Mateo 23:1–26:30 (Unit 6)

Mga Materyal para Pagpangandam alang sa Home-Study Teacher

Summary sa mga Leksyon sa Daily Home-Study

Ang mosunod nga summary sa mga panghitabo, mga doktrina, ug mga baruganan nga nakat-unan sa mga estudyante samtang nagtuon sila sa Mateo 23:1–26:30 (unit 6) dili tuyo nga itudlo isip kabahin sa imong leksyon. Ang leksyon nga imong itudlo nagtutok lang sa pipila niining mga doktrina ug mga baruganan. Sunda ang mga pag-aghat sa Balaang Espiritu samtang ikonsiderar nimo ang mga panginahanglan sa imong mga estudyante.

Day 1 (Mateo 23)

Gitun-an sa mga estudyante ang pagbadlong ni Jesus ngadto sa mga lider sa mga Judeo ug nakakat-on nga mahimo ra kitang mopili sa pagsunod sa mga balaod sa Dios bisan og ang uban nakita nato nga nagpakaaron ingnon sa ilang mga lihok. Nakat-unan nila nga kon sulayan nato ang pagpataas sa kaugalingon labaw kay sa uban, ipaubos kita, ug kon mapainubsanon ta ug moserbisyo sa uban, ang Ginoo mopataas kanato. Nakat-unan usab nila nga kon maningkamot ta sa pagkahimong espirituhanong limpyo sa sulod, makita kini sa gawas nato nga mga pagpili, ug kon andam ta nga pundukon sa Manluluwas, niana atong madawat ang Iyang pagpangga ug proteksyon.

Day 2 (Mateo 24)

Gikan sa pakigpulong sa Manluluwas mahitungod sa Iyang Ikaduhang Pag-anhi, nakat-unan sa mga estudyante ang mosunod: Kon magpabilin kitang malig-on ug dili mabuntog, nan kita pagaluwason. Sa dili pa moabut ang Ikaduhang Pag-anhi ni Jesukristo, ang mga pinili sa Ginoo pagapundukon ug ang ebanghelyo masangyaw sa tibuok kalibutan. Kon atong ibahandi ang pulong sa Ginoo, nan dili kita malingla. Ang Langitnong Amahan lang ang nahibalo kon kanus-a mahitabo ang Ikaduhang Pag-anhi. Kon magbantay kita sa mga timailhan ug motuman sa mga sugo sa Ginoo, nan maandam kita sa Ikaduhang Pag-anhi sa Manluluwas.

Day 3 (Mateo 25)

Samtang gitun-an sa mga estudyante ang sambingay sa napulo ka mga dalagang birhen, nakat-unan nila nga dili kita mahimong makapanghulam og espirituhanong pagpangandam gikan sa uban ug nga kita maandam sa Ikaduhang Pag-anhi pinaagi sa pagpalambo sa atong pagpamatuod ug pagkakabig pinaagi sa inadlawng pagkamatarung. Nakat-unan usab nila nga aron maandam alang sa pag-anhi sa Ginoo ug mahimong takus nga magpabilin sa Iyang presensya, kinahanglang makaila kita Kaniya. Sa makadiyot gitun-an sa mga estudyante ang sambingay sa mga talento ug nakakat-on nga ang kahadlok mopugong nato sa paggamit sa mga gasa ug abilidad nga gihatag sa Ginoo kanato, ug kon dili nato palamboon ug gamiton ang atong espirituhanong mga gasa alang sa kaayohan, nan kini mawala ra kanato.

Day 4 (Mateo 26:1–30)

Samtang gitun-an sa mga estudyante ang katapusang mga adlaw sa mortal nga pagpangalagad ni Jesukristo, ilang nakat-unan nga dihang nadungog sa mga disipulo ni Jesukristo ang mga pulong sa Ginoo, ilang gisusi ang kaugalingon nilang kinabuhi aron makita unsaon nila kini sa paggamit. Ilang nakat-unan nga ang mga sakrament emblem nagrepresentar sa lawas ug dugo ni Jesukristo, nga Iyang gisakripisyo alang nato ug nga si Jesukristo mihimo sa sakrament aron kita mahinumdom Kaniya ug sa Iyang Pag-ula alang sa atong mga sala. Nakat-unan usab nila nga kon kita maghinulsol ug moambit sa sakrament uban sa tinuod nga katuyoan, malimpyuhan kita sa atong mga sala.

Pasiuna

Dihang gitudlo ni Jesukristo sa Iyang mga disipulo ang mahitungod sa Iyang Ikaduhang Pag-anhi samtang didto sa Bungtod sa mga Oliba, Iyang gisugilon ang mahitungod sa sambingay sa mga talento.

Mga Sugyot alang sa Pagtudlo

Mateo 25:14–30

Si Jesukristo mitudlo sa iyang mga disipulo sa sambingay sa mga talento

Sa dili pa magklase, pagbutang og lima ka sinsilyo sa pikas kilid sa kwarto ug duha ka sinsilyo sa pikas kilid. Pagbutang og laing walo ka sinsilyo sa imong bulsa.

Sa pagsugod sa leksyon, pagdapit og tulo ka estudyante nga moadto sa atubang aron motabang nimo nga i-akting ang sambingay nga gitudlo ni Jesukristo sa Iyang mga disipulo isip kabahin sa Iyang instruksyon bahin sa Ikaduhang Pag-anhi.

Dapita ang usa ka estudyante sa pagbasa og kusog sa Mateo 25:14–18. Hangyoa ang klase sa pagsunod, nga mangita sa unsay nadawat sa matag sulugoon ug unsay iyang gihimo niini.

Unsa ang gihatag sa agalon ngadto sa matag usa niya ka sulugoon? (Ipasabut nga ang mga talento niini nga sambingay mao ang gidaghanon sa kwarta. Kuhaa ang walo ka sinsilyo sa imong bulsa, ug ihatag ang lima ngadto sa usa ka estudyante, duha sa lain nga estudyante, ug ang usa sa ikatulo nga estudyante.)
Unsa ang gihimo sa matag sulugoon sa kwarta nga gihatag diha nila?

Dapita ang estudyante nga dunay lima ka sinsilyo nga mangita sa dugang nga lima ka sinsilyo gikan sa pikas kilid sa kwarto. Hangyoa ang estudyante nga may duha ka sinsilyo nga mangita sa dugang nga duha ka sinsilyo gikan sa laing pikas kilid sa kwarto. Dapita ang estudyante nga may usa ka sinsilyo nga itago o magpakaaron ingnon nga milubong sa sinsilyo.

Hangyoa ang mga estudyante sa pag-uli diha nimo sa mga sinsilyo ug manglingkod. Isulat sa pisara ang mosunod nga mga elemento sa sambingay (nga dili iapil ang interpretasyon sulod sa parentheses):

Ang agalon sa mga sulugoon (si Ginoong Jesukristo)

Ang mga sulugoon (Mga disipulo sa Ginoo)

Ang mga talento (Mga gasa ug mga abilidad nga gihatag sa Ginoo sa Iyang mga disipulo)

Unsa ang girepresentaran sa mga elemento diha sa sambingay? (Kon gikinahanglan, tabangi ang mga estudyante nga mahibaloan kon si kinsa ug unsa ang girepresentaran sa mga elemento. Isulat sa pisara ang mga interpretasyon sunod sa mga elemento. Ipasabut nga ang pipila ka mga gasa ug mga abilidad nga naa nato sa mortalidad nadawat ug napalambo na atol sa atong premortal nga kinabuhi. Kita makapili nga ipadayon sa pagpalambo kana nga mga gasa ug ang uban atol sa pagka-mortal.)
Sumala sa Mateo 25:15, ngano nga gihatagan sa agalon ang matag sulugoon og lain-laing kantidad sa kwarta? (Human makatubag ang mga estudyante, ipasabut nga ang mga pulong nga “sumala sa iyang katakus” nagpasabut nga ang Dios mihatag sa matag usa nato og mga gasa ug mga abilidad [katakus] nga atong gikinahanglan sumala sa atong mga kahimtang. Ang tanan gihatagan og esprituhanong gasa gikan sa Dios [tan-awa sa D&P 46:11]. Ipasabut nga ang kantidad sa talento nga gihatag kanato dili maoy indikasyon sa atong personal nga bili.)

Basaha og kusog ang mosunod nga mga pangutana, ug dapita ang mga estudyante sa pagpamalandong niini:

Asa nga sulugoon ang gibati ninyo nga pareho kaayo ninyo: ang usa ba nga gihatagan og lima ka talento, duha ka talento, o usa ka talento? Ngano?

Dapita ang usa ka estudyante sa pagbasa og kusog sa Mateo 25:19–21. Hangyoa ang klase sa pagsunod, nga mangita sa gisulti sa agalon ngadto sa sulugoon kinsa nakadawat og lima ka talento.

Unsa ang gisulti sa agalon ngadto sa unang sulugoon?

Ipasabut nga ang pagkahimong “piniyalan sa daghang mga butang” ug ang “[pag]duyog … sa kalipay sa imong agalon” (Mateo 25:21) nagpasabut sa pagtuman sa atong balaanong potensyal ug pagdawat og kinabuhing dayon uban sa Langitnong Amahan.

Unsa nga baruganan ang atong makat-unan gikan sa kasinatian sa unang sulugoon? (Ang mosunod posibling maoy usa ka baruganan nga nahibaloan sa mga estudyante: Kon matinud-anon kitang migamit sa mga gasa ug abilidad nga gihatag sa Ginoo kanato, niana atong matuman ang atong balaanong potensyal ug madawat ang kinabuhing dayon.)
Unsa ang pipila ka mga example kon unsaon nga kita magmatinud-anon sa paggamit sa atong mga gasa ug abilidad nga gihatag sa Ginoo kanato?

Ipasabut nga ang ikaduhang sulugoon mahimo ra untang moreklamo dihang nakita niya nga gihatagan og lima ka talento ang unang sulugoon ug ang iya duha ra. Hinoon, nagmatinud-anon siya sa paggamit sa mga talento nga gihatag kaniya.

Dapita ang usa ka estudyante sa pagbasa og kusog sa Mateo 25:22–23. Hangyoa ang klase sa pagsunod, nga mangita sa gisulti sa agalon ngadto sa sulugoon kinsa nakadawat og duha ka talento.

Unsa ang gisulti sa agalon ngadto sa sulugoon kinsa nakadawat og duha ka talento?
Bisan og ang agalon mihatag sa duha ka sulugoon og managlahing kantidad sa kwarta, ngano kaha nga silang duha nakadawat man og pareho nga tubag gikan sa ilang agalon?
Unsa nga baruganan ang atong makat-unan gikan sa kasinatian sa tawo nga gihatagan og duha ka talento? (Ang mga estudyante mahimong mogamit og lain-laing mga pulong apan kinahanglang mahibaloan nila ang mosunod nga baruganan: Panalanginan kita sa Ginoo kon magmatinud-anon kita sa paggamit sa mga gasa ug abilidad nga Iyang gihatag kanato, bisan kon unsa kadaghan ang naa nato o unsa man kini. Gamit ang mga pulong sa mga estudyante, isulat sa pisara kining baruganan.)

Hangyoa ang klase sa pagpamalandong kon mibati na ba sila nga naay tawo nga mas daghan o mas maayong gasa ug mga abilidad kay sa ilaha. Itudlo ang baruganan nga bag-o lang nimong gisulat sa pisara.

Sa unsang paagi ang paghinumdom niini nga baruganan makatabang nato kon mobati ta nga naay tawo nga nakadawat og mas daghan o mas maayong mga gasa ug abilidad kay sa atoa?

Dapita ang usa ka estudyante sa pagbasa og kusog sa mosunod nga pamahayag ni Elder Quentin L. Cook sa Korum sa Napulog Duha ka mga Apostoles:

“Ang paglambo sa kaugalingon natong mga talento maoy pinakamaayong sukod sa atong personal nga kauswagan. … Ang pakigkumpara sa mga panalangin makapaniguro nga magpalayas sa kalipay. Dili mahimong mapasalamaton ta unya sa samang panahon masinahon usab. Kon tinuoray kitang gusto nga makabaton sa Espiritu sa Ginoo ug masinati ang kamaya og kalipay, kinahanglan kitang magmaya sa kaugalingon natong mga panalangin ug magmapasalamaton” (“Rejoice!” Liahona, Nob. 1996, 29, 30).

Unsaon man nato sa pagdiskobre ang mga gasa ug abilidad nga gihatag sa Ginoo kanato?

Hatagi ang matag estudyante og papel ug hangyoa sila sa pagsulat sa ilang ngalan diha sa ibabaw. Dapita sila nga ipasa ang ilang mga papel ngadto sa estudyante nga ilang katapad. Hangyoa ang mga estudyante sa pagsulat og usa ka gasa o abilidad nga ilang nakita niana nga tawo kansang ngalan naa sa papel. Sugoa sila nga ipadayon ang pagpasa sa papel libut sa kwarto ug pagsulat sa mga gasa ug abilidad nga ilang naobserbahan.

Human sa pipila ka minutos, hangyoa ang mga estudyante sa pag-uli sa mga papel ngadto sa mga tag-iya niini. Hatagi og panahon ang mga estudyante sa pagbasa mahitungod sa mga gasa ug abilidad nga nakita sa uban diha kanila. Dayon hangyoa sila sa pagsulat diha sa ilang mga papel sa tubag sa mosunod nga panguta:

Unsa ang usa ka paagi nga kamo makagamit sa usa sa inyong mga gasa sa pagpadayon sa buhat sa Ginoo?

Ipasabut nga ang sambingay sa mga talento naglakip og mga pahimangno bahin sa mga gasa ug abilidad nga gihatag kanato. Dapita ang pipila ka estudyante nga magpuli-puli sa pagbasa og kusog sa Mateo 25:24–30. Hangyoa ang klase sa pagsunod, nga mangita kon giunsa sa pagtubag sa agalon ang sulugoon nga mitago sa iyang talento. Human mabasa ang bersikulo 27, ipasabut nga ang tubo nagpasabut nga interes (ginansya gikan sa pagpamuhunan o pagpahulam og kwarta).

Ngano nga ang katapusang sulugoon mitago sa iyang talento? Giunsa man sa pagsanong sa Ginoo ang pagpili nga gihimo sa sulugoon?
Bisan tuod og ang sulugoon wala gayud mawad-i sa kwarta sa iyang agalon, unsay sayop nga nabuhat sa sulugoon?
Unsa kaha sa inyong hunahuna ang itubag unta sa agalon ngadto sa sulugoon kon may giuli pa siya nga duha ka talento?

Dapita ang mga estudyante sa pagpamatuod sa mga baruganan nga ilang nahisgutan. Awhaga sila sa paggamit niini nga mga gasa ug abilidad aron sa pagpadayon sa buhat sa Ginoo.

Sunod nga Unit (Mateo 26:31–Mark 3)

Ipasabut nga sa sunod semana magtuon ang estudyante sa detalye sa Pag-ula ni Jesukristo, nga nagsugod sa Iyang pag-antus sa Tanaman sa Getsemani ug nagpadayon hangtud sa wala masubay sa balaod nga mga paghusay, pamugal-bugal, mga pagbunal, ug sa Iyang kamatayon hangtud sa pagkalansang, ug sa katapusan misangput sa Iyang mahimayaong Pagkabanhaw.