Mataupu Faavae ma Feagaiga 124:84–145; 125–26

Faatomuaga

O leMataupu Faavae ma Feagaiga 124:84–145, na maua i le aso 19 o Ianuari, 1841, o loo i ai le fautuaga a le Alii i tagata taitoatasi o le Ekalesia. Sa Ia fofogaina mai ai i latou o e e tatau ona galulue i tulaga eseese faaletaitai perisitua. Ia Mati 1841, na maua ai e le Perofeta o Iosefa Samita le faaaliga o loo i ai i le Mataupu Faavae ma Feagaiga 125, lea na faaali mai ai e le Alii Lona finagalo e faatatau i le faapotopotoina o le Au Paia i le Teritori o Aioua. I le aso 9 o Iulai, 1841, na maua ai e le Perofeta le faaaliga o loo i ai i le Mataupu Faavae ma Feagaiga 126, lea na fetalai mai ai le Alii ia Polika Iaga o le a le toe manaomia ona tuua e ia lona aiga ina ia auauna atu i ni misiona.

Mataupu Faavae ma Feagaiga 124:84–122

Ua tuuina mai e le Alii ia fautuaga i tagata taitoatasi patino

Mafaufau i se taimi na e maua ai se fautuaga mai se tasi sa manao e fesoasoani ia te oe. Pe sa e mulimuli i lena fautuaga? Aisea pe aisea na leai ai?

I le Mataupu Faavae ma Feagaiga 124:84–118, na tuuina mai ai e le Alii ni fautuaga taitoatasi i ni tagata faapitoa o le Ekalesia, afai e mulimuli ai, ua folafola mai ai faamanuiaga silisili. Faitau ia fuaitau nei, ma vaavaai mo se tulaga tutusa i le fautuaga na tuuina mai i nei tagata taitoatasi. (Atonu e aoga le iloa o le fautuaga e faatatau i le taitaiga, faatonuga po o le aoaoga. (Atonu e te manao e faailoga le fautuaga e tali tutusa.)

Fuaiupu 89–90 (William Law)
Fuaiupu 94–96 (Ailama Samita)
Fuaiupu 111–14 (Amosa Davies)
Fuaiupu 115–18 (Robert Foster)

Toe iloilo fuaiupu na e faitauina, ma vaavaai mo faamanuiaga na folafola mai e le Alii pe afai e mulimuli nei alii i le fautuaga sa Ia tuuina mai ia te i latou. I le avanoa ua saunia, lisi ai faamanuiaga na folafola mai e le Alii ia i latou:

O le mataupu faavae e tasi tatou te aoaoina mai i nei fuaiupu e faatatau i fanau uma a le Atua o le afai tatou te faalogo i fautuaga a perofeta, o le a lelei ia i tatou.

Tali fesili nei i lau api talaaga mo le suesueina o tusitusiga paia:
1. O a ni fautuaga patino ua tuuina mai e le Peresitene o le Ekalesia i tausaga talu ai nei?
2. O le a se taimi na faamanuiaina ai oe e ala i le gauai atu i le fautuaga a perofeta?

Faitau le Mataupu Faavae ma Feagaiga 124:84, ma vaavaai mo le mea na fetalai mai le Alii sa faia e se tagata o le Ekalesia e igoa ia Almon Babbit nai lo le mulimuli i fautuaga a le au Peresitene o le Ekalesia. Atonu e fesoasoani le iloa, “o se tamai povi auro” e faasino i le tupua po o le atua sese sa faia e Arona mo le fanauga a Isaraelu a o i ai le perofeta o Mose i luga o le Mauga o Sinai (tagai i le Esoto 32). O se faatusa o mea faalelalolagi e mafai ona fai ma faalavelave ma taofia ai i tatou mai le mauaina o faamanuiaga faaleagaga.

E tusa ai ma le fuaiupu e 84, o le “tamai povi auro” a Almon Babbitt o lona tausili lea e fai lana lava fautuaga nai lo le fautuaga a le Au Peresitene Sili.

Faitau i le lapataiga a Peresitene Spencer W. Kimball e uiga i le tele o atua sese o loo tapuai i ai tagata i aso nei, ma mafaufau pe ono mafai faapefea e nei tupua faaneionapo ona suitulaga i le fautuaga lenei a perofeta soifua:

“O tupu faaonapo nei po o atua sese ua mafai ona foliga mai i lavalava, fale, pisinisi, masini, taavale, vaa e tafafao ai, atoa ma isi lava mea e tele e mafai ona punitia ai le ala e tau atu i le tulaga faale-Atua. O le a le eseesega o i ai pe afai o le aitema na faatatau i ai e le mamanuina e pei o se tupua? …

“O mea e leai ni tino e pei lava foi o ni atua ua saunia. O tikeri ma mataitusi ma faalagiga e mafai ona avea ma tupua. … O le tikeri i le [kolisi], ma le tamaoaiga ma le saogalemu lea e maua mai ai, e foliga mai e ese le moomia ua faapea ona faalona lua i ai le [auauna atu i se] misiona. O nisi ua faatamala i auaunaga i le Ekalesia i o latou tausaga [aooga] i kolisi, ua manatu e ave le faamuamua i aoaoga faalelalolagi ma ua le amanaia ai feagaiga faaleagaga na latou osia. …

“O le toatele ua tapuai i tuligamanu, malaga mo se fagotaga, o faigamalologa, o tafaoga ma evaga i faaiuga o vaiaso. O isi ua avea ai ma a latou tupua ia taaloga, pesipolo, lakapi, fetauiga a pulu, po o le tapolo. O nei taumafaiga e tele atu taimi e faalavelave ai nai lo le le faalavelave i tapuaiga i le Alii ma le tuuina atu o auaunaga i le fausiaina o le malo o le Atua. Ia i latou e auai ai, o lenei faamamafa e ono foliga mai e le matuia, ae ua ta‘u mai ai lea mea o loo i ai lo latou tautua faamaoni ma le tuuto.

“Ma o le isi lava mea e tapuai i ai tagata o le pule ma le mamalu. O le toatele o le a soli i vae mea faaleagaga ma e masani lava o tulaga faatauaina, a’o latou feaei i le manuia. O nei atua o le pule, tamaoaiga, ma faatosinaga e sili atu ona manaomia tele, ma e fai lava foi si mo’i e pei o tamai povi auro a le fanauga a Isaraelu i le vao” (The Miracle of Forgiveness [1969], 40–42).

Tali le fesili lenei i lau api talaaga mo le suesueina o tusitusiga paia: O a nisi o auala e ono tuu faamuamua ai e tagata a latou lava fautuaga nai lo o fautuaga ua tuuina mai e le Alii ia i tatou i aso nei e ala mai i Ana perofeta?

Ia manatua, e mafai ona e to’a i le mulimuli ai i fautuaga ma aoaoga a perofeta aua latou te fofogaina mai afioga a le Alii (tagai i le MF&F 1:38).

O leMataupu Faavae ma Feagaiga 124:119–22 o loo i ai faatonuga i le Ekalesia e faatatau i le fausiaina o le Maota i Navu, lea o le a avea o se faletalimalo a le Ekalesia.

Mataupu Faavae ma Feagaiga 124:123-45

Ua faailoa mai e le Alii suafa o i latou o e e tatau ona auauna atu i tulaga tofi eseese faaletaitai perisitua

Lisi nisi o tofiga faaletaitai perisitua i le Ekalesia:

I le Mataupu Faavae ma Feagaiga 124:123–45, na fofoga faapitoa mai ai e le Alii ia suafa o tagata e auauna atu i tulaga tofi eseese faaletaitai perisitua. Faitau fuaiupu e 123–42, ma vaavaai mo tofiga faaletaitai perisitua na ta’ua e le Alii. Faaopoopo i ai soo se tofiga e le’i i ai i lau lisi.

Faitau le Mataupu Faavae ma Feagaiga 124:143, ma vaavaai mo le mafuaaga e valaau ai e le Alii taitai perisitua ma tuuina mai ki o le perisitua.

Tatou te aoaoina le upumoni lenei i le fuaiupu lenei: E valaau e le Alii ia taitai perisitua e taitaia le galuega o le auaunaga ma fesoasoani e faaatoatoa le Au Paia. (O le galuega o le auaunaga ma le faaatoatoaina o le Au Paia, e faatatau i le galuega o le fesoasoani i fanau uma a le Tama Faalelagi ia faalatalata atili atu ia te Ia ma toe foi atu ma le agavaa i Lona afioaga.) Mafaufau e faailoga upu po o fasifuaitau o loo aoao mai ai lenei upumoni i au tusitusiga paia.

I lau api talaaga mo le suesueina o tusitusiga paia, tusi e uiga i ni auala se tasi pe lua na fesoasoani ai ou taitai perisitua ia te oe e faalatalata atili atu i lou Tama Faalelagi.

Mataupu Faavae ma Feagaiga 125

Ua faatonu e le Alii le Au Paia e faapotopoto i nofoaga e tofia e Ia

Ina ua mavae ona tutuliese mai le Au Paia mai Misuri i le taumalulu o le 1838–39, sa latou agai atu i Ilinoi ma Aioua, lea na latou nonofo ai i itu uma e lua o le Vaitafe o Misisipi. O le faaaliga o loo i ai i le Mataupu Faavae ma Feagaiga 125 na maua mai ia Mati 1841 ma ua faaali mai ai le finagalo o le Alii e faatatau i le Au Paia i le Teritori o Aioua. A o e faitau i le Mataupu Faavae ma Feagaiga 125, vaavaai mo faatonuga na tuuina mai e le Alii i nei Au Paia.

Mataupu Faavae ma Feagaiga 126

Ua le toe manaomia ona tuua e Polika Iaga lona aiga ina ia auauna atu i ni misiona faaopoopo

Vaai faalemafaufau pe o le a faapei le tuua o lou aiga ina ia auauna atu i ni misiona mo le Alii i taumafanafana e lima o le a sosoo mai ona toe valaauina lea e auauna atu i se misiona i se atunuu ese mo le toeitiiti atoa le lua o tausaga. O le a sou lagona e uiga i le tuua o lou aiga i le tele o taimi? O a ni ou lagona e uiga i ai pe afai sa e nafa ma manaoga o lou aiga?

Ina ua auai Polika Iaga i le Ekalesia ia Aperila i le 1832, sa ia auauna atu i ni misiona se fitu i le aluga o le iva tausaga na sosoo ai. O lana misiona muamua sa faia i le taimi o le taumalulu ina ua uma ona papatisoina o ia. E lima isi, e aofia ai lona auai i le Tolauapiga a Siona, na faia i taumafanafana uma mai le 1833 e oo atu i le 1837. O nei misiona sa mai le tolu i le lima masina le umi. I le 1839 sa valaauina ai Polika Iaga, faatasi ai ma isi Aposetolo, e auauna atu i se misiona i Peretania Tele. Sa latou mulimuli i faatonuga a le Alii ia tuuvaa atu mo lenei misiona mai Sisifo Mamao, Misuri, i le aso 26 o Aperila, 1839 (tagai i le MF&F 118). Sa faaaluina e Polika ma isi Aposetolo le lima masina na sosoo ai i Aioua ma Ilinoi, i le faia ai o nisi sauniuniga e malaga atu ai i Peretania Tele. Sa taia le eria i se faamai pipisi o le malaria i le taumafanafana o le 1839, ma, sa gasegase ai foi i latou.

Faitau le faamatalaga lenei mai ia Polika Iaga, ma vaavaai mo le faamaoniga o le uiga faaalia o Polika i le auauna atu i le Alii, e ui lava i le ma’i tigaina lea sa le mafai ai ona alu i totonu o le taavaletoso e aunoa ma le fesoasoani ina ua latou o ese atu: “Sa ou naunau e alu i Egelani po o le oti a o taumafai pea. O lau tautinoga maumaututu o le faia o mea e manaomia ai au i le Talalelei o le ola ma le faaolataga, po o lou oti o taumafai pea e faia” (Aoaoga a Peresitene o le Ekalesia: Polika Iaga [1997], 6).

O le auaunaga faafaifeautalai a Polika Iaga na manaomia ai foi le ositaulaga i le vaega a lona aiga. Faitau le otootoga lenei o tulaga o le aiga o Polika i le taimi na ia tuua ai mo lana misiona i Peretania Tele:

Sa tuua e Polika Iaga ia Montrose, Aioua, mo Peretania Tele i le aso 14 o Setema, 1839, i le na o le 10 o aso talu ona uma ona fanauina e lana ava o Mary Ann, le la tama lona fa. Sa mafatia foi Mele Ane i le [faama’i o le] malaria. O faalima ai lenei o taimi talu ona la faaipoipo na ia auina atu ai Polika Iaga i se misiona. I le mavae ai ona tutuli ese mai o latou fale ma aveesea o a latou meatotino i Misuri i le tausaga na muamua atu, sa faapea ona latou i ai i le loloto o le mativa. Na pau le mea sa mafai ona tuua e Polika Iaga ia Mary Ann o le $2.72 mo lo latou aiga. Sa faatuatua Polika ma Mary Ann, o le a tausia e le Alii i latou ma faalagolago i se folafolaga mai le Alii e faapea, o aiga o le au Aposetolo o le a taulimaina o latou manaoga a’o o ese atu le au Aposetolo i a latou misiona (tagai i le MF&F 118:3).

A o malaga atu Alii faifeautalai o Polika Iaga, Heber C. Kimball, ma Siaosi A. Samita agai i le itu i sasae o le Iunaite Setete mo a latou misiona i Peretania Tele, “sa aapa ane Polika i lana ato ma maua ai i taimi uma se tupe e fetaui mo le pasese e sosoo ai i le taavale solofanua. Sa faapea o ia o Heber sa toe faatumuina le tupe, ae na iloa mulimuli ane, e leai. Na amata e le usoga la latou malaga i le $13.50 o foai, ae sa latou faaaluina le sili atu ma le $87 i pasese i taavale solofanua. Sa latou le iloa pe na faapefea ona oo le tupe faaopoopo i totonu o le ato ‘sei vagana ai o se sui le vaaia mai le lalolagi Faalelagi e faavavevave le folafolaina atu o le Talalelei’ [i le Leonard J. Arrington, Brigham Young: American Moses [1985], 77.]” (Church History in the Fulness of Times Student Manual, 2nd ed. [Church Educational System manual, 2003],228).

A’o ia faatonutonuina le faalauteleina o le galuega faafaifeautalai i Motu o Peretania, sa faaalia e Polika Iaga le tomai maoae faaleagaga ma le faaletaitai. I lalo o le taitaiga a Polika Iaga ma isi Aposetolo, na oo ai le Ekalesia i se tuputupu ae na matua tulaga ese i Peretania Tele. E oo ane i le taimi na faamaeaina ai e le toatele o Aposetolo a latou misiona i Motu o Peretania i le faaiuga o Aperila 1841, e sili atu ma le 5,000 tagata na auai i le Ekalesia, ma e tusa ma le 1,000 o i latou ua malaga atu i Navu i ni nai masina na muamua atu.

“O lenei misiona, sa o se taimi taua o aoaoga faamasani ma le tuputupu a’e mo le Korama a Aposetolo e Toasefululua. Sa mafai e Polika Iaga ona faamalosia tomai faaletaitai, ia o le a le umi ae valaau i ai o ia e faaaoga i Navu. … E ala i tofotofoga ma osigataulaga i Peretania, faapea foi ma le galulue ai mo se sini e tasi, sa tutu faatasi ai le Toasefululua i se auala na faamautinoa ai le malosi o le tulaga faaleautaitai o le Ekalesia i tausaga a sau” (Church History in the Fulness of Times,234).

Ina ua uma ona taitaia le galuega faafaifeautalai a le Ekalesia i Peretania Tele, sa faapea ona taunuu atu Polika Iaga i Navu, Ilinoi, i le aso 1 o Iulai, 1841. Na maua e le Perofeta o Iosefa Samita le faaaliga ua faamaumauina i le Mataupu Faavae ma Feagaiga 126 i le valu o aso mulimuli ane.

Faitau le Mataupu Faavae ma Feagaiga 126:1–3, ma vaavaai mo le mea na ta’u mai e le Alii ia Polika e uiga i lana auaunaga. O le a se taimi na e lagonaina ai sa fiafia le Alii i lau auaunaga?

Mai mea ua e aoaoina i fuaiupu 1-2, faauma le mataupu faavae lenei e faatatau i le auaunaga tatou te tuuina atu: Afai tatou te galulue ma le filiga mo le Alii, o le a Ia a tatou taulaga amiotonu.

“E faaopoopo atu i le mafai ona faaalu se taimi tele ma lona aiga ina ua mavae le faaaliga lenei nai lo le mea sa mafai ona i ai i nai tausaga na muamua atu, sa faapea foi ona latalata atu Polika Iaga i le Perofeta o Iosefa Samita i le tele o taimi (e luasefulu-valu masina mai masina mulimuli e tolusefulu ono o le soifua o Iosefa).

“E foliga manino mai na silafia e le Alii, le lumanai o Polika Iaga ma le lumanai o le Ekalesia, ma tuu ai Polika i tafatafa o Iosefa ina ia mafai ona ia aoaoina mea na manaomia ona ia iloa e taitai ai le Ekalesia i le mavae ai o le maliu o Iosefa” (Mataupu Faavae ma Feagaiga Tusi Lesona a le Tagata Aoga, 2nd ed. [Church Educational System manual, 2001], 313).

faatagata o Polika Iaga ma Iosefa Samita — Ona o le vavalalata o lana fegalegaleaiga ma le Perofeta o Iosefa Samita, na aoao ai e Polika Iaga le mea o le a manaomia ona ia silafia e taitai ai le Ekalesia i le mavae ai o le maliu o Iosefa.

E ui ina sa le toe manaomia ona tuua e Polika Iaga lona aiga ina ia auauna atu i ni misiona faaopoopo, ae o le a ia auauna atu i ni nai misiona pupuu a’o le’i maliu le Perofeta. Na taliaina e le Alii le taulaga amiotonu a Polika Iaga ma taumafaiga maelega i Lana galuega.

Mafaufau i avanoa ua e maua e auauna atu ai i le Alii. I lau api talaaga mo le suesueina o tusitusiga paia, tusi ai ni nai fuaiupu e faamatala ai ni auala e mafai ona e mulimuli ai i le faataitaiga a taitai e pei o Polika Iaga, ina ia galue ma le filiga i nei avanoa.
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Sa ou suesueina le Mataupu Faavae ma Feagaiga 124:84–145; 125–26 ma faamaeaina lenei lesona i le (aso).

O fesili, mafaufauga ma manatu faaopoopo ou te fia faasoa atu i lo’u faiaoga: