Iunite 32: Aso 3

Faanatinatiina o le Galuega o le Faaolataga

Faatomuaga

Talu mai le amataga o le Toefuataiga, ua faalauteleina ai le galuega a le Alii i le lalolagi atoa. Ua tatou ola i se vaitaimi ua faanatinatiina ai e le Alii Lana galuega. Ua ia te outou ni punaoa ma ni avanoa se tele e saofaga atu i le faanatinatiina o le galuega a le Alii.

Ua Faanatinati e le Alii Lana Galuega

O a nisi o mafuaaga atonu e faanatinati pe faavave ai e se tasi le faia o se galuega? Faitau le Mataupu Faavae ma Feagaiga 88:73, ma vaavaai mo le mea na fetalai mai le Alii o le a ia faanatinatia (tagai foi i le Iakopo 5: 61–62, 70–71).

E faatatau i le Mataupu Faavae ma Feagaiga 88:73, na saunoa ai Elder Russell M. Nelson o le Korama a Aposetolo e Toasefululua, “O le taimi lenei o le faanatinati” (“Thus Shall My Church Be Called,” Ensign, Me 1990, 17).

Ua tatou ola i se vaitaimi ua faanatinatiina ai e le Alii Lana galuega. E ala i le faanatinatiina o Lana galuega, ua faatelevaveina e le Alii ma faalautele i luma Ana taumafaiga e uiga i le aumaia o le faaolataga o tagata.

1. Tali le fesili lenei i lau api talaaga mo le suesueina o tusitusiga paia: O a la nisi o auala ua e molimauina ai le faanatinatiina e le Alii o Lana galuega?

I le taimi o le auaunaga a Peresitene Spencer W. Kimball, o le avea ma Peresitene o le Ekalesia, na faanatinatiina ai e le Alii ia Lana galuega. Mo se faataitaiga, ua faalauteleina le galuega faafaifeautalai, ma ua lolomiina e le Ekalesia ni lomiga fou o tusitusiga paia. A o ia uunaia tagata o le Ekalesia e faamalolosi i luma, na saunoa Peresitene Kimball, “ua fai si umi e le o alualu i luma” le Ekalesia. Ia toe amata la tatou malaga agai i luma ma luga” (“Let Us Move Forward and Upward,” Ensign, Me 1979, 82). Sa ia aoao mai foi, “E tatau ona faalautetele a tatou laa ma e tatau ona faia nei loa” (“Always a Convert Church: Some Lessons to Learn and Apply This Year,” Ensign, Sete. 1975, 3).

Pe a “faalautetele e [tagata o le Ekalesia] a latou laa,” latou te faateleina a latou taumafaiga e auai i le galuega a le Alii. Mo se faataitaiga, latou te galulue ma le filiga sili atu e faasoa atu le talalelei, suesue i tusitusiga paia, ma fai galuega o le malumalu ma talafaasolopito o aiga.

Faanatinatiina o le Galuega Faafaifeautalai

Sa ta’u mai e Peresitene Spencer W. Kimball i le Au Paia e faapea, sa saunia le Alii e tatala faitotoa mo i latou e faasoa atu ai le talalelei, e aofia ai i malo sa le’i faatagaina ai le galuega faafaifeautalai. Ae peitai, sa ia saunoa foi, na manaomia e le Au Paia ona saunia i latou ia maua na avanoa. Na molimau mai foi Peresitene Kimball, afai e saunia alii talavou uma e auauna atu i se misiona talai, o le a tatala e le Alii faitotoa ma saunia se ala mo le galuega faafaifeautalai e alu atu ai i le lalolagi atoa:

“Ou te mafaufau i le tele o malo e le’i talaiina atu i ai le talalelei. Ou te iloa e i ai o latou pupuni [taofiga o faatosinaga mai fafo], e pei o pupuni uamea ma pupuni ofe. Ou te iloa le faigata tele aua sa tatou faia ni taumafaiga. …

“Ae e leai se mafuaaga lelei o o’u vaaia, o le a tatala ai e le Alii ia faitotoa lea tatou te lei saunia e ulu atu i ai. Aisea o le a ia soloia ai i lalo le Puipui Uamea po o le Puipui Ofe po o soo se isi lava puipui, pe afai tatou te le o saunia lava e ulu atu i ai?” (“When the World Will Be Converted,” Ensign, Oke. 1974, 5, 7).

Sa mulimuli tagata o le Ekalesia i le fautuaga a Peresitene Kimball ma saunia e faasoa atu le talalelei. I le taimi o le taitaiga a Peresitene Kimball, sa siitia ai le numera o faifeautalai faamisiona i le silia i le 50 pasene. I le faaiuga o le vaitau o le 1980 ma le 1990, o malo o Siamani i Sasae, o malo i totonu o le Soviet Union sa i ai muamua, ma isi atunuu sa faasaina ai muamua le galuega faafaifeautalai, na amata ona faatagaina faifeautalai e faasoa atu le talalelei i nei atunuu. Na faataunuuina le valoaga a Peresitene Kimball, ma e faaauau pea ona faataunuuina a’o faalauteleina le galuega faafaifeautalai.

A o uunaia e Peresitene Kimball tagata o le Ekalesia e faalautetele a latou laa, sa ia faamanino mai ai se tiutetauave a alii talavou uma i le Ekalesia: “O le fesili e masani ona fesiligia: Pe e tatau i alii talavou uma ona faia se misiona? Ma o le tali ua tuuina mai e le Alii. O le ‘Ioe.’ E tatau i alii talavou uma ona faia se misiona” (“When the World Will Be Converted,” 8).

Talu mai lena taimi, ua faaauau pea ona uunaia e perofeta ia alii talavou agavaa, ma malolosi uma e auauna atu i se misiona talai. Ua taliaina foi e perofeta ia tamaitai talavou e auauna atu i ni misiona talai pe afai latou te mananao i ai. Ia Oketopa 2012, sa fofogaina ai e Peresitene Thomas S. Monson se suiga musuia i tulaga manaonia i le matutua o faifeautalai, ua mafai ai e alii talavou ona amata le auaunaga faafaifeautalai i le 18 tausaga le matutua ae o tamaitai talavou i le 19 tausaga. E tatau i alii talavou uma ona saunia e auauna atu i se misiona talai ma ia tausia lona agavaa ia auauna atu ai.

2. Tali fesili nei i lau api talaaga mo le suesueina o tusitusiga paia:

   1. Aisea e tatau ona saunia ai alii talavou uma e auauna atu i se misiona talai?

   2. E mafai faapefea e le saunia mo se misiona i le taimi nei ona fesoasoani e te saofaga ai i le galuega a le Alii?

   3. O a auala e te manatu ua saofaga ai le suiga musuia i le matutua manaomia mo faifeautalai faamisiona i le faanatinatiina o le galuega a le Alii?

Lomiga Fou o Tusitusiga Paia

O le a sau tala e fai atu pe afai e fai atu sau uo lelei ia te oe, “ou te fia faalatalata atu i le Atua. O le a se mea e tatau ona ou faia?”

Faitau le saunoaga lenei mai ia Peresitene Spencer W. Kimball: “Ua ou iloaina a ou manatu faatalale i le ma fesootaiga ma le e paia, ma a oo ina foliga mai e le o faafofoga mai le Atua ma leai se siufofoga paia o fetalai mai, o lona uiga ua ou matua mamao, mamao ese lava. Afai ou te faatofuina au lava i tusitusiga paia, ona vaapiapi ai lea o le va ma toe foi mai le faaleagaga” (Aoaoga a Peresitene o le Ekalesia: Spencer W. Kimball [2006], 77).

Faitau le Mataupu Faavae ma Feagaiga 1:6, 24–30, ma faailoa mai pe aisea na finagalo ai le Alii i taitai o le Ekalesia e lomia faaaliga. E mafai faapefea e tusitusiga paia ona fesoasoani ia i tatou e faalautetele a tatou laa ma saofaga i le faanatinatiina o le galuega a le Alii?

I le amataga o le vaitau o le 1970, sa silafia ai e taitai o le Ekalesia le manaomia e tagata o le Ekalesia ona faateleina le iloa o tusitusiga paia, ma ia i ai se lomiga faatulagaina o le Tusi Paia mo suesuega ma le aoao atu. I le 1979, i le mavae ai o tausaga o taumafaiga musuia ma le filigā, na lolomiina ai e le Ekalesia se lomiga aloaia faaPeretania a le AAG o le Tusi Paia King James. O lenei lomiga o le Tusi Paia, o loo i ai ni fesoasoaniga se tele mo suesuega ia sa le’i maua muamua, e aofia ai le faalauteleina o vaefaamatalaga faatasi ma mau faasino ma isi fesoasoaniga; toe faaleleia atili ulutala o mataupu; vaega pupuu mai le Faaliliuga a Iosefa Samita; o le Topical Guide; ma le Bible Dictionary. I le 1981, na lomia ai e le Ekalesia se lomiga fou o le tusi fusi tolu faa-Peretania—o le Tusi a Mamona, Mataupu Faavae ma Feagaiga, ma le Penina Tau Tele—ua aofia ai vaefaamatalaga ua toe faaleleia, ulutala o mataupu, faafanua, ma se faasino upu. I le 2009, na lolomiina ai e le Ekalesia le lomiga a le AAG o le Tusi Paia Reina-Valera i le gagana Sipaniolo.

Faitau le saunoaga lenei a Peresitene Boyd K. Packer o le Korama a Aposetolo e Toasefululua, na faia i le tasi o le tausaga talu ona faamatuu mai i tua le tusi fusi tolu o le 1981 i le gagana Peretania. Vaavaai mo auala na ia tagai mamao ai i le faamanuiaina o olaga ma le faaagai i luma o le galuega a le Atua e nei lomiga fou o tusitusiga paia.

“I le mavae ai o tausaga, o le a faatupuina mai e nei tusitusiga paia ni augatupulaga faamanuiaina o ni Kerisiano faamaoni, ua latou iloa le Alii o Iesu Keriso, ma ua latou mananao e usiusitai i Lona finagalo.

“… O le a tatalaina mai faaaliga ia i latou, e le pei o se isi lava i le talafaasolopito o le lalolagi. … O le a latou atiina ae se talalelei e aoao ai e sili atu nai lo mea na maua e o latou augatama. O le a ia i latou le molimau o Iesu o le Keriso, ma o le a latou agavaa e folafola atu o Ia ma puipuia o Ia” (“O Tusitusiga Paia,” Liahona, Ian. 1983, 104).

Ua molimau mai tusitusiga paia o Iesu o le Keriso. O le suesueina o tusitusiga paia, e mafai ona fesoasoani ia i tatou e maua se molimau ia Iesu Keriso ma fesoasoani e faatumulia o tatou olaga i le Agaga Paia. Sa faia ma e faaauau pea ona faia taumafaiga e tele ina ia tuuina atu i tagata o le Ekalesia ia tusitusiga paia ma fesoasoani aoga mo suesuega i a latou lava gagana moni.

3. Tali fesili nei i lau api talaaga mo le suesueina o tusitusiga paia:

   1. Aisea e taua ai le suesueina i aso uma o tusitusiga paia?

   2. Ua faapefea ona fesoasoani au suesuega patino o tusitusiga paia e te lagolago ai i le galuega a le Alii?

O Le Faanatinatiina o le Galuega Faalemaulmalu ma Talafaasolopito o Aiga

O le fausiaina o malumalu na matuai maoae le faateleina i lalo o le taitaiga a Peresitene Gordon B. Hinckley. I le 1995, i le taimi lea sa itiiti ifo ma le 50 malumalu na faagaoioia i le lalolagi atoa, sa ia saunoa ai: “Ua ia te au se faanaunauga musaesae ia tu se malumalu i mea e faigofie mo le Au Paia i le lalolagi atoa. … Ua televave le galuega i le saoasaoa tatou te mafaia. O la‘u tatalo faifai pea ina ia mafai ona faateletelevave ina ia toatele o tatou tagata e mafai ona faigofie ona malaga i se maota paia o le Alii” (“O Misiona, Malumalu ma le Taitaiga,” Ensign, Ian. 1996, 66).

Faitau le Mataupu Faavae ma Feagaiga 128:15, 17ma vaavaai mo lo tatou tuitetauave o loo i ai i o tatou augatama. Na faailoa mai e Elder David A. Bednar o le Korama a Aposetolo e Toasefululua, le mataupu faavae lenei: “Ua ia te i tatou le tiutetauave o le feagaiga e sailia o tatou augatama ma tuuina atu mo i latou ia sauniga faaola o le talalelei” (“O Le a Liliu Atu Loto o Fanau i o Latou Tama,” Ensign po o le Liahona, Nov. 2011, 25).

O le fausiaina o malumalu ma le faaleleia atili i le galuega o talafaasolopito o aiga, o ni faamaoniga ua faanatinati e le Atua Lana galuega i le isi itu o le veli.

Faitau le saunoaga lenei mai ia Elder Bednar, ma vaavaai mo auala e mafai ona e saofaga ai i le galuega a le Alii: “E le o se mea na faafuaveta ona oo mai le Family Search ma isi meafaigaluega i se taimi ua matua masani lelei ai tupulaga talavou ma se vaega tele o faamatalaga ma fesootaiga tau tekinolosi. Ua aoaoina a outou tamatamailima ia iloa auina atu feau feaveai i telefoni ma komepiuta e faatelea’i ai ma faalautele le galuega a le Alii—e le na ona fesootai vave ai ma a outou uo. O tomai ma taleni ua molimauina i le toatele o tupulaga talavou i ona po nei, o se tapenapenaga e saofagā ai i le galuega o le faaolataga” (“O Loto o Fanau,” 26).

4. Tali le fesili lenei i lau api talaaga mo le suesueina o tusitusiga paia: O a ni aafiaga lelei na e maua i le faia o galuega o talafaasolopito o aiga po o le alu i le malumalu e auai i sauniga mo e ua maliliu?

O Lo Tatou Tiutetauave o le Faaagai i Luma le Galuega

A o e faitau i le saunoaga lenei a Elder David B. Haight o le Korama a Aposetolo e Toasefululua, ia faailoga se faamanuiaga o loo avanoa mo i tatou taitoatasi:

“Uso e ma tuafafine, ua tatalaina e le Alii le ala ma ua mafai ai ona faalauteleina Lana galuega i le lalolagi atoa, ma o se matuai faamanuiaga mo i tatou uma—e taitoatasi ma lana lava ala—e auai ai. …

“O ai ea sei vagana ai perofeta a le Atua sa mafai ona muai silafia le vavega o le faatupulaia vave o le galuega a le Alii? E moni, e pei ona muai valoia mai e le Alii i le vaega e 88 o le Mataupu Faavae ma Feagaiga, ua Ia faanatinatiina Lana galuega i lona taimi (tagai i le MF&F 88:73)” (“Galuega Faafaifeautalai—O So Tatou Tiutetauave,” Liahona, Ian. 1994, 71).

E mafai ona faamanuiaina i tatou e auai i le faanatinatiina o le galuega a le Alii. Mafaufau i avanoa ua e maua e saofaga ai i le faanatinatiina o le galuega a le Alii.

5. Tali fesili nei i lau api talaaga mo le suesueina o tusitusiga paia:

   1. O a nisi o auala e mafai ona e saofaga ai i le faanatinatiina o le galuega a le Alii?

   2. O a ni faamanuiaga ua e mauaina, a o e auai i le faanatinatiina o le galuega a le Alii?

6. Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

   Ua ou suesueina le lesona “O le Faanatinatiina o le Galuega o le Faaolataga” ma faamaeaina i le (aso).

   O fesili, mafaufauga ma manatu faaopoopo ou te fia faasoa atu i lo’u faiaoga: