Iunite 4: Aso 1
Mataupu Faavae ma Feagaiga 8–9
Faatomuaga
Ia Aperila 1829, na amata ai ona fesoasoani Oliva Kaotui i le Perofeta o Iosefa Samita i le faaliliuga o papatusi auro e ala i le avea ma tusiupu. Ona sa ofoina mai e le Alii ia Oliva le meaalofa o le faaliliu pe afai na manao i ai (tagai i le MF&F 6:25), o lea “sa oo ina popole tele ai [Oliva] i le faaeeina atu o le mana faaliliu i ona luga” (Joseph Smith, i le History of the Church, 1:36). O le tali, na fetalai mai le Alii o le a Ia tuuina mai ia Oliva le tomai faaliliu, e tusa ai ma le faatuatua o Oliva.
A’o fai e Oliva se taumafaiga e faaliliu, sa foliga mai sa lelei lava i le amataga, ae “sa le faaauau pea e pei ona [sa ia] amata mai” (MF&F 9:5). Na maua e le Perofeta le faaaliga i le Mataupu Faavae ma Feagaiga 9, lea na faamalamalama mai ai le mafuaaga na le faamanuiaina ai taumafaiga a Oliva e faaliliu. Sa faatonuina e le Alii ia Oliva e lē tatau ia te ia ona toe faaliliu. Nai lo o lena, e tatau ia Oliva ona taulai atu i lana matafaioi o se tusiupu mo Iosefa. O le Mataupu Faavae ma Feagaiga vaega 8–9, faapea ma le vaega 6, o ni faaaliga faavae e faatatau i le Agaga Paia, ma auala e mafai ona tatou saili ai mo le, ma iloa ai faaaliga mai le Alii.
Mataupu Faavae ma Feagaiga 8
Ua aoao e le Alii ia Oliva Kaotui e uiga i le meaalofa o faaaliga
Ua e mafaufau ea pe faapefea ona iloa le taimi e fetalai mai ai le Atua ia te oe pe taliina ai au tatalo?
Faitau le Mataupu Faavae ma Feagaiga 8:1 e vaai ai pe na faapefea ona faatonuina e le Alii ia Oliva Kaotui e tatalo. Ona faitau lea o le Mataupu Faavae ma Feagaiga 8:2–3, ma faailoga fasifuaitau o loo faamatala ai auala na fetalai mai le Alii o le a Ia tali mai ai i tatalo a Oliva. O leMataupu Faavae ma Feagaiga 8:2–3 o se mau tauloto. Atonu e te manao e faailoga i se ala iloagofie ina ia mafai ona e mauaina i le lumanai.
-
Fai ni koluma se lua i lau api talaaga mo le suesueina o tusitusiga paia. Faaigoa le koluma muamua Sailia o Faaaliga mai le Atua. Faaigoa le koluma lona lua Mauaina o Faaaliga mai le Atua. I le koluma muamua, tusi ai pe a ma se tasi se mataupu faavae ua e aoaoina mai le Mataupu Faavae ma Feagaiga 8:1 e uiga i auala e saili ai mo faaaliga. I le koluma lona lua, tusi ai se upumoni na aoao mai e le Alii i fuaiupu e 2–3 e uiga i le auala e fetalai mai ai o Ia ia i tatou.
E te manatua le tala ia Mose na vaeluaina le Sami Ulaula? Na poloaiina e le Alii ia Mose e faasaoloto le fanauga a Isaraelu sa nonofo pologa. Mulimuli ane, faatasi ai ma le tuliloa atu e le autau a Aikupito, na poloka ai Mose ma lona nuu i matafaga o le Sami Ulaula. E tusa ai ma le Mataupu Faavae ma Feagaiga 8:2–3, na faapefea ona musuia e le Alii ia Mose e vaelua le Sami Ulaula?
O se tasi o upumoni tatou te aoao mai i nei fuaiupu o le, e fetalai mai le Alii i o tatou mafaufau ma loto e ala i le mana o le Agaga Paia. Mafaufau e uiga i ni taimi na fetalai mai ai le Alii ia te oe i lenei auala.
I le faamatalaga lenei, o loo faamatalaina ai e Peresitene Boyd K. Packer, Peresitene o le Korama a Aposetolo e Toasefululua, ma Elder Richard G. Scott, o le Korama a Aposetolo e Toasefululua, le auala na fetalai mai ai le Alii ia te i la’ua.
Na saunoa Peresitene Packer:
“E mafai ona e aoao i le taimi nei, i lou talavou, ina ia taitaiina e le Agaga Paia.
“O le avea ai ma se Aposetolo, o loo o’u faalogo i le taimi lenei i le musumusuga lava lea e tasi, e sau mai i le punavai lava lea e tasi, i le ala lava lea e tasi, na ou faalogo i ai a’o ou tamaitiiti. Ua sili atu le manino o faailo i le taimi nei” (Prayers and Answers,” Ensign, Nov. 1979, 21).
Na aoao mai Elder Scott:
“O se lagona e sau i le mafaufau e ese le maoti.
“E mafai ona faalogoina pe lagonaina pe tusia ni upu auiliili, e pei lava na faamalau mai ni faatonuga.
“O se fesootaiga i le loto o se uunaiga ua sili ona masani ai. E masani ona amata e le Alii i le tuuina mai o lagona. Soo se mea e i ai se faailoaga o lo latou taua ma usitaia ai, e faapea ona maua ai e se tagata le avanoa sili atu e maua ai ni faatonuga sili atu ona manino i le mafaufau. O se lagona i le loto, pe a mulimuli i ai, e faamalosia i se faatonuga e sili atu le maoti i le mafaufau” (“Helping Others to Be Spiritually Led” [o le saunoaga i faiaoga o aoaoga faalelotu a le Ofisa o Aoga a le Ekalesia, 11 Aok., 1998], 3–4; si.lds.org).
Mau Tauloto—Mataupu Faavae ma Feagaiga 8:2-3
Ina ia fesoasoani ia e manatua le auala o le a fetalai mai ai le Alii i lou mafaufau ma lou loto, tusi le fuaitau o loo i le Mataupu Faavae ma Feagaiga 8:2–3 i se kata po o se pepa. Galue i le taulotoina o fuaiupu nei e ala i le taulotoina o le fuaitau i taeao ma afiafi taitasi a’o le’i faia au tatalo faaletagata lava ia. O le taimi lava e te taulotoina ai, atonu e te manao e faasoa atu i se uo po o se tagata o le aiga, ma faamatala atu i ai lona uiga ia te oe.
-
Mataupu Faavae ma Feagaiga 9
Na faamatala mai e le Alii le mafuaaga na faafaigata ai ia Oliva Kaotui ona faaliliu
O a ni isi o faaiuga taua o le a faia i le tausaga a sau? I le isi 5 po o le 10 tausaga? Mafaufau loloto pe aisea e te ono manaomia ai le taitaiga mai le Alii i le faia o nei faaiuga taua.
I le Mataupu Faavae ma Feagaiga 9, o loo faamalamalama mai ai e le Alii le mafuaaga na faafaigata ai ia Oliva Kaotui ona faaliliu papatusi. E mafai ona fesoasoani le faamalamalamaga a le Alii e te malamalama ai i le auala e saili ma maua ai le taitaiga mo faaiuga o le a e faia i lou olaga.
Faitau le Mataupu Faavae ma Feagaiga 9:1–4, ma vaavaai mo le galuega na faatonu e le Alii ia Oliva e taulai atu i ai nai lo o le faaliliu. Ona faitau lea o le Mataupu Faavae ma Feagaiga 9:5–6, 11, ma faailoga mafuaaga na le faamanuiaina ai Oliva i le taimi sa taumafai ai e faaliliu.
Na saunoa Peresitene Iosefa Filitia Samita: “Na oo mai le toilalo o Oliva, ona sa le’i faaauau pea o ia e pei ona fautuaina ai, ma o le galuega e faigata tele, o lea na aluese ai lona faatuatua” (Church History and Modern Revelation, 2 vols. [1953], 1:51).
O le a se mea e mafai ona tatou aoao mai i le aafiaga a Oliva Kaotui e uiga i le mea e tatau ona tatou faia e maua ai faaaliga mai le Alii? O a nisi o auala e mafai ai e le mata’u, po o le leai o se faatuatua, ona taofia i tatou mai le mauaina po o le galulue i faaaliga mai le Alii?
Sa faamalamalama mai e Elder Jeffrey R. Holland o le Korama a Aposetolo e Toasefululua:
“I le faagasologa o faaaliga ma le faia o faaiuga taua, o le fefe e i ai sona sao faataumaoi, o nisi taimi e taotaomia ai. Ia Oliva Kaotui, o le na misia le avanoa e na o le tasi le taimi e oo mai ai ona na te le’i faaaogaina le avanoa ina ua ia mauaina, sa fetalai mai le Alii, ‘Sa e lē faaauau pea e pei ona sa e amata mai.’ Pe le o se faaupuga masani ea lea ia i latou o e ua faatonuina ae ua fati ona o le faaluafesasi ma le toe tepa i tua i masalosaloga? …
“… A uma ona e mauaina le savali, a uma ona e totogia le tau e lagona ai Lona alofa ma faalogo i le afioga a le Atua, ia agai loa i luma. Aua le fefe, aua le faatautu, aua le taulai atu i mea e faaletaua, aua le faitio. … Faatasi ai ma le agaga o faaaliga, aveese lou fefe, ae agai loa i luma ma le talitonu mausali” (“Cast Not Away Therefore Your Confidence,” Ensign, Mar. 2000, 10).
Mafaufau i se taimi na e manaomia ai e faaaoga le faatuatua e saili ai mo se, po o le galue i se tali mai le Alii. O le a se mea e mafai ona e faia i le sailia o se tali?
Faitau le Mataupu Faavae ma Feagaiga 9:7–8, e vaavaai ai mo le isi mafuaaga na faafaigata ai ia Oliva ona maua le fesoasoani a le Alii i ana taumafaiga e faaliliu. O le a sou manatu i le uiga o le “suesue i ai i lou mafaufau”?
O se tasi o lesona e mafai ona tatou aoaoina mai i nei fuaiupu, o le mauaina ma le iloaina o faaaliga e manaomia ai taumafaiga i la tatou vaega. Atonu e te manao e faaopoopo atu lenei upumoni i le lisi o auala e saili ai faaaliga mai le Alii, lea sa e faia i lau api talaaga mo le suesueina o tusitusiga paia mo le galuega e fai 1. Ia manatua e tatau ona tatou fesili atu i le Alii pe o sa’o a tatou faaiuga i le maea ai o le faagasologa o le iloiloina o a tatou faaiuga.
-
Mafaufau loloto pe ono mafai faapefea ona faaaoga e tagata taitoatasi o loo ta’ua i lalo ia upumoni o loo i le Mataupu Faavae ma Feagaiga 9:7–8 e maua ai faaaliga e faatatau i o latou tulaga.
-
E le o mautinoa e se alii talavou pe e tatau ona alu i le kolisi, po o le su’e o se galuega ma aoao se tomai.
-
O loo taumafai se tamaitai talavou e filifili pe faapefea ona aluese mai ana uo o e e le lelei o latou faatosinaga ia te ia.
-
O loo mafaufau se faifeautalai talavou ua maea lana misiona e faaipoipo, ma o loo mafaufau po o se tagata faapitoa, o se paaga talafeagai lea e faaipoipo i ai.
Faitau le Mataupu Faavae ma Feagaiga 9:8–9, ma vaavaai pe e mafai faapefea ona iloa e Oliva Kaotui na sa’o pe sese lana faaiuga. O le a se mea e mafai ona tatou aoao mai i le fuaiupu 8, e uiga i le auala o le a tali mai ai le Alii ia i tatou, pe a tatou ole atu pe o sa’o se faaiuga o loo tatou faia?
O le mu o le loto i totonu lea na folafolaina mai ia Oliva Kaotui, ua na o le tasi lea o auala atonu e faamautu mai ai e le Agaga Paia se filifiliga sa’o. O faamautuuga mai le Agaga e mafai ona oo mai i le tele o auala patino ma o’oo’o.
Na saunoa Elder Richard G. Scott e uiga i se auala atonu e faaosofia ai e le Alii i tatou ia “lagona ai ua sao” (MF&F 9:8): “O le lagona o le toafilemu o le molimau masani faamautu lea ua ou iloaina. Pe a oo ina ou matua popole lava e uiga i se mataupu taua, ma tauivi e foia e aunoa ma le faamanuiaina, ou te faaauau pea lava na taumafaiga i le faatuatua. Mulimuli ane, ona oo mai lea o se toafilemu e faatumulia ai au, ma foia o’u atugaluga, e pei lava ona sa Ia folafola mai” (“Faaaogaina o le Meaalofa Faalelagi o le Tatalo,” Ensign po o le Liahona, Me 2007, 10).
Na faamatala mai foi e Elder Scott le auala na ia lagonaina ai o lana faaiuga e le sa’o: “Ia te a’u, o lena [pogisa o le mafaufau], o se lagona le mautonu, ma le manuia” (“Faaaogaina o le Meaalofa Faalelagi o le Tatalo,” 10).
Atonu e te manao e tusi le faamatalaga lona lua a Elder Scott i le pito o au tusitusiga paia i talaane o le Mataupu Faavae ma Feagaiga 9:9 po o totonu o lau api talaaga mo le suesueina o tusitusiga paia.
I le Mataupu Faavae ma Feagaiga 9:10–14, na faamautinoa mai ai e le Alii ia Oliva, na te le’i tausalaina o ia ona o lona toilalo e faaliliu. Sa faatonuina e le Alii ia Oliva ia faaauau pea ona tusitusi mo le Perofeta ma “tu mausali i le galuega,” na valaauina ai e le Alii ia Oliva e fai (MF&F 9:14). Na folafola mai e le Alii ia Oliva, o le faaauau pea i le filiga ma le usiusitai, o le a aumaia ai le ola e faavavau.
-
-
Ua ou suesueina le Mataupu Faavae ma Feagaiga 8–9 ma faamaeaina le lesona lenei i le (aso).
O fesili, mafaufauga, ma manatu faaopoopo ou te fia faasoa atu i lou faiaoga: