Iunite 24: Aso 4
Mataupu Faavae ma Feagaiga 112
Faatomuaga
I le aso 23 o Iulai, 1837, na maua ai e le Perofeta o Iosefa Samita le faaaliga i le Mataupu Faavae ma Feagaiga 112 e fai ma sui o Thomas B. Marsh, o le sa avea i lena taimi ma Peresitene o le Korama a Aposetolo e Toasefululua. I le faaaliga lenei na fautuaina ai Thomas Marsh e faatatau i ona lava tiutetauave ma i latou o le Korama a le Toasefululua.
Mataupu Faavae ma Feagaiga 112:1–13
Ua tuuina mai e le Alii fautuaga patino ma folafola mai faamanuiaga ia Thomas B. Marsh
Mafaufau i ni taimi sa e lagonaina ai le ita, le fiafia, tiga, po o le lotoleaga ona o se taunuuga o au fegalegaleaiga ma isi. Na feagai se Aposetolo anamua, o Thomas B. Marsh, ma se tulaga na ono taitai atu ai o ia i le mauaina o ni lagona faapena.
E lei leva ona valaauina o ia e avea ma se Aposetolo i le 1835, ae tofia Thomas B. Marsh e avea ma Peresitene o le Korama a Aposetolo e Toasefululua. I le tautotogo o le 1837, na iloa ai e Peresitene Marsh o se tasi o le au Aposetolo, o Pale P. Palate, sa fuafua e alu i se misiona i Egelani e aunoa ma le taitaiga a Peresitene Marsh. Sa tusi mai Peresitene Marsh, o le sa i Misuri, ia Elder Palate ma isi sui o le Toasefululua, ma valaaulia i latou ia latou feiloai i Katelani, Ohaio, i le aso 24 o Iulai, 1837, ina ia mafai ona latou autasi i a latou fuafuaga mo ni misiona. Ae peitai, i le masina a o lei faia lena fonotaga, na malaga ai isi sui e toalua o le korama o Heber C. Kimball ma Orson Hyde, i Egelani ina ua uma ona maua ni valaauga o misiona mai le Perofeta o Iosefa Samita. Sa le fiafia sa’o lava Peresitene Marsh ona sa o lava sui o le Toasefululua e talai atu le talalelei i Egelani, e aunoa ma le autasi o le korama ma e aunoa ma lona aofia ai.
I lenei tulaga, o le a se mea e mafai ona fai e Peresitene Marsh e aloese ai mai le lagonaina o le ita, le fiafia, tiga, po o le lotoleaga? O a nisi o tulaga matautia o le faatagaina o lagona faapena e pulea o tatou mafaufauga ma amioga?
Sa uunaia e Polika Iaga, o le sa avea ma se tasi o le Korama a Aposetolo e Toasefululua i le taimi lena, ia Peresitene Marsh e feiloai ma le Perofeta o Iosefa Samita. I le tali mai i atugaluga o Peresitene Marsh, na tuuina mai ai e le Alii le faaaliga ua faamaumauina i le Mataupu Faavae ma Feagaiga 112 i le Perofeta o Iosefa Samita.
Faitau le Mataupu Faavae ma Feagaiga 112:1–3, ma vaavaai mo lapataiga na tuuina mai e le Alii ia Thomas B. Marsh. A o e faitauina, atonu e fesoasoani le iloa o le upu faamaualaloina i le fuaiupu e 3 ua faailoa mai ai na faamaualaloina e Peresitene Marsh o ia lava. O a ni lapataiga na tuuina mai e le Alii ia te ia? O a ni mea lelei na fetalai mai le Alii na faia e Thomas?
I le Mataupu Faavae ma Feagaiga 112: 4–10, na tuuina mai ai e le Alii nisi fautuaga ia Thomas B. Marsh ma faamautinoa mai ia te ia, o le a ia ausia ni mea se tele faatasi ai ma le fesoasoani a le Alii.
-
Faitau le Mataupu Faavae ma Feagaiga 112:4–10. I lau api talaaga mo le suesueina o tusitusiga paia, lisi ai folafolaga na faia e le Alii ia Thomas B. Marsh. (I le fuaiupu e 5, o le upu finafinau e le faapea ia ita po o le faafinau; o lona uiga ia galue ma le filiga i le talaiga o le talalelei.)
Faauma le faamatalaga “afai-ona” e faavae i mea ua e aoaoina mai le Mataupu Faavae ma Feagaiga 112:10: Afai tatou te , ona … lea e le Alii . (Atonu e te manao e faailoga lenei mataupu faavae i au tusitusiga paia.)
-
-
Aisea e te manatu e fesoasoani ai le lotomaualalo ia i tatou e maua le taitaiga a le Alii?
-
O le a se taimi na e lagonaina ai le taialaina e le Alii ina ua uma ona e faalotomaualaloina oe lava?
-
Ina ua tuuina mai e le Alii lenei faaaliga ia Iulai 1837, sa i ai le Ekalesia i le le lotogatasi, finauga, ma le liliuese. O le faamaualuga ma le faaloloto na taitai atu ai nisi o tagata o le Ekalesia e faitio faaaliali i le Perofeta o Iosefa Samita ma fesiliga lana pule. O nei luitau sa i se isi itu o se taunuuga o faigata tautupe i totonu o le Au Paia i Katelani, Ohaio. Ona o le salalau tele o faafitauli o le tamaoaiga, lea na ta’ua mulimuli ane o le Atuatuvale o le 1837, sa tele ai faletupe na gau i le Iunaite Setete atoa. O le Sosaiete Saogalemu o Katelani, o se faalapotopotoga tautupe na faatuina e taitai o le Ekalesia, sa faapea foi ona gau ai i le 1837. E lua selau tagata fai saofaga na maumau ai le toetoe o a latou tupe uma na teu ai, ae o Iosefa Samita le tagata sa sili ona mafatia i le tele o tupe na gau ai. E ui lava ina sa le’i faatupeina e le Ekalesia le Sosaiete Saogalemu o Katelani, ae sa manatu i ai nisi o le Au Paia, o le faletupe a le Ekalesia po o le faletupe a le Perofeta, ma sa latou tuuaia Iosefa Samita mo a latou faafitauli tautupe. Sa oo lava foi ina amata valaau o ia e nisi o se perofeta e le taulia. Ae e toatele isi sa faaauau pea i le faatuatua ma tumau faamaoni i le Perofeta, e ui lava ina sa gau a latou tupe ona o le gau o le Sosaiete Saogalemu o Katelani. (Tagai i le Church History in the Fulness of Times Student Manual, 2nd ed. [Church Educational System manual, 2003], 171–73.)
O nisi o tagata o le Ekalesia, e aofia ai nisi o le Korama a Aposetolo e Toasefululua, sa oo lava ina taumafai e aveese Iosefa Samita mai le avea ma Peresitene o le Ekalesia.
Faitau le Mataupu Faavae ma Feagaiga 112:11–13, ma vaavaai mo le mea na faatonuina e le Alii ia Thomas B. Marsh e fai, e fesoasoani ai i isi tagata o le Korama a Aposetolo e Toasefululua o e sa i ai ni faafitauli.
Mataupu Faavae ma Feagaiga 112:14-34
Ua aoao e le Alii ia Thomas B. Marsh e faatatau i tiute o le au Aposetolo e Toasefululua
Sa i ai Peresitene Marsh i se tofiga taua ma sa tele ni tiutetauave na tuuina mai e le Alii ia te ia.
-
Sa fesoasoani le Alii ia Thomas B. Marsh ia iloa le taua o ona tiutetauave o se Peresitene o le Korama a Aposetolo e Toasefululua a o faaauau pea ona faamanatu mai ia te ia e lotomaualalo. Faatumu le siata lenei a o e suesueina le Mataupu Faavae ma Feagaiga 112:14–22, 28–33.
|
O fuaitau o loo faamamafa mai ai le taua o tiutetauave o Peresitene Marsh: | |
|
O fuaitau o loo faamanatu mai ai ia Thomas Marsh le manaomia ona lotomaualalo: |
-
-
E tusa ai ma fuaiupu e 16-17, o ki o le perisitua o loo umia e le Peresitene o le Korama a Aposetolo e Toasefululua? Faailoga i au tusitusiga paia le aoaoga faavae ua e iloa, ma tusi i lalo i lau api talaaga mo le suesueina o tusitusiga paia.
-
Tusi se mataupu faavae ua e aoaoina i fuaiupu e 30–32 e uiga i ki o le perisitua na umia e Peresitene Marsh.
-
Mafaufau e maka le aoaoga faavae lenei o loo maua i le Mataupu Faavae ma Feagaiga 112:30–32: Ua toefuatai mai ki o le perisitua mo le taimi mulimuli i le tisipenisione o le atoaga o taimi.
O le tisipenisione o se vaitaimi e faaali mai ai e le Alii Ana aoaoga faavae, sauniga, ma le perisitua. O se vaitaimi lea e i ai i le Alii e lē itiiti ifo ma le toatasi se auauna faamaoniaina i luga o le fogaeleele o lē e umia le perisitua paia ma o lē e i ai le tiute paia e tufa atu le talalelei ma faia sauniga o i ai. (Tagai i le Bible Dictionary, “Dispensations.”)
Mafaufau loloto i le fesili lenei: I le Mataupu Faavae ma Feagaiga 112:15, 30, o le a le fetalaiga a le Alii e uiga i le sootaga i le va o tiutetauave a Thomas Marsh i le avea ai o se Peresitene o le Korama a Aposetolo e Toasefululua ma tiutetauave o le Perofeta o Iosefa Samita?
Sa faafaigata ia Thomas B. Marsh ona mulimuli i le fautuaga na ia mauaina i le faaaliga lenei.
E lei leva ona tuuina mai le faaaliga i le Mataupu Faavae ma Feagaiga 112 ae ta’u atu e Thomas B. Marsh ia Vilate Kimball (le faletua o Heber C. Kimball) e faapea, o le a le manuia taumafaiga a Heber i lana misiona. O le mea moni sa manatu Peresitene Marsh, talu ai o le talaiina atu o le talalelei i atunuu e mamao sa fai ma ona tiutetauave, o lea o le a le mafai ai ona matala faitotoa o le galuega faafaifeautalai i Egelani seiiloga na te auina atu i ai se isi a le o lena o le alu foi i ai o ia lava.
Mafaufau pe faapefea ona faaalia i lenei mea na tupu le ono tauivi o Peresitene Marsh ia lotomaualalo.
Na faamalamalama mai e Peresitene Dieter F. Uchtdorf o le Au Peresitene Sili le auala e mafai ona tatou lotomaualalo atili ai ma aloese ai mai le faamaualuga:
“O le lotomaualalo e le faapea ua faatalitonuina i tatou lava tatou te lē aoga, leai se uiga, pe itiiti foi so tatou taua. E le faapea foi e faafitia ai pe taofia ai taleni ua tuuina mai ia i tatou e le Atua. Tatou te le mafaufau i le lotomaualalo e ala i lo tatou manatu faatauvaa ia i tatou lava; tatou te mafaufau i le lotomaualalo e ala i lo tatou lē manatu mo na o i tatou lava. E oo mai i lo tatou galulue ma se uiga o loo auauna atu i le Atua ma o tatou uso a tagata.
“O le lotomaualalo e taitaia lo tatou gauai ma le alofa i isi ma i faamoemoega o le Tama Faalelagi. E fai e le faamaualuga le faafeagai. E maua mai e le faamaualuga lona malosiaga mai vaieli loloto o le manatu faapito. O le taimi lava e taofia ai lo tatou faamemelo ia i tatou lava ma tuu atu i tatou lava i auaunaga, o le taimi foi lena e faaitiitia ai le faamaualuga ma amata ai ona mate atu” (O Le Faamaualuga ma le Perisitua,” Ensign po o le Liahona, Nov. 2010, 58).
-
Faitau le Mataupu Faavae ma Feagaiga 112:34, ma vaavaai mo le mea sa manaomia ona fai e Thomas Marsh ina ia maua ai nei faamanuiaga.
Faauma le mataupu faavae lenei: E tatau ona tatou ina ia maua ai faamanuiaga a le Alii.
O le tala lenei e aotele ai le liliu ese mulimuli ane o Thomas B. Marsh ma le toe foi mai i le Ekalesia:
Mo se taimi, sa mulimuli ai Peresitene Marsh i le fautuaga na ia mauaina. Sa ia galue e faamalosia le Ekalesia ma lagolago Iosefa Samita. Ae ui i lea, e lei umi ae toe foi i ona lagona o le faafinau e uiga i le ala na taitaia ai le Ekalesia. O nei lagona faatasi ai ma le popole i feteenaiga i le va o tagata le usiusitai ma le lotomalolosi o le Ekalesia ma o latou tuaoi i Misuri. Ia Setema 1838, a’o lofituina o ia i lenei agaga o le liliuese, sa faapea ona aafia ai lona toalua o Elisapeta i se feeseeseaiga. Sa malilie i laua ma se isi tamaitai, o ni tagata uma o le Ekalesia, e faafesuiai e le aunoa ia susu ina ia lava mo le faia o ni sisi, ae sa tuuaia Tuafafine Marsh i le solia o lana maliega e ala i le tuuina o se vaega o le susu lea sa sili ona tele ai le kulimi. Sa silia i le faatasi ona aumai le mataupu i luma o taitai o le Ekalesia. Sa oo lava ina aumai i luma o le Au Peresitene Sili. O taimi uma lava, sa tonu ai o Tuafafine Marsh na sese. Sa ita ma le faamalieina Peresitene Marsh i nei faaiuga (tagai i le George A. Smith, “Discourse,” Deseret News, Ape. 16, 1856, 44). E ui o lenei tulaga sa le’i taitaiina ai o ia e tuua le Ekalesia, ae sa tuufaatasi ai ma isi ona le fiafia. Sa faapea ona faateteleina lona faitio i isi taitai o le Ekalesia, ma iu ai ina liliuese e faasaga i le Au Paia. Sa ia ta’ua mulimuli ane, “Sa oo ina ou lotovale i le Perofeta … ma le amanaiaina ai mea uma sa sa’o, ma faaaluina ai lo’u taimi atoa i le vaavaai mo mea leaga” (“Remarks,” Deseret News, 16 Sete., 1857, 220).
O le sefuluvalu o tausaga talu ona ia tuua le Ekalesia, na tusia ai ma le faamaualalo e Thomas Marsh se tusi ia Heber C. Kimball, ma talosagaina se faamagaloga ma se faatagaga e toe auai ai i le Ekalesia. Sa ia faamatalaina le mea sa ia aoaoina e ala i ana mea sese: “Sa mafai lelei lava ona faaauau le galueag a le Alii e aunoa ma a’u, ma e leai ma se mea na aveesea mai ia te Ia e ala i lo’u aluese mai le vaegaau; Ae paga lea, i le tele o mea ua aveesea mai ia te a’u?!” (Tusi a Thomas B. Marsh ia Heber C. Kimball, 5 Me, 1857, Brigham Young Collection, Church History Library, e pei ona siiina mai i le Kay Darowski, “The Faith and Fall of Thomas Marsh,” Revelations in Context [Mat. 19, 2013]; history.lds.org).
-
-
Ua ou suesueina le Mataupu Faavae ma Feagaiga 112 ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu i lo’u faiaoga: