Leksyon 31: Mateo 26:31–75

Leksyon 31

Mateo 26:31–75

Pasiuna

Sa tanaman sa Getsemani, gisugdan ni Jesukristo sa pagdala diha sa Iyang Kaugalingon ang mga sala sa tanang katawhan isip kabahin sa Iyang Pag-ula. Si Jesus gibudhian ni Judas ngadto sa mga lider sa mga Judeo. Dayon si Jesus gihusay sa ilegal nga paagi sa atubangan ni Caiaphas, ang high priest, diin sayop nga mga pasangil ang gipasaka batok Kaniya. Sa laing bahin, sa tulo ka higayon gilimud ni Pedro nga siya nakaila sa Manluluwas ngadto sa mga nakaila kaniya isip usa sa mga disipulo ni Kristo.

Mga Sugyot alang sa Pagtudlo

Mateo 26:31–46

Si Jesukristo nag-antus sa Tanaman sa Getsemani

Hangyoa ang mga estudyante sa pagkonsiderar sa mosunod nga mga sitwasyon: Usa ka batan-ong lalaki gisultihan sukad sa iyang kabatan-on nga iyang katungdanan ang pagserbisyo og usa ka full-time nga misyon. Isip usa ka tin-edyer, nasayud gihapon siya nga kinahanglan siyang magmisyon apan naglisud sa iyang pasalig sa pag-adto. Mas interesado siya sa ubang oportunidad ug nabalaka nga ang pagmisyon mopugong niya nga maangkon ang maong mga oportunidad.

Unsa ang uban pang mga sitwasyon nga ang mga batan-ong lalaki ug babaye lahi og gusto kay sa gusto sa Langitnong Amahan nga ilang buhaton? (Ilista sa pisara ang mga tubag sa mga estudyante.)
Ngano nga lisud man usahay ang paghimo sa unsay gusto sa Langitnong Amahan nga atong buhaton?

Ipapangita sa mga estudyante ang mga baruganan diha sa Mateo 26:31–46 nga makatabang nila samtang maglisud sila sa pagsunod sa kabubut-on sa Langitnong Amahan.

Pahinumdumi ang mga estudyante nga sigun sa narekord sa Mateo 26:1–30, ang Ginoo mikaon sa kasaulogan sa Pagpalabay uban sa Iyang mga Apostoles ug mipasiugda sa sakrament.

Dapita ang pipila ka estudyante nga magpuli-puli sa pagbasa og kusog sa Mateo 26:31–35. Hangyoa ang klase sa pagsunod, nga mangita sa unsay gipanagna ni Jesus nga mahitabo sa Iyang mga Apostoles.

Unsa ang giingon ni Jesus nga mahitabo sa mga Apostoles nianang gabhiona?

Ipasabut nga dinhi sa mga pulong, ang pulong nga managpanibog [offended] nagpasabut nga motalikod o mobiya.

Giunsa sa pagsanong ni Pedro ug uban nga mga Apostoles kon unsay gisulti sa Manluluwas?

Dapita ang usa ka estudyante sa pagbasa og kusog sa Mateo 26:36–38. Hangyoa ang klase sa pagsunod, nga mangita kon diin si Jesus ug ang mga Apostoles miadto human sa kasaulogan sa Pagpalabay. Dapita ang mga estudyante sa pagreport sa ilang nakit-an.

Hangyoa ang mga estudyante sa pag-adto sa Mga Hulagway sa Biblia, nu. 11, “Bungtod sa mga Oliba” ug nu. 12, “Tanaman sa Getsemani” sa Santos sa Ulahing mga Adlaw nga edisyon sa King James Bible. Ipasabut nga ang Getsemani mao ang tanaman sa mga kahoy nga oliba nga nahimutang sa Bungtod sa mga Oliba nga naa lang gawas sa mga paril sa Jerusalem ug ang ngalan nga Getsemani nagpasabut nga “pugaanan para sa lana.”

Garden of Gethsemane — Tanaman sa Getsemani

Unsa nga mga pulong diha sa bersikulo 36-38 ang naghulagway sa gibati ni Jesus dihang misulod Siya sa Getsemani?

Dapita ang usa ka estudyante sa pagbasa og kusog sa Mateo 26:39, ug hangyoa ang klase sa pagpangita kon unsay gibuhat ni Jesus human “nakalakaw siya sa unahan og diyutay” ngadto sa tanaman.

Unsa nga mga pulong diha sa mga bersikulo 37–39 ang naghulagway sa lisud nga palas-anon nga gisinati ni Jesus?
Unsa ang gihangyo ni Jesus sa Amahan nga isaylo gikan Kaniya?

Guniti pataas ang usa ka kopa. Ipasabut nga ang kopa nga gipasabut sa Manluluwas mao ang simbolo sa mapait nga pag-antus nga Iyang nasinati isip kabahin sa Pag-ula. Sa Getsemani, gisugdan ni Jesus ang pagdala sa Iyang kaugalingon sa mga sala ug pag-antus sa tanang katawhan isip kabahin sa Iyang talagsaong maulaong sakripisyo.

Dapita ang usa ka estudyante sa pagbasa og kusog sa pamahayag ni Elder Jeffrey R. Holland sa Korum sa Napulog Duha ka mga Apostoles, kinsa mipasabut unsay gipangayo ni Jesus sa Amahan dihang mihangyo Siya nga ang kopa isaylo gikan Kaniya:

“Ang Ginoo miingon, uban sa pagbati, ‘Kon duna may laing agianan, kana ang akong agian. Kon duna may laing paagi—laing paagi—kalipay Ko nga buhaton kini.’ … Apan sa katapusan, ang kopa wala isaylo” (“Teaching, Preaching, Healing,” Ensign, Ene. 2003, 41).

Mahimo kang mosugyot nga markahan sa mga estudyante ang mga pulong nga “ngani, dili sumala sa akong pagbuot kondili sa imo.” (bersikulo 39).

Bisan og si Jesus mihangyo og usa ka lahi nga paagi nga matuman ang mga katuyoan sa Amahan, unsa man ang Iyang gihimo aron matuman ang Pag-ula? (Kinahanglang mahibaloan sa mga estudyante ang kamatuoran susama sa mosunod: Gitugyan ni Jesukristo ang Iyang kabubut-on ngadto sa kabubut-on sa Amahan sa pagtuman sa Pag-ula.)
Unsa ang atong makat-unan mahitungod kang Jesus gumikan sa Iyang kaandam nga motugyan ngadto sa kabubut-on sa Langitnong Amahan bisan og nagpasabut kini nga mag-antus Siya sa hilabihan ug sa katapusan mamatay?

Isulat sa pisara ang mosunod nga dili kompleto nga pamahayag: Atong gisunod ang ehemplo ni Jesukristo kon kita …

Unsaon ninyo sa pagkompleto kini nga pamahayag basi sa unsay atong nakat-unan gikan sa Mateo 26:39? (Gamit ang mga pulong sa mga estudyante, kompletuha ang pamahayag aron maporma ang mosunod nga kamatuoran: Atong gisunod ang ehemplo ni Jesukristo kon pilion nato ang pagtugyan sa atong kabubut-on ngadto sa kabubut-on sa Amahan.)

Pahinumdumi ang mga estudyante sa sitwasyon mahitungod sa batan-ong lalaki kinsa nagduha-duha sa pagmisyon, ingon man ang ubang sitwasyon nga nakalista sa pisara.

Sa unsang paagi ang ehemplo sa Manluluwas makalig-on kanato atol niini nga mga sitwasyon?

Dapita ang mga estudyante nga hunahunaon ang mga higayon dihang bisan og ang ilang mga tinguha lahi kay sa kabubut-on sa Langitnong Amahan, sa katapusan gipili nila ang pagsunod sa Iyang kabubut-on. Hangyoa ang pipila ka estudyante nga mopakigbahin sa ilang mga kasinatian ug mopasabut nganong kana ang ilang gipili ug unsay ilang gibati mahitungod niini?

Awhaga ang mga estudyante sa pag-ila og piho nga mga paagi nga masunod nila ang ehemplo ni Jesukristo pinaagi sa pagtugyan sa ilang kabubut-on ngadto sa kabubut-on sa Langitnong Amahan.

Dapita ang mga estudyante sa pagribyu sa Mateo 26:37–38, nga mangita sa mga instruksyon sa Manluluwas ngadto kang Pedro, Santiago, ug ni Juan sa Getsemani.

Unsa nga mga instruksyon ang gihatag ni Jesus kang Pedro, Santiago, ug ni Juan?
Sa inyong hunahuna unsa kaha ang ipasabut sa instruksyon nga “pagtukaw kamo uban kanako”? (bersikulo 38).

Aron matabangan ang mga estudyante nga makasabut nganong ang mga disipulo nagkinahanglan sa instruksyon sa Manluluwas sa pagtukaw uban Kaniya, ipasabut nga dihang ang mga disipulo miadto sa tanaman, sila “misugod sa hilabihan nga pagkahibulong, ug paglibug kaayo, ug pagmulo diha sa ilang mga kasingkasing, natingala kon kini ba ang Mesiyas” (Hubad ni Joseph Smith, Marcos 14:36 [sa mga pinili gikan sa Hubad ni Joseph Smith sa Biblia]). Sa pagsugo sa Iyang mga disipulo nga magtukaw uban Kaniya, gipahimangnoan sila ni Jesus nga magmalig-on kay ang ilang pagtuo Kaniya pagasulayan.

Nganong ang mga disipulo natingala kon si Jesus ba gayud ang Mesiyas? (Daghang mga Judeo wala makasabut nga ang Mesiyas mag-antus ug mamatay apan ilang gilauman nga ang Mesiyas maoy maghimong gawasnon sa mga Judeo pinaagi sa pagpapalagpot sa mga Romano.)

Dapita ang usa ka estudyante sa pagbasa og kusog sa Mateo 26:40, ug hangyoa ang klase sa pagpangita kon unsay nakit-an ni Jesus nga gibuhat niining tulo ka Apostoles samtang Siya nag-ampo. Dapita ang mga estudyante sa pagreport sa ilang nakit-an. Ipasabut nga ang Hubad ni Joseph Smith sa Lucas 22:45 nag-ingon nga nahikatulog ang mga disipulo, “kay sila puno sa kasubo.”

Unsa kaha ang gikasub-an sa mga Apostoles?
Unsa kaha ang inyong bation kon kamo pa ang naa sa ilang kahimtang ug nakabantay nga nakatulog mo kay sa magtukaw uban sa Manluluwas?

Dapita ang usa ka estudyante sa pagbasa og kusog sa Mateo 26:41, ug hangyoa ang klase sa pagpangita sa unsay gipabuhat ni Jesus sa Iyang mga disipulo. Dapita ang mga estudyante sa pagreport sa ilang nakit-an.

Unsa nga baruganan ang atong makat-unan gikan sa mga gitudlo sa Manluluwas niini nga mga Apostoles? (Kinahanglang mahibaloan sa mga estudyante ang baruganan nga susama sa mosunod: Kon magtukaw kita ug mag-ampo sa kanunay, makabaton kita og kusog sa pagbatok sa tintasyon.)
Unsa sa inyong hunahuna ang ipasabut sa mga pulong nga “sa pagkatinuod matinguhaon ang espiritu apan maluya ang lawas” (bersikulo 41)? Unsa ang kalabutan niini sa pagbatok sa tintasyon?
Hinumdumi nga ang “pagtukaw” nagpasabut nga magmata, alerto, o mabinantayon. Sa unsang paagi ang espirituhanong pagtukaw ug pag-ampo makatabang nato sa pagbuntog sa atong mga kahuyang ug pagbatok sa tintasyon?

Dapita ang mga estudyante sa pagpamalandong kon sila ba, sama sa mga Apostoles sa Getsemani, wala makabatok sa tintasyon tungod kay wala sila mag-ampo ug magtukaw. Hangyoa sila sa paghunahuna sa unsang paagi kana nga pagpili nakaapekto kanila. Dapita ang mga estudyante sa pagpamalandong sa mga panahon nga sila nakabatok sa tintasyon pinaagi sa pag-ampo ug pagtukaw.

Unsa ang nakatabang ninyo nga mapadayon ang espirituhanong pagtukaw ug pag-ampo?

Ipamatuod nga makabatok kita sa tintasyon kon kita padayong magtukaw ug mag-ampo. Dapita ang mga estudyante sa pagsulat sa papel kon unsay ilang mahimo aron mas makapadayon sa pagtukaw ug pag-ampo. Awhaga sila nga dalhon nila ang ilang papel aron mapahinumduman sila sa ilang tumong.

I-summarize ang Mateo 26:42–46 pinaagi sa pagpasabut nga si Jesus nag-ampo sa tulo ka higayon sa Tanaman sa Getsemani. Sa matag higayon gipahayag Niya ang Iyang kaandam nga mosunod sa kabubut-on sa Iyang Amahan.

Mateo 26:47–75

Si Jesukristo gidakop ug gihusay sa atubangan ni Caifas

Dapita ang usa ka estudyante sa pagbasa og kusog sa mosunod nga pamahayag ni Gerald N. Lund, kinsa sa wala madugay nahimong sakop sa Seventy:

“Hunahunaa si [Jesukristo,] ang Binuhat kansang gahum, kahayag, himaya naghupot sa kalibutan sa hapsay, ang Binuhat kinsa namulong ug ang mga solar system, mga galaxy, ug mga bitoon mitunga—mibarug atubangan sa mga tawong dautan ug gihukman nila isip binuhat nga walay hinungdan o bili!” (“Knowest Thou the Condescension of God?” sa Doctrines of the Book of Mormon: The 1991 Sperry Symposium, ed. Bruce A. Van Orden and Brent L. Top [1992], 86).

Isulat sa pisara ang Mateo 26:47–68. Hangyoa ang mga estudyante sa pagpangita niini nga mga bersikulo, kon giunsa ni Jesukristo nga padayong mitugyan ngadto sa kabubut-on sa Langitnong Amahan bisan sa dili maayo ug sayop nga paghukom Kaniya sa dautang mga tawo. Mag-agad sa panginahanglan sa imong mga estudyante, mahimong basahon ninyong tanan og kusog kini nga bersikulo sa tibuok klase, ipares-pares ang mga estudyante sa pagbasa og kusog sa mga bersikulo, o sugoa ang mga estudyante nga basahon kini sa hilum.

Human sa igong panahon, pangutan-a sa mosunod:

Giunsa ni Jesukristo sa pagtugyan ngadto sa kabubut-on sa Langitnong Amahan bisan sa dili maayo ug sayop nga paghukom Kaniya sa dautang mga tawo?

Dapita ang usa ka estudyante sa pagbasa og kusog sa Mateo 26:53. Hangyoa ang klase sa pagsunod, nga mangita kon unsay giingon ni Jesus nga Iya untang mabuhat niini nga panghitabo.

Unsa kaha unta ang mabuhat sa Manluluwas?
Imbis mangayo og dagsa sa mga anghel o bisan unsang diosnong gahum nga moluwas Kaniya, unsa man ang gihimo ni Jesus?
Unsa ang gitudlo niini diha ninyo mahitungod sa kaandam sa Manluluwas sa paghimo sa kabubut-on sa Langitnong Amahan sa bisan unsang mga kahimtang?

Bisan og si Jesukristo dunay gahum sa paglaglag sa mga tawo nga mibunal ug miluwa Kaniya, Siya andam nga miantus ug milahutay (tan-awa sa 1 Nephi 19:9). Ang mga lider ug mga sundalo wala makamatikud sa walay kinutubang gahum nga madawat ni Jesus kon kini kabubut-on pa sa Amahan nga Iyang buhaton.

Ipasabut nga sigun sa narekord sa bersikulo 56, ang panagna sa Manluluwas nga ang mga Apostoles motalikod Kaniya natuman. Hinoon, kini nga pagtalikod temporaryo lamang.

I-summarize ang Mateo 26:69–75 pinaagi sa pagpasabut nga samtang gihusay si Jesus human sa Iyang pagkadakop, si Pedro sa tulo ka higayon milimud nga siya nakaila Kaniya. (Pahinumdom: Kini nga paglimud hisgutan og maayo diha sa leksyon sa Lucas 22.)

Ipamatuod ang mga kamatuoran nga nia niini nga leksyon.

Komentaryo ug Background nga Impormasyon

Mateo 26:39. “Ngani, dili sumala sa akong pagbuot kondili sa imo”

Si Elder Jeffrey R. Holland sa Korum sa Napulog Duha ka mga Apostoles mipasabut:

“Kon magbilin ka og usa ka dakong pasalig sa imong mga estudyante agig tubag sa dili hitupngan nga sakripisyo sa Manluluwas alang nila, ang Iyang bayad para sa ilang mga kalapasan, ang Iyang mga kasubo alang sa ilang mga sala, magbilin diha kanila sa panginahanglan nga mosunod—nga itugyan ang kaugalingon nilang lisud nga sitwasyon ug mga oras sa pagdesisyon ngadto ‘sa kabubut-on sa Amahan’ [3 Ne. 11:11], bisan unsa ka lisud. Dili nila kana kanunay nga himoon, labaw kay sa imo ug sa akong paghimo niini, apan kinahanglan nga kana unta ang ilang tumong; kana unta ang ilang katuyoan. Ang butang nga ingon og gusto gayud kaayo nga ipasabut ni Kristo mahitungod sa Iyang misyon—lapas sa personal nga mga hiyas, lapas sa labihan kanindot nga mga wali, ug gani lapas sa mga pagpapang-ayo—mao nga Iyang gitugyan ang Iyang kabubut-on ngadto sa Amahan” (“Teaching, Preaching, Healing,” Ensign, Ene. 2003, 41).