Leksyon 22
Mateo 19–20
Pasiuna
Nagtudlo si Jesukristo mahitungod sa kasagrado sa kaminyoon. Gipasabut Niya og maayo ang kaimportante sa pagpili sa kinabuhing dayon kay sa kalibutanong katigayunan ug gitudlo ang sambingay sa mga mamumuo diha sa ubasan [vineyard]. Gipanagna usab ni Jesus ang Iyang kamatayon ug gitudloan ang Iyang mga disipulo nga moserbisyo sa uban.
Mga Sugyot alang sa Pagtudlo
Mateo 19:1–12
Nagtudlo ang Manluluwas mahitungod sa kasagrado sa kaminyoon
I-display ang usa ka litrato sa usa ka malipayong minyo nga managtiayon nga na-sealed sa templo. Ipasabut nga ang doktrina sa Ginoo kalabut sa kaminyoon ug pakigbulag [divorce] lahi kay sa daghang gituohan sa kalibutan.
-
Unsa ang ubang gituohan sa kalibutan kalabut sa kaminyoon ug pakigbulag? (Pasidaan: Likayi ang paggahin og taas kaayong panahon sa paghisgot sa may kalabutan nga hilisgutan sama sa kaminyoon sa sama og sekso [same-sex marriage], nga makahurot sa panahon palayo sa ubang importante nga mga baruganan sa leksyon karon.)
Dapita ang mga estudyante samtang nagtuon sila sa Mateo 19:1–12 sa pagpangita sa mga pagtulun-an sa Ginoo kalabut sa kaminyoon ug pakigbulag ug ipahunahuna ang kaimportante niining mga pagtulun-an ngadto kanila.
Hangyoa ang usa ka estudyante sa pagbasa og kusog sa Mateo 19:1–3. Dapita ang klase sa pagsunod, nga mangita sa pangutana nga gipangutana sa mga Pariseo kang Jesus. Dapita ang mga estudyante sa pagreport kon unsay ilang nakit-an.
Ipasabut nga ang mga pulong nga “ang pagpakigbulag niya sa iyang asawa sa bisan unsang hinungdan” (Mateo 19:3) nagpasabut sa usa ka tawo nga nakigbulag sa iyang asawa sa bisan unsang rason, bisan kon kini ginagmay o hinakog.
Dapita ang usa ka estudyante sa pagbasa og kusog sa Mateo 19:4–6, ug hangyoa ang klase sa pagpangita kon unsay gitudlo sa Manluluwas kalabut sa kaminyoon ug pakigbulag.
-
Unsa nga mga kamatuoran kalabut sa kaminyoon ang atong makat-unan gikan sa tubag sa Manluluwas ngadto sa mga Pariseo? (Ang mga estudyante mahimong mahibalo og pipila ka mga kamatuoran, apan siguroa sa pagpasabut og maayo nga ang kaminyoon tali sa lalaki ug babaye usa ka sagradong relasyon nga gitakda ug giestablisar sa Dios.)
Dapita ang usa ka estudyante sa pagbasa og kusog sa Mateo 19:7, ug hangyoa ang klase sa pagpangita sa laing pangutana nga gipangutana sa mga Pariseo ngadto sa Manluluwas.
-
Unsa man ang gipangutana sa mga Pariseo sa Manluluwas?
Dapita ang usa ka estudyante sa pagbasa og kusog sa Mateo 19:8–9, ug hangyoa ang klase sa pagpangita sa tubag sa Manluluwas.
-
Sumala sa Manluluwas, nganong gitugutan man ni Moises nga makigbulag ang mga Israelite? (Tungod sa katig-a sa kasingkasing sa mga tawo.)
Aron matabangan ang mga estudyante nga makasabut kon unsay kalabutan niini nga pagtulun-an sa atong panahon, dapita ang usa ka estudyante sa pagbasa og kusog sa mosunod nga pamahayag ni Elder Dallin H. Oaks sa Korum sa Napulog Duha ka mga Apostoles:
“Ang matang sa kaminyoon nga gikinahanglan sa kahimayaan—mahangturon ang gidugayon ug diosnon ang kahimili—dili makahunahuna og deborsyo. Sa mga templo sa Ginoo, pagakaslon ang magtiayon nga molungtad sa kahangturan. Apan may pipila ka kaminyoon wala mouswag paingon niana nga sumbanan. Tungod sa ‘pagkatig-a sa [atong] mga kasingkasing’ [Mateo 19:8], ang Ginoo sa pagkakaron wala mopatuman og sangputanan sa celestial nga sumbanan. Siya mitugot sa deborsyado nga tawo sa pagminyo pag-usab nga walay mansa sa pagkamakasasala nga gihisgutan sa kinatas-ang balaod” (“Deborsyo,” Ensign o Liahona, Mayo 2007, 70).
Hunahunaa ang pagdapit sa mga estudyante nga mopakigbahin sa ilang mga pagpamatuod nga gitakda ug giestablisar sa Dios ang kaminyoon isip usa ka sagradong relasyon tali sa lalaki ug babaye.
Mateo 19:13–30; 20:1–16
Gitudlo ni Jesus ang mahitungod sa kinabuhing dayon ug gihatag ang sambingay sa mga mamumuo diha sa ubasan [parrasan].
Dapita ang usa ka estudyante nga moduol sa atubangan sa klase. Sultihi ang estudyante nga kon makahimo siya og 10 ka push-up, makadawat siya og gamayng ganti (sama sa 10 ka gagmayng kendi). Human makahimo og 10 ka push-up ang estudyante, hatagi siya sa ganti, ug dayon hangyo og laing volunteer. Hangyoa ang ikaduhang estudyante sa paghimo og usa ka push-up, ug dayon pangutan-a ang klase kon sa ilang hunahuna unsa nga ganti ang kinahanglang madawat niini nga estudyante ug ngano man. Palingkura og balik ang duha ka estudyante. Pahibaloa ang klase nga sa kaulahian sa leksyon ang ikaduhang estudyante makadawat og ganti basi sa unsay nakat-unan sa klase diha sa mga kasulatan.
I-summarize ang Mateo 19:13–27 pinaagi sa pagpasabut nga giawhag ni Jesus ang Iyang mga sumusunod sa pagtinguha og kinabuhing dayon imbis nga kalibutanong katigayunan. Nangutana si Pedro kon unsay madawat sa mga disipulo tungod kay ilang gibiyaan ang ilang kalibutanong katigayunan aron mosunod sa Manluluwas. (Pahinumdom: Ang mga panghitabo niini nga mga bersikulo itudlo og maayo diha sa leksyon sa Marcos 10.)
Dapita ang usa ka estudyante sa pagbasa og kusog sa Mateo 19:28–30. Hangyoa ang klase sa pagsunod, nga mangita sa tubag sa Manluluwas ngadto ni Pedro.
-
Sumala sa bersikulo 29, unsa may mapanunod sa matag usa nga mibiya sa tanan aron mosunod sa Manluluwas?
Ipasabut nga gitudlo dayon sa Manluluwas ngadto sa Iyang mga disipulo ang sambingay aron matabangan sila nga makasabut sa tinguha sa Langitnong Amahan nga hatagan ang tanan Niyang mga anak sa oportunidad nga makadawat og kinabuhing dayon. Niini nga sambingay, usa ka tawo ang misuhol og mga mamumuo sa lain-laing oras sa tibuok adlaw aron magtrabaho diha sa iyang ubasan. Ang normal nga adlaw sa tingtrabaho sa panahon sa Bag-ong Tugon magsugod sa mga alas 6:00 sa buntag ngadto sa alas 6:00 sa gabii, nga dunay gamayng kalainan sa gidugayon sa lain-laing panahon sa tuig.
Kopyaha ang mosunod nga tsart diha sa pisara o ihatag kini sa mga estudyante isip handout.
|
Mga mamumuo (Oras sa Pagsugod) |
Sweldo nga Gikasabutan |
Mga Oras nga Gitrabahoan |
Gibayran nga Kantidad |
|---|---|---|---|
|
Sayo sa buntag (alas 6:00 sa buntag) | |||
|
ika-3 nga oras (alas 9:00 sa buntag) | |||
|
ika-6 nga oras (alas 12:00 sa udto) | |||
|
ika-9 nga oras (alas 3:00 sa hapon) | |||
|
ika-11 nga oras (alas 5:00 sa hapon) |
Dapita ang mga estudyante nga magtrabaho sa ginagmay nga grupo. Ipabasa nila ang Mateo 20:1–7 diha sa ilang grupo, nga mangita kon unsa kadugay magtrabaho ang matag grupo sa mga mamumuo ug ang sweldo nga ilang gikasabutan. (“Ang usa ka sintabo [penny]” nagpasabut sa usa ka denario, nga sinsilyo sa Roma nga tugbang sa sweldo sa usa ka mamumuo alang sa usa ka adlaw.)
Human sa igong panahon, dapita ang pipila ka mga estudyante nga moduol sa pisara ug pasulati ang unang duha ka kolum sa tsart (o ipasulat nila diha sa mga kopya nga imong gihatag).
-
Kinsa sa inyong hunahuna ang kinahanglang bayaran og dako?
Dapita ang usa ka estudyante sa pagbasa og kusog sa Mateo 20:8–10, ug hangyoa ang klase sa pagpangita sa bayad nga nadawat sa matag grupo sa mga mamumuo.
-
Unsa nga bayad ang nadawat sa matag grupo sa mga mamumuo? (Human makatubag ang mga estudyante, isulat ang 1 ka sintabo sa kada box diha sa kolum nga gisulatan og “Gibayran nga Kantidad.”)
-
Kon apil kamo sa mga mamumuo nga nagtrabaho og tibuok adlaw, unsa nga mga hunahuna o mga pagbati ang inyo untang nabatunan samtang nakadawat mo og samang ganti niadtong nagtrabaho og usa lamang ka oras?
Dapita ang usa ka estudyante sa pagbasa og kusog sa Mateo 20:11–14. Hangyoa ang klase sa pagsunod, nga mangita sa unsay gisulti niadtong nagtrabaho og tibuok adlaw ngadto sa tag-iya sa ubasan ug unsay iyang gitubag ngadto kanila.
-
Unsa man ang gireklamo niadtong nagtrabaho og tibuok adlaw?
-
Unsa may gisulti sa tag-iya sa ubasan agig tubag?
-
Sa unsang paagi nga ang tag-iya sa ubasan nahimong makiangayon (o patas) niadtong nagtrabaho og tibuok adlaw?
Aron matabangan ang mga estudyante nga mahibalo og usa ka kamatuoran gikan niini nga sambingay, ipasabut nga ang usa ka sintabo mahimong magrepresentar sa walay katapusan o kinabuhing dayon, sigun sa gihisgutan diha sa Mateo 19:29. Isulat sa pisara ang mosunod nga dili kompleto nga pamahayag: Ihatag sa Dios ang kinabuhing dayon ngadto sa tanang tawo kinsa …
-
Kon ang ganti diha niini nga sambingay nagrepresentar sa kinabuhing dayon, unsa may girepresentar sa trabaho? (Ang mga estudyante mahimong mogamit og lain-laing mga pulong, apan siguroa sa pagpasabut og maayo nga ang trabaho diha niini nga sambingay mahimong magrepresentar sa paghimo ug pagtuman sa sagradong mga pakigsaad ngadto sa Dios. Human makatubag ang mga estudyante, kompletuha ang kamatuoran diha sa pisara sigun sa mosunod: Ihatag sa Dios ang kinabuhing dayon ngadto sa tanang tawo kinsa mopili sa paghimo ug pagtuman sa sagradong mga pakigsaad ngadto Kaniya.)
Ipasabut nga kini nga kamatuoran makatabang kanato aron masabtan ang kalooy sa Langitnong Amahan alang sa mga indibidwal kinsa wala makahimo o makatuman sa mga pakigsaad sayo sa kinabuhi ug alang niadtong walay oportunidad sa pagbuhat sa ingon hangtud human sa ilang kamatayon (tan-awa sa D&P 137:7–8).
-
Sa inyong hunahuna nganong importante man nga atong masayran nga iIhatag sa Dios ang kinabuhing dayon ngadto sa tanang tawo kinsa mopili sa paghimo ug pagtuman sa sagradong mga pakigsaad ngadto Kaniya, nga dili magsapayan kon kanus-a kana mahitabo?
Pahinumdumi ang mga estudyante mahitungod sa ikaduhang estudyante nga mihimo og usa lamang ka push-up, ug ipangutana:
-
Sa inyong hunahuna unsa nga ganti ang kinahanglang madawat niini nga estudyante sa paghimo og usa ka push-up? (Hatagi ang estudyante sa samang ganti nga imong gihatag ngadto sa estudyante nga mihimo og 10 ka push-up.)
Hangyoa ang usa ka estudyante sa pagbasa og kusog sa Mateo 20:15–16. Hangyoa ang klase sa pagsunod, nga mangita kon giunsa pagtubag sa tag-iya sa ubasan niadtong mireklamo kalabut sa iyang pagkamahinatagon ngadto sa ubang mga mamumuo.
-
Sa inyong hunahuna unsa kaha ang buot ipasabut sa tag-iya sa ubasan sa dihang nangutana siya, “Imo ba diay ako nga bagutbotan tungod sa akong pagkamahinatagon?” (bersikulo 15).
Ipasabut nga si Elder Jeffrey R. Holland sa Korum sa Napulog Duha ka mga Apostoles miusab sa mga pulong aron masabtan og maayo kini nga pangutana sama sa mosunod: “Nganong masina kamo tungod sa akong pagkamabination?” (“Mga Mamumuo sa Ubasan,” Ensign o Liahona, Mayo 2012, 31).
-
Unsay buot ipasabut diha sa bersikulo 16 nga “daghan [ang] gitawag, apan pipila lamang ang napili”? (Ang matawag nagpasabut nga dapiton nga moapil sa buhat sa Langitnong Amahan. Ang mapili nagpasabut nga makadawat sa Iyang mga panalangin—lakip na ang panalangin sa kinabuhing dayon.)
-
Unsa nga baruganan ang atong makat-unan gikan sa bersikulo 16? (Ang mga estudyante mahimong mahibalo og daghang baruganan, lakip sa mosunod: Kon pilion natong masina sa mga panalangin sa Langitnong Amahan ngadto sa uban, nan mahimong mawad-an kita sa mga panalangin nga gusto Niyang ihatag kanato.)
Basaha og kusog ang mosunod nga pamahayag ni Elder Jeffrey R. Holland, ug dapita ang mga estudyante sa pagpamalandong kon sa unsang paagi sila matintal nga masina sa mga panalangin nga gihatag sa Langitnong Amahan ngadto sa uban:
“Mga kaigsoonan, adunay mga higayon sa atong kinabuhi diin ang usa ka tawo makadawat og wala damha nga panalangin o nakadawat og espesyal nga pag-ila. Mohangyo ko kaninyo ayaw og kahiubos—ug ayaw gayud og kasina—kon maayong mga butang ang mahitabo sa uban? Dili kita makuhaan kon ang uban mapanalanginan. Wala kita sa kontest kon si kinsa ang pinakadatu o ang pinakadaghan og talento o pinakamaanyag o gani ang pinakadaghan og panalangin. Ang kontest nga anaa gayud kita mao ang kontest batok sa sala. …
“… Ang pagkasina, pagyam-id, o pagdaut sa uban dili makapalambo [sa inyong kahimtang], ni ang pagpa-ubos sa ubang tawo makapanindot sa inyong imahe. Busa pagmabination, ug pagmapasalamaton nga ang Dios mabination. Kini makapalipay” (“Mga Mamumuo sa Ubasan,” 31, 32).
Ipakigbahin ang imong pagpamatuod mahitungod sa mga kamatuoran nga nahibaloan sa mga estudyante samtang nagtuon sila sa sambingay sa mga mamumuo diha sa ubasan.
Isulat sa pisara ang mosunod nga pamahayag. Hatagi ang mga estudyante og panahon sa pagkompleto sa pamahayag diha sa ilang mga class notebook o mga scripture study journal. Basi sa unsay akong nakat-unan gikan niini nga sambingay, ako mo- …
Human sa igong panahon, dapita ang pipila ka mga estudyante nga komportable sa pagbuhat sa ingon sa pagpakigbahin ngadto sa klase sa unsay ilang gisulat.
Mateo 20:17–34
Gipanagna ni Jesus ang Iyang kaugalingong kamatayon ug gitudloan ang Iyang mga disipulo nga moserbisyo sa uban
I-summarize ang Mateo 20:17–34 pinaagi sa pagpasabut nga gipanagna sa Manluluwas nga pagabudhian Siya ug pagasilutan og kamatayon inig balik Niya sa Jerusalem. Gitudloan Niya ang Iyang mga disipulo nga imbis nga magtinguha alang sa katungdanan ug awtoridad, kinahanglan nilang sundon ang Iyang ehemplo ug moserbisyo sa uban.
Komentaryo ug Background nga Impormasyon
Mateo 19:3–6. “Ang sa Dios gihiusa”
Si Elder F. Burton Howard sa Seventy mipasabut nga ang mga propeta dugay nang nagtudlo sa tahas sa kaminyoon diha sa plano sa Dios:
“Ang mahangturong kaminyoon usa ka baruganan nga gitukod sa wala pa ang katukuran sa kalibutan ug gipahigayon niini nga yuta sa wala pa ang kamatayon. Si Adan ug si Eva gihatag ngadto sa usag usa sa Dios didto sa Tanaman sa Eden sa wala pa ang Pagkapukan. Ang mga kasulatan miingon, ‘Sa adlaw nga gibuhat sa Dios ang tawo, sa kasama sa Dios gibuhat sila; ug mipanalangin kanila’ (Gen. 5:1–2; emphasis gidugang).
“Ang mga propeta managsamang nagtudlo nga ang hingpit ug kinatas-ang elemento sa mahinungdanong plano sa Dios alang sa mga panalangin sa Iyang mga anak mao ang mahangturong kaminyoon” (“Mahangturong Kaminyoon,” Ensign o Liahona, Mayo 2003, 92).
Si Sister Julie B. Beck, kinsa nakaserbisyo isip kinatibuk-ang presidente sa Relief Society, nagtudlo sa mosunod kalabut kon ngano nga ang kaminyoon gi-orden sa Dios:
“Nasayud kita sa dakong away sa wala pa kita dinhi sa yuta midapig kita sa atong Manluluwas, nga si Jesukristo, sa pagpatunhay sa atong potensyal nga masakop og mahangturong mga pamilya. … Kita nagtuo diha sa pagtukod og mahangturong mga pamilya. Kana nagpasabut nga kita nagtuo sa pagminyo”(“Unsay Labing Maayo nga Mahimo sa Santos sa Ulahing mga Adlaw nga mga Babaye: Barug nga Lig-on ug Dili Matarug,” Ensign o Liahona, Nob. 2007, 110).
Mateo 19:6–9. Deborsyo
Si Elder Dallin H. Oaks Korum sa Napulog Duha ka mga Apostoles mikomentaryo mahitungod sa epekto sa deborsyo diha sa mga pamilya:
“May daghang mga maayong miyembro sa Simbahan nga nakaagi og deborsyo. … Kami nahibalo nga daghan kaninyo nga inosenteng biktima—mga miyembro nga ang unang mga kapikas kanunay nga nagluib sa mga sagradong pagpakigsaad o mitalikod o midumili sa pagtuman sa mga katungdanan sa kaminyoon sulod sa dugayng panahon. …
“… Ang tanan nga nakaagi sa deborsyo nakahibalo sa kasakit ug nagkinahanglan sa panambal nga gahum ug paglaum nga naggikan sa Pag-ula. Kanang panambal nga gahum ug kanang paglaum anaa alang kanila ug alang usab sa ilang mga anak. …
“… Kita dili makapugong ug kita walay tulubagon sa kabubut-on sa uban, bisan may panahon nga sila modangat ngari kanato sa labihan kasakit. …
“Bisag unsa ang sangkaon ug walay kabilinggan unsa kalisud ang inyong kasinatian, inyo ang saad nga kamo dili pagahikawan sa panalangin sa mahangturong pamilya nga mga relasyon kon kamo mahigugma sa Ginoo, motuman sa iyang kasugoan, ug bisan sa kutob sa imong mahimo” (“Deborsyo,” Ensign o Liahona, Mayo 2007, 70–71, 73).
Mateo 19:10–12. “Kay adunay mga lalaki nga eunoco”
Si Elder Bruce R. McConkie sa Korum sa Napulog Duha ka mga Apostoles mipasabut nga sa karaang panahon ang ubang mga tawo adunay sayop nga pagtuo nga ang kinabuhi nga dili minyo maoy angayang tinguhaon:
“Klaro nga kadtong mihimo sa ilang kaugalingon nga mga eunoco mga lalaki kinsa sa sayop nga paganong pagsimba tinuyo nga nagpaputol uban sa paglaum nga ang maong butang moresulta sa ilang kaluwasan. Klaro kini nga ang maong butang dili tinuod nga gikinahanglan sa ebanghelyo sa bisan unsang paagi. Walay ingon nga butang diha sa ebanghelyo sama sa tinuyo nga pagpaputol; ang maong ideya nakasupak sa tinuod nga mga baruganan sa pagpasanay ug sa celestial nga kaminyoon” (Mormon Doctrine, 2nd ed. [1966], 241).
Mateo 20:1–16. Ang sambingay sa mamumuo diha sa ubasan
Si Elder Dallin H. Oaks sa Korum sa Napulog duha ka mga Apostoles mipakigbahin og importante nga leksyon nga angayang makat-unan gikan sa sambingay sa mga mamumuo diha sa ubasan:
“Sama sa ubang mga sambingay, kini makatudlo og pipila ka lahi ug bililhong mga baruganan. Alang sa kasamtangang katuyoan ang leksyon niini mao nga ang ganti sa Agalon sa Katapusang Paghukom dili ibasi kon unsa kita kadugay nga nagtrabaho sa ubasan. Dili nato mabatunan ang atong langitnong ganti pinaagi sa pagsubay kon pila ka oras kita nga nagtrabaho. Unsay mahinungdanon mao nga ang atong trabaho diha sa trabahoanan sa Ginoo miresulta nga kita nahimo sa unsay angay nato nga mamahimo. Alang sa uban kanato, nagkinahanglan kini og mas taas nga panahon kay sa uban. Unsay importante sa katapusan mao nga kita nahimo tungod sa atong pagtrabaho” (“The Challenge to Become,” Ensign, Nob. 2000, 34).