E Faafeiloai Atu le Mataupu Faavae ma Feagaiga ma le Talafaasolopito o le Ekalesia

O Le a le Mataupu Faavae ma Feagaiga?

O le Mataupu Faavae ma Feagaiga o se tusitusiga paia ma o loo i ai se tuufaatasiga o faaaliga paia ma folafolaga musuia e tuuina mai ai ni aoaoga i taitai o le Ekalesia, tagata o le Ekalesia, ma tagata o le lalolagi i o tatou aso. O faaaliga o onapo nei ma e tutu faatasi ma le Tusi Paia, o le Tusi a Mamona, ma le Penina Tau Tele o se tasi o tusi faavae e fa o Le Ekalesia a Iesu Keriso o le Au Paia o Aso e Gata Ai.

Na faamalamalama mai e Peresitene Iosefa Filitia Samita le taua o le Mataupu Faavae ma Feagaiga ia i tatou: “O lenei Mataupu Faavae ma Feagaiga o loo i ai le afioga a le Atua ia i latou e nonofo ai nei iinei. O la tatou tusi lea. E anaina e le Au Paia o Aso e Gata Ai. E sili atu le taua nai lo o auro, na saunoa le Perofeta [Iosefa Samita] e tatau ona tatou faatauaina e sili atu nai lo oa o le lalolagi atoa” (Doctrines of Salvation, tuufaatasia Bruce R. McConkie, 3 vols. [1954–56], 3:199).

Aisea e Taua ai le Suesueina o le Mataupu Faavae ma Feagaiga ma le Talafaasolopito o le Ekalesia ia te Au?

Na tuuina mai e le Alii o Iesu Keriso lava Ia se poloaiga ia i latou e mafai ona faaaogaina le Mataupu Faavae ma Feagaiga:

“Suesue i nei poloaiga, ona ua moni ma faamaoni i latou, ma o le a faataunuuina lava valoaga ma folafolaga uma ua i totonu o i latou.

“O le mea ua fai atu ai A’u o le Alii ua ‘Ou fai atu ai, ma ‘Ou te lē faatoese mai ai a’u lava ia; ma e ui ina mavae atu le lagi ma le lalolagi, e lē mavae atu lava la’u upu, ae o le a faataunuuina uma lava, pe i lo’u lava leo po o i le leo o a’u auauna, ua tutusa lava” (MF&F 1:37–38).

Na faamalamalama mai e Peresitene Gordon B. Hinckley:

“O le Mataupu Faavae ma Feagaiga e uiga ese lava mai ia tatou tusi o tusitusiga paia. O le tulafono faavae o le Ekalesia. E ui o le Mataupu Faavae ma Feagaiga o loo aofia ai tusitusiga ma faamatalaga o faapogai eseese, ae e muamua lava o se tusi o faaaliga na tuuina mai e ala mai i le Perofeta o lenei tisipenisione.

“Ua amataina nei faaaliga i se tautinoga mamana e uiga i faamoemoega atoatoa o le Atua i le toefuataiga o Lana galuega sili o aso e gata ai:

“’Faalogo maia, Outou e tagata o la’u ekalesia, ua fetalai mai ai le siufofoga o ia o lē o afio i luga, ma o lē o ona fofoga ua i luga o tagata uma; ioe, e moni Ou te fai atu: Faalogo mai ia outou e tagata mai mea mamao; ma outou o loo i luga o motu o le sami, faafofoga mai faatasi.

“’Aua e moni o le siufofoga o le Alii ua mo tagata uma, ma e leai se tasi e sao mai ai; ma e leai se mata o le a lē vaai, po o se taliga o le a lē faalogo, po o se loto o le a lē tuia.’ (MF&F 1:1–2.)

“Mai i lena la faatomuaga maoae, o loo faamatala mai ai se vaaiga faalemataupu loloto ofoofogia lena e sau mai le puna o upumoni e faavavau. O nisi o faaaliga, o ni faaaliga tuusao na tuuina mai e le Alii i Lana perofeta. O nisi faaaliga, o ni upu a Iosefa Samita na tusia pe sa tautalagia foi ina ua uunaiina ai o ia e le Agaga Paia. Ua i ai foi faatasi ma lana tala o mea na tutupu i tulaga eseese lava. O le tuufaatasia uma ai, ua maua ai se fuataga maoae o aoaoga faavae ma faiga masani a Le Ekalesia a Iesu Keriso o le Au Paia o Aso e Gata Ai. …

“O mataupu eseese o loo i ai i le tusi, e maoae lava. Ua aofia ai mataupu faavae ma aiaiga e faatatau i le auala e tatau ona pulea ai le Ekalesia. Ua faataatitia mai ai tulafono tulaga ese ma le matagofie o le soifua maloloina, faatasi ai ma folafolaga faaletino ma faaleagaga. O loo faamatala mai ai le feagaiga o le perisitua e faavavau i se auala e le o maua lava i se isi mea o tusitusiga paia. O faamanuiaga ma manuia—ma tapulaa ma avanoa—o tikeri e tolu o le mamalu ua fofogaina mai, e faavae i le faamatalaga puupuu a Paulo e uiga i se mamalu o le la, ma le masina, ma fetu. O loo folafola mai ai le salamo i le gagana manino ma le faatauanau. Ua tuuina mai ai le faiga sa‘o o le papatisoga. O le natura o le aiga Atua, lea sa faigata ona malamalama i ai le au failotu mo le tele o seneturi, o loo faamatalaina mai i se gagana e malamalama ai tagata uma. O loo ta’u mai ai le tulafono a le Alii mo mea tau tupe, o loo faatonu mai ai le ala e maua mai ai ma vaevaeina ai tupe mo le faagaoioia o le Ekalesia. Ua faaalia mai le galuega mo e ua maliliu e faamanuia ai atalii ma afafine o le Atua i augatupulaga uma” (“O Le Faatulagaga ma le Finagalo o le Atua,” Ensign, Jan. 1989, 2, 4).

A o e suesue i le Mataupu Faavae ma Feagaiga, e mafai ona e masani atili i le siufofoga o Iesu Keriso (tagai i le MF&F 18:33–36) ma le fesootaiga mai le Agaga Paia (tagai i le MF&F 8:2-3).

E Faatatau i le Mataupu Faavae ma Feagaiga

O le Mataupu Faavae ma Feagaiga ua faia mai i ni vaega e 138 ma ni folafolaga aloaia se lua. O le tele o nei faaaliga sa lomia muamua i le 1833 i se tusi o le Tusi o Poloaiga. I lalo o le taitaiga a le Au Peresitene Sili, i lomiga na sosoo mai ai o le Mataupu Faavae ma Feagaiga, ua faaopoopoina i ai isi faaaliga faaopoopo po o isi mataupu ua faamaumauina, ina ua maea ona tuuina atu i le, ma taliaina e tagata o le Ekalesia i taimi o konafesi a le Ekalesia.

O le lomiga i le 1876, sa saunia e Elder Orson Pratt i lalo o le taitaiga a Peresitene Polika Iaga, na faatulagaina ai faaaliga i le faasologa o taimi [na maua ai] ma tuuina i ai ni ulutala fou ma ni faatomuaga tuai.

I le lomiga i le 1981 o le Mataupu Faavae ma Feagaiga, sa faaaofia ai mo le taimi muamua lava, ni faamatalaga aloaia se tolu. O nei mea o le vaega 137 ma 138, ua faataatitia mai ai itu taua o le faaolataga mo e ua maliliu, ma le Folafolaga Aloaia 2.

O le lomiga i le 2013 o le Mataupu Faavae ma Feagaiga o loo aofia ai le toe iloiloina o fesoasoaniga mo suesuega, ata fou, faafanua ua faafouina, ma suiga i faatomuaga o vaega. O fetuunaiga laiti i faatomuaga ua faamoemoe e tuuina atu ai se talaaga manino atu ma sili ona sa’o mo tusitusiga paia.

Galuega Faatino o Pepa a Iosefa Samita [Joseph Smith Papers Project]

O le tele o faamatalaga faasolopito i lenei tusi lesona sa aumaia mai le History of the Church ma le Galuega Faatino o Pepa a Iosefa Samita. Sa faapitoa le fesoasoani a voluma 1 ma le 2 o faasologa o Pepa o Faamatalaga o The Joseph Smith Papers, ua lolomiina e le Church Historian’s Press (o se faailoga o le Matagaluega o Talafaasolopito a le Ekalesia o Le Ekalesia a Iesu Keriso o le Au Paia o Aso e Gata Ai). Ina ia maimoa i ata faafuainumera ma faitau i tusiga o uluai pepa o faamatalaga i le Galuega Faatino o Pepa a Iosefa Samita [Joseph Smith Papers Project], asiasi i le josephsmithpapers.org.