Leksyon 17: Mateo 14

Leksyon 17

Mateo 14

Pasiuna

Human makahibalo mahitungod sa kamatayon ni Juan Bautista, nagtinguha si Jesus nga mag-inusara apan gisundan sa pundok sa katawhan. Naluoy Siya kanila, giayo ang ilang mga masakiton, ug milagrusong mipakaon sa sobra sa lima ka libo kanila. Nianang gabhiona, milakaw si Jesus sa lanaw paingon sa Iyang mga disipulo kinsa nanlimbasug didto sa Lanaw sa Galilea batok sa kusog nga unos.

Mga Sugyot alang sa Pagtudlo

Mateo 14:1–21

Nagtinguha si Jesus nga mag-inusara ug dayon mipakaon sa sobra sa lima ka libo ka mga tawo

Hangyoa ang mga estudyante sa paghunahuna og higayon nga nakasinati sila og grabe nga kasubo. Dapita sila sa pagpamalandong kon unsay ilang gibuhat aron makalahutay ug makabuntog sa ilang kasubo.

Unsa ang pipila ka lain-laing paagi nga ang mga tawo misulay sa paglahutay ug pagbuntog sa kasubo?

Dapita ang mga estudyante samtang nagtuon sila sa Mateo 14 sa pagpangita og mga paagi nga sila makalahutay ug makabuntog sa kasubo, mga pagsulay, ug mga pagduha-duha.

I-summarize ang Mateo 14:1–11 pinaagi sa pagpasabut nga pinaagi sa pag-awhag sa iyang bag-ong asawa (si Herodias), gipabilanggo ni Haring Herodes sa dili makiangayong paagi si Juan Bautista. Human misayaw sa iyang atubangan ang anak sa iyang asawa (si Salome), misaad si Herodes sa atubangan sa kadaghanan nga maangkon niya ang “bisan unsang butang nga pangayuon niya” (Mateo 14:7). Mikonsulta ang anak ngadto sa iyang inahan ug gipangayo ang ulo ni Juan Bautista, ug isip resulta, gipapunggotan ni Herodes si Juan.

Pahinumdumi ang mga estudyante nga si Juan Bautista usa ka higala ug kaliwat ni Jesukristo ug gipili sa Dios nga mahimong propeta nga moandam sa dalan alang sa Mesiyas.

Hunahunaa nga suod mo nga higala ni Juan Bautista. Unsa kaha ang inyong reaksyon sa pagkadungog mahitungod sa dili makiangayon niyang kamatayon?

Dapita ang usa ka estudyante sa pagbasa og kusog sa Mateo 14:12–13, ug hangyoa ang klase sa pagpangita kon unsay gibuhat ni Jesus sa dihang nakadungog Siya mahitungod sa kamatayon ni Juan.

Unsay gibuhat ni Jesus sa dihang nakadungog Siya mahitungod sa kamatayon ni Juan? (Mahimo nimong ipasabut nga ang “usa ka dapit nga awaaw” nagpasabut sa usa ka mingaw nga dapit.)
Unsa ang nahitabo sa dihang gisulayan ni Jesus nga mag-inusara?
Unsa ang inyong bation kon kamo nasubo ug gustong mag-inusara, apan ang uban nagtinguha sa inyong pagtagad?

Dapita ang usa ka estudyante sa pagbasa og kusog sa Mateo 14:14. Hangyoa ang klase sa pagsunod, nga mangita kon unsay reaksyon ni Jesus sa dihang Iyang nakita ang pundok sa katawhan nga misunod Kaniya.

Unsa nga ehemplo ang gipakita sa Manluluwas nga angayan natong sundon kon makasinati kita og kaguol? (Ang mga estudyante mahimong mogamit og lain-laing mga pulong, apan siguroa nga mahibalo sila sa mosunod nga kamatuoran: Pinaagi sa pagpakita og kalooy alang sa uban bisan kon nakasinati kita og kaguol, nagsunod kita sa ehemplo ni Jesukristo.)
Nganong lisud man ang pagpakita og kalooy alang sa uban kon nag-antus kita?
Sa unsang paagi nga ang pagpakita og kalooy alang sa uban makatabang kanato kon kita mismo nag-antus?
Kanus-a man nga kamo o ubang tawo nga inyong nailhan nakasinati og grabe nga kaguol ug nagpakita gihapon og kalooy alang sa uban? Sa unsang mga paagi nga ang pagserbisyo sa laing tawo nakatabang?

Papuli-puliha sa pagbasa og kusog ang pipila ka mga estudyante gikan sa Mateo 14:15–21. Hangyoa ang klase sa pagsunod, nga mangita kon sa unsang paagi nga gipadayon ni Jesus ang pagpakita og kalooy sa pundok sa katawhan. (Pahinumdom: Ang milagro nga narekord diha sa Mateo 14:15–21 itudlo og maayo diha sa leksyon nga maghisgot sa Marcos 6:35–44.)

Giunsa ni Jesus sa pagpadayon sa pagpakita og kalooy sa mga tawo nga misunod Kaniya?

Mateo 14:22–36

Si Jesus naglakaw sa lanaw atol sa usa ka unos

Aron matabangan ang mga estudyante sa paghunahuna sa mga kahimtang nga mahimong makasinati sila og pagduha-duha ug kahadlok samtang magsunod sila ni Jesukristo, ipabasa og kusog sa duha ka estudyante ang mosunod nga sitwasyon:

Usa ka batan-ong babaye mibati nga walay mahimo samtang nagtan-aw sa iyang inahan nga nag-antus og grabe nga sakit. Misugod siya sa pagkwestyon kon nagpakabana ba ang Langitnong Amahan sa kasakit sa iyang pamilya. Gusto kaayo siyang motuo sa Dios, apan ang iyang mga pagduha-duha misugod sa paglukop kaniya.
Usa ka batan-ong lalaki bag-ohay lang nga mipasakop sa Simbahan. Daghan sa iyang karaang mga higala ang dayag nga misupak sa iyang desisyon nga mopasakop sa Simbahan. Nagsugod siya sa paghunahuna kon magpadayon pa ba siya nga mahimong aktibo ug matinud-anong miyembro sa Simbahan.

Unsa ang uban pang mga paagi nga masinati sa mga tawo ang pagduha-duha o kahadlok samtang nagtinguha sila nga mosunod ni Jesukristo?

Hangyoa ang mga estudyante sa pagpangita sa mga kamatuoran samtang magtuon sila sa nahabiling bahin sa Mateo 14 nga makatabang kanila nga mabuntog ang mga kahadlok, mga pagduha-duha, ug kasagmuyo.

I-summarize ang Mateo 14:22 pinaagi sa pagpasabut nga ang Manluluwas misugo sa Iyang mga disipulo sa pagbiyahe ngadto sa pikas bahin sa Lanaw sa Galilea samtang gipapauli Niya ang pundok sa katawhan. Dapita ang usa ka estudyante sa pagbasa og kusog sa Mateo 14:23. Hangyoa ang klase sa pagsunod, nga mangita kon asa miadto si Jesus dihang Iya nang gipapauli ang pundok sa katawhan. Dapita sila sa pagreport kon unsay ilang nakit-an.

Dapita ang usa ka estudyante sa pagbasa og kusog sa Mateo 14:24–25, ug hangyoa ang klase sa pagpangita kon unsay nahitabo samtang ang mga disipulo mitabok sa Lanaw sa Galilea.

Unsay nahitabo sa mga disipulo samtang mitabok sila sa Lanaw sa Galilea?
Unsay buot ipasabut sa “sungsungon man ang hangin”? (bersikulo 24). (Naghaguros kini sa bali nga direksyon sa ilang padulngan.)

Sumala sa bersikulo 23, gabii kadto sa dihang nag-inusara si Jesus sa bukid ug ang mga disipulo mitabok sa Lanaw sa Galilea. Ang gilay-on sa pagtabok sa lanaw mga lima ka milya (mga walo ka kilometro) ug matabok ra gayud unta sulod sa duha ngadto sa tulo ka oras kon maayo ang panahon.

Sumala sa bersikulo 25, kanus-a man miadto ang Manluluwas sa mga disipulo nga diha sa tubig? (Ang ikaupat nga hugna sa bantay mao ang gikan sa alas 3:00 sa kaadlawon ngadto sa alas 6:00 sa buntag)
Mga unsa kaha kadugay nga nakigbisug sa hangin ang mga disipulo sa pagtabok sa lanaw? (Siguro mga 9 ngadto sa 12 ka oras.)

Ipabasa og hilum sa mga estudyante ang Mateo 6:47–48, nga mangita sa dugang nga mga detalye nga gihatag ni Marcos kalabut niini nga hitabo. Hangyoa ang mga estudyante sa pagreport kon unsay ilang nakit-an.

Maluwas kaha ni Jesus og sayo ang mga disipulo gikan sa ilang panlimbasug? Unsa kaha ang katuyoan nga gitugutan man ang mga disipulo nga manlimbasug sulod sa igong panahon sa wala pa sila giluwas?
Unsa nga kamatuoran ang atong makat-unan kalabut sa atong kaugalingong panlimbasug gikan niini nga istorya mahitungod sa mga disipulo nga misulay sa pagtabok sa lanaw? (Ang mga estudyante mahimong mogamit og lain-laing mga pulong apan kinahanglang mahibalo sa mosunod nga kamatuoran: Bisan tuod nga ang Dios dili kanunayng moluwas kanato gikan sa pagpanlimbasug, nasayud Siya kon unsay atong nasinati ug mobuhat, diha sa Iyang kaugalingong panahon, sa pagtabang kanato.)
Unsa nga kaayohan ang moabut gikan sa atong panlimbasug sulod sa usa ka panahon imbis nga luwason dayon sa Ginoo gikan sa atong mga pagsulay?
Sa unsang paagi nga ang pagkasayud nga ang Ginoo nagpakabana sa atong panlimbasug makapalig-on sa atong pagtuo diha Kaniya bisan kon dili dayon Siya moluwas kanato gikan niini?

Hangyoa ang mga estudyante sa pag-visualize nga diha sila sa sakayan para pangisda sa tunga-tunga sa kagabhion, nanlimbasug batok sa kusog nga hangin ug balud sulod sa daghang oras, ug dayon nakakita og tawo nga naglakaw ibabaw sa tubig.

Unsa kaha ang inyong mahunahuna o bation kon kamo mismo anaa niini nga sitwasyon?

Dapita ang usa ka estudyante sa pagbasa og kusog sa Mateo 14:26–27, ug hangyoa ang klase sa pagpangita kon unsay reaksyon sa mga disipulo sa dihang ilang nakita si Jesus.

Unsay reaksyon sa mga disipulo sa dihang ilang nakita si Jesus?
Unsa may reaksyon ni Jesus sa ilang kahadlok?

Ipabasa og kusog sa laing estudyante ang Mateo 14:28, ug hangyoa ang klase sa pagpangita kon unsay gitinguha nga buhaton ni Pedro sa dihang nakadungog siya sa tingog sa Ginoo.

Unsa may gitinguha nga buhaton ni Pedro sa dihang nakadungog siya sa tingog sa Ginoo?

Iisa ang hulagway ni Jesus sa atubangan sa klase, ug ipahunahuna sa klase nga sila mao si Pedro diha sa sakayan. Papuli-puliha sa pagbasa og kusog ang duha ka mga estudyante gikan sa Mateo 14:29–30. Human mabasa ang matag bersikulo, pangutan-a ang mga estudyante kon unsay ilang mahunahuna o bation kon sila mao si Pedro.

Nganong misugod man si Pedro sa pagtidlum?
Unsa may marepresentar sa hangin ug mga balud niini nga istorya sa atong kinabuhi nga moresulta sa atong pagsinati og kahadlok o pagduha-duha?
Unsay atong makat-unan gikan sa kasinatian ni Pedro mahitungod sa pagbuntog sa atong mga kahadlok o pagduha-duha? (Ang mga estudyante mahimong mogamit og lain-laing mga pulong, apan siguroa nga klaro kini nga kon atong ipunting ang atong panan-aw ngadto kang Jesukristo ug ipabilin ang atong pagtuo diha Kaniya, dili kita mabuntog sa atong mga kahadlok ug mga pagduha-duha.)

Dapita ang usa ka estudyante sa pagbasa og kusog sa mosunod nga pamahayag ni Presidente Howard W. Hunter, ug hangyoa ang klase sa pagpaminaw sa kapeligro sa pagkapakyas sa pagpabilin sa atong pagtuo diha sa Ginoo:

“Kini ang akong lig-ong pagtuo nga isip mga indibidwal nga katawhan, isip mga pamilya, mga komunidad, ug mga nasud, kita mahimong sama ni Pedro, mopunting sa atong panan-aw ngadto kang Jesus, kita usab makalakaw nga madaugon tabok sa ‘dagkong mga balud sa kawalay pagtuo’ ug magpabiling ‘dili mahadlok bisan sa nagkakusog nga hangin sa pagduha-duha.’ Apan kon ilayo nato ang atong panan-aw gikan kaniya kinsa kinahanglan kitang motuo, kay kini sayon man nga buhaton ug ang kalibutan labihan ang pagkatintal sa pagbuhat niini, kon kita motan-aw sa gahum ug kapintas nianang makalilisang ug makalaglag nga mga elemento sa atong palibut imbis nga motan-aw kaniya kinsa makatabang kanato ug makaluwas kanato, niana dili nato mapugngan nga maunlod sa dagat sa kagubot ug kasubo ug kapakyas” (“The Beacon in the Harbor of Peace,” Ensign, Nob. 1992, 19).

Sa unsang paagi nga kita mahimong “mopunting sa atong panan-aw” ngadto kang Jesukristo, sama sa gibuhat ni Pedro sa sinugdanan?
Kanus-a man kamo nakakita nga ang pagtuo sa usa ka tawo nakapalikay niya nga mabuntog sa kahadlok o pagduha-duha?

Ipamatuod nga samtang kita “mopunting sa atong panan-aw” ngadto kang Jesukristo ug mopabilin sa atong pagtuo diha Kaniya, makakaplag kita og paglaum ug kaisug sa pag-atubang sa atong mga hagit. Dapita ang mga estudyante sa paghunahuna og mga kausaban nga ilang mahimo sa ilang kinabuhi aron mas itumong ug makapabilin sa ilang pagtuo diha ni Jesukristo ug magtakda og tumong sa paghimo niadtong mga kausaban.

Ipasabut nga sama ni Pedro, tingali mapakyas kita usahay sa pagpabilin sa atong pagtuo diha ni Jesukristo ug tingali magpaundayon sa kahadlok, pagduha-duha, ug kasagmuyo.

I-display ang hulagway ni Jesukristo nga naglakaw ibabaw sa tubig (tan-awa sa Libro sa mga Hulagway sa Ebanghelyo [2009], nu. 43; tan-awa usab sa LDS.org). Dapita ang usa ka estudyante sa pagbasa og kusog sa Mateo 14:30–32.

Sumala sa bersikulo 30, unsay gibuhat ni Pedro sa dihang nakaamgo siya nga nag-anam na siya og tidlum?
Unsa man ang atong makat-unan gikan niini nga istorya kalabut kon unsay buhaton sa Ginoo kon magtinguha kita sa Iyang panabang kon ang atong pagtuo mohuyang? (Ang mga estudyante mahimong mogamit og lain-laing mga pulong, apan kinahanglan silang mahibalo sa mosunod nga baruganan: Kon tinguhaon nato ang panabang sa Dios kon ang atong pagtuo mohuyang, makadasig Siya kanato gikan sa atong mga kahadlok ug mga pagduha-duha.)
Sa unsa nga mga paagi ang Dios makadasig kanato gikan sa atong mga kahadlok ug mga pagduha-duha?

Dapita ang usa ka estudyante sa pagbasa og kusog sa Mateo 14:33, ug hangyoa ang klase sa pagpangita kon unsay reaksyon sa mga disipulo nga diha sa sakayan human nga nakasakay na sila si Jesus ug Pedro sa sakayan.

I-summarize ang Mateo 14:33–36 pinaagi sa pagpasabut nga human niini nga hitabo, si Jesus ug ang Iyang mga disipulo nagpadayon sa ilang biyahe ug nakaabut sa layo nga kabaybayunan sa Galilea. Sa dihang nakahibalo ang mga tawo nga anaa na didto si Jesus, gidala nila ngadto Kaniya ang mga tawo nga nag-antus sa balatian. Daghan ang nangaayo sa yano lamang nga paghikap sa borlas sa Iyang kupo.

Tapusa pinaagi sa pag-awhag sa mga estudyante sa paggamit sa unsay ilang nakat-unan niini nga leksyon pinaagi sa paglihok sa bisan unsa nga mga pag-aghat nga ilang nadawat.

Komentaryo ug Background nga Impormasyon

Mateo 14:25. “Sa ikaupat nga hugna sa bantay sa kagabhion, kanila miadto si Jesus”

Kon magpaabut kita nga ang Ginoo mohatag kanato og dinaliang mga solusyon sa atong mga problema, napakyas kita sa pagkakita sa mas dako nga katuyoan sa paglangay sa Iyang tabang. Si Elder D. Todd Christofferson sa Korum sa Napulog Duha ka mga Apostoles namulong mahitungod sa usa ka personal nga pagsulay nga iyang gisagubang diin walay dinaliang solusyon gikan sa Ginoo:

“Bisan kon niadto nag-antus ko, sa akong paglantaw og balik karon, mapasalamaton ko nga walay dinaliang sulbad sa akong problema. Ang kamatuoran nga napugos ko sa pagbalik ngadto sa Dios alang sa tabang hapit sa tanang adlaw sulod sa daghang katuigan nagtudlo kanako unsaon sa pag-ampo ug matubag sa mga pag-ampo ug natudloan ako sa makatarunganon kaayong paagi nga makabaton og hugot nga pagtuo sa Dios. Akong nailhan ang akong Manluluwas ug ang akong Langitnong Amahan ug sa paagi nga dili mahimo sa ubang paagi o tingali sa paagi nga mas dugay unta nakong makab-ot. … Nakat-on ko sa pagsalig sa Ginoo sa tibuok nakong kasingkasing. Nakat-on ko nga kauban Siya sa tanang adlaw” (“Give Us This Day Our Daily Bread” [fireside sa Church Educational System, Ene. 9, 2011], LDS.org).

Si Elder Bruce R. McConkie sa Korum sa Napulog Duha ka mga Apostoles misulti sa mosunod kalabut sa pagkasayud sa Manluluwas mahitungod sa pagpaningkamot sa Iyang mga disipulo nga makatabok sa Lanaw sa Galilea taliwala sa unos:

“Gikan sa ibabaw sa bukid diin siya nag-ampo … , nakita ni Jesus ang kalisang ug panlimbasug sa iyang minahal nga mga higala samtang nagtinguha sila sa luwas nga kasadpang kabaybayunan sa lanaw sa Galilea. … Ang Iyang pagkasayud sa ilang nahiaguman miabut pinaagi sa Espiritu imbis nga sa natural nga mata, kay sobra kini sa upat—tingali lima o unom—ka milya ang gilay-on. …

“… Sulod sa mga walo o napulo ka oras mibiyahe sila og minos pa sa upat ka milya gikan sa baybayon.

Ang ilang kalisang hilabihan. Bisan ang kusgan nga mga tawo dili makasukol sa padayong paghampak sa mga balud ug sa naghaguros nga pwersa sa unos diha sa lanaw. Ikaupat na nga hugna sa pagbantay sa kagabhion, mga tunga-tunga sa alas tres ug alas sayis sa buntag. Gipasagdan sila ni Jesus nga manlimbasug ug maningkamot hangtud nahurot na ang ilang kusog. Karon miabut Siya aron motabang” (The Mortal Messiah, 4 vols. [1979–81], 2:358–59).