Mateo 6:1–13:23 (Unit 3)

Mga Materyal para Pagpangandam alang sa Home-Study Teacher

Summary sa mga Leksyon sa Daily Home-Study

Ang mosunod nga mga summary sa panghitabo, mga doktrina, ug mga baruganan nga nakat-unan sa mga estudyante samtang nagtuon sila sa Mateo 6:1–13:23 (unit 3) dili tuyo nga itudlo isip kabahin sa imong leksyon. Ang leksyon nga imong itudlo nagtutok lang sa pipila niining mga doktrina ug mga baruganan. Sunda ang mga pag-aghat sa Balaang Espiritu samtang ikonsiderar nimo ang panginahanglan sa imong mga estudyante.

Day 1 (Mateo 6–7)

Samtang ang mga estudyante padayon sa ilang pagtuon sa Wali Ibabaw sa Bungtod, nakat-unan nila ang mosunod: Kon mopahigayon kita og mga buhat sa pagpahinungod nga makalipay sa Langitnong Amahan kay sa tinguha nga matagad sa uban, niana Siya dayag nga moganti kanato. Dili kita makaserbisyo sa Dios ug sa bahandi. Kon kita mangayo, mangita, ug manuktok sa atong pagpangita sa kamatuoran, tubagon kita ug panalanginan sa Langitnong Amahan og personal nga pagpadayag. Mailhan nato ang mini nga mga propeta pinaagi sa ilang mga bunga.

Day 2 (Mateo 8–10)

Dinhi sa leksyon, nakat-unan sa mga estudyante nga si Jesus moayo kanato ug sa atong mga sakit ug mga balatian ug Siya mitawag og mga Apostoles ug gitugyan ang Iyang awtoridad ngadto kanila. Nahibaloan usab sa mga estudyante nga kon anaa kita sa pagserbisyo sa Ginoo, Siya modasig sa angay natong isulti kon gikinahanglan, ug kon wad-on nato ang atong kinabuhi (mohatag sa atong panahon) tungod og para kang Jesukristo, niana atong makita ang katuyoan sa atong kinabuhi.

Day 3 (Mateo 11–12)

Samtang maningkamot kita sa pagkat-on bahin ni Jesukristo ug samtang kita mopamatuod bahin Kaniya, ang kaugalingon natong pagpamatuod Kaniya malig-on, ug kon kita moduol ni Jesukristo, Siya mopagaan sa atong mga palas-anon ug mohatag nato og pahulay. Agig dugang, nakat-unan sa mga estudyante ang hingpit nga komitment ngadto sa Dios ug mapulihan ang dautang mga impluwensya sa ilang kinabuhi og maayong mga butang.

Day 4 (Mateo 1–23)

Samtang gitun-an sa mga estudyante ang sambingay sa magpupugas, nakat-unan nila nga ang mga kabalaka sa kalibutan makabalda nato, makatangtang sa atong pag-focus sa Ginoo, ug mapugngan ang atong pagtuo ug pagpamatuod sa pulong sa Dios. Aron malikayan ang pagkahitabo niini ug aron makabig ngadto sa Manluluwas, kinahanglan tang makadawat sa pulong sa Dios ug maningkamot nga malig-on ang atong pagpamatuod.

Pasiuna

Ipasabut nga sigun sa narekord sa Mateo 7, gipadayon sa Manluluwas ang Iyang Wali Ibabaw sa Bungtod pinaagi sa pagtudlo sa Iyang mga disipulo sa paghimo og matarung nga paghukom. Gitudlo usab Niya ang mahitungod sa pagkadawat og personal nga pagpadayag ug paghimo sa kabubut-on sa Langitnong Amahan.

Mga Sugyot alang sa Pagtudlo

Pahinumdom: Atol sa leksyon sa home-study para sa unit 1 ug sa day 3 nga leksyon niining semanaha, gitun-an sa mga estudyante ang scripture mastery passage sa Mateo 11:28–30. Ikonsiderar ang paggahin og mubo nga panahon sa pagribyu sa tudling uban sa mga estudyante.

Mateo 7:1–5

Isip kabahin sa Wali Ibabaw sa Bungtod, gitudloan ni Jesukristo ang Iyang mga disipulo mahitungod sa paghimo og matarung nga paghukom

Sa dili pa magklase, isulat sa pisara ang mosunod nga mga pangutana: Kinahanglan ba tang mohukom o dili mohukom sa uban? Inig sugod sa klase, dapita ang mga estudyante sa pagtubag sa pangutana.

I-display ang litrato nga Ang Wali sa Bukid [Wali Ibabaw sa Bungtod] (Libro sa mga Hulagway sa Ebanghelyo [2009], nu. 39; tan-awa usab sa LDS.org). Ipasabut nga samtang gipadayon ni Jesus ang Iyang Wali Ibabaw sa Bungtod, gitudloan ni Jesukristo ang Iyang mga disipulo mahitungod sa pagpanghukom.

Dapita ang usa ka estudyante sa pagbasa og kusog sa Mateo 7:1. Hangyoa ang klase sa pagsunod, nga mangita sa unsay gitudlo sa Manluluwas bahin sa pagpanghukom. Ipasabut nga ang bersikulo 1 sagad nga masaypan sa pagsabut nga nag-ingon nga dili gayud kita manghukom. Hangyoa ang estudyante sa pagbasa sa Hubad ni Joseph Smith sa Mateo 7:1-2, “Karon mao kini ang mga pulong nga gitudlo ni Jesus sa Iyang mga tinun-an nga sila mosulti ngadto sa mga katawhan. Ayaw paghukom sa dili matarung nga paagi, aron ikaw dili pagahukman, apan paghukom sa matarung nga paagi.”

Unsa ang gitudlo sa Manluluwas mahitungod sa pagpanghukom?
Sa inyong hunahuna unsay ipasabut sa matarung nga paghukom?

Dapita ang usa ka estudyante sa pagbasa og kusog sa Mateo 7:2. Hangyoa ang klase sa pagsunod, nga mangita kon unsay mahitabo nato basi sa atong pagpanghukom sa uban. Dapita ang mga estudyante sa pagreport sa ilang nakat-unan. (Mahimo nimong ipasabut nga ang mga pulong nga “ang hukom nga inyong ipakanaug” nagpasabut sa paagi sa inyong pagsukod o paghukom.)

Unsa ang mahitabo kon mohimo kita og matarung nga paghukom ngadto sa uban? (Human makatubag ang mga estudyante, tabangi nga ilang mahibaloan ang mosunod nga baruganan: Kon matarung ang atong pagpanghukom sa uban, ihatag sa Dios ang sama nga kalooy ug pagkapatas ngari kanato.)

Kon mahimo, iapud-apud ang mga kopya sa mosunod nga pamahayag gikan sa Matinuoron sa Tinuohan ngadto sa matag estudyante. Dapita ang usa ka estudyante sa pagbasa niini og kusog. Hangyoa ang klase sa pagsunod ug mangita sa mga matang sa paghukom nga angay ug dili angay natong buhaton ug unsaon nga matarung ang atong paghukom.

“Usahay magtuo ang mga tawo nga sayop ang paghukom sa uban sa bisan unsang paagi. Samtang tinuod nga dili ka angayang mohukom sa uban o hukman sila sa dili matarung nga paagi, kinahanglan nga mohukom ka sa mga ideya, mga sitwasyon, ug sa mga tawo sa tibuok nimong kinabuhi. …

“Ang paghukom usa ka importanting paggamit sa inyong kagawasan ug nagkinahanglan og dakong pag-amping, ilabi na kon mohukom ka og ubang mga tawo. Ang tanan ninyong mga paghukom kinahanglang magiyahan sa matarung nga mga sumbahan. Hinumdumi nga ang Dios lamang, ang nahibalo sa kasingkasing sa matag indibidwal, ang makahimo og katapusang paghukom sa mga indibidwal (tan-awa sa Pinadayag 20:12; 3 Nephi 27:14; D&P 137:9). …

“… Kutob sa imong mahimo, hukmi ang mga kahimtang sa mga tawo kaysa maghukom sa mga tawo mismo. Kon posible, likaye ang paghimo og mga paghukom hangtud nga makabaton ka og igo nga kahibalo sa mga panghitabo. Kanunay nga magmahimong sensitibo ngadto sa Balaang Espiritu, kinsa makagiya sa imong mga desisyon” (Matinud-anon sa Tinuohan: Usa ka Pakisayran sa Ebanghelyo [2004], 135).

Unsa nga matang sa mga paghukom ang angay natong buhaton?
Unsaon man nato sa paghukom nga matarung?
Unsa ang pipila ka mga example sa mga higayon diin ang tawo nagkinahanglan nga mohimo og matarung nga mga paghukom?

Pag-display og gamayng tipak sa kahoy ug usa ka taas, baga nga piraso sa kahoy. Ipasabut nga dihang nagtudlo ang Manluluwas sa Iyang mga disipulo mahitungod sa paghukom, gipahisama niya ang gamayng tipak sa kahoy ngadto sa usa ka puling ug ang baga nga piraso sa kahoy nga troso. Dapita ang usa ka estudyante sa pagbasa og kusog sa Mateo 7:3. Hangyoa ang klase sa pagsunod, nga mangita sa unsay gitudlo sa Manluluwas bahin sa pagpanghukom sa uban.

Sa gihimong pagkumpara sa Manluluwas unsa ang girepresentaran sa puling ug sa troso? (Nagrepresentar kini sa gagmay ug dagkong mga sayop, mga kahuyang, o mga sala.)
Unsaon ninyo sa pagsulti og balik sa gitudlo sa Manluluwas diha sa bersikulo 3?

Pagpaduol og tulo ka estudyante sa atubangan sa klase. Sugoa ang usa ka estudyante sa paggunit sa baga nga kahoy salipud sa iyang mga mata. Pangutan-a ang ikaduhang estudyante:

Gusto ka ba ang imong classmate nga naay babag nga kahoy maoy motangtang sa imong puling? Nganong dili man?

Pangutan-a ang estudyante nga naay bagang kahoy nga babag:

Unsa ang gikinahanglan nimong buhaton aron makakita og klaro aron matangtang nimo ang puling sa mata sa imong classmate?

Palingkura og balik ang duha ka estudyante sa ilang lingkuranan. Dapita ang usa ka estudyante sa pagbasa og kusog sa Mateo 7:4–5. Dapita ang klase sa pagsunod, nga mangita kon kansang sayop ang giingon sa Manluluwas nga angay natong kabalak-an.

Ang ato bang kabalaka ug pagkorihir itutok ba ngadto sa sayop sa uban o sa atong kaugalingon? Ngano man?
Unsa nga baruganan ang atong makat-unan gikan niining mga bersikulo nga makatabang nato nga malikay sa dili matarung nga paghukom ngadto sa uban? (Ang mga estudyante mahimong mogamit og lain-laing mga pulong apan kinahanglang mahibaloan nila ang mosunod nga baruganan: Kon atong tutukan ang pagtangtang sa kaugalingon natong mga sala ug mga kahuyang, niana ingon og dili kita makahukom sa uban sa dili matarung nga paagi. Isulat sa pisara kini nga baruganan.)
Sa unsang paagi kini nga baruganan makatabang nato kon makakita ta og sipyat sa uban?

Mahimo nimong hatagan ang mga estudyante og gamayng tipak sa kahoy nga hipuson nila isip pahinumdom niini nga baruganan. Dapita ang mga estudyante pagpamalandong sa mga sala o kahuyang nga mahimo nilang tangtangon sa ilang kinabuhi. Awhaga sila sa pagpangayo og tabang sa Ginoo nga matangtang ang kaugalingon nilang mga sipyat imbis hukman ang uban sa dili matarung nga paagi.

Mateo 7:24–27

Ang Ginoo misaad og kaluwasan ngadto sa mga mohimo sa kabubut-on sa Amahan

Pag-display og usa ka bato ug usa ka panaksan nga balas. Pangutan-a ang mga estudyante kon pilion ba nila ang pagtukod og balay sa bato o sa balas. Dapita sila sa pagpasabut kon ngano.

Hangyoa ang usa ka estudyante sa pagbasa og kusog sa Mateo 7:24–27. Dapita ang klase sa pagsunod, nga mangita sa giingon ni Jesus kon unsa ang kalainan sa pagtukod og balay sa usa ka bato ug pagtukod og balay sa balas.

Sumala sa bersikulo 24, unsa nga mga buhat ang giingon sa Manluluwas ang maghimo sa usa ka tawo nga sama sa tawong but-an nga nagtukod diha sa usa ka bato?
Sumala sa bersikulo 26, unsa nga mga buhat ang giingon sa Manluluwas ang makahimo sa usa ka tawo nga sama sa tawong buang-boang nga nagtukod diha sa usa ka balas?
Sa inyong hunahuna unsay girepresentaran sa ulan, mga baha, ug hangin (tan-awa sa bersikulo 27; tan-awa usab sa Helaman 5:12) niini nga mga pagkumpara?
Unsa nga mga baruganan mahitungod sa pagbuhat sa mga buluhaton sa Ginoo ang atong makat-unan gikan niini nga mga pagkumpara? (Ang mga estudyante mahimong mogamit og lain-laing mga pulong apan kinahanglang mahibaloan nila ang mosunod nga mga baruganan: Kon atong paminawon ug lihukon ang mga gitudlo sa Manluluwas, niana Siya molig-on kanato nga makalahutay sa mga pagsulay. Kon atong paminawon ang mga pagtulun-an apan dili mosunod niini, niana wala kanato ang suporta nga atong gikinahanglan kon moabut ang mga pagsulay.)

Dapita ang mga estudyante nga magmahimong sama sa tawong but-an pinaagi sa paglihok subay sa mga baruganan nga gitudlo sa Manluluwas. Mahimong hatagan nimo ang mga estudyante og higayon sa pagsulat unsaon nila sa paggamit ang usa o labaw pa nga mga baruganan niini nga leksyon o gikan sa uban nilang gitun-an sa Wali Ibabaw sa Bungtod nga gihimo sa Manluluwas.

Sunod nga Unit (Mateo 13:24–17:27)

Sultihi ang mga estudyante nga sa sunod semana basahon nila ang dautang plano nga maoy hinungdan sa kamatayon ni Juan Bautista. Makat-unan usab nila ang mga tubag sa mosunod nga mga pangutana: Nganong gipaputlan og liog ni Herodes si Juan? Nganong miunlod man sa tubig si Pedro human milampos og nakalakaw niini? Hangyoa ang mga estudyante sa pagkonsiderar kon unsay bation nga mamatyan og usa ka suod nga higala o sakop sa pamilya. Dapita sila, samtang tun-an nila ang sunod nga unit, sa pagtan-aw kon giunsa sa pagsanong sa Manluluwas ang kamatayon sa usa ka minahal ug unsay nahitabo sa Bukid sa Transpigurasyon.