Leksyon 19
Mateo 16
Pasiuna
Gibadlong ni Jesukristo ang mga Pariseo ug mga Saduceo kinsa nangita og timailhan sa Iyang kabalaan. Si Pedro mipamatuod nga si Jesus mao ang Kristo ug gisaaran sa mga yawe sa gingharian. Gitudloan ni Jesus ang Iyang mga disipulo sa pagpas-an sa ilang krus ug mosunod Kaniya.
Mga Sugyot alang sa Pagtudlo
Mateo 16:1–12
Ang mga Pariseo ug mga Saduceo nangita og timailhan gikan sa Manluluwas
Sa dili pa magklase, isulat sa pisara ang mosunod nga mga pulong:
Pinaagi sa panagway sa usa ka anghel
Pinaagi sa Espiritu Santo
Pinaagi sa pagtuo sa mga pulong sa usa ka higala o sakop sa pamilya
Pinaagi sa pagsaksi og usa ka milagro
Sa pagsugod sa leksyon, hangyoa ang mga estudyante sa pagpili og mga pulong diha sa pisara nga naghulagway sa gusto nilang paagi nga madawat ang pagpamatuod sa ebanghelyo. Dapita ang pipila ka estudyante sa pagreport kon asa nga mga pulong ang ilang gipili ug ipasabut kon nganong kini ang ilang gipili.
Dapita ang mga estudyante samtang sila nagtuon sa Mateo 16 nga mangita sa mga kamatuoran kon sa unsang paagi ang Ginoo motabang nato sa pagdawat ug paglig-on sa atong mga pagpamatuod sa ebanghelyo.
Dapita ang usa ka estudyante sa pagbasa og kusog sa Mateo 16:1. Hangyoa ang mga estudyante sa pagsunod, nga mangita sa unsay gusto sa mga Pariseo ug mga Saduceo gikan ni Jesus.
-
Unsa ang gusto sa mga Pariseo ug mga Saduceo gikan ni Jesus?
-
Unsa sa inyong hunahuna ang ipasabut nga ang mga Pariseo ug mga Saduceo “nagtintal” ni Jesus dihang nangayo sila og timailhan? (Ang usa ka kahulugan sa verb nga tintal mao ang pagsulay o pag-testing.)
Dapita ang pipila ka estudyante nga magpuli-puli sa pagbasa og kusog sa Mateo 16:2-4. Hangyoa ang klase sa pagsunod, nga mangita sa tubag sa Manluluwas ngadto sa mga Pariseo ug mga Saduceo.
-
Unsa nga timailhan ang giingon sa Ginoo nga Iyang ihatag?
Ipasabut nga ang gipasabut ni Jesus mao ang propeta sa Daang Tugon nga si Jonas, nga gilamoy sa “dakung isda” (Jonas 1:17). Ang “pagkalubong” ni Jonas ug dayon ang paggula gikan sa tiyan sa isda human sa tulo ka adlaw nagsimbolo sa pagkamatay, paglubong, ug Pagkabanhaw ni Jesukristo sa ikatulong adlaw gikan sa lubnganan.
-
Unsa ang gibuhat sa Manluluwas human Iyang gibadlong ang mga Pariseo ug mga Saduceo?
-
Unsa ang atong makat-unan gikan niini nga kasinatian bahin sa dili hustong paagi sa pagpangita og espirituhanong kamatuoran? (Ang mga estudyante mahimong mogamit og lain-laing mga pulong, apan siguroha nga mahibalo sila sa mosunod nga kamatuoran: Dili kita makadawat og espirituhanong kamatuoran pinaagi sa pagpangita og mga timailhan.)
I-summarize ang Mateo 16:5–12 pinaagi sa pagpasabut nga gipahimangnoan sa Manluluwas ang Iyang mga disipulo bahin sa sayop nga mga pagtulun-an sa mga Pariseo ug mga Saduceo. (Pahinumdom: Kini nga hitabo itudlo sa mas lapad nga detalye diha sa leksyon sa Marcos 8.)
Mateo 16:13–20
Si Pedro mipamatuod bahin ni Jesukristo ug gisaaran sa mga yawe sa gingharian
Ipasabut nga human gibadlong ni Jesus ang mga Pariseo ug mga Saduceo sa pagpangita og timailhan, gitudloan Niya ang Iyang mga disipulo sa unsang paagi madawat ang usa ka pagpamatuod sa kamatuoran. Dapita ang usa ka estudyante sa pagbasa og kusog sa Mateo 16:13–14. Hangyoa ang klase sa pagsunod, nga mangita sa pangutana ni Jesus ug sa tubag sa Iyang mga disipulo.
-
Unsa ang gipangutana sa Manluluwas sa Iyang mga disipulo? Giunsa nila sa pagtubag? (Mahimong gikinahanglan nimong ipasabut nga si Elias ug Jeremias mao ang mga propeta sa Daang Tugon nga Si Elias ug si Jeremias.)
-
Sa unsang paagi ang ilang tubag magpahibalo kanato kon unsa ka dako ang nahibaloan sa mga tawo kon si kinsa si Jesus niining puntoha sa Iyang pangalagad?
Dapita ang usa ka estudyante sa pagbasa og kusog sa Mateo 16:15–17. Hangyoa ang klase sa pagsunod, nga mangita sa ikaduhang pangutana sa Manluluwas.
-
Unsa ang ikaduhang pangutana sa Manluluwas? Giunsa sa pagtubag ni Pedro?
-
Sumala sa bersikulo 17, giunsa sa pagkahibalo ni Pedro nga si Jesukristo mao ang Anak sa Dios? (Ipasabut nga ang Langitnong Amahan mipadayag niining kamatuoran ngadto kaniya pinaagi sa Espiritu Santo.)
-
Unsa nga kamatuoran ang atong makat-unan gikan niini nga mga bersikulo kon unsaon nga kita makaangkon og pagpamatuod ni Jesukristo? (Ang tubag sa mga estudyate kinahanglang magtumong sa kamatuoran nga makabaton kita og pagpamatuod bahin ni Jesukristo pinaagi sa pagpadayag gikan sa Espiritu Santo.)
-
Ngano kaha nga importante man para nato nga makadawat og pagpamatuod pinaagi sa pagpadayag gikan sa Espiritu Santo kaysa ubang paagi?
Aron matabangan ang mga estudyante nga makasabut sa tahas sa Espiritu Santo sa pagtabang nato nga makaangkon og pagpamatuod sa Manluluwas, dapita ang usa ka estudyante sa pagbasa og kusog sa mosunod nga pamahayag ni Presidente Joseph Fielding Smith:
“Ang Espiritu sa Dios nga mamulong sa espiritu sa tawo dunay gahum sa paghatag sa kamatuoran og dakong epekto ug panabut kay sa kamatuoran nga personal nga ihatag bisan sa langitnong mga binuhat. Pinaagi sa Espiritu Santo ang kamatuoran modulot sa kinahiladman ug sa kaugatan aron kini dili gayud hikalimtan”(Mga Pagtulun-an sa mga Presidente sa Simbahan: Joseph Fielding Smith [2013], 208).
-
Unsa pang ubang butang ang mahimo natong buhaton aron maandam ang atong kaugalingon sa pagdawat sa pagpadayag pinaagi sa Espiritu Santo?
-
Giunsa ninyo sa pagkahibalo nga si Jesukristo mao ang Anak sa Dios ug inyong Manluluwas? Unsa ang inyong gihimo aron maandam sa pagdawat niana nga saksi gikan sa Espiritu Santo?
Dapita ang mga estudyante sa pagpamalandong sa ilang mga pagpamatuod bahin sa Manluluwas. Awhaga sila nga irekord diha sa ilang mga class notebook o mga scripture study journal kon unsaon nila sa paglig-on ang ilang mga pagpamatuod o unsay angay nilang buhaton aron makadawat og pagpamatuod pinaagi sa Espiritu Santo.
Dapita ang duha ka estudyante sa pagduol sa atubangan sa classroom ug moapil sa role play. I-assign ang usa ka estudyante nga magrepresentar sa iyang kaugalingon ug ang laing estudyante nga magrepresentar og usa ka higala nga dili miyembro sa Simbahan. Ang estudyante nga nagrepresentar sa dili miyembro nga higala hatagi og papel nga may sulat nga duha ka pangutana sa ubos. Dapita ang estudyante sa pagbasa og kusog sa mga pangutana sa tinagsa, ug tubagon sa laing estudyante. (Mahimo nimong awhagon ang klase sa pagsugyot og posibling mga tubag nga ikatubag sa estudyante.)
-
Nakadungog ko nga ang inyong simbahan nangangkon nga mao lang ang tinuod nga simbahan ni Jesukristo. Mao ba na ang inyong gituohan?
-
Ang akong simbahan mituo usab ni Jesukristo, ngano kaha nga sa imong hunahuna ang inyong simbahan ra ang bugtong tinuod?
Pasalamati ang mga estudyante sa pag-apil, ug pabalika sila sa ilang lingkuranan.
Dapita ang mga estudyante samtang padayon silang nagtuon sa Mateo 16 sa pagpangita sa mga kamatuoran nga makatabang nato sa pagsabut ug pagpasabut ngadto sa uban unsa ang nakalahi sa Simbahan ni Jesukristo sa mga Santos sa Ulahing mga Adlaw isip Simbahan sa Ginoo dinhi sa kalibutan.
Cesarea Filipo
Pahinumdumi ang mga estudyante nga dihang gipangutana ni Jesus ang Iyang mga disipulo mahitungod kon si kinsa Siya, didto sila sa rehiyon nga gitawag og Cesarea Filipo (tan-awa sa Mateo 16:13). Kon mahimo, pag-display og hulagway sa Cesarea Filipo (tan-awa sa Mga Hulagway sa Biblia, nu. 26, “Cesarea Filipo”). Hangyoa ang mga estudyante sa pag-ila unsa ang naa sa luyo sa suba ug kakahoyan dinhi sa litrato. Ipasabut nga ang porma sa dagkong bato sa Cesaria Filipo naghatag og makahuluganong talan-awon samtang ang Manluluwas padayon sa Iyang diskusyon uban sa Iyang mga disipulo.
Dapita ang usa ka estudyante sa pagbasa og kusog sa Mateo 16:18–20. Hangyoa ang klase sa pagsunod, nga mangita kon giunsa paggamit sa Manluluwas ang konsepto bahin sa usa ka bato sa paghulagway sa pundasyon sa Iyang Simbahan.
-
Sa inyong hunahuna unsa kaha ang buot ipasabut sa Manluluwas sa Iyang pag-ingon nga tukuron Niya ang Iyang Simbahan “ibabaw niining bato”? (bersikulo 18).
Aron matabangan ang mga estudyante nga makasabut niini nga mga pulong, dapita ang usa ka estudyante sa pagbasa og kusog sa mosunod nga pamahayag ni Propeta Joseph Smith:
“Si Jesus diha sa Iyang mga pagtulun-an miingon, ‘Ibabaw niining bato pagatukuron ko ang akong Simbahan. …’ [Mateo 16:18.] Unsa nga bato? Pinadayag” (Mga Pagtulun-an sa mga Presidente sa Simbahan: Joseph Smith [2007], 195).
“Ang Simbahan ni Jesukristo sa mga Santos sa Ulahing mga Adlaw natukod pinaagi sa laktud nga pagpadayag, isip tinuod nga Simbahan sa Dios sukad pa kaniadto, sumala sa mga kasulatan (Amos 3:7, ug sa Mga Buhat 1:2)” (Mga Pagtulun-an: Joseph Smith, 233).
-
Unsaon ninyo sa pag-summarize ang pagtudlo sa Manluluwas bahin sa Iyang Simbahan nga narekord diha sa bersikulo 18? (Kinahanglang mahibalo ang mga estuyante sa butang nga susama sa mosunod nga baruganan: Ang Simbahan ni Jesukristo natukod pinaagi sa pagpadayag gikan sa Dios. Isulat kini nga kamatuoran diha sa pisara.)
-
Sa unsang paagi ang pagkahibalo nga Ang Simbahan ni Jesukristo sa mga Santos sa Ulahing mga Adlaw natukod pinaagi sa pagpadayag gikan sa Dios makalig-on sa inyong pagpamatuod sa ebanghelyo?
-
Sumala sa bersikulo 19, unsay gisaad sa Manluluwas nga ihatag ngadto kang Pedro?
-
Unsa nga doktrina ang atong makat-unan gikan sa saad nga ihatag sa Manluluwas ngadto ni Pedro? Siguroha nga mahibaloan sa mga estudyante ang mosunod nga mga kamatuoran: Gihatag ni Jesukristo ang mga yawe sa gingharian ngadto sa Iyang pinili nga mga propeta ug mga apostoles.)
-
Unsa ang mga yawe sa gingharian? (Ang gahum sa pagdumala, katungod, ug awtoridad nga gikinahanglan sa pagdumala sa gingharian sa Dios dinhi sa kalibutan, o Simbahan ni Jesukristo.)
Aron matabangan ang mga estudyante nga makasabut unsa ang mga yawe sa priesthood, dapita ang usa ka estudyante sa pagbasa og kusog sa mosunod nga pamahayag ni Elder Dallin H. Oaks sa Korum sa Napulog Duha ka mga Apostoles:
“Ang mga yawe sa priesthood mao ang awtoridad nga gihatag sa Dios ngadto sa mga [naghupot sa] priesthood aron pagmando, pagkontrolar, ug pagdumala sa paggamit sa Iyang priesthood dinhi sa yuta’ [Handbook 2: Administering the Church, (2010), 2.1.1]. Ang matag buhat o ordinansa nga gipahigayon sa Simbahan gihimo ubos sa direkta o dili direkta nga pagtugot sa tawo nga naghupot sa mga yawe niana nga kalihokan” (“Ang mga Yawe ug Awtoridad sa Priesthood,” Ensign o Liahona, Mayo 2014, 49).
-
Unsa ang gisulti ni Jesus nga si Pedro makahimo sa pagbuhat tungod sa mga yawe nga ihatag kaniya?
Ipasabut nga kauban sa mga yawe nga gisaad sa Manluluwas kang Pedro mao ang mga yawe sa gahum sa pag-seal. Kini nga gahum nagtugot nga mapahigayon ang mga ordinansa ubos sa awtoridad sa mga lider sa Simbahan nga mahimong balido sa langit. Gamiton usab kini sa pagbugkos sa mga pamilya alang sa kahangturan. Sa atong panahon, ang gahum sa pag-seal gihuptan sa Unang Kapangulohan ug sa Korum sa Napulog Duha ka mga Apostoles.
-
Unsaon ninyo sa pag-summarize nganong gihatag sa Ginoo ang mga yawe sa priesthood ngadto sa Iyang mga propeta ug mga Apostoles (Kinahanglang mahibaloan sa mga estudyante ang kamatuoran susama sa mosunod: Ang mga yawe sa priesthood gikinahanglan alang sa pagdumala sa Simbahan sa Ginoo dinhi sa kalibutan.)
Paghangyo og estudyante nga mobasa og kusog sa mga pangutana gikan sa role play. Dapita ang klase sa pagpasabut kon unsaon nila sa pagtubag niining mga pangutana gamit ang mga kamatuoran nga ilang nahibaloan diha sa Mateo 16:18–19. Mahimo usab nimong dapiton ang mga estudyante nga mopakigbahin sa ilang mga pagpamatuod niining mga kamatuoran.
Ikonsiderar ang pag-display og litrato sa kasamtangang Unang Kapangulohan ug sa Korum sa Napulog Duha ka mga Apostoles (tan-awa sa LDS.org [pananglit sa, Meet Today’s Prophets and Apostles] ug sa mga isyu sa kinatibuk-ang komperensya sa Ensign o Liahona) ug sa pagpamatuod nga ang sama nga mga yawe nga gihatag ngadto kang Pedro ug ngadto sa ubang mga Apostoles sa karaan gihuptan ug gigamit karon sa buhing mga propeta ug mga Apostoles sa Ginoo.
Mateo 16:21–28
Gitudlo ni Jesus unsay ipasabut sa pagsunod Kaniya
I-summarize ang Mateo 16:21–28 pinaagi sa pagpasabut nga si Jesus namulong bahin sa Iyang maulaon nga sakripisyo. Gitudloan usab Niya ang Iyang mga disipulo nga kinahanglang andam nilang ilimud ang pagka-kinaiyanhon nga tawo (tan-awa sa Mosiah 3:19), magmasulundon, ug mosakripisyo aron sadya nga makasunod Kaniya.
Scripture Mastery—Mateo 16:15–19
Dapita ang mga estudyante sa pagpakigbahin diha sa kon unsay ilang nakat-unan gikan sa Mateo 16. Ikonsiderar ang pagpili og porsyon sa Mateo 16:15–19 nga memoryahon sa tibuok klase sulod sa mosunod nga mga adlaw. Makita nimo ang mga ideya sa pagmemorya diha sa apendiks niini nga manwal.
Komentaryo ug Background nga Impormasyon
Mateo 16:1–4. Ang mga Pariseo ug mga Saduceo nangita og timailhan
Ang Mateo 16:1–4 naghisgot sa panag-atubang ni Jesus ug sa pipila ka mga tigpangita og timailhan nga mga Pariseo ug mga Saduceo, kinsa miadto aron sa “pagsulay” sa Manluluwas nga mopakita kanila og timailhan (bersikulo 1). (Ang usa ka kahulugan sa verb nga tintal mao ang pagsulay o pag-testing.) Agig tubag sa ilang hangyo, si Jesus mibadlong sa ilang kamapahitas-on ug sa ilang katakus sa pag-ila sa mga timailhan sa kausaban sa panahon apan pakyas sa pag-ila sa mga timailhan sa Dios (tan-awa sa mga bersikulo 2–3). Mitudlo usab ang Manluluwas nga ang “kaliwatan nga dautan ug mananapaw mangita gayud ug ilhanan” (bersikulo 4). Kon ang mga indibidwal padayon sa grabing mga sala, usa sa sangputnan mao nga dili na nila mamatngunan ang hilum ug malumo nga mga hagawhaw sa Espiritu ug mangayo na sila og kalig-unan pinaagi sa pisikal, mahikap, o dili ordinaryong mga timailhan.
Mateo 16:4. “Ang timailhan sa propeta nga si Jonas”
Si Elder Bruce R. McConkie sa Korum sa Napulog Duha ka mga Apostoles mipasabut sa timailhan ni propeta Jonas:
“Ang paglubong ni Jonas ug ang pagguwa gikan sa ‘dako kaayong isda’ (Jonas 1:15–17; 2) nagsimbolo sa pagkamatay, paglubong, ug pagkabanhaw ni Kristo” (Mormon Doctrine, 2nd ed. [1966], 711–12).
Mateo 16:18. “Ibabaw niining bato pagatukuron ko ang akong simbahan”
“Dihang gitudloan sa Manluluwas si Pedro mahitungod sa pagpadayag, maalamon Niyang gigamit ang ngalan ni Simon [Pedro], ‘Ikaw mao si Pedro [Petros], ug sa ibabaw niining bato [petra] pagatukuron ko ang akong simbahan’ (Mateo 16:18). Ang pulong sa Gresyanhon nga petros nagpasabut sa nabulag nga bato. Ang pulong sa Gresyanhon nga petra masabut usab nga ‘usa ka bato,’ apan agig dugang nagpasabut usab kini sa batoon nga yuta, dagkong bato ilawom sa yuta, o dagkong bugon sa mga bato. Gikan niini nga mga pulong atong nakat-unan nga dili ngadto kang Pedro isip usa ka tawo diin ang Simbahan itukod, apan ibabaw sa naa sa ilawom nga bato sa pagpadayag” (New Testament Student Manual [manwal sa Church Educational System, 2014], 53).
Mateo 16:18–19. “Ang mga yawe sa gingharian”
Si Elder Russell M. Nelson sa Korum sa Napulog Duha ka mga Apostoles mipasabut giunsa nga padayon sa pagpangulo ang Ginoo sa Iyang Simbahan ug gingharian sa yuta pinaagi sa mga propeta ug sagradong mga yawe sa priesthood:
“Ang buhi nga Ginoo nangulo sa Iyang buhi nga Simbahan [tan-awa sa D&P 1:30, 38]! Ang Ginoo mopadayag sa Iyang kabubut-on alang sa Simbahan ngadto sa Iyang propeta. Kagahapon, human kita gidapit sa pagpaluyo ni Thomas S. Monson isip Presidente sa Simbahan, duna usab kitay pribilehiyo sa pagpaluyo niya, sa mga magtatambag sa Unang Kapangulohan, ug sa mga sakop sa Korum sa Napulog Duha ka mga Apostoles isip mga propeta, manalagna, ug tigpadayag. Hunahunaa kana! Atong gipaluyohan ang 15 ka tawo isip mga propeta sa Dios! Naghupot sila sa tanang yawe sa priesthood nga sukad natugyan sa tawo niining dispensasyon. …
Si “[Presidente Gordon B. Hinckley mipasabut,] ‘Ang Unang Kapangulohan ug ang Konseho sa Napulog Duha ka mga Apostoles, gitawag ug gi-orden nga maghupot sa mga yawe sa priesthood, dunay awtoridad ug responsibilidad sa pagdumala sa Simbahan, sa pagpahigayon sa mga ordinansa niini, sa pagpasabut sa doktrina niini, ug sa pag-establisar ug pagmintinar sa mga naandan niining gimbuhaton.’ [“God Is at the Helm,” Ensign, May 1994, 54]” (“Pagpaluyo sa mga Propeta,” Ensign or Liahona, Nob. 2014, 75–76).
Mateo 16:21–23. Si Jesukristo mibadlong ni Pedro
“Sa pagtutok lamang sa umaabot nga kamatayon sa Manluluwas, pakyas si Pedro sa pagsabut sa tinuod nga misyon ni Jesukristo—sa pagtubos sa tanang katawhan. Dihang gibadlong si Pedro sa Manluluwas ug giingnan siya nga ‘Satanas’ [Mateo 16:23; Mark 8:33], wala Siya magpasabut nga si Pedro mao si Lucifer. Ang pulong sa Hebrew nga satanas nagpasabut nga ‘kaaway o maninintal.’ Sa ingon, nakabantay si Kristo nga nianang higayona nabutang ni Pedro ang iyang kaugalingon sa papel nga pagkakaaway, nga oposisyon sa pinakaunang misyon sa Manluluwas sa pagluwas.
“Maayo tingali ang ipasabut ni Pedro dihang misupak siya sa gitudlo nga si Jesukristo mag-antus ug patyon (tan-awa sa Mateo 16:22; Marcos 8:32). Hinoon, kon gitumanan ni Jesus ang mga gipanghinaut ni Pedro pinaagi sa paglikay nga mag-antus sa Pag-ula, wala untay katubsanan gikan sa mga sala ug walay Pagkabanhaw nga mobuntog sa kamatayon. Ang tanang katawhan dili unta makalikay nga mamatay sa dayon (tan-awa sa Alma 34:9), ug ang buhat sa Dios sa pagpahinabo ‘sa pagka-imortal ug kinabuhing dayon sa tawo’ (Moises 1:39) dili unta matuman. Tanan kini mopalampus unta sa makalaglag nga mga tumong ni Satanas. Nianang higayuna sa diha-diha niyang pagsupak, si Pedro wala masayud nga mipabor diay siya sa kaaway” (New Testament Student Manual [manwal sa Church Educational System, 2014], 122).