Faatomuaga i le Polokalama o Suesuega e Fai i le Fale a le Seminare

O le polokalama o suesuega e fai i le Fale a le seminare, ua fuafuaina e fesoasoani ia te oe e faamalosia ai lou malamalama i le talalelei a Iesu Keriso, ma faaaoga ona aoaoga i lou olaga i aso taitasi e ala i se suesuega o tusitusiga paia. Mo au suesuega i le tausaga aoga lenei, o le a muamua ona e faia le faitauina o mau atofaina mo le kosi lenei—o le Mataupu Faavae ma Feagaiga—ona faatoa e faia ai lea o lesona taitasi. E faatasi i le vaiaso o le a oulua feiloai ai ma le faiaoga seminare, e ave atu i ai au galuega ma auai i se lesona faalevaiaso.

O le seminare o se polokalama o aoaoga faalelotu i aso taitasi. O le suesueina ma le agaga tatalo o au tusitusiga paia e tatau ona faia o se masani i aso taitasi. O le a manaomia ona e galue i au galuega atofaina o le seminare i aso aoga taitasi, e ui lava o le a e le auai atu i le vasega seminare i aso uma. E 32 iunite e tatau ona faamaeaina i le aluga o le kosi. O le siata o le faitauga ua faaalia ai mea e tatau ona e suesueina mo iunite taitasi. O le a fesoasoani atu lou faiaoga ina ia e malamalama i le taimi e tatau ona faagata ai iunite taitasi. O lesona o loo i lenei taiala suesue e tatau ona alu ai le tusa ma le 30 minute e fai ai, e faaopoopo atu i lau suesuega o tusitusiga paia i aso taitasi.

E tatau ona i ai ni au api talaaga mo le suesueina o tusitusiga paia se lua (po o ni api se lua), e ese mai i lau api o talaaga patino, lea o le a e tusia ai galuega atofaina mai gaoioiga i le taiala suesue. O vaiaso taitasi e te lua feiloai ai ma lou faiaoga, e tatau ona e tuuina atu i ai lau api talaaga mo le suesueina o tusitusiga paia, ua i ai galuega atofaina ua faamaeaina mai gaoioiga i le taiala suesue sa e faia mo lena vaiaso. O le a faitau ma tali atu lou faiaoga i galuega atofaina ma toe faafoi atu ia te oe lena api talaaga mo le suesueina o tusitusiga paia i le vaiaso e sosoo ai. E mafai foi ona tusi au tali i pepa i se api e mafai ona saei ona itulau ma tuuina atu itulau sa e faia i lena vaiaso. Ma, a toe faafoi mai e lou faiaoga ia itulau, e mafai ona e toe tuuina i totonu o le api.

Faaaogaina o le Tusi Lesona Lenei i se Polokalama Faaleaso a le Seminare

O lenei tusi lesona e mafai ona faaaoga e faiaoga ma tagata aoga i le polokalama faaleaso a le seminare, e faaleleia ai lesona pe mo galuega e faaatoa ai togi. Ae peitai, e lei fuafua e tuu atu i tagata aoga uma o le seminare i aso taitasi. Afai e tatau ona fai e se tagata aoga se lesona e faaatoa ai ona togi, e mafai ona atofa atu e le faiaoga ia te ia e fai le lesona e suesue i le aiga e tutusa ma le lesona sa misi.

Faaaogaina o le Taiala a le Tagata Aoga o le Suesuega e Fai i le Aiga

Faatomuaga i le Anotusi o Mau

O lenei folasaga ua tuuina atu ai ni faamatalaga o le talaaga ma se aotelega o le tusiga o mau mo lesona taitasi.

Faavasegaina o Fuaiupu ma le Aotelega o le Anotusi

O le faavasegaina o fuaiupu e atagia ai malologa masani pe a i ai se suiga i le mea e fai po o se autu. O [faavasegaina] taitasi e sosoo atu ai ma se aotelega puupuu o mea na tutupu po o aoaoga i fuaiupu.

Aoaoga Faavae ma Mataupu Faavae

A o alia’e ia aoaoga faavae ma mataupu faavae e pei ona masani ai mai tusiga o mau, e faalapopoaina i le lesona e fesoasoani ai ia e iloaina.

Fesoasoaniga mo Suesuega

O fesoasoaniga mo suesuega e maua ai malamalamaaga faaopoopo ma faamalamalama ai faiga masani ia e mafai ona faaleleia atili ai au suesuega ma le malamalama i mau.

Mau Tauloto

O mau tauloto taitasi e 25 o loo maua i le Mataupu Faavae ma Feagaiga, e ese le tulaga o loo taulima ai i le lesona e i ai, ina ia fesoasoani e faaloloto atili ai lou taulotoina.

Faamaumauina o Tali i totonu o le Tusi Lesona

O le a i ai nisi o taimi e talosagaina ai oe e tusi ia tali i totonu o le tusi lesona i laina avanoa po o i se siata.

Galuega Atofaina o le Api Talaaga mo le Suesueina o Tusitusiga Paia

O galuega atofaina o le api talaaga mo le suesueina o tusitusiga paia, e tatau ona tusia ma tuuina atu i lou faiaoga i vaiaso taitasi mo [sona] manatu faaalia. O le mafaufau totoa i au tali o le a fesoasoani e te maua ai ni aafiaga aoga ao e suesue ma faaaoga upumoni mai tusitusiga paia.