Leksyon 13

Mateo 8–10

Pasiuna

Sa pagbiyahe ni Jesus ngadto sa Galilea mihimo Siya og daghang milagro. Gitawag usab Niya ang Napulog Duha ka mga Apostoles, mihatag kanila og gahum ug mitudlo kanila, ug mipadala kanila aron sa pagpangalagad sa katawhan.

Mga Sugyot alang sa Pagtudlo

Mateo 8:1–9:34

Si Jesus mihimo ug daghang milagro

Sa pagsugod sa klase, hangyoa ang mga estudyante sa pagtubag sa mosunod nga pangutana:

• Kon nahibalo mo nga ang Manluluwas mobisita karon sa inyong siyudad o lungsod, kinsa ang inyong dalhon ngadto Niya aron mamaayo? Ngano man?

Kopyaha ang mosunod nga mga scripture reference sa pisara: Mateo 8:1–4; Mateo 8:5–13; Mateo 8:14–15; Mateo 8:23–27; Mateo 8:28–32; Mateo 9:1–8; Mateo 9:18–19, 23–26; Mateo 9:20–22; Mateo 9:27–31; ug Mateo 9:32–33. I-assign ang matag scripture reference ngadto sa matag usa ka estudyante. (Kon gamay ra ang imong klase, ang ubang estudyante mahimong mobasa og sobra sa usa ka tudling sa kasulatan.)

Dapita ang mga estudyante nga basahon ang gi-assign nila nga mga tudling sa kasulatan ug ipapangita ang mga milagro nga gihimo ni Jesus. Human sa igong panahon, hangyoa sila sa paghatag og mubo nga report kon unsay ilang nakat-unan. (Pahinumdom: Ang mga estudyante makatuon og maayo niining mga milagro diha sa Marcos 1–5.)

Sunod-sunod nga pagtuon sa mga Ebanghelyo

Silang Mateo, Marcos, Lucas, ug Juan mirekord sa mga hitabo ug mga detalye sa kinabuhi sa Manluluwas nga lahi sa ilang mga istorya. Hinoon, ang mga Ebanghelyo nilang Mateo, Marcos, ug Lucas daghan og natampo sa mao gihapon nga sugilanon. Ang mga pahinumdom para sa magtutudlo anaa sa managlahing lokasyon dinhi sa manwal aron matabangan ka nga mahibalo kon asa itudlo ang piho nga mga hitabo sa mas lapad nga detalye. Sama pananglit, ang mga milagro nga narekord sa Mateo 8 ug 9 mahisgutan sa mas lapad nga detalye diha sa mga leksyon sa Marcos 1–5.

Dapita ang usa ka estudyante sa pagbasa og kusog sa Mateo 8:16-17. Hangyoa ang klase sa pagsunod, nga mangita sa gituman ni Jesukristo nga panagna dihang gihimo Niya kini nga mga milagro. Dapita ang mga estudyante sa pagreport sa ilang nakit-an.

• Unsa nga kamatuoran bahin ni Jesukristo ang atong makat-unan gikan sa mga istorya mahitungod niining mga milagro? (Ang mga estudyante mahimong mogamit og lain-laing mga pulong, apan siguroha nga mahibalo sila sa mosunod nga kamatuoran: Si Jesus makaayo sa atong mga kahuyang ug mga sakit. Mahimo nimong ipasabut nga ang sakit usa ka balatian, kaluya, o kahuyang.)

• Sa unsang paagi ang Manluluwas moayo kanato o molig-on sa atong mga kahuyang kon Siya wala maglakaw uban kanato karon? (Pinaagi sa Iyang Pag-ula. Tan-awa sa Alma 7:11–13.)

Mateo 9:35–10:8

Si Jesus mitawag og napulog duha ka mga Apostoles

I-display ang litrato o mga litrato sa kasamtangang mga Apostoles sa Simbahan, lakip ang Unang Kapangulohan. (Kana nga mga imahe makita sa LDS.org [tan-awa sa Meet Today’s Prophets and Apostles] ug sa mga isyu sa kinatibuk-ang komperensya sa Ensign o Liahona.)

• Unsa ang nakalahi niining mga tawhana sa ubang mga tawo sa kalibutan karon?

Dapita ang mga estudyante sa pagpangita sa mga kamatuoran samtang magtuon sila sa Mateo 9–10 bahin sa buluhaton sa mga Apostoles ug sa mga panalangin nga ilang mahatag sa atong kinabuhi.

Dapita ang usa ka estudyante sa pagbasa og kusog sa Mateo 9:35. Hangyoa ang klase sa pagsunod ug mangita kon unsay gihimo ni Jesus agig dugang sa pagpang-ayo sa uban.

• Agig dugang sa pagpang-ayo sa uban, unsa pay gibuhat ni Jesus atol sa Iyang pangalagad?

Ipasabut nga dihang nagsangyaw si Jesus sa ebanghelyo ug mihimo og mga milagro sa tibuok Judea, ang gidaghanon sa mga tawo nga misunod ug nagtinguha Kaniya nagkadaghan.

Dapita ang usa ka estudyante sa pagbasa og kusog sa Mateo 9:36–38. Hangyoa ang klase sa pagsunod, nga mangita kon si kinsa ang giingon sa Manluluwas nga motabang Kaniya sa pagpangalagad niadtong tanan nga mosunod Kaniya.

• Sumala sa mga bersikulo 37–38, kinsa ang giingon ni Jesus nga Iyang gikinahanglan nga makatabang sa Iyang pag-atiman niadtong misunod Kaniya?

Dapita ang usa ka estudyante sa pagbasa og kusog sa Mateo 10:1–4. Hangyoa ang klase sa pagsunod, nga mangita kon unsay gihimo ni Jesus aron makab-ot ang mga panginahanglan sa mga tawo.

• Unsa ang gihimo ni Jesus sa pagtabang sa panon sa katawhan nga misunod Kaniya?

• Unsang doktrina ang atong makat-unan gikan niining mga bersikulo bahin sa usa ka paagi sa pagpangalagad ni Jesukristo sa mga tawo sa kalibutan? (Ang mga estudyante mahimong mogamit og lain-laing mga pulong, apan siguroha nga mahibaloan nila ang mosunod nga doktrina: Si Jesukristo mitawag og mga Apostoles ug mitugyan sa Iyang awtoridad ngadto kanila. Mahimo nimong isugyot nga isulat sa mga estudyante ang doktrina tapad sa Mateo 10:1–4.)

Dapita ang usa ka estudyante sa pagbasa og kusog sa Mateo 10:5–8. Hangyoa ang klase sa pagsunod, nga mangita sa unsay gipabuhat ni Jesukristo sa Iyang mga Apostoles.

• Unsa ang gipabuhat ni Jesus sa Iyang mga Apostoles?

Ipasabut nga ang pulong nga apostol naggikan sa pinulongang Gresyanhon nga nagpasabut nga “usa ka tawo nga gipadala.” Sa una ang mga Apostoles gipadala lamang ngadto sa balay sa Israel. Sa wala madugay, ang nabanhaw nga Manluluwas misugo nga ang ebanghelyo masangyaw usab ngadto sa mga Hentil, o niadtong dili sakop sa balay sa Isarel.

• Unsa nga mga pagkasusama ang inyong nabantayan tali sa mga gibuhat ni Jesus ug sa mga buhat nga gisugo Niyang buhaton sa Iyang mga Apostoles?

• Unsa nga kamatuoran ang atong makat-unan gikan niining mga bersikulo bahin sa unsay gipabuhat ni Jesus sa mga Apostoles. (Kinahanglang mahibaloan sa mga estudyante ang kamatuoran nga susama sa mosunod: Mitawag ang Ginoo og mga Apostoles aron sa pagsangyaw sa Iyang ebanghelyo ug paghimo sa Iyang mga buluhaton. Ikonsiderar ang pagsulat sa pisara niini nga kamatuoran.)

I-refer usab ngadto sa mga litrato sa kasamtangang mga Apostoles. Hangyoa ang mga estudyante sa paghatag og mga ehemplo kon sa unsang paagi ang kasamtangang mga Apostoles nagsangyaw ug nangalagad sama sa pag-alagad ni Jesukristo kon Siya nia pa dinhi.

Tabangi ang mga estuyante nga mobati sa kamatuoran ug kaimportante sa mga doktrina ug mga baruganan

Human mahibaloan ug masabtan sa mga estudyante ang mga baruganan ug doktrina sa ebanghelyo nga naa sa mga kasulatan, mahimong dili nila kini gamiton hangtud bation nila ang kamatuoran ug kaimportante pinaagi sa Espiritu ug mobati sa kadinalian sa paggamit niini nga baruganan diha sa ilang kinabuhi. Usa sa pinaka-epektibong paagi sa pagtabang sa mga estudyante sa paghimo niini mao ang pag-awhag nila nga mamalandong ug mopakigbahin og personal nga mga kasinatian nga may kalabutan niana nga mga kamatuoran.

Aron matabangan ang mga estudyante nga mobati sa kaimportante sa kamatuoran nga ilang nahibaloan sa ibabaw, basaha o ipakita ang porsyon sa bag-ong pakigpulong nga gihatag sa usa ka modernong Apostol nga haum sa mga batan-on. Human mabasa ang pamahayag o mapasalida ang video clip, ipangutana:

• Sa unsang paagi nga ang pagkasabut nga ang mga Apostoles gitawag ni Jesukristo aron sa paghimo sa Iyang buluhaton makaimpluwensya sa atong pagsanong sa unsay ilang itudlo ug itambag nga atong buhaton?

• Sa unsang mga paagi ang mga pangalagad ug mga mensahe sa modernong mga Apostoles nakaimpluwensya sa inyong kinabuhi?

Dapita ang mga estudyante sa matinud-anong pagpangita og mga oportunidad nga makapaminaw, makatuon, ug makagamit sa mga pulong sa pinili nga mga Apostoles sa Ginoo.

Mateo 10:9–42

Gitudloan ni Jesus ang Napulog duha ka mga Apostoles sa wala pa sila magsangyaw ug mangalagad

I-summarize ang Mateo 10:9–16 pinaagi sa pagpasabut nga ang Ginoo misugo sa mga Apostoles sa pagsalig sa Langitnong Amahan nga sila sangkapan sa panginahanglan samtang magbiyahe sila aron sa pagsangyaw sa ebanghelyo. Ang Manluluwas mitudlo usab kanila sa pagpanalangin sa mga tawo nga modawat ug mopapuyo kanila.

Hangyoa ang mga estudyante sa paghunahuna og usa ka panahon dihang may tawo nga dili sakop sa ilang tinuohan mihatag nila og lisud nga pangutana bahin sa ebanghelyo o nangutana nila og butang nga kontrobersyal mahitungod sa Simbahan.

• Unsa kamo kamasaligon nga kamo nahibalo unsay angay ninyong isulti niana nga sitwasyon? Ngano man?

Dapita ang mga estudyante sa pagpangita og baruganan diha sa mga gipangtudlo ni Jesus sa Iyang mga Apostoles sa katapusan sa Mateo 10 nga makatabang nato kon kinahanglan kitang mopasabut sa ebanghelyo o mopakigbahin sa atong pagpamatuod.

Dapita ang pipila ka estudyante nga magpuli-puli sa pagbasa og kusog sa Mateo 10:16–20. Hangyoa ang klase sa pagsunod, nga mangita sa matang sa mga hagit nga giingon ni Jesus nga sagubangon sa mga Apostoles samtang magbiyahe sila ug magsangyaw.

• Unsa nga mga hagit ang giingon ni Jesus nga sagubangon sa Iyang mga Apostoles samtang sila magsangyaw sa ebanghelyo?

• Sumala sa mga bersikulo 19–20, sa unsang paagi ang mga Apostoles mahibalo unsay isulti atol niining mahagitong mga sitwasyon? (Mahimong nimong ipasabut nga ang mga pulong nga “ayaw kamo pagkalibug” nagpasabut nga “dili kaayo mabalaka”.

• Unsa nga baruganan ang atong makat-unan gikan niining mga bersikulo bahin sa pagpakigsulti ngadto sa uban kon anaa kita sa pagserbisyo sa Ginoo? (Ang mga estudyante mahimong mogamit og lain-laing mga pulong, apan kinahanglan nilang mahibaloan ang mosunod nga baruganan: Kon kita anaa sa pag-alagad sa Ginoo, kita Iyang dasigon kon unsay atong isulti kon gikinahanglan.)

• Kanus-a kamo mibati nga ang Ginoo midasig kaninyo nga mahibalo unsay isulti ngadto sa laing tawo? (Mahimo nimong hatagan og panahon ang mga estudyante sa paghunahuna sa dili pa nimo sila patubagon niini nga pangutana.)

I-summarize ang Mateo 10:21–42 pinaagi sa pagpasabut nga si Jesukristo padayong mihatag og mga instruksyon, pahimangno, ug kahupayan sa Iyang mga Apostoles bahin sa mga hagit nga ilang sagubangon. Aron matabangan ang mga estudyante nga makatuon sa mga pulong sa Manluluwas diha sa Mateo 10:37–39, ipares-pares sila o bahina sa ginagmayng grupo ug hatagi ang matag pares o grupo og kopya sa kauban nga handout. Dapita ang mga estudyante sa pagsunod sa mga instruksyon diha sa handout pinaagi sa dungan nga pagtuon sa mga bersikulo ug paghisgot sa ilang mga tubag sa pangutana.

Mateo 10:37–39

Manwal sa Seminary Teacher sa Bag-ong Tugon—Leksyon 13

Sa matag pares o sa ginagmayng grupo, tun-i og dungan ang gi-assign nga mga bersikulo ug hisguti ang inyong mga tubag sa mga pangutana.

Basaha ang Mateo 10:37–38, nga mangita sa mga sakripisyo nga gisulti sa Manluluwas nga kinahanglang andam nato nga buhaton isip Iyang mga disipulo. Ang mga pulong nga “takus kanako” niini nga mga bersikulo nagpasabut nga mahimong takus nga representante sa Ginoo ug angayan sa Iyang mga panalangin.

• Ngano kaha nga gikinahanglan man sa mga disipulo ni Jesukristo nga higugmaon Siya labaw sa uban—lakip ang mga sakop sa kaugalingon nilang pamilya?

Ang krus nga gihisgutan sa bersikulo 38 nagpasabut sa krus nga gipas-an ni Jesukristo ug gilansangan sa pagtuman sa kabubut-on sa Amahan. Sa paghulagway, gitawag ni Jesukristo ang Iyang mga sumusunod nga “magpas-an sa [ilang] krus, ug magsunod [Kaniya]” (Mateo 16:24).

Basaha ang Hubad ni Joseph Smith, Mateo 16:26 (diha sa Ang Giya sa mga Kasulatan), ug tan-awa unsay ipasabut para nato nga magpas-an sa atong krus ug magsunod kang Jesukristo.

Basaha ang Mateo 10:39, nga mangita sa mga baruganan nga gitudlo ni Jesukristo bahin sa sakripisyo. Ang Hubad ni Joseph Smith nagklaro sa sinugdanan niini nga bersikulo nga mabasa, “Ang makakaplag sa iyang kinabuhi …”. Niini nga mga pulong, ang mga pulong nga “makakaplag sa iyang kinabuhi” nagpasabut nga magpakabuhi sa kahakog kay sa magtinguha nga makaserbisyo sa Dios ug sa Iyang mga anak.

• Sa inyong hunahuna sa unsang mga paagi ang mga tawo nga nagtutok sa kaugalingon nilang kabubut-on ug hinakog nga mga tinguha sa katapusan “kawagtangan” sa ilang kinabuhi?

Basi sa inyong nabasahan, kompletuha ang mosunod nga baruganan:

Kon tinguha nato ang pagkaplag sa atong kinabuhi, nan •

Hunahunaa ang pagmarka sa bersikulo 39 sa saad nga gihimo sa Manluluwas ngadto sa magawagtang sa ilang kinabuhi tungod Kaniya. Ang pagwagtang sa atong kinabuhi tungod Kaniya mas labaw pa kay sa andam nga mamatay tungod Kaniya. Nagpasabut kini sa kaandam nga motugyan sa atong kaugalingon matag adlaw sa pagserbisyo Kaniya ug sa mga tawo sa atong palibut.

• Unsa sa inyong hunahuna ang gipasabut nga makakaplag kita sa atong kinabuhi kon kawagtangan kita niini tungod Kaniya?

Basi sa inyong nabasahan, kompletuha ang mosunod nga baruganan:

Kon kawagtangan kita sa atong kinabuhi tungod ug alang kang Jesukristo, nan •

Basaha ang mosunod nga pamahayag ni Presidente Thomas S. Monson ug dayon hisguti ang inyong mga tubag sa mga pangutana nga nagsunod.

“Ako nagtuo nga ang Manluluwas nagsulti kanato nga gawas kon kalimtan nato ang atong kaugalingon diha sa pagserbisyo sa uban, adunay gamay ra nga katuyoan ang atong kaugalingong kinabuhi. Kadtong kinsa nagpakabuhi lamang alang sa ilang kaugalingon sa katapusan maminusan ang ilang pagkatawo ug sa mapasumbingayong paagi mawagtangan sa ilang kinabuhi, samtang kadtong nahikalimot sa ilang kinabuhi diha sa pagserbisyo sa uban motubo ug molambo—ug sa ingon moluwas sa ilang kinabuhi” (“Unsa may Akong Nabuhat alang sa Usa ka Tawo Karon?” Ensign o Liahona, Nob. 2009, 85).

• Kinsa man ang inyong nahibaloan nga mipili nga kawagtangan sa iyang kinabuhi tungod ug alang kang Jesukristo? Unsa ang epekto niini nga desisyon ngadto niining tawhana?

© 2015 pinaagi sa Intellectual Reserve, Inc. Tanang mga katungod gigahin.

Human makompleto sa mga estudyante ang handout, mahimo kang mohangyo og pipila nga mo-summarize para sa klase sa unsay ilang nakat-unan.

Mahimo nimong ipakigbahin ang imong pagpamatuod bahin sa mga baruganan nga nahibaloan sa mga estudyante mahitungod sa pagwagtang sa atong kinabuhi tungod kang Jesukristo. Dapita ang mga estudyante nga isulat diha sa ilang mga class notebook o mga scripture study journal ang pipila ka butang nga ilang mahimo karon o sa umaabut sa pagwagtang sa ilang kinabuhi tungod sa pagserbisyo alang ni Jesukristo ug sa uban. Dapita sila sa paghimo og usa ka tumong ug lihukon kana nga tumong.

Komentaryo ug Background nga Impormasyon

Mateo 10:35–37. “Ang mahigugma sa iyang amahan o inahan labaw pa kanako”

Si Presidente Ezra Taft Benson, nga mikomentaryo sa Mateo 10:35–37, nakabantay nga usa sa pinakalisud nga pagpili nga mahimo sa usa ka tawo mao ang pagpili tali sa Dios ug sa usa ka sakop sa pamilya:

“Usa sa pinakalisud nga pagsulay sa tanan mao ang higayon nga ikaw mopili tali sa pagpahimuot sa Dios o pagpahimuot sa tawo nga imong gimahal o gitahud—ilabi na sa sakop sa pamilya.

“Giatubang ni Nephi kana nga pagsulay ug maayo kini nga pagkaatiman sa dihang ang iyang buotang amahan mibagulbol og kadiyot batok sa Ginoo (tan-awa sa 1 Nephi 16:18–25). Padayong gipakita ni Job ang iyang integridad ngadto sa Ginoo bisan tuod og ang iyang asawa misugo kaniya sa pagtunglo sa Dios ug magpakamatay (tan-awa sa Job 2:9–10).

“Ang kasulatan nag-ingon, ‘Tahuron mo ang imong amahan ug ang imong inahan’ (Exodo 20:12; tan-awa usab sa Mosiah 13:20). Usahay ang tawo kinahanglang mopili sa pagtahud sa Langitnong Amahan tali sa mortal nga amahan” (“The Great Commandment—Love the Lord,” Ensign, Mayo 1988, 5).

Dugang nga Ideya sa Pagtudlo

Mateo 10:34–38. Gitudloan ni Jesus ang Iyang mga disipulo sa paglaum nga dunay oposisyon

Human og summarize sa Mateo 10:21–42, dapita ang usa ka estudyante sa pagbasa og kusog sa Mateo 10:34–35. Hangyoa ang klase sa pagsunod, nga mangita sa unsay gisulti ni Jesukristo nga mahitabo samtang isangyaw ang iyang ebanghelyo.

Ipasabut sa mga estudyante nga wala mag-ingon si Jesukristo nga ang tuyo sa Iyang pag-anhi mao ang pagbungkag sa pamilya ug pagdala og kasamok sa kalibutan, apan Iya hinoong gitudlo nga ang paagi sa pagsanong sa mga tawo ngadto Kaniya ug sa Iyang ebanghelyo maoy makabungkag ug makapabulag-bulag. Kadtong mopili nga mosunod kang Kristo makasinati og tensyon ug gani kayugot niadtong dili modawat Kaniya ug sa Iyang ebanghelyo, lakip sa mga sakop sa pamilya ug mga higala. Mga pahimangno kini ngadto sa Iyang mga disipulo sa dili paglaum nga ang ilang kinabuhi walay pagsulay o oposisyon.

• Sa unsang paagi ang ebanghelyo ni Jesukristo makahatag og kalinaw ngadto sa tawo nga modawat ug mosunod niini? Sa unsang mga paagi nga ang maong mga tawo makasinati og kasamok, oposisyon, o pagkabulag-bulag tungod sa iyang pagdawat sa ebanghelyo?

• Sa unsang mga paagi nga ang pag-anhi ni Jesukristo mobahin-bahin sa mga tawo nga nagpuyo sa kalibutan atol sa Iyang mortal nga kinabuhi?

Dapita ang usa ka estudyante sa pagbasa og kusog sa Mateo 10:36. Hangyoa ang klase sa pagsunod, nga mangita kon unsa ang giingon sa Ginoo nga maoy tinubdan sa pipila ka oposisyon nga masinati gumikan sa ilang pagdawat sa ebanghelyo.

• Asang dapita ang giingon sa Manluluwas nga ang uban sa Iyang mga disipulo makasinati og pagpanglutos gumikan sa pagsunod Kaniya? (Sa ilang panimalay, o mga pamilya.)

Dapita ang mga estudyante sa pag-isa sa ilang kamot kon nakasinati na sila, o may nailhang tawo nga nakasinati, sa oposisyon o pagpanglutos gikan sa usa ka sakop sa pamilya gumikan kay mituo sa gipahiuli nga ebanghelyo ni Jesukristo.

• Unsa nga mga hagit ang mahimo niini nga matang sa oposisyon ngadto sa usa ka sumusunod ni Jesukristo? (Kon walay isulti ang mga estudyante, ipasabut nga ang mga tawo sa ingon niini nga mga kahimtang usahay mobati nga kinahanglang mopili tali sa duha ka tawo nga ilang gimahal: ang Manluluwas ug ang sakop sa pamilya.)

• Unsa pay laing lisud nga mga pagpili ang sagubangon sa mga disipulo ni Jesukristo gumikan sa ilang pagdawat sa ebanghelyo?

Dapita ang usa ka estudyante sa pagbasa og kusog sa Mateo 10:37–38. Hangyoa ang klase sa pagsunod, nga mangita sa unsay gisulti sa Manluluwas niadtong kinahanglang mopili tali sa pagsunod Kaniya ug sa uban pang butang o tawo.

• Sa kaugalingon ninyong mga pulong, unsay gisulti sa Manluluwas ngadto sa mga nagtinguha nga mosunod Kaniya?

Ipadayon ang leksyon pinaagi sa pagpares-pares sa mga estudyante o pagbahin-bahin ngadto sa ginagmayng grupo ug paghatag nila og mga kopya sa handout nga giulohan og “Mateo 10:37–39.”