ang mag-aghat nimo sa paggamit niini aron sa pagpanalangin sa uban’ [‘The Candle of the Lord,’ Ensign, Ene. 1983, 53]” (New Testament Student Manual [manwal sa Church Educational System, 2014], 407).
2 Mga Taga-Corinto 12:7. Unsa ang “tunok” nga nakasamok ni Apostol Pablo?
Si Elder Bruce R. McConkie sa Korum sa Napulog Duha ka mga Apostoles misugyot nga ang tunok ni Pablo tingali ang mga “wala mailhing balatian, maklaro nga usa ka bug-at diin ang Apostol mahimong miantus sa kanunay o pabalik-balik” (Doctrinal New Testament Commentary, 3 vols. [1965–73], 2:448).
2 Mga Taga-Corinto 12:9. “Ang akong gahum ginahingpit diha sa kahuyang”
Si Elder Robert D. Hales sa Korum sa Napulog Duha ka mga Apostoles nakat-on gikan sa iyang personal nga kasinatian uban sa pisikal nga mga hagit aron mapasabut kon sa unsang paagi nga ang kalooy sa Manluluwas makapahimo natong lig-on diha sa kahuyang:
“Sa milabayng duha ka tuig, mihulat ko sa Ginoo alang sa mortal nga mga leksyon nga itudlo ngari nako atol sa mga panahon sa pisikal nga kasakit, mental nga paghingutas, ug pagpamalandong. Nakat-on ko nga ang makanunayon, tumang kasakit mao ang usa ka talagsaon nga mapahinungoron nga tigpalunsay nga makapahimo natong mapaubsanon ug mapaduol ngadto sa Espiritu sa Dios. Kon maminaw kita ug mosunod, magiyahan kita pinaagi sa Iyang Espiritu ug buhaton ang Iyang kabubut-on diha sa atong inadlaw-adlaw nga paningkamot.
“Dihay mga higayon sa dihang nangutana ko og pipila ka direktang mga pangutana sa akong mga pag-ampo, sama sa, ‘Unsa nga mga leksyon nga gusto Nimong akong makat-onan gikan niining mga kasinatian?’
“Samtang nagtuon ako sa mga kasulatan atol niining kritikal nga panahon sa akong kinabuhi, ang belo minipis ug ang mga tubag nahatag ngari nako sama nga kini narekord diha sa mga kinabuhi sa uban kinsa miagi og mas bug-at pang mga pagsulay. …
Sa pipila ka okasyon, akong giingnan ang Ginoo nga ako nakat-on gayud sa mga leksyon nga gitudlo ug dili na kinahanglan nga ako molahutay pa og dugang nga mga pag-antus. Ang ingon nga mga pangaliyupo daw walay kapuslanan, tungod kay naklaro na kini ngari kanako nga kining makalimpyo nga proseso sa pagsulay kinahanglang antuson diha sa panahon sa Ginoo ug sa kaugalingong paagi sa Ginoo. Usa kini ka butang nga itudlo, ‘maoy matuman ang Imong kabubut-on’ (Mat. 26:42). Lahi ang pagsunod niini. Nakat-on usab ko nga dili ko mag-inusara sa pag-atubang niini nga mga pagsulay ug mga kasakit kon dili ang mga anghel nga magbalantay moatiman kanako. …
“Ang mga kasinatian sa miaging duha ka tuig nakapahimo sa akong espiritu nga mas lig-on ug nakahatag kanako og kadasig nga maisugong mopamatuod ngadto sa kalibutan ang mga pagbati sa akong kasingkasing” (“The Covenant of Baptism: To Be in the Kingdom and of the Kingdom,” Ensign, Nob. 2000, 6).