Leksyon 149
2 Juan–3 Juan
Pasiuna
Gipasidan-an ni Juan ang mga Santos mahitungod sa mga tawo kinsa manglimbong ug magsangyaw nga si Jesukristo wala moanhi sa unod. Gidayeg niya si Gayo tungod sa iyang kamatinud-anon.
Pahinumdom: Kini nga leksyon naglakip og sugyot sa pagtudlo alang sa 3 Juan nga naglakip sa mga estudyante nga nakadawat og mga sulat gikan sa mga ginikanan o sa mga lider sa Simbahan. Kon pilion nimo nga gamiton kini nga sugyot sa pagtudlo, gikinahanglan nimo ang pagpangandam daan sulod sa pipila ka adlaw. Dapita ang mga ginikanan o, kon gikinahanglan, lokal nga mga lider sa Simbahan sa matag estudyante sa paghimo og mubo nga sulat ngadto sa estudyante nga magpahayag sa kalipay nga ilang gibati samtang nakita nila ang paningkamot sa estudyante sa pagsunod sa ebanghelyo. Siguroa nga duna kay sulat alang sa matag estudyante gikan sa iyang mga ginikanan o lider sa Simbahan sa adlaw nga itudlo nimo kini nga leksyon.
Mga Sugyot alang sa Pagtudlo
2 Juan
Mipasidaan si Juan mahitungod sa mga tawo nga nagtudlo og sayop nga doktrina
Pagngalan og ilado kaayo nga atleta nga pamilyar sa kadaghanan sa mga estudyante.
-
Unsa kaha ang buhaton niini nga atleta aron hingpit kanunay ang iyang kahimsog aron makadula og tarung?
-
Unsa kaha ang mahitabo kon kini nga atleta, human sa pagpaningkamot nga molambo, mihunong sa pag-adto sa gym ug nagsugod sa pagkaon og junk food, nagsigig tan-aw og TV, nag-video games, ug mitumar og mga makadaot sa lawas?
Dapita ang mga estudyante sa pagkonsiderar kon sa unsang paagi ang pagpaningkamot nga angayang buhaton sa malampusong mga atleta aron mapreserbar ang pinakamaayo nilang pisikal nga kondisyon ikakumpara sa pagpaningkamot nga angayang buhaton sa mga miyembro sa Simbahan aron mapreserbar ang mga panalangin nga ilang nadawat pinaagi sa ebanghelyo. Dapita sila sa pagpangita og usa ka baruganan samtang nagtuon sila sa 2 Juan nga makatabang nila nga mapreserbar ang mga panalangin nga ilang nabatunan isip mga miyembro sa Simbahan.
I-summarize ang 2 Juan 1:1–4 pinaagi sa pagpasabut nga gisugdan ni Apostol Juan ang iyang sulat pinaagi sa pagtumong sa iyang sulat ngadto sa “pinili nga senyora ug sa iyang mga anak,” nga tingali usa ka direktang sulat ngadto sa usa ka babaye nga miyembro sa Simbahan ug sa iyang mga anak o pinulongan nga nagsimbolo sa paghuglagway sa usa ka kongregasyon sa Simbahan.
Dapita ang usa ka estudyante sa pagbasa og kusog sa 2 Juan 1:5–6. Hangyoa ang klase sa pagsunod, nga mangita sa sugo nga gipahinumdom ni Juan sa mga Santos.
-
Unsa nga sugo ang gipahinumdom ni Juan sa mga Santos?
Dapita ang usa ka estudyante sa pagbasa og kusog sa 2 Juan 1:7. Hangyoa ang klase sa pagpangita kon nganong gitambagan ni Juan ang mga miyembro sa Simbahan nga “managgawi kita subay sa” (2 Juan 1:6), o mosunod, sa mga sugo.
-
Nganong gitambagan man ni Juan ang mga miyembro sa Simbahan sa pagsunod sa mga sugo?
-
Unsa man ang gitudlo sa mga “malimbungon” (bersikulo 7)?
Ipasabut nga dihang gisulat ni Juan kini nga epistola, ang usa ka pilosopiya nga nailhang Docetism nag-anam og ka-popular. Ang mga Docetist mituo nga ang Dios labihan ang pagkahimaya nga dili Siya mahimong mag-antus, mamatay, o ubang mortal nga kasinatian. Busa, miingon sila nga si Jesukristo isip anak sa Dios wala gayud moanhi sa aktwal sa unod apan ang Iyang Espiritu lamang maingon og maoy mibuhat sa mga butang nga mabuhat o masinati sa usa ka mortal.
-
Unsa ang pipila ka mga pananglitan sa mga sayop nga mga pagtulun-an sa atong panahon nga misukwahi sa mga kamatuoran sa ebanghelyo?
-
Ngano nga peligro man sa espirituhanong paagi kini nga mga pagtulun-an?
Dapita ang usa ka estudyante sa pagbasa og kusog sa 2 Juan 1:8. Hangyoa ang klase sa pagsunod, nga mangita kon unsay gitambag ni Juan nga buhaton sa mga miyembro sa Simbahan tungod sa sayop nga mga pagtulun-an. Ipasabut nga ang “bantayi ninyo ang inyong kaugalingon” nagpasabut nga magmabinantayon o magmainampingon sa dili paghangop sa sayop nga mga pagtulun-an ug mga butang nga gihagoan pwedeng nagpasabut nga gihimo o naangkon.
-
Unsa nga baruganan ang atong makat-unan gikan sa mga pagtulun-an diha sa mga bersikulo 6–8 kon unsaon nato nga makapadayon kita sa pagtagamtam sa mga panalangin sa ebanghelyo nga atong nadawat? (Gamit ang kaugalingon nilang mga pulong, kinahanglang mahibaloan sa mga estudyante ang baruganan nga susama sa mosunod: Samtang kita nagtuman sa mga sugo ug nagmabinantayon, padayon kitang makatagamtam sa mga panalangin sa ebanghelyo nga atong nadawat. Isulat sa pisara kini nga baruganan.)
Dapita ang mga estudyante nga isulat diha sa ilang mga class notebook o mga scripture study journal ang usa ka listahan sa mga panalangin sa ebanghelyo nga ila na nga nadawat o gilauman nga madawat. Hangyoa sila sa pagpakigbahin diha sa klase kon unsay ilang gisulat. Isulat ang ilang mga tubag sa pisara.
-
Sa unsang paagi ang pagdawat sa sayop nga mga pagtulun-an makapugong kanato sa pag-angkon ug sa padayon nga pagtagamtam niining mga panalangin sa ebanghelyo?
Dapita ang usa ka estudyante sa pagbasa og kusog sa 2 Juan 1:9. Hangyoa ang klase sa pagsunod, nga mangita sa unsay gitudlo ni Juan nga mahitabo niadtong magsunod sa doktrina ni Kristo, o magpabiling duol ug molahutay sa ebanghelyo.
-
Unsa ang mabatunan sa mga tawo nga magsunod sa doktrina ni Kristo? (Human makatubag ang mga estudyante, isulat sa pisara ang mosunod nga baruganan: Kon magsunod kita sa doktrina ni Kristo, maanaa kanato ang Amahan ug ang Anak.)
Ipasabut nga maanaa kanato ang Amahan ug ang Anak pinaagi sa pagpakig-uban sa Espiritu Santo.
Hangyoa ang mga estudyante sa pagpamalandong sa ilang mga paningkamot sa pagtuman sa mga sugo, nga magmabinantayon, ug magsunod sa ebanghelyo. Dapita sila sa pagsulat kon nganong gusto nilang mapreserbar ang mga panalangin nga ilang nadawat pinaagi sa ebanghelyo ug usa ka butang nga ilang buhaton karon aron mas magmatinud-anon ug magpadayon sa pagtuman sa mga sugo.
I-summarize ang 2 Juan 1:10–13 pinaagi sa pagpasabut nga giawhag ni Juan ang mga Santos nga likayan ang mga tawo nga nagsabwag og sayop nga doktrina. Gipahayag usab niya ang iyang tinguha nga personal niyang makaistorya ang mga Santos nga iyang gisulatan.
3 Juan
Gidayeg ni Juan si Gayo tungod sa iyang pagkamatinud-anon
Pagdala sa klase og gamayng graba ug dako nga panaksan nga puno sa tubig. Hangyoa ang usa ka estudyante sa paghulog og gamayng graba ngadto sa tubig nga dili matandog ang tubig.
-
Nganong imposible man nga dili matandog ang tubig pinaagi sa gamayng graba?
-
Kinsa pa gawas sa imong kaugalingon ang positibong maapektuhan gumikan sa imong pagpili sa pagsunod sa ebanghelyo?
Ipasabut nga sumala sa narekord sa 3 Juan, namulong si Juan ngadto sa matinud-anong miyembro sa Simbahan nga ginganlan og Gayo.
Dapita ang usa ka estudyante sa pagbasa og kusog sa 3 Juan 1:1–4. Hangyoa ang klase sa pagsunod, nga mangita kon sa unsang paagi si Juan naapektuhan sa kamatinud-anon ni Gayo sa pagsunod sa ebanghelyo. Ipasabut nga ang mga anak diha sa bersikulo 4 tingali nagpasabut sa mga miyembro sa Simbahan kinsa natabangan ni Juan nga makabig sa ebanghelyo.
-
Sa unsang paagi nga si Juan naapektuhan sa kamatinud-anon ni Gayo sa pagsunod sa ebanghelyo?
-
Unsaon man ninyo sa pag-summarize ang kamatuoran gikan niining mga bersikulo kon sa unsang paagi ang pagsunod sa ebanghelyo makaapektar sa atong kaugalingon ug sa uban? (Ang mga estudyante mahimong makakita og lain-laing kamatuoran, apan siguroa nga mahibaloan nila ang kamatuoran nga susama sa mosunod: Ang pagsunod sa ebanghelyo maghatag og kalipay dili lamang sa atong kaugalingon apan sa uban usab.)
-
Kanus-a kamo nakasinati og kalipay tungod kay dunay tawo nga matinud-anong nagsunod sa ebanghelyo?
Alang sa dugang nga paghulagway niini nga kamatuoran, kon gipili nimo nga pasulaton ang mga ginikanan o mga lider sa Simbahan ngadto sa mga estudyante, ipanghatag na ang mga sulat karon. Siguroa nga ang matag estudyante dunay sulat gikan sa iyang mga ginikanan o lider sa Simbahan, ug hatagi og panahon ang mga estudyante sa pagbasa sa mga sulat.
I-summarize ang 3 Juan 1:5–14 pinaagi sa pagpasabut nga gidayeg ni Juan si Gayo sa iyang kaandam nga modawat sa tigbiyahian nga mga lider sa Simbahan o sa mga misyonaryo, ug iyang gisaway ang lokal nga lider nga si Diotrefes, kinsa wala modawat ni Juan ug sa iyang mga kaubanan.
Ribyuha ang mga kamatuoran nga nahibaloan dinhi nga leksyon. Ipamatuod kini nga mga kamatuoran, ug dapita ang mga estudyante sa paggamit niini sa ilang kinabuhi.
Komentaryo ug Background nga Impormasyon
2 Juan 1:1–5. “Ang pinili nga senyora”
“Gihulagway ni Juan ang iyang kaugalingon isip ‘ang anciano o elder’; ‘ang pinili nga senyora’ nga iyang gisulatan (tan-awa sa 2 Juan 1:1) posibling usa ka paghulagway nga nagpasabut sa usa ka branch sa Simbahan o literal nga nagpasabut sa usa ka babaye nga miyembro, tingali gani og ang iyang asawa. Sa atong dispensasyon, si Emma Smith, ang asawa ni Propeta Joseph Smith, gitawag nga ‘pinili nga babaye’ (D&P 25:3). Gikalipay ni Juan nga nakit-an niya ang mga anak sa pinili nga senyora o babaye nga nagsubay sa kamatuoran ug nagsunod sa ebanghelyo ni Jesukristo” (New Testament Student Manual [manwal sa Church Educational System, 2014], 519).
3 Juan 1:9–10. “Si Diotrefes, nga buot gayud magpakalabaw sa tanan, nagadumili sa pag-ila kanamo”
Si Elder Bruce R. McConkie sa Korum sa Napulog Duha ka mga Apostoles mipasabut kon si kinsa si Diotrefes ug unsay iyang gihimo:
“Ania si Diotrefes, usa ka lokal nga opisyal sa simbahan nga may pagkainila ug impluwensya: (1) Kinsa midumili sa pagtugot nga basahon diha sa iyang kongregasyon ang doktrina ug mga instruksyon sa usa ka sakop sa Unang Kapangulohan sa Simbahan; (2) Kinsa nagsangyaw batok sa apostolikanhong mga pangulo sa Simbahan; (3) Kinsa midumili sa pagdawat sa mga representante sa simbahan nga gipadala ngadto kaniya; (4) Kinsa midumili nga tugutan ang ubang naa sa kongregasyon sa pag-atiman o pagpatalinghug sa mga awtorisadong mga tawo sa simbahan; ug (5) Kinsa misalikway (maingon og mi-excommunicate o mipahimulag) sa takus nga mga miyembro sa Simbahan” (Doctrinal New Testament Commentary, 3 vols. [1965–73], 3:413–14).