Iunite 13: Aso 1

O Le Nofoaga Autu o Siona

Faatomuaga

O lenei lesona e tuuina atu ai se vaaiga aoao o ni nai mea na tutupu i le talafaasolopito o le Ekalesia lea na tupu i le Itumalo o Jackson, Misuri. I le taumafanafana o le 1831, o nisi o le Au Paia o e na faapotopoto i Ohaio, na amata la latou malaga e nonofo i le eria o le Itumalo o Jackson, Misuri. I se faaaliga i le Perofeta o Iosefa Samita ia Iulai 1831, na tofiaina ai e le Alii le taulaga o Initipene, Misuri, e avea ma “nofoaga tutotonu” o Siona (MF&F 57:3). Sa amata ona atiina ae e le Au Paia le aai ma taumafai e ola e tusa ai ma tulafono a le Atua. Ae peitai, i le aluga o taimi, sa tulai mai ni finauga i le va o le Au Paia ma isi tagatanuu o Misuri, lea na oo atu ai i sauaga a le au faatupu vevesi e faasaga i le Au Paia. Sa faamalosia le Au Paia e tuua le Itumalo o Jackson ia Novema ma Tesema o le 1833.

Ua tofia e le Alii ia Initipene, Misuri, e avea ma nofoaga tutotonu o Siona

Vaai faalemafaufau e faapea o loo e tolauapi ae e iloa ai o loo agai atu ni matagi malolosi. O a nisi o auala e te ono maua ai le puipuiga mai matagi malolosi? E mafai faapefea ona aoga se faleie i lenei tulaga?

I le Feagaiga Tuai, na faaaoga ai e le perofeta o Isaia le tala faatusa o se faleie, e faatusa i le fausiaina o Siona i aso amuli, e avea o se puipuiga mo le Au Paia (tagai i le Isaia 54:2). Na faaaoga e le fanauga a Isaraelu faleie mo o latou malutaga ma malologa a’o latou nonofo ma malaga i le vao. Na aoao mai Peresitene Ezra Taft Benson e uiga i le faafaatusa e fesootai ma faleie:

“Ia e tagai atu faalemafaufau i se faleie tele o loo faatu i luga e ni maea ua nonoa agai i fao laau (siteki) e tele o loo tutui mau i le eleele.

“Na faatusa e perofeta ia Siona o aso e gata ai i se faleie tele e aofia uma ai le lalolagi. O le faleie ua taofiofia e maea ua faapea ona faamauina i siteki. O na siteki, e moni lava, o faalapotopotoga eseese faaleitulagi ua salalau solo i le lalolagi. I le taimi nei, ua faapea ona faapotopotoina mai Isaraelu i siteki eseese o Siona,” (“Ia Faamalosia Ou Siteki,” Ensign, Jan. 1991, 2).

Faitau le Mataupu Faavae ma Feagaiga 115:6, ma vaavaai mo le ituaiga puipuiga na folafola mai e le Alii ia i latou o e o le a faapotopoto i Siona i aso amuli. Atonu e te manao e faailoga mea e te maua.

Sa mafaufau le uluai Au Paia e faapea, o Siona o se nofoaga o le filemu, saogalemu, ma le puipuiga mai le amioleaga (tagai i le MF&F 45:66–71). Sa latou faatalitali ma le naunautai i le Alii e faaali mai le nofoaga o Siona ina ia mafai ona latou amata fausia Lona nuu paia. Ia Iulai 1831, na tautino mai ai e le Alii o le laueleele o Misuri o le laueleele folafolaina lea o Siona, ma o Initipene, Misuri, o le “nofoaga tutotonu” lea o le aai o Siona (tagai i le MF&F 57:1–3).

1. Tali fesili nei i lau api talaaga mo le suesueina o tusitusiga paia:

   1. Pe ana faapea sa avea oe o se uluai tagata o le Ekalesia, faamata o a ni ou lagona ina ua e iloa le mea o le a fausia ai le aai o Siona?

   2. O le a se taimi e te ono manao ai e amata fausia le aai? Aisea?

Pe sa i ai se taimi na sese ai lou faatuina o se faleie, pe sa e taumafai e faatu se faleie ae le’i atoa ona vaega uma? O le a le mea na tupu, pe e te manatu o le a se mea o le a tupu?

E pei lava o se faleie e tatau ona faatu i se auala faapitoa, faapea ai ma ona vaega sa’o uma, e ao foi ona fausia Siona e tusa ai ma se mamanu faapitoa. Faitau le Mataupu Faavae ma Feagaiga 105:5, ma vaavaai mo le auala e ao ona fausia ai le “faleie” o Siona ina ia taliaina e le Alii.

Ia matau, e tatau ona fausia Siona i luga o mataupu faavae o le amiotonu. Ina ua uma ona faaali mai e le Alii le tulaga o le laueleele o Siona i le 1831, na Ia tuuina mai ni faaaliga i totonu o le lua tausaga na sosoo ai, e faamatala mai ai mataupu faavae e tatau i le Au Paia ona fausia ai Siona.

Faitau mau nei, ma vaavaai mo mataupu faavae o le amiotonu ma poloaiga, o le a manaomia ona mulimuli ai le Au Paia ina ia fausia ai ma le manuia Siona. I avanoa ua saunia, tusi ai nisi o mataupu faavae ma poloaiga e te tau i ai.

Mataupu Faavae ma Feagaiga 82:14–19

Mataupu Faavae ma Feagaiga 97:10-16

Mataupu Faavae ma Feagaiga 97:21–22, 25–27

Mataupu Faavae ma Feagaiga 133:4-9

2. Tali fesili nei i lau api talaaga mo le suesueina o tusitusiga paia:

   1. O a ni auala e mafai i le ola ai i nei mataupu faavae o le amiotonu ona fesoasoani i le Au Paia e fausia Siona ma ia puipuia ai mai afā faaleagaga?

   2. Mata e mafai faapefea i le ola ai i nei mataupu faavae ona fesoasoani e puipuia i tatou i aso nei?

Ua tulai mai finauga i le va o le Au Paia ma isi tagatanuu o Misuri

Ina ua uma ona faaali mai e le Alii le tulaga o Siona ia Iulai 1831, e toatele le Au Paia sa malaga mo le toeitiiti 900 maila mai Katelani, Ohaio, i Initipene, Misuri, e nonofo ai ma fausia Siona.

Toe tepa i tua i le ata o le faleie i le amataga o le lesona. O faleie anamua sa masani ona falo ina ia mafai ona ofi uma ai aiga toatele. I le faataunuuina o se vaega o le valoaga a Isaia e faapea, o le a faalauteleina tuaoi o le faleie o Siona, e faauumiina maea, ma faamalolosia fao [siteki], o Katelani, Ohaio, na filifilia ai “o se siteki i Siona” (MF&F 82:13) ina ua uma ona faavaeina le nofoaga tutotonu o Siona i Initipene, Misuri. O aso popofou ma aso nei i le Ekalesia, o le Au Paia e faapotopoto i siteki o Siona e maua faamanuiaga o le puipuiga o Siona. O lona uiga, o le Au Paia o loo nonofo i totonu o siteki o Siona, e mafai ona olioli i faamanuiaga ma le puipuiga lava e tasi o loo maua e i latou o loo nonofo i le nofoaga tutotonu o Siona.

Faitau le faamatalaga lenei e uiga i le auala na lagolagoina ai e le Au Paia i le siteki o Siona i Katelani le fausiaina o le nofoaga tutotonu o Siona i Misuri. Vaavaai mo mea na faia e le Au Paia i Katelani e fesoasoani i le faatuina o Siona. Atonu e te manao e faailoga nisi o manatu e te iloa e aoga.

Katelani, Ohio: I le taimi o se faasologa o konafesi na faia ia Novema 1831, na tuufaatasia ai e le Perofeta o Iosefa Samita ma isi taitai o le Ekalesia ia faaaliga na maua e mai i lena taimi ma fuafuaina ai e lolomi ia faaaliga i se tusi. Na maua e Oliva Kaotui ma Ioane Uitimera le tiutetauave e ave atu faaaliga i Misuri ina ia mafai e William W. Phelps ona lomiaina e avea ma Tusi o Poloaiga. I le taimi o le 1831–32, sa faaauau pea ona maua e Iosefa ia faaaliga ma galue i lana faaliliuga musuia o le Tusi Paia. I le tautotogo o le 1832, sa malaga atu ai o ia i Misuri e asi le Au Paia i Siona, e lapatai i latou e faapea, sa saili Satani, “e liliu ese o latou loto mai le upumoni” (MF&F 78:10), ma ia faamaopoopo ai taumafaiga o le faleteuoloa a le epikopo i Katelani ma Initipene. E toatele le Au Paia sa faaauau pea ona siitia atu i Siona, ma e oo ane i le faaiuga o le 1832, pe a ma le tasi vae tolu o tagata o le Ekalesia ua nonofo i le Itumalo o Jackson, Misuri. I le Ekalesia anamua, sa galulue faatasi ai le Au Paia i Ohaio ma le Au Paia i Misuri e saofaga atu tupe ma punaoa e fausia ai le aai o Siona.

Mafaufau loloto i le auala a le Perofeta o Iosefa Samita ma isi Au Paia i Ohaio na fesoasoani ai i le Au Paia i Misuri ia faatuina Siona.

Faitau le faamatalaga lenei e uiga ia Initipene, Misuri, ma vaavaai mo mea na taofia ai le Au Paia mai le fausiaina o Siona. Atonu e te manao e faailoga nisi o manatu e te iloa e aoga.

Initipene, Misuri: Na faamatalaina e Pale P. Palate le nofoia e le Au Paia i Siona e ala i le folafola mai e faapea, “o le filemu ma le mau sa faapaleina ai a latou galuega, ma sa avea le vaomatua ma fanua uluola” (Autobiography of Parley Parker Pratt, ed. Pale P. Palate [1938], 93). Sa faatauina mai e taitai o le Ekalesia i Misuri se fanua, faatu se faleoloa ma se fale lomitusi, ma tali atu i manaoga o le Au Paia fai mai. E oo ane ia Iulai 1833, ua faateleina le faitau aofai o tagata o le Au Paia o Aso e Gata Ai iina i le toeitiiti 1,200. Ae sa le faapea ai sa aunoa taitai o le Ekalesia ma le Au Paia ma ni o latou faafitauli. Sa faatagaina e nisi tagata o le Au Paia lo latou manatu faapito ma le faaloloto e taofia ai i latou mai le ola i le tulafono o le faapaiaga. E le gata i lea, na faateleina le popole o isi tagata sa nofoia le eria i le vave faatoateleina o “Mamona” ma o latou faatosinaga i le tulaga o le tamaoaiga ma faiga faaupufai o le lotoifale. Sa le ioe taitai o tapuaiga i le lotoifale i talitonuga a le Au Paia. Sa faasalalau e se tasi o taitai faalelotu ni faamatalaga pepelo e uiga i tagata o le Ekalesia ma uunaia tagatanuu e faia ni amioga saua e faasaga ia i latou. Na iu lava ina matuai leaga feteenaiga i le eseese o manatu faaleupufai, e aofia ai le faafitauli i le tulaga o le faapologa tagata. Ina ua uma ona lolomi e W. W. Phelps se tusiga na faaautuina “Free People of Color,” sa faapea ona ave sese ai e tagatanuu o Misuri, o e na matele i le fautuaina o faiga faapologa, e faapea, sa taumafai le Au Paia e valaaulia atu pologa na faasaolotoina i Misuri. I le aso 20 o Iulai, 1833, na o atu ai se vaega faatupu vevesi i Initipene, togi le masini lomitusi i le aualatele, talepe le ofisa lomitusi, faaleaga le tele o itulau sa le’i faapipiiina o le Tusi o Poloaiga, faataina ma faapipii fulumanu ia Epikopo Paterika ma le tagata liliu mai o Charles Allen, ma faamatauina le aai. Sa faaauau pea ia faiga faalealofa, ma sa faamalosia le Au Paia e tuua le Itumalo o Jackson i Novema ma Tesema o le tausaga lena.

Vaai faalemafaufau pe faapei le lagona pe ana faapea [o oe] o se tasi o le Au Paia, o le sa faamoemoe mo le puipuiga a le Alii, ae sa faamalosia e tuua Siona.

3. E faavae i mea ua e aoaoina, tusi i lau api talaaga mo le suesueina o tusitusiga paia pe aisea na tauivi ai le Au Paia anamua e fausia le aai o Siona. O le a se mea e mafai ona e aoaoina mai i la latou aafiaga?

O le a le lumanai o Siona?

Pe sa e faamoemoe mo se, pe faatalitali foi mo se mea ia tupu ae sa le’i tupu? O a ni ou lagona na i ai?

Vaai faalemafaufau i le le fiafia ma le le mautonu na oo i le Au Paia anamua, ina ua faate’aina tagata o le Ekalesia mai le Itumalo o Jackson, Misuri. I Katelani, Ohaio, sa tusia ai e le Perofeta o Iosefa Samita se tusi i le Au Paia na faateaeseina a’o le’i leva ona latou sosola ese mai le Itumalo o Jackson. Sa ia tusia ai, “Ina ua matou faalogo i a outou mafatiaga, na fagua ai faanoanoaga uma o o matou loto; o se mea mamafatu ia i matou; ua le mafai ona taofiofi o matou loimata” (i le History of the Church, 1:454).

I lena lava tusi e tasi, na tusi ai e le Perofeta e uiga i lona fesili atu i le Alii pe aisea ua faatamaia ai faamoemoega o le Au Paia mo Siona: “Ou te iloa o Siona, i le aso tatau a le Alii, o le a toe faaolaina; ae e fia ni aso o le a feagai ai Siona ma lona faamamaina, tofotofoga, ma puapuaga, ae ua natia e le Alii mai i la’u vaai; ma ina ua ou fesili e uiga i lenei mataupu, sa faapea mai le siufofoga o le Alii: Ia filemu, ma iloa o au o le Atua! O i latou uma ua tigaina ona o lou igoa o le a nofotupu faatasi ma au, ma o le na te faamaumau lona ola ona o au o le a ia toe mauaina” (i le History of the Church, 1:453–54).

O le a le mea na ta’u mai e le Alii ia Iosefa Samita e fai, ina ua ia fesili atu i ai pe aisea na tatau ai ona toilalo le Au Paia i le fausiaina o Siona? Mafaufau pe mafai faapefea ona aoga le ala na tali mai ai le Alii i le fesili a le Perofeta, pe afai e le ogatasi mea o lou olaga ma ou faamoemoega po o mea sa e manatu e oo i ai.

Mulimuli ane, na tuuina mai ai e le Alii se isi faamalamalamaaga atili i le pogai na le manuia ai le taumafaiga a le Au Paia e fausia le aai o Siona. Faitau le Mataupu Faavae ma Feagaiga 105:5-6, 9-10, 23-24, ma vaavaai mo le mea na manaomia e le Alii mai Lona nuu ona faatoa mafai lea ona faavaeina Siona.

Mai le amataga o lenei lesona, o Siona ua faatatau lea i se nofoaga o le a fausia ai e le Au Paia se aai paia, o se Ierusalema Fou. Ae o le manatu faavae o Siona e aofia ai le sili atu nai lo o se nofoaga patino lea e mafai ona maua ai e le Au Paia le puipuiga. Atonu na manatu le Au Paia anamua, sa na o se nuu na tatau ona latou fausia, ae sa fuafuaina e le Alii e fausia ni tagata amiotonu faapea foi ma se nuu. O le “faleie” o le puipuiga o Siona, e mafai ona maua i soo se mea lava e i ai tagata e usiusitai i tulafono o le malo selesitila (tagai i le MF&F 105:5).

Atonu e te manatua mai lau suesuega o le Mataupu Faavae ma Feagaiga 97:21 e faapea, na faamalamalama mai e le Alii o Siona o e loto mama. Toe faamanatu mataupu faavae o le amiotonu ma poloaiga sa e lisiina i le amataga o le lesona lenei. Mafaufau pe faapefea ona fesoasoani nei mataupu faavae amiotonu i se nuu ina ia avea ai ma e loto mama.

Na faamalamalama mai e Elder David R. Stone o le Fitugafulu, le auala e mafai ona tatou fausia ai Siona i o tatou aso:

Po o fea lava tatou te i ai, po o fea foi le nuu tatou te nonofo ai, e mafai ona tatou fausia la tatou lava Siona e ala i mataupu faavae o le malo selesitila, ma taumafai pea ina ia avea ma e loto mama. O Siona o le matagofie, ma e umiaina e le Alii i Ona lava aao. E mafai ona avea o tatou aiga ma nofoaga o le sulufaiga ma se puipuiga, e pei foi ona i ai Siona.

“E le tatau ona avea i tatou o ni papeti i lima o tu ma aga o atunuu ma taimi. E mafai ona tatou lototetele ma e mafai ona [tatou] savavali i ala o le Alii, ma mulimuli i Ona tulaga aao. Ma a tatou faia lea mea, o le a ta’ua i tatou o Siona, ma o le a avea i tatou ma nuu o le Alii” (“Siona i le Totonugalemu o Papelonia,” Ensign po o le Liahona, Me 2006, 93).

4. I lau api talaaga mo le suesueina o tusitusiga paia, fai se aotelega o mea ua e aoaina i lenei lesona e uiga ia Siona. O le a lau matafaioi i le fausiaina o Siona i le mea o loo e nofo ai?

5. Mafaufau i mataupu faavae o le amiotonu na e lisiina i le amataga o le lesona. I lau api talaaga mo le suesueina o tusitusiga paia, tusi ai se sini o le a fesoasoani e te ola faamaoni ai i se tasi pe sili atu o ia mataupu faavae.

6. Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

   Ua ou suesueina le lesona o le Nofoaga Autu o Siona ma faamaeaina i le (aso).

   O fesili, mafaufauga ma manatu faaopoopo ou te fia faasoa atu i lo’u faiaoga: