Iunite 23: Aso 3

Mataupu Faavae ma Feagaiga 107:39–100; 108

Faatomuaga

O le vaega muamua o lenei lesona na aofia ai le Mataupu Faavae ma Feagaiga 107:39–100. E ui o le Mataupu Faavae ma Feagaiga 107 sa faamaumauina ia Aperila 1835, ae o le tele o anotusi i fuaiupu e 60–100 sa tuuina mai i le Perofeta o Iosefa Samita e ala i le faaaliga i le aso 11 o Novema, 1831. O fuaiupu o loo talanoaina i le lesona lenei o loo i ai fetalaiga a le Alii e uiga i faiga anamua o le tuuina atu o le Perisitua Mekisateko mai le tama i le atalii. O loo tuuina mai ai foi faatonuga e faatatau i tiute o taitai eseese o le perisitua. O lenei lesona o loo aofia ai foi le Mataupu Faavae ma Feagaiga 108, lea na tuuina mai ai e le Alii le fautuaga ma folafolaga ia Laimani Sherman.

Mataupu Faavae ma Feagaiga 107:39–100

Ua faaali mai e le Alii, o le Perisitua Mekisateko sa tuufaasolo i aso anamua mai le tama i le atalii

1. I lau api talaaga mo le suesueina o tusitusiga paia, tusi e uiga i nisi o tulaga o loo feagai nei ma oe, pe e le o toe mamao ae feagai [ma oe], lea e mafai ona e manuia ai i le mauaina o le taitaiga po o le faamafanafanaga mai lou Tama Faalelagi.

A o e suesueina le Mataupu Faavae ma Feagaiga 107:39–100, vaavaai mo upumoni e mafai ona fesoasoani e te maua ai le taitaiga ma le faamafanafanaga mai le Tama Faalelagi.

I le lesona talu ai na e aoaoina ai nisi o tiute o le Au Peresitene Sili, o le Korama a Aposetolo e Toasefululua, ma le Au Fitugafulu. Faitau le Mataupu Faavae ma Feagaiga 107:39, ma vaavaai mo se tasi o tiute o le Korama a Aposetolo e Toasefululua. O le faaupuga “faifeau evagelia” e faatatau ia i latou o e umia le tofi o le peteriaka o le Perisitua Mekisateko (tagai i le Taiala i Tusitusiga paia, Faievagelia,” scriptures.lds.org; Bible Dictionary, Evangelist”).

Faauma le faamatalaga lenei e faavae i luga o mea ua e aoaoina mai le fuaiupu e 39: O peteriaka ua valaauina e ala i le ma faauuina i lalo o le taitaiga a Aposetolo e Toasefululua.

O i latou o e umia le tofi o le peteriaka e tuuina atu faamanuiaga faapitoa, e ta’ua o faamanuiaga faapeteriaka, i tagata agavaa o le Ekalesia. O se faamanuiaga faapeteriaka e i ai fautuaga a le Alii mo se tagata ma tautino mai le gafa o lena tagata i le aiga o Isaraelu (tagai i le Faamaoni i le Faatuatua: O Se Tusitaiala o le Talalelei [2004], “Faamanuiaga Faapeteriaka,” 47-49).

A o suesue e tagata taitoatasi o latou faamanuiaga faapeteriaka, e mafai ona latou maua le taitaiga ma le faamafanafanaga mai le Tama Faalelagi. Afai e lei maua lou faamanuiaga faapeteriaka, mafaufau e talanoa i ou matua ma le epikopo po o le peresitene o le paranesi po o afea se taimi e sili ona talafeagai mo le mauaina o se faamanuiaga faapeteriaka, ma mea e tatau ona e faia e saunia ai mo lena aafiaga.

O le upu peteriaka e faatatau foi i tama. Ua aoao mai leMataupu Faavae ma Feagaiga 107:41–57 o Atamu sa avea ma se tama ma se peteriaka amiotonu. Vaavaai vave i fuaiupu 41–50, ma faailoa mai se mamanu—o ni mea se lua sa faia e Atamu a’o pulefaamalumalu i lona aiga.

Faailoaina o Mamanu

O mamanu i tusitusiga paia e mafai ona taialaina ai mea tatou te faia. Na aoao mai Elder David A. Bednar o le Korama a Aposetolo e Toasefululua, “O se mamanu o se ata faataatia lea, faataitaiga, po o se tulaga laugatasia e mafai ona faaaoga e fai ma taiala mo le faia o soo se mea. Ma e tumu tusitusiga paia i mamanu faaleagaga” (“O Se Faatanoa o le Vaiola” [Faeasiate a le Ofisa o Aoga a le Ekalesia mo talavou matutua, 2007], 4; si.lds.org). A o e suesue i tusitusiga paia, vaavaai mo mamanu e mafai ona tuuina mai le taitaiga mo lou olaga.

Faitau le Mataupu Faavae ma Feagaiga 107:53. I lenei fuaiupu tatou te faitau ai, sa faamanuiaina e Atamu ana fanau amiotonu uma.

2. Mai mea ua e aoaoina i le Mataupu Faavae ma Feagaiga 107:41–57, tali fesili nei i lau api talaaga mo le suesueina o tusitusiga paia:

   1. O a mea e lua sa faia pea lava pea e Atamu a o pulefaamalumalu ai i lona aiga?

   2. E mafai faapefea ona avea le faataitaiga a Atamu o se mamanu mo tamā uma?

O se tasi o upumoni e mafai ona tatou aoaoina mai i le Mataupu Faavae ma Feagaiga 107:53 e faapea, o tama o loo umia le Perisitua Mekisateko ua i ai le pule e faamanuia ai a latou fanau. E le gata i le faauuina o se atalii i le perisitua, e mafai foi e se tama ona tuu atu se faamanuiaga faaleperisitua i se atalii po o se afafine i taimi e ma‘i ai, po o le tuuina atu o le taiala ma faamafanafanaga.

E faaopoopo atu i le faamanuiaga o a latou fanau, o e umia le Perisitua Mekisateko e mafai ona tuuina atu faamanuiaga i isi tagata o le aiga ma isi e talosagaina ni [faamanuiaga]. Na faamalamalama mai e Peresitene Boyd K. Packer o le Korama a Aposetolo e Toasefululua: “O aiga e le o i ai le perisitua e tatau lava ona mataituina ma tautuaina e korama o le perisitua. O lenei faiga, o le a le tulai mai ai se manaomia o se faamanuiaga i soo se aiga o le Ekalesia” (“O Le Mana o le Perisitua,” Ensign po o le Liahona, Me 2010, 9).

3. I lau api talaaga mo le suesueina o tusitusiga paia, faamatala le auala ua faamanuiaina ai oe po o tagata e te iloa mai le mauaina o faamanuiaga faaleperisitua mai lou tama po o isi e umia le Perisitua Mekisateko. Afai e te le’i maua le avanoa e maua ai se faamanuiaga faaleperisitua, ia tusi e uiga i auala e mafai ona faamanuiaina ai oe mai le sailia o se faamanuiaga faapena.

Mafaufau i tua i le tulaga na e tusi e uiga i ai mo le galuega atofaina 1 o le lesona lenei. Ia manatua e mafai ona e sailia le taitaiga ma le faamafanafanaga mai le Tama Faalelagi e ala i faamanuiaga faapeteriaka, ma e ala i faamanuiaga faaleperisitua e tuuina atu e lou tama po o isi e umia le Perisitua Mekisateko.

I le Mataupu Faavae ma Feagaiga 107:58–98, tatou te faitau ai e uiga i tiute o taitai o perisitua eseese. A o e suesueina nei fuaiupu, mafaufau i auala e mafai ai e i latou o e faataunuuina nei tiute ona aumai faamanuiaga o le perisitua i olaga o isi.

Faitau le Mataupu Faavae ma Feagaiga 107:99–100, ma vaavaai mo faatonuga na tuuina mai e le Alii ia i latou o e umia le perisitua.

Na aoao mai Peresitene Thomas S. Monson: “O le perisitua e le faapea o se meaalofa ae o se poloaiga e auauna atu, o se avanoa e siitia ai, ma se avanoa e faamanuia ai olaga o isi” (“O Lo Tatou Faalagolagomaga Tele o le Perisitua Paia,” Ensign po o le Liahona, Me 2006, 57).

Mataupu Faavae ma Feagaiga 108

Ua tuuina mai e le Alii le fautuaga ma faamanuiaga ia Laimani Sherman

Mafaufau i se taimi ma e lagonaina ai le uunaia o oe e le Agaga e fai se mea ma sa e mulimuli ai i le uunaiga. O a faamanuiaga na e maua ina ua e usitai i uunaiga a le Agaga?

O Laimani Sherman o se tagata faamaoni o le Ekalesia o le sa auauna i le Tolauapiga a Siona, ma na valaauina e avea ma se tasi o Peresitene e toafitu o le Korama a Fitugafulu. Sa tusia e le Perofeta o Iosefa Samita i lana api o talaaga e faapea, i lena aso 26 o Tesema, 1835, “Na sau ai Uso Laimani Sherman i totonu, ma talosagaina ina ia maua mai se afioga a le Alii e ala mai ia te a’u; ‘ona, na ia fai mai ai, ‘na galueaina a’u e faailoa atu ia te oe o’u lagona ma manaoga, ma sa folafola mai e tatau ona ou maua se faaaliga lea e tatau ona faailoa mai ai lo’u tiute’” (i le History of the Church, 2:345).

Ina ua fai mai Laimani sa “galueaina” o ia e talanoa atu ia Iosefa Samita, o lona uiga na uunaia e le Agaga Paia.

O le tali atu i le talosaga a Laimani, na maua ai e Iosefa Samita le faaaliga ua faamaumauina i le Mataupu Faavae ma Feagaiga 108. Faitau le Mataupu Faavae ma Feagaiga 108:1, ma vaavaai mo faamanuiaga na tuuina mai e le Alii ia Laimani aua sa usitai o ia i le uunaiga e talanoa atu i le Perofeta.

E faavae i luga o le mea na faaali mai e le Alii ia Laimani Sherman, faauma le mataupu faavae lenei: A o tatou i le siufofoga o le Alii, tatou te valaaulia ai Lana faamagaloga.

4. Tali le fesili lenei i lau api talaaga mo le suesueina o tusitusiga paia: Aisea e te manatu ai, o le usitaia o uunaiga mai le Alii e valaaulia ai le faamagaloga?

E mafai ona faalogoina le siufofoga o le Alii e ala mai i tusitusiga paia, i saunoaga a Ana perofeta, ma uunaiga a le Agaga Paia. O le usitai i le Atua e aofia ai le faatumuina o lou olaga i gaoioiga amiotonu lea e aumaia ai le mana faaleagaga. O le usiusitai atoatoa e aumaia ai le mana atoa o le talalelei i lou olaga. O lenei usiusitai e aofia ai gaoioiga atonu e te le’i mafaufau muamua i ai o se vaega o le salamo, e pei o le auai i sauniga a le Ekalesia, totogiina o sefuluai, auauna atu ma le faamagalo atu i isi. Ua folafola mai le Alii, “O ia o lē e salamo ma faia poloaiga a le Alii o le a faamagaloina” (MF&F 1:32).

Faitau le Mataupu Faavae ma Feagaiga 108:2, ma vaavaai mo le fautuaga a le Alii ia Laimani Sherman ina ua uma ona ta’u mai ia te ia ua faamagaloina ana agasala.

O le a sou manatu i le uiga o le “ia tuu atu i lou agaga ia mapu e faatatau i lou tulaga faaleagaga” (MF&F 108:2)?

Ua tatou aoao mai le Mataupu Faavae ma Feagaiga 108:1–2 e faapea, o le faamagaloga a le Alii e aumaia ai le mapu i o tatou agaga.

O nisi taimi e tuufesili ai tagata ua salamo pe mata ua faamagaloina i latou i a latou agasala. I faamatalaga o loo i lalo, ia faailoga le fautuaga na tuuina mai ia i latou o e atonu o loo tauivi ia tuu atu i o latou agaga ia mapu.

Na aoao mai Peresitene Boyd K. Packer o le Korama a Aposetolo e Toasefululua:

“O lena taeao sili o le faamagaloga atonu e le vave oo mai. Aua le faavaivai pe afai sa e toilalo i le taimi muamua. E masani lava o le vaega sili ona faigata o le salamo o le faamagaloina lea o oe lava. O le lotovaivai o se vaega lea o le suega. Aua le faavaivai. O le a oo mai lena taeao matagofie.

“Ona toe oo mai ai lea i lou olaga ‘o le manuia foi mai le Atua, o loo silisili lava i mea uma e manatu i ai.’ [Filipi 4:7.] Ona, e pei ai lea o Ia, o le a le toe manatua lava au agasala. E faapefea ona e iloa? O le a e iloa lava! [Tagai i le Mosaea 4:1–3.]” (“O Le Taeao Pupula o le Faamagaloga,” Liahona, Ian. 1996, 24).

Na aoao mai Peresitene Harold B. Lee: “Afai e oo mai le taimi ua e faia ai mea uma e te mafaia e salamo ai i au agasala, po o ai lava oe, po o fea lava e te i ai, ma ua faia faasa’oga ma faaleleiga i le mea sili e te gafatia ai …, o le a e manao i lena tali mautinoa pe ua taliaina oe e le Alii pe leai. I lau sailiga loloto, afai e te saili atu ma e maua lena filemu o le mafaufau, o le faailoga lena e te iloa ai ua taliaina e le Alii lou salamo” (Stand Ye in Holy Places [1974], 185).

Suesue i le Mataupu Faavae ma Feagaiga 108:3, ma vaavaai mo fautuaga faaopoopo na tuuina mai e le Alii ia Laimani Sherman. (Atonu e fesoasoani le iloa o le upu tausiga i lenei fuaiupu, o lona uiga o le ola ai po o le usitai. O se tautoga o se folafolaga po o se feagaiga.)

O a ni auala e aoga ai lenei fautuaga o le, ia faaeteete atili i le tausiga o tautoga, i se tasi ua uma ona faamagaloina i agasala?

5. I lau api talaaga mo le suesueina o tusitusiga paia, faamalamalama ai pe mafai faapefea e upumoni ua e faailoaina mai i le Mataupu Faavae ma Feagaiga 108:1–3 ona faamalosiau i se uo po o se tagata o le aiga e usitai i le siufofoga o le Alii ma maua le faamagaloga.

Pe ua e faalogo i le faaupuga “faapotopotoga Paia”? Na faamalamalama mai e Elder David B. Haight o le Korama a Aposetolo e Toasefululua e faapea: “O se faapotopotoga paia, e pei ona faaigoa ai, o se sauniga paia lea, mamalu ma migao e potopoto faatasi ai le Au Paia i lalo o le taitaiga a le Au Peresitene Sili. O faapotopotoga paia e pei ona faaigoa ai, o se sauniga paia lea, mamalu ma migao e potopoto faatasi ai le Au Paia i lalo o le taitaiga a le Au Peresitene Sili” (“O Faapotopotoga Paia,” Liahona, Ian. 1995, 15).

Ia Tesema 1832, sa folafola mai ai e le Alii i le Au Paia, afai o le a latou fausia se malumalu ma faia ai se faapotopotoga paia, o le a Ia faaee mai faamanuiaga silisili i o latou luga (tagai i le MF&F 88:70–75, 117–19). Ia Tesema 1835, ina ua tuuina mai le faaaliga, ua faamaumauina i le Mataupu Faavae ma Feagaiga 108 ia Laimani Sherman, sa na o le toe tolu masina ona faapaiaina lea o le Malumalu o Katelani.

A o e faitauina le Mataupu Faavae ma Feagaiga 108:4–6, vaavaai mo mea na folafola mai e le Alii ia Laimani o le a ia maua i le faapotopotoga paia.

Ma le isi, faitau le Mataupu Faavae ma Feagaiga 108:7–8, ma vaavaai mo faatonuga na tuuina mai e le Alii ia Laimani. E mafai faapefea ona e faamalolosia isi “i au talanoaga uma” (MF&F 108:7)? Atonu e fesoasoani le iloa o apoapoaiga o fautuaga po o faamalosiauga e faia mea lelei.

6. Tali fesili nei i lau api talaaga mo le suesueina o tusitusiga paia:

   1. O a ni auala e te manatu e mafai ona fesoasoani ai faatonuga i le Mataupu Faavae ma Feagaiga 108:7–8 ia Laimani Sherman a o ia talaiina atu le talalelei i isi?

   2. E mafai faapefea ona e faaaogaina le fautuaga a le Alii i le fuaiupu e 7 i lou olaga?

7. Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

   Sa ou suesueina Mataupu Faavae ma Feagaiga 107:39–100; 108 ma faamaeaina lenei lesona i le (aso).

   O fesili, mafaufauga ma manatu faaopoopo ou te fia faasoa atu i lo’u faiaoga: