Iunite 30: Aso 2
Tuua o Navu; o le Savaliga Sopo atu i Aioua; Mataupu Faavae ma Feagaiga 136:1-18
Faatomuaga
Ina ua mavae le maliufasia o le Perofeta o Iosefa Samita, sa taitaia e le Korama a Aposetolo e Toasefululua, i lalo o le taitaiga a Polika Iaga, o le Peresitene o le Korama a le Toasefululua, le Ekalesia ma faaauau pea le galuega a le Alii. Sa latou uunaia le Au Paia e faauma le Malumalu o Navu, ma ia saunia e siitia atu i sisifo.
Sa Galulue ma le Filiga le Au Paia ina ia Maua Faamanuiaga o le Malumalu
Mafaufau i se taimi na e faia ai se mea faigata aua na e iloa o le taunuuga o le a tauia ai le taumafaiga.
O se tasi o le galuega faigata na faatonuina le Au Paia e fai ina ua mavae le maliu o le Perofeta o Iosefa Samita, o le faamaea o le Malumalu o Navu. Sa manaomia ai se osigataulaga tele o le Au Paia e fausia ai le Malumalu o Navu. A o e faitau i le parakalafa lenei, vase lalo o osigataulaga na faia e le Au Paia e fausia ai le uluai malumalu i Navu:
I le konafesi aoao ia Oketopa 1844, na talosaga atu ai Peresitene Polika Iaga i le Au Paia e tuuina atu a latou sefuluai ma taulaga e fausia ai le malumalu. I le tali atu, na foai atu e tagata taitoatasi o le Aualofa se pene i le vaiaso mo sapalai o mea faufale. E toatele alii sa faasefuluaiina o latou taimi e ala i le galulue i le malumalu i se aso e tasi mai aso uma e sefulu. O isi na tuuina atu le silia ma le tasi-vaesefulu o mea na latou maua. Sa tuuina atu e Toronto Joseph ia Polika Iaga le $2,500 o auro ma fai atu, na manao e tuuina atu mea uma sa ia te ia e fausia ai le malo o le Atua.
O le uluai Malumalu o Navu
Aisea e te manatu na naunau ai le Au Paia e ositaulaga le tele o mea e fausia ai le malumalu?
E ui lava ina sa ositaulaga le Au Paia e fausia le Malumalu o Navu, ae o sauaga na faigata ai ona faamaeaina le malumalu. Sa manatu le toatele o fili o le Ekalesia o le taimi lava na fasiotia ai le Perofeta o Iosefa Samita, o le a solofa ai foi ma le Ekalesia. Ae ui i lea, ina ua tumau pea le faamaoni o tagata o le Ekalesia ma faaauau pea le alualu i luma o le Ekalesia, sa faapea ona faateteleina e fili o le Ekalesia a latou taumafaiga e tutuli ese le Au Paia mai Ilinoi.
A o e faitauina parakalafa nei, vaavaai mo mea na faia e fili o le Ekalesia e taumafai ai e faaumatia le Ekalesia:
Ia Setema 1844, sa faatulaga ai e Colonel Levi Williams, o le na aafia foi i le fasiotiga o Iosefa ma Ailama Samita, ia se faatosinaga tele faamiliteli e tutuliese faamalosi ai le Au Paia o Aso e Gata Ai mai Ilinoi. Sa faasalalauina o ia “o se luko tele taulamalama i le Itumalo o Hancock” (David E. Miller and Della S. Miller, Nauvoo: The City of Joseph [1974], 186). Ina ua faalogo i lenei mea, sa auina atu e Kovana Thomas Ford o Ilinoi ia General John Hardin o le militeli o le setete i le itumalo e tausi le filemu.
O le tausaga mulimuli ane, ia Setema 1845, na taitai atu ai e Colonel Williams se vaega e 300 o alii faatupu faalavelave ma osofaia nuu o le Au Paia o Aso e Gata Ai i eria taulalata ane, na susunu le tele o fale sa le’i i ai se puipuiga, fale i faatoaga, fale vili falaoamata, ma faaputuga saito. I le ogatotonu o Setema, na talosagaina ai e Peresitene Polika Iaga ni volenitia e o e laveai na tagata o le Au Paia. Sa saunia e le Au Paia i Navu ni taavaletoso se 134 e aumai ai ma le saogalemu aiga mai nuu taulalata ane agai i Navu.
E faapefea ona faafaigata e nei osofaiga le faaauauina o le galuega o le malumalu?
O le toatele o tagata na nonofo i Ilinoi, sa popole e faapea, o le i ai o le Au Paia o Aso e Gata Ai e ono taitai atu ai i se taua faalemalo. Sa latou fai atu i le Au Paia e o ese ma le setete. I le aso 24 o Setema, 1845, na folafola atu ai e le Korama a Aposetolo e Toasefululua e faapea, o le a o ese le Ekalesia i le tautotogo na sosoo ai.
Mafaufau loloto pe aisea e ono faigata ai ona faia le faaiuga e o ese ma Ilinoi. Ia mafaufau foi po o le a se aafiaga e ono oo i taumafaiga a le Au Paia e faamaea le malumalu ona o le faaiuga e o ese ma Navu.
E ui lava ina sa iloa e le Au Paia o le a tatau ona latou o ese ma Ilinoi, ae sa faaauau pea ona latou fausia le Malumalu o Navu.
-
Tali le fesili lenei i lau api talaaga mo le suesueina o tusitusiga paia: Aisea e te manatu sa faaauau ai pea e le Au Paia ona galulue i le malumalu, e ui lava ina sa latou iloa o le a latou o ese?
O le taimi lena, sa le’i maua e tagata lautele o le ekalesia ia sauniga o le malumalu e tatau mo le faaeaga. I se faaaliga i le 1841, na folafola mai ai e le Alii i le Au Paia, afai latou te fausia le Malumalu o Navu, o le a mafai ona latou maua na sauniga faaola (tagai i le MF&F 124:22–44).
Sa faatuatua nei Au Paia o sauniga o le malumalu o le a saunia ai i latou e nonofo i le afioaga o le Tama Faalelagi i le faavavau, ma ina ia mafai ona faamauina faatasi o latou aiga e faavavau. O tala i osigataulaga ma faigata na faatoilaloina e le Au Paia ina ia fausia ai le malumalu, ua aoao mai ai ia i tatou le upumoni lenei: O le mauaina o sauniga o le malumalu e matuai aoga ai lava a tatou taumafaiga ma osigataulaga amiotonu uma.
-
-
Aisea e te manatu ai, o le mauaina o sauniga o le malumalu e matuai aoga ai le galue malosi ma le faia o osigataulaga?
-
O a ni mea e tatau ona e faia ina ia mafai ona e maua sauniga o le malumalu?
-
Mafaufau loloto pe o i ai se mea e tatau ona e taofia ona faia po o le amata foi ona faia, ina ia mafai ona e maua ai faamanuiaga o le malumalu.
Na faamatalaina e Peresitene Thomas S. Monson ia osigataulaga na faia e nisi o le Au Paia o ona po nei ina ia maua ai sauniga o le malumalu: “I le tele o tausaga talu ai, sa ou faitau ai e uiga i se vaega e silia ma le toaselau tagata o le au paia na tuua Manaus [Pasila,] lea e i le totonugalemu o le vaomatua o Amasone, ae malaga atu i le malumalu e sili ona latalata ane, e tu i Sao Paulo, Pasila—e toeitiiti 2,500 maila (4,000 km) mai Manaus. Na malaga na Au Paia faatuatua i se vaa mo aso e fa i le Vaitafe o le Amasone ma ona magavai. Ina ua mae’a lenei malaga i le vai, sa faaee i pasi mo isi aso e tolu e malaga ai i auala gaoa, ma nai meaai laiti ma sa leai se mea e momoe lelei ai. Ina ua mavae ao e fitu ma po e fitu, sa latou taunuu i le malumalu i Sao Paulo, lea na faatino ai sauniga o le faavavau. O le mea moni, na tutusa lava le faigata o la latou malaga toe foi. Peitai, sa latou mauaina sauniga ma faamanuiaga o le malumalu, ma e ui lava ina sa leai ni a latou tupe na totoe, ae sa faatumulia i latou lava i le agaga o le malumalu ma le loto faafetai mo faamanuiaga sa latou mauaina” (O Le Malumalu Paia—O Se Sulu Ta’iala i le Lalolagi,” Ensign po o le Liahona, Me 2011, 91).
E faapefea ona musuia oe e faataitaiga a nei Au Paia, a o e sauni e maua sauniga o le malumalu?
Faitau parakalafa nei, ma vase lalo o ni faataitaiga o taumafaiga amiotonu a le Au Paia i Navu e maua sauniga o le malumalu:
Sa faapaia e taitai o le Ekalesia potu o le Malumalu o Navu ina ua maea fausia na potu, ina ia mafai ona amata ai sauniga i se vave e mafai ai. Na faapaiaina le potu e i le taualuga o le malumalu mo sauniga i le aso 30 o Novema, 1845. Na amata ona maua e le Au Paia o latou faaeega paia i le afiafi o le aso 10 o Tesema, ma o sauniga o le faaeega paia sa faaauau lava seia oo i le 3:00 i le vaveao o le aso 11 o Tesema.
Sa galue malosi Peresitene Polika Iaga e tuuina atu sauniga o le malumalu mo le Au Paia a’o le’i faamalosia i latou e o ese mai Navu, Ilinoi.
E oo ane i le faaiuga o le 1845, e silia ma le 1,000 tagata o le ekalesia na maua sauniga o le malumalu. Ia Ianuari 1846, sa faamaumauina ai e Peresitene Polika Iaga e faapea, “O lena le naunautaiga e pei ona molimauina e le Au Paia ina ia maua sauniga [o le Malumalu], ma o lo matou naunautaiga foi lena ia i matou ina ia faataunuuina ia sauniga mo i latou, o lea sa ou tuuina atu ai au atoa i le galuega a le Alii i le Malumalu i le po ma le ao, e le sili atu i le fa itula e moe ai i lona averesi, i le aso, ma alu i le fale taitasi i le vaiaso” (i le History of the Church, 7:567). O le toatele o tagata o le Ekalesia sa saofaga i le tataina o lavalava o le malumalu i po taitasi, ina ia mafai ona faaauau le galuega i le taeao e sosoo ai e aunoa ma le faatuai.
I le aso 3 o Fepuari, 1846, na tuua ai e Peresitene Iaga le malumalu ina ia faia sauniuniga faaiu e tuua Navu i le aso e sosoo ai i le malaga i sisifo. Ae peitai, sa potopoto ni tagata se toatele ina ia maua o latou faaeega paia, ma sa toe foi atu o ia ma le agaalofa e auauna atu ia i latou. O lenei mea na tuai ai ona malaga ese atu o ia mo le isi lua vaiaso. E tusa ai ma faamaumauga a le malumalu, e 5,615 le Au Paia sa maua faaeega paia a’o le’i o atu i sisifo. (Tagai i le Church History in the Fulness of Times Student Manual, 2nd ed. [Church Educational System manual, 2003], 303–4.)
-
-
O le a se vaega ua faagaeetia ai oe e uiga i taumafaiga a le Au Paia ina ia maua sauniga o le malumalu?
-
O a ni taumafaiga ma ni osigataulaga e manaomia ona tatou faia ina ia maua ai sauniga o le malumalu?
-
Ua Tuua e le Au Paia ia Navu
Ina ua uma ona maua sauniga o le malumalu, na amata loa ona tuua e le Au Paia ia Navu ia Fepuari 1846. Ae peitai, sa le’i o faatasi uma tagata o le Ekalesia ma le vaega autu o le Au Paia. Sa i ai se vaega toaitiiti sa le‘i saunia i le taimi e malaga ese ai, ma o nisi sa filifili e nonofo.
O le toatele o le Au Paia o e na nonofo i Navu sa faaauau pea ona oo i ai sauaga. Ia Setema 1846, i le fitu o masina talu ona o ese atu le vaega autu o le Au Paia, e tusa ma le 800 tagata, na faaauupegaina i ni fana se ono, na sauni e osofai Navu. Sa sauniuni le Au Paia na totoe ma nisi o tagata fou o le nuu lea sa pe a na o le 150 o alii e mafai ona tau, e puipui le aai.
Ina ua mavae ni nai aso o tau, sa faamalosia le Au Paia e siilima ma sa faatonuina i latou e o ese vave mai le aai. Ona ulu atu lea o le au faatupu vevesi i le aai, gaoi fale, ma faaleaga le malumalu. O nisi o le Au Paia o e sa le mafai ona sosola ese vave, sa sasaina pe tauai i totonu o le Vaitafe o Misisipi. Ina ua mavae le solaaga a le Au Paia mai Navu, sa latou faatulaga ni tolauapiga sulufai faalava i auvai i sisifo o le vaitafe. O le toatele o tagata sa le’i lava ni a latou meaai po o ni sapalai e tausi ai i latou lava.
Sa auina atu e taitai o le Ekalesia ni au laveai e toe foi i fanua faigata o Aioua e fesoasoani i le Au Paia mafatia.
-
Faitau le savali lenei na tuuina atu e Peresitene Polika Iaga i alii o e na tuuina atu i ai le valaauga e saili mai ni au laveai:
Ia tuu atu i le afi o le feagaiga lea sa outou osia i le Maota o le Alii, e mumu i o outou loto, e pei o le afi lē matineia, seia outou …saili atu i tagata uma … o e [e mafai ona o], ma tuu atu le afi i lona agaga, seia oo ina tulai o ia …ma alu atu loa, ma aumai se uta o tagata matitiva mai Navu. …
“… O le aso lenei o le faatinoga” (Journal History of The Church of Jesus Christ of Latter-day Saints, Sept. 28, 1846, 5–6, Church History Library, Salt Lake City)
Ua aoao mai i tatou i le saunoaga a Polika Iaga e faapea, e finagalo le Alii ina ia tatou ola i feagaiga tatou te osia.
-
-
O a ni osigataulaga ua e faia e tausia ai feagaiga?
-
O a ni faamanuiaga ua e mauaina ona ua e ola e tusa ai ma feagaiga ua e osia?
-
Ua Sopoia e le Au Paia ia Aioua ma Faatu le Laumua i Uinita Kuata
Ina ua amata ona tuua e le vaega autu o le Au Paia ia Navu ia Fepuari 1846, na latou malaga agai i sisifo o le setete o Aioua. “O le tuua o Navu sa o se faatinoga o le faatuatua mo le Au Paia. Sa latou o ese ma le le iloa lelei po o fea sa o i ai, po o le a foi le taimi o le a latou taunuu ai i se nofoaga e faamautu ai. Na pau le mea na latou iloa, sa itiiti lava se taimi na totoe ona tutuli ese loa lea o i latou mai Ilinoi e o latou fili, ma sa faapea ona maua e o latou taitai le faaaliga e su’e se sulufaiga i se mea o Mauga Papa” (Church History in the Fulness of Times Student Manual,309).
A o e faitau i le tala lenei ia Orson ma Catherine Spencer, vaavaai mo faataitaiga o lo laua faatuatua ma le faamoemoe:
“Ina ua tuua Navu, [o Catherine], ua matuai vaivai ma gapelu, sa vave lava ona goto ifo i le tele o faigata ua saputu mai. Sa tusi augani atu le tane faavauvau i matua o lona toalua, ma talosaga i ai e talia o ia [Catherine] i totonu o le latou fale seia oo ina maua e le Au Paia se nofoaga e faamautu i ai. Na oo mai le tali, ‘Ia tuu atu ia te ia e teena lana tapuaiga faalumaina ona mafai lea ona toe foi mai, ae e le mafai seiiloga na te faia.’
“Ina ua faitau atu le tusi ia te ia, sa fai atu o ia i lana tane, e aumai lana Tusi Paia ma susue i le tusi a Ruta ma faitau le mataupu muamua, fuaiupu e sefuluono ma le sefulufitu: ‘Aua e te finau ia te a’u ina ia ou tuulafoai ia te oe, ia le mulimuli atu ia te oe; aua o le mea e te alu i ai, ou te alu ai foi, o le mea e te nofo ai ou te nofo ai. E fai lou nuu mo’u nuu; e fai lou Atua mo’u Atua’” (Memoirs of John R. Young: Utah Pioneer 1847 [1920], 17–18). E le’i leva ae maliu Catherine Spencer.
Sa feagai le Au Paia ma le tele o isi faafitauli a’o latou malaga. Ona o timuga mamafa ma le le lava o sapalai, na faaaluina ai e le Au Paia le fa masina i le savalia o le malaga e 300-maila e sopoia ai Aioua. O le manatu ai i le tuai o lenei savaliga, o lea na tonu ai i taitai o le Ekalesia e aua le faaauau atu i sisifo i Mauga Paia seia oo i le tautotogo o le 1847. Sa latou fautuaina le Au Paia e tapena ma faamautu mo le taumalulu. O se tasi o nuu e aupito sili ona tele, o Uinita Kuata, sa i ai i le itu i sisifo o le Vaitafe o Misuri, i le setete lea o Nebraska i le taimi nei.
O le nofoaga le tumau o Uinita Kuata
Mataupu Faavae ma Feagaiga 136:1–18
Ua fautuaina e le Alii le Au Paia e faatulaga i latou lava ma saunia e faaauau la latou malaga i sisifo
Sa maua e Peresitene Polika Iaga le faaaliga ua faamaumauina i le Mataupu Faavae ma Feagaiga 136 i Uinita Kuata ia Ianuari 1847.
A o e suesue i le Mataupu Faavae ma Feagaiga 136:1-18, matau le fautuaga a le Alii e faatatau i le auala e tatau ona faatulaga ai e le Au Paia i latou lava ma sauniuni ai e faaauau la latou malaga i sisifo.
O le a e aoao atili e uiga i le malaga i sisifo faatasi ma lou faiaoga i le lesona mo le iunite lenei.
-
Sa ou suesueina le “Tuua o Navu,” “O Le Savaliga Sopo atu i Aioua,” ma le Mataupu Faavae ma Feagaiga 136:1-18 ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu i lo’u faiaoga: