O Le Aiga: O Se Folafolaga i le Lalolagi

Faatomuaga

I le aso 23 o Setema, 1995, i se sauniga aoao a le Aualofa, na faalauiloa mai ai e Peresitene Gordon B. Hinckley le “O Le Aiga: O Se Folafolaga i le Lalolagi.” O lenei folafolaga mai le Au Peresitene Sili ma le Korama a Aposetolo e Toasefululua ua tautino atu ai i le lalolagi tulaga faatonuina ma aoaoga faavae a le Alii e faatatau i le aiga. Ua tuuina mai ai foi i le folafolaga ia fautuaga mo le faamalolosia o aiga ma se lapataiga e uiga i taunuuga o le faamalepeina o aiga. (O loo i ai se kopi o lenei folafolaga i le aiga i le faaiuga o le lesona lenei.)

Ua Tuuina mai e le Au Peresitene Sili ma le Korama a Aposetolo e Toasefululua se Folafolaga i le Lalolagi e Faatatau i le Aiga

Pe sa i ai ni au fesili pe e te iloa se tasi na i ai ni fesili e faatatau i se tasi o nei faafitauli?

O le taua o le faaipoipoga ma le aiga
Tatala o faaipoipoga
Faaipoipoga i le itupa e tasi
Itupa
Matua e le’i faaipoipoina
Mauaina o se fanau
O sootaga feusuai i fafo atu o le faaipoipoga
Matafaioi o tina
Matafaioi o tama
Faapau Pepe

O le tele o fesili e uiga i nei faafitauli ma isi mataupu faaleaiga e mafai ona tali e faaaoga ai le “O Le Aiga: O Se Folafolaga i le Lalolagi.”

A o lei faitauina mai e Peresitene Gordon B. Hinckley le folafolaga lenei, sa ia ta‘ua nisi o mafuaaga e manaomia ai e le lalolagi upumoni o loo i ai [i le folafolaga]. A o e faitau i lana faamatalaga, ia vaavaai ma vase lalo o na mafuaaga.

“Faatasi ai ma le tele o le tuusaoloto ua faaigoa faafoliga e faapea o mea moni, faatasi ai ma le tele o le taufaasese e faatatau i faatulagaga faatonuina ma mea e faatauaina, faatasi ai ma le tele o faatauanauga ma faatosinaga ina ia talia lemu le pisia mai le lalolagi, ua matou lagonaina le tatau ona fautua atu ma lapataiina. I le faalauteleina o lenei mea, o i matou o le Au Peresitene Sili ma le Aufono a Aposetolo e Toasefululua, ua tuuina atu nei se folafolaga i le Ekalesia ma i le lalolagi, o se tautinoga ma le toe faamautuina o tulaga faatonuina, aoaoga faavae ma faiga masani e faatatau i le aiga, ia ua faafia ona ta’ua pea lava pea e perofeta, tagatavaai ma talifaaaliga o lenei ekalesia mai lava i lona talafaasolopito atoa” (“Ia Tu Malosi e Tetee atu i Togafiti a le Lalolagi” Liahona, Ian. 1996, 122).

Ina ia fesoasoani i lou iloaina o aoaoga ma mataupu faavae e tali ai fesili e uiga i faafitauli ua lisiina i le amataga o le lesona, kopi le siata lenei i lau api talaaga mo le suesueina o tusitusiga paia, ae tuu se avanoa e tusi ai au tali. (Atonu e te manao e faanumera parakalafa o loo i le kopi o le folafolaga pe a maea le lesona lenei.)

Faafitauli e Faatatau i le Aiga	Aoaoga Faavae ma Mataupu Faavae mai le Folafolaga i le Aiga	O Le Fea o Parakalafa i le Folafolaga na Aoaoina Mai Ai?
O le taua o le faaipoipoga ma le aiga
Tatala o faaipoipoga
Faaipoipoga i le itupa e tasi
Itupa	O le tulaga tane po o le fafine o le tagata o se vaega taua lea o le mua’i olaga faitino ma le faasinomaga e faavavau ma le faamoemoega.	parakalafa 2
Mauaina o se fanau
Matafaioi o tama
Matafaioi o tina
O sootaga feusuai i fafo atu o le faaipoipoga
Faapau Pepe	O le foafoaga o le olaga faaletino o se vaega paia ma le taua o le fuafuaga a le Tama Faalelagi.	parakalafa 3 ma le 5

Faitau ia parakalafa 1-5 o le folafolaga i le aiga, ma vaavaai mo aoaoga ma mataupu faavae e fesootai ma nei faafitauli e faatatau i le aiga. Mai mea na e maua i le folafolaga i le aiga, ia iloa le aoaoga faavae po o le mataupu faavae, e faatatau i faafitauli taitasi o loo i le siata. Tusi mea nei i le koluma talafeagai, i autafa o le faafitauli e faatatau i ai, i le siata o loo i lau api talaaga. Ia tusi foi po o le fea le parakalafa po o parakalafa o le folafolaga i le aiga sa e faaaogaina e fesoasoani ia te oe e faailoa mai ai aoaoga faavae po o mataupu faavae taitasi. (Ua uma ona faatumu atu ia faamatalaga mo laina e lua o le siata, e fai ma faataitaiga.)

Filifili ni aoaoga faavae po o ni mataupu faavae se lua sa e faailoaina i luga o lau siata. I lau api talaaga mo le suesueina o tusitusiga paia, tali fesili nei mo aoaoga faavae po o mataupu faavae taitasi ua e filifilia:
1. Aisea e te manatu e taua ai le malamalama i lenei aoaoga faavae po o le mataupu faavae?
2. E mafai faapefea e le malamalama ma le talitonu i lenei aoaoga faavae po o le mataupu faavae, ona aafia ai faaiuga e te faia?

E Fesoasoani le Folafolaga i le Aiga ia i Tatou i le Atinaeina o ni Aiga Faamanuiaina

Faitau parakalafa 6–7 “O Le Aiga: O Se Folafolaga i le Lalolagi,” ma vaavaai mo mea e mafai ona fesoasoani e te maua ai le fiafia i lou aiga.

O se tasi o mataupu faavae tatou te aoao mai i le folafolaga i le aiga e faapea e maua le fiafia i le olaga faaleaiga, pe a faavae i aoaoga a le Alii o Iesu Keriso.

I lau api talaaga mo le suesueina o tusitusiga paia, lisi ai mataupu faavae o loo maua i le parakalafa 7 o le folafolaga i le aiga, e fesoasoani i aiga e maua ai le fiafia. (Atonu e te manao e faailoga nei mataupu faavae i lau kopi o le folafolaga i le aiga.) Ona tali lea o fesili nei:
1. O a ni faataitaiga ua e vaaia o ni aiga e mulimuli i nei aoaoga?
2. Aisea e te manatu ai, atonu e sili atu ona fiafia aiga e mulimuli i nei aoaoga?
Mafaufau i auala e mafai ai e nei aoaoga ona faaopoopo atu i le fiafia o se aiga. Mafaufau po o le fea o nei aoaoga e mafai ona lelei atili atu ona e ola ai ina ia mafai ona aumaia le fiafia sili atu ia te oe ma lou aiga. I lau api talaaga mo le suesueina o tusitusiga paia, tusi ai se sini e fesoasoani ai ia lelei atili atu ona e ola i se tasi pe sili atu o nei aoaoga i totonu o lou aiga.

E tusa ai ma le afa mulimuli o le parakalafa 7 o le folafolaga i le aiga, o a ia tiutetauave o tamā?

Mafaufau i auala ua e vaai o faataunuu ai e lou tama po o isi tama ia nei tiutetauave.

E tusa ai ma le afa mulimuli o le parakalafa 7, o le a le tiutetauave autu o tina?

Mafaufau i ni auala ua e vaai o faataunuu ai e lou tina po o isi tina ia lenei matafaioi?

E tusa ai ma le parakalafa 7, o a tiutetauave po o le matafaioi a tina ma tama na ala mai “i le fuafuaga paia.” O lona uiga o lenei mea, sa faavaeina e lo tatou Tama Faalelagi. Aisea e te manatu e taua ai le malamalama i lenei mea?

I le parakalafa 7 ua tatou aoao ai foi o tama ma tina e tatau ona fesoasoani le tasi i le isi o se paaga tutusa i o latou tiutetauave faaleaiga. Mafaufau e uiga i se taimi na e vaaia ai tina ma tamā o galulue faatasi e fesoasoani le tasi i le isi o se paaga tutusa i nei tiutetauave paia.

O le fuaiupu lenei o loo latalata i le faaiuga o le parakalafa 7: “O mea e faaletonu, oti, po o nisi mea e tula’i mai, e alagatatau ai ona fetuutuunai tagata taitoatasi.” O loo silafia e le Alii nei tulaga, ma e faamanuia e Ia matua ma aiga a’o latou taumafai e faataunuu o latou matafaioi i le lelei sili latou te mafaia ai.

Toe faitau le fuaiupu mulimuli o le parakalafa 7 o le folafolaga i le aiga, ma vaavaai po o ai isi e mafai ona fesoasoani atu ia tina ma tama i o latou tiutetauave. E mafai foi e le fanau ona fesoasoani atu i o latou matua e faataunuu o latou tiutetauave.

E tofu aiga uma ma ona lava faigata ma tulaga e uiga ese ai, ae o aiga uma e mafai ona ola i aoaoga a Iesu Keriso ma maua ai le fiafia.

I lau api talaaga mo le suesueina o tusitusiga paia, tusi ai se mea e te talisapaia ai lou tina, lou tama, po o le tagata o loo vaaia oe.

Faitau parakalafa 8-9 o le folafolaga i le aiga, ma vaavaai po o le a le mea o le a tupu pe afai tatou te le faataunuuina o tatou tiutetauave i o tatou aiga.

O se tasi o mataupu faavae o loo aoao mai i nei parakalafa o le o le a faamasinoina i tatou e le Alii pe afai tatou te le faataunuuina o tatou tiutetauave i o tatou aiga. Atonu e te manao e tusi lenei upumoni i luga o lau kopi o le folafolaga.

Mafaufau loloto pe o faapefea ona e faataunuuina ou tiutetauave i lou aiga. Ia manatua e saili le fesoasoani a le Alii a o e galue agai i lau sini, ia lelei atili atu ona e ola i totonu o lou aiga i se tasi o aoaoga a Iesu Keriso.

Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le lesona “O Le Aiga: O Se Folafolaga i le Lalolagi” ma faamaeaina i le (aso).

O fesili, mafaufauga ma manatu faaopoopo ou te fia faasoa atu i lo’u faiaoga: