Leksyon 14: Mateo 11-12

Leksyon 14

Mateo 11–12

Pasiuna

Mipamatuod si Jesukristo nga si Juan Bautista gipadala aron sa pag-andam sa Iyang agianan, ug misaad Siya og kapahulayan sa tanan kinsa moduol Kaniya. Gitubag ni Jesus ang mga pasangil sa mga Pariseo nga ang Iyang gahum naggikan sa yawa. Iya silang gipahimangnoan batok sa paghimo og sayop nga mga akusasyon ug sa pagpangita og mga timailhan, ug Iyang gitudlo ang sambingay sa balay nga wala puy-i.

Mga Sugyot alang sa Pagtudlo

Mateo 11

Mipamatuod si Jesukristo nga si Juan Bautista gipadala aron sa pag-andam sa sa Iyang agianan

Ipakita sa mga estudyante ang litrato sa usa ka opisyal sa pulis, usa ka doktor, ug ni Jesukristo.

Nganong importante nga masayud nga kining mga tawhana mao gayud sigun sa unsay nakita diha kanila? Unsaon ninyo sa pagkahibalo nga mao kana sila sigun sa unsay nakita diha kanila?

Ipasabut nga atol sa mortal nga pangalagad sa Manluluwas, daghan ang nagtinguhang masayud kon Siya ba ang mipakita nga mao Siya. Hangyoa ang mga estudyante sa pagpangita sa mga kamatuoran samtang magtuon sila sa Mateo 11 nga makatabang nila sa pagpalambo sa kaugalingon nilang pagpamatuod kon si kinsa si Jesukristo.

Ipasabut nga gipadakop ug gipapriso ni Haring Herodes si Juan Bautista. Dapita ang usa ka estudyante sa pagbasa og kusog sa Mateo 11:2–3. Hangyoa ang klase sa pagsunod, nga mangita sa pangutana nga gipadala ni Juan sa iyang mga disipulo nga ipangutana ngadto ni Jesus.

Unsa ang gipadala ni Juan sa iyang mga disipulo nga ipangutana kang Jesus?

Ipasabut nga uban niini nga pangutana sa besikulo 3, ang mga disipulo ni Juan nangutana ni Jesus kon Siya ba ang Mesiyas. Pahinumdumi ang mga estudyante nga si Juan Bautista nasayud nga si Jesus mao ang Mesiyas (tan-awa sa Mateo 3:11, 13–14; Juan 1:29–34).

Ngano kaha nga si Juan Bautista mipadala man sa iyang mga disipulo sa pagsuta kon si Jesus mao ba ang Mesiyas nga si Juan nahibalo na mang daan kon si kinsa si Jesus? (Gusto siya nga ang iyang mga disipulo makadawat og kaugalingon nilang pagpamatuod bahin ni Jesukristo.)

Dapita ang usa ka estudyante sa pagbasa og kusog sa Mateo 11:4-5. Hangyoa ang klase sa pagsunod, nga mangita kon giunsa sa pagtubag ni Jesus ang ilang pangutana.

Kay sa motug-an lang dayon nga Siya ang Mesiyas, unsay gipabuhat ni Jesus sa mga disipulo ni Juan Bautista?

Mahimo nimong ipasabut nga mahimo ra kaayong sultihan diretso ni Jesus ang mga disipulo ni Juan nga Siya ang Mesiyas. Apan hinoon, giingnan Niya sila nga “[paminawa] ug [tan-awa]” (bersikulo 4), o ikonsiderar, sa Iyang mga gipangbuhat ug dayon mobalik ngadto ni Juan Bautista ug mopamatuod sa mga butang nga ilang nadungog ug nakita nga gibuhat ni Jesus.

Sa unsang paagi ang tubag ni Jesus nakatabang sa mga disipulo ni Juan nga makadawat og mas makusganong pagsaksi bahin sa Manluluwas kay sa pagsulti diretso kanila kon si kinsa Siya?
Unsa nga baruganan ang atong makat-unan gikan niini nga istorya kon unsaon nato nga malig-on ang atong pagsaksi sa Manluluwas? (Bisan og mogamit sila og lain-laing mga pulong, kinahanglang mahibaloan sa mga estudyante ang mosunod nga kamatuoran: Samtang maningkamot kita sa pagkat-on bahin ni Jesukristo ug samtang kita mopamatuod bahin Kaniya, ang kaugalingon natong pagpamatuod Kaniya malig-on.)

Dapita ang mga estudyante sa pagsulat kon sa unsang paagi nga nahibaloan nila mismo nga si Jesukristo ang Anak sa Dios. Mahimo nimong dapiton ang pipila ka estudyante sa pagpakigbahin sa klase kon unsay ilang gisulat.

I-summarize ang Mateo 11:7–27 pinaagi sa pagpasabut nga dihang mibiya na ang duha ka disipulo, gisultihan ni Jesus ang mga tawo nga si Juan Bautista mao ang propeta nga gipili sa pag-andam sa agianan sa Mesiyas. Gihimaraut ni Jesus ang mga misalikway ni Juan Bautista ingon man kadtong mga nakasaksi sa klarong ebidensya sa tinuod nga kabalaan sa Ginoo nga sa gihapon misalikway Kaniya. (Pahinumdom: Ang mga pagtulun-an ni Jesus bahin ni Juan Bautista dinhi niining mga bersikulo hisgutan nga mas detalyado sa leksyon diha sa Lucas 7:18–35).

Si Jesus dayon mihatag og usa ka saad ngadto sa tanang kinsa modawat Kaniya isip ang Mesiyas. Aron matabangan ang mga estudyante nga makaribyu sa Mateo 11:28–30, nga imong gitudlo sa leksyon 1, dapita ang usa ka estudyante sa pagbasa og kusog niini nga mga bersikulo ug hangyoa ang klase sa pagsunod ug sa pagpangita kon unsay ipabuhat sa Ginoo kanato.

Unsa ang ipabuhat sa Ginoo kanato? Unsa ang iyang gisaad agig balus niini? (Human mahatag sa mga estudyante ang ilang mga tubag, isulat sa pisara ang mosunod nga kamatuoran: Kon moduol kita ni Jesukristo, Iyang himoong sayon ang atong mga palas-anon ug hatagan kita og kapahulayan.)
Sa unsang paagi ang pagsabut sa mga kamatuoran dinhi sa scripture mastery passage makatabang ninyo niining tuiga?

Mateo 12:1–42

Gibadlong ni Jesus ang mga Pariseo sa sayop nilang mga pasangil ug pagpangita og timailhan

(Pahinumdom: Ang mga panghitabo sa Mateo12:1–21 itudlo sa mas lapad nga detalye diha sa leksyon sa Marcos 2–3.)

I-summarize ang Mateo 12:1–30 pinaagi sa pagpasabut nga human giayo ni Jesus ang usa ka tawo atol sa Adlawng Igpapahulay, ang ubang mga Pariseo nagtinguha sa paglaglag Kaniya. Dihang giayo Niya ang tawo nga nasudlan og dautang espiritu, gisulayan nila ang pagpakaulaw Kaniya sa atubangan sa mga tawo pinaagi sa pagpasangil nga gihimo Niya ang maong mga buhat pinaagi sa gahum sa yawa. Nasayud si Jesus sa ilang mga hunahuna ug miinsister nga, sa sukwahi, pinaagi sa pagpalayas sa dautang espiritu Iyang gipakita nga Siya ang Mesiyas ug ang nagtukod sa gingharian sa Dios. Hangyoa ang mga estudyante sa pagbasa og hilum sa Mateo 12:30, nga mangita sa unsay gitudlo ni Jesus bahin niadtong dili mouban Kaniya. Hangyoa ang mga estudyante nga moreport sa ilang nakit-an.

Sumala sa bersikulo 30, kon tinguha man nato nga malakip sa gingharian sa Dios, unsay angay natong buhaton? (Samtang motubag ang mga estudyante, siguroha ang paghatag og gibug-aton niini nga kamatuoran: Kon tinguha nato nga mahimong usa ka bahin sa gingharian sa Dios, kinahanglang bug-os ang atong komitment kang Jesukristo.)
Unsa ang pipila ka paagi nga kita makapakita sa atong bug-os nga pasalig kang Jesukristo?

I-summarize ang Mateo 12:31–42 pinaagi sa pagpasabut nga si Jesus mipamatuod pag-usab nga ang Iyang maayong mga buhat mao ang mga ebidensya nga Siya Iya sa Dios ug dili sa yawa. Gipahimangnoan usab Niya ang mga Pariseo nga ang Dios maghimo nilang may tulubagon sa ilang mga gipasangil. Ang pipila sa mga eskriba ug mga Pariseo dayon nangayo og timailhan, ug gibadlong sila ni Jesus tungod sa pagpangayo og timailhan ug sa wala pagkakita nga Siya mas labaw pa kay sa kanhing mga propeta o mga hari sa Israel.

Mateo 12:43–50

Gitudlo ni Jesus ang sambingay sa balay nga wala puy-i ug nga kadtong mohimo sa kabubut-on sa Iyang Amahan pagaiphon uban sa Iyang pamilya

Hangyoa ang mga estudyante sa pag-hunahuna nga usa sa ilang mga higala nangayo og tambag kon unsaon nga dili na mausab ang sala nga gipaningkamutan niya sa pagbiya.

Unsa nga tambag ang inyong ihatag sa inyong higala nga siya matabangan sa pagbatok sa tintasyon?

Ipasabut nga ang Mateo 12:43–45 naglangkob sa sambingay bahin sa mahugawng espiritu nga gipagula gikan sa usa ka tawo. Dapita ang mga estudyante sa pagpangita og baruganan dinhi sa sambingay nga makatabang sa ilang higala sa pagbuntog sa tintasyon. Dapita ang usa ka estudyante sa pagbasa og kusog sa Mateo 12:43–44, ug hangyoa ang klase sa pagpangita sa unsay gihimo sa mahugawng espiritu human kini gipagula gikan sa tawo.

Unsa ang gibuhat sa mahugawng espiritu human walay makaplagang kapahulayan?
Unsa nga mga pulong ang naghulagway sa kahimtang sa “balay,” o sa tawo, dihang mibalik ang mahugawng espiritu?

Dapita ang usa ka estudyante sa pagbasa og kusog sa Mateo 12:45, ug hangyoa ang klase sa pagpangita sa unsay gihimo sa mahugawng espiritu human makit-i ang “balay,” o ang tawo, nga wala puy-i. Hangyoa ang mga estudyante sa pagreport sa ilang nakit-an.

Human Iyang gipagula ang yawa, unsay wala mahimo sa tawo hinungdan nga nakabalik ang mahugawng espiritu? (Wala niya pulihi ang dautan og matarung nga mga hunahuna, pagbati, mga pulong, ug mga buhat.)
Sa unsang paagi ang kasinatian sa maong tawo sa sambingay nagrepresentar og tawo kinsa naghinulsol sa sala ug naningkamot sa pagbatok sa tintasyon?

Human makatubag ang mga estuyante, dapita ang usa ka estudyante sa pagbasa og kusog sa mosunod nga pamahayag ni Presidente Spencer W. Kimball:

“Kon mobiya sa sala ang usa ka tawo dili kay basta lang siya manghinaot og mas maayong mga kahimtang. Kinahanglan gayud nga mohimo siya niini. …

“… Ang mga butang nga iyang gipili ug gipangandoy ug mga sulod sa iyang hunahuna mawala, ug ang mas maayong mga ipuli dili pa mopuli. Kini mao ang oportunidad ni Satanas” (The Miracle of Forgiveness [1969], 171–72; emphasis gidugang).

Unsa nga baruganan ang atong makat-unan gikan niini nga sambingay nga makatabang natong masayud unsaon nga makapadayon sa pagbatok sa dautang mga impluwensya human og tangtang niini sa atong kinabuhi. (Ang mga estudyante mahimong mogamit og lain-laing mga pulong, apan kinahanglan nilang mahibaloan ang mosunod nga baruganan: Mabatukan nato ang dautang mga impluwensya human og tangtang niini sa atong kinabuhi pinaagi sa pagpuli niini og kamatarung.)

Aron matabangan ang mga estudyante nga makasabut niini nga kamatuoran, ipabasa og kusog sa usa ka estudyante ang mosunod nga pamahayag. Hangyoa ang klase sa pagpaminaw kon nganong dili igo nga ilayo lamang sa sala ang atong kinabuhi.

“Dili paigo nga simpleng sulayan lamang ang pagbatok sa dautan o wad-on ang sala sa imong kinabuhi. Kinahanglan gayud nga pun-on nimo ang imong kinabuhi uban sa pagkamatarung ug mosalmot sa mga kalihokan nga magdala og espirituhanon nga gahum. …

“Ang hingpit nga pagkamasulundon magdala og hingpit nga gahum sa ebanghelyo sa imong kinabuhi, lakip ang pagdugang og kalig-on sa pagbuntog sa imong mga kahuyang. Kini nga pagkamasulundon naglakip sa mga kalihokan nga sa una wala tingali nimo mahunahuna nga usa ka bahin sa paghinulsol, sama sa pagtambong sa mga miting, pagbayad sa ikapulo, paghatag og serbisyo, ug sa pagpasaylo sa uban” (Matinud-anon sa Tinuohan: Usa ka Pakisayran sa Ebanghelyo [2004], 133).

Kon maghinulsol ta, unsa ang pipila ka butang nga atong mahimo sa pagpuno sa atong kinabuhi uban sa pagkamatarung aron dili na kita mobalik sa pagpakasala? (Mahimo nimong dapiton ang usa ka estudyante nga isulat diha sa pisara ang mga tubag.)
Sa unsang paagi ang paghimo niining mga butanga magdala og esprituhanong gahum sa atong kinabuhi ug maghimo natong makabuntog sa dautang mga impluwensya?

Ipamatuod nga ang pagpuno sa atong kinabuhi uban sa pagkamatarung maghatag kanato og mas dakong gahum sa pagbatok sa dautan. Awhaga ang mga estudyante sa pagpamalandong kon sa unsang paagi nga mapuno nila uban sa dugang nga pagkamatarung ang ilang kinabuhi ug masunod ang inspirasyon nga ilang nadawat samtang sila namalandong.

I-summarize ang nahibilin sa Mateo 12 pinaagi sa pagpasabut nga samtang nagtudlo si Jesus, may miingon Kaniya nga dunay pipila ka sakop sa Iyang pamilya nga gustong makig-istorya Kaniya. Ang Ginoo mitudlo dayon nga ang tanang mohimo sa kabubut-on sa Amahan pagaiphon nga kauban sa Iyang pamilya.

Scripture Mastery—Mateo 11:28–30

Aron matabangan ang mga estudyante nga makamemorya sa Mateo 11:28–30, pahimoa og aksyon ang mga estudyante nga magrepresentar sa mga pulong nga naa sa matag bersikulo ug dayon mo-recite sa tudling [passage] samtang naghimo sa mga aksyon. Ipapraktis sa mga estudyante ang pag-recite niini sa pagsugod sa klase sulod sa pipila ka adlaw hangtud ila kining mamemorya.

Komentaryo ug Background nga Impormasyon

Mateo 11:11. “Ang labing gamay diha sa gingharian sa langit daku pa kay kaniya”

Si Propeta Joseph Smith mipasabut nga ang usa ka paagi nga makasabut sa Mateo 11:11 mao ang pagtan-aw niini isip usa ka reference kang Jesukristo Mismo:

“Kinsa ang gipasabut ni Jesus nga labing gamay? Giisip si Jesus nga adunay pinakagamay nga pangangkon sa katungod sa gingharian sa Dios, ug [sa ingon] pinakaubos nga ilhon isip usa ka propeta; sama nga daw siya misulti—‘Siya nga giisip nga pinakagamay diha kaninyo mas labaw pa kay ni Juan—kana mao Ako’” (Mga Pagtulun-an sa mga Presidente sa Simbahan: Joseph Smith [2007], 96).

Mateo 12:31–32. “Pagpasipala batok sa Espiritu Santo”

“Si Propeta Joseph Smith mipasabut sa unsang paagi ang usa ka tawo makahimo og sala nga pagpasipala batok sa Espiritu Santo:

“Kinahanglan nga nadawat niya ang Espiritu Santo, ang kalangitan maabli alang kaniya, ug makaila sa Dios, ug dayon makasala batok Kaniya. Human ang tawo makasala batok sa Espiritu Santo, walay paghinulsol alang kaniya. Siya kinahanglan nga moingon nga ang adlaw wala mosidlak samtang nakita niya kining misidlak, siya kinahanglan nga molimud ni Jesukristo bisan og ang kalangitan naablihan ngadto kaniya, ug ilimud ang plano sa kaluwasan nga ang iyang mga mata nagtan-aw sa kamatuoran niini; ug sukad niana nga panahon nagsugod siya nga mahimong kaaway” (sa History of the Church, 6:314).

Usahay ang mga estudyante mahingawa bahin sa sala nga pagpasipala batok sa Espiritu Santo o sa paglimud niini. Si Presidente Spencer W. Kimball mitudlo:

“Ang sala batok sa Espiritu Santo nagkinahanglan sa kahibalo nga tataw kaayo nga imposibling mahimo sa ordinaryong mga miyembro” (The Miracle of Forgiveness [1969], 123).

Si Elder James E. Talmage sa Korum sa Napulog Duha ka mga Apostoles mipasabut nganong gipahimangnoan ni Jesus ang mga Pariseo mahitungod sa dili mapasaylo nga sala diha sa Mateo 12:31–32:

“Si Jesus manggiloy-on sa Iyang pagpaniguro nga ang mga pulong nga gipamulong batok Kaniya isip usa ka Tawo, tingali mapasaylo; apan ang pagpamulong batok sa awtoridad nga Iyang gihuptan, ug ilabi na ang pagpaangkon nga gikan ni Satanas kana nga gahum ug awtoridad, duol na kaayo sa pagpasipala batok sa Espiritu Santo, diin kana nga sala walay kapasayloan” (Jesus the Christ, 3rd ed. [1916], 269).