Leksyon 33: Mateo 27:51–28:20

Leksyon 33

Mateo 27:51–28:20

Pasiuna

Sa pagkamatay ni Jesukristo, ang tabil sa templo nagisi sa duha ka bahin. Ang mga lider sa Judeo mipetisyon ni Pilato nga gwardiyahan ang gilubngan sa lawas ni Jesus. Si Jesukristo nabanhaw ug nagpakita sa daghang tawo, lakip ngadto sa Iyang mga Apostoles. Gisugo Niya ang Iyang mga Apostoles sa pagdala sa ebanghelyo sa tibuok kalibutan.

Mga Sugyot alang sa Pagtudlo

Mateo 27:51–56

Sa pagkamatay ni Jesukristo, ang tabil sa templo nagisi ug ang kalibutan natay-og

Hangyoa ang mga estudyante sa paghunahuna kon sila o ubang tawo nga ilang nailhan, namatyan na ba og tawo nga ilang suod? Dayon pangutan-a ang klase:

Ngano nga lisud man ang mamatyan og usa ka minahal?

Hangyoa ang mga estudyante sa pagpangita og mga kamatuoran samtang magtuon sila sa Mateo 27:51–28:20 nga makatabang nila nga mahupay kon mamatyan sila og usa ka minahal. Sa paghatag og kinatibuk-ang kahulugan sa karon nga leksyon, mahimo nimong hangyoon ang mga estudyante nga i-summarize og kadiyot kon unsa ang nasinati ni Jesukristo sa tunga-tunga nga panahon dihang Siya gidakop ug dihang Siya gilansang.

Dapita ang usa ka estudyante sa pagbasa og kusog sa Mateo 27:51. Hangyoa ang klase sa pagsunod, nga mangita kon unsay nahitabo sa templo dihang namatay si Jesus.

Unsa ang nahitabo dihang mamatay si Jesus?

Ikonsiderar ang pagkopya diha sa pisara sa kauban nga diagram sa sulod sa templo.

Ipasabut nga sa panahon ni Jesus, ang templo dunay duha ka kwarto: ang Dapit nga Balaan ug ang Dapit nga Labing Balaan. Ang Dapit nga Labing Balaan nagrepresentar sa presensya sa Dios. Kining duha ka kwarto gibahin pinaagi sa usa ka tabil, o kurtina. Kausa sa matag tuig, sa Adlaw sa Pag-ula, ang halangdong pari moagi gikan sa Dapit nga Balaan lahus sa tabil sa templo ug mosulod ngadto sa Dapit nga Labing Balaan, diin iwisik niya ang dugo nga halad sa pasig-uli [sin offering] aron sa pagtubos sa mga sala sa tanang kongregasyon sa Israel (tan-awa sa Levitico 16). Dihang ang tabil sa templo nagisi sa duha ka bahin sa pagkamatay ni Kristo, usa kadto ka mahinuklugong simbolo nga si Jesukristo, ang Labing Halangdon nga Pari, miagi lahus sa tabil sa kamatayon ug sa dili madugay mosulod ngadto sa presensya sa Dios nga Amahan.

Aron matabangan ang mga estudyante nga mas makasabut sa kahulugan sa pagkagisi sa tabil, dapita ang usa ka estudyante sa pagbasa og kusog sa mosunod nga pamahayag ni Elder Bruce R. McConkie sa Korum sa Napulog Duha ka mga Apostoles:

“Ang Dapit nga Labing Balaan bukas na karon alang sa tanan, ug ang tanan, pinaagi sa maulaon nga dugo sa Kordero, makasulod na karon sa pinakataas ug labing balaan sa tanang dapit, niana nga gingharian diin ang mahangturong kinabuhi nahimutang. … Ang mga ordinansa nga gihimo lahus sa tabil sa karaang templo usa ka pagkasusama sa unsay buhatunon ni Kristo, nga karon iya nang nahimo, ang tanang tawo makahimo na sa pag-agi sa tabil ngadto sa presensya sa Ginoo aron mapanunod ang hingpit nga kahimayaan” (Doctrinal New Testament Commentary, 3 vols. [1965–73], 1:830).

Unsang importante nga kamatuoran ang atong makat-unan mahitungod sa Pag-ula ni Jesukristo gumikan sa pagkagisi sa tabil? (Human makatubag ang mga estudyante, isulat sa pisara ang mosunod nga kamatuoran: Tungod sa Pag-ula ni Jesukristo, tanan kita makasulod sa presensya sa Dios kon maghinulsol kita ug motuman sa atong mga pakigsaad.)
Sa unsang paagi nga ang Pag-ula ni Jesukristo naghimong posible nga kita makabalik sa presensya sa Dios?

Ipasabut nga bisan og ang Pag-ula ni Jesukristo naghimong posible nga kita makabalik sa presensya sa Dios, kinahanglan kitang mohimo sa atong bahin nga mahimong takus nga makig-uban sa atong Langitnong Amahan sa kahangturan.

Unsa ang kinahanglan natong buhaton aron mahimong takus nga makig-uban sa Langitnong Amahan sa kahangturan?

I-summarize ang Mateo 27:52–56 pinaagi sa pagpasabut nga human sa Pagkabanhaw ni Jesukristo, daghang matarung nga mga tawo nga patay na nabanhaw usab ug mipakita sa daghang mga tawo sa Jerusalem. Kining mga bersikulo naghisgot usab nga ang uban sa mga nakasaksi sa pagkamatay ni Jesus mao ang Romano nga kapitan ug daghang kababayen-an.

Dapita ang usa ka estudyante sa pagbasa og kusog sa Mateo 27:54. Hangyoa ang klase sa pagpangita kon unsay gibati sa Romano nga kapitan ug sa iyang mga kaubanan dihang nasaksihan nila ang panghitabo human sa paglansang sa Manluluwas.

Unsa ang gibati sa kapitan ug sa iyang mga kauban.
Unsa ang ilang nakita nga maoy hinungdan nga nakapamahayag sila nga “sa pagkatinuod [si Jesus] ang Anak sa Dios”?

Mateo 27:57–66

Ang mga lider sa mga Judeo nakigkunsabo ni Pilato nga gwardiyahan ang gilubngan ni Jesus

I-summarize ang Mateo 27:57–61 pinaagi sa pagpasabut nga human sa kamatayon ni Jesus, may usa ka dato nga disipulo ginganlan og Jose sa Arimatea iyang “gipangayo [gihangyo] ang lawas ni Jesus” (bersikulo 58). Giputos Niya ang lawas ni Jesus og usa ka limpyong panapton, gipahimutang kini sa lubnganan (o building) nga iyang gipanag-iya, ug dayon gialihan og dakong bato ang ganghaan sa lubnganan.

Dapita ang pipila ka estudyante nga magpuli-puli sa pagbasa og kusog sa Mateo 27:62–66. Hangyoa ang klase sa pagsunod, nga mangita sa unsay gihangyo sa punoan sa mga pari ug mga Pariseo ngadto kang Pilato.

Unsa ang gihangyo sa punoan [daku-dako] sa mga pari ug mga Pariseo ngadto kang Pilato.
Nganong nagtinguha man sila niini?

Mateo 28:1–20

Si Jesukristo nabanhaw ug mipakita ngadto sa daghang tawo

Ipasabut nga sayo sa unang adlaw sa semana, o Dominggo, si Maria Magdalena ug ang laing babaye ginganlan og Maria miadto sa lubnganan aron sa paghaplas sa lawas ni Jesus isip pagpahayag sa ilang gugma ug pagdayeg. Dapita ang pipila ka estudyante nga magpuli-puli sa pagbasa og kusog sa Mateo 28:1–6.

Unsa ang nakita sa mga babaye dihang nangabut sila sa lubnganan? (Ipasabut nga ang Joseph Smith Translation nagklaro nga ang mga babaye nakakita og duha ka anghel, dili usa.
Unsa kaha ang inyong reaksyon kon nakakita mo og duha ka anghel? Unsa ang reaksyon sa mga gwardiya?
Sumala sa mga bersikulo 5–6, unsay gisulti sa mga anghel ngadto sa mga babaye?
Unsa nga mga kamatuoran ang atong makat-unan gikan niini nga mga pulong? (Human makatubag ang mga estudyante, isulat sa pisara ang mosunod nga kamatuoran: Si Jesukristo nabanhaw gikan sa pagkamatay.)

Aron matabangan ang mga estudyante nga makasabut sa doktrina sa Pagkabanhaw, grupoha sila nga magtinagurha o tinagutlo ug ipakompleto nila ang mosunod nga handout diha sa ilang mga grupo:

“Siya nabanhaw” (Mateo 28:6)

Manwal sa Seminary Teacher sa Bag-ong Tugon—Leksyon 33

Tun-i ang entry nga giulohan og “Pagkabanhaw” sa ang Giya Ngadto sa mga Kasulatan. Hisguti ang mga pangutana sa ubos ug irekord ang inyong mga tubag diha sa mga luna nga gihatag.

Unsa ang kalainan tali sa nabuhi og balik ug sa nabanhaw?
Unsa ang mahitabo sa tanang katawhan agig resulta sa Pagkabanhaw ni Jesukristo?
Sa unsang paagi ang pagkasabut sa doktrina sa Pagkabanhaw naghatag og kahupayan alang sa mga namatyan og mga minahal?

Hangyoa ang pipila ka estudyante nga mopakigbahin sa klase kon unsay ilang nakat-unan gumikan sa pagkompleto sa handout.

Dapita ang usa ka estudyante sa pagbasa og kusog sa mosunod nga pamahayag ni Presidente Gordon B. Hinckley:

“Ang milagro niana nga kabuntagon sa pagkabanhaw, nianang unang Pasko sa Pagkabanhaw, usa ka milagro sa tanang katawhan. Milagro kadto sa gahum sa Dios, kansang Hinigugma nga Anak mihatag sa Iyang kinabuhi sa pag-ula alang sa mga sala sa tanan, usa ka sakripisyo sa paghigugma alang sa tanang anak sa Dios. Sa paghimo sa ingon Iyang gibugto ang mga gapos sa kamatayon. …

“Ug sama sa Iyang pagpabangon sa Iyang lawas ug paggula gikan sa lubnganan, mao usab kitang tanan makatagamtam og pagpahiuli sa lawas ug sa espiritu aron mahimo nga buhi nga kalag sa adlaw nga kita mabanhaw.

“Busa, kita magmaya, ingon man ang daghan, ug ang tanang katawhan, kon atong hinumduman ang pinakamahimayaon, pinakamahupayon, pinakamahinamon sa tanang panghitabo sa kasaysayan sa tawo—ang kadaugan batok sa kamatayon” (“The Victory over Death,” Ensign, Abr. 1997, 4).

Dapita ang usa ka estudyante sa pagbasa og kusog sa Mateo 28:7–10.

Sumala sa bersikulo 7, unsay gisugo sa mga anghel nga buhaton sa mga babaye?
Ngano kaha nga ang mga babaye nanglakaw man uban sa “kahadlok ug dakong kalipay”?
Unsa ang nahitabo sa mga babaye dihang nanglakaw sila aron sa pagsulti sa mga disipulo mahitungod sa ilang nasinati?

I-summarize ang Mateo 28:11–15 pinaagi sa pagpasabut nga dihang nagdali sila nga ibalita sa mga disipulo ang mahitungod sa Pagkabanhaw ni Jesus, ang punoan sa mga pari nakadungog sa nanghitabo gikan sa mga sundalo nga naggwardiya sa lubnganan. Ang mga lider sa mga Judeo nangahadlok nga basin mahibaloan sa mga tawo ang tinuod, mao nga gibayaran nila ang mga gwardiya aron isabwag ang bakak nga gikuha sa mga disipulo ang Iyang lawas gikan sa lubnganan samtang nakatulog sila.

Ipabasa og kusog sa usa ka estudyante ang Mateo 28:16–18. Dapita ang klase sa pagsunod, nga mangita sa panalangin nga midangat ngadto sa onse ka mga Apostoles dihang gisunod nila ang pulong sa mga babaye sa pag-adto sa Galilea.

Unsa nga panalangin ang midangat sa onse ka mga disipulo tungod kay gisunod nila ang pulong sa mga babaye?

Dapita ang usa ka estudyante sa pagbasa og kusog sa Mateo 28:19–20. Hangyoa ang klase sa pagsunod, nga mangita sa unsay gisugo sa Manluluwas nga buhaton sa Iyang mga Apostoles human sila nakakita Kaniya.

Unsa ang gisugo nga buhaton sa mga Apostoles human nila makita ang Manluluwas?
Unsa ang atong makat-unan gikan sa ilang kasinatian mahitungod sa atong responsibilidad gumikan sa pagkaangkon nato og pagpamatuod kang Jesukristo? (Human makatubag ang mga estudyante, isulat sa pisara ang mosunod nga baruganan: Dihang nakaangkon ta og pagpamatuod kang Jesukristo, may responsibilidad kita sa pagpamatuod mahitungod Kaniya ngadto sa uban.)

Dapita ang mga estudyante sa pag-adto sa pisara ug ipasulat ang mga paagi nga kita makapamatuod mahitungod ni Jesukristo ngadto sa uban. Mahimo usab nimong dapiton ang mga estudyante nga mopasabut o mohatag og mga ehemplo sa mga ideya nga ilang gisulat. Dayon ikonsiderar ang mosunod nga mga pangutana:

Sumala sa bersikulo 20, unsay gisaad sa Manluluwas nga ihatag sa Iyang mga Apostoles?
Sa unsang mga paagi nga “kauban ninyo,” ang Ginoo o motabang ninyo, sa inyong mga paningkamot sa pagpakigbahin sa ebanghelyo?

Awhaga ang mga estudyante nga mopakigbahin sa ilang mga pagpamatuod mahitungod ni Jesukristo ngadto sa uban. Aron matabangan sila nga mahimo kini, hangyoa ang mga estudyante sa paggamit og usa sa mga ideya nga nalista diha sa pisara sa paghimo og personal nga tumong sa pagpamatuod mahitungod ni Jesukristo ug sa Iyang ebanghelyo ngadto sa mga sakop sa pamilya, mga higala, ug sa uban. Dapita ang mga estudyante sa pagsulat sa ilang tumong diha sa ilang mga class notebook o mga scripture study journal.

Scripture Mastery—Mateo 28:19–20

Aron matabangan ang mga estudyante nga makamemorya sa scripture mastery passage, ipares-pares ang mga estudyante ug ipasulat sa papel ang tudling sa usa ka sakop sa matag pares. Hangyoa ang mga estudyante sa paggunting sa papel, nga ipabilin ang mga pulong nga naa sa tudling sa kasulatan. Hangyoa ang mga estudyante sa pagsagul-sagol sa pinikas-pikas nga papel ug dayon i-arrange kini sa hustong han-ay (nga mag-refer sa ilang mga kasulatan kon gikinahanglan). Ipapraktis kanunay sa mga estudyante hangtud nga dili na sila kinahanglang magtan-aw sa ilang mga kasulatan. Awhaga ang mga estudyante sa pagtangtang og usa ka papel ug i-recite sa ilang hunahuna ang gitangtang nga mga pulong. Human mamemorya sa mga estudyante ang usa sa mga pulong, awhaga sila sa pagtangtang og laing mga pulong ug balikon sa hunahuna ang mga pulong nga naa sa duha ka papel. Tuguti nga ipadayon nila kini nga proseso hangtud nga ilang ma-recite diha sa ilang mga hunahuna ang tibuok nga tudling.

Komentaryo ug Background nga Impormasyon

Mateo 28:6. “Siya nabanhaw”

Si Presidente Ezra Taft Benson mipahayag nga walay panghitabo nga mas labaw pa kaimportante kay sa Pagkabanhaw ni Jesukristo:

“Ang labing dako nga panghitabo sa kasaysayan mao kadto nga nakaapekto sa labing daghan sulod sa labing taas nga mga panahon. Pinaagi niini nga sumbanan, walay hitabo nga mas importante ngadto sa mga indibidwal o mga nasud kay sa Pagkabanhaw sa Agalon. Ang umaabut nga pagkabanhaw sa matag kalag kinsa nabuhi ug namatay sa yuta usa ka kasigurohan diha sa kasulatan, ug sigurado nga walay laing hitabo diin ang usa ka tawo kinahanglang mohimo og mainampingong pagpangandam. Walay laing mas klaro nga mahitabo sa tanan kay sa pagkabanhaw. Ang tanang buhi nga binuhat mabanhaw” (“The Greatest Event in History,” New Era, Abr. 2004, 45).

Mateo 28:19. “Busa panglakaw kamo, ug pagsangyaw sa tanang kanasuran”

Si Elder David A. Bednar sa Korum sa Napulog Duha ka mga Apostoles mipasabut nga ang mga miyembro sa Simbahan makagamit og social media sa pagsangyaw sa ebanghelyo:

“Ang Ginoo nagpadali sa Iyang buhat, ug dili sulagma nga kining talagsaong kalamboan sa komunikasyon ug imbensyon nahitabo niining dispensasyon sa kahingpitan sa panahon. Ang mga channel sa social media mao ang mga himan nga sa personal ug positibong paagi makaapekto sa daghang mga indibidwal ug mga pamilya. Ug ako nagtuo nga ang panahon miabut alang nato isip mga disipulo ni Kristo sa paggamit niining dinasig nga mga himan sa husto ug mas epektibo nga paagi sa pagpamatuod sa Dios ang Mahangturong Amahan, sa Iyang plano sa kalipay alang sa Iyang mga anak, ug sa Iyang Anak, nga si Jesukristo, isip Manluluwas sa kalibutan; sa pagsangyaw sa kamatuoran sa Pagpahiuli sa ebanghelyo sa ulahing mga adlaw; ug sa pagtuman sa buhat sa Ginoo” (“To Sweep the Earth as with a Flood” [Brigham Young University Campus Education Week devotional, Ago. 19, 2014], LDS.org).