Mataupu Faavae ma Feagaiga 69–71

Faatomuaga

I le faaiuga o Oketopa po o le amataga o Novema 1831, na maua ai e Oliva Kaotui se tofiga e aveina atu le tusiga mo le Tusi o Poloaiga mai Ohaio i Misuri. I Misuri, o le a mafai ai e William W. Phelps ona lolomi le tusi i lana falelomitusi. I le aso 11 o Novema, 1831, na tofia ai e le Alii ia Ioane Uitimera e avea ma soa malaga a Oliva ma poloaiina o ia e faaauau pea i ona tiute o se tusitalafaasolopito o le Ekalesia (tagai i le MF&F 69). O le aso na sosoo ai, na tofia ai e le Alii ni alii se toaono e avea ma ni tausimea i faaaliga (tagai i le MF&F 70). Ia Tesema 1831, na poloaiina ai e le Alii ia le Perofeta o Iosefa Samita ma Sini Rikitone e auauna atu i se misiona e aveese ai lagona le lelei e faasaga i le Ekalesia, ma saunia le ala mo faaaliga ma poloaiga ia na tatau ona lolomiina (tagai i le MF&F 71).

Mataupu Faavae ma Feagaiga 69

Na faaali mai e le Alii le taua o le tausia o talafaasolopito

Pe na i ai se tasi na faatuatuaina oe e tausia se mea taua? O le a lea mea taua? Na faapefea e lena faatuatuaga ona uunaia oe e tausia lena mea taua?

Faitau le folasaga o le vaega o le Mataupu Faavae ma Feagaiga 69, ma faailoga le mea na tuuina atu ia Oliva le tausiga.

Afai na tuuina atu nei aitema taua ia te oe, e faapefea ona e tausia ia mea?

Faitau le Mataupu Faavae ma Feagaiga 69:1–2, ma sue le fautuaga na tuuina mai e le Alii e faatatau i nei aitema taua.

Aisea e te manatu ai, o se mea atamai le tuuina atu i ni tagata e sili atu ma le toatasi e tausia nei aitema taua?

Na faatuatuaina e le Alii ia Ioane Uitimera i se isi tiutetauave taua, e faaopoopo atu i le fesoasoani ia Oliva Kaotui i le aveina atu o faaaliga ma tupe i Misuri. Faitau le Mataupu Faavae ma Feagaiga 69:3–8, ma vaavaai mo le isi tiute na totofi atu e le Alii ia Ioane Uitimera. Atonu e te manao e faailoga mea e te maua.

Toe iloilo mea o loo aoao mai i le Mataupu Faavae ma Feagaiga 47 e uiga i le tofiaina o Ioane Uitimera e avea o se tusitalafaasolopito ma se tusitalafaamaumau o le Ekalesia.

Tali fesili nei i lau api talaaga mo le suesueina o tusitusiga paia:
1. E tusa ai ma le Mataupu Faavae ma Feagaiga 69:8, aisea na taua ai mo Ioane Uitimera ona tausia se talafaasolopito o le Ekalesia?
2. Aisea o le a avea ai nei mea ma ni mafuaaga lelei mo oe e tausia ai se talafaasolopito faaletagata lava ia?

Mafaufau e tusi le mataupu faavae lenei i le laina o au tusitusiga paia: Ua faamoemoe le Alii ia tausia ni talafaasolopito mo le manuia o le Ekalesia ma le tupulaga faia‘e.

Tali fesili nei i lau api talaaga mo le suesueina o tusitusiga paia:
1. I lou lava manatu, e faapefea ona aoga i le Ekalesia le tausia o talafaasolopito a le Ekalesia ma talafaasolopito faaletagata lava ia?
2. E ono mafai faapefea ona aoga i le tupulaga faia‘e?
Fai se tasi po o gaoioiga uma nei, ona tusi lea o se otootoga o lou aafiaga i lau api talaaga mo le suesueina o tusitusiga paia:
1. Mafaufau e uiga i se tala mai le talafaasolopito o le Ekalesia po o le talafaasolopito o lou aiga, sa i ai se auala na fesoasoani ai ia te oe. Faasoa atu lenei tala i se tasi o le aiga po o se uo.
2. Fai atu i se tagata o le aiga e faamatala atu ia te oe se talaaga o le aiga na aoga ia te ia.

Mataupu Faavae ma Feagaiga 70:1–4

Ua tofia e le Faaola ni tausimea e tausia Ana faaaliga

Na tusia foi e le Perofeta o Iosefa Samita se talaaga faaletagata lava ia. Faitau le folasaga o le vaega mo le Mataupu Faavae ma Feagaiga 70, ma faailoga le mea o loo ta’u mai i le talafaasolopito a Iosefa Samita e uiga i le Mataupu Faavae ma Feagaiga.

kopi o le Mataupu Faavae ma Feagaiga i gagana e tele

Tali fesili nei i lau api talaaga mo le suesueina o tusitusiga paia:
1. O a ni isi o auala e aoga ai le Mataupu Faavae ma Feagaiga i le lalolagi?
2. O faapefea ona aoga le Mataupu Faavae ma Feagaiga ia te oe?

Faitau le Mataupu Faavae ma Feagaiga 70:1, ma faailoa mai igoa e ono o loo ta‘ua ai. Ona faitau lea o le Mataupu Faavae ma Feagaiga 70:2–4, ma vaavaai mo le tiutetauave na tuuina mai e le Alii i nei alii e toaono.

O le a sou manatu i le uiga o le faaupuga “o le a ou manaomia mai ia te i latou se tala o lenei mea-tausi” (MF&F 70:4)? E ui o tiutetauave ua tuuina mai e le Alii ia i tatou atonu e le tutusa ma ituaiga tausimea e pei o nei alii, ae o le a le mea o loo fautua mai e lenei mataupu faavae, e uiga i le mea o le a manaomia mai e le Alii ia i tatou i le aso o le faamasinoga?

Mai mea ua e aoaoina i nei fuaiupu, faatumu le avanoa e faauma ai le mataupu faavae lenei: O le a faamasinoina i tatou e le Alii mo tiute ua Ia tuuina mai ia i tatou.

Tali fesili nei i lau api talaaga mo le suesueina o tusitusiga paia:
1. E mafai faapefea e lenei mataupu faavae ona faatosinaina le auala tatou te tali atu ai i valaauga ma tofiga o le Ekalesia?
2. O a ni isi o ou tiutetauave o le a faamasinoina ai oe e le Alii?

Mataupu Faavae ma Feagaiga 70:5-18

Ua faamalamalama mai e le Alii le auala e taulima ai manaoga faaletino o i latou e galulue i auaunaga tumau a le Ekalesia

O leMataupu Faavae ma Feagaiga 70:5–18 o loo aoao mai ai, o alii o e na tuu i ai le faatuatuaga e avea ma tausimea i faaaliga ma poloaiga, na tatau ona latou faia le lolomiina ma le tufatufaina o lomiga a le Ekalesia ma a latou galuega. I o tatou aso, o le Au Pulega Aoao o le Ekalesia ua taatia ese a latou galuega ina ia auauna atu tumau, o lea latou te maua ai se alauni talafeagai e ola ai—e lava mo le tausiga o i latou lava ma o latou aiga

Aisea e talafeagai ai mo taitai o le Ekalesia o e ua valaauina e auauna atu tumau ona maua se taui mo mea latou te manaomia?

Mataupu Faavae ma Feagaiga 71

Ua aoao e le Alii le Perofeta o Iosefa Samita ma Sini Rikitone i le ala e tali atu ai i le au faitio o le Ekalesia

Pe ua e faalogo i ni faitioga e uiga i le Ekalesia? O a ni auala talafeagai e tali atu ai i faitioga o le Ekalesia?

Ina ia fesoasoani ia e malamalama i le talaaga o le faaaliga ua faamaumauina i le Mataupu Faavae ma Feagaiga 71, faitau le palakalafa lenei. A o e faitauina, vaavaai mo auala na faitioina ai le Ekalesia ma ona taitai i le taimi na tuuina mai ai le faaaliga lenei.

O Ezra Booth o se faifeau Metotisi o le sa auai i le Ekalesia ina ua mavae lona molimauina o se faamalologa. Sa malaga atu o ia o se faifeautalai i Misuri, ae sa le fiafia o ia ina ua le mafai ona ia faia ni vavega e faatalitonu ai isi e uiga i le upumoni. E le gata i lea, sa le talitonu Uso Booth sa talafeagai amioga a Iosefa Samita mo se perofeta po o se taitai faaleagaga. Sa iu ina matuai faitio lava o ia i le Perofeta o Iosefa Samita, ma tusia ai ni tusi se iva e faitioina ai le Ekalesia ma ona taitai. O nei tusi, sa lomiaina i se nusipepa sa ta’ua o le Ohio Star, na taitaiina ai nisi o tagata e faatupu ni lagona le lelei agai i le Ekalesia ma ona taitai. Na faamaumauina e le Perofeta o Iosefa Samita e faapea, o tusitusiga a Ezra Booth sa “o se faasologa o tusi, lea, e ala i o latou taumafaiga pitotasi, taufaasese, ma le aoga e faatoilalo le galuega a le Alii, ae ua aliali ai le vaivai, amioleaga ma le faavalevalea o [Ezra Booth], ma tuua ai se maafaamanatu o lona lava maasiasi, mo le lalolagi e mafaufau i ai” (i le History of the Church, 1:216–17).

O Symonds Ryder, o le isi tagata liliuese o le Ekalesia, na ia tuuina atu kopi o nisi o faaaliga i se isi nusipepa, i se taumafaiga e faalotovaivai tagata mai le auai i le Ekalesia. O le vevesi na faatupuina e Ezra Booth ma Symonds Ryder na iu ina avea o se faafitauli ogaoga.

Faitau le Mataupu Faavae ma Feagaiga 71:1–4, ma vaavaai mo le mea na ta’u mai e le Alii i le Perofeta o Iosefa Samita ma Sini Rikitone e fai, e faatoamalie ai lagona le lelei lea na tulai mai i tusiga a le nusipepa.

Ia matau, i le fuaiupu e 1 o le ala na tatau ai ia Iosefa ma Sini ona folafola atu le talalelei. O le a le mataupu faavae e mafai ona tatou aoaoina mai i lenei aoaoga e uiga i le auala e tali atu ai i le faitioina o le Ekalesia?

Tali le fesili lenei i lau api talaaga mo le suesueina o tusitusiga paia: O le a se mea e mafai ona e faia i le taimi nei, e saunia ai e tali atu i faitioga e faasaga i le Ekalesia po o ona taitai?

Atonu e te manao e tusi le mataupu faavae lenei i le laina o au tusitusiga paia i autafa o le Mataupu Faavae ma Feagaiga 71:1: A faitioina e tagata le Ekalesia, e mafai ona tatou tali atu i le faasoa atu o upumoni mai tusitusiga paia ma mulimuli i le taitaiga a le Agaga.

Na faamalamalama mai e Elder Robert D. Hales o le Korama a Aposetolo e Toasefululua, le auala e mafai ona fesoasoani mai ai le Agaga ia i tatou e tali atu i faitioga e faasaga i le Ekalesia: “A tatou tali atu i isi, o le a eseese uma lava tulaga. O le mea e lelei ai, ua silafia e le Alii loto o e tuuaia i tatou, ma le ala e mafai ona tatou tali lelei atu ai ia te i latou. A o saili e soo moni le taitaiga mai le Agaga, latou te mauaina musumusuga e talafeagai lelei ma mea taitasi latou te feagai. Ma o mea uma lava tou te fetaiai, o soo moni e tali atu i auala e valaaulia ai le Agaga o le Alii” (“Lototele Faakerisiano: O Le Tulaga Manaomia o se Soo“ Ensign po o le Liahona, Nov. 2008, 73).

Faitau le Mataupu Faavae ma Feagaiga 71:5–11, ma vaavaai mo le fautuaga ma le faamafanafanaga na tuuina mai e le Alii i le Perofeta o Iosefa Samita ma Sini Rikitone a o la’ua tali atu i faitioga e faasaga i le Ekalesia. Ia vaavaai foi mo folafolaga na tuuina mai e le Alii ia i laua i fuaiupu e 7 ma le 10.

Ia matau, o lenei faaaliga na faatonuina ai ni taitai se toalua o le Ekalesia—o le Perofeta o Iosefa Samita ma Sini Rikitone—e feiloai ma i latou o e na osofaia le Ekalesia i nofoaga faitele ma i nofoaga e lē faalauaiteleina, ma ia saili e faatoilalo na tagata i pepelo na latou faasalalauina. O le mea e masani ai, o le tiute lenei o taitai o le Ekalesia, seiiloga e faatonu pe tofia e taitai perisitua isi latou te faia. Ae peitai, e tatau ona saunia le autalavou o le Ekalesia e tali atu i mea sese e uiga i le Ekalesia i le auala na ta’ua i luga e Elder Hales.

Na tuuina mai foi e Elder Hales le fautuaga e uiga i o tatou uiga faaalia ia i latou o e faitio i le Ekalesia po o ona taitai: “I le avea ai ma soo moni, e tatau ona avea ma o tatou popolega aupito taua le soifua sololelei o isi, ae le o le sa’o o le tagata lava ia. O fesili ma faitioga tatou te maua ai se avanoa e aapa atu ai i isi, ma faaali atu ai e taua i latou i lo tatou Tama Faalelagi ma i tatou. O lo tatou faamoemoe o le fesoasoani lea ia latou malamalama i le upumoni, ae le o le taupunipuni o o tatou manatu po o le tau faamaonia e sa’o o tatou manatu ae sese isi i se felafolafoaiga faatofamanino. O a tatou molimau mai le taele o o tatou loto, o le tali aupito mamana lena e mafai ona tatou tuuina atu i e tuuaifuaina i tatou. Ma o na ituaiga molimau e na o le alofa ma le agamalu e mafai ona tuuina atu ai,” (“Christian Courage,” 73–74).ge,” 73–74).

Na usitai Sini Rikitone i le fautuaga a le Alii ma valaaulina Ezra Booth e faatasi ma ia i le taulaga o Ravenna, Ohaio, lea o le a latou talanoaina faalauaitele ai tusi na auina atu e Ezra i le nusipepa. Sa luiina foi e Sini ia Symonds Ryder i se talanoaga lautele e uiga i le Tusi a Mamona. Sa teena e nei alii uma ia valaaulia. Sa molimau pea Sini e uiga i le upumoni i Ravenna ma isi nofoaga.

Tali fesili nei i lau api talaaga mo le suesueina o tusitusiga paia:
1. E mafai faapefea e aoaoga o loo i le Mataupu Faavae ma Feagaiga 71:8–9 ona avea ma faamafanafanaga ia i latou o e tali atu i faitioga e faasaga i le Ekalesia?
2. E tusa ai ma le fuaiupu e 10, aisea e le tatau ai ona tatou soona popole pe a faitio tagata e uiga i le Ekalesia?

Mafaufau i mea o le a e faia e saunia lelei ai oe lava e tali atu i faitioga e faasaga i le Ekalesia.

Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le Mataupu Faavae ma Feagaiga 69–71 ma faamaeaina lenei lesona i le (aso).

O fesili, mafaufauga ma manatu faaopoopo ou te fia faasoa atu i lo’u faiaoga: